“𑐩𑐫𑑂𑐖𑐸” 𑐄𑐥𑐣𑑂𑐫𑐵𑐳𑐫𑐵 𑐣𑐳𑐣𑐵 … -𑐡𑐷𑐥𑐎 𑐬𑐵𑐖 “𑐏𑑂𑐰𑐥”

𑐣𑑂𑐴𑑂𑐫𑐏𑑃 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑐵 𑐏𑑂𑐫𑐮𑐫𑑂 𑐩𑐫𑑂𑐖𑐸 𑐡𑐶𑐰𑑂𑐫𑐵 𑐰𑐖𑑂𑐬𑐵𑐔𑐵𑐬𑑂𑐫 𑐣𑑂𑐴𑐹𑐐𑐸 𑐣𑐵𑑄 𑐩𑐏𑐸 𑑋 𑐰𑐫𑑂𑐎𑑅𑐫𑐵 𑐏𑐸𑐡𑑃 𑐣𑑂𑐴𑐫𑑂𑐡𑑃 𑐣𑑂𑐴𑑂𑐫𑑄 𑐴𑐾 𑐣𑑂𑐴𑐵𑐥𑐵𑑄𑐏𑐸𑐳𑐶 𑐔𑐶𑐣𑐵𑐏𑑃 𑐖𑑂𑐰𑐣𑐵 𑐥𑐶𑐮𑐸𑐗𑐵𑑅𑐩𑑂𑐴 𑐰𑑂𑐫𑐎𑑂𑐟𑐶𑐟𑑂𑐰 𑐏𑑅 𑑋 𑐰𑐫𑑂𑐎𑑅𑐫𑐵 𑐔𑐶𑐣𑐵𑐏𑑃 ‘𑐏𑑅 𑐖𑐶 𑐣𑐾𑐰𑐵𑑅 𑐩𑐶𑐳𑐵 𑐏𑑅’ 𑐣𑐾.𑐳𑑄. 𑑑𑑑𑑓𑑖 𑐡𑑃𑐫𑑂 𑐩𑐴𑐵𑐎𑐰𑐶 𑐐𑐶𑐬𑐶𑐖𑐵 𑐥𑑂𑐬𑐳𑐵𑐡 𑐖𑑀𑐱𑐷𑐫𑐵 𑑗𑑙 𑐎𑑂𑐰𑐐𑐸 𑐧𑐸𑐡𑐶𑑄𑐫𑐵 𑐮𑐳𑐟𑐵𑐫𑑂 𑐢𑐾𑑄𑐢𑐾𑑄𑐧𑐮𑑂𑐮𑐵 𑐎𑐵𑐳𑐵𑐫𑑂 𑐮𑐶𑐫𑐵𑑄 𑐮𑑂𑐫𑐹 𑐳𑐶𑐬𑐥𑐵𑑅 𑐟𑑂𑐫𑐵𑐎𑐾𑐟 𑐟𑐵𑐮𑐵𑑅𑐐𑐸 𑐖𑐸𑐮 𑑋 𑐠𑑂𑐰 𑐔𑐶𑐣𑐵𑐏𑑃𑐫𑑂 𑐕𑐩𑑂𑐴 𑐣𑐾𑐰𑐵𑑅 𑐐𑐺𑐴𑐶𑐞𑐷 𑐐𑐠𑐾 𑐕𑐾𑑃 𑐎𑑅𑐑𑐵𑐣𑐵 𑐩𑐳𑑂𑐟𑐫𑑂𑐟 𑐣𑐾𑐰𑐵𑑅 𑐨𑐵𑐫𑑂 𑐳𑑂𑐫𑐣𑐵, 𑐕𑐾𑑃𑐫𑐵 𑐡𑐸𑐖𑑅 𑐟𑐫𑐾𑐟 𑐐𑐠𑐾 𑐩𑐵𑐣𑐾 𑐫𑐵𑐫𑐾𑐐𑐸, 𑐩𑐵𑐣 𑐳𑐩𑑂𑐩𑐵𑐣 𑐧𑐶𑐂𑐐𑐸 𑐢𑐫𑐵𑑅 𑐣𑐾𑐰𑐵𑑅 𑐖𑐸𑐫𑐵𑐐𑐸 𑐫𑐵 𑐕𑐐𑐹 𑐐𑑁𑐬𑐰 𑐟𑐵𑐫𑐾𑐎𑐵𑐡𑐶𑐩𑑂𑐴 𑐕𑐩𑑂𑐴 𑐣𑐾𑐰𑐵𑑅 𑐩𑐶𑐳𑐵𑐫𑐵𑐟 𑐣𑑂𑐴𑐫𑐧𑑂𑐰𑐫𑐵𑐟𑑅𑐐𑐸 𑐡𑐸 𑑋 𑐰𑐫𑑂𑐎𑑅𑐫𑐵 𑐠𑑂𑐰 𑐔𑐶𑐣𑐵𑐏𑑃 ‘𑐮𑐴𑐣𑐵’ 𑐥𑑁𑐮𑐫𑑂 𑐥𑐶𑐡𑑄𑐐𑐸 𑐖𑐸𑐮 𑑋
𑐕𑐐𑐹 𑐂𑐮𑐫𑑂 ‘𑐳𑑅 𑐕𑐐𑐹 𑐦𑐬𑐎 𑐀𑐨𑐶𑐰𑑂𑐫𑐰𑑂𑐎𑑂𑐟𑐶 ’ 𑐖𑑂𑐫𑐵𑐗𑑂𑐰𑑅 𑐖𑐸𑐫𑐵𑐔𑑂𑐰𑑄𑐐𑐸 𑐃 𑑋 𑐩𑐫𑑂𑐖𑐸 𑐡𑐶𑐰𑑂𑐫𑐵𑐖𑐸 𑐫𑐵 𑐩𑐣 𑐠𑑂𑐰 𑐖𑑂𑐫𑐵𑐗𑑂𑐰𑐫𑑂 𑐎𑑂𑐰𑐳𑐵𑐟 𑑋 𑐀𑐮𑐾 𑐐𑐣 𑐂𑐔𑑂𑐕𑐵 𑐀𑐣 𑐮𑑃 𑐢𑐿𑐠𑐾𑑄 𑐰𑐫𑑂𑐎𑐮𑑄 𑐠𑑂𑐰 𑐖𑑂𑐫𑐵𑐗𑑂𑐰𑐮𑐫𑑂 𑐕𑐥𑐸 𑐔𑐶𑐧𑐵𑐏𑑄 ‘𑐴𑑂𑐰𑐐𑑄𑐐𑐸 𑐨𑐶𑐟𑑂𑐬𑐶𑐐𑑄𑐖𑐶’ 𑐰𑐵𑐔𑐣 𑐫𑐵𑐣𑐵𑐡𑐷 𑑋 𑐠𑑂𑐰 𑐧𑐵𑐏𑐣𑐫𑑂 𑐐𑐸𑑃𑐨𑑂𑐰𑐫𑑂 𑐰𑐣𑐾𑐩𑐵𑑅𑐩𑑂𑐴 𑐕𑐩𑑂𑐴 𑐎𑐵𑐫𑐾𑐰𑑄 𑐣𑑂𑐫𑐵𑐳𑑅 𑐡𑐵𑑄 𑐩𑐵𑐮 𑐢𑐫𑐵 𑐧𑑁𑐫𑐵𑐟 𑐢𑐵𑐂 𑑋 𑐠𑑁𑑄 𑐢𑐵𑐢𑐵𑑄 𑐎𑐣𑑂𑐴𑐾 𑐢𑐵𑐢𑐵𑑄 𑐡𑐵𑑄 𑐧𑐶𑐂𑐟𑑂𑐫𑑅𑐐𑐸 𑐀𑐣𑑂𑐟𑐶𑐩 𑐃 𑐠𑑂𑐫𑑄𑐎𑐰𑐂 𑑋 𑐰 𑐂𑐮𑐫𑑂 𑐧𑑁𑐩𑑂𑐴 𑐠𑑅𑐐𑐸 𑐮𑐖𑐐𑐵𑐫𑑂 𑐰𑐣𑐾𑐟 𑐰𑐳𑑅 𑐦𑐶𑐫𑐵𑐔𑑂𑐰𑐣𑐶𑐧𑐮𑐫𑑂 𑐧𑑁𑐫𑐵 𑐨𑐶𑐟𑑂𑐬𑐶𑐐𑑄𑐖𑐶 𑐐𑐸𑐫𑐵𑐔𑑂𑐰𑑄𑐐𑐸 𑐏𑑄𑐎𑐶 𑑋 𑐮𑐶𑐥𑐵 𑐧𑑁𑐩𑑂𑐴 𑐡𑐵𑑄 𑐧𑐶𑐫𑐵𑐰𑐣𑐷 𑑋 𑐎𑐵𑐫𑐾𑐰𑑄 𑐡𑐵𑑄 𑐎𑐫𑐵 𑐩𑐵𑑄𑐩𑑂𑐴𑐾𑐳𑐶𑐫𑐵 𑐣𑑂𑐴𑐫𑐣𑐾 𑐰𑐣𑐵 𑐖𑐶 𑐐𑐸𑑃𑐨𑑂𑐰𑐫𑑂 𑐰𑐣𑐾𑐩𑐏𑐸𑐟 𑑋 𑐠𑑂𑐰 𑐡𑐵𑐩𑑄 𑐧𑐵𑐫𑐵𑐟 𑐨𑐶𑐟𑑂𑐬𑐶𑐐𑑄𑐖𑐶 𑐣𑑂𑐫𑐵𑐣𑐵𑐧𑐶𑐂 𑐢𑐫𑐵 𑐢𑐵𑐂𑐐𑐸 𑐴𑐾 𑐠𑐸𑐎𑐶𑐫𑐵 𑐳𑐵𑐬 𑑋 𑐀𑐠𑐾𑐴𑐾 𑐕𑐎𑑅 𑐁𑐏𑑂𑐫𑐵𑐣𑐎𑐵𑐬 𑐨𑐵𑐖𑐸 𑐩𑐠𑐸𑐬𑐵 𑐳𑐵𑐫𑑂𑐩𑐶𑐖𑐸𑑄 𑐣𑑂𑐴𑑂𑐫𑐵𑐩𑑂𑐴𑐾𑑄𑐳𑐶𑐟𑑄 𑐔𑑂𑐰𑐫𑐾𑐐𑐸 𑐖𑑂𑐫𑐵𑐫𑑂 𑐩𑐣 𑐎𑑂𑐰𑐳𑐵𑐎𑐾𑐟 𑐠𑑁𑑄𑐎𑐣𑑂𑐴𑐾𑐫𑐵 𑐳𑐵𑐩𑐵𑐖𑐶𑐎 𑐳𑐘𑑂𑐖𑐵𑐮𑐫𑐵 𑐩𑐵𑐢𑑂𑐫𑐩𑑄 𑐕𑐐𑐹 𑐂𑐮𑐫𑑂 ‘𑐟𑑂𑐬𑐵𑐳’ 𑐱𑐶𑐬𑑂𑐲𑐎 𑐧𑐶𑐫𑐵 𑐧𑐵𑐏𑑄 𑐔𑑂𑐰𑐫𑐾𑐟 𑐳𑐵𑐬𑑂𑐰𑐖𑐣𑐶𑐎 𑐫𑐵𑐣𑐵𑐡𑐷 𑑋 𑐠𑑂𑐰 𑐖𑑂𑐫𑐵 𑐰𑐫𑑂𑐎𑐮𑑄 𑐣𑑅𑐮𑐶 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑐵𑐴𑐶𑐟𑑂𑐫𑐶𑐎 𑐥𑐟𑑂𑐬𑐶𑐎𑐵𑐫𑐵 𑐩𑑄𑐎𑐵𑑅 𑐐𑑂𑐰𑐳𑐵𑐮𑐫𑑂 𑐫𑐵𑐣𑐵𑐡𑐶𑐐𑐸 𑐖𑐸𑐮 𑑋 𑐠𑑂𑐰𑐴𑐾 𑐢𑐾𑑄𑐢𑐾𑑄𑐧𑐮𑑂𑐮𑐵 𑐎𑐵𑐳𑐵𑐫𑑂 𑐄𑐟𑑂𑐎𑐺𑐲𑑂𑐚 𑐩𑐶𑐳𑐵 𑐔𑑂𑐰𑐩𑐶 𑐎𑐠𑑄 𑐩𑐫𑑂𑐖𑐸 𑐡𑐶𑐰𑑂𑐫𑐵 𑐰𑐖𑑂𑐬𑐵𑐔𑐵𑐬𑑂𑐫𑐖𑐸𑑄 𑐣𑐾.𑐳𑑄 𑑑𑑑𑑔𑑑 𑐡𑑃𑐫𑑂 𑐳𑐶𑐬𑐥𑐵𑑅𑑅 𑐟𑑂𑐫𑐵𑐎𑐵𑐡𑐷𑐐𑐸 𑐏𑑅 𑑋 𑐰𑐫𑑂𑐎𑑅 𑐁𑐏𑑂𑐫𑐵𑐣𑐎𑐵𑐬 𑐨𑐵𑐖𑐸 𑐩𑐠𑐸𑐬𑐵 𑐳𑐵𑐫𑑂𑐩𑐶𑐖𑐸𑑄 𑐮𑐶𑐥𑐵 𑐕𑐎𑑅 𑐮𑐸𑑃𑐢𑑂𑐰𑐵𑐏𑐵𑐫𑐵 𑐠𑑂𑐫𑑄𑐮𑑂𑐫𑐵𑑅 𑑑𑑑𑑕 𑐥𑑁𑐮𑐫𑑂 ‘𑐩𑐶𑐳𑐵 𑐄𑐥𑐣𑑂𑐫𑐵𑐳𑐎𑐵𑐬𑐫𑐵𑐟 𑑒𑑕𑑐𑑐𑑐𑑋– 𑐟𑐎𑐵𑑅𑐫𑐵 𑐳𑐶𑐬𑐥𑐵𑑅’ 𑐢𑐫𑐵𑑅 𑐣𑑂𑐴𑐹𑐣𑑂𑐴𑐹𑐥𑐶𑑄 𑐩𑐶𑐳𑐵 𑐄𑐥𑐣𑑂𑐫𑐵𑐳𑐎𑐵𑐬 𑐡𑐫𑐾𑐎𑐾𑐐𑐸 𑐟𑐵𑐟𑐸𑐣𑐵 𑑒𑑐𑑗𑑗 𑐡𑑃𑐫𑐵 𑐔𑐿𑐟 𑐩𑐳𑐵𑐣𑑂𑐟 𑐟𑐎𑐫𑐵 𑐡𑐸𑐣𑐾𑐫𑐵 𑐃 𑐧𑐶𑐫𑐵𑑅 𑐄𑐥𑐣𑑂𑐫𑐵𑐳 𑐔𑑂𑐰𑐫𑐾𑐟 𑐰𑐶𑐖𑑂𑐘𑐵𑐥𑐣 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐐𑐸𑐎𑐶 𑐗𑐶𑑄𑐣𑐶𑐩𑑂𑐴 𑐩𑐶𑐳𑐵 𑐄𑐥𑐣𑑂𑐫𑐵𑐳𑐎𑐵𑐬𑐟𑐳𑐾𑑄 𑐰 𑐢𑐾𑑄𑐢𑐾𑑄𑐧𑐮𑑂𑐮𑐵 𑐎𑐵𑐳𑐵𑐫𑑂 𑐧𑑂𑐰𑐟𑐶 𑐎𑐵𑑅𑐐𑐸 𑐳𑑂𑐫𑐹𑐐𑐸 𑐴𑐾 𑐖𑐸𑐮 𑑋 𑐠𑐠𑐾 𑐣𑑂𑐴𑐹 𑐄𑐥𑐣𑑂𑐫𑐵𑐳𑐎𑐵𑐬𑐫𑐵 𑐗𑑂𑐰𑐮𑐫𑑂 𑐡𑑄𑐗𑐵𑐩𑑂𑐴 𑐕𑐩𑑂𑐴 𑐩𑐫𑑂𑐖𑐸 𑐡𑐶𑐰𑑂𑐫𑐵 𑐰𑐖𑑂𑐬𑐵𑐔𑐵𑐬𑑂𑐫𑐖𑐸 𑐕𑐩𑑂𑐴 𑐣𑑄 𑐖𑐸𑐮 𑑋 𑐰𑐫𑑂𑐎𑐮𑑄 ‘𑐩𑐫𑑂𑐖𑐸’ 𑐄𑐥𑐣𑑂𑐫𑐵𑐳 𑐔𑑂𑐰𑐫𑐵𑐡𑐶𑐐𑐸 𑐖𑐸𑐮 𑑋 𑐎𑐸𑐟𑑅 𑐥𑐶𑐎𑐵𑐎, 𑐏𑑂𑐰𑐥𑑄 𑐥𑐶𑐡𑑄𑐐𑐸 𑐠𑑂𑐰 𑐄𑐥𑐣𑑂𑐫𑐵𑐳𑐫𑑂 𑐗𑐶𑑄𑐕𑐐𑐹 𑐡𑑂𑐫𑐵𑑅 𑐡𑐸𑐳𑐵 𑐠𑐸𑐎𑐶𑐫𑐵 𑐥𑑁 𑐮𑑂𑐫𑐵𑑅 𑑗𑑒 𑐏𑑅 𑑋 𑐠𑑂𑐰 𑐄𑐥𑐣𑑂𑐫𑐵𑐳 𑐣𑑂𑐴𑑂𑐫𑐵𑐂 𑐣𑐳𑑄𑐔𑐵𑐫𑐵 𑐂𑐮𑐫𑑂 𑐩𑐣𑐹𑐟 𑐎𑐵𑐮𑐵𑐎𑐹𑐮𑐸 𑐴𑐵𑐮𑐵𑑅 𑐟𑐸𑑄𑐠𑐷 𑐮𑑅 𑐎𑐵𑑅𑐰𑐿𑐐𑐸 𑐳𑐮𑑄 𑐩𑐫𑑂𑐖𑐸𑐫𑐵𑐟 𑐡𑑃 𑐡𑑃 𑐮𑐶𑐧𑐵𑐟, 𑐠𑑁𑑄 𑐀𑐣𑑂𑐬𑑂𑐟𑐰𑐵𑐬𑑂𑐟𑐵 𑐰𑑂𑐫𑐸 𑐰𑐣𑐾𑐩𑐵𑐣𑐷 𑐢𑐿𑐐𑐸 𑐩𑐏𑐸𑐮𑐵 𑐢𑐫𑐵𑑅 𑐠𑐣𑐶𑐐𑐸 𑐎𑐠𑑄 𑑋 𑐫𑐮𑑄 𑐫𑐾𑑃 𑐰𑐫𑐵 𑐮𑐖𑐐𑐵𑐫𑐵 𑐣𑐶𑑄𑐟𑐶 𑐀𑐣𑑂𑐬𑑂𑐟𑐰𑐵𑐬𑑂𑐟𑐵 𑐧𑑂𑐫𑐸 𑐰𑐫𑐾𑐩𑐵𑐩𑑂𑐴 𑐣𑐳𑐣𑐵𑐫𑐵 𑐩𑐣𑐫𑑂 𑐫𑐮𑐫𑑂 𑐴𑐾 𑐮𑐖𑐐𑐵 𑐔𑐸𑐮𑐵𑑅𑐳𑐵 𑐖𑑂𑐫𑐸 𑐢𑐿𑐐𑐸 𑐟𑐵𑐟𑐸𑐣𑐵 𑑋 𑐟𑐬 𑐠𑐩𑑄 𑐫𑐵𑐂𑐐𑐸 𑐩𑐟𑐶 𑐐𑐣 𑐥𑐸 𑐰𑐣𑐶 𑐕𑐸 𑐔𑑂𑐰𑐿𑐟𑐮 𑐰𑐴𑐾 𑐮𑐵 𑐖𑐸𑐂𑐣𑐶 𑑋 𑐳𑑂𑐣𑐵𑐟𑐎 𑐎𑑂𑐰𑐔𑐵𑐫𑐾𑐎𑐵 𑐠𑐷𑐠𑐷 𑐟𑐵𑐮𑐶𑐩, 𑐎𑐩𑑂𑐥𑑂𑐫𑐹𑐚𑐬𑐫𑐵 𑐖𑑂𑐫𑐵 𑐳𑐫𑐾𑐎𑐵𑐟𑑅𑐩𑑂𑐴 𑐣𑐳𑐣𑐵𑐫𑐵𑐟 𑐖𑑂𑐫𑐵 𑐔𑐸𑐮𑐵𑐂, 𑐣𑐶𑐩𑑂𑐴 𑐳𑑂𑐰𑐩𑑂𑐴 𑐖𑐎 𑐳𑑂𑐚𑐵𑐦 𑐡𑐸𑐐𑐸 𑐕𑐐𑐹 𑐖𑑂𑐫𑐵𑐎𑐸𑐠𑐷 𑑋 𑐐𑑀𑐥𑐵𑐮 𑐡𑐵𑐃, 𑐳𑐸𑐥𑐮𑐵, 𑐬𑐶𑐟𑐾𑐣𑑂𑐡𑑂𑐬 𑐳𑐬 𑐰 𑐣𑐳𑐣𑐵 𑐫𑐵𑐣𑐵 𑐥𑑂𑐫𑐩𑑂𑐴 𑐖𑐎 𑐳𑑂𑐚𑐵𑐦 𑑋 𑐠𑑅 𑐳𑑂𑐰𑐫𑐵 𑐔𑑂𑐰𑐫𑐾𑐫𑐵 𑐎𑐬𑑂𑐩𑐔𑐵𑐬𑐷𑑄 𑐕𑐸 𑐖𑑂𑐫𑐵 𑐧𑐶𑐮 𑐰 𑐫𑐵𑐫𑐵𑑄 𑐣𑑂𑐴𑐶 𑐧𑐶𑐣𑐵𑐔𑑂𑐰𑐣𑐷 𑑋 𑐠𑐠𑐾 𑐖𑐸𑐖𑐸𑑄 𑐀𑐣𑐫𑐵 𑐮𑐾𑐏𑐵𑐫𑐵 𑐖𑑂𑐫𑐵 𑐫𑐵𑐂𑐩𑑂𑐴 𑐳𑐸𑐥𑐮𑐵 𑐣𑐵𑐥𑑄 𑐳𑐟𑐶𑐣𑐵𑐰𑐣𑐷 𑑋 𑐣𑑂𑐴𑐶𑐣𑐫𑑂 𑐧𑐖𑐶 𑐣 𑐰𑐣𑐾𑐟 𑐣𑑄 𑐣𑐶𑐩𑑂𑐴𑑄 𑐣𑐵𑐥𑑄 𑐰𑐣𑐵 𑐏𑑃 𑐮𑑂𑐴𑐵𑐮𑑂𑐴𑐵𑑄 𑐗𑐣𑑂 𑐳𑐟𑐶𑐣𑐵 𑐰𑐣𑐷 𑑋 𑐀𑐮𑐾 𑐐𑑀𑐥𑐵𑐮 𑐡𑐵𑐃 𑐢𑐵𑑅𑐩𑑂𑐴 𑐴𑐵𑐎𑐶𑐩𑑄 𑐢𑐵𑑅𑐠𑐾𑑄𑐫𑐵 𑐖𑑂𑐫𑐵 𑐫𑐵𑐣𑐵, 𑐎𑑂𑐰𑐠𑐵 𑐳𑐸𑐔𑐸𑐥𑐶𑐔𑐸 𑐫𑐵𑐂𑐩𑑂𑐴 𑐩𑐾𑐔 𑐚𑐾𑐧𑐮 𑐴𑐸𑐫𑐵 𑐖𑑂𑐫𑐵𑐎𑐸𑐠𑐶𑐫𑐵𑐟 𑐳𑐦𑐵 𑐫𑐵𑐣𑐵𑐟𑐿𑐩𑑂𑐴 𑐎𑐬𑑂𑐩𑑄𑐔𑐵𑐬𑐷 𑑋 𑐰𑐫𑐵 𑐄𑐳𑐵𑑃𑐫𑑂 𑐩𑐡𑐸𑐩𑑂𑐴 𑐩𑐵𑑄 𑐕𑐩𑑂𑐴 𑐖𑐎 𑐖𑐸𑐫𑐵𑑅 𑐖𑑂𑐫𑐵𑐎𑐸𑐠𑐷 𑐃 𑐧𑐶𑐂𑐩𑐦𑐫𑐵 𑐔𑑂𑐰𑐧𑐮𑐫𑑂 𑐴𑐵𑐎𑐶𑐩𑑄 𑐣𑐳𑐣𑐵𑐫𑐵𑐟, 𑐳𑐸𑐥𑐮𑐵𑐫𑐵𑐟 𑐩𑐾𑐩𑑂𑐴 𑐳𑑂𑐚𑐵𑐦 𑐟𑐫𑐾𑐩𑐵𑐮 𑐳𑐸𑑄 𑐡𑐸𑐳𑐵 𑐧𑑂𑐰𑐣𑐵𑐴𑐖𑐶 𑐢𑐫𑐵𑑅 𑐢𑐵𑐂 𑐴𑐵𑐎𑐶𑐩𑑄 𑑋 𑐣𑐳𑐣𑐵𑐫𑐵 𑐠𑑅𑐠𑐵𑐫𑑂 𑐐𑑂𑐫𑐵𑐳 𑐟𑐫𑑂𑐴𑐿𑐩𑑂𑐴 𑐩𑐣𑐹𑐫𑐵𑐟 𑐣𑑂𑐫𑐣𑐵 𑐟𑐮𑐧𑐫𑐵 𑐣𑐵𑑄 𑐎𑐵𑐂𑐧𑐮𑐫𑑂 𑐩𑑂𑐴𑐵 𑐰 𑐳𑑂𑐰𑐫𑐵𑐮𑐵 𑐠𑑂𑐰 𑐖𑑂𑐫𑐵 𑐴𑐾 𑐖𑑂𑐫𑐸 𑐢𑐫𑐵 𑐮𑐶𑐳𑑅 𑐧𑐶𑐂 𑑋 𑐣𑐳𑐣𑐵𑑄 𑐠𑑅 𑐳𑑂𑐰𑐫𑐵 𑐣𑑄 𑐟𑐮𑐧 𑐀𑐥𑑀𑐡𑐸𑐐𑐸 𑐠𑐸𑐂𑐎𑐷 𑑋 𑐀𑐠𑐾𑐴𑐾 𑐳𑐸𑐥𑐮𑐵𑑄 𑐖𑑂𑐰𑐣𑐵𑐰𑑅𑐩𑑂𑐴 𑐩𑐣𑐹 𑐴𑐵𑐎𑐶𑐩𑑄 𑐫𑐫𑐾𑐎𑐶 𑐩𑐏𑐸 𑑋 𑐮𑐶𑐥𑐵 𑐴𑐵𑐎𑐶𑐩 𑐠𑐩𑑄 𑐴𑐾 𑐮𑐔𑐣𑐵 𑐢𑐵𑑅𑐩𑑂𑐴 𑐩𑐣𑐹 𑐖𑑂𑐰𑐣𑐵𑐰𑐂 𑑋

𑐥𑐶𑐟𑐺𑐳𑐟𑐵𑐟𑑂𑐩𑐎 𑐠𑑂𑐰 𑐳𑐩𑐵𑐖𑐫𑑂 𑐩𑐶𑐖𑑄 𑐟𑐫𑐾𑐳𑑄 𑐫𑐵𑐂𑐐𑐸 𑐀𑐣𑑂𑐫𑐵 𑐀𑐟𑑂𑐫𑐵 𑐠𑑂𑐰 𑐄𑐥𑐣𑑂𑐫𑐵𑐳𑐫𑑂 𑐣𑑂𑐴𑐫𑑂𑐧𑑂𑐰𑐫𑐵𑐟𑑅𑐐𑐸 𑐡𑐸 𑑋 𑐐𑐸𑐧𑐮𑐾𑑄 𑐧𑐳𑐫𑐵 𑐴𑐸𑐮𑐫𑑂 𑐩𑑂𑐴𑐫𑑂 𑐠𑐶𑐫𑐵𑑄 𑐖𑐶𑐮 𑐮𑐵 𑐐𑐸𑐧𑐮𑐾𑑄 𑐚𑑂𑐫𑐸𑐱𑐣 𑐧𑑂𑐰𑑄𑐎𑑂𑐩𑑂𑐴𑐶 𑐩𑐵𑐲𑑂𑐚𑐬𑑄 𑐩𑑂𑐴𑐫𑑂 𑐠𑐶𑐫𑐵𑑄 𑐖𑐶𑐮 𑐮𑐵 𑐫𑑁𑐣 𑐴𑐶𑑄𑐳𑐵 𑐫𑐵𑑅𑐳𑐵𑑄 𑐫𑐵𑐫𑐵𑐠𑐾𑑄 𑐫𑐵𑐎𑐵𑑅 𑐩𑐔𑑂𑐰𑑄𑐳𑐾𑑄 𑐄𑐎𑐶𑐫𑐵 𑐰𑐶𑐬𑑀𑐢𑐫𑑂 𑐧𑑂𑐰𑐮𑐵𑐳𑐵 𑐎𑐵𑑅𑐐𑐸 𑐠𑑂𑐰 𑐄𑐥𑐣𑑂𑐫𑐵𑐳𑐫𑑂 𑐎𑑂𑐫𑐣𑐵𑐟 𑑋 𑐡𑐶𑐰𑑂𑐫𑐵𑐖𑐸 𑐫𑐵 𑐠𑑂𑐰 𑐄𑐥𑐣𑑂𑐫𑐵𑐳 𑐧𑑂𑐰𑑃𑐧𑑂𑐰𑑄 𑐰𑐣𑐾𑐧𑐮𑐫𑑂 𑐫𑑁𑐣 𑐴𑐶𑑄𑐳𑐵𑐫𑐵, 𑐩𑐶𑐳𑐵 𑐳𑐔𑐾𑐟𑐣𑐵𑐫𑐵 𑐳𑑅 𑐠𑑂𑐰𑐫𑐾𑐎𑐶𑐩𑑂𑐴 𑐣𑐳𑐣𑐵𑐬𑐸𑐥𑐷 𑐥𑐵𑐟𑑂𑐬 𑐕𑐩𑑂𑐴 𑐳𑑂𑐥𑐲𑑂𑐚 𑐰𑐎𑑂𑐟𑐵 𑐏𑐣𑐾𑐡𑐸 𑑋 𑐣𑐵𑐥𑑄 𑐩𑐶𑐖𑑄𑐟𑐫𑑂 𑐩𑐶𑐖𑑄𑐟 𑐣𑐵𑐥𑑄 𑐏𑑃 𑐰𑑂𑐫𑐵𑐂 𑐀𑐮𑐾 𑐩𑐶𑐳𑑂𑐟𑐫𑑂 𑐩𑐶𑐳𑑂𑐟𑐣𑐵𑐥𑑄 𑐢𑐫𑐵𑑅 𑐕𑐩𑑂𑐴 𑐩𑐶𑐳𑐵𑐩𑐔𑐵 𑐃𑐫𑐵 𑐴𑑂𑐫𑐸𑐥𑐵𑑄 𑐕𑐩𑑂𑐴 𑐩𑐵𑑄𑐩𑑄𑑄 𑐩𑑂𑐴𑑂𑐫𑐵𑐫𑑂𑐫𑐵𑐟 𑐡𑐎𑐮𑐾 𑐣𑑂𑐴𑐵𑐥𑐵𑑄 𑐠𑐷 𑐩𑐖𑑂𑐫𑐸 𑐖𑐹𑐧𑐮𑐫𑑂 𑐐𑐠𑐾 𑐐𑐠𑐾 𑐫𑐵𑐫𑐾𑐐𑐸 𑐢𑐫𑐵𑑅 𑐳𑑂𑐫𑐣𑐵𑐟𑑅𑐐𑐸 𑐠𑑅 𑐩𑐔𑐵𑐳𑐸𑐫𑐵 𑐏𑑃 𑐮𑐸𑐩𑑄𑐎𑐶 𑑋 𑐀𑐠𑐾𑐳𑐵𑑄 𑐩𑐵𑐩𑑄 𑐰𑑂𑐫𑐵𑐐𑐮𑑄 𑐔𑑂𑐰𑐣𑐾𑐩𑐵, 𑐡𑐾𑐣𑐾𑐐𑐸 𑐰𑑂𑐫𑐵𑐐𑐮𑑄 𑐣𑐫𑐾𑐐𑐸 𑐣𑑄 𑐀𑐠𑐾𑐴𑐾 𑐩𑐾𑐥𑐶𑑄 𑐥𑐵𑐳𑐵𑐥𑐶𑐣𑐶 𑐖𑐸𑐳𑐵𑑄 𑐩𑐵𑐩𑑄 𑐀𑐖𑑀𑐐𑐸 𑐕𑐸𑑄 𑐫𑐵𑐎𑐾𑐩𑐰𑑂𑐫𑐸 𑐢𑐎𑐵𑑅 𑐎𑑂𑐰𑐥𑐸𑐮𑐵𑑄𑐐𑐸 𑐳𑐩𑐵𑐖𑐫𑐵 𑐎𑑂𑐰𑐥𑐸𑐮𑐵𑑄𑐐𑐸 𑐧𑐶𑐔𑐵𑑅 𑐫𑐵𑐟 𑐣𑑂𑐴𑐹 𑐥𑐴𑐮𑐫𑑂 𑐴𑑂𑐫𑐹𑐥𑐵 𑐴𑐫𑐾𑐩𑐵𑑅𑐐𑐸 𑐎𑑂𑐫𑐣𑐵𑐟 𑑋 𑐐𑐠𑐾 𑐎𑐶 𑐩𑐵𑑄𑐧𑑁 𑐢𑐵𑐂𑐥𑐶𑑄 𑐡𑐎𑐮𑐾 𑐣𑑂𑐴𑐵𑐥𑐵𑑄𑐫𑐵 𑐐𑐸𑐬𑐸 𑐨𑐵𑑅𑐥𑐵 𑑋 𑐄𑐎𑐶𑑄 𑐴𑐾 𑐮𑐵 𑐏𑐂 𑐣𑐳𑐣𑐵 𑐬𑐸𑐥𑐷 𑐥𑐵𑐟𑑂𑐬𑑄 𑐖𑑂𑐫𑐵𑐎𑐸𑐠𑐷𑑄 𑐕𑐾𑑃 𑐀𑐮𑐾 𑐕𑐾𑑃𑐣𑑄 𑐖𑑂𑐫𑐵𑐎𑐸𑐠𑐷 𑐰𑐣𑐶𑐧𑐮𑐫𑑂 𑐀𑐖𑑀 𑐀𑐖𑑀𑐐𑐸 𑐩𑐶𑐖𑑄𑐟𑐳𑐾𑑄 𑐩𑐶𑐳𑑂𑐟𑐫𑐾𑐟 𑐫𑐵𑐂𑐐𑐸 𑐀𑐣𑑂𑐫𑐵𑐫𑑂𑐫𑐵 𑐮𑐸 𑐟 𑐠𑐸𑐎𑐶 𑐎𑑂𑐫𑐣𑐵𑐡𑐶𑐐𑐸 𑐡𑐸 𑑋 𑐐𑐸𑐧𑐮𑐾𑑄 𑐧𑐳 𑐥𑐶𑐫𑐵𑐔𑑂𑐰𑐣𑐶𑐧𑐮𑐫𑑂 𑐕𑐐𑐸 𑐔𑑂𑐫𑐵 𑐥𑐳𑐮𑐫𑑂 𑐀𑐫𑑂𑐮𑐵 𑐟𑑂𑐰𑐣𑐵 𑐟𑑅𑐩𑑂𑐴 𑐩𑐶𑐖𑑄, 𑐎𑐮𑐵𑑅 𑐣𑐵𑐥𑑄 𑐮𑑂𑐰𑐵𑐣𑐵𑐔𑑂𑐰𑐣𑐶 𑐳𑐵 𑐎𑐮𑐵𑑅𑐩𑑂𑐴 𑐔𑑂𑐫𑐵 𑐩𑐵𑐮 𑐢𑐵𑑅𑐰𑑅𑐐𑐸 𑐡𑐸, 𑐕𑐎𑑅 𑐧𑐶𑐂𑐫𑑄𑐎𑐷 𑐢𑐵𑐂𑐧𑐮𑐫𑑂 𑐩𑐵𑑅𑐳𑐵 𑐫𑑄𑐎𑐶 𑐀𑐮𑐾 𑐰 𑐔𑑂𑐫𑐵 𑐩𑐵𑐮 𑐢𑐵𑑅𑐩𑑂𑐴 𑐴𑐵𑐎𑐶𑐩 𑐮𑐶𑐳𑐾𑑄 𑐴𑐾 𑐴𑐸𑑄 𑐢𑐫𑐵𑑅 𑐣𑑂𑐫𑑄𑐎𑐷 𑑋 𑐧𑐶𑐔𑐬𑐵 𑐩𑐔𑐵𑐫𑐵𑐟 𑐧𑐸𑐫𑐵 𑐔𑑂𑐫𑐵 𑐧𑐶𑐂𑐫𑑄𑐎𑐷 𑑋 𑐳𑐏𑐾 𑐩𑐶𑐖𑑄 𑐥𑑂𑐬𑐢𑐵𑐣𑐫𑐵 𑐡𑐳𑐹 𑐠𑑂𑐰 𑐳𑐶𑐰𑐵𑐫𑑂 𑐕𑐸 𑐖𑐸𑐂 𑐢𑐫𑐵 𑐎𑑂𑐫𑐣𑐵𑐡𑐷𑐟 𑐄𑐥𑐣𑑂𑐫𑐵𑐳𑐎𑐵𑐬 𑐳𑐦𑐮 𑐏𑐣𑐾𑐡𑐸 𑑋 𑐀𑐖𑑀𑐐𑐸 𑐮𑐸 𑐣𑐳𑐣𑐵 𑐕𑐾𑑃 𑐠𑑂𑐫𑐣𑐶𑐧𑐮𑐫𑑂 𑐩𑐣𑐸𑐟𑐫𑑂 𑐴𑐸𑐮 𑐏𑐣𑐵 𑐕𑐸 𑐖𑐸𑐮 𑐢𑐎𑐵 𑐳𑑂𑐰𑐂𑐧𑐮𑐫𑑂 𑐕𑐩𑑂𑐴 𑐩𑐶𑐳𑐵 𑐊𑐜𑐳 𑐖𑐸𑐫𑐵 𑐳𑐷𑐐𑐸 𑐏𑐣𑐷 𑑋 𑐕𑐾𑑃 𑐫𑐵 𑐨𑐸𑐟𑐸 𑐔𑑂𑐫𑐵𑐎𑐾𑐫𑐵 𑐣𑐶𑐟𑐶𑑄 𑐖𑑂𑐫𑐵 𑐰𑐣𑐾𑐠𑐵𑐫𑑂 𑐠𑑅𑐐𑐸 𑐩𑑂𑐴 𑐩𑐶𑐫𑐵 𑐳𑐵𑑄 𑐧𑐮𑐶𑐡𑐵𑐣 𑐫𑐵𑐂𑐐𑐸 𑐎𑑂𑐫𑐣𑐵𑐡𑐷 𑑋 𑐀𑐮𑐾 𑐐𑐣𑑄 𑐖𑑂𑐫𑐵 𑐩𑐳𑑄𑐳𑐾𑑄 𑐟𑑂𑐰𑐣𑐵𑐖𑐎 𑐡𑐸𑑅𑐏 𑐧𑐶𑐂𑐩𑑂𑐴 𑐨𑐵𑑅𑐟𑐫𑐵𑐟 𑐕𑐩𑑂𑐴 𑐩𑐶𑐳𑐵𑑄 𑐮𑐛𑑂𑐛𑐵𑐫𑑂 𑐔𑐶𑐣𑐵 𑐟𑐬𑐎𑐵𑐬𑐷 𑐩𑐶𑐫𑐵 𑐔𑑂𑐰𑐣𑐶𑐐𑐸 𑐣𑑄 𑐣𑐳𑐣𑐵𑑄 𑐏𑐣𑐷 𑑋 𑐠𑑂𑐰 𑐳𑑂𑐰𑐫𑐵 𑐄𑐥𑐣𑑂𑐫𑐵𑐳𑐎𑐵𑐬𑑄 𑐩𑐶𑐖𑑄𑐥𑑂𑐬𑐢𑐵𑐣 𑐳𑐩𑐵𑐖𑐫𑑂 𑐩𑐶𑐳𑐵𑐟 𑐠𑐠𑐾 𑐴𑐾 𑐣𑑂𑐴𑐫𑐔𑐶𑐮𑐾𑐩𑐵, 𑐀𑐟𑑂𑐫𑐵𑐔𑐵𑐬𑐫𑐵 𑐰𑐶𑐬𑑀𑐢𑐫𑑂 𑐳𑑅 𑐠𑑂𑐰𑐫𑐾𑐎𑐾𑐩𑐵 𑐢𑐿𑐐𑐸 𑐰𑐫𑑂𑐎𑑅𑐫𑐵 𑐄𑐖𑑄 𑑋

𑐕𑐐𑐸 𑐡𑑂𑐫𑐵𑐫𑑂 𑐖𑑂𑐫𑐵𑐎𑐸𑐠𑐷𑐫𑐵 𑐴𑐵𑐎𑐶𑐩𑑄 𑐣𑐳𑐣𑐵𑐫𑐵 𑐥𑐵𑐳𑐵 𑐳𑐸𑐥𑐮𑐵𑐫𑐵𑐟 𑐳𑑅𑐟𑐷, 𑐥𑐸𑐮𑐵𑑄𑐩𑑂𑐴 𑐳𑑂𑐚𑐵𑐦 𑐖𑐸𑐫𑐵𑐣𑑄 𑐩𑐾𑐥𑐶𑑄 𑐳𑑂𑐚𑐵𑐦𑐟𑐫𑐾𑐟 𑐳𑑂𑐫𑑄𑐎𑐮, 𑐩𑐏𑐸 𑐩𑐏𑐸𑐐𑐸 𑐖𑑂𑐫𑐵 𑐫𑐵𑐟 𑐢𑐫𑐵 𑐧𑑂𑐰𑐧𑐶𑐫𑐵 𑐴𑐂 𑑋 𑐕𑐩𑑂𑐴 𑐐𑐬𑐶𑐧𑐩𑐵𑐬𑐵 𑐴𑐵𑐎𑐶𑐩𑑄 𑐠𑐩𑑄 𑐴𑑅𑐩𑑂𑐴 𑐮𑐔𑐣𑐵𑐫𑐵𑐟 𑐔𑐵𑐴𑐶𑑃 𑐕𑑂𑐫𑐣𑐫𑑂 𑐣𑑂𑐴𑐸𑐎𑐵𑐟𑐿𑐐𑐸 𑐐𑐣𑑄 𑐰𑐣𑐾𑐩𑐵𑑅𑐳𑐵𑑄 𑐣𑐵𑐥𑑄 𑐧𑑂𑐰𑐣𑐵 𑐫𑑄𑐎𑐶𑐐𑐸 𑐠𑐸𑐎𑐶 𑐡𑐸𑐠𑑂𑐫𑐵 𑑋 𑐳𑐸𑐥𑐮𑐵 𑐏𑑂𑐰𑐵𑑅𑐴𑐾 𑐎𑐸𑐟𑐸𑑄𑐰𑐣𑐶𑐠𑐾𑑄 𑐔𑑂𑐰𑑄𑐎 𑐥𑐶𑐴𑐵𑑃 𑐰𑐂𑐧𑐮𑐫𑑂 𑐣𑐳𑐣𑐵𑑄 𑐕𑐵𑐫𑑂 𑐕𑐸 𑐖𑐸𑐮 𑐢𑐫𑐵 𑐎𑐸𑐟𑐸𑐎𑐸𑐮𑐵 𑐣𑑂𑐫𑐣𑐵𑑅 𑐏𑑃 𑐠𑐸𑐂𑐎𑐷 𑑋 𑐰𑑂𑐫𑐵𑐴𑐵 𑐖𑐸𑐂 𑐢𑐸𑑄𑐎𑐵 𑐕𑐩𑑂𑐴 𑐩𑑂𑐴𑑂𑐫𑐵𑐫𑑂 𑐡𑐸𑐩𑑂𑐴 𑐴𑐵𑐎𑐶𑐩𑐫𑐵 𑐥𑐴 𑐏𑐣𑐵 𑐰𑐿𑐟 𑐣𑑄 𑐳𑐵𑐥 𑐩𑐣𑐩𑐡𑐂 𑐮𑐔𑐣𑐵𑐣𑐵𑐥𑑄 𑐥𑑂𑐫𑐥𑐸𑐣𑐵 𑐖𑐸𑐂𑐐𑐸 𑐀𑐮𑐾 𑐮𑐔𑐣𑐵𑐫𑐵𑐟 𑐣𑑄 𑐳𑐩𑑂𑐗𑐾𑐫𑐵𑐎𑐾 𑐩𑐦𑑄𑐐𑐸 𑐖𑐸𑐂 𑑋 𑐟𑐬 𑐳𑐟𑑂𑐫 𑐳𑐟𑑂𑐫 𑐴𑐾 𑐏𑑅 𑐀𑐳𑐟𑑂𑐫 𑐀𑐳𑐟𑑂𑐫 𑐴𑐾 𑑋

𑐣𑐳𑐣𑐵𑐫𑐵 𑐖𑑂𑐫𑐵𑐎𑐸𑐠𑐷𑐥𑐵𑐏𑐾𑑄 𑐕𑐐𑐸 𑐰𑑂𑐫𑐵𑐥𑐵𑐬 𑐩𑐾𑐮𑐵 𑐖𑐸𑐂 𑑋 𑐄𑐎𑐶 𑐮𑐔𑐣𑐵𑐫𑐵𑐟 𑐄𑐡𑑂𑐑𑑀𑐲𑐞𑐫𑐵 𑐖𑐶𑐩𑑂𑐩𑐵 𑐧𑐶𑐂 𑑋 𑐰 𑐩𑐾𑐮𑐵𑐫𑑂 𑐴𑐵𑐎𑐶𑐩𑑄 𑐮𑐔𑐣𑐵𑐫𑐵 𑐏𑐸𑐰 𑐟𑐵𑐬𑐶𑐦 𑐫𑐵𑐂 𑐳𑐵 𑐣𑐳𑐣𑐵 𑐰 𑐳𑐸𑐥𑐮𑐵 𑐫𑐵 𑐖𑑂𑐫𑐵 𑐫𑐵𑐟 𑐔𑑂𑐰𑐕𑐵𑐂𑐩𑐏𑐸 𑑋 𑐠𑐸𑐎𑐶𑑄𑐫𑐵𑐣𑐵 𑐮𑐔𑐣𑐵𑐫𑐵 𑐗𑐣𑑂 𑐦𑐸𑑃𑐂 𑐀𑐥𑑀𑐂 𑑋 𑐰 𑐗𑐣𑑂 𑐔𑑄 𑐔𑑄 𑐢𑐵𑐂 𑑋 𑐂𑐩𑐶𑐟 𑐩𑐣𑐹 𑐴𑐾 𑐨𑐵𑐥𑐶𑐂𑐩𑐏𑐸 𑑋 𑐕𑐵𑐫𑑂𑐢𑐵𑑅𑐳𑐵 𑐴𑐵𑐎𑐶𑐩𑑄 𑐮𑐔𑐣𑐵𑐫𑐵𑐟 𑐔𑐵𑐔𑐵 𑐴𑐸𑐎𑐵𑑅 𑐔𑑂𑐰𑑄𑐐𑐸 𑐡𑐂 𑑋 𑐣𑐳𑐣𑐵𑑄 𑐠𑐖𑑀𑐐𑐸 𑐮𑐸 𑐮𑑃𑐫𑑂 𑐰𑐫𑐾 𑐰𑐣𑐾 𑐫𑐵𑐂𑐧𑐮𑐫𑑂 𑐏𑐣𑐵𑐔𑑂𑐰𑐣𑐷 𑑋 𑐠𑐠𑐾 𑐴𑐵𑐎𑐶𑐩𑐫𑐵 𑐥𑐴 𑐏𑐣𑐵 𑐣𑐳𑐣𑐵 𑐰 𑐳𑐸𑐥𑐮𑐵𑐫𑐵 𑐠𑐸𑐐𑐸 𑐮𑐵 𑐫𑐵 𑐟𑐮𑐧 𑐎𑐫𑐵𑑅𑐖𑑂𑐫𑐵 𑐴𑐾 𑐟𑑂𑐰𑐟𑐶𑐐𑐸 𑐰𑐶𑐔𑐵𑑅 𑐫𑐵𑐣𑐵𑐔𑑂𑐰𑐣𑐷 𑑋

𑐟𑐬 𑐣𑐳𑐣𑐵𑐫𑐵𑐟 𑐰 𑐰𑑂𑐫𑐵𑐥𑐵𑐬 𑐩𑐾𑐮𑐵 𑐳𑐶𑐢𑐫𑐾𑐎𑐵 𑐁𑑅 𑐫𑐵𑐟 𑐖𑑂𑐫𑐵 𑐩𑐡𑐸 𑐮𑐶𑐥𑐵 𑐩𑐵𑐮𑐶𑐧𑐮𑐫𑑂 𑐳𑑅𑐟𑐾 𑐢𑐫𑐵 𑐟𑐮𑐧 𑐣𑑄 𑐮𑐶𑐥𑐵 𑐟𑐶𑐣𑐶 𑐢𑐫𑐵 𑐕𑐾𑑃 𑐮𑐶𑐟 𑐕𑑂𑐰𑐫𑐵𑐧𑐶𑐂 𑑋 𑐠𑐩𑑄 𑐫𑐵𑑅𑐐𑐸 𑐖𑑂𑐫𑐵 𑐟 𑐳𑐸𑐥𑐮𑐵𑐫𑐵𑐟 𑐢𑐿𑐠𑐎𑐶 𑐢𑐵𑐐𑐸𑐮𑐶𑑄 𑐰𑐿𑐟 𑐦𑐸𑐎𑑄 𑐧𑐸𑐗𑐾𑐫𑐵𑐣𑐵 𑐄𑐳𑐵𑑄𑐣𑐶𑐳𑐾𑑄 𑐣𑐳𑐣𑐵 𑐰𑐣𑐶𑐩𑐏𑐸 𑑋 𑐳𑐡𑐵𑑄 𑐠𑐾𑑄 𑐮𑐶𑐴𑐵𑑃 𑐰𑐣𑐵𑐔𑑂𑐰𑐣𑐶𑐧𑐮𑐫𑑂 𑐮𑑃𑐫𑑂 𑐣𑐶𑐩𑑂𑐴 𑐩𑐶𑐳𑐵 𑐩𑐶𑐖𑑄 𑐟𑑂𑐰𑐣𑐵𑐟𑑅𑐥𑐶𑑄 𑐮𑑂𑐰𑐵𑐣𑐵𑐔𑑂𑐰𑐣𑐶 𑐖𑐶 𑐣𑐵𑐥𑑄 𑐡𑐾𑐣𑐾 𑐫𑑅 𑐀𑐮𑐾 𑐡𑐵𑑄 𑐧𑐶𑐂 𑐩𑐫𑑅 𑐢𑐫𑐵𑑅 𑑋 𑐩𑐏𑐸𑐳𑐵 𑐖𑐶𑐟𑑅 𑐧𑐮𑐵𑐟𑑂𑐎𑐵𑐬 𑐫𑐵𑐟 𑐢𑐫𑐵 𑐥𑐸𑐮𑐶𑐳𑐠𑐵𑐫𑑂 𑐰𑐣𑐾𑐟𑑂𑐫𑐮 𑐢𑐫𑐵𑑅 𑐴𑐵𑐮𑐵𑐔𑑂𑐰𑐣𑐶𑐐𑐸 𑐏𑐣𑐷 𑑋 𑐀𑐮𑐾 𑐀𑐣 𑐣𑑄 𑐧𑐳𑐫𑑂 𑐰𑐣𑐷 𑐣𑐳𑐣𑐵 𑑋 𑐄𑐏𑐸𑐣𑑂𑐴𑐸 𑐕𑐵𑐫𑑂 𑐕𑐵𑐫𑑂 𑐳𑐶𑐚 𑐩𑐡𑐫𑐾𑐢𑐸𑑄𑐎𑐸𑐐𑐸 𑐧𑐳𑐫𑑂 𑐕𑐩𑑂𑐴 𑐣𑐶𑐩𑑂𑐴 𑐡𑐣𑐵𑐔𑑂𑐰𑑄𑐥𑐶𑑄 𑐡𑐂 𑐳𑐵 𑐄𑐎𑐶 𑐠𑐵𑐴𑐵𑑃𑐰𑐣𑐷 𑑋 𑐮𑐶𑐥𑐵 𑐖𑐸𑐖𑐸𑑄 𑐧𑐳𑐫𑑂 𑐫𑐎𑑂𑐰 𑐩𑐣𑐹 𑐡𑐫𑐵 𑐠𑑅 𑐎𑐵𑑅 𑐰𑐣𑐷 𑑋 𑐀𑐖𑑀𑐠𑐵𑐫𑑂 𑐣𑐳𑐣𑐵𑐫𑐵𑐟 𑐳𑐸𑐮𑐵 𑐳𑐸𑐮𑐵 𑐴𑐾 𑐰 𑐧𑐮𑐵𑐟𑑂𑐎𑐵𑐬𑐷𑑄 𑐠𑑅𑐐𑐸 𑐖𑑂𑐫𑐵 𑐫𑐵𑐣𑐵𑐰𑐣𑐷 𑑋 𑐠𑐠𑐾𑑄 𑐖𑐵𑐐𑐷𑐬 𑐩𑐡𑐫𑐾𑐎𑐵 𑐰𑑅𑐩𑑂𑐴 𑐰𑐿𑐟 𑐕𑐸 𑐖𑐸𑐐𑐸 𑐕𑐸 𑐖𑐸𑐐𑐸𑐠𑐾𑑄 𑐖𑐸𑐂 𑑋 𑐕𑐾𑑃𑐫𑑂 𑐠𑑂𑐫𑑄𑐎𑐵 𑐣𑐳𑐣𑐵 𑐕𑐾𑐮𑐷 𑐴𑐾 𑐏𑑂𑐰𑐫𑐵𑐔𑑂𑐰𑐣𑐷 𑐫𑐵𑐎𑑅𑐔𑐵 𑑋 𑐀𑐮𑐾 𑐀𑐠𑐾𑑄 𑐀𑐠𑐾𑑄 𑐴𑐾 𑐩𑐔𑐵𑐧𑐮𑐫𑑂 𑐫𑐵 𑐏𑑃 𑐮𑐸𑐩𑐣𑐵 𑐰𑐂 𑑋 𑐫𑐾𑑃𑐫𑐵𑐥𑐸𑐣𑑂𑐴𑐶𑐫𑐵 𑐂𑐮𑐫𑑂 𑐀𑐠𑐾𑐴𑐾 𑐗𑐶𑑄𑐣𑐶𑐡𑑃𑐟𑐶 𑐡𑐸𑐧𑐮𑐫𑑂 𑐄𑐏𑐾𑐠𑐸𑐏𑐾 𑐖𑐵𑐟𑑂𑐬𑐵 𑐳𑑂𑐰𑐰𑑄𑐧𑐮𑐫𑑂 𑐟𑐳𑐎𑑄 𑐴𑐸𑐮𑐠𑐵𑐫𑑂 𑐫𑑁𑐣 𑐴𑐶𑑄𑐳𑐵 𑐫𑐵𑑅𑐐𑐸 𑐮𑐸𑐩𑑄𑐎𑐷 𑑋 𑐮𑐶𑐥𑐵 𑐩𑑂𑐴𑑂𑐫𑐵𑐫𑑂𑐫𑐵 𑐏𑐶𑐄𑑃 𑐏𑑂𑐰𑐵𑑅 𑐠𑐸𑐂𑐎𑐵 𑐩𑐵𑑄𑐩𑑂𑐴 𑐎𑑂𑐰𑐠𑐵𑐫𑑂 𑐰𑐫𑐵 𑐏𑑃 𑐣𑑂𑐫𑐣𑐷 𑑋 𑐠𑑅𑐟 𑐖𑐹𑐐𑐸 𑐏𑑃 𑐎𑐣𑐶𑐧𑐮𑐫𑑂 𑐠𑑂𑐰 𑐳𑐩𑐵𑐖𑐫𑑂 𑐩𑐶𑐳𑐵𑐟𑐫𑐾𑐟 𑐠𑐖𑑀𑐐𑐸 𑐑𑐬𑐾𑐮𑐸 𑐫𑑁𑐣 𑐴𑐶𑑄𑐳𑐵 𑐫𑐎𑑂𑐰 𑐴𑐾 𑐖𑐸, 𑐠𑐸𑐎𑐶 𑐠𑑅 𑐧𑐔𑐾 𑐖𑐸𑐂𑐩𑐵 𑐢𑐫𑐵𑑅 𑐩𑐵𑑄𑐩𑑂𑐴𑐾𑐳𑐶𑐫𑐵 𑐠𑑅𑐐𑐸 𑐴𑐾 𑐡𑐸𑑅𑐏 𑐎𑐣𑐷 𑑋 𑐰 𑐂𑐮𑐫𑑂 𑐳𑐵𑐥 𑐡𑐸𑑅𑐏 𑐖𑐸𑐫𑐵 𑐥𑑂𑐰𑐵 𑐖𑐵𑐫𑐾𑐎𑐾𑐟 𑐕𑐩𑑂𑐴 𑐳𑐵𑐴𑐸𑐠𑐵𑐫𑑂 𑐖𑑂𑐫𑐵 𑐫𑐵 𑐰𑐣𑐵 𑐢𑐫𑐵 𑑋 𑐮𑐶𑐥𑐵 𑐕𑐣𑑂𑐴𑐸 𑐳𑐵𑐴𑐸𑐣𑐷 𑐩𑐡𑐸𑐐𑐸 𑐂𑐮𑐫𑑂 𑐰 𑐳𑐵𑐴𑐸𑑄 𑐫𑑁𑐣 𑐴𑐶𑑄𑐳𑐵 𑐫𑐵𑐫𑐾𑐟𑑂𑐫𑐣𑐶 𑐧𑐮𑐫𑑂 𑐴𑐾 𑐳𑐵𑐴𑐸𑐣𑐷𑑄 𑐠𑑂𑐫𑑄𑑄𑐎𑐰𑐫𑐵 𑐳𑑄𑐗𑐾𑐫𑐵𑐣𑐵 𑐴𑑅𑐐𑐸 𑐏𑑃 𑐣𑐳𑐣𑐵𑐫𑐵𑐟 𑐎𑐣𑐷 𑑋 𑐟𑐬 𑐠𑑁𑑄 𑐃 𑐥𑐵𑐫𑐾 𑐢𑐸𑑄𑐎𑐮 𑐣𑑂𑐴𑐵𑐥𑐵𑐠𑐾𑑄 𑐳𑐸𑐣𑐵𑑄 𑐫𑑁𑐣 𑐴𑐶𑑄𑐳𑐵 𑐫𑐵𑑅𑐳𑐵 𑐳𑐴𑐫𑐵𑐣𑐵 𑐩𑐔𑑂𑐰𑑄𑐳𑐾𑑄 𑐀𑐖𑑀𑐥𑐶𑑄𑐟 𑐧𑐾𑐂𑐖𑑂𑐖𑐟 𑐫𑐵𑐫𑐾𑐩𑐵 𑐢𑐫𑐵 𑐐𑑂𑐫𑐵𑑄 𑐧𑐶𑐂 𑑋 𑐕𑐐𑐸 𑐎𑐠𑑄 𑐫𑑁𑐣 𑐴𑐶𑑄𑐳𑐵𑐫𑐵 𑐰𑐶𑐬𑑀𑐢𑐫𑐵 𑐳𑑅 𑐠𑑂𑐰𑐫𑑂𑐎𑑅𑐐𑐸 𑐠𑑂𑐰 𑐄𑐥𑐣𑑂𑐫𑐵𑐳𑐫𑑂 𑐏𑑄𑐎𑐾𑐦𑐹 𑑋 𑐣𑑂𑐴𑐫𑐵𑐎𑑂𑐰 𑐴𑐾 𑐮𑐿𑐐𑐶𑐎 𑐳𑐩𑐵𑐣𑐟𑐵𑐫𑐵 𑐏𑑄, 𑐋𑐣 𑐎𑐵𑐣𑐹𑐣𑐫𑐵 𑐰𑑂𑐫𑐵𑐏𑑂𑐫𑐵𑐳𑐵𑑅𑐳𑐵𑑄 𑐠𑑁𑑄𑐫𑐵 𑐠𑑂𑐰 𑐣𑐷𑐕𑐐𑐹𑐐𑐸 𑐱𑐡𑐷 𑐣𑑄 𑐫𑑁𑐣 𑐥𑐶𑐥𑐵𑐳𑐸𑐟 𑐣𑑂𑐴𑐫𑐵𑐠𑐵𑐫𑑂 𑐣𑑄 𑐡𑐸𑐐𑐸 𑐰 𑐠𑐸𑐎𑐶𑐫𑐵 𑐳𑐸𑐮𑐴 𑐫𑐵𑐫𑐾 𑐩𑐦𑐸𑐐𑐸 𑐟𑐬 𑐰𑑂𑐫𑐰𑐴𑐵𑐬𑐫𑑂 𑐩𑐶𑐳𑐵𑐟𑐫𑑂 𑐳𑐩𑐵𑐣 𑐀𑐢𑐶𑐎𑐵𑐬𑐫𑐵 𑐏𑑃 𑐏𑐵𑐮𑐶 𑐨𑑂𑐰𑑃𑐟𑐫𑑂 𑐖𑐎 𑐮𑐶𑐎𑐸𑐣𑐵𑐔𑑂𑐰𑑄𑐐𑐸 𑐫𑐵𑐟 𑐄𑐥𑐣𑑂𑐫𑐵𑐳𑐎𑐵𑐬𑑄 𑐳𑐩𑐵𑐖𑐫𑐵 𑐣𑑂𑐴𑑂𑐫𑐣𑐾 𑐠𑐣𑐫𑐵 𑐩𑐶𑐏𑐵𑑄 𑐩𑐏𑑄𑐐𑐸 𑐎𑐵𑐣𑐸𑐣𑐫𑐵𑐟 𑐣𑑂𑐴𑑂𑐫𑐣𑐾 𑐄𑐮𑐵𑐡𑐶𑐐𑐸 𑐟𑐳𑐎𑑄 𑐔𑑂𑐰𑐕𑐵𑐫𑐾𑐧𑐴 𑐖𑐹 𑑋 𑐡𑐶𑐰𑑂𑐫𑐵𑐖𑐸 𑐫𑐵 𑐠𑑂𑐰 𑐕𑐐𑐸 𑐫𑑁𑐣 𑐰𑐶𑐲𑐫𑐫𑐵 𑐎𑐠𑐵𑐰𑐳𑑂𑐟𑐸 𑐏𑑅 𑐀𑐠𑐾𑐳𑐵𑑄 𑐳𑐩𑐵𑐖𑐫𑑂 𑐖𑐸𑐫𑐵𑐔𑑂𑐰𑑄𑐐𑐸 𑐖𑐑𑐣𑑂𑐫 𑐫𑑁𑐣 𑐀𑐥𑐬𑐵𑐢𑐫𑐵𑐟 𑐣𑑂𑐴𑑂𑐫𑐔𑑂𑐫𑐵𑐣𑐵𑐡𑐶𑐐𑐸 𑐡𑐸 𑑋 𑐳𑐵𑐢𑐵𑐬𑐞 𑐎𑐠𑐵𑐣𑐎 𑐏𑐫𑐵𑐣𑑄 𑐀𑐮𑐾 𑐩𑑂𑐴𑑀 𑐥𑐵𑐟𑑂𑐬𑐟 𑐖𑐎 𑐧𑐶𑐫𑐵 𑐣𑑄 𑐄𑐥𑐣𑑂𑐫𑐵𑐳 𑐟𑐳𑐎𑑄 𑐳𑑂𑐫𑐮𑐵 𑑋 𑐡𑐶𑐰𑑂𑐫𑐵𑐖𑐸 𑐣𑐳𑐣𑐵 𑐥𑐵𑐟𑑂𑐬𑐫𑐵 𑐬𑐸𑐥𑐫𑑂𑑄 𑐨𑑀𑐐𑐾𑐫𑐵𑐫𑐾𑐩𑐵𑐮𑐵𑐔𑑂𑐰𑑄𑐐𑐸 𑐰𑐳𑑂𑐟𑐸𑐠𑑂𑐟𑐶𑐶 𑐟𑑂𑐰𑑅𑐩𑐥𑐸𑐳𑐾𑑄 𑐳𑐩𑐵𑐖𑐫𑐵𑐟, 𑐳𑐩𑐵𑐖𑐫𑐵 𑐛𑐾𑐎𑐾𑐡𑐵𑐬𑐟𑐫𑐾𑐟 𑐣𑐵𑑄𑐐𑐵 𑐫𑐵𑐣𑐵 𑐎𑑂𑐫𑐣𑐵𑐡𑐶𑐂𑐟 𑐟𑐵𑐮𑐵𑑅𑐐𑐸 𑐏𑐣𑐾𑐡𑐸 𑑋

𑐄𑐥𑐣𑑂𑐫𑐵𑐳𑐫𑐵 𑐮𑐶𑐥𑐵𑑄𑐐𑐸 𑐡𑑂𑐫𑐵𑐫𑑂 𑐕𑐎𑐮𑑄 𑐠𑐸𑐎𑐶𑐫𑐵 𑐥𑐵𑐟𑑂𑐬𑐟 𑐣𑐳𑐣𑐵, 𑐮𑐔𑐣𑐵 𑐰 𑐐𑑀𑐥𑐵𑐮 𑐡𑐵𑐃𑐫𑐵 𑐂𑐴𑐶𑐥𑐵 𑐖𑐸𑐂𑐢𑐸𑑄𑑄𑐎𑐵 𑐣𑑄 𑐠𑑅𑐠𑑅𑐐𑐸 𑐕𑐾𑑃𑐖𑑅𑐥𑐶𑑄 𑐣𑐵𑐥𑑄 𑐃 𑐣𑑂𑐴𑐫𑐵𑐎𑐵 𑐔𑑂𑐰𑐣𑐶𑐐𑐸 𑐰𑑂𑐫𑐵𑐏𑑂𑐫𑐵 𑐡𑐸 𑐣𑐵𑐥𑑄 𑐠𑑅𑐠𑑅𑐐𑐸 𑐴𑐾 𑐮𑐖𑐐𑐵𑐫𑑂 𑐟𑐎𑑂𑐫𑐣𑐵𑐔𑑂𑐰𑑄𑐐𑐸 𑐎𑑂𑐫𑐣𑐵𑐟𑑅𑐐𑐸 𑐡𑐸 𑑋 𑐮𑐔𑐣𑐵𑐫𑐵𑐟 𑐴𑐵𑐎𑐶𑐩𑑄 𑐟𑑂𑐰𑑅𑐟𑐵 𑐰𑑂𑐫𑐹𑐐𑐸 𑐰 𑐠𑑅 𑐳𑑂𑐰𑐫𑐵 𑐫𑐎𑑂𑐰 𑐠𑑄𑐩𑑂𑐴𑐣𑐶𑐳𑐾𑑄 𑐰𑑂𑐫𑐵𑐴𑐵 𑐫𑐵𑐣𑐵 𑐣𑑄 𑐨𑐵𑑅𑐟 𑐩𑐡𑐫𑐾𑐢𑐸𑑄𑐎𑐸𑐐𑐸 𑐖𑐸𑐂 𑑋 𑐠𑐣𑐠𑐵𑐫𑑂 𑐢𑐵𑐫𑐾𑐦𑐸 𑐣𑑂𑐴𑐫𑐵𑐎𑑂𑐰 𑐴𑐾 𑐡𑐸𑑅𑐏𑐖𑐸𑐳𑐵𑑄 𑐀𑐣𑑂𑐟𑐫𑑂 𑐳𑐸𑐏𑐵𑐣𑑂𑐟 𑐖𑐸𑐂𑐎𑐵𑐟𑑅𑐐𑐸 𑐕𑐐𑐹 𑐳𑐎𑐵𑐬𑐵𑐟𑑂𑐟𑑂𑐩𑐎 𑐄𑐥𑐣𑑂𑐫𑐵𑐳 𑐏𑑅 𑐩𑐫𑑂𑐖𑐸 𑑋

𑐡𑐶𑐰𑑂𑐫𑐵 𑐰𑐖𑑂𑐬𑐵𑐔𑐵𑐬𑑂𑐫𑐖𑐸𑑄 𑐠𑑂𑐰 𑐄𑐥𑐣𑑂𑐫𑐵𑐳𑐫𑐵 𑐀𑐣𑑂𑐟𑐫𑑂 𑐨𑐟𑐶𑐔𑐵 𑐴𑐠𑐵𑐫𑑂𑐥𑐠𑐵𑐫𑑂 𑐔𑐵𑐫𑐵 𑐎𑑂𑐰𑐔𑐵𑐫𑐾𑐎𑐵𑐟𑑅𑐐𑐸 𑐠𑐾𑑄 𑐏𑐣𑐾𑐡𑐸 𑑋 𑐕𑐵𑐫𑑂𑐢𑐵𑑅𑐳𑐵 𑐣𑐳𑐣𑐵𑐫𑐵 𑐰𑑂𑐫𑐵𑐴𑐵𑐖𑐸𑐫𑐵 𑐣𑑄 𑐣𑐶𑐩𑑂𑐴 𑐩𑑂𑐴𑑂𑐫𑐵𑐫𑑂 𑐡𑐿𑐐𑐸, 𑐴𑐵𑐎𑐶𑐩𑑄 𑐟𑑂𑐰𑑅𑐟𑐵 𑐰𑑂𑐫𑐹𑐐𑐸 𑐏𑑃 𑐀𑐮𑐾 𑐰𑐫𑐵 𑐰𑑂𑐫𑐵𑐴𑐵 𑐖𑐹𑐐𑐸 𑐏𑑃 𑐀𑐖𑐐 𑐐𑑀𑐥𑐵𑐮 𑐡𑐵𑐃𑐫𑐵 𑐣𑑄 𑐰𑐿𑐰𑐵𑐴𑐶𑐎 𑐖𑐷𑐰𑐣 𑐟𑐵𑐮𑐵𑑅𑐐𑐸 𑐦𑐸𑐎𑑄 𑐠𑑂𑐰 𑐡𑑂𑐫𑐵𑐫𑑂 𑐧𑑂𑐰𑐣𑐾𑐡𑐸 𑑋 𑐔𑑂𑐰𑐫𑐾𑐫𑐵 𑐡𑑂𑐫𑐵𑐫𑑂 𑐟𑐳𑐎𑑄 𑐩𑐵𑑅𑐴𑑄𑐎 𑐣𑐳𑐣𑐵 𑐰 𑐳𑐸𑐥𑐮𑐵𑐫𑐵 𑐣𑑂𑐴𑐶𑐔𑑂𑐕𑐶𑐫𑐵 𑐧𑐫𑐵𑐣 𑐫𑐵𑐣𑐵𑐟𑑅𑐐𑐸 𑐠𑑂𑐰 𑐄𑐥𑐣𑑂𑐫𑐵𑐳𑐫𑑂 𑐮𑐶𑐥𑐵𑑄𑐐𑐸 𑐡𑑂𑐫𑐵𑐫𑑂 𑐠𑐠𑐾 𑐫𑐵𑐫𑐾𑐩𑐦𑐹𑐠𑐾𑑄 𑐏𑐣𑐾𑐡𑐸 𑑋 𑐳𑐏𑐾 𑐄𑐥𑐣𑑂𑐫𑐵𑐳𑐎𑐵𑐬𑑄 𑐠𑐸𑐎𑐶𑐫𑐵𑐟 𑐫𑐵𑐎𑐣𑑄 𑐎𑑂𑐰𑐔𑐵𑐫𑐾𑐎𑐾 𑐟𑑂𑐫𑑄𑐐𑐸 𑐠𑐾𑑄 𑐖𑐸𑐰𑐐𑐸 𑐡𑐸 𑑋 𑐣𑑂𑐴𑑂𑐫𑐵𑐐𑐸𑐠𑐖𑐸 𑐡𑐶𑐰𑑂𑐫𑐵𑐖𑐸 𑐕𑐩𑑂𑐴 𑐄𑐥𑐣𑑂𑐫𑐵𑐳𑐎𑐵𑐬 𑐎𑐠𑑄 𑐡𑑄 𑐗𑐵𑑅𑐐𑐸 𑐡𑐸, 𑐰𑐫𑑂𑐎𑑅𑐫𑐵 𑐣𑑂𑐴𑐵𑐥𑐵𑑄𑐐𑐸 𑐄𑐥𑐣𑑂𑐫𑐵𑐳 𑐏𑐫𑐵𑐣𑑄 𑐧𑐵𑑄𑐮𑐵𑐖𑐹 𑐀𑐮𑐾 𑐮𑐶𑐥𑐵 𑐣𑑄 𑐠𑑂𑐰 𑐳𑐶𑐧𑐾𑑄 𑐣𑑄 𑐀𑐖 𑐧𑐵𑑄𑐧𑐵𑐮𑐵𑑅𑐐𑐸 𑐄𑐥𑐣𑑂𑐫𑐵𑐳 𑐧𑑂𑐰𑐣𑐾𑐡𑐂 𑐢𑐿𑐐𑐸 𑐨𑐮𑐳𑐵 𑐎𑐫𑐵𑑅 𑐠𑑂𑐰 𑐄𑐥𑐣𑑂𑐫𑐵𑐳𑐫𑐵 𑐮𑐵𑐐𑐶𑑄 𑐳𑐸𑐨𑐵𑐫𑑂 𑑋

𑐣𑐾.𑐳𑑄. 𑑑𑑑𑑔𑑓 𑐐𑐸𑑃𑐮𑐵𑐐𑐵𑑅 𑐡𑑂𑐰𑐵𑐡𑐱𑐷

𑐡𑐷𑐥𑐎 𑐬𑐵𑐖 “𑐏𑑂𑐰𑐥”