𑐮𑐵𑐏𑐾 𑐥𑑂𑐫𑐵𑐏𑑄 𑐮𑑂𑐴𑐸𑐂𑐩𑑂𑐴 𑐮𑑅𑐳𑐶𑑄 !

𑐣𑐾𑐰𑐵: 𑐀𑐣𑐮𑐵𑐂𑐣 𑐣𑑂𑐫𑐸𑐖 | 𑑒𑑐𑑗𑑖 𑐨𑐵𑐡𑑂𑐬 𑑑𑑘, 𑐧𑐸𑐢𑐧𑐵𑐬 𑑑𑑓:𑑓𑑐:𑑒𑑑

𑐮𑐵𑐏𑐾 𑐢𑐵𑐫𑐾𑐰𑑄 𑐴𑐾 𑐗𑐷𑐐𑐸 𑐩𑐶𑐏𑐵𑐫𑑂 𑐩𑐶𑐖𑑄𑐫𑐵 𑐬𑐸𑐥 𑐡𑑃 𑐰𑐂 𑑋 𑐮𑐵𑐏𑐾 𑐥𑑂𑐫𑐵𑐏𑑄 𑐮𑑂𑐴𑐸𑐂𑐐𑐸 𑐣𑐶𑐟𑐶𑑄 𑐱𑐎𑑂𑐟𑐶𑐫𑐵 𑐁𑐰𑐱𑑂𑐫𑐎𑐟𑐵 𑐣𑑄 𑐄𑐟𑑂𑐟𑐶𑐎𑑄 𑐴𑐾 𑐡𑐸 𑑋 𑐮𑐵𑐏𑐾 𑐏𑑃𑐐𑑂𑐰𑑅 𑐥𑐸𑐬𑐸𑐲𑐰𑐵𑐔𑐎 𑐏𑑅, 𑐠𑑂𑐰 𑐳𑐎𑐳𑐶𑐣𑑄 𑐳𑑂𑐫𑐹𑐐𑐸 𑐏𑑃 𑐏𑑅 𑑋 𑐮𑐵𑐏𑐾𑐫𑐵 𑐂𑐟𑐶𑐴𑐵𑐳 𑐰 𑐎𑐶𑑄𑐰𑐡𑐣𑑂𑐟𑐷𑐂 𑐣𑑄 𑐕𑐩𑑂𑐴 𑐩𑐶𑐖𑑄 𑐴𑐾 𑐏𑑅 𑑋 𑐮𑐵𑐏𑐾𑐫𑐵𑐟 𑐱𑐵𑐣𑑂𑐟 𑐨𑐿𑐬𑐰 𑐎𑐠𑑄 𑐣𑑄 𑐎𑐵𑐫𑐾𑐐𑐸 𑐫𑐵𑑅 𑑋

𑐕𑐸𑑄 𑐡𑑃 𑐣𑑂𑐴𑑂𑐫𑑅𑐣𑐶𑐳𑐾𑑄 𑐮𑐵𑐏𑐾 𑐰 𑐮𑐵𑐏𑐾 𑐥𑑂𑐫𑐵𑐏𑑄𑐫𑐵 𑐮𑑀𑐎𑐥𑑂𑐬𑐶𑐫𑐟𑐵𑐫𑐵𑐟 𑐩𑐏𑐸𑐐𑐸 𑐎𑐠𑑄 𑐕𑑂𑐫𑐮𑐵𑐔𑑂𑐰𑑄𑐐𑐸𑐮𑐶𑑄 𑐳𑑄𑐳𑑂𑐎𑐺𑐟𑐶𑐴𑑂𑐫𑑅𑐩𑐶𑐥𑐶𑐣𑑂𑐳𑑄 𑐔𑑂𑐫𑐹𑐟𑐵𑑅 𑐥𑑂𑐰𑑄𑐎𑐵𑑅 𑐴𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶𑐂 𑐩𑐹 𑐮𑐵𑐏𑐾 𑐫𑐾𑑃𑐫𑐵 𑐩𑐖𑐶𑐥𑐵𑑅 𑐮𑐵𑐏𑐾 𑐏𑑅 𑑋 𑐐𑐸𑐩𑑂𑐴 𑐮𑐵𑐏𑐾 𑐫𑐾𑑃𑐫𑐵𑑅𑐫𑐵 𑐣𑐶𑐟𑐶𑑄 𑐔𑑂𑐫𑐵𑐣𑑂𑐴𑐸 𑐖𑐎 𑐥𑐶𑐴𑐵𑑃 𑐰𑐂 𑑋 𑐠𑑂𑐰 𑐟𑑂𑐰𑑅𑐟𑐵𑑅 𑐐𑐸𑑄𑐮𑐵 𑐮𑐵𑐏𑐾, 𑐟𑑂𑐰𑐵𑑅 𑐮𑐵𑐏𑐾 𑐣𑑄 𑐠𑑅𑐐𑐸 𑐴𑐾 𑐥𑐬𑐩𑑂𑐥𑐬𑐵 𑐎𑐠𑑄 𑐥𑐶𑐴𑐵𑑃 𑐰𑐂 𑑋 𑐠𑐸𑐎𑐶𑐫𑐵𑐟 𑐟𑑂𑐰𑑅𑐟𑐵𑑅 𑐠𑐷𑐠𑐷 𑐖𑐶𑐮𑑂𑐮𑐵𑐫𑑂 𑐠𑐷𑐠𑐷 𑐳𑑄𑐑𑐳𑑄𑐳𑑂𑐠𑐵𑐟𑐳𑐾𑑄 𑐠𑑅𑐠𑑅𑐐𑐸 𑐝𑑄𑐐𑑄 𑐮𑐵𑐏𑐾 𑐥𑐶𑐎𑐵𑐫𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐰𑑄𑐐𑐸 𑐕𑐸𑑄 𑐡𑐶𑑄 𑐣𑑂𑐴𑑂𑐫𑑅 𑐖𑐎 𑐂𑐚𑐴𑐬𑐷 𑐣𑐾𑐰𑐵𑑅 𑐳𑑄𑐑𑑄 𑐐𑐸𑑄𑐮𑐵 𑐮𑐵𑐏𑐾 𑐥𑐶𑐎𑐵𑐫𑐾𑐐𑐸 𑐗𑑂𑐰𑐮𑐫𑑂 𑐩𑐶𑐳𑐵𑐩𑑂𑐴𑐾𑐳𑐶𑐟 𑐴𑐾 𑐮𑐵𑐏𑐾 𑐡𑐫𑐾𑐎𑐵𑑅 𑐥𑐶𑐎𑐵𑐟 𑑋 𑐠𑐠𑐾 𑐩𑐶𑐳𑐵𑐩𑑂𑐴 𑐮𑐵𑐏𑐾 𑐖𑐸𑐫𑐵𑑅 𑐥𑐶𑐴𑐵𑑃 𑐰𑑅𑐐𑐸 𑐧𑐸𑐏𑑃 𑐳𑐵𑐩𑐵𑐖𑐶𑐎 𑐳𑑄𑐖𑐵𑐮𑐫𑑂 𑐰𑐫𑐾𑐰𑑄 𑐠𑐠𑐾 𑐂𑐚𑐴𑐬𑐷𑐂 𑐥𑐶𑐴𑐵𑑃 𑐰𑑅𑐩𑑂𑐴 𑐮𑐵𑐏𑐾𑐫𑐵𑐟 𑐮𑐵𑐏𑐾 𑐢𑐵𑐫𑐾𑐐𑐸 𑐎𑐶 𑐮𑑅𑐳𑐶𑑄 𑐢𑐵𑐫𑐾𑐐𑐸 𑐢𑐿𑐐𑐸 𑐣𑑂𑐴𑑂𑐫𑐳𑑅 𑐔𑐶𑑄 𑐧𑑂𑐰𑐮𑑄𑐐𑐸 𑐡𑐸 𑑋

𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶𑐂 𑐮𑑅𑐳𑐶𑑄 𑐥𑑂𑐫𑐵𑐏𑑄 𑐮𑑂𑐴𑐸𑐂𑐐𑐸 𑐢𑐿𑐐𑐸 𑐩𑐡𑐸 𑑋 𑐟𑐬, 𑐮𑐵𑐏𑐾 𑐏𑑂𑐰𑐵𑑅𑐥𑐵𑑅 𑐥𑐸𑐫𑐵𑑅 𑐩𑐶𑐳𑐵𑐩𑑂𑐴 𑐥𑑂𑐫𑐵𑐏𑑄 𑐮𑑂𑐴𑐸𑐳𑐾𑐮𑐶𑑄 𑐠𑑂𑐰 𑐥𑑂𑐫𑐵𑐏𑑄𑐫𑐵𑐟 𑐕𑐸 𑐢𑐵𑐫𑐾𑐐𑐸 𑐢𑐿𑐐𑐸 𑐣𑑂𑐴𑑂𑐫𑐳𑑅 𑐣𑑄 𑐧𑑂𑐰𑐮𑑄𑐐𑐸 𑐡𑐸 𑑋

𑐠𑐠𑐾 𑐩𑐶𑐳𑐵𑐥𑐶𑑄 𑐮𑐵𑐏𑐾 𑐖𑐸𑐫𑐵𑑅 𑐥𑑂𑐫𑐵𑐏𑑄 𑐮𑑂𑐴𑐹𑐐𑐸𑐫𑐵𑐟 𑐎𑐫𑐵𑑅 𑐱𑑂𑐬𑐷 𑐮𑐵𑐏𑐾 𑐁𑑅𑐖𑐸 𑐰𑑂𑐫𑐰𑐳𑑂𑐠𑐵𑐥𑐣 𑐳𑐩𑐵𑐖𑐫𑐵 𑐕𑑂𑐫𑐵𑐘𑑂𑐖𑐾 𑐬𑐵𑐩 𑐬𑑄𑐖𑐶𑐟𑑄 𑐮𑐵𑐏𑐾 𑐥𑑂𑐫𑐵𑐏𑑄𑐫𑐵𑐟 𑐎𑐫𑐵𑑅 𑐖𑐸𑐫𑐵𑐔𑑂𑐰𑑄𑐐𑐸 𑐠𑐷𑐠𑐷 𑐐𑐟𑐶𑐰𑐶𑐢𑐶𑑄 𑐰𑐶𑐎𑐺𑐟𑐶 𑐴𑐫𑐵𑐔𑑂𑐰𑑄𑐐𑐸 𑐢𑐵𑐳𑐾𑑄 𑐋𑐟𑐶𑐴𑐵𑐳𑐶𑐎 𑐬𑐸𑐥𑑄 𑐥𑐮𑐶𑐳𑑂𑐠𑐵 𑐫𑐵𑐣𑐵𑐟𑑅𑐥𑐶𑑄 𑐮𑐵𑐏𑐾𑐟 𑐧𑐵𑐴𑐾𑐎 𑐩𑐾𑐎𑐠𑑄𑐫𑐵 𑐮𑐵𑐏𑐾𑐥𑐶𑑄 𑐩𑐣𑑀𑐬𑐘𑑂𑐖𑐣𑐫𑐵 𑐣𑐶𑐟𑐶𑑄 𑐖𑐎 𑐮𑑂𑐴𑐸𑐂𑐎𑐾𑐐𑐸 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐐𑐸 𑐏𑑃 𑐎𑐣𑐵𑐡𑐶𑐮 𑑋

𑐀𑐠𑐾𑐴𑐾, 𑐰𑐫𑑂𑐎𑐮𑑄 𑐮𑐵𑐏𑐾 𑐥𑑂𑐫𑐵𑐏𑑄 𑐮𑑂𑐴𑐸𑐂𑐩𑑂𑐴 𑐩𑐶𑐖𑑄 𑐴𑐾 𑐖𑐸𑐂𑐩𑐵𑑅𑐐𑐸 𑐰 𑐩𑐶𑐳𑐵 𑐐𑐸𑐧𑐮𑐾𑑄 𑐖𑐸𑐂𑐩𑐦𑐂𑐐𑐸 𑐰𑐶𑐔𑐵𑑅 𑐥𑑂𑐰𑑄𑐎𑐵𑐡𑐶𑐳𑐾𑑄 𑐠𑐠𑐾 𑐩𑐶𑐳𑐵𑐥𑐶𑑄 𑐮𑐵𑐏𑐾 𑐖𑐸𑐂𑐐𑐸 𑐖𑑂𑐫𑐵𑐫𑐵𑐟 𑐣𑑄 𑐣𑑂𑐴𑑂𑐫𑐵𑐂𑐥𑐸𑐎𑐾𑐐𑐸 𑐣𑐶𑐟𑐶𑑄 𑐖𑐎 𑐖𑐹𑐐𑐸 𑐏𑑃 𑐎𑐣𑐵𑐡𑐶𑐮 𑑋