𑐮𑑀𑐥𑑀𑐣𑑂𑐩𑐸𑐏 𑐣𑐾𑐰𑐵𑑅 𑐧𑐵𑐖𑑄

𑐕𑐸𑑄 𑐣𑑄 𑐳𑐨𑑂𑐫𑐟𑐵𑐫𑐵 𑐩𑑂𑐴𑐳𑐶𑐎𑐵 𑐢𑐫𑐵𑐐𑐸 𑐣𑑂𑐰𑐰𑐵𑐫𑐾𑐐𑐸 𑐨𑐵𑐫𑑂, 𑐮𑐶𑐥𑐶, 𑐎𑐮𑐵𑐎𑐺𑐟𑐶, 𑐩𑑂𑐫𑐾,𑐳𑐒𑑂𑐐𑐶𑐟 , 𑐧𑐵𑐖𑑄, 𑐣𑐳𑐵𑐟𑑂𑐰𑑃𑐳𑐵, 𑐰𑐳𑑅, 𑐣𑑂𑐴𑐶 𑐴𑐣𑐾𑐐𑐸 𑐥𑐴𑑅, 𑐧𑐸𑐂𑐧𑐮𑐫𑑂 𑐣𑐶𑐳𑐾𑑄𑐳𑐷𑐧𑐮𑐫𑑂 𑐟𑐎 𑐫𑐵𑐂𑐐𑐸 𑐳𑑄𑐳𑑂𑐎𑐵𑐬 𑐁𑐡𑐶𑑄 𑐧𑐶𑐫𑐵𑐔𑑂𑐰𑐣𑐷 𑑋 𑐣𑐾𑐰𑐵𑑅 𑐕𑐐𑐹 𑐖𑐵𑐟 𑐖𑐎 𑐩𑐏𑐳𑐾 𑐕𑐐𑐹 𑐳𑐨𑑂𑐫𑐟𑐵 𑐏𑑅 𑑋 𑐩𑐾𑐐𑐸 𑐖𑐣𑐖𑐵𑐟𑐶 𑐳𑑂𑐰𑐫𑐵𑑄 𑐧𑐶𑐳𑑂𑐎𑑄 𑐖𑐸𑐫𑐵𑑅 𑐣𑐾𑐰𑐵𑑅 𑐳𑐨𑑂𑐫𑐟𑐵 𑐡𑐸𑐣𑐾 𑐣𑑄 𑐠𑐷𑐠𑐷 𑐖𑐵𑐟÷𑐳𑐩𑐸𑐡𑐵𑐫𑐟 𑐡𑐸 𑑋 𑐠𑐷𑐠𑐷 𑐖𑐵𑐟𑐫𑐵 𑐠𑑅𑐠𑑅𑐐𑐸 𑐴𑐾 𑐨𑐹𑐩𑐶𑐎𑐵 𑐣𑐾𑐰𑐵𑑅 𑐳𑐨𑑂𑐫𑐟𑐵𑐡𑐸𑐣𑐾 𑐡𑐸 𑑋 𑐣𑐾𑐰𑐵𑑅 𑐟𑐖𑐶𑐮𑐖𑐶, 𑐖𑐵𑐟𑑂𑐬𑐵, 𑐳𑑄𑐳𑑂𑐎𑐵𑐬𑐫𑑂 𑐧𑐵𑐖𑑄 𑐰 𑐳𑐒𑑂𑐐𑐶𑐟𑐫𑐵 𑐳𑑂𑐰𑐵𑐥𑐹 𑐢𑐫𑐵𑐐𑐸 ‘𑐮𑐵 𑐰 𑐮𑐸𑐳𑐶’ 𑐠𑐾𑑄 𑐏𑑅 𑑋

𑐮𑑀𑐎𑐧𑐵𑐖𑐵 𑐳𑑄𑐐𑑂𑐬𑐴𑐵𑐮𑐫𑐫𑑂 𑐟𑐫𑐵𑐟𑑅𑐐𑐹 𑐢𑐮𑑅𑐫𑐵 𑐁𑐢𑐵𑐬 𑐎𑐵𑐫𑐾𑐐𑐸 𑐏𑑅𑐳𑐵 𑐣𑐾𑐥𑐵𑐮𑐫𑑂 𑐳𑑂𑐰𑐳𑑅 𑐰 𑐣𑑂𑐴𑐫𑐾𑐣𑑂𑐫𑐵𑐐𑐹 (𑑓𑑗𑑕) 𑐮𑑀𑐎𑐧𑐵𑐖𑑄 𑐡𑐸 𑑋 𑐄𑐎𑐶 𑐩𑐢𑑂𑐫𑐾 𑐔𑐫𑑂𑐐𑐹 (𑑘𑑐) 𑐮𑐵 𑐣𑐾𑐰𑐵𑑅 𑐧𑐵𑐖𑑄 𑐖𑐎 𑐴𑐾 𑐡𑐸 𑑋 𑐠𑐸𑐎𑐶𑑄 𑐣 𑐳𑐷𑐡𑐸 𑐎𑐶 𑐣𑐾𑐰𑐵𑑅 𑐳𑐨𑑂𑐫𑐟𑐵 𑐐𑐸𑐮𑐶 𑐎𑐮𑐵 𑐰 𑐳𑑄𑐳𑑂𑐎𑐺𑐟𑐶𑐫𑐵 𑐬𑐒𑑂𑐐𑑄 𑐖𑐵𑑅 𑐢𑐎𑐵𑑅 𑑋 𑐧𑐵𑐖𑑄 𑐠𑐵𑐎𑐵𑑅 𑐧𑐬𑐾 𑐕𑐸𑐂𑐐𑐸, 𑐎𑐫𑑂𑐟𑐵𑐥𑐹𑐖𑐵, 𑐖𑑂𑐫𑐵𑐖𑑄𑐎𑑂𑐰𑑅, 𑐂𑐴𑐶𑐥𑐵 𑐫𑐵𑐎𑐾𑐐𑐸 𑐗𑐷𑐐𑐸 𑐔𑐮𑐣 𑐡𑐸 𑑋 𑐣𑐾𑐰𑐵𑑅 𑐳𑑄𑐳𑑂𑐎𑐵𑐬𑐫𑑂 𑐮𑐵 𑐳𑐷𑐧𑐮𑐫𑑂 𑐟𑐎𑑄 𑐧𑐵𑐖𑑄 𑐴𑐾 𑐠𑐵𑐎𑐵𑑅 𑐳𑐶𑐠𑑄 𑐫𑑄𑐎𑐾𑐐𑐸 𑐫𑐵𑐂 𑑋 𑐡𑐾𑐐𑑅𑐡𑐾𑐐𑐮𑐫𑑂 𑐐𑐣𑑄 𑐣𑑂𑐴𑐶𑐣𑑂𑐴𑐶, 𑐐𑐣𑑄 𑐰𑐶𑐲𑐾𑐱 𑐡𑐶𑑄𑐎𑐸𑐣𑑂𑐴𑐸 𑐣𑐶𑐟𑑂𑐫𑐥𑐸𑐖𑐵 𑐫𑐵𑐂𑐧𑐮𑐫𑑂 𑐧𑐵𑐖𑑄 𑐠𑐵𑐂𑐐𑐸÷𑐥𑐸𑐂𑐐𑐸 𑐫𑐵𑐂 𑑋 𑐀𑐠𑐾𑐴𑐾 𑐡𑑃𑐫𑑂𑐡𑐳𑑄 𑐆𑐟𑐸𑐣𑐵𑐥𑑄 𑐰𑐂𑐐𑐸 𑐣𑐏𑑅𑐔𑐏𑑅𑐫𑐵 𑐩𑑂𑐫𑐾𑑃 𑐥𑐸𑐫𑐵𑑅 𑐧𑐵𑐖𑑄 𑐠𑐵𑐂𑐐𑐸 𑐔𑐮𑐣 𑐡𑐸 𑑋 𑐠𑐠𑐾 𑐠𑐵𑐫𑐾𑐐𑐸÷𑐥𑐸𑐫𑐾𑐐𑐸 𑐢𑐫𑐵𑐐𑐸 𑐣𑑂𑐴𑑂𑐫𑐂𑐥𑐸𑐎𑐾𑐟 𑐖𑐎 𑐩𑐏𑐳𑐾 𑐠𑐸𑐎𑐶𑐫𑐵 𑐀𑐬𑑂𑐠 𑐣𑑄 𑐡𑐫𑐵𑐔𑑂𑐰𑐣𑐷 𑑋 𑐟𑐬 𑐠𑑁𑑄𑐎𑐣𑑂𑐴𑐫𑑂 𑐫𑐎𑑂𑐰 𑐴𑐾 𑐠𑐖𑑂𑐫𑐵𑑅𑐐𑐸 𑐧𑐵𑐖𑑄 𑐮𑑀𑐥𑑀𑐣𑑂𑐩𑐸𑐏 𑐀𑐰𑐳𑑂𑐠𑐵𑐫𑑂 𑐠𑑂𑐫𑐣𑐾𑐢𑐸𑑄𑐎𑐹𑐐𑐸 𑐡𑐸𑐳𑐵 𑐐𑐸𑐮𑐶𑑄 𑐮𑑀𑐥 𑐴𑐾 𑐖𑐸𑐂𑐢𑐸𑑄𑐎𑐹𑐐𑐸 𑐀𑐰𑐳𑑂𑐠𑐵𑐫𑑂 𑐡𑐸 𑑋

𑐣𑐾𑐰𑐵𑑅 𑐧𑐵𑐖𑐣𑐫𑑂 𑐥𑐸𑐂𑐐𑐸 𑐧𑐵𑐖𑑄 𑐥𑑀𑑄𑐐𑐵, 𑐥𑑃𑐫𑑂𑐟𑐵𑑅, 𑐎𑐵𑐴𑐵𑑅(𑐎𑐵𑑅), 𑐣𑐾𑐎𑐹, 𑐩𑐸𑐴𑐵𑐮𑐷, 𑐧𑐵𑑃𑐳𑐸𑐬𑐷, 𑐧𑐫𑑂 𑐏𑑅 𑑋 𑐥𑑀𑑄𑐐𑐵, 𑐥𑑃𑐫𑑂𑐟𑐵𑑅, 𑐎𑐵𑐴𑐵𑑅, 𑐣𑐾𑐎𑐸 𑐥𑐟𑐶𑑄 𑐩𑐳𑑄𑐎𑐸𑐳𑐾 𑐥𑐸𑐂𑐐𑐸 𑐧𑐵𑐖𑑄 𑐏𑑅 𑑋 𑐠𑑂𑐰 𑐳𑑂𑐰𑑄𑐐𑐸𑐮𑐶𑑄 𑐴𑐾 𑐧𑐵𑐖𑑄 𑐎𑑃𑐫𑑂, 𑐳𑐶𑐖𑑅 𑐣𑐵𑐥𑑄 𑐩𑐾𑐐𑐸 𑐣𑐫𑐵𑐐𑐸 𑐖𑐸𑐂, 𑐀𑐮𑐾 𑐟𑐥𑑂𑐫𑑄𑐎 𑐥𑐸𑐂𑐟 𑐥𑑃𑐫𑐵 𑐎𑐠𑐶 𑐳𑑂𑐰𑐵𑐣𑐵𑐟𑐂 𑑋 𑐖𑑂𑐫𑐵𑑅𑐖𑑄𑐎𑑂𑐰, 𑐧𑐬𑐾 𑐕𑐸𑐂𑐐𑐸, 𑐎𑐫𑑂𑐟𑐵𑐥𑐸𑐖𑐵 𑐰 𑐩𑐾𑐩𑐾𑐐𑐸 𑐥𑐸𑐖𑐵 𑐫𑐵𑐂𑐧𑐮𑐫𑑂 𑐨𑐹𑐟𑐥𑑂𑐬𑐾𑐟𑐫𑐵 𑐧𑐵𑐢𑐵 𑐩𑐡𑐫𑐾𑐩𑐵 𑐢𑐎𑐵𑑅 𑐧𑑁 𑐰𑐵𑐫𑐾 𑐫𑑄𑐎𑐾𑐐𑐸 𑐔𑐮𑐣 𑐡𑐸 𑑋 𑐠𑐠𑐾 𑐧𑑁 𑐰𑐵𑐫𑐾 𑐫𑑄𑐎𑐷𑐧𑐮𑐫𑑂 (𑐫𑐩𑐧𑐵𑐡𑑂𑐫) 𑐣𑐵𑐫𑑂𑐏𑐶𑑄 𑐰 (𑐫𑐩𑐟𑐸𑐬𑑂𑐫) 𑐎𑐵𑐴𑐵𑑅 𑐥𑐸𑐂𑐩𑐵𑑅 𑑋

𑐎𑐵𑐴𑐵𑑅 𑐧𑐵𑐖𑑄 𑐣𑐵𑐫𑑂 𑐳𑐩𑐸𑐡𑐵𑐫𑑄 𑐥𑐸𑐂𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐳𑐷𑐧𑐮𑐾 𑐳𑐶𑐠𑑄 𑐫𑑄𑐎𑐷𑐧𑐮𑐫𑑂 𑐣𑑄 𑐣𑐵𑐫𑑂𑐏𑐶𑑄 𑐠𑐵𑐣𑐵𑑅 𑐎𑐵𑐴𑐵𑑅 𑐧𑐵𑐖𑑄 𑐥𑐸𑐂𑐩𑐵𑑅 𑑋 𑐠𑐠𑐾 𑐫𑐵𑐂𑐧𑐮𑐫𑑂 𑐢𑐵𑑅𑐳𑐵 𑐣𑐵𑐫𑑂𑐏𑐶 𑐧𑐵𑐖𑑄𑐫𑐵 𑐧𑑀𑐮 𑐖𑐵𑐟𑑂𑐬𑐵𑐧𑐮𑐫𑑂, 𑐐𑐸𑑄𑐮𑐵𑐧𑐮𑐫𑑂 𑐠𑐵𑐂𑐐𑐸 𑐳𑑂𑐰𑐫𑐵𑑄 𑐥𑐵𑐂 𑑋 𑐠𑐠𑐾 𑐫𑐵𑐣𑐵𑑅 𑐣𑐵𑐫𑑂𑐏𑐶𑑄 𑐰 𑐎𑐵𑐴𑐵𑑅 𑐧𑐵𑐖𑑄 𑐠𑐵𑐂𑐐𑐸 𑐫𑐩𑐡𑑂𑐫𑑅𑐫𑐵𑐟 𑐳𑐸𑐔𑑄 𑐧𑐷𑐐𑐸 𑐢𑐫𑐵𑐐𑐸 𑐖𑐣𑐰𑐶𑐱𑑂𑐰𑐵𑐳 𑐡𑐸 𑑋 𑐠𑐖𑑂𑐫𑐵𑑅𑐐𑐸 𑐧𑐵𑐖𑑄 𑐠𑐵𑐂𑐥𑐶𑑄 𑐢𑐵𑑅𑐳𑐵 𑐁𑑅 𑐟𑐳𑐎𑑄 𑐴𑐾 𑐩𑑂𑐴𑑀 𑐖𑐸𑐂𑐢𑐸𑑄𑐎𑐮 𑑋 𑐃 𑐰 𑐁𑐢𑐸𑐣𑐶𑐎𑐬𑐞𑑄 𑐫𑐵𑐣𑐵𑑅 𑐠𑑂𑐰 𑐧𑐵𑐖𑑄 𑐳𑑂𑐫𑐣𑐾 𑐣𑑂𑐴𑑂𑐫𑐵𑑅𑐥𑐶𑑄 𑐩𑑂𑐴𑑀 𑐖𑐹𑐐𑐸 𑐏𑐣𑐾𑐡𑐸 𑑋 𑐐𑐸𑐮𑐶𑐳𑐶𑐣𑑄 𑐀𑐬𑑂𑐠 𑐩𑐠𑐸𑐫𑐵𑑅 𑐠𑑂𑐰 𑐧𑐵𑐖𑑄 𑐩𑐠𑐵𑐎𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐖𑐵𑐟𑑂𑐬𑐵 𑐰 𑐐𑐸𑑄𑐮𑐵𑐧𑐮𑐫𑑂 𑐣𑐵𑐫𑑂𑐏𑐶𑑄 𑐠𑐵𑐂𑐥𑐶𑐣𑐶𑐐𑐸 𑐮𑑂𑐫𑐵𑑅 𑐢𑐵𑑅𑐳𑐵 𑐄𑐟𑑂𑐳𑐵𑐴𑐖𑐣𑐎 𑐴𑐾 𑐡𑐸 𑑋 𑐟𑐬 𑐎𑐵𑐴𑐵𑑅 𑐧𑐵𑐖𑑄 𑐢𑐵𑑅𑐳𑐵 𑐮𑑀𑐥 𑐖𑐸𑐂𑐐𑐸 𑐏𑐟𑐬𑐵 𑐏𑐣𑐾𑐡𑐸 𑑋 𑐀𑐫𑑂𑐣𑑄 𑐕𑐸𑑄 𑐕𑐸𑑄 𑐥𑐸𑐔𑐮𑑄 𑐠𑐸𑐎𑐷 𑐢𑑂𑐫𑐵𑐣 𑐧𑐶𑐫𑐵𑐔𑑂𑐰𑑄𑐐𑐸 𑐢𑐵𑑅𑐳𑐵 𑐏𑐣𑐾𑐡𑐸 𑑋

𑐀𑐠𑐾𑐴𑐾 𑐩𑐾𑐐𑐸 𑐮𑑀𑐥𑑀𑐣𑑂𑐩𑐸𑐏 𑐧𑐵𑐖𑑄 𑐥𑑃𑐫𑑂𑐟𑐵𑑅 𑐏 𑑋 𑐥𑑃𑐫𑑂𑐟𑐵𑑅 𑐎𑐵𑐴𑐵𑑅 𑐳𑑂𑐰𑐫𑐵𑑄 𑐔𑐷𑐴𑐵𑐎𑑅 𑐖𑐸𑐂 𑑋 𑐥𑑃𑐫𑑂𑐟𑐵𑑅 𑐡𑑂𑐫𑑅𑐠𑐵𑐫𑑂 𑐡𑐶𑐣𑐵𑑅 𑐥𑐸𑐂𑐐𑐸 𑐧𑐵𑐖𑑄 𑐏𑑅 𑑋 𑐥𑑃𑐫𑑂𑐟𑐵𑐫𑐵 𑐥𑐵𑐳𑐵 𑐧𑐵𑐖𑑄 𑐎𑑀𑐟𑐵𑐏𑐶𑑄 𑐏𑑅, 𑐐𑐸𑐎𑐶𑐫𑐵 𑐀𑐰𑐳𑑂𑐠𑐵 𑐣𑑄 𑐥𑑃𑐫𑑂𑐟𑐵𑑅𑐫𑐵 𑐠𑐾𑑄 𑐴𑐾 𑐣𑐶𑐬𑐵𑐱𑐵𑐖𑐣𑐎 𑐡𑐸 𑑋 𑐧𑐴𑐵𑑅𑐧𑐴𑐶 𑐣𑐵𑐥𑑄 𑐩𑐾𑐩𑐾𑐐𑐸 𑐡𑑂𑐫𑑅𑐡𑑂𑐫𑑅𑐠𑐵𑐫𑑂 𑐮𑐕𑐶𑐫𑑄𑐎 𑐥𑑃𑐫𑑂𑐟𑐵 𑐥𑐸𑐂𑐐𑐸 𑐥𑐬𑐩𑑂𑐥𑐬𑐵 𑐡𑐸 𑑋 𑐠𑐠𑐾 𑐥𑐸𑐫𑐵𑑅 𑐡𑑂𑐫𑑅 𑐁𑐴𑑂𑐰𑐵𑐣𑐫𑐵 𑐳𑐸𑐔𑑄 𑐧𑐷𑐐𑐸 𑐢𑐫𑐵𑐐𑐸 𑐰𑐶𑐱𑑂𑐰𑐵𑐳 𑐡𑐸 𑑋 𑐟𑐬 𑐁𑑅 𑐀𑐥𑑂𑐰 𑐴𑐾 𑐧𑐴𑐵𑐧𑐴𑐷𑐮𑐫𑑂 𑐥𑑃𑐫𑑂𑐟𑐵𑑅 𑐩𑐥𑐹𑐐𑐸, 𑐎𑑀𑐟𑐵𑐏𑐶𑑄 𑐩𑐠𑐵𑑅𑐐𑐸 𑐫𑐎𑑂𑐰 𑐴𑐾 𑐡𑑃 𑐡𑐫𑐾𑐢𑐸𑑄𑐎𑐮 𑑋 𑐫𑐾𑑃𑐫𑑂 𑐮𑐵 𑐗𑐣𑑂 𑐴𑐾 𑐩𑑂𑐴𑑀 𑑋 𑐣𑐎𑐟𑐶𑐣𑐶 𑐴𑐾 𑐎𑐾𑐱𑐔𑐣𑑂𑐡𑑂𑐬 𑐩𑐴𑐵𑐰𑐶𑐴𑐵𑐬𑑄 𑐢𑐵𑑅𑐳𑐵 𑐠𑑂𑐰 𑐧𑐵𑐖𑑄 𑐧𑐶𑐡𑑂𑐫𑐵 𑐳𑑂𑐫𑐣𑐵𑑅 𑐥𑐸𑐣𑐳𑑂𑐬𑑂𑐠𑐵𑐥𑐣 𑐫𑐵𑑅𑐐𑐸 𑐡𑐸 𑑋 𑐩𑐾𑐠𑐵𑐫𑑂 𑐣𑑄 𑐠𑑂𑐰 𑐧𑐵𑐖𑑄 𑐳𑑄𑐬𑐎𑑂𑐲𑐞𑐫𑐵 𑐣𑐶𑑄𑐟𑐶𑑄 𑐠𑐖𑑂𑐫𑐵𑑅𑐐𑐸 𑐥𑐮𑐵𑑅 𑐣𑑂𑐴𑑂𑐫𑐵𑐎𑐾 𑐴𑐠𑐵𑐫𑑂 𑐖𑐸𑐂𑐢𑐸𑑄𑐎𑐹𑐐𑐸 𑐡𑐸 𑑋

𑐣𑑂𑐴𑐵𑐥𑐵𑑄𑐐𑐸 𑐥𑐺𑐲𑑂𑐛𑐫𑐵 𑐮𑑂𑐫𑑄
𑐣𑐾𑐎𑐹 𑐧𑐵𑐖𑑄 𑐐𑐸𑑄𑐮𑐵𑐧𑐮𑐫𑑂 𑐥𑐸𑐂𑐐𑐸 𑐫𑐵𑐂 𑑋 𑐠𑑂𑐰 𑐧𑐵𑐖𑑄 𑐡𑐶𑐰𑑄𑐐𑐟 𑐖𑐹𑐥𑐶𑑄 𑐕𑐾𑑃𑐖𑑅𑐫𑐵 𑐣𑐵𑐩𑐫𑑂 𑐣𑑄 𑐥𑐸𑐂𑐎𑐾𑐐𑐸 𑐫𑐵𑐂 𑑋 𑐫𑐾𑑃 𑐳𑑂𑐰𑐫𑐩𑑂𑐨𑐹𑐂 𑐐𑐸𑑄𑐮𑐵𑐧𑐮𑐫𑑂𑐖𑐎 𑐠𑑂𑐰 𑐥𑐸𑐂𑐐𑐸 𑐏𑐣𑐾𑐡𑐸𑐳𑐵𑑄 𑐫𑐮 𑐰 𑐏𑑂𑐰𑐥𑐫𑑂 𑐢𑐵𑑅𑐳𑐵 𑐣𑑁𑐧𑐵𑐖𑐣𑐫𑑂 𑐰 𑐎𑐶𑐥𑐹 𑐁𑐡𑐶 𑐣𑐾𑐰𑐵𑑅 𑐮𑐵𑐐𑐵𑐫𑑂 𑐢𑐵𑑅𑐣𑐵𑐥𑑄 𑐥𑐸𑐫𑐵𑐔𑑂𑐰𑐐𑐸𑑄 𑐡𑐸 𑑋 𑐠𑑂𑐰 𑐧𑐵𑐖𑑄 𑐖𑐒𑑂𑐐𑐮𑐷 𑐩𑐾𑐫𑑂 (𑐀𑐬𑑂𑐣𑐵)𑐫𑐵 𑐣𑐾𑐎𑐹𑐫𑐵𑐐𑐸 𑐖𑐸𑐂 𑑋 𑐀𑐬𑑂𑐣𑐵 𑐣𑐾𑐥𑐵𑐮𑐫𑑂 𑐴𑐾 𑐮𑑀𑐥 𑐖𑐸𑐂𑐐𑐸 𑐏𑐟𑐬𑐵𑐫𑑂 𑐮𑐵𑑅𑐐𑐸 𑐥𑐱𑐸 𑐏𑑅 𑑋 𑐥𑑀𑑄𑐐𑐵 𑐮𑑀𑐥𑑀𑐣𑑂𑐩𑐸𑐏 𑐀𑐰𑐳𑑂𑐠𑐵𑐫𑑂 𑐩𑐡𑐸𑐳𑐵𑑄 𑐀𑐥𑐵𑐫𑑂𑐳𑐎𑑄 𑐔𑑂𑐰𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐣𑑄 𑐏𑐣𑐾𑐩𑐡𑐸 𑑋 𑐡𑐵𑐦𑐵 𑐨𑐖𑐣, 𑐎𑐵𑐟𑑂𑐟𑐶 𑐥𑑂𑐫𑐵𑐏𑑄, 𑐫𑐾𑑃𑐫𑐵𑑅𑐧𑐮𑐫𑑂 𑐥𑐶𑐎𑐵𑐂𑐐𑐸 𑐡𑐷𑐥𑑂𑐫𑐵𑐏𑑄 𑐣𑐵𑐥𑑄 𑐠𑐷𑐠𑐷 𑐖𑐵𑐟𑑂𑐬𑐵𑐧𑐮𑐫𑑂 𑐥𑑀𑑄𑐐𑐵 𑐥𑐸𑐂𑐐𑐸 𑐫𑐵𑐂 𑑋

𑐩𑐸𑐴𑐵𑐮𑐷, 𑐧𑐵𑑃𑐳𑐸𑐬𑐷, 𑐧𑐫𑑂 𑐥𑐟𑐶𑐣𑑄 𑐥𑑂𑐰𑐵𑑅 𑐟𑐶𑐫𑐵𑑅 𑐥𑐸𑐂𑐐𑐸 𑐳𑐸𑐬 𑐧𑐵𑐖𑑄 𑐏𑑅 𑑋 𑐧𑐫𑑂 𑐟𑐥𑑂𑐫𑑄𑐎 𑐥𑐸𑐂𑐐𑐸 𑐳𑐸𑐬 𑐧𑐵𑐖𑑄 𑐏𑑅 𑑋 𑐧𑐫𑑂 𑐳𑐶𑑃𑐫𑐵𑐐𑐸 𑐖𑐸𑐂 𑑋 𑐠𑐸𑐎𑐷𑐫𑐵 𑐥𑐵𑐳𑐵 𑐧𑐵𑐖𑑄 𑐎𑑂𑐰𑑄𑐔𑐵𑐏𑐶𑑄 𑐏𑑅 𑑋 𑐧𑐵𑐖𑑄 𑐣𑐵𑐥 𑐴𑐾 𑐮𑑂𑐰𑐫𑐾𑐎 𑐧𑐫𑑂𑐫𑐵 𑐳𑑅 𑐣𑑄 𑐣𑐵𑐂𑐳𑐾 𑐔𑑂𑐰𑑄 𑑋 𑐧𑐵𑑃𑐳𑐸𑐬𑐷𑐫𑐵 𑐳𑑅 𑐧𑐫𑑂 𑐳𑑂𑐰𑐫𑐵𑑄 𑐟𑐳𑑅 𑐖𑐸𑐂𑐳𑐵 𑐩𑐸𑐴𑐵𑐮𑐷𑐳𑑂𑐰𑐫𑐵𑑄 𑐔𑐷𑐳𑑅 𑐖𑐸𑐂 𑑋 𑐧𑐵𑑃𑐳𑐸𑐬𑐷 𑐣𑐵𑐥𑑄 𑐥𑐔𑐶𑐩𑐵, 𑐏𑐶𑑄 𑐠𑐵𑐂𑐐𑐸 𑐏𑑅𑐳𑐵 𑐩𑐸𑐴𑐵𑐮𑐷𑐫𑐵 𑐥𑐮𑐾𑐳𑐵 𑐢𑐵𑑅 𑐣𑐵𑐥 𑐣𑑄 𑐥𑐸𑐂𑐐𑐸 𑐫𑐵𑐣𑐵𑐴𑑅𑐐𑐸 𑐡𑐸 𑑋 𑐢𑐵𑑅 𑐧𑐵𑐖𑑄𑐫𑐵 𑐳𑑅 𑐟𑐸𑐮𑐣𑐵𑐟𑑂𑐩𑐎 𑐬𑐸𑐥𑑄 𑐏𑐶𑑄, 𑐥𑐔𑐶𑐩𑐵 𑐳𑑂𑐰𑐫𑐵𑑄 𑐟𑐳𑑅 𑐖𑐹𑐐𑐸𑐮𑐶𑑄 𑐧𑐵𑑃𑐳𑐸𑐬𑐷 𑐥𑐸𑐂𑐥𑐶𑑄 𑐣𑑄 𑐫𑐎𑑂𑐰 𑐩𑐵𑐮𑐷𑐐𑐸 𑐳𑐩𑐳𑑂𑐫𑐵 𑐢𑐵𑑅𑐳𑐵 𑐡𑐸 𑑋

𑐣𑐾𑐰𑐵𑑅 𑐧𑐵𑐖𑑄 𑐩𑐸𑐴𑐵𑐮𑐷 𑐢𑐵𑑅𑐳𑐵 𑐩𑐾𑐩𑐾𑐐𑐸 𑐧𑐵𑐖𑑄𑐳𑑂𑐰𑐫𑐵𑑄 𑐟𑐳𑐎𑑄 𑐏𑐟𑐬𑐵𑐫𑑂 𑐮𑐵𑐫𑐾𑐢𑐸𑑄𑐎𑐹𑐐𑐸 𑐧𑐵𑐖𑑄 𑐏𑑅 𑑋 𑐩𑐸𑐴𑐵𑐮𑐷𑐫𑐵 𑐣𑑄 𑐣𑐾𑐰𑐵𑑅 𑐳𑐨𑑂𑐫𑐟𑐵𑐫𑑂 𑐥𑑂𑐬𑐩𑐸𑐏 𑐨𑐹𑐩𑐶𑐎𑐵 𑐡𑐸 𑑋 𑐧𑐾𑐮𑐵𑐫𑐟𑐫𑐵𑐧𑐶𑐖𑑂𑐘 𑐎𑑂𑐫𑐵𑐬𑑀𑐮 𑐟𑐶𑑄𑐐𑐾𑑄 𑐩𑐸𑐴𑐵𑐮𑐷 𑐧𑐵𑐖𑑄 𑐣𑐾𑐥𑐵𑑅 𑐡𑐾𑐫𑑂𑐫𑐵 𑐴𑐾 𑐢𑐸𑐎𑐢𑐸𑐎𑐷 𑐢𑐵𑑅𑐐𑐸 𑐡𑐸 𑑋 𑐩𑐸𑐴𑐵𑐮𑐷 𑐎𑐥𑐵𑐮𑐷 𑐳𑐩𑐸𑐡𑐵𑐫𑐫𑐵 𑐥𑐸𑐬𑑂𑐏𑑁𑐮𑐷 𑐧𑐵𑐖𑑄 𑐏𑑅 𑑋 𑐩𑐸𑐴𑐵𑐮𑐷𑑄 𑐡𑑃𑐫𑑂𑐡𑐳𑑄 𑐰𑐂𑐐𑐸 𑑑𑑒 𑐩𑐵𑐳𑐫𑑂 𑐡𑐸𑐐𑐸 𑐣𑐏𑑅𑐔𑐏𑑅𑐫𑐵 𑐩𑑂𑐫𑐾 𑐥𑐸𑐫𑐵𑑅 𑐫𑐵𑐩 𑐴𑐶𑐮𑐵𑐰𑑄𑐐𑐸 𑐳𑐸𑐔𑑄 𑐧𑐶𑐫𑐵𑐔𑑂𑐰𑐣𑐷 𑑋 𑐧𑐳𑐣𑑂𑐟, 𑐳𑐶𑐣𑐵𑐖𑑂𑐫𑐵, 𑐥𑐸𑐰𑐵𑐖𑑂𑐫𑐵, 𑐑𑐵𑐟𑐸, 𑐳𑐶𑐮𑐸, 𑐩𑐵𑐮𑐱𑑂𑐬𑐷, 𑐢𑐣𑐵𑐱𑑂𑐬𑐷 𑐁𑐡𑐶 𑐩𑑂𑐫𑐾 𑐥𑐸𑐂𑐐𑐸 𑐔𑐮𑐣 𑐡𑐸 𑑋 𑐴𑑀𑐮𑐶𑐧𑐮𑐫𑑂 𑐔𑐎𑑄𑐡𑑂𑐫𑑅𑐫𑐵 𑐖𑐵𑐟𑑂𑐬𑐵 𑐫𑐵𑐂𑐧𑐮𑐫𑑂 𑐣𑑄 𑐩𑐸𑐴𑐵𑐮𑐷𑐂 𑐴𑑀𑐮𑐶 𑐩𑑂𑐫𑐾 𑐥𑐸𑐂𑐎𑐵𑑅 𑐧𑐵𑐖𑑄 𑐠𑐵𑐫𑐾𑐩𑐵𑑅 𑑋 𑐁𑑅 𑐢𑐵𑑅𑐳𑐵 𑐠𑑂𑐰 𑐔𑐮𑐣 𑐴𑐾 𑐮𑑀𑐥 𑐖𑐸𑐂𑐢𑐸𑑄𑐎𑐮 𑑋

‘𑐟𑐶𑐳𑐵𑑄 𑐣𑑄 𑐟𑐶𑐂𑐎𑐵𑑅, 𑐐𑐸𑐖𑐬𑐵𑐟𑐶 𑐥𑐸𑐂𑐎𑐵𑑅 𑐬𑐵𑐖𑐩𑐟𑐶 𑐧𑑂𑐫𑐵𑐴𑐵 𑐫𑐵𑐣𑐵 𑐧𑑂𑐫𑐹’ 𑐠𑑂𑐰 𑐮𑑀𑐎𑑄𑐴𑑂𑐰𑐵𑑅𑐐𑐸 𑐩𑑂𑐫𑐾𑐫𑐵 𑐧𑑀𑐮 𑐏𑑅 𑑋 𑐠𑐸𑐎𑐷 𑐐𑐸𑐖𑐬𑐵𑐟𑐶 𑐢𑐵𑑅𑐐𑐸 𑐐𑐸𑐖𑐬𑐵𑐟𑐶 𑐩𑐸𑐴𑐵𑐮𑐶 𑐏𑑅 𑑋 𑐐𑐸𑐖𑐬𑐵𑐟𑐫𑐵 𑐳𑐴𑐣𑐵𑐂 𑐧𑐵𑐖𑑄 𑐠𑐾𑑄 𑐖𑑂𑐰𑐮𑐵𑑅𑐐𑐸𑐮𑐶𑑄 𑐠𑑂𑐰𑐫𑐵𑐟 𑐐𑐸𑐖𑐬𑐵𑐟𑐶 𑐩𑐸𑐴𑐵𑐮𑐶 𑐢𑐵𑑅𑐐𑐸 𑐏𑑅 𑑋 𑐐𑐸𑑄𑐮𑐵𑑄 𑐮𑐕𑐶 𑐠𑐵𑐂𑐐𑐸 𑐢𑐵𑑅 𑐧𑐵𑐖𑑄𑐫𑐵 𑐩𑐹 𑐳𑐸𑐬 𑐥𑐵𑐳𑐵𑐧𑐵𑐖𑑄 𑐣𑑄 𑐩𑐸𑐴𑐵𑐮𑐷 𑐴𑐾 𑐏𑑅 𑑋 𑐢𑐵𑑅 𑐣𑐵𑐥𑑄 𑐩𑐸𑐴𑐵𑐮𑐷 𑐥𑐸𑐂𑐐𑐸 𑐣𑑄 𑐮𑑀𑐥 𑐴𑐾 𑐖𑐹𑐐𑐸 𑐡𑐸 𑑋 𑐩𑐸𑐴𑐵𑐮𑐷𑐫𑐵 𑐥𑐮𑐾𑐳𑐵 𑐎𑐣𑐵𑐬 𑐀𑐬𑑂𑐠𑐵𑐟 𑐎𑑂𑐮𑐵𑐬𑐾𑐣𑐾𑐚 𑐚𑑂𑐬𑐩𑑂𑐥𑐾𑐚 𑐟𑐫𑐵𑑅 𑐩𑐸𑐴𑐵𑐮𑐷𑐫𑐵 𑐠𑐵𑐫𑑂 𑐖𑐵𑐫𑐾𑐎𑐾𑐐𑐸 𑐎𑐸𑐟𑑅 𑐮𑐵 𑐖𑐸𑐮, 𑐟𑐬 𑐄𑐎𑐶𑑄 𑐢𑐵𑑅 𑐧𑐵𑐖𑑄𑐫𑐵 𑐣𑐾𑐰𑐵𑑅 𑐩𑑁𑐮𑐶𑐎𑐟𑐵 𑐴𑐾 𑐣𑑂𑐴𑐵𑐳 𑐫𑐵𑐣𑐵𑐧𑐶𑐄𑐐𑐸 𑐏𑐣𑐾𑐡𑐸 𑑋

𑐫𑐾𑑃𑐫𑑂 𑐮𑑀𑐥 𑐖𑐸𑐂𑐢𑐸𑑄𑐎𑐹𑐐𑐸 𑐩𑐖𑐶𑐩𑐐𑐵𑑅𑐐𑐸 𑐧𑐵𑐖𑑄 𑐠𑑁𑑄𑐎𑐣𑑂𑐴𑐫𑑂 𑐫𑐾𑑃𑐫𑐵𑑅𑐧𑐮𑐫𑑂 𑐖𑐎 𑐥𑐸𑐫𑐵 𑐰𑐫𑐵𑐔𑑂𑐰𑑄𑐐𑐸 𑐏𑐣𑐾𑐡𑐸 𑑋 𑐰 𑐣𑑄 𑐥𑐸𑐂𑐥𑐶𑑄 𑐏𑑂𑐰𑐥 𑐡𑐾𑐳𑑄𑐣𑐶𑐳𑐾𑑄 𑐳𑑅𑐟𑐾𑐐𑐸 𑐫𑐵𑐂 𑑋 𑐱𑑂𑐬𑐷 𑐐𑐞𑐾𑐱, 𑐱𑑂𑐬𑐷 𑐎𑐸𑐩𑐵𑐬𑐷 𑐩𑐵𑐖𑐸 𑐰 𑐱𑑂𑐬𑐷 𑐨𑐿𑐬𑐰 𑐁𑐖𑐸 𑐥𑐶𑐎𑐵𑐂𑐧𑐮𑐫𑑂 𑐩𑐸𑐴𑐵𑐮𑐷 𑐴𑐾 𑐩𑐵𑑅, 𑐣𑐵𑐥𑑄 𑐡𑑂𑐫𑑅 𑐥𑑂𑐫𑐵𑐏𑐣𑐫𑑂 𑐣𑑄 𑐩𑐸𑐴𑐵𑐮𑐷 𑐴𑐾 𑐩𑐵𑑅 𑑋 𑐳𑑂𑐰𑐣𑐶𑐐𑑅𑐣𑐵𑐥𑑄 𑐣𑐾𑐰𑐵𑑅 𑐧𑐳𑑂𑐟𑐷 𑐩𑐶𑐮𑐾 𑐫𑐵𑐣𑐵𑑅 𑐖𑐎 𑐩𑐸𑐴𑐵𑐮𑐷 𑐥𑐸𑐂𑐥𑐶𑐣𑐶𑐐𑐸 𑐮𑑂𑐫𑐵𑑅 𑐟𑐳𑐎𑑄 𑐴𑐾 𑐩𑑂𑐴𑑀 𑑋 𑐏𑑂𑐰𑐥𑐫𑐵 𑐩𑐴𑐵𑐎𑐵𑐮𑐷 𑐥𑑂𑐫𑐵𑐏𑑄, 𑐠𑐶𑐩𑐶𑐫𑐵 𑐮𑐵𑐫𑑂𑐎𑐹 𑐨𑐿𑐮𑑅𑐥𑑂𑐫𑐵𑐏𑑄, 𑐫𑐮𑐫𑐵 𑐎𑐵𑐟𑑂𑐟𑐶 𑐥𑑂𑐫𑐵𑐏𑑄 𑐁𑐡𑐶𑐂 𑐣𑑄 𑐩𑐸𑐴𑐵𑐮𑐷 𑐩𑐖𑐶𑐩𑐐𑐵𑑅 𑑋 𑐩𑐸𑐴𑐵𑐮𑐷 𑐣𑑄 𑐠𑐷𑐠𑐷 𑐥𑑂𑐬𑐎𑐵𑐬𑐫𑐵 𑐡𑐸 𑑋 𑐐𑐸𑐮𑐶𑑄 𑐥𑑂𑐬𑐎𑐵𑐬 𑐮𑐵 𑐮𑑀𑐥 𑐴𑐾 𑐖𑐸𑐂𑐢𑐸𑑄𑐎𑐮, 𑐠𑑁𑑄𑐎𑐣𑑂𑐴𑐫𑑂 𑐳𑑄𑐐𑑂𑐬𑐴𑐵𑐮𑐫𑐫𑑂 𑐖𑐎 𑐡𑐣𑐶 𑑋 𑐐𑐸𑐮𑐶𑐏𑐾 𑐩𑐸𑐴𑐵𑐮𑐷 𑐧𑐵𑐖𑑄 𑐣𑐾𑐰𑐵𑑅𑐟𑐫𑑂𑐳𑑄 𑐴𑐾 𑐩𑑂𑐴𑐳𑐷𑐎𑐾 𑐩𑐦𑐸𑐐𑐸 𑐀𑐰𑐳𑑂𑐠𑐵𑐫𑑂 𑐰𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐠𑐠𑐾 𑐩𑐖𑐶𑐩𑐐𑐵𑑅𑐐𑐸 𑐧𑐵𑐖𑑄𑐟𑐫𑑂 𑐠𑐖𑐵𑑅𑐐𑐸 𑐳𑑂𑐠𑐶𑐟𑐶 𑐰𑑅𑐐𑐸𑐫𑐵 𑐎𑐵𑐬𑐞 𑐣𑐾𑐰𑐵𑑅 𑐳𑐩𑐸𑐡𑐵𑐫𑐫𑑂 𑐡𑐸𑐐𑐸 𑐠𑐖𑐵𑐟÷𑐎𑑂𑐰𑐖𑐵𑐟𑐫𑐵 𑐧𑐵𑐖𑑄 𑐢𑐎𑐵𑑅 𑐟𑐂𑐐𑐸 𑐎𑐹𑐧𑐶𑐔𑐵𑐬 𑐣𑑄 𑐏𑑅 𑑋 𑐠𑐸𑐎𑐶𑑄 𑐫𑐵𑐣𑐵𑑅 𑐠𑑅𑐐𑐸 𑐴𑐾 𑐢𑐎𑐵𑑅 𑐣𑐵𑐮𑐾𑐐𑐸 𑐳𑑂𑐰𑑅𑐳𑐵𑑄 𑐳𑐩𑐵𑐖𑐫𑑂 𑐧𑐵𑑄𑐩𑐮𑐵𑐎 𑐳𑑂𑐰𑐂 𑐢𑐫𑐵𑐐𑐸 𑐨𑐵𑐰𑑄 𑐫𑐵𑐣𑐵𑑅 𑐣𑑄 𑐣𑑂𑐴𑐹𑐥𑐸𑐳𑑂𑐟𑐵𑑄 𑐠𑐖𑑂𑐫𑐵𑑅𑐐𑐸 𑐧𑐵𑐖𑑄 𑐳𑐫𑐾𑐎𑐾𑐐𑐸𑐮𑐶𑐂 𑐢𑑂𑐫𑐵𑐣 𑐩𑐧𑐶𑐄𑐐𑐸 𑐏𑐣𑐾𑐡𑐸 𑑋 𑐣𑑁𑐧𑐵𑐖𑑄, 𑐣𑐾𑐎𑐸 𑐧𑐵𑐖𑑄𑐫𑐵 𑐐𑐸𑐬𑐸 𑐩𑑀𑐟𑐶𑐮𑐵𑐮 𑐱𑐶𑐮𑑂𑐥𑐎𑐵𑐬𑑄 𑐠𑐖𑑂𑐫𑐵𑑅𑐐𑐸 𑐴𑐾 𑐕𑐐𑐹 𑐑𑐚𑐣𑐵 𑐎𑐣𑐵𑐡𑐷𑐐𑐸 𑐡𑐸 𑑋 𑐣𑐾𑐎𑐸 𑐧𑐵𑐖𑑄 𑐣𑑁 𑐧𑐵𑐖𑑄 𑐖𑐵𑐟𑑂𑐬𑐵 𑐣𑑂𑐫𑐵𑐫𑐾𑐎𑐾𑐟 𑐩𑐖𑐶𑐩𑐐𑐵𑑅𑐐𑐸 𑐩𑐸𑐴𑐵𑐮𑐶 𑐠𑐵𑐂𑐥𑐶𑑄 𑐩𑐡𑐸𑐐𑐸𑐮𑐶𑑄 𑐰𑐫𑑂𑐎𑐮𑑄 𑐠𑑅𑐐𑐸 𑐳𑐩𑐸𑐡𑐵𑐫𑐫𑑂 𑐴𑐾 𑐩𑐸𑐴𑐵𑐮𑐶 𑐳𑑂𑐫𑐣𑐾𑐐𑐸 𑐥𑐮𑐵𑑅 𑐣𑑂𑐴𑑂𑐫𑐵𑐎𑐵𑐡𑐷𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐠𑐵𑐫𑑂 𑐳𑐫𑐾𑐎𑐵𑑅 𑐖𑐵𑐟𑑂𑐬𑐵𑐫𑑂 𑐥𑐸𑐂𑐐𑐸 𑐂𑐮𑐫𑑂 𑐢𑐵𑑅𑐳𑐵 𑐥𑐸𑐂𑐥𑐶𑑄𑐟 𑐳𑐩𑐵𑐖𑑄 𑐧𑐵𑑄𑐩𑐮𑐵𑑅𑐐𑐸 𑐏𑑃 𑐣𑑂𑐫𑑄𑐎𑐹𑐐𑐸𑐮𑐶𑑄 𑐳𑐫𑐾𑐎𑐹𑐥𑐶𑑄𑐳𑑄 𑐟𑐎𑑄 𑐥𑐸𑐂𑐐𑐸 𑐡𑐶𑐎𑐵𑐧𑐶𑐮 𑑋 𑐁𑑅 𑐢𑐵𑑅𑐳𑐵 𑐣𑑁 𑐧𑐵𑐖𑐣𑐫𑑂 𑐟𑐎𑑄 𑐎𑐣𑐵𑐬 𑐥𑐸𑐂𑐎𑐵 𑐴𑐫𑐾𑐩𑐵𑑅𑐐𑐸 𑐧𑐵𑐢𑑂𑐫𑐟𑐵 𑐴𑐾 𑐖𑐸𑐮 𑑋

𑐧𑐵𑐖𑑄 𑐣𑐵𑐥𑑄 𑐧𑐵𑐖𑑄 𑐠𑐵𑐂𑐐𑐸 𑐧𑑀𑐮, 𑐠𑐵𑐫𑐾𑐐𑐸 𑐥𑐴𑑅𑐫𑐵 𑐩𑑁𑐮𑐶𑐎𑐟𑐵 𑐣𑑄 𑐧𑐶𑐳𑑂𑐟𑐵𑐬𑑄 𑐴𑐶𑐮𑐵𑐰𑑄𑐐𑐸 𑐡𑐸 𑑋 𑐃 𑐣𑐵𑐥𑑄 𑐕𑐸𑑄 𑐨𑐔𑐵 𑐴𑐶𑐮𑐵𑐰𑑄𑐐𑐸 𑐳𑐵𑐩𑐵𑐣𑑂𑐫 𑐴𑐾 𑐏𑑅 𑑋 𑐧𑐵𑑄𑐮𑐵𑐎 𑐳𑑂𑐫𑐣𑐾𑐐𑐸 𑐰𑑂𑐫𑐰𑐳𑑂𑐠𑐵 𑐰 𑐳𑑂𑐫𑐣𑐵 𑐎𑐵𑐂𑐥𑐶𑑄 𑐩𑐡𑐫𑐾𑐰𑑄 𑐐𑐸𑐮𑐶𑐏𑐾 𑐧𑑀𑐮, 𑐬𑐵𑐐 𑐠𑐵𑐫𑐾 𑐳𑑅𑐥𑐶𑑄 𑐩𑐡𑐫𑐵𑑅 𑐟𑐣𑐵 𑐴𑐾 𑐰𑐣𑐾𑐢𑐸𑑄𑐎𑐮 𑑋 𑐠𑑂𑐰 𑐟𑐣𑐵 𑐰𑐣𑐾𑐐𑐸 𑐎𑑂𑐬𑐩 𑐢𑐵𑑅𑐳𑐵 𑐁𑑅 𑐣𑑄 𑐩𑐡𑐶𑐄𑐣𑐶 𑑋 𑐠𑐷𑐠𑐷 𑐧𑐵𑐖𑑄 𑐡𑐠𑐸𑐂 𑐕𑐸𑑄 𑐳𑐩𑐵𑐣𑐟𑐵 𑐡𑑅𑐳𑐵𑑄 𑐠𑑅𑐠𑑅𑐐𑐸 𑐧𑐵𑐖𑑄𑐫𑐵 𑐠𑑅𑐠𑑅𑐐𑐸 𑐴𑐾 𑐀𑐮𑐐 𑐰𑐶𑐲𑐾𑐱𑐟𑐵 𑐣𑑄 𑐡𑐂 𑑋 𑐐𑐣𑑄 𑐧𑐵𑑄𑐮𑐵𑐎 𑐳𑑅𑐥𑐶𑑄 𑐳𑑂𑐫𑐣𑐵𑐩𑐶 𑐩𑐡𑐫𑐵𑑅 𑐧𑐵𑐖𑑄𑐫𑐵 𑐩𑐹 𑐬𑐳 𑐴𑐾 𑐩𑐡𑐫𑐾𑐎 𑐧𑐵𑐖𑑄 𑐠𑐵𑐣𑐵𑑅 𑐧𑐵𑐖𑑄𑐫𑐵 𑐀𑐳𑑂𑐟𑐶𑐟𑑂𑐰 𑐴𑐾 𑐏𑐟𑐬𑐵𑐫𑑂 𑐮𑐵𑐎𑐵𑐔𑑂𑐰𑑄𑐐𑐸 𑐡𑐸 𑑋 𑐀𑐫𑑂 𑐖𑐹𑐐𑐸𑐮𑐶𑑄 𑐧𑐵𑐖𑑄𑐫𑐵 𑐨𑑁𑐟𑐶𑐎 𑐳𑑂𑐰𑐬𑐹𑐥 𑐖𑐎 𑐩𑐏𑐳𑐾 𑐧𑐵𑐖𑑄𑐫𑐵 𑐬𑐳 𑐧𑐶𑐫𑐵𑑅 𑐕𑑂𑐫𑐮𑐾𑐐𑐸 𑐧𑐶𑐡𑑂𑐫𑐵 𑐣𑑄 𑐮𑑀𑐥𑑀𑐣𑑂𑐩𑐸𑐏 𑐀𑐰𑐳𑑂𑐠𑐵𑐫𑑂 𑐡𑐸 𑑋

𑐥𑐸𑐂𑐥𑐶𑑄, 𑐠𑐵𑐂𑐥𑐶𑑄 𑐣𑐵𑐥𑑄 𑐧𑐵𑑄𑐮𑐵𑐎 𑐣𑐾𑐰𑐵𑑅 𑐧𑐵𑐖𑑄 𑐡𑐫𑐾𑐎𑐾𑐳𑑅𑐥𑐶𑑄 𑐣𑑄 𑐩𑑂𑐴𑑀 𑐖𑐹𑐐𑐸 𑐀𑐰𑐳𑑂𑐠𑐵 𑐡𑐸 𑑋 𑐕𑑂𑐫𑑄𑐐𑐹𑐫𑐵 𑐣𑐾𑐰𑐵𑑅 𑐧𑐵𑐖𑑄 𑐡𑐫𑐾𑐎𑐷𑐥𑐶𑑄 𑐎𑐸𑐮𑐸 𑐳𑐩𑐸𑐡𑐵𑐫𑐫𑐵𑐥𑐶𑑄 𑐏 𑑋 𑐠𑑂𑐰 𑐧𑐶𑐡𑑂𑐫𑐵 𑐣𑑄 𑐣𑑂𑐴𑐹𑐐𑐸 𑐥𑐸𑐳𑑂𑐟𑐵𑐫𑑂 𑐴𑐳𑑂𑐟𑐵𑐣𑑂𑐟𑐬𑐞 𑐧𑐵𑑄𑐮𑐵𑐎 𑐖𑐸𑐂𑐩𑐦𑐫𑐵𑑅 𑐠𑐠𑐾 𑐣𑐾𑐰𑐵𑑅 𑐧𑐵𑐖𑑄 𑐡𑐫𑐾𑐎𑐷𑐥𑐶𑑄 𑐰𑐶𑐱𑐾𑐲𑐖𑑂𑐘 𑐩𑑂𑐴𑑀 𑐖𑐸𑐫𑐵𑐰𑑄𑐐𑐸 𑐡𑐸 𑑋 𑐩𑐵𑐡𑐮 𑐡𑐫𑐾𑐎𑐷𑐥𑐶𑑄 𑐐𑐿𑐬𑐣𑐾𑐰𑐵𑐟𑐫𑑂𑐳𑑄 𑐠𑐵𑐫𑑂 𑐮𑐵 𑐎𑐫𑐵𑐴𑐮, 𑐟𑐬 𑐣𑐾𑐰𑐵𑑅 𑐧𑐵𑐖𑐣𑐫𑑂 𑐡𑐂𑐐𑐸 𑐬𑐳 𑐢𑐵𑑅𑐳𑐵 𑐩𑑄𑐟 𑑋

𑐧𑐵𑐖𑑄𑐫𑐵𑐟 𑐩𑐵𑑅𑐐𑐸 𑐖𑑂𑐰𑐮𑑄 𑐧𑐵𑑄𑐮𑐵𑑅𑐐𑐸 𑐳𑐶𑑃, 𑐕𑑂𑐫𑑄𑐐𑐹, 𑐥𑑃, 𑐠𑐷𑐠𑐷 𑐢𑐵𑐟𑐸𑐟 𑐏𑑅 𑑋 𑐀𑐰𑑂𑐫𑐰𑐳𑑂𑐠𑐶𑐟 𑐳𑑂𑐰𑐣𑐶𑐐𑑅𑐫𑐵 𑐳𑐴𑐬𑐷𑐎𑐬𑐞𑑄 𑐫𑐵𑐣𑐵𑑅 𑐣𑐾𑐰𑐵𑑅 𑐧𑐵𑐖𑑄 𑐡𑐫𑐾𑐎𑐾𑐟 𑐩𑐵𑑅𑐐𑐸 𑐥𑑂𑐬𑐎𑐺𑐟𑐶𑐎 𑐖𑑂𑐰𑐮𑑄 𑐟𑐎𑑄 𑐩𑐡𑐫𑐵 𑐰𑐣𑐾𑐢𑐸𑑄𑐎𑐮 𑑋 𑐠𑐸𑐎𑐶𑐫𑐵 𑐡𑐎𑐮𑐫𑑂 𑐀𑐥𑑂𑐰𑑅 𑐮𑐶𑐔𑑂𑐰𑑅 𑐥𑑄 𑐩𑐵𑑅𑐐𑐸 𑐧𑐵𑐖𑐣𑐫𑑂 𑐮𑐵𑑅𑐐𑐸 𑐡𑐸 𑑋 𑐥𑐶𑑄𑐰𑐵𑐔𑐵 𑐧𑐵𑐖𑑄 𑐠𑐸𑐎𑐶𑐫𑐵 𑐡𑐳𑐸 𑐏 𑑋 𑐥𑐶𑑄𑐰𑐵𑐔𑐵 𑐧𑐵𑐖𑑄 𑐡𑐫𑐾𑐎𑐾𑐟 𑐟𑐔𑐵𑑅𑐐𑐸 𑐥𑑄 𑐩𑐵𑑅 𑑋 𑐳𑐶𑐖𑑅𑐫𑐵 𑐧𑐵𑐖𑐣𑐫𑑂 𑐥𑑀𑑄𑐐𑐵, 𑐥𑑃𑐫𑑂𑐟𑐵, 𑐎𑐵𑐴𑐵𑑅 𑐮𑐵𑑅 𑑋 𑐠𑑂𑐰 𑐧𑐵𑐖𑑄 𑐟𑐵𑐩𑑂𑐬𑐵𑐎𑐵𑐬 𑐳𑐩𑐸𑐡𑐵𑐫𑐫𑐵 𑐰𑐶𑐱𑐾𑐲𑐖𑑂𑐘𑑄 𑐡𑐫𑐾𑐎𑐾𑐐𑐸 𑐫𑐵𑐂 𑑋 𑐟𑐵𑐮 𑐧𑐵𑐖𑑄 𑐟𑐵𑑅, 𑐨𑐸𑐳𑑂𑐫𑐵𑑅, 𑐕𑐸𑐳𑑂𑐫𑐵𑑅, 𑐧𑐨𑐹𑐔𑐵, 𑐎𑑃𑐫𑑂𑐥𑐶𑑄 𑐥𑑄𑐔𑐢𑐵𑐟𑐸 𑐀𑐲𑑂𑐚𑐢𑐵𑐟𑐸𑐫𑐵𑐐𑐸 𑐖𑐸𑐂 𑑋 𑐠𑐠𑐾 𑐬𑐳 𑐰𑐫𑐾𑐎 𑐡𑐫𑐾𑐎𑐾 𑐳𑑅𑐥𑐶𑑄 𑐩𑑂𑐴𑑀 𑐖𑐸𑐫𑐵𑐰𑑄𑐐𑐸 𑐡𑐸𑐳𑐵 𑐧𑐖𑐵𑐬𑐫𑑂 𑐧𑐵𑑄𑐮𑐵𑑅𑐐𑐸 𑐧𑐵𑐖𑑄 𑐴𑐾 𑐩𑐵𑐮𑐾 𑐠𑐵𑐎𑐸𑐂𑐢𑐸𑑄𑐎𑐹𑐐𑐸 𑐡𑐸 𑑋 𑐠𑐵𑐂𑐥𑐶𑑄 𑐀𑐥𑑂𑐰𑑅𑐳𑐵 𑐖𑐎 𑐡𑐫𑐾𑐎𑐷𑐥𑐶𑑄 𑐣𑑄 𑐄𑐮𑐶 𑐴𑐾 𑐥𑑂𑐬𑐾𑐬𑐶𑐟 𑐖𑐸𑐫𑐵𑑅 𑐀𑐥𑑂𑐰𑐂 𑑋

𑐁𑑅𑐫𑐵 𑐂𑐮𑐫𑑂 𑐗𑐷𑐳𑑄 𑐀𑑅𑐥𑐸𑐎 𑐏𑐣𑐵𑐔𑑂𑐰𑐐𑐸𑑄 𑐧𑐵𑐖𑑄 𑐢𑐵𑑅, 𑐢𑐶𑐩𑐾, 𑐏𑐶𑑄, 𑐣𑐵𑐫𑑂𑐏𑐶𑑄𑑄, 𑐧𑐵𑐳𑐸𑐬𑐷 𑐁𑐡𑐶 𑐏𑑅 𑑋 𑐢𑐵𑑅 𑐧𑐵𑐖𑑄 𑐧𑑁𑐡𑑂𑐑𑐢𑐬𑑂𑐩𑐣𑐵𑐥 𑐳𑑂𑐰𑐵𑐥𑐹 𑐡𑐸𑐐𑐸𑐮𑐶𑑄 𑐱𑐵𑐎𑑂𑐫, 𑐧𑐖𑑂𑐬𑐵𑐔𑐵𑐬𑑂𑐫, 𑐄𑐡𑐵𑐫𑑂, 𑐳𑐵𑐫𑑂𑐩𑐷 𑐳𑐩𑐸𑐡𑐵𑐫𑐫𑑂 𑐀𑐥𑑂𑐰𑑅 𑐕𑑂𑐫𑐮𑐵𑐧𑐸𑐮𑐵 𑐡𑐸 𑑋 𑐀𑐠𑐾 𑐏𑑅𑐳𑐵𑑄 𑐁𑑅 𑐢𑐵𑑅𑐳𑐵 𑐩𑐾𑐩𑐾𑐐𑐸 𑐳𑐩𑐸𑐡𑐵𑐫𑑄 𑐣𑑄 𑐢𑐵𑑅𑐧𑐵𑐖𑑄 𑐠𑐵𑐣𑐵𑐴𑑅𑐐𑐸 𑐧𑐵𑑄𑐮𑐵𑐐𑐸 𑐥𑐮𑐵𑑅 𑐣𑑄 𑐏𑐣𑐾𑐡𑐸 𑑋 𑐀𑐠𑐾𑐴𑐾 𑐢𑐶𑐩𑐾 𑐖𑑂𑐫𑐵𑐥𑐹 𑐳𑐩𑐸𑐡𑐵𑐫𑐫𑐵 𑐮𑑀𑐎𑑄𑐴𑑂𑐰𑐵𑑅𑐐𑐸 𑐧𑐵𑐖𑑄 𑐏𑑅 𑑋 𑐠𑑂𑐰 𑐧𑐵𑐖𑑄 𑐠𑐵𑐫𑐾𑐐𑐸 𑐧𑐶𑐡𑑂𑐫𑐵 𑐣𑑄 𑐩𑐾𑐐𑐸 𑐣𑐾𑐰𑐵𑑅 𑐳𑐩𑐸𑐡𑐵𑐫 𑐡𑐸𑐣𑐾 𑐁𑐡𑐵𑐣 𑐥𑑂𑐬𑐡𑐵𑐣 𑐖𑐸𑐂𑐐𑐸 𑐣𑑂𑐴𑑂𑐫𑐵𑐫𑐾 𑐢𑐸𑑄𑐎𑐹𑐐𑐸 𑐡𑐸 𑑋 𑐢𑐵𑑅 𑐰 𑐢𑐶𑐩𑐾 𑐣𑐵𑐥𑑄 𑐧𑐵𑑃𑐳𑐸𑐬𑐷, 𑐏𑐶𑑄, 𑐡𑐵𑐦𑐵𑐏𑐶𑑄𑐮𑐫𑑂 𑐣𑑄 𑐠𑑂𑐰 𑐥𑐮𑐵𑑅 𑐣𑑂𑐴𑑂𑐫𑐵𑑅𑐐𑐸 𑐡𑐸 𑑋 𑐠𑐖𑑂𑐫𑐵𑑅𑐐𑐸 𑐴𑐾 𑐥𑐮𑐵𑑅𑐫𑐵𑐟 𑐴𑑅𑐥𑐵𑑅 𑐧𑐶𑐧𑐶𑐄𑑃 𑐩𑐾𑐐𑐸 𑐮𑑀𑐥𑐫𑐵 𑐏𑐟𑐬𑐵 𑐮𑐵𑑅𑐐𑐸 𑐧𑐵𑐖𑑄 𑐠𑐵𑐫𑐾𑐐𑐸, 𑐧𑐵𑐖𑑄𑐫𑐵 𑐧𑐶𑐡𑑂𑐫𑐵 𑐣𑑄 𑐖𑐵𑐟𑐫𑐵 𑐥𑑄𑐐𑑅 𑐔𑐶𑐂𑐎𑐵𑑅 𑐳𑑂𑐫𑐣𑐵𑐧𑐷𑐐𑐸, 𑐳𑑂𑐫𑐣𑐵 𑐎𑐵𑐫𑐾𑐐𑐸 𑐥𑐮𑐵𑑅 𑐗𑐷 𑐣𑐾𑐰𑐵𑑅 𑐳𑐩𑐸𑐡𑐵𑐫𑑄 𑐣𑑂𑐴𑑂𑐫𑐵𑐎𑐾𑐩𑐵𑑅 𑑋 𑐣𑐾𑐰𑐵𑑅 𑐳𑐨𑑂𑐫𑐟𑐵𑐫𑐵𑐟 𑐔𑐶𑐟𑑂𑐬 𑐣𑐵𑐥𑑄 𑐖𑑂𑐰𑑅𑐮𑐵𑐎𑐵𑑅 𑐳𑑂𑐰𑑅𑐳𑐵 𑐣𑐾𑐰𑐵𑑅 𑐧𑐵𑐖𑑄 𑐳𑐜𑑂𑐜𑐶𑐟 𑐔𑐶𑐟𑑂𑐬𑐫𑐵𑐐𑐸 𑐬𑐒𑑂𑐐 𑐏𑑅 𑑋 𑐠𑐷𑐠𑐷 𑐬𑐒𑑂𑐐 𑐖𑐵𑐫𑐵𑑅 𑐴𑐾 𑐣𑐾𑐰𑐵𑑅 𑐳𑐨𑑂𑐫𑐟𑐵 𑐗𑑅𑐗𑑅 𑐢𑐵𑑅𑐐𑐸 𑐏𑑅 𑑋 𑐡𑐎𑑂𑐰 𑐬𑐒𑑂𑐐𑐫𑐵 𑐔𑐶𑐟𑑂𑐬 𑐄𑐮𑐶 𑐴𑐾 𑐩𑐴𑐟𑑂𑐰 𑐡𑐂 𑑋 𑐄𑐎𑐶𑑄 𑐕𑐐𑐹 𑐕𑐐𑐹 𑐫𑐵𑐣𑐵𑑅 𑐬𑐒𑑂𑐐𑐟 𑐟𑐣𑐵𑐰𑐣𑐎𑐷 𑐔𑐶𑐟𑑂𑐬𑐫𑐵 𑐣𑑄 𑐩𑐴𑐟𑑂𑐰 𑐟𑐣𑐵𑐰𑐣𑐷 𑑋

𑐮𑑀𑐥 𑐖𑐸𑐫𑐵𑐔𑑂𑐰𑑄𑐐𑐸 𑐧𑐵𑐖𑑄 𑐥𑐶𑑄𑐰𑐵𑐔𑐵
𑐮𑐸𑐳𑐶𑑄 𑐠𑐶𑐂𑐎𑐵𑑅 𑐟𑐵𑐬 𑐎𑐶𑐫𑐵𑑅 𑐠𑐵𑐂𑐐𑐸 𑐥𑐶𑑄𑐰𑐵𑐔𑐵 𑐧𑐵𑐖𑑄 𑐕𑐐𑐹 𑐖𑐎 𑐣𑐾𑐰𑐵𑑅 𑐧𑐵𑐖𑑄 𑐏𑑅 𑑋 𑐠𑑂𑐰 𑐧𑐵𑐖𑑄 𑐢𑐵𑑅𑐳𑐵 𑐧𑐵𑐏𑐣𑐫𑑂 𑐎𑐣𑐾𑐐𑐸 𑐏𑑃 𑐠𑐾𑑄 𑐖𑐹𑐐𑐸 𑐡𑐸 𑑋 𑐠𑑂𑐰 𑐧𑐵𑐖𑑄𑐫𑐵 𑐧𑐵𑐬𑐾 𑐧𑐶𑐳𑑂𑐟𑐺𑐟 𑐖𑐵𑐣𑐎𑐵𑐬𑐷 𑐢𑐵𑑅𑐳𑐵 𑐩𑐮𑐹𑐣𑐶 𑑋 𑐫𑐡𑑂𑐫𑐥𑐶 𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵𑑅 𑐎𑐰𑐶𑐎𑐾𑐱𑐬𑐷 𑐔𑐶𑐟𑑂𑐟𑐢𑐬 𑐴𑐺𑐡𑐫𑐫𑐵𑐐𑐸 𑐔𑑂𑐰𑐳𑐸𑐮𑐫𑑂 𑐟𑐎𑑄 𑐠𑑂𑐰 𑐧𑐵𑐖𑑄𑐫𑐵 𑐏𑑃 𑐔𑑂𑐰𑐫𑐵𑐟𑑅𑐐𑐸 𑐡𑐸 𑑋 𑐠𑑂𑐰 𑐧𑐵𑐖𑑄 𑐎𑐶𑐥𑐵 𑐎𑐵𑐫𑐾𑐐𑐸 𑐥𑑂𑐬𑐰𑐶𑐢𑐶 𑐩𑐰𑐣𑐷𑐧𑐮𑐫𑑂 𑐴𑐾 𑐮𑑀𑐥 𑐖𑐹𑐐𑐸 𑐀𑐣𑐸𑐩𑐵𑐣 𑐫𑐵𑐫𑐾𑐦𑐸 𑑋 𑐥𑐱𑐸𑐥𑐟𑐶𑐫𑐵 𑐕𑐐𑐸 𑐟𑐸𑐣𑐵𑑅𑐳𑐶𑑃𑐂 𑐥𑐶𑑄𑐰𑐵𑐔𑐵 𑐎𑐶𑐫𑐵𑐔𑑂𑐰𑑄𑐐𑐸 𑐁𑐎𑐺𑐟𑐶 𑐣𑑄 𑐡𑐸 𑑋 𑐠𑐸𑐎𑐶𑐫𑐵 𑐁𑐢𑐵𑐬 𑐎𑐫𑐵𑑅 𑐧𑐶.𑐳𑑄. 𑑒𑑐𑑕𑑙 𑐳𑐵𑐮𑐫𑑂 𑐖𑑂𑐫𑐵𑐥𑐹 𑐩𑐴𑐵𑐐𑐸𑐠𑐶 𑐰 𑐮𑑀𑐎𑐧𑐵𑐖𑐵 𑐳𑑄𑐐𑑂𑐬𑐴𑐵𑐮𑐫𑐫𑐵 𑐐𑑂𑐰𑐳𑐵𑐮𑐫𑑂 𑐥𑐶𑑄𑐰𑐵𑐔𑐵 𑐡𑐫𑐾𑐎𑐵𑑅 𑐟𑐵𑐮𑐶𑐩 𑐣𑑄 𑐧𑐶𑐄𑐐𑐸 𑐏𑑅 𑑋 𑐰𑐫𑐵𑑄 𑐮𑐶𑐥𑐵 𑐢𑐵𑑅𑐳𑐵 𑐴𑐵𑐣𑑄 𑐠𑑂𑐰 𑐧𑐵𑐖𑑄 𑐣𑑂𑐫𑐣𑐾÷𑐏𑐣𑐾 𑐩𑐡𑐫𑐵𑐰𑐣 𑑋 𑐔𑐶𑐟𑑂𑐬 𑐰 𑐕𑐸𑑄 𑐖𑐵𑐣𑐎𑐵𑐬𑐷𑐟 𑐎𑐫𑐵𑑅 𑐢𑐵𑐫𑐾𑐐𑐸 𑐏𑑅𑐳𑐵 𑐠𑑂𑐰 𑐧𑐵𑐖𑑄 𑐩𑑂𑐴 𑐐𑑅𑐥𑑅 𑐴𑐶𑐎𑐾𑐐𑐸 𑐟𑐵𑑅𑐔𑐵 𑐥𑑄𑐫𑐵𑐐𑐸 𑐖𑐸𑐂𑐳𑐵 𑐟𑐵𑐬 𑐳𑐮 𑐣𑑂𑐴𑐶𑐥𑑂𑐫𑑄𑐫𑐵 𑐳𑑃𑐫𑐵𑐐𑐸 𑐖𑐸𑐂 𑑋 𑐠𑑂𑐰 𑐧𑐵𑐖𑑄 𑐗𑐷𑐳𑑄 𑐏𑐣𑐵𑐔𑑂𑐰𑑄𑐐𑐸 𑐳𑐵𑐬𑐒𑑂𑐐𑐷 𑐠𑐾𑑄 𑐎𑐶𑐣𑐵𑑅 𑐠𑐵𑐂 𑑋 𑐟𑐵𑐬 𑐳𑑃𑐫𑐵𑐐𑐸 𑐖𑐹𑐐𑐸𑐮𑐶𑑄 𑐠𑑂𑐰 𑐧𑐵𑐖𑐣𑐫𑑂 𑐎𑑂𑐰𑐫𑑂𑐫𑐵𑐐𑐸 𑐳𑐸𑐬 𑐖𑐎 𑐮𑐵𑑅 𑑋

𑐧𑐵𑐖𑑄𑐫𑐵 𑐳𑐵𑐩𑐵𑐣𑑂𑐫 𑐐𑑂𑐰𑐮𑐵𑐐𑐸 𑐳𑑂𑐰𑐬𑐸𑐥 𑐳𑑂𑐰𑐫𑐾𑐧𑐮𑐫𑑂 𑐠𑑂𑐰 𑐧𑐵𑐖𑑄 𑐳𑐵𑐬𑐒𑑂𑐐𑐷 𑐳𑑂𑐰𑐫𑐵𑑄 𑐣𑑂𑐴𑑂𑐫𑑅 𑐁𑐰𑐶𑐳𑑂𑐎𑐵𑐬 𑐖𑐹𑐐𑐸 𑐀𑐣𑐸𑐩𑐵𑐣 𑐫𑐵𑐫𑐾𑐦𑐸 𑑋 𑐠𑑂𑐰 𑐧𑐵𑐖𑑄 𑐖𑑂𑐫𑐵𑐥𑐸 𑐳𑐩𑐸𑐡𑐵𑐫𑑄 𑐠𑐵𑐂𑐐𑐸 𑐢𑐎𑐵𑑅 𑐳𑐦𑐸𑐮𑐶𑐂 𑐔𑑂𑐰𑐫𑐵𑐟𑑅𑐐𑐸 𑐡𑐸 𑑋 𑐣𑐵𑐥𑑄 𑐡𑐵𑐦𑐵𑐩𑑂𑐫𑐾 𑐴𑐵𑐮𑐷𑐧𑐮𑐫𑑂 𑐣𑑄 𑐠𑐵𑐂𑐐𑐸 𑐢𑐎𑐵𑑅 𑐣𑑄 𑐡𑐸 𑑋 𑐮𑑀𑐥 𑐖𑐸𑐂𑐢𑐸𑑄𑐎𑐹𑐐𑐸 𑐠𑑂𑐰 𑐮𑑀𑐎𑐧𑐵𑐖𑑄 𑐮𑑀𑐎𑐧𑐵𑐖𑐵 𑐀𑐢𑑂𑐫𑐫𑐣𑐎𑐬𑑂𑐟𑐵 𑐳𑐒𑑂𑐐𑐶𑐟𑐎𑑅𑐩𑐶 𑐖𑐾𑐳𑐣 𑐎𑐸𑑃𑐰𑐬𑑄 𑐀𑐣𑐸𑐳𑐣𑑂𑐢𑐵𑐣 𑐫𑐵𑐣𑐵𑑅 𑐠𑑅𑐩𑑂𑐴𑑄 𑐴𑐾 𑐠𑑂𑐰 𑐧𑐵𑐖𑑄 𑐡𑐫𑐾𑐎𑐵𑑅 𑐥𑐸𑐬𑑂𑐣𑐳𑑂𑐠𑐵𑐥𑐣 𑐫𑐵𑐫𑐾𑐐𑐸 𑐥𑐮𑐵𑑅 𑐣𑑂𑐴𑑂𑐫𑐵𑐎𑐾 𑐢𑐸𑑄𑐎𑐹𑐐𑐸 𑐡𑐸 𑑋 𑐰𑐫𑑂𑐎𑐮𑑄 𑐠𑑂𑐰 𑐧𑐵𑐖𑑄 𑐕𑐫𑑂𑐮𑐵𑑅 𑐩𑑂𑐫𑐾𑑃 𑐣𑑄 𑐥𑐶𑐎𑐵𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐩𑐾𑐐𑐸 𑐮𑑀𑐎𑐧𑐵𑐖𑑄 𑐣𑐵𑐥𑑄 𑐠𑑂𑐰 𑐧𑐵𑐖𑑄 𑐠𑐵𑐣𑐵𑑅 𑐰𑐫𑑂𑐎𑑅𑐫𑐵 𑐥𑐸𑐔𑑅 ‘𑐣𑐵𑐂𑐚𑑄’ 𑐫𑐸𑐬𑑀𑐥𑐫𑐵 𑐳𑐵𑐒𑑂𑐐𑐶𑐟𑐶𑐎 𑐨𑑂𑐬𑐩𑐞 𑐫𑐵𑑅𑐐𑐸 𑐏𑑅 𑑋 𑐳𑐵𑐒𑑂𑐐𑐶𑐟𑐶𑐎 𑐥𑑂𑐬𑐳𑑂𑐟𑐸𑐟𑐶 𑐳𑑂𑐰𑑅𑐥𑐶𑑄 𑐰𑐶𑐡𑐾𑐱𑐷𑐟𑐫𑑂𑐳𑑄 𑐟𑐎𑑄 𑐥𑐶𑑄𑐰𑐵𑐔𑐵𑐫𑑂 𑐰𑐶𑐱𑐾𑐲 𑐢𑑂𑐫𑐵𑐣 𑐧𑐶𑐄𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐠𑑂𑐰 𑐥𑐸𑐔𑑅𑐫𑐵 ‘𑐎𑐵𑐮𑑀 𑐝𑐸𑑄𑐐𑐵’ 𑐢𑐵𑑅𑐐𑐸 𑐩𑑂𑐫𑐾𑑃 𑐣𑐵𑐥𑑄 𑐩𑐾𑐐𑐸 𑐩𑑂𑐫𑑃𑐾𑐫𑑂 𑐰𑐫𑑂𑐎𑐮𑑄 𑐥𑐶𑑄𑐰𑐵𑐔𑐵 𑐕𑑂𑐫𑐵𑐮𑐵𑐡𑐷𑐐𑐸 𑐡𑐸 𑑋

𑐰𑐫𑑂𑐎𑑅𑐫𑐵 𑐴𑐾 𑐥𑑂𑐬𑐾𑐬𑐞𑐵 𑐎𑐫𑐵𑑅 𑐖𑐶𑑄 (𑐫𑐔𑐸 𑐱𑐵𑐎𑑂𑐫) 𑐣𑑄 𑐠𑑂𑐰 𑐧𑐵𑐖𑑄 𑐬𑐵𑐖𑐩𑐟𑐶 𑐳𑑄𑐎𑐶𑐥𑐵𑐫𑐵 𑐩𑑂𑐫𑑃𑐾 ‘𑐏𑑂𑐰𑐫𑑂 𑐰𑐫𑐵𑑅 𑐣𑑄 𑐏𑑂𑐰𑐫𑑂 𑐩𑐏𑑄’𑐫𑐵 𑐎𑐨𑐬𑐫𑑂 𑐕𑑂𑐫𑐮𑐵𑑅𑐐𑐸 𑐏 𑑋 𑐠𑑂𑐰 𑐧𑐵𑐖𑑄𑐫𑐵 𑐠𑐵𑐫𑐾𑐐𑐸 𑐰𑐶𑐢𑐶 𑐩𑐳𑐶𑐄𑐣𑐶𑐐𑐸𑐮𑐶𑑄 𑐠𑐸𑐎𑐷 𑐀𑐗 𑐥𑐬𑐶𑐎𑑂𑐲𑐞 𑐫𑐵𑐫𑐾𑐩𑐵𑐣𑐶𑐐𑐸 𑐳𑐷 𑐡𑐸 𑑋 𑐠𑑂𑐰 𑐧𑐵𑐖𑑄 𑐡𑐫𑐾𑐎𑐾𑐟 𑐟𑑅𑐔𑐵𑑅𑐐𑐸 𑐥𑑄 𑐩𑐵𑑅𑐐𑐸, 𑐟𑐬 𑐁𑑅 𑐳𑑂𑐰𑐣𑐶𑐐𑐮𑐫𑑂 𑐠𑐖𑑂𑐫𑐵𑑅𑐐𑐸 𑐥𑑄 𑐩𑐵𑐮𑐾 𑐠𑐵𑐎𑐹𑐐𑐸𑐮𑐶𑑄 𑐣𑑄 𑐳𑐩𑐳𑑂𑐫𑐵 𑐡𑐸 𑑋 𑐧𑐵𑐖𑑄𑐫𑐵𑐟 𑐩𑐵𑑅𑐐𑐸 𑐖𑑂𑐰𑐮𑑄 𑐩𑐶𑐮𑐾𑐫𑐵𑐫𑐾 𑐦𑐸𑐳𑐵 𑐠𑑂𑐰 𑐧𑐵𑐖𑑄𑐫𑐵𑐟 𑐴𑐵𑐣𑑄 𑐧𑐫𑑂𑐧𑐫𑑂 𑐖𑐸𑐂𑐎 𑐥𑐸𑐣𑐬𑑂𑐖𑐷𑐰𑐣 𑐧𑐷𑐦𑐂 𑑋