𑐩𑐴𑐵𑐎𑐰𑐶 𑐐𑐶𑐬𑐶𑐖𑐵𑐥𑑂𑐬𑐳𑐵𑐡 𑐖𑑀𑐱𑐷𑐫𑐵 𑐳𑐩𑐵𑐮𑑀𑐔𑐣𑐵 𑐳𑐦𑐹

𑐩𑐴𑐵𑐎𑐰𑐶 𑐐𑐶𑐬𑐶𑐖𑐵𑐥𑑂𑐬𑐳𑐵𑐡 𑐖𑑀𑐱𑐷𑑄 𑑘𑑔 𑐎𑑂𑐰𑑅𑐐𑐸 𑐧𑐸𑐣𑑂𑐴𑐶𑐫𑐵 𑐮𑐳𑐟𑐵𑐫𑑂 ‘𑐐𑐶𑐬𑐶𑐖𑐵𑐥𑑂𑐬𑐳𑐵𑐡𑐫𑐵 𑐳𑐩𑐵𑐮𑑀𑐔𑐣𑐵 𑐳𑐦𑐹’ 𑐥𑐶𑐟𑐧𑑂𑐰𑐖𑑂𑐫𑐵 𑐫𑐵𑑅𑐐𑐸 𑐡𑐸 𑑋  𑐩𑐴𑐵𑐎𑐰𑐶 𑐖𑑀𑐱𑐷𑑄 𑐠𑑅𑐐𑐸 𑐖𑐷𑐰𑐣𑐎𑐵𑐮𑐫𑑂 𑐠𑐷𑐠𑐷 𑐔𑑂𑐰𑐩𑐶𑐫𑐵 𑐎𑐺𑐟𑐶𑐫𑐵𑐟 𑐎𑐫𑐵𑑅 𑐫𑐵𑐣𑐵𑐡𑐷𑐐𑐸 𑐳𑐩𑐵𑐮𑑀𑐔𑐣𑐵 𑐳𑑄𑐐𑑂𑐬𑐴 ‘𑐐𑐶𑐬𑐶𑐖𑐵𑐥𑑂𑐬𑐳𑐵𑐡𑐫𑐵 𑐳𑐩𑐵𑐮𑑀𑐔𑐣𑐵’ 𑐣𑐵𑑄𑐫𑐵 𑐳𑐦𑐹 𑐰𑑄𑐐𑐸 𑐱𑐣𑐶𑐰𑐵𑑅 𑐳𑐎𑑂𑐰𑐫𑑂 𑐖𑐹𑐐𑐸 𑐕𑐐𑐹 𑐖𑑂𑐫𑐵𑐗𑑂𑐰𑑅𑐫𑐵 𑐡𑐠𑐸𑐂 𑐥𑐶𑐟𑐧𑑂𑐰𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋

𑐳𑐎𑑂𑐰 𑐎𑐺𑐲𑐶 𑐦𑐵𑐬𑑂𑐩𑐫𑑂 𑐦𑐵𑐬𑑂𑐩𑐫𑐵 𑐳𑑄𑐔𑐵𑐮𑐎 𑐨𑐵𑐲𑐵𑐳𑐾𑐰𑐷 𑐃. 𑐬𑐵𑐖𑐡𑐵𑐳 𑐱𑑂𑐬𑐾𑐲𑑂𑐛𑐫𑐵 𑐳𑐨𑐵𑐥𑐟𑑂𑐰𑐶𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐳𑐵𑐴𑐶𑐟𑑂𑐫𑐎𑐵𑐬𑐮𑐶𑐳𑐾𑑄 𑐳𑐩𑐵𑐮𑑀𑐔𑐎 𑐢𑑂𑐬𑐸𑐰 𑐩𑐢𑐶𑐎𑑅𑐩𑐶𑑄 𑐳𑐦𑐹𑐫𑐵 𑐥𑐶𑐟𑐧𑑂𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐣𑐰𑐵𑐳𑐾𑑄 𑐳𑐵𑐴𑐶𑐟𑑂𑐫𑐎𑐵𑐬 𑐩𑐢𑐶𑐎𑑅𑐩𑐶𑑄 𑐠𑑁𑑄𑐫𑐵 𑐂𑐮𑐫𑑂 𑐰𑐫𑐵𑑅 𑐐𑐶𑐬𑐶𑐖𑐵𑐥𑑂𑐬𑐳𑐵𑐡𑐫𑐵 𑐳𑐩𑐵𑐮𑑀𑐔𑐣𑐵 𑐳𑐦𑐹 𑐧𑑂𑐰𑐣𑐾 𑐏𑑄𑐐𑐸 𑐢𑐂𑐐𑐸 𑐣𑑄 𑐗𑐷𑐐𑐸 𑐣𑐶𑑄𑐟𑐶𑑄 𑐟𑑅𑐢𑑄𑐐𑐸 𑐳𑑁𑐨𑐵𑐐𑑂𑐫 𑐴𑐾 𑐏𑑅𑐳𑐵𑑄 𑐣𑑄 𑐟𑑅𑐡𑑃 𑐟𑐎 𑐰𑐫𑑂𑐎𑑅𑐫𑐵 𑐎𑐺𑐟𑐶 𑐧𑐵𑐬𑐾 𑐖𑐵𑐣𑐎𑐵𑐬𑐷 𑐩𑐡𑐫𑐵𑐔𑑂𑐰𑑄𑐐𑐸 𑐡𑐸𑐬𑑂𑐨𑐵𑐐𑑂𑐫 𑐏𑑅 𑐢𑐫𑐵𑐡𑐶𑐮 𑑋

𑐩𑐴𑐵𑐎𑐰𑐶 𑐖𑑀𑐱𑐷𑐫𑐵 𑐟𑑅𑐢𑐶𑐎𑑅𑐩𑑂𑐴 𑐎𑐵𑐫 𑐎𑐸𑐘𑑂𑐖 𑐖𑑀𑐱𑐷𑑄 𑐩𑐴𑐵𑐎𑐰𑐶𑐫𑐵 𑐡𑐾𑐣𑐫𑐵 𑐧𑐵𑐬𑐾 𑐔𑐬𑑂𑐔𑐵 𑐫𑐵𑐳𑐾𑑄 𑐰𑐫𑑂𑐎𑐮𑑄 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑐵 𑐎𑑂𑐲𑐾𑐟𑑂𑐬𑐫𑑂 𑐠𑑅𑐐𑐸 𑐖𑐷𑐰𑐣 𑐰 𑐩𑐺𑐟𑑂𑐫𑐸𑐮𑐶𑐥𑐵 𑐣𑑄 𑐁𑐥𑐵𑐮𑑄 𑐔𑐬𑑂𑐔𑐵 𑐩𑐸𑑄𑐎𑐾𑐟 𑐟𑐵𑑅𑐮𑐵𑑅𑐐𑐸𑐮𑐶𑑄 𑐠𑑅𑐥𑐶𑑄𑐟 𑐐𑑁𑐬𑐰 𑐩𑐴𑐳𑐸𑐳 𑐖𑐹𑐐𑐸 𑐢𑐫𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐠𑑅 𑐀𑐧𑐸 𑐰𑐵𑐩𑐥𑐣𑑂𑐠𑐷 𑐰𑐶𑐔𑐵𑐬𑐢𑐵𑐬𑐵𑐫𑐵 𑐰𑑂𑐫𑐎𑑂𑐟𑐶𑐟𑑂𑐰 𑐖𑐹𑐐𑐸 𑐰 𑐟𑐵𑐟𑑂𑐎𑐵𑐮𑐷𑐣 𑐥𑑄𑐔𑐵𑐫𑐟𑐷 𑐰𑑂𑐫𑐰𑐳𑑂𑐠𑐵 𑐰𑐶𑐬𑐸𑐡𑑂𑐢 𑐫𑐵𑑅𑐐𑐸 𑐳𑑄𑐑𑐬𑑂𑐲𑐫𑐵 𑐎𑐵𑐬𑐞𑑄 𑐖𑐾𑐮 𑐔𑑂𑐰𑑄𑐐𑐸 𑐂𑐮𑐫𑑂 𑐫𑐵𑑅𑐐𑐸 𑐡𑐸𑐰𑑂𑐬𑑂𑐫𑐰𑐴𑐵𑐬𑐫𑐵 𑐎𑐵𑐬𑐞𑑄 𑐩𑑂𑐴𑑀 𑐂𑐮𑐫𑑂 𑐴𑐾 𑐩𑐺𑐟𑑂𑐫𑐸𑐰𑐬𑐞 𑐫𑐵𑐫𑐾𑐩𑐵𑑅𑐐𑐸 𑐏𑑅 𑐢𑐫𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑑅𑐫𑐵 𑐳𑐨𑐵𑐥𑐟𑐶 𑐃. 𑐱𑑂𑐬𑐾𑐲𑑂𑐛𑑄 𑐩𑐴𑐵𑐎𑐰𑐶 𑐖𑑀𑐱𑐷𑐫𑐵 𑐎𑐺𑐟𑐶 𑐥𑐶𑐠𑐣𑐾𑐐𑐸 𑐣𑐶𑑄𑐟𑐶𑑄 𑐠𑑅 𑐟𑐳𑐎𑑄 𑐮𑐵𑐮𑐫𑐶𑐟 𑐖𑐸𑐫𑐵𑐔𑑂𑐰𑐣𑐵𑐐𑐸 𑐢𑐵𑐳𑐾𑑄 𑐩𑐾𑐐𑐸 𑐣𑐶𑐐𑐹 𑐳𑐦𑐹 𑐣𑑄 𑐫𑐵𑐎𑐣𑑄 𑐥𑑂𑐬𑐎𑐵𑐱𑐣 𑐫𑐵𑐫𑐾𑐐𑐸𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋 𑐮𑐶𑐳𑐾𑑄 𑐰𑐫𑑂𑐎𑐮𑑄 𑐠𑑅𑐐𑐸 𑐀𑐩𑐾𑐬𑐶𑐎𑐵𑐫𑐵 𑐫𑐵𑐟𑑂𑐬𑐵𑐫𑐵 𑐳𑑄𑐳𑑂𑐩𑐬𑐞 𑐣𑑄 𑐣𑐾𑐥𑐵𑐮𑐨𑐵𑐲𑐵 𑐰 𑐏𑐳𑑂 𑐨𑐵𑐳𑑄 𑐥𑐶𑐠𑐣𑐾𑐐𑐸 𑐖𑐵𑐣𑐎𑐵𑐬𑐷 𑐣𑑄 𑐧𑐶𑐫𑐵𑐡𑐷𑐐𑐸 𑐏𑑅 𑑋

𑐄𑐐𑐸 𑐴𑐾 𑐖𑑂𑐫𑐵𑐗𑑂𑐰𑐮𑐫𑑂 𑐨𑐵𑐲𑐵, 𑐳𑑄𑐳𑑂𑐎𑐺𑐟𑐶, 𑐎𑐮𑐵 𑐰 𑐥𑐟𑑂𑐬𑐎𑐵𑐬𑐶𑐟𑐵𑐫𑐵 𑐩𑐵𑐢𑑂𑐫𑐩𑑄 𑐧𑐶𑐫𑐵𑐡𑐷𑐐𑐸 𑐫𑑀𑐐𑐡𑐵𑐣𑐫𑐵 𑐎𑐡𑐬 𑐫𑐵𑐳𑐾𑑄 𑐳𑐎𑑂𑐰𑐫𑐵 𑐨𑐵𑐲𑐵𑐳𑐾𑐰𑐷 𑐬𑐘𑑂𑐖𑐣 𑐱𑑂𑐬𑐾𑐲𑑂𑐛, 𑐄𑐖𑑂𑐫𑐵𑐮𑑀 𑐊𑐦𑐊𑐩𑐫𑐵 𑐎𑐸𑐩𑐵𑐬 𑐬𑑄𑐖𑐶𑐟, 𑐣𑐾𑐥𑐵𑐮𑐩𑐞𑑂𑐜𑐮 𑐚𑐾𑐮𑐶𑐨𑐶𑐖𑐣𑐫𑐵 𑐳𑐶𑐮𑑂𑐨𑐶𑐫𑐵 𑐬𑐵𑐖𑑀𑐥𑐵𑐢𑑂𑐫𑐵𑐫, 𑐮𑐵𑐰𑐞𑑂𑐫 𑐳𑐣𑑂𑐡𑐾𑐱 𑐳𑐵𑐥𑑂𑐟𑐵𑐴𑐶𑐎, 𑐳𑑄𑐔𑐵𑐬𑐎𑑅𑐩𑐶 𑐳𑐖𑐣𑐵 𑐟𑐶𑐩𑐶𑐮𑑂𑐳𑐶𑐣𑐵𑐫𑐵𑐟 𑐡𑐵𑑄𑐮𑐶𑐳𑐾𑑄 𑐴𑐣𑐵𑐥𑑁 𑐡𑐾𑐕𑐵𑐣𑐵𑑅 𑐴𑐣𑐾𑐖𑑂𑐫𑐵 𑐣𑑄 𑐫𑐵𑑅𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐳𑐎𑑂𑐰𑐫𑐵 𑐨𑐵𑐲𑐵𑐳𑐾𑐰𑐷𑐮𑐶𑐳𑐾𑑄 𑐳𑑄𑐳𑑂𑐎𑐺𑐟𑐶𑐰𑐶𑐡 𑐥𑑂𑐬𑐎𑐵𑐱𑐩𑐵𑐣 𑐳𑐎𑑂𑐰, 𑐮𑐎𑑂𑐲𑑂𑐩𑐷𑐣𑐵𑐬𑐵𑐫𑐞 𑐱𑐵𑐴𑐷, 𑐬𑐵𑐩𑐾𑐱 𑐱𑑂𑐬𑐾𑐲𑑂𑐛 𑐮𑐐𑐵𑐫𑐟𑑄 𑐬𑐔𑐣𑐵 𑐰 𑐩𑐴𑐵𑐎𑐰𑐶𑐫𑐵 𑐩𑑂𑐫𑐾𑑃 𑐣𑑂𑐫𑑄𑐎𑐵𑐡𑐷𑐐𑐸 𑐏𑑅𑐳𑐵 𑐣𑐬𑐾𑐱𑐰𑐷𑐬 𑐱𑐵𑐎𑑂𑐫, 𑐖𑑂𑐘𑐵𑐣𑐷𑐬𑐵𑐖𑐵 𑐩𑐵𑐣𑐣𑑂𑐢𑐬 𑐮𑐐𑐵𑐫𑐟𑑄 𑐣𑐸𑐐𑑅 𑐏𑑃 𑐥𑑂𑐰𑑄𑐎𑐵𑐡𑐷𑐐𑐸 𑐏𑑅 𑑋

source: NepalBhasaTimes

𑐣𑐾𑐥𑐵𑐮𑐨𑐵𑐲𑐵