“𑐮𑐸𑐩𑐣𑑂𑐟𑐶𑐂 𑐥𑐡𑑂𑐩𑐬𑐟𑑂𑐣 𑐟𑐸𑐮𑐵𑐢𑐬” 𑐳𑐦𑐹 𑐥𑐶𑐡𑐣

𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵𑑅, 𑐩𑐵𑐣𑐰𑐀𑐢𑐶𑐎𑐵𑐬𑐰𑐵𑐡𑐷, 𑐬𑐵𑐖𑐣𑐷𑐟𑐶𑐖𑑂𑐘 𑐥𑐡𑑂𑐩𑐬𑐟𑑂𑐣 𑐟𑐸𑐮𑐵𑐢𑐬𑐫𑐵 “𑐮𑐸𑐩𑐣𑑂𑐟𑐶𑐂 𑐥𑐡𑑂𑐩𑐬𑐟𑑂𑐣 𑐟𑐸𑐮𑐵𑐢𑐬” 𑐳𑐦𑐹 𑐥𑐶𑐡𑑄𑐐𑐸 𑐡𑐸 𑑋

𑐱𑐣𑐶𑐰𑐵𑑅 𑐫𑐮𑐫𑐵 𑐀𑐱𑑀𑐎 𑐥𑐵𑐬𑑂𑐚𑐷𑐥𑑂𑐫𑐵𑐮𑐾𑐳𑐫𑑂 𑐥𑐡𑑂𑐩𑐬𑐟𑑂𑐣 𑐮𑐸𑐩𑐣𑑂𑐟𑐶 𑐐𑐸𑐠𑐶𑐫𑐵 𑐐𑑂𑐰𑐳𑐵𑐮𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐠𑐠𑐾 𑐳𑐦𑐹 𑐥𑐶𑐡𑑄𑐐𑐸 𑐏𑑅 𑑋

𑐄𑐐𑐸 𑐳𑐦𑐹 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐐𑑂𑐰𑐵𑐴𑐵𑐮𑐶𑑄 𑐥𑐶𑐡𑑄𑐐𑐸 𑐏𑑅 𑑋

𑐄𑐥𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷𑐮𑐶𑐳𑐾𑑄 𑐥𑐬𑐬𑐵𑐲𑑂𑐚𑑂𑐬𑐩𑐣𑑂𑐟𑑂𑐬𑐷 𑐣𑐵𑐬𑐵𑐫𑐞𑐎𑐵𑐖𑐷 𑐱𑑂𑐬𑐾𑐲𑑂𑐛𑐫𑐵 𑐩𑐹𑐥𑐵𑐴𑐵𑑃𑐳𑐸𑐂 𑐰 𑐧𑐵𑐐𑐩𑐟𑐷 𑐥𑑂𑐬𑐡𑐾𑐱𑐫𑐵 𑐥𑐬𑑂𑐫𑐚𑐣 𑐳𑑄𑐳𑑂𑐎𑐺𑐟𑐶 𑐳𑐴𑐎𑐵𑐬𑐷𑐩𑐣𑑂𑐟𑑂𑐬𑐷 𑐱𑐿𑐮𑐾𑐣𑑂𑐡𑑂𑐬𑐩𑐵𑐣 𑐧𑐖𑑂𑐬𑐵𑐔𑐵𑐬𑑂𑐫𑐫𑐵 𑐰𑐶𑐱𑐾𑐲 𑐄𑐥𑐳𑑂𑐠𑐶𑐟𑐶𑐂 𑐖𑐹𑐐𑐸 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐳𑐵𑐴𑐶𑐟𑑂𑐫𑐎𑐵𑐬 𑐴𑐶𑐟𑐎𑐬𑐰𑐷𑐬 𑐳𑐶𑑄 𑐎𑐳𑐵𑑅, 𑐣𑐬𑑂𑐩𑐡𑐾𑐱𑑂𑐰𑐬 𑐥𑑂𑐬𑐢𑐵𑐣, 𑐥𑐹𑐬𑑂𑐰𑐳𑐨𑐵𑐩𑐸𑐏 𑐡𑐩𑐣𑐣𑐵𑐠 𑐝𑐸𑑄𑐐𑐵𑐣𑐵, 𑐥𑐬𑐬𑐵𑐲𑑂𑐚𑑂𑐬𑐰𑐶𑐡𑑂 𑐴𑐶𑐬𑐞𑑂𑐫𑐮𑐵𑐮 𑐱𑑂𑐬𑐾𑐲𑑂𑐛𑐥𑐶𑐣𑑂𑐟 𑐴𑐣𑐾𑐐𑐸 𑐖𑑂𑐫𑐵 𑐣𑑄 𑐫𑐵𑑅𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐄𑐥𑐥𑑂𑐬𑐩𑐸𑐏 𑐳𑐸𑐣𑐶𑐟𑐵 𑐜𑑄𑐐𑑀𑐮, 𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑑂𑐬𑐩𑐸𑐏 𑐔𑐶𑐬𑐶𑐧𑐵𑐧𑐸 𑐩𑐴𑐬𑑂𑐖𑐣𑐮𑐶𑐳𑐾𑑄 𑐠𑐷𑐠𑐷 𑐥𑑂𑐬𑐟𑐶𑐲𑑂𑐛𑐶𑐟 𑐰𑑂𑐫𑐎𑑂𑐟𑐶𑐥𑐶𑑄 𑐥𑐵𑐴𑐵𑑃 𑐎𑐠𑑄 𑐄𑐥𑐳𑑂𑐠𑐶𑐟 𑐖𑐸𑐫𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐮𑐸𑐩𑐣𑑂𑐟𑐶 𑐐𑐸𑐠𑐶𑐫𑐵 𑐡𑐸𑐖𑑅 𑐮𑐶𑐳𑐾𑑄 𑐟𑐸𑐮𑐵𑐢𑐬𑐫𑐵 𑐩𑑂𑐴𑑂𑐫𑐵𑐫𑑂 𑐳𑐸𑐩𑑂𑐣𑐶𑐩𑐵 𑐟𑐸𑐮𑐵𑐢𑐬𑑄 𑐥𑐡𑑂𑐩𑐬𑐟𑑂𑐣 𑐟𑐸𑐮𑐵𑐢𑐬𑑄 𑐫𑐵𑐣𑐵𑐡𑐷𑐐𑐸 𑐫𑑀𑐐𑐡𑐵𑐣𑐫𑐵𑐟 𑐎𑐫𑐵𑑅 𑐔𑐬𑑂𑐔𑐵 𑐫𑐵𑐣𑐵𑐡𑐶𑐳𑐾𑑄 𑐖𑑂𑐫𑐵𑐗𑑂𑐰𑐮𑐫𑑂 𑐧𑑂𑐰𑐟𑐶 𑐎𑐵𑑅𑐥𑐶𑑄𑐳𑐎𑐮𑐳𑐶𑐟 𑐮𑐳𑐎𑐸𑐳 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐧𑑂𑐰𑐟𑐶 𑐎𑐵𑑅𑐥𑐶𑑄 𑐳𑐎𑐮𑐳𑐶𑐣𑑄 𑐟𑐸𑐮𑐵𑐢𑐬𑐫𑐵 𑐎𑐶𑐥𑐵𑐫𑑂 𑐳𑑂𑐰𑐵𑑄 𑐡𑐾𑐕𑐵𑐣𑐵𑑅 𑐱𑑂𑐬𑐡𑑂𑐢𑐵𑐨𑐵𑐰 𑐥𑑂𑐰𑑄𑐎𑐹𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐐𑐸𑐠𑐶 𑐳𑑄𑐳𑑂𑐠𑐵𑐣𑐫𑐵 𑐥𑐸𑐮𑐵𑑄𑐩𑑂𑐴 𑐥𑑂𑐬𑐱𑐵𑐳𑐎𑐷𑐫 𑐥𑑂𑐬𑐩𑐸𑐏 𑐎𑐶𑐬𑐞 𑐱𑐵𑐎𑑂𑐫, 𑐬𑐵𑐲𑑂𑐚𑑂𑐬𑐶𑐫 𑐰𑐶𑐨𑐹𑐟𑐶 𑐱𑑄𑐏𑐢𑐬 𑐳𑐵𑐏𑑂𑐰𑐵𑑅 𑐥𑑂𑐬𑐟𑐶𑐲𑑂𑐛𑐵𑐣𑐫𑐵 𑐣𑐵𑐫𑑅 𑐖𑑂𑐘𑐵𑐣𑐸𑐬𑐵𑐩 𑐱𑑂𑐬𑐾𑐲𑑂𑐛𑐮𑐶𑐳𑐾𑑄 𑐠𑐷𑐠𑐷 𑐰𑑂𑐫𑐎𑑂𑐟𑐶𑐥𑐶𑐣𑑂𑐳𑑄 𑐟𑐸𑐮𑐵𑐢𑐬𑑄 𑐫𑐵𑐣𑐵𑐡𑐷𑐐𑐸 𑐫𑑀𑐐𑐡𑐵𑐣𑐫𑐵𑐟 𑐎𑐫𑐵𑑅 𑐔𑐬𑑂𑐔𑐵 𑐥𑐬𑐶𑐔𑐬𑑂𑐔𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐮𑐸𑐩𑐣𑑂𑐟𑐶 𑐐𑐸𑐠𑐶𑐫𑐵 𑐣𑐵𑐫𑑅 𑐜𑐵. 𑐎𑐾𑐱𑐰𑐩𑐵𑐣 𑐱𑐵𑐎𑑂𑐫𑐫𑐵 𑐳𑐨𑐵𑐣𑐵𑐫𑑅𑐳𑐸𑐂 𑐖𑐹𑐐𑐸 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐐𑐸𑐠𑐶𑐫𑐵 𑐩𑐹𑐕𑑂𑐫𑐵𑐘𑑂𑐖𑐾 𑐣𑐬𑐾𑐱𑐰𑐷𑐬 𑐱𑐵𑐎𑑂𑐫𑑄 𑐖𑑂𑐫𑐵𑐗𑑂𑐰𑑅 𑐣𑑂𑐴𑑂𑐫𑐵𑐎𑐵𑐡𑐷𑐐𑐸 𑐏𑑅 𑑋