𑐫𑐮𑐫𑑂 𑐣𑑄 𑐣𑐾𑐰𑐵𑑅 𑐥𑐵𑐛𑑂𑐫𑐳𑐦𑐹 𑐟𑐫𑐵𑐬

𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐀𑐣𑑂𑐟𑐬𑑂𑐐𑐟 𑐮𑐵𑑅𑐐𑐸 𑐳𑑂𑐎𑐸𑐮𑐫𑑂 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩 𑐎𑐠𑑄 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐾𑐐𑐸 𑐣𑐶𑑄𑐟𑐶𑑄 𑐥𑐵𑐛𑑂𑐫𑐳𑐦𑐹 𑐟𑐫𑐵𑐬 𑐖𑐹𑐐𑐸 𑐡𑐸 𑑋 𑐠𑑂𑐰 𑐥𑐵𑐛𑑂𑐫 𑐳𑐦𑐹 𑐰𑑄𑐐𑐸 𑐱𑐸𑐎𑑂𑐬𑐰𑐵𑑅 𑐫𑐮 𑐩𑐣𑐥𑐵𑐫𑐵 𑐩𑐾𑐫𑐬 𑐔𑐶𑐬𑐶𑐧𑐵𑐧𑐸 𑐩𑐴𑐬𑑂𑐖𑐣𑐫𑐵𑐟 𑐮𑑅𑐮𑑂𑐴𑐵𑑅𑐐𑐸 𑐡𑐸 𑑋 𑐥𑐵𑐛𑑂𑐫𑐳𑐦𑐹 𑐣𑐶𑐬𑑂𑐩𑐵𑐞 𑐳𑐩𑐶𑐟𑐶𑐫𑐵 𑐳𑑄𑐫𑑀𑐖𑐎 𑐄𑐥𑐥𑑂𑐬𑐵. 𑐟𑐸𑐮𑐳𑐷𑐮𑐵𑐮 𑐳𑐶𑑄𑐴 𑐱𑐸𑐎𑑂𑐬𑐰𑐵𑑅 𑐩𑐾𑐫𑐬 𑐩𑐴𑐬𑑂𑐖𑐣𑐫𑐵𑐟 𑐥𑐵𑐛𑑂𑐫𑐳𑐦𑐹 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋

𑐥𑐵𑐛𑑂𑐫𑐳𑐦𑐹 𑐮𑑅𑐮𑑂𑐴𑐵𑐣𑐵 𑐎𑐫𑐵𑐡𑐶𑐳𑐾𑑄 𑐩𑐾𑐫𑐬 𑐩𑐴𑐬𑑂𑐖𑐣𑑄 𑐠𑑂𑐰𑐴𑐾 𑐰𑐂𑐐𑐸 𑐱𑐿𑐎𑑂𑐲𑐶𑐎 𑐳𑐟𑑂𑐬𑑄𑐣𑐶𑐳𑐾𑑄 𑐫𑐮 𑐩𑐣𑐥𑐵 𑐀𑐣𑑂𑐟𑐬𑑂𑐐𑐟𑐫𑐵 𑐳𑐵𑐩𑐸𑐡𑐵𑐫𑐶𑐎 𑐰 𑐣𑐶𑐖𑐷 𑐦𑐸𑐎𑑂𑐎𑑄 𑐳𑑂𑐎𑐸𑐮𑐫𑑂 𑐧𑑂𑐰𑑄𑐎𑐾𑐐𑐸 𑐳𑐸𑐬𑐸 𑐫𑐵𑐫𑐾𑐐𑐸 𑐏𑑃 𑐎𑐣𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐥𑐵𑐛𑑂𑐫𑐳𑐦𑐹 𑐟𑐸𑐬𑐸𑐣𑑂𑐟 𑐕𑐵𑐥𑐾 𑐫𑐵𑐫𑐾𑐟 𑐣𑑄 𑐩𑐴𑐵𑐣𑐐𑐬𑐫𑐵 𑐱𑐶𑐎𑑂𑐲𑐵 𑐩𑐴𑐵𑐱𑐵𑐏𑐵𑐫𑐵𑐟 𑐣𑐶𑐬𑑂𑐡𑐾𑐱𑐣 𑐧𑐶𑐫𑐵𑐡𑐶𑐮 𑑋

𑐩𑐾𑐫𑐬 𑐩𑐴𑐬𑑂𑐖𑐣𑑄 𑐫𑐮 𑐡𑐾𑐫𑑂𑐫𑐵 𑐳𑐨𑑂𑐫𑐟𑐵, 𑐠𑐣𑐫𑐵 𑐖𑐵𑐟𑑂𑐬𑐵𑐥𑐬𑑂𑐰, 𑐳𑑄𑐳𑑂𑐎𑐺𑐟𑐶 𑐬𑐴𑐣𑐳𑐴𑐣, 𑐠𑐵𑐫𑑂𑐧𑐵𑐫𑑂, 𑐠𑐣𑐫𑐵 𑐰𑐿𑐨𑐰𑐫𑐵𑐟 𑐠𑐸𑐂𑐎𑐾𑐟 𑐣𑐾𑐥𑐵𑐮𑐨𑐵𑐲𑐵 𑐟𑐳𑐎𑑄 𑐁𑐰𑐱𑑂𑐫𑐎 𑐖𑐹𑐐𑐸 𑐢𑐵𑐳𑐾𑑄 𑐣𑐾𑐥𑐵𑐮𑐨𑐵𑐲𑐵 𑐩𑐠𑐸𑐂𑐎𑑄 𑐠𑐣𑐫𑐵 𑐰𑐿𑐨𑐰 𑐠𑐸𑐂𑐎𑐾𑐩𑐦𑐂𑐐𑐸 𑐖𑐹𑐐𑐸𑐮𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐟 𑐩𑐔𑐵𑑄𑐣𑐶𑐳𑐾𑑄 𑐴𑐾 𑐫𑐮 𑐡𑐾𑐫𑑂𑐫𑐵 𑐰𑐿𑐨𑐰𑐫𑑂 𑐐𑑁𑐬𑐰 𑐫𑐵𑐫𑐾 𑐦𑐫𑐾𑐎𑐾𑐟 𑐣𑐾𑐥𑐵𑐮𑐨𑐵𑐲𑐵𑐫𑐵 𑐩𑐵𑐢𑑂𑐫𑐩𑑄 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐳𑐦𑐹 𑐟𑐫𑐵𑐬 𑐫𑐵𑐣𑐵𑐐𑐸 𑐏𑑃 𑐎𑐣𑐵𑐡𑐶𑐮 𑑋

𑐫𑐮 𑐩𑐣𑐥𑐵𑐫𑐵 𑐥𑑂𑐬𑐰𑐎𑑂𑐟𑐵 𑐰 𑐳𑐵𑐩𑐵𑐖𑐶𑐎 𑐰𑐶𑐎𑐵𑐳𑐫𑐵 𑐳𑑄𑐫𑑀𑐖𑐎 𑐮𑐶𑐳𑐾𑑄 𑐰𑐜𑐵 𑑙 𑐫𑐵 𑐀𑐢𑑂𑐫𑐎𑑂𑐲 𑐬𑐵𑐖𑐸 𑐩𑐴𑐬𑑂𑐖𑐣𑑄 𑐠𑐸𑐐𑐸 𑐥𑐵𑐛𑑂𑐫𑐳𑐦𑐹 𑐫𑐵𑐎𑐣𑑄 𑐴𑐾 𑐱𑐶𑐎𑑂𑐲𑐵 𑐳𑐩𑐶𑐟𑐶𑐥𑐵𑐏𑐾𑑄 𑐥𑐵𑐬𑐶𑐟 𑐫𑐵𑐣𑐵𑑅 𑐕𑐵𑐥𑐾 𑐫𑐵𑐫𑐾𑐐𑐸 𑐏𑑃 𑐎𑐣𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐠𑐸𑐐𑐸 𑐰𑐶𑐲𑐫 𑐧𑑂𑐰𑑄𑐎𑐾𑐟 𑐱𑐶𑐎𑑂𑐲𑐎 𑐣𑐶𑐫𑐸𑐎𑑂𑐟 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐫𑐵𑐎𑐣𑑄 𑐴𑐾 𑐰𑐶𑐖𑑂𑐘𑐵𑐥𑐣 𑐫𑐵𑐫𑐾𑐐𑐸 𑐏𑑃 𑐣𑑄 𑐎𑐣𑐵𑐡𑐶𑐮 𑑋 𑐰𑐫𑑂𑐎𑑅𑐫𑐵 𑐎𑐠𑑄 𑐩𑐣𑐥𑐵 𑐀𑐣𑑂𑐟𑐬𑑂𑐐𑐟𑐫𑐵 𑐳𑐵𑐩𑐸𑐡𑐵𑐫𑐶𑐎 𑐳𑑂𑐎𑐸𑐮𑐫𑑂 𑐠𑑂𑐰 𑐰𑐶𑐲𑐫 𑐧𑑂𑐰𑑄𑐎𑐾𑐟 𑐥𑐷𑐩𑑂𑐴 𑐱𑐶𑐎𑑂𑐲𑐎 𑐣𑐶𑐫𑐸𑐎𑑂𑐟 𑐫𑐵𑐫𑐾𑐐𑐸 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐟𑐫𑐵𑐬𑐷 𑐡𑐸 𑑋

𑐣𑐾𑐥𑐵𑐮𑐨𑐵𑐲𑐵 𑐥𑐵𑐛𑑂𑐫𑐳𑐦𑐹 𑐄𑐥𑐥𑑂𑐬𑐵𑐢𑑂𑐫𑐵–𑐥𑐎 𑐩𑐴𑐬𑑂𑐖𑐣𑐫𑐵 𑐳𑑄𑐫𑑀𑐖𑐎𑐟𑑂𑐰𑐫𑑂 𑐡𑐸𑐐𑐸 𑐳𑐰𑐶𑐣𑐵 𑐩𑐴𑐬𑑂𑐖𑐣, 𑐊𑐮𑐶𑐣𑐵 𑐩𑐴𑐬𑑂𑐖𑐣, 𑐡𑐶𑐥𑐎 𑐟𑐸𑐮𑐵𑐢𑐬 𑐰 𑐖𑐷𑐰𑐣 𑐩𑐴𑐬𑑂𑐖𑐣 𑐥𑐵𑐛𑑂𑐫𑐳𑐦𑐹 𑐣𑐶𑐬𑑂𑐩𑐵𑐞 𑐳𑐩𑐶𑐟𑐶𑑄 𑐟𑐫𑐵𑐬 𑐫𑐵𑑅𑐐𑐸 𑐏𑑅 𑑋 𑐄𑐥𑐥𑑂𑐬𑐵𑐢𑑂𑐫𑐵𑐥𑐎 𑐩𑐴𑐬𑑂𑐖𑐣𑑄 𑐩𑐳𑑂𑐟𑐫𑑂𑐟 𑐟𑐳𑐎𑑄 𑐳𑐴𑐖 𑐝𑑄𑐐𑑄 𑐀𑐢𑑂𑐫𑐵𑐥𑐣 𑐫𑐵𑐎𑐾𑐦𑐂 𑐎𑐠𑑄 𑐥𑐵𑐛𑑂𑐫𑐳𑐦𑐹 𑐟𑐫𑐵𑐬 𑐫𑐵𑐣𑐵𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐡𑐸 𑑋

𑐳𑐦𑐹 𑐮𑑅𑐮𑑂𑐴𑐵𑐫𑐾𑐐𑐸 𑐗𑑂𑐰𑐮𑐫𑑂 𑐳𑐩𑐶𑐟𑐶𑐫𑐵 𑐡𑐸𑐖𑑅 𑐡𑐶𑐥𑐎 𑐟𑐸𑐮𑐵𑐢𑐬𑑄 𑐥𑐵𑐛𑑂𑐫𑐳𑐦𑐹 𑐮𑐵𑐐𑐹 𑐫𑐵𑐫𑐾𑐢𑐸𑑄𑐎𑐵𑑅 𑐦𑐸𑐎𑑂𑐎 𑐳𑑂𑐎𑐸𑐮𑐫𑑂 𑐥𑐵𑐛𑑂𑐫𑐎𑑂𑐬𑐩 𑐮𑐵𑐐𑐹 𑐫𑐵𑑅–𑐩𑐫𑐵𑑅 𑐳𑑂𑐰𑐫𑐾𑐐𑐸 𑐣𑐶𑑄𑐟𑐶𑑄 𑐣𑐶𑐬𑐣𑑂𑐟𑐬 𑐀𑐣𑐸𑐐𑐩𑐣 𑐫𑐵𑐣𑐵 𑐔𑑂𑐰𑐣𑐾𑐩𑐵𑑅𑐐𑐸 𑐏𑑃 𑐢𑐫𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐠𑐸𑐎𑐶𑐫𑐵 𑐣𑐶𑑄𑐟𑐶𑑄 𑐕𑐐𑐹 𑐀𑐣𑐸𑐐𑐩𑐣 𑐰 𑐳𑐴𑐖𑐷𑐎𑐬𑐞 𑐥𑐸𑐔𑑅 𑐴𑐾 𑐣𑐷𑐳𑑂𑐰𑐣𑐵𑑅 𑐖𑑂𑐫𑐵 𑐫𑐵𑐫𑐾𑐩𑐵𑑅𑐐𑐸 𑐳𑐸𑐗𑐵𑐰 𑐣𑑄 𑐟𑐫𑐵𑐡𑐷𑐐𑐸 𑐏𑑅 𑑋

𑐫𑐮𑐫𑑂 𑐧𑐵𑐮𑐰𑐶𑐎𑐵𑐳 𑐟𑐴 𑐣𑐶𑐳𑐾𑑄 𑑓 𑐟𑐐𑐶𑑄 𑐟𑐎 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩 𑐣𑐾𑐥𑐵𑐮𑐨𑐵𑐲𑐵𑑄 𑐧𑑂𑐰𑑄𑐎𑐾𑐟𑑂𑐫𑑄𑐐𑐸 𑐏𑑅 𑑋 𑐠𑐸𑐎𑐶𑐫𑐵𑐟 𑐧𑐸𑐮𑐸𑐴𑐸𑑃 𑐔𑑂𑐰𑐫𑑂𑐫𑐵 𑐎𑐎𑑂𑐲𑐵𑐫𑑂 𑐣𑑄 𑐮𑐵𑐐𑐹 𑐫𑐵𑐣𑐵𑑅 𑐔𑑂𑐫𑐵𑐐𑐹 𑐟𑐐𑐶𑑄 𑐟𑐎 𑐴𑐾 𑐧𑑂𑐰𑑄𑐎𑐾𑐐𑐸 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐐𑑂𑐰𑐳𑐵𑑅 𑐡𑐸 𑑋