𑐩𑐖𑐶𑐥𑐵𑑅 𑐮𑐵𑐏𑐾𑐫𑐵 𑐧𑐵𑐏𑑄

 

 

𑐣𑐾𑐰𑐵𑑅 𑐧𑐳𑑂𑐟𑐷 𑐡𑐸𑐐𑐸 𑐮𑐵𑐐𑐵𑐫𑑂 𑐫𑐾𑑃𑐫𑑂 𑐖𑐎 𑐩𑐏𑐸 𑐫𑐾𑑃𑐣𑑄 𑐥𑐶𑐣𑐾 𑐣𑑄 𑐫𑐎𑑂𑐰 𑐠𑐵𑐳𑐫𑑂 𑐠𑐷𑐠𑐷 𑐖𑐵𑐟𑑂𑐬𑐵, 𑐣𑐏𑑅𑐔𑐏𑑅𑐫𑐵 𑐂𑐮𑐫𑑂 𑐠𑐷𑐠𑐷 𑐮𑐵𑐏𑐾 𑐥𑐶𑐴𑐵𑑄 𑐰𑐂𑐐𑐸 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐫𑐾𑑃𑐫𑐵𑑅 𑐖𑐵𑐟𑑂𑐬𑐵 𑐳𑐸𑐬𑐸 𑐖𑐸𑐂 𑐣𑑂𑐴𑑂𑐫𑑅 𑐨𑐵𑐡𑑂𑐬 𑐡𑑂𑐰𑐵𑐡𑐱𑐷𑐎𑐸𑐣𑑂𑐴𑐸 𑐫𑑅𑐳𑐶𑑄 𑐠𑐣𑐾𑐢𑐸𑑄𑐎𑐵𑑅 𑐣𑐶𑐳𑐾𑑄 𑐔𑑂𑐫𑐵𑐣𑑂𑐴𑐸 𑐟𑐎 𑐩𑐖𑐶𑐥𑐵𑑅 𑐟𑑂𑐰𑐵𑐮𑑄 𑐮𑐵𑐏𑐾 𑐥𑐶𑐴𑐵𑑄𑐰𑐂 𑑋 𑐴𑑂𑐫𑐵𑐄𑑃𑐐𑐸 𑐰𑐬𑑂𑐞𑐫𑐵, 𑐟𑐵𑐟𑐵𑐴𑐵𑐎𑑅𑐐𑐸 𑐳𑑃, 𑐢𑑄𑐰𑐵 𑐣𑐶𑐥𑐸 𑐥𑐶𑐴𑐵𑑄 𑐰𑑅𑐩𑑂𑐴 𑐐𑑂𑐫𑐵𑐣𑐵𑐥𑐸𑐳𑐾 𑐔𑑂𑐰𑑄𑐩𑑂𑐴 𑐮𑐵𑐏𑐾 (𑐬𑐵𑐎𑑂𑐲𑐳) 𑐥𑑂𑐬𑐎𑐺𑐟𑐶𑐫𑐵𑐩𑑂𑐴 𑐖𑐹𑐳𑐵𑑄 𑐠𑑂𑐰 𑐮𑐵𑐏𑐾𑐫𑐵 𑐥𑑂𑐬𑐰𑐺𑐟𑐶 𑐢𑐵𑑅𑐳𑐵 𑐩𑐣𑐹𑐟𑐫𑑂𑐟 𑐴𑐵𑐣𑐷 𑐣𑑀𑐎𑑂𑐳𑐵𑐣𑐷 𑐫𑐵𑐫𑐾𑐐𑐸 𑐩𑐏𑐸𑐎𑐶 𑐀𑑅𑐏𑐧𑐟𑑄 𑐩𑐣𑐹𑐟𑐫𑑂𑐟 𑐐𑑂𑐰𑐵𑐴𑐵𑐮𑐶 𑐰 𑐬𑐎𑑂𑐲𑐵 𑐫𑐵𑐫𑐾𑐐𑐸 𑐏𑑅 𑑋

𑐀𑐠𑐾 𑐴𑐾 𑐥𑑂𑐫𑐵𑐏𑑄 𑐮𑑂𑐴𑐸𑐫𑐵𑑅 𑐩𑐳𑑂𑐟𑐫𑑂𑐟 𑐣𑑂𑐴𑑂𑐫𑐂𑐥𑐸𑐎𑐵 𑐧𑐷𑐩𑑂𑐴 𑐖𑐹𑐐𑐸𑐮𑐶𑑄 𑐮𑐵𑐏𑐾𑐫𑐵𑐟 𑐱𑐵𑐣𑑂𑐟 𑐨𑐿𑐬𑐧 𑐣𑑄 𑐢𑐵𑐫𑐾𑐐𑐸 𑐫𑐵𑑅 𑑋 𑐫𑐾𑑃𑐫𑐵 𑐖𑐵𑐟𑑂𑐬𑐵𑐧𑐮𑐫𑑂 𑐎𑐸𑐩𑐵𑐬𑐷 𑐩𑐵𑐖𑐸𑐫𑐵𑐟 𑐮𑑄 𑐎𑑂𑐫𑐣𑐾𑐟 𑐰 𑐬𑐎𑑂𑐲𑐵𑐬𑑂𑐠 𑐬𑐠𑐫𑐵 𑐣𑑂𑐴𑑂𑐫𑑅 𑐣𑑂𑐴𑑂𑐫𑑅 𑐰𑐣𑐷𑐩𑑂𑐴 𑐠𑑂𑐰 𑐮𑐵𑐏𑐾 𑐖𑐵𑐟𑑂𑐬𑐵𑐫𑐵 𑐕𑐩𑑂𑐴 𑐁𑐎𑐬𑑂𑐲𑐎 𑐥𑐵𑐟𑑂𑐬 𑐣𑑄 𑐏𑑅 𑑋 𑐩𑐖𑐶𑐥𑐵𑑅𑐫𑐵 𑐬𑑄𑐖𑐶𑐟𑐎𑐵𑐬 (𑐕𑐶𑐥𑐵) 𑐟𑐫𑑂𑐳𑑄 𑐖𑐎 𑐩𑐖𑐶𑐥𑐵𑑅 𑐮𑐵𑐏𑐾 𑐥𑐶𑐎𑐵𑐫𑐾𑐐𑐸 𑐫𑐵𑐂 𑑋

𑐮𑐵𑐏𑐾 𑐥𑑂𑐫𑐵𑐏𑑄 𑐴𑐸𑐮𑐷𑐩𑑂𑐴𑐾𑐳𑑂𑐫𑐵𑑄 𑐣𑐶𑐱𑑂𑐔𑐶𑐟 𑐧𑐵𑐖𑑄 𑐰 𑐟𑐵𑐮𑐫𑑂 𑐗𑑂𑐫𑐵𑐮𑐶𑑄𑐔𑐵 𑐖𑑂𑐰𑐣𑐾𑐟 𑐰𑐶𑐱𑐾𑐲 𑐎𑐶𑐳𑐶𑐩𑑄 𑐠𑑅𑐐𑐸 𑐥𑑂𑐬𑐟𑐶𑐨𑐵 𑐎𑑂𑐫𑐣𑐾𑐐𑐸 𑐫𑐵𑐂 𑑋 𑐮𑐵𑐏𑐾 𑐖𑐸𑐂𑐟 𑐠𑐷𑐠𑐷 𑐣𑐶𑐫𑐩 𑐡𑐸𑐣𑐾 𑐔𑑂𑐰𑐣𑐵𑑅 𑐥𑐸𑐖𑐵 𑐫𑐵𑐣𑐵𑑅 𑐖𑐸𑐂𑐩𑐵𑑅 𑑋 𑐮𑐵𑐏𑐾 𑐖𑐸𑐂𑐟 𑐂𑐔𑑂𑐕𑐵 𑐖𑐎 𑐡𑐫𑐵𑑄 𑐩𑐐𑐵𑑅, 𑐢𑐿𑐬𑑂𑐫, 𑐱𑐎𑑂𑐟𑐶, 𑐳𑐴𑐣𑐱𑐷𑐮𑐟𑐵 𑐰 𑐄𑐬𑑂𑐖𑐵 𑐣𑑄 𑐩𑐡𑐫𑐾𑐎𑑄 𑐩𑐐𑐵𑑅 𑑋 𑐮𑐵𑐏𑐾 𑐥𑑂𑐫𑐵𑐏𑑄 𑐴𑐸𑐮𑐷𑐧𑐮𑐫𑑂 𑐮𑐵𑐏𑐾 𑐏𑑂𑐰𑐵𑑅𑐥𑐵𑑅, 𑐖𑐵𑐩𑐵, 𑐑𑑄𑐑𑐮𑐵 𑐡𑐎𑑂𑐎𑑄 𑐫𑐵𑐣𑐵𑑅 𑑔𑑐 𑐎𑐶𑐮𑑀𑑄 𑐩𑐮𑑂𑐫𑐵𑐎 𑐎𑑂𑐰𑐧𑐸𑐂𑐩𑐵𑑅 𑑋

𑐄𑐥𑐵𑐎𑐸 𑐰𑐣𑐾𑐐𑐸 𑐂𑐮𑐫𑑂, 𑐎𑐸𑐩𑐵𑐬𑐷 𑐩𑐵𑐖𑐸𑐫𑐵 𑐬𑐠 𑐳𑐵𑐮𑐷𑐐𑐸 𑐬𑐸𑐚𑐫𑑂 𑐐𑐶𑐚𑐷, 𑐀𑐥𑑂𑐥𑐵, 𑐣𑐎𑐶𑑄, 𑐏𑐵 𑐚𑐸𑐎𑑂𑐬𑐵 𑐡𑐫𑐵𑐔𑑂𑐰𑐣𑐷𑐐𑐸 𑐮𑑃𑐫𑑂 𑐮𑐵𑐎𑐵𑑄 𑐩𑐣𑑂𑐴𑑂𑐫𑐵𑐳𑐾 𑐖𑐸𑐂𑐩𑐵𑑅, 𑐐𑐸𑐎𑐶𑑄 𑐫𑐵𑐣𑐵𑑅 𑐟𑐸𑐟𑐶𑐂 𑐑𑐵𑑅 𑐮𑐵𑐂𑐐𑐸 𑐖𑐸𑐂 𑑋 𑐟𑐬 𑐮𑐵𑐏𑐾 𑐖𑐹𑐩𑑂𑐴𑐾𑐳𑑂𑐫𑐵𑑄 𑐮𑐵𑐏𑐾𑐁𑐖𑐸𑐫𑐵 𑐱𑐎𑑂𑐟𑐶𑐫𑐵 𑐥𑑂𑐬𑐨𑐵𑐰𑑄 𑐕𑐸 𑐴𑐾 𑐔𑐵𑐂𑐩𑐏𑐸 𑑋 𑐮𑐵𑐏𑐾 𑐐𑐠𑐾 𑐫𑐵𑐣𑐵𑑅 𑐡𑐾𑐱𑐫𑑂 𑐡𑐸𑐴𑐵𑑄 𑐰𑐮 𑐢𑐫𑐵𑐐𑐸 𑐰𑐶𑐲𑐫𑐫𑑂 𑐱𑑂𑐬𑐷 𑐮𑐵𑐏𑐾 𑐁𑐖𑐸 𑐖𑐵𑐟𑑂𑐬𑐵 𑐰𑑂𑐫𑐰𑐳𑑂𑐠𑐵𑐥𑐣 𑐳𑐩𑐵𑐖𑐫𑐵 𑐳𑐔𑐶𑐰 𑐬𑐵𑐩 𑐬𑑄𑐖𑐶𑐟𑑄 𑐧𑑅𑐔𑐵𑐴𑐵𑐎𑐮𑑄 𑐥𑐸𑐮𑐵𑑄𑐐𑐸 𑐧𑐵𑐏𑑄 𑐠𑐠𑐾 𑐎𑐣𑐵𑐡𑐶𑐮– ‘𑐣𑑂𑐴𑐵𑐥𑐵 𑐥𑐬𑐵𑐥𑐹𑐬𑑂𑐰𑐎𑐵𑐮𑐫𑑂 𑐫𑐾𑑃 𑐡𑐾𑐱𑐫𑑂 𑐟𑑅𑐡𑑃 𑐟𑐎 𑐰𑐵 𑐩𑐰𑐫𑐵𑑅 𑐀𑐣𑐶𑐎𑐵𑐮 𑐖𑐸𑐮, 𑐠𑐣𑐫𑐵𑐥𑐶𑑄 𑐖𑐣𑐟𑐵𑐫𑐵𑐟 𑐫𑐎𑑂𑐰 𑐡𑐸𑑅𑐏 𑐎𑐲𑑂𑐚 𑐖𑐸𑐮 𑑋

𑐖𑐣𑐟𑐵 𑐳𑐎𑐮𑐾𑑄 𑐖𑐸𑐖𑐸𑐫𑐵𑐠𑐵𑐫𑑂 𑐰𑐣𑐵𑑅 𑐡𑐸𑑅𑐏 𑐎𑐲𑑂𑐚𑑄 𑐩𑐸𑐎𑑂𑐟 𑐫𑐵𑐫𑐾𑐟 𑐧𑐶𑐣𑑂𑐟𑐶 𑐫𑐵𑑅𑐰𑐣 𑑋 𑐖𑐸𑐖𑐸𑑄 𑐟𑐵𑐣𑑂𑐟𑑂𑐬𑐶𑐎 𑐐𑐸𑐬𑐸𑐖𑐸𑐥𑐶𑑄𑐟 𑐳𑑅𑐟𑐵𑑅 𑐐𑐠𑐾 𑐫𑐵𑐣𑐵𑑅 𑐡𑐾𑐱𑐫𑑂 𑐰𑐬𑑂𑐲𑐵 𑐩𑐖𑐹𑐐𑐸 𑐢𑐎𑐵𑑅 𑐣𑑂𑐫𑐣𑐾𑐎𑐣𑐾 𑐫𑐵𑐟 𑑋 𑐟𑐵𑐣𑑂𑐟𑑂𑐬𑐶𑐎 𑐐𑐸𑐬𑐸𑐖𑐸𑐥𑐶𑑄𑐳𑑄 𑐳𑐶𑐡𑑂𑐢𑐷 𑐰 𑐳𑐵𑐢𑐣𑐵 𑐫𑐵𑐣𑐵 𑐳𑑂𑐰𑐫𑐵𑑅 𑐡𑐾𑐱𑐫𑑂 𑐰𑐬𑑂𑐲𑐵 𑐖𑐸𑐂𑐎𑐾𑐐𑐸 𑐣𑐶𑐟𑐶𑑄 𑐱𑑂𑐬𑐷 𑐟𑐮𑐾𑐖𑐸 𑐨𑐰𑐵𑐣𑐷𑐫𑐵𑐟 𑐳𑑅𑐟𑐵𑑅 𑐠𑐣 𑐴𑐮𑐎𑐶 𑐰𑐬𑑂𑐲𑐵 𑐣𑑄 𑐖𑐸𑐂, 𑐡𑐾𑐱𑐫𑑂 𑐫𑐎𑑂𑐰 𑐧𑐵𑑄𑐮𑐵𑐂 𑐢𑐎𑐵𑑅 𑐖𑐸𑐖𑐸𑐫𑐵𑐟 𑐧𑐶𑐣𑑂𑐟𑐶 𑐫𑐵𑐟 𑑋

𑐟𑐟𑑂𑐥𑐱𑑂𑐔𑐵𑐟 𑐖𑐸𑐖𑐸 𑐟𑐵𑐣𑑂𑐟𑑂𑐬𑐶𑐎 𑐐𑐸𑐬𑐸𑐖𑐸𑐥𑐶𑑄 𑐰 𑐳𑑂𑐠𑐵𑐣𑐷𑐫 𑐖𑐣𑐟𑐵 𑐩𑐸𑐣𑐵𑑅 𑐕𑐐𑐹 𑐥𑐸𑐔𑑅 𑐡𑐫𑐾𑐎𑐵𑑅 𑐱𑑂𑐬𑐷 𑐟𑐮𑐾𑐖𑐸 𑐨𑐰𑐵𑐣𑐷𑐫𑐵𑐟 𑐴𑐫𑐾𑐐𑐸 𑐮𑐵𑐐𑐶 𑐄𑐖𑑄 𑐧𑐶𑐮 𑑋 𑐐𑐸𑐬𑐸𑐖𑐸𑐥𑐶𑐣𑐶 𑐥𑐸𑐔𑑅 𑐟𑐮𑐾𑐖𑐸 𑐨𑐰𑐵𑐣𑐷 𑐩𑐵𑐟𑐵𑐫𑐵𑐟 𑐴𑐫𑐾𑐐𑐸 𑐮𑐵𑐐𑐶 𑐩𑐴𑐶𑐣𑑁𑑄 𑐩𑐴𑐶𑐣𑐵, 𑐖𑑄𑐐𑐮, 𑐥𑐴𑐵𑐜, 𑐏𑐸𑐳𑐶𑐫𑐵 𑐮𑑃 𑐕𑐶𑐣𑐵𑑅 𑐟𑑅𑐟𑑅𑐖𑐵𑑅𑐐𑐸 𑐥𑐴𑐵𑐜 𑐡𑐸𑐐𑐸 𑐠𑐵𑐳𑐫𑑂 𑐠𑑂𑐫𑐣 𑑋 𑐀𑐣 𑐐𑐸𑐦𑐵 𑐏𑐣𑐾𑐡𑐟 𑑋 𑐐𑐸𑐦𑐵𑐫𑐵 𑐥𑑂𑐬𑐰𑐾𑐱𑐡𑑂𑐰𑐵𑐬 𑐥𑐶𑐣𑐾 𑐟𑐳𑐎𑑄 𑐟𑐟𑑅𑐳𑐮𑑄 𑐴𑐵𑐮𑐵𑐔𑑂𑐰𑑄𑐐𑐸 𑐳𑑅 𑐰𑐮 𑑋

𑐡𑐸𑐣𑐾 𑐳𑑂𑐰𑑅𑐧𑐮𑐫𑑂 𑐐𑐸𑐬𑐸𑐖𑐸𑐥𑐶𑐣𑐶 𑐥𑐸𑐔𑑅 𑐠𑐵𑐬𑐵𑐣𑑂𑐴𑐸𑐮 𑑋 𑐡𑐸𑐣𑐾 𑐮𑐵 𑐬𑐵𑐎𑑂𑐲𑐳𑐟𑐫𑑂𑐐𑐸 𑐧𑐳𑑂𑐟𑐷 𑐡𑐸𑐐𑐸𑐸 𑐮𑐵𑐣𑐵𑐔𑑂𑐰𑐣 𑑋 𑐬𑐵𑐎𑑂𑐲𑐳𑐟𑐫𑑂𑐳 𑐥𑐱𑐸𑐟 𑐣𑐫𑐵𑐔𑑂𑐰𑑄𑐐𑐸, 𑐡𑑂𑐫𑐣𑐵 𑐔𑑂𑐰𑑄𑐐𑐸, 𑐎𑐸𑐳𑑂𑐟𑐷 𑐩𑑂𑐴𑐶𑐟𑐵𑐔𑑂𑐰𑑄𑐐𑐸, 𑐠𑑅𑐠𑑅𑐐𑐸 𑐟𑐵𑐮𑐫𑑂 𑐩𑐳𑑂𑐟𑐶 𑐫𑐵𑐣𑐵𑐔𑑂𑐰𑑄𑐐𑐸 𑐏𑐣𑐾𑐰𑑄 𑐥𑐸𑐔𑑅𑐫𑐵𑐥𑐶𑑄 𑐩𑐣𑐹𑐟 𑐧𑐶𑐳𑐶𑐄𑑃 𑐰𑐣𑐾𑐟 𑐳𑑂𑐰𑐮 𑑋 𑐟𑐬 𑐟𑐵𑐣𑑂𑐟𑑂𑐬𑐶𑐎 𑐐𑐸𑐬𑐸𑐖𑐸𑐥𑐶𑑄𑐳𑑄 𑐐𑑂𑐫𑐵𑐫𑐾 𑐩𑑂𑐰𑐵𑑅 𑐢𑐎𑐵𑑅 𑐴𑑁𑐳𑐮𑐵 𑐧𑐶𑐫𑐵𑑅 𑐟𑐵𑐣𑑂𑐟𑑂𑐬𑐶𑐎 𑐐𑐸𑐬𑐸𑐖𑐸𑐥𑐶𑑄𑐳 𑐩𑐣𑑂𑐟𑑂𑐬𑐳𑐶𑐡𑑂𑐢𑐶 𑐫𑐵𑐣𑐵𑑅 𑐐𑐸𑐦𑐵 𑐡𑐸𑐣𑐾 𑐖𑐵𑐎𑐶𑑄 𑐎𑐫𑐾𑐎𑐵𑐕𑑂𑐰𑐮 𑑋

𑐕𑐸𑑄 𑐃 𑐮𑐶𑐥𑐵 𑐡𑐎𑑂𑐰 𑐬𑐵𑐎𑑂𑐲𑐳𑐟 𑐩𑐳𑑂𑐟 𑐣𑑂𑐴𑑂𑐫𑑅 𑐰𑐫𑐾𑐎𑐵𑑅 𑐀𑐔𑐾𑐟 𑐖𑐸𑐮 𑑋 𑐀𑐮𑐾 𑐄𑐐𑐸 𑐥𑐸𑐔𑑅 𑐐𑐸𑐦𑐵 𑐡𑐸𑐣𑐾 𑐡𑐸𑐴𑐵𑑄 𑐰𑐣𑐵𑑅 𑐳𑑂𑐰𑑅𑐐𑐸 𑐂𑐮𑐫𑑂 𑐕𑐠𑐵𑐫𑑂 𑐟𑐳𑐎𑑄 𑐖𑐮𑑂𑐮 𑐠𑐷𑐐𑐸 𑐠𑐵𑐳𑐫𑑂 𑐠𑑂𑐫𑐣 𑑋 𑐀𑐣 𑐱𑑂𑐬𑐷 𑐟𑐮𑐾𑐖𑐸 𑐨𑐰𑐵𑐣𑐷𑑄 𑐁𑐳𑐣 𑐫𑐵𑐣𑐵𑐧𑐶𑐖𑑂𑐫𑐵𑐣𑐵 𑐔𑑂𑐰𑑄𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐐𑐸𑐬𑐸𑐖𑐸𑐥𑐶𑑄𑐳𑑄 𑐰𑐳𑐥𑑀𑐮𑐫𑐵𑐟 𑐧𑐶𑐣𑑂𑐟𑐶 𑐫𑐵𑐣𑐵𑑅 𑐡𑐎𑑂𑐰 𑐏𑑃 𑐧𑐾𑐮𑐶𑐧𑐶𑐳𑑂𑐟𑐵𑐬𑑄 𑐎𑐣 𑑋 𑐟𑐮𑐾𑐖𑐸 𑐨𑐰𑐵𑐣𑐷𑑄 ‘𑐖𑐶 𑐰𑐫𑐾 𑐩𑐖𑐶𑐄, 𑐟𑐬 𑐖𑐶𑐐𑐸 𑐥𑑂𑐬𑐟𑐶𑐎 𑐖𑐶𑐐𑐸 𑐏𑐜𑑂𑐐 𑐖𑑂𑐰𑐣𑐵 𑐴𑐸𑑃, 𑐠𑑂𑐰𑐫𑐵𑑄 𑐮𑐶𑐥𑐵 𑐡𑐾𑐱𑐫𑑂 𑐖𑐹𑐐𑐸 𑐡𑐎𑑂𑐰 𑐡𑐸𑑅𑐏 𑐎𑐲𑑂𑐚 𑐔𑐶𑐮𑐵 𑐰𑐣𑐷’ 𑐢𑐎𑐵𑑅 𑐄𑐖𑑄 𑐧𑐶𑐫𑐵𑐧𑐶𑐖𑑂𑐫𑐵𑐟 𑑋

𑐄𑐐𑐸 𑐥𑐸𑐔𑐮𑑄 𑐡𑐾𑐱𑐫𑑂 𑐮𑐶𑐴𑐵𑑄 𑐰𑐣𑐾𑐟 𑐖𑑄𑐐𑐮, 𑐥𑐴𑐵𑐜, 𑐏𑐸𑐳𑐶𑐫𑐵 𑐮𑑃𑐫𑑂 𑐖𑑄𑐐𑐮𑐷 𑐖𑐣𑐵𑐰𑐬𑐟𑐫𑑂𑐐𑐸 𑐟𑑂𑐬𑐵𑐳 𑐡𑐸𑐐𑐸 𑐏𑑃 𑐎𑐣 𑑋 𑐱𑑂𑐬𑐷 𑐟𑐮𑐾𑐖𑐸 𑐨𑐰𑐵𑐣𑐷𑑄 𑐟𑑅𑐢𑐶𑐩𑑂𑐴, 𑐐𑑂𑐫𑐵𑐣𑐵𑐥𑐸𑐳𑐾 𑐔𑑂𑐰𑑄𑐩𑑂𑐴 𑐬𑐵𑐎𑑂𑐲𑐳𑐫𑐵𑐟 𑐳𑑅𑐟𑐵𑑅 𑐄𑐐𑐸 𑐥𑐸𑐔𑑅𑐫𑐵𑐟 𑐳𑐸𑐬𑐎𑑂𑐲𑐶𑐟 𑐎𑐠𑑄 𑐡𑐾𑐱𑐫𑑂 𑐟𑑂𑐰𑑅𑐟𑐵 𑐰𑐫𑐾𑐟 𑐄𑐖𑑄 𑐧𑐶𑐮 𑑋 𑐟𑐬 𑐄𑐐𑐸 𑐥𑐸𑐔𑑅 𑐗𑐣𑑂 𑐐𑑂𑐫𑐵𑐣𑐵𑑅 𑐟𑐮𑐾𑐖𑐸 𑐨𑐰𑐵𑐣𑐷𑐫𑐵𑐟 𑐧𑐶𑐣𑑂𑐟𑐶 𑐫𑐵𑐟, ‘𑐠𑑂𑐰 𑐬𑐵𑐎𑑂𑐲𑐳𑑄 𑐮𑑃𑐫𑑂 𑐖𑐶𑐩𑐶𑐟 𑐳𑑂𑐫𑐵𑐣𑐵𑑅 𑐣𑐫𑐵𑐧𑐷, 𑐠𑑂𑐰 𑐮𑐵 𑐗𑐣 𑐐𑑂𑐫𑐵𑐣𑐵𑐥𑐸’ 𑐢𑐵𑐮 𑑋

𑐟𑐮𑐾𑐖𑐸 𑐨𑐰𑐵𑐣𑐷𑑄 ‘𑐐𑑂𑐫𑐵𑐫𑐾 𑐩𑑂𑐰𑐵𑑅, 𑐠𑑂𑐰 𑐬𑐵𑐎𑑂𑐲𑐳 𑐖𑐶𑐐𑐸 𑐬𑐎𑑂𑐲𑐵 𑐫𑐵𑐂𑐩𑑂𑐴 𑐬𑐎𑑂𑐲𑐎 𑐏𑑅 𑑋 𑐰𑑄 𑐕𑐸𑑄 𑐴𑐵𑐣𑐷 𑐣𑑀𑐎𑑂𑐳𑐵𑐣𑐷 𑐫𑐵𑐂𑐩𑐏𑐸’ 𑐢𑐵𑐳𑐾𑑄 𑐢𑐸𑐎𑑂𑐎 𑐖𑐸𑐫𑐵𑑅 𑐰𑐣𑐾𑐟 𑐄𑐖𑑄 𑐧𑐶𑐮 𑑋 𑐬𑐵𑐎𑑂𑐲𑐳 𑐣𑐵𑐥𑑄 𑐟𑐸𑑄 𑐥𑐸𑐔𑑅 𑐫𑐾𑑃 𑐡𑐾𑐱𑐫𑑂 𑐮𑐶𑐴𑐵𑑄 𑐰𑐮 𑑋𑐠𑐵𑐫𑑂𑐠𑐵𑐳𑐫𑑂 𑐬𑐵𑐎𑑂𑐲𑐳𑑄 𑐣𑑂𑐴𑑂𑐫𑐂𑐥𑐸𑐎 𑐠𑑅𑐐𑐸 𑐴𑐾 𑐟𑐵𑐮𑑄 𑐥𑑂𑐫𑐵𑐏𑑄 𑐴𑐸𑐮𑐵𑑅 𑐳𑐸𑐬𑐎𑑂𑐲𑐶𑐟 𑐎𑐠𑑄 𑐫𑐾𑑃 𑐡𑐾𑐫𑑂𑐫𑐵 𑐳𑐶𑐩𑐵𑐣𑐵𑐫𑑂 𑐠𑑂𑐫𑑄𑐎𑐵𑐧𑐶𑐮 𑑋 𑐬𑐵𑐎𑑂𑐲𑐳𑐫𑐵𑐟 ‘𑐕 𑐠𑐣 𑐴𑐾 𑐔𑑂𑐰𑐣𑐵𑐔𑑂𑐰𑑃’ 𑐢𑐫𑐵𑑅 𑐀𑐣𑐟𑐸𑑄 𑐟𑑂𑐰𑑅𑐟𑐵𑑅 𑐥𑐸𑐔𑑅𑐫𑐵 𑐳𑐎𑐮𑐾𑑄 𑐖𑐸𑐖𑐸𑐫𑐵𑐠𑐵𑐫𑑂 𑐰𑐣𑐵𑑅 𑐱𑑂𑐬𑐷 𑐟𑐮𑐾𑐖𑐸 𑐨𑐰𑐵𑐣𑐷𑑄 𑐧𑐶𑐫𑐵𑐴𑑅𑐐𑐸 𑐏𑐜𑑂𑐐 𑐮𑑅𑐮𑑂𑐴𑐵𑐟 𑑋

𑐀𑐮𑐾 𑐰𑐶𑐢𑐶𑐥𑐹𑐬𑑂𑐰𑐎 𑐳𑑂𑐠𑐵𑐥𑐣𑐵 𑐫𑐵𑐫𑐾𑐰𑑄 𑐡𑐾𑐱𑐫𑑂 𑐰𑐬𑑂𑐲𑐵 𑐖𑐸𑐫𑐵𑑅 𑐀𑐣𑐶𑐎𑐵𑐮 𑐔𑐶𑐮𑐵𑐰𑐣𑐵𑑅 𑐳𑐴𑐎𑐵𑐮 𑐳𑐸𑐬𑐸 𑐖𑐸𑐮 𑑋 𑐖𑐣𑐟𑐵𑑄 𑐄𑐟𑑂𑐳𑐰 𑐫𑐵𑐟 𑑋 𑐟𑐬 𑐟𑐵𑐣𑑂𑐟𑑂𑐬𑐶𑐎 𑐐𑐸𑐬𑐸𑐖𑐸𑐫𑐵 𑐥𑐸𑐔𑐮𑑄 𑐠𑑅 𑐣𑐵𑐥𑑄 𑐧𑑂𑐰𑐣𑐵𑐴𑑅𑐩𑑂𑐴 𑐬𑐵𑐎𑑂𑐲𑐳𑐫𑐵𑐟 𑐢𑐵𑑅𑐳𑐵 𑐮𑑂𑐰𑑅𑐩𑑄𑐎𑐮 𑑋 𑐕𑐸𑑄 𑐃 𑐮𑐶𑐥𑐵 𑐕𑐩𑑂𑐴 𑐐𑐸𑐬𑐸𑐖𑐸𑐫𑐵𑐟 𑐣𑐵𑐥𑑄 𑐰𑑅𑐩𑑂𑐴 𑐬𑐵𑐎𑑂𑐲𑐳 𑐮𑐸𑐩𑐣 𑑋 𑐡𑐎𑑂𑐰 𑐥𑐸𑐔𑑅 𑐬𑐵𑐎𑑂𑐲𑐳𑑄 𑐕𑐸𑑄 𑐄𑐟𑑂𑐥𑐵𑐟 𑐩𑐔𑐾 𑐫𑐵𑐟 𑐮𑐵 𑐢𑐎𑐵𑑅 𑐠𑑅𑐥𑐶𑑄𑐳𑑄 𑐟𑑂𑐰𑐟𑐵𑑅 𑐟𑐫𑐵𑐐𑐸 𑐠𑐵𑐳𑐫𑑂 𑐰𑐣𑐵𑑅 𑐳𑑂𑐰𑑅 𑐰𑐣 𑑋

𑐬𑐵𑐎𑑂𑐲𑐳 𑐀𑐣𑐟𑐸𑑄 𑐔𑑂𑐰𑐣𑐵𑐔𑑂𑐰𑑄𑐐𑐸 𑐏𑐣𑐵𑑅 𑐄𑐩𑐶𑐳𑑄 𑐬𑐵𑐎𑑂𑐲𑐳𑐫𑐵𑐟 𑐠𑑅𑐐𑐸 𑐠𑐵𑐳𑐫𑑂 𑐮𑐶𑐴𑐵𑑄 𑐰𑐣𑐾𑐟 𑐂𑐣𑐵𑐥 𑐫𑐵𑐟 𑑋 𑐟𑐬 𑐬𑐵𑐎𑑂𑐲𑐳𑑄 𑐖𑐶 𑐮𑐶𑐴𑐵𑑄 𑐰𑐣𑐾 𑐩𑐏𑐸, 𑐖𑐶 𑐠𑐣 𑐴𑐾 𑐔𑑂𑐰𑐣𑐾𑐐𑐸 𑐂𑐔𑑂𑐕𑐵 𑐡𑐸 𑐢𑐎𑐵𑑅 𑐖𑐶𑐡𑑂𑐢𑐶 𑐫𑐵𑐟 𑑋 𑐐𑐸𑐬𑐸𑐖𑐸 𑐥𑐸𑐔𑐮𑑄 𑐖𑐸𑐖𑐸𑐫𑐵𑐠𑐵𑐫𑑂 𑐰𑐣𑐵𑑅 𑐡𑐎𑑂𑐰 𑐏𑑃𑐫𑐵 𑐧𑐾𑐮𑐶𑐧𑐶𑐳𑑂𑐟𑐵𑐬 𑐫𑐵𑐟 𑑋 𑐖𑐸𑐖𑐸𑑄 𑐀𑐠𑐾 𑐏𑑅𑐳𑐵 𑐰 𑐬𑐵𑐎𑑂𑐲𑐳𑑄 𑐩𑐣𑐹𑐟𑐫𑑂𑐟 𑐴𑐵𑐣𑐶, 𑐣𑑀𑐎𑑂𑐳𑐵𑐣𑐷 𑐫𑐵𑐂𑐎𑐶 𑐩𑐫𑐵𑐂, 𑐰𑐫𑐵𑐐𑐸 𑐳𑑂𑐰𑐨𑐵𑐰 𑐳𑑂𑐰𑐫𑐵𑑅 𑐖𑐎 𑐡𑐾𑐱𑐫𑑂 𑐡𑐸𑐎𑐵𑐫𑐾𑐐𑐸 𑐢𑐎𑐵𑑅 𑐁𑐖𑑂𑐘𑐵 𑐧𑐶𑐮 𑑋

𑐟𑐵𑐣𑑂𑐟𑑂𑐬𑐶𑐎 𑐰 𑐳𑑂𑐠𑐵𑐣𑐷𑐫 𑐩𑐣𑐹𑐟𑐫𑑂𑐳𑑄 𑐬𑐵𑐎𑑂𑐲𑐳 𑐔𑑂𑐰𑐣𑐵𑐔𑑂𑐰𑑄𑐐𑐸 𑐠𑐵𑐳𑐫𑑂 𑐬𑐵𑐎𑑂𑐲𑐳 𑐡𑑂𑐫𑐣𑐵𑐔𑑂𑐰𑑄𑐐𑐸 𑐂𑐮𑐫𑑂 𑐩𑐔𑐵 𑐕𑐩𑑂𑐴𑐾𑐳𑐶𑐟 𑐕𑑂𑐰𑐫𑐵𑑅 𑐴𑐵𑐫𑐾𑐎𑐾 𑐧𑐶𑐮 𑑋 𑐮𑐵𑐏𑐾𑐣𑑄 𑐩𑐔𑐵𑐫𑐵𑐟 𑐮𑐶𑐟𑑂𑐟𑐸𑐮𑐶𑐣𑐵𑑅 𑐖𑑂𑐰𑐣, 𑐟𑐬 𑐕𑐸𑑄 𑐴𑐾 𑐴𑐵𑐣𑐷 𑐣𑑀𑐎𑑂𑐳𑐵𑐣𑐷 𑐩𑐫𑐵𑑅 𑑋 𑐀𑐮𑐾 𑐟𑐶𑐣𑐶 𑐠𑑂𑐰 𑐬𑐵𑐎𑑂𑐲𑐳𑑄 𑐩𑐣𑐹𑐟𑐫𑑂𑐟 𑐕𑐸𑑄 𑐴𑐵𑐣𑐶 𑐫𑐵𑐂𑐩𑐏𑐸 𑐢𑐫𑐵𑐐𑐸 𑐳𑐶𑐂𑐎𑐮 𑑋

𑐮𑐶𑐥𑐵 𑐰𑐫𑐵𑐟 𑐡𑐾𑐫𑑂 𑐰 𑐖𑐣𑐟𑐵𑐫𑐵 𑐎𑐮𑑂𑐫𑐵𑐞 𑐫𑐵𑐫𑐾 𑐢𑐎𑐵𑑅 𑐧𑐔𑑄 𑐮𑑂𑐴𑐵𑐎𑐵𑑅 𑐡𑐾𑐱𑐫𑑂 𑐡𑐸𑐎𑐵𑐮 𑑋 𑐬𑐵𑐎𑑂𑐲𑐳𑑄 𑐩𑐣𑐹𑐟𑐫𑑂 𑐧𑐳𑑂𑐟𑐷 𑐡𑐸𑐣𑐾 𑐔𑑂𑐰𑐣𑐵𑑅 𑐐𑑂𑐰𑐵𑐴𑐵𑐮𑐶 𑐰 𑐬𑐎𑑂𑐲𑐵 𑐫𑐵𑐫𑐾𑐐𑐸 𑐖𑑂𑐫𑐵 𑐫𑐵𑐣𑐵𑐔𑑂𑐰𑐣 𑑋 𑐬𑐵𑐎𑑂𑐲𑐳 𑐮𑐵 𑐰 𑐏𑑂𑐫𑐾𑑃 𑐟𑐳𑐎𑑄 𑐫𑑅𑐩𑑂𑐴 𑐰 𑐣𑐂𑐩𑑂𑐴 𑐖𑐹𑐐𑐸𑐮𑐶 𑐩𑐣𑐹𑐟𑐫𑑂𑐳𑑄 𑐬𑐵𑐎𑑂𑐲𑐳 𑐩𑐢𑐵𑐳𑐾 𑐮𑐵𑐏𑐾 𑐢𑐎𑐵𑑅 𑐣𑐵𑑄 𑐕𑐸𑐣𑐵𑐧𑐶𑐮 𑑋