𑐰𑐜𑐵𑐢𑑂𑐫𑐎𑑂𑐲 𑐧𑐵𑐮𑐎𑐺𑐲𑑂𑐞𑑄 𑐣𑐾𑐥𑐵𑐮𑐨𑐵𑐲𑐵 𑐰𑐶𑐡𑑂𑐫𑐵𑐬𑑂𑐠𑐷𑐫𑐵𑐟 𑐕𑐵𑐟𑑂𑐬𑐰𑐺𑐟𑐶 𑐧𑐷𑐐𑐸

𑐣𑐾𑐳𑑄 𑑑𑑑𑑔𑑕 𑐳𑐶𑐮𑑂𑐮𑐵𑐐𑐵 𑑑𑑔, 𑐫𑐾𑑃 𑑋 𑐎𑐵𑐩𑐥𑐵 𑑑𑑒 𑐰𑐜𑐵𑐫𑐵 𑐰𑐜𑐵𑐀𑐢𑑂𑐫𑐎𑑂𑐲 𑐧𑐵𑐮𑐎𑐺𑐲𑑂𑐞 𑐩𑐴𑐬𑑂𑐖𑐣𑑄 𑐳𑑂𑐣𑐵𑐟𑐎 𑐟𑐐𑐶𑐩𑐫𑑂 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑐣𑐵𑐔𑑂𑐰𑑄𑐩𑑂𑐴 𑐕𑐩𑑂𑐴 𑐰𑐶𑐡𑑂𑐫𑐵𑐬𑑂𑐠𑐷𑐫𑐵𑐟 𑐕𑐵𑐟𑑂𑐬𑐰𑐺𑐟𑐶 𑐧𑐶𑐂𑐐𑐸 𑐖𑐹𑐐𑐸 𑐡𑐸 𑑋 𑐠𑐸𑐐𑐸 𑐕𑐵𑐟𑑂𑐬𑐰𑐺𑐟𑐶𑐫𑐵 𑐡𑐵𑑄 𑐡𑑃𑐫𑑂 𑑑𑑒𑐡𑑂𑐰𑑅 𑐟𑐎𑐵𑐫𑐵 𑐖𑐸𑐂 𑑋 𑐠𑐸𑐎𑐠𑑄𑐫𑐵 𑐕𑐵𑐟𑑂𑐬𑐰𑐺𑐟𑐶 𑐬𑐟𑑂𑐣 𑐬𑐵𑐖𑑂𑐫 𑐮𑐎𑑂𑐲𑑂𑐩𑐷 𑐎𑐮𑐾𑐖𑐫𑑂 𑐣𑐾𑐥𑐵𑐮𑐨𑐵𑐲𑐵 𑐰𑐶𑐲𑐫 𑐎𑐫𑐵𑑅 𑐧𑑂𑐰𑐣𑐷𑐩𑑂𑐴 𑐰𑐶𑐡𑑂𑐫𑐵𑐬𑑂𑐠𑐷𑐫𑐵𑐟 𑐩𑐸𑐎𑑂𑐎𑑄 𑐳𑑂𑐣𑐵𑐟𑐎 𑐟𑐐𑐶𑑄𑐫𑐵 𑐥𑑂𑐫𑐡𑑃 𑐟𑐎𑐫𑐵 𑐀𑐢𑑂𑐫𑐫𑐣𑐫𑐵 𑐮𑐵𑐐𑐶𑑄 𑐧𑐶𑐂𑐟𑑂𑐫𑑄𑐐𑐸 𑐏𑑅 𑑋

𑐬𑐟𑑂𑐣 𑐬𑐵𑐖𑑂𑐫𑐮𑐎𑑂𑐲𑑂𑐩𑐷 𑐎𑐮𑐾𑐖𑐫𑐵 𑐳𑑂𑐣𑐵𑐟𑐎 𑐟𑐐𑐶𑐩𑐫𑑂 𑐣𑐾𑐥𑐵𑐮𑐨𑐵𑐲𑐵 𑐀𑐢𑑂𑐫𑐵𑐥𑐣 𑐫𑐵𑐣𑐵𑐔𑑂𑐰𑑄𑐥𑐶𑑄 𑐱𑐶𑐎𑑂𑐲𑐎 𑐥𑐸𑐔𑑅𑐫𑐵 𑐎𑐖𑐶 𑐱𑑂𑐬𑐷𑐩𑐶𑐮𑐵 𑐳𑐸𑐰𑐵𑐮𑐫𑐵 𑐣𑐾𑐟𑐺𑐟𑑂𑐰𑐫𑑂 𑐴𑑂𑐫𑐵𑐄𑑃𑐣𑐶𑐨𑐵𑑅𑐫𑐵 𑐣𑐵𑐫𑑅 𑐬𑐵𑐎𑐾𑐳 𑐩𑐵𑐣 𑐩𑐵𑐳𑑂𑐎𑐾 𑐳𑐩𑐾𑐟 𑐡𑐸𑐠𑑂𑐫𑐵𑑅𑐐𑐸 𑐕𑐐𑐹 𑐥𑐸𑐔𑐮𑑄 𑐠𑑁𑑄 𑐰𑐜𑐵 𑐀𑐢𑑂𑐫𑐎𑑂𑐲 𑐩𑐴𑐬𑑂𑐖𑐣𑐫𑐵𑐟 𑐣𑐵𑐥𑐮𑐵𑐣𑐵𑑅 𑐠𑐸𑐐𑐸 𑐕𑐵𑐟𑑂𑐬𑐰𑐺𑐟𑐶𑐫𑐵 𑐰𑑂𑐫𑐰𑐳𑑂𑐠𑐵𑐥𑐣 𑐫𑐵𑐣𑐵𑐧𑐶𑐫𑐵𑐡𑐷𑐟 𑐂𑐣𑐵𑐥 𑐫𑐵𑑅𑐰𑑄𑐐𑐸 𑐏𑑅 𑑋 𑐮𑐶𑐳𑐮𑐫𑑂 𑐰𑐫𑑂𑐎𑑅 𑐩𑐴𑐬𑑂𑐖𑐣𑑄 𑐠𑐸𑐐𑐸 𑐖𑑂𑐫𑐵𑐫𑑂 𑐩𑐵𑑅𑐎𑐠𑑄𑐫𑐵 𑐡𑐵𑑄 𑐔𑐸𑐮𑐵𑐎𑐾𑐐𑐸 𑐧𑐔𑑄 𑐧𑐶𑐫𑐵𑐡𑐷𑐐𑐸 𑐏𑑅 𑑋

𑐰𑐜𑐵 𑐀𑐢𑑂𑐫𑐎𑑂𑐲 𑐩𑐴𑐬𑑂𑐖𑐣𑐫𑐵 𑐠𑐸𑐐𑐸 𑐫𑑀𑐐𑐡𑐵𑐣𑑄 𑐬𑐟𑑂𑐣 𑐬𑐵𑐖𑑂𑐫𑐮𑐎𑑂𑐲𑑂𑐩𑐷 𑐎𑐮𑐾𑐖𑐫𑑂 𑐣𑐾𑐥𑐵𑐮𑐨𑐵𑐲𑐵 𑐀𑐢𑑂𑐫𑐫𑐣 𑐫𑐵𑐂𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐫𑐵𑐟 𑐐𑑂𑐰𑐵𑐴𑐵𑐮𑐶 𑐖𑐸𑐂 𑐢𑐫𑐵𑐟𑑅𑐐𑐸 𑐡𑐸 𑑋 𑐠𑐸𑐎𑐠𑑄𑐫𑐵 𑐐𑑂𑐰𑐵𑐴𑐵𑐮𑐶 𑐧𑐶𑐂𑐐𑐸 𑐧𑐔𑑄 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐩𑐾𑐐𑐸 𑐰𑐜𑐵 𑐀𑐢𑑂𑐫𑐎𑑂𑐲𑐥𑐶𑑄 𑐥𑐵𑐏𑐾𑑄 𑐣𑑄 𑐩𑑁𑐏𑐶𑐎𑐎𑐠𑑄 𑐰𑐫𑐾𑐢𑐸𑑄𑐎𑐹𑐐𑐸 𑐰 𑐰𑐫𑑂𑐎𑑅𑐥𑐶𑐣𑑂𑐟 𑐣𑑄 𑐠𑐸𑐎𑐠𑑄 𑐴𑐾 𑐣𑐵𑐥𑐮𑐵𑐣𑐵𑑅 𑐕𑐵𑐟𑑂𑐬𑐰𑐺𑐟𑐶 𑐩𑐸𑐣𑐾𑐐𑐸 𑐎𑐖𑐶 𑐳𑐸𑐰𑐵𑐮𑑄 𑐎𑐣𑐵𑐡𑐷𑐐𑐸 𑐡𑐸 𑑋