‘𑐩𑐳𑑂𑐟𑐫𑑂𑐟 𑐳𑐎𑑂𑐬𑐶𑐫 𑐫𑐵𑐫𑐾𑐦𑑅𑐳𑐵 𑐖𑐎 𑐨𑐵𑐲𑐵𑐫𑐵 𑐰𑐶𑐎𑐵𑐳 𑐖𑐸𑐂’

𑐣𑐾𑐥𑐵𑐮𑐨𑐵𑐲𑐵 𑐩𑐔𑐵𑐳𑐵𑐴𑐶𑐟𑑂𑐫𑐫𑐵 𑐳𑐩𑐳𑑂𑐫𑐵 𑐰 𑐥𑑂𑐬𑐰𑐡𑑂𑐬𑑂𑐢𑐣𑐫𑐵 𑐄𑐥𑐵𑐫 𑐰𑐶𑐲𑐫𑐫𑑂 𑐩𑑂𑐴𑐶𑐐𑑅 𑐕𑐐𑐹 𑐧𑐶𑐔𑐵𑑅 𑐐𑑀𑐲𑑂𑐛𑐷 𑐖𑐸𑐮 𑑋 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐜𑐾𑐩𑐷𑐫𑐵 𑐐𑑂𑐰𑐳𑐵𑐮𑐫𑑂 𑐖𑐹𑐐𑐸 𑐧𑐶𑐔𑐵𑑅 𑐐𑑀𑐲𑑂𑐛𑐷 𑐰𑐬𑐶𑐲𑑂𑐛 𑐩𑐔𑐵𑐳𑐵𑐴𑐶𑐟𑑂𑐫𑐎𑐵𑐬 𑐱𑐵𑐣𑑂𑐟𑐡𑐵𑐳 𑐩𑐵𑐣𑐣𑑂𑐢𑐬𑐫𑐵 𑐩𑐹 𑐥𑐵𑑃𑐴𑐵𑑄𑐳𑐸𑐂 𑐖𑐹𑐐𑐸 𑐏𑑅 𑑋

𑐟𑐵𑑅𑐂𑐮𑑄𑐣𑐶𑐳𑐾𑑄 𑐩𑐔𑐵 𑐳𑐵𑐴𑐶𑐟𑑂𑐫𑐫𑑂 𑐮𑑂𑐴𑐵𑑅 𑐣𑑂𑐴𑑂𑐫𑐵𑐎𑐵𑑅 𑐰𑐫𑐵𑐔𑑂𑐰𑐣𑐵𑐡𑐷𑐩𑑂𑐴 𑐰 𑐰𑐶.𑐳𑑄. 𑑒𑑐𑑒𑑐 𑐳𑐵𑐮𑐫𑐵 𑐣𑐾𑐥𑐵𑐮𑐨𑐵𑐲𑐵𑐫𑐵 𑐕𑐩𑑂𑐴 𑐣𑑂𑐴𑑂𑐫𑐮𑐸𑐰𑐵 𑐱𑐵𑐣𑑂𑐟𑐡𑐵𑐳 𑐩𑐵𑐣𑐣𑑂𑐢𑐬𑑄 𑐠𑑅𑐐𑐸 𑐣𑐸𑐐𑑅 𑐏𑑃 𑐥𑑂𑐰𑑄𑐎𑐾𑐐𑐸 𑐗𑑂𑐰𑐮𑐫𑑂 𑐠𑑅 𑐩𑐔𑐵 𑐳𑐵𑐴𑐶𑐟𑑂𑐫𑐎𑐵𑐬 𑐩𑐏𑐸, 𑐩𑐔𑐵 𑐎𑐵𑐂𑐩𑑂𑐴 𑐖𑑂𑐫𑐵𑐩𑐶 𑐖𑐎 𑐏𑑅 𑐢𑐫𑐵𑐡𑐶𑐮 𑑋 𑐩𑐔𑐵𑐟𑐫𑑂𑐟 𑐥𑐵𑐳𑐵 𑐡𑐫𑐾𑐎𑐷𑐥𑐶𑑄 𑐖𑑂𑐫𑐵 𑐩𑐰𑑅 𑐢𑐵𑐂𑐐𑐸 𑐗𑐷𑐐𑐸 𑐳𑐩𑐵𑐖𑐫𑑂 𑐩𑐔𑐵𑐟𑐫𑑂𑐟 𑐳𑐎𑑂𑐬𑐶𑐫 𑐫𑐵𑐫𑐾𑐦𑐟 𑐢𑐵𑑅𑐳𑐵 𑐟𑐶𑐣𑐶 𑐗𑐷𑐐𑐸 𑐨𑐵𑐲𑐵, 𑐳𑐵𑐴𑐶𑐟𑑂𑐫𑐫𑐵 𑐰𑐶𑐎𑐵𑐳𑐫𑑂 𑐟𑐶𑐧𑑅 𑐖𑐸𑐂 𑐢𑐫𑐵𑐡𑐶𑐮 𑑋 𑐗𑐷𑐳𑑄 𑐗𑐷 𑐩𑐳𑑂𑐟𑐫𑑂𑐟 𑐕𑐸 𑐧𑑂𑐰𑑄𑐎𑐾𑐐𑐸 𑐢𑐫𑐵𑐐𑐸 𑐧𑐵𑐬𑐾 𑐳𑑂𑐥𑐲𑑂𑐚 𑐖𑐸𑐂𑐩𑐵𑑅 𑐢𑐵𑐳𑐾𑑄 𑐰𑐫𑑂𑐎𑐮𑑄 𑐫𑐹𑐬𑑀𑐥𑐶𑐫𑐣𑐟𑐫𑑂𑐐𑐸 𑐣𑐎𑑂𑐎𑐮 𑐫𑐵𑐣𑐵𑑅 𑐩𑐔𑐵 𑐳𑐵𑐴𑐶𑐟𑑂𑐫𑐫𑑂 𑐦𑑂𑐫𑐵𑐣𑑂𑐚𑐵𑐳𑐷 𑐰𑐶𑐲𑐫 𑐧𑑂𑐰𑑄𑐎𑐾𑐐𑐸 𑐫𑐵𑐟 𑐢𑐵𑑅𑐳𑐵 𑐗𑐷𑐐𑐸 𑐐𑐟𑐶𑐥𑐟𑐶 𑐡𑐂𑐩𑐏𑐸 𑐢𑐵𑐳𑐾𑑄 𑐗𑐷𑐳𑑄 𑐗𑐷𑐐𑐸 𑐴𑐾 𑐳𑑄𑐳𑑂𑐎𑐵𑐬 𑐳𑑄𑐳𑑂𑐎𑐺𑐟𑐶 𑐰 𑐗𑐷𑐐𑐸 𑐥𑐬𑐶𑐰𑐾𑐱𑐫𑐵 𑐰𑐶𑐲𑐫𑐰𑐳𑑂𑐟𑐸 𑐡𑐫𑐾𑐎𑐵𑑅 𑐳𑐵𑐴𑐶𑐟𑑂𑐫 𑐔𑑂𑐰𑐫𑐾𑐩𑐵𑑅 𑐏𑑃𑐫𑑂 𑐧𑑅 𑐧𑐶𑐫𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑑅𑐫𑐵 𑐩𑐾𑐩𑑂𑐴 𑐰𑐎𑑂𑐟𑐵 𑐰 𑐩𑐔𑐵 𑐮𑐫𑑂𑐥𑑁 𑐃𑐮𑑂𑐰𑐴𑑄 𑐥𑑂𑐬𑐎𑐵𑐱𑐣 𑐳𑑄𑐳𑑂𑐠𑐵𑐫𑐵 𑐴𑐵𑐩𑐵 𑐣𑐬𑐾𑐱𑐰𑐷𑐬 𑐱𑐵𑐎𑑂𑐫𑑄 𑐩𑐔𑐵𑐟𑐫𑑂𑐟 𑐫𑑅𑐐𑐸 𑐖𑐎 𑐩𑐏𑐸 𑐮𑑂𑐰𑐫𑐾𑐎 𑐰 𑐩𑐔𑐵𑐟𑐫𑑂𑐟 𑐳𑑄𑐳𑑂𑐎𑐵𑐬𑐶𑐟 𑐫𑐵𑐫𑐾𑐟, 𑐣𑐿𑐟𑐶𑐎𑐟𑐵, 𑐁𑐟𑑂𑐩𑐰𑐶𑐱𑑂𑐰𑐵𑐳 𑐧𑑂𑐰𑐮𑑄𑐎𑐾𑐟 𑐰 𑐗𑐷𑐐𑐸 𑐳𑑄𑐳𑑂𑐎𑐵𑐬 𑐳𑑂𑐫𑐣𑐾𑐟, 𑐧𑑂𑐰𑑄𑐎𑐾𑐟 𑐩𑐔𑐵𑐳𑐵𑐴𑐶𑐟𑑂𑐫 𑐔𑑂𑐰𑐫𑐾𑐩𑐵𑑅𑐐𑐸 𑐏𑑃 𑐎𑐣𑐵𑐡𑐶𑐮 𑑋 𑐩𑐔𑐵𑐳𑐵𑐴𑐶𑐟𑑂𑐫𑐫𑐵 𑐳𑐩𑐳𑑂𑐫𑐵 𑐢𑐫𑐵𑐐𑐸 𑐴𑐾 𑐗𑐷 𑐠𑑅 𑐴𑐾 𑐏𑑅 𑐢𑐵𑐳𑐾𑑄 𑐰𑐫𑑂𑐎𑐮𑑄 𑐩𑐔𑐵 𑐳𑐵𑐴𑐶𑐟𑑂𑐫 𑐧𑑂𑐰𑐣𑐷𑐥𑐶𑑄 𑐰 𑐧𑑂𑐰𑑄𑐎𑐷𑐥𑐶𑑄 𑐴𑐾 𑐎𑐸𑐟𑑅 𑐩𑐫𑐵𑑅𑐐𑐸 𑐏𑑃 𑐎𑐸𑐮𑐵𑐡𑐶𑐮 𑑋 𑐗𑐷𑐎𑐾 𑐩𑐾𑐩𑐾𑐐𑐸 𑐨𑐵𑐲𑐵𑐫𑐵 𑐥𑐟𑑂𑐬𑐶𑐎𑐵 𑐡𑐫𑐵𑐔𑑂𑐰𑐣𑐷 𑐟𑐬 𑐠𑑅𑐐𑐸 𑐴𑐾 𑐨𑐵𑐲𑐵𑐫𑐵 𑐥𑐟𑑂𑐬𑐶𑐎𑐵 𑐳𑑂𑐰𑐫𑐾𑐐𑐸 𑐎𑐸𑐟𑑅 𑐗𑐷𑐳𑑄 𑐫𑐵𑐣𑐵 𑐩𑐔𑑂𑐰𑐣𑐵𑐐𑐸 𑐴𑐾 𑐠𑐸𑐎𑐶𑐫𑐵 𑐳𑐩𑐳𑑂𑐫𑐵 𑐏𑑅 𑐢𑐫𑐵𑐡𑐶𑐮 𑑋

𑐩𑐔𑐵𑐳𑐵𑐴𑐶𑐟𑑂𑐫𑐫𑑂 𑐳𑑂𑐫𑐮𑑂𑐮𑐵𑑅𑐐𑐸 𑐮𑑂𑐴𑐵𑑅 𑐣𑑂𑐴𑑂𑐫𑐵𑐎𑐵𑐔𑑂𑐰𑐣𑐵𑐡𑐷𑐩𑑂𑐴 𑐮𑑀𑐎𑐎𑐰𑐶 𑐬𑐵𑐖𑐨𑐵𑐃 𑐖𑐎𑑅𑐩𑐶𑑄 𑐮𑐶𑐏𑐶𑐟 𑐬𑐸𑐥𑑄 𑐴𑐾 𑐩𑐔𑐵𑐳𑐵𑐴𑐶𑐟𑑂𑐫𑐫𑐵 𑐳𑐩𑐳𑑂𑐫𑐵 𑐰 𑐠𑐸𑐎𑐶𑐫𑐵𑐟 𑐥𑑂𑐬𑐰𑐡𑑂𑐬𑑂𑐢𑐣𑐫𑐵 𑐄𑐥𑐵𑐫 𑐧𑐵𑐬𑐾 𑐎𑐸𑐮𑐵𑐡𑐷𑐐𑐸 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐕𑐐𑐹 𑐡𑐱𑐎𑑄 𑐩𑐮𑑂𑐫𑐵𑐎 𑐳𑑂𑐎𑐹𑐮𑐫𑑂 𑐣𑐾𑐥𑐵𑐮𑐨𑐵𑐲𑐵 𑐳𑑂𑐫𑐣𑐾𑐐𑐸 𑐖𑑂𑐫𑐵 𑐫𑐵𑐣𑐵𑐔𑑂𑐰𑐣𑐵𑐡𑐷𑐩𑑂𑐴 𑐱𑐶𑐎𑑂𑐲𑐶𑐎𑐵 𑐬𑐩𑐶𑐟𑐵 𑐰𑐖𑑂𑐬𑐵𑐔𑐵𑐬𑑂𑐫 𑐣𑑄 𑐠𑑅𑐐𑐸 𑐣𑐸𑐐𑑅 𑐏𑑃 𑐥𑑂𑐰𑑄𑐎𑐵𑐡𑐷𑐐𑐸 𑐏𑑅 𑑋

𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐜𑐾𑐩𑐷𑐫𑐵 𑐔𑐵𑐣𑑂𑐳𑐮𑐬 𑐫𑐖𑑂𑐘𑐬𑐟𑑂𑐣 𑐢𑐵𑐏𑑂𑐰𑐵𑐫𑐵 𑐣𑐵𑐫𑑅𑐳𑐸𑐂 𑐖𑐹𑐐𑐸 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐊𑐎𑐾𑐜𑐾𑐩𑐷𑐫𑐵 𑐎𑐵𑐬𑑂𑐫𑐳𑐩𑐶𑐟𑐶𑐫𑐵 𑐡𑐸𑐖𑑅 𑐰 𑐳𑐵𑐴𑐶𑐟𑑂𑐫 𑐎𑐰𑑅𑐫𑐵 𑐎𑐖𑐶 𑐟𑑂𑐬𑐶𑐬𑐟𑑂𑐣 𑐱𑐵𑐎𑑂𑐫𑑄 𑐮𑐳𑐎𑐸𑐮 𑐫𑐵𑐣𑐵𑐡𑐷𑐐𑐸 𑐏𑑅𑐳𑐵 𑐩𑐾𑐩𑑂𑐴 𑐡𑐸𑐖𑑅 𑐱𑐵𑐎𑑂𑐫 𑐳𑐸𑐬𑐾𑐣𑑄 𑐳𑐸𑐨𑐵𑐫𑑂 𑐡𑐾𑐕𑐵𑐫𑐵𑐡𑐷𑐐𑐸 𑐏𑑅 𑑋