𑐰𑐶𑐬𑐵𑐚 𑐥𑐹𑐬𑑂𑐞 𑐰𑐿𑐡𑑂𑐫 𑐳𑐶𑐬𑐥𑐵𑑅𑐫𑐵 𑐣𑐶𑑄𑐟𑐶𑑄 𑑑𑑐 𑐐𑐹 𑐮𑐏𑐫𑐵 𑐀𑐎𑑂𑐲𑐫 𑐎𑑀𑐲

𑐰𑐶𑐬𑐵𑐚 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐳𑐩𑑂𑐩𑐾𑐮𑐣 𑐐𑐸𑐠𑐶 (𑐰𑐶𑐬𑐵𑐚 𑐐𑐸𑐠𑐶)𑐫𑐵 𑐐𑑂𑐰𑐳𑐵𑐮𑐫𑑂 𑐠𑐸𑐐𑐸𑐳𑐷 𑐖𑐹𑐐𑐸 𑐏𑑂𑐰𑐷𑐕𑐎𑑂𑐰𑑅𑐐𑐸 𑐰𑐶𑐬𑐵𑐚 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐳𑐩𑑂𑐩𑐾𑐮𑐣𑐫𑐵 𑐗𑑂𑐰𑐮𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵 𑐁𑐢𑐸𑐣𑐶𑐎 𑐐𑐡𑑂𑐫 𑐎𑐰𑐶𑐟𑐵𑐫𑐵 𑐣𑑂𑐴𑑂𑐫𑐮𑐸𑐰𑐵 𑐩𑐡𑐸𑐩𑑂𑐴 𑐥𑐹𑐬𑑂𑐞 𑐰𑐿𑐡𑑂𑐫𑐫𑐵 𑐣𑐵𑐩𑑄 𑐀𑐎𑑂𑐲𑐫 𑐎𑑀𑐲 𑐳𑑂𑐰𑐣𑐾𑐐𑐸 𑐖𑑂𑐫𑐵 𑐖𑐸𑐮 𑑋 𑐰𑑄𑐐𑐸 𑐎𑑁𑐮𑐵𑐠𑑂𑐰 𑐡𑑂𑐰𑐵𑐡𑐱𑐎𑐶𑐸𑐣𑑂𑐴𑐸 𑐖𑐹𑐐𑐸 𑐳𑐩𑑂𑐩𑐾𑐮𑐣𑐫𑑂 𑐩𑐡𑐸𑐩𑑂𑐴 𑐎𑐰𑐶 𑐰𑐿𑐡𑑂𑐫𑐫𑐵 𑐖𑐴𑐵𑐣 𑐩𑐶𑐬𑐵 𑐱𑐵𑐎𑑂𑐫 𑐰𑐿𑐡𑑂𑐫𑑄 𑐗𑐶𑐐𑐹 𑐮𑐏 𑐟𑐎𑐵 𑐡𑐵𑑄𑐫𑐵 ‘𑐰𑐶𑐬𑐵𑐚 𑐥𑐹𑐬𑑂𑐞 𑐰𑐿𑐡𑑂𑐫 𑐳𑐶𑐬𑐥𑐵𑑅’𑐫𑐵 𑐣𑐶𑑄𑐟𑐶𑑄 𑐄𑐐𑐸 𑐀𑐎𑑂𑐲𑐫 𑐎𑑀𑐲 𑐳𑑂𑐰𑐣𑐵𑐡𑐷𑐐𑐸 𑐏𑑅 𑑋

𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑐵 𑐏𑑂𑐫𑐮𑐫𑑂 𑐖𑑂𑐰𑑅𑐩𑐡𑐸𑐐𑐸 𑐫𑑀𑐐𑐡𑐵𑐣 𑐧𑐶𑐫𑐵𑐡𑐷𑐩𑑂𑐴 𑐕𑐩𑑂𑐴𑐾𑐳𑐶𑐟 𑐣𑐶𑐡𑑃𑐫𑑂 𑐕𑐎𑑂𑐰𑑅 𑐕𑐐𑐹 𑐮𑐏 𑐟𑐎𑐵 𑐡𑐵𑑄𑐫𑐵 𑐳𑐶𑐬𑐥𑐵𑑅 𑐧𑐷𑐐𑐸 𑐮𑑂𑐫𑐵𑐏𑑄 𑐄𑐐𑐸 𑐀𑐎𑑂𑐲𑐫 𑐎𑑀𑐲 𑐳𑑂𑐰𑐣𑐵𑐡𑐷𑐐𑐸 𑐏𑑅 𑑋 𑐮𑐶𑐳𑐾𑑄 𑐄𑐐𑐸 𑐂𑐮𑐫𑑂 𑐰𑐫𑑂𑐎𑐮𑑄 𑐰𑐶𑐬𑐵𑐚𑐫𑐵 𑐕𑐾𑑃 𑐡𑐣𑐾𑐟 𑐣𑐶𑐐𑐹 𑐮𑐏 𑐟𑐎𑐵 𑐡𑐵𑑄 𑐣𑑄 𑐁𑐬𑑂𑐠𑐶𑐎 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐡𑐾𑐱𑐫𑑂 𑐥𑑄𑐔𑐵𑐫𑐟𑐷 𑐎𑑂𑐬𑐸𑐬 𑐱𑐵𑐳𑐣𑐫𑐵 𑐂𑐮𑐫𑑂 𑐖𑐣𑐟𑐵𑐫𑐵 𑐏𑑃 𑐔𑑂𑐰𑐫𑐾𑐐𑐸, 𑐧𑑂𑐰𑐣𑐾𑐐𑐸, 𑐣𑑂𑐫𑐣𑐾𑐐𑐸, 𑐣𑑂𑐫𑑄𑐎𑐾𑐐𑐸 𑐩𑑁𑐮𑐶𑐎 𑐀𑐢𑐶𑐎𑐵𑐬 𑐱𑐵𑐳𑐣 𑐳𑐟𑑂𑐟𑐵𑑄 𑐎𑑂𑐰𑐟𑑂𑐫𑐮𑐵𑐟𑑅𑐐𑐸 𑐂𑐮𑐫𑑂 𑐖𑐣𑐟𑐵𑐫𑐵𑐟 𑐠𑑅𑐐𑐸 𑐏𑑃 𑐳𑐵𑐴𑐶𑐟𑑂𑐫𑐫𑐵 𑐩𑐵𑐢𑑂𑐫𑐩𑑄 𑐣𑑂𑐫𑑄𑐎𑐾𑐐𑐸 𑐟𑐵𑐟𑐸𑐣𑐵𑑅 𑐣𑐾.𑐳𑑄. 𑑑𑑐𑑘𑑒 𑐮𑐫𑑂 𑐰𑐶𑐬𑐵𑐚 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐳𑐩𑑂𑐩𑐾𑐮𑐣 𑐐𑐸𑐠𑐶𑐫𑐵 𑐥𑐮𑐶𑐳𑑂𑐠𑐵 𑐫𑐵𑐣𑐵𑑅 𑐄𑐐𑐸 𑐂𑐮𑑄𑐣𑐶𑐳𑐾𑑄 𑐰𑐶𑐬𑐵𑐚𑑄 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐳𑐩𑑂𑐩𑐾𑐮𑐣 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐏𑑅 𑑋

𑐰𑐶𑐬𑐵𑐚 𑐐𑐸𑐠𑐶𑐫𑐵 𑐣𑐵𑐫𑑅 𑐩𑐴𑐾𑐣𑑂𑐡𑑂𑐬𑐐𑑀𑐥𑐵𑐮 𑐎𑐬𑑂𑐩𑐵𑐔𑐵𑐬𑑂𑐫𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐣𑑂𑐴𑑂𑐫𑐵𑑅𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐩𑐹𑐥𑐵𑐴𑐵𑑄𑐎𑐠𑑄 𑐰𑐬𑐶𑐲𑑂𑐛 𑐳𑐵𑐴𑐶𑐟𑑂𑐫𑐎𑐵𑐬 𑐴𑐶𑐟𑐎𑐬𑐰𑐷𑐬 𑐳𑐶𑑄𑐴 𑐎𑑄𑐳𑐵𑐎𑐵𑐬 𑐗𑐵𑐫𑐵𑐡𑐷𑐐𑐸 𑐏𑑅 𑑋 𑐣𑐾𑐥𑐵𑑅 𑐡𑐾𑐫𑑂 𑐰 𑐣𑐾𑐰𑐵𑑅 𑐬𑐵𑐲𑑂𑐚𑑂𑐬𑐶𑐫 𑐐𑐵𑐣 𑐴𑐵𑐫𑐾𑐎𑐵𑑅 𑐣𑑂𑐴𑑂𑐫𑐵𑑅𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐰𑐶𑐬𑐵𑐚𑐫𑐵 𑐣𑑂𑐰𑐎𑐸 𑐩𑐴𑐾𑐣𑑂𑐡𑑂𑐬𑐮𑐵𑐮 𑐎𑐵𑐫𑐳𑑂𑐠𑑄 𑐮𑐳𑐎𑐸𑐳 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐰𑐶𑐬𑐵𑐚𑐫𑐵 𑐕𑑂𑐫𑐵𑐘𑑂𑐖𑐾 𑐥𑑂𑐬𑐡𑐷𑐥𑐬𑐟𑑂𑐣 𑐱𑐵𑐎𑑂𑐫𑑄 𑐣𑑂𑐴𑑂𑐫𑐵𑐎𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐎𑐬𑐶𑐧 𑐳𑑂𑐰𑐷𑐣𑑂𑐫𑐵𑐩𑑂𑐴 𑐳𑐵𑐴𑐶𑐟𑑂𑐫𑐎𑐵𑐬𑑄 𑐠𑑅𑐠𑑅𑐐𑐸 𑐳𑐵𑐴𑐶𑐟𑑂𑐫𑐶𑐎 𑐬𑐔𑐣𑐵 𑐥𑐵𑐛 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐥𑐵𑐛 𑐫𑐵𑑅𑐐𑐸 𑐬𑐔𑐣𑐵𑐩𑐢𑑂𑐫𑐾 𑐔𑐶𑐧𑐵𑐏𑑄 𑐰𑐶𑐢𑐵𑐫𑑂 𑐣𑐬𑐾𑐱 𑐀𑐩𑐵𑐟𑑂𑐫 𑐣𑑂𑐴𑐵𑐥, 𑐖𑑂𑐘𑐵𑐣𑐷𑐬𑐵𑐖𑐵 𑐩𑐵𑐣𑐣𑑂𑐢𑐬 𑐮𑐶𑐄 𑐰 𑐬𑐟𑑂𑐣𑐎𑐵𑐖𑐷 𑐩𑐴𑐬𑑂𑐖𑐣 ‘𑐮𑐹𑐣𑐶𑐨𑐵𑑅’ 𑐮𑐶𑐫𑐵𑑄𑐮𑐶𑐄 𑐮𑐵𑑅𑐐𑐸 𑐏𑑅 𑑋 𑐀𑐠𑐾 𑐴𑐾 𑐔𑐶𑐣𑐵𑐏𑑃𑐥𑐵𑐏𑐾 𑐬𑐵𑐩𑐾𑐱𑑂𑐰𑐬 𑐩𑐶𑐱𑑂𑐬𑐞 𑐱𑑂𑐬𑐾𑐲𑑂𑐛, 𑐡𑐶𑐮𑐎𑐸𑐩𑐵𑐬𑐷 𑐜𑑄𑐐𑑀𑐮 𑐰 𑐖𑑂𑐘𑐵𑐣𑐾𑐣𑑂𑐡𑑂𑐬𑐬𑐟𑑂𑐣 𑐰𑐖𑑂𑐬𑐵𑐔𑐵𑐬𑑂𑐫 𑐕𑐳𑐶𑐎𑐠𑑄 𑐣𑑂𑐴𑐵𑐥, 𑐮𑐶𑐄 𑐰 𑐮𑐶𑐫𑐵𑑄𑐮𑐶𑐄 𑐮𑐵𑑅𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐥𑐵𑐛 𑐫𑐵𑑅𑐐𑐸 𑐬𑐔𑐣𑐵𑐩𑐢𑑂𑐫𑐾 𑐄𑐟𑑂𑐎𑐺𑐲𑑂𑐚 𑐖𑐹𑐥𑐶𑐣𑐶𑐐𑐸 𑐣𑐵𑑄 𑐰𑐶𑐬𑐵𑐚𑐫𑐵 𑐥𑐸𑐮𑐵𑑄𑐩𑑂𑐴 𑐣𑐵𑐫𑑅𑐮𑐶𑐳𑐾𑑄 𑐳𑐵𑐴𑐶𑐟𑑂𑐫𑐎𑐵𑐬 𑐟𑑂𑐬𑐶𑐬𑐟𑑂𑐣 𑐱𑐵𑐎𑑂𑐫𑑄 𑐑𑑀𑐲𑐞𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐄𑐐𑐸 𑐴𑐾 𑐖𑑂𑐫𑐵𑐗𑑂𑐰𑐮𑐫𑑂 𑐣𑐾.𑐳𑑄. 𑑑𑑑𑑔𑑒𑐫𑐵 𑐡𑑃𑐫𑑂 𑐊𑐳𑐂𑐂 𑐥𑐬𑐷𑐎𑑂𑐲𑐵𑐫𑑂 𑐣𑐾𑐥𑐵𑐮𑐨𑐵𑐲𑐵 𑐰𑐶𑐲𑐫𑐫𑑂 𑐡𑐎𑐮𑐫𑑂 𑐀𑐥𑑂𑐰𑑅 𑐮𑑂𑐫𑐵𑑅 𑐴𑐫𑐵𑐡𑐷𑐩𑑂𑐴 𑐥𑐹𑐬𑑂𑐞𑐶𑐩𑐵 𑐟𑐸𑐮𑐵𑐢𑐬 (𑐖𑐐𑐟𑐳𑐸𑐣𑑂𑐡𑐬 𑐧𑑂𑐰𑐣𑐾𑐎𑐸𑐠𑐶)𑐫𑐵𑐟 𑐣𑑂𑐫𑐵𑐡𑑂𑐰𑑅 𑐟𑐎𑐵 𑐡𑐵𑑄 𑐰 𑐡𑐳𑐶𑐥𑑁𑐮𑐶𑐳𑐾𑑄 𑐣𑐾𑐥𑐵𑐮𑐨𑐵𑐲𑐵 𑐥𑐡𑐎𑑄 𑐕𑐵𑐫𑑂𑐥𑐶𑐄𑐐𑐸 𑐏𑑅 𑑋

𑐳𑐩𑑂𑐩𑐾𑐮𑐣𑐫𑑂 𑐖𑐸𑐖𑐸𑐎𑐵𑐖𑐷 𑐬𑑄𑐖𑐶𑐟, 𑐰𑐷𑐬𑐥𑑂𑐬𑐳𑐵𑐡 𑐨𑑄𑐳𑐵𑐬𑐷, 𑐐𑐸𑐖𑑂𑐫𑐾 𑐩𑐵𑐮𑐵𑐎𑐵𑐬, 𑐥𑐰𑐶𑐟𑑂𑐬 𑐎𑐳𑐵𑑅 𑐴𑐬𑐶𑐳𑐸𑐣𑑂𑐡𑐬 𑐮𑐵𑐏𑐾 𑐱𑑂𑐬𑐾𑐲𑑂𑐛, 𑐩𑐿𑐫𑐵 𑐩𑐴𑐬𑑂𑐖𑐣 𑐮𑐐𑐵𑐫𑐟𑑄 𑐩𑑂𑐫𑐾𑑃 𑐣𑑂𑐫𑑄𑐎𑐵𑐡𑐷𑐐𑐸 𑐏𑑅𑐳𑐵 𑐰𑐶𑐬𑐵𑐚𑐫𑐵 𑐏𑑂𑐰𑐵𑑅𑐥𑑁 ‘𑐴𑑂𑐫𑐵𑐄𑑃𑐧𑐵𑐮𑐵’𑐫𑐵 𑑓𑑐 𑐐𑐹𑐐𑐸 𑐮𑑂𑐫𑐵𑑅𑐫𑐵 𑐔𑐶𑐏𑐶𑐦𑑂𑐫𑐣𑐾𑐖𑑂𑐫𑐵 𑐣𑑄 𑐫𑐵𑑅𑐐𑐸 𑐏𑑅 𑑋

𑐰𑐶𑐬𑐵𑐚𑐫𑐵 𑐡𑐵𑑄𑐨𑐬𑐶𑑄 𑐬𑐵𑐩𑐐𑑀𑐥𑐵𑐮 𑐔𑑁𑐐𑐸𑐠𑐶𑑄 𑐳𑐸𑐨𑐵𑐫𑑂 𑐡𑐾𑐕𑐵𑐣𑐵𑐡𑐷𑐐𑐸 𑐏𑑅 𑑋