𑐰𑐶𑐱𑑂𑐰 𑐣𑐶𑐎𑐾𑐟𑐣𑐫𑐵 𑐰𑐶𑐡𑑂𑐫𑐵𑐬𑑂𑐠𑐷 𑐳𑐷𑐰𑑄 𑐁𑐣𑑂𑐡𑑀𑐮𑐣

𑐟𑑂𑐬𑐶𑐥𑐸𑐬𑐾𑐱𑑂𑐰𑐬𑐫𑑂 𑐔𑑂𑐰𑑄𑐐𑐸 𑐰𑐶𑐱𑑂𑐰 𑐣𑐶𑐎𑐾𑐟𑐣 𑐩𑐵𑐰𑐶𑐫𑐵 𑐎𑐎𑑂𑐲𑐵 𑑑𑑑 𑐫𑐵 𑐩𑐾𑐣𑐾𑐖𑐩𑐾𑐣𑑂𑐚 𑐧𑑂𑐰𑐣𑐷𑐩𑑂𑐴 𑐕𑐩𑑂𑐴 𑐰𑐶𑐡𑑂𑐫𑐵𑐬𑑂𑐠𑐷𑑄 𑐁𑐟𑑂𑐩𑐴𑐟𑑂𑐫𑐵 𑐫𑐵𑑅𑐐𑐸 𑐢𑐵𑐳𑐾𑑄 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐳𑑄 𑐥𑑂𑐬𑐡𑐬𑑂𑐱𑐣 𑐫𑐵𑑅𑐐𑐸 𑐡𑐸 𑑋 𑐀𑐣 𑐧𑑂𑐰𑐣𑐷𑐩𑑂𑐴 𑐰𑐶𑐡𑑂𑐫𑐵𑐬𑑂𑐠𑐷 𑐳𑐡𑐷𑐎𑑂𑐲𑐵 𑐔𑑁𑐢𑐬𑐷 𑐧𑐸𑐢𑐰𑐵𑑅 𑐔𑐵𑐣𑑂𑐴𑐫𑑂 𑐳𑐶𑐣𑐵𑐔𑑂𑐰𑑄𑐐𑐸 𑐀𑐰𑐳𑑂𑐠𑐵𑐫𑑂 𑐮𑐹𑐐𑐸 𑐏𑑅 𑑋

𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐳𑑄 𑐀𑐣𑐸𑐱𑐵𑐳𑐣 𑐥𑑂𑐬𑐩𑐸𑐏𑑄 𑐧𑐶𑐄𑐐𑐸 𑐩𑐵𑐣𑐳𑐶𑐎 𑐫𑐵𑐟𑐣𑐵𑐫𑐵 𑐎𑐵𑐬𑐞𑑄 𑐔𑑁𑐢𑐬𑐷𑑄 𑐁𑐟𑑂𑐩𑐴𑐟𑑂𑐫𑐵 𑐫𑐵𑑅𑐐𑐸 𑐢𑐵𑐳𑐾𑑄 𑐣𑑂𑐫𑐵𑐫𑐫𑐵 𑐩𑐵𑐐 𑐫𑐵𑐳𑐾𑑄 𑐳𑑂𑐎𑐸𑐮𑐫𑑂 𑐥𑑂𑐬𑐡𑐬𑑂𑐱𑐣 𑐫𑐵𑑅𑐐𑐸 𑐏𑑅 𑑋

𑐰𑐶𑐡𑑂𑐫𑐵𑐮𑐫𑐫𑐵 𑐥𑑂𑐬𑐢𑐵𑐣𑐵𑐢𑑂𑐫𑐵𑐥𑐎 𑐴𑐾𑐬𑐩𑑂𑐧𑐬𑐵𑐖 𑐎𑑃𑐜𑐾𑐮𑑄 𑐢𑐵𑑅𑐳𑐵 𑐩𑐵𑐣𑐳𑐶𑐎 𑐫𑐵𑐟𑐣𑐵 𑐧𑐶𑐄𑐐𑐸 𑐏𑑃𑐫𑐵𑐟 𑐏𑐞𑑂𑐜𑐣 𑐫𑐵𑐣𑐵𑐡𑐷𑐐𑐸 𑐡𑐸 𑑋 𑐰𑐫𑑂𑐎𑐮𑑄 𑐰𑐶𑐡𑑂𑐫𑐵𑐬𑑂𑐠𑐷 𑐔𑑁𑐢𑐬𑐷 𑐣𑐶𑐫𑐩𑐶𑐟 𑐬𑐸𑐥𑑄 𑐰𑐶𑐡𑑂𑐫𑐵𑐮𑐫 𑐩𑐰𑑅𑐐𑐸 𑐎𑐵𑐬𑐞𑑄 𑐣𑐶𑐫𑐩𑐶𑐟 𑐬𑐸𑐥𑑄 𑐰𑐶𑐡𑑂𑐫𑐵𑐮𑐫 𑐰𑐵 𑐢𑐎𑐵𑑅 𑐳𑐮𑑂𑐮𑐵𑐴 𑐧𑐶𑐫𑐵 𑐕𑑂𑐰𑐫𑐵𑐐𑐸 𑐰 𑐰𑐫𑐵𑑄 𑐮𑐶𑐥𑐵 𑐣𑑄 𑐩𑐰𑑅𑐐𑐸𑐮𑐶𑑄 𑐁𑑅 𑐀𑐨𑐶𑐨𑐵𑐰𑐎 𑐖𑑂𑐰𑐣𑐵𑑅 𑐰𑐵 𑐢𑐎𑐵𑑅 𑐧𑐸𑐢𑐰𑐵𑑅 𑐳𑐩𑑂𑐗𑐾 𑐫𑐵𑐣𑐵 𑐕𑑂𑐰𑐫𑐵𑐐𑐸 𑐏𑑃 𑐎𑐣𑐵𑐡𑐷𑐐𑐸 𑐡𑐸 𑑋

𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐳𑑄 𑐢𑐵𑑅𑐳𑐵 𑐰𑐶𑐡𑑂𑐫𑐵𑐮𑐫𑐫𑐵 𑐥𑐬𑐵𑐩𑐬𑑂𑐱 𑐰𑐶𑐨𑐵𑐐𑐫𑐵 𑐥𑑂𑐬𑐩𑐸𑐏 𑐣𑐰𑐬𑐵𑐖 𑐮𑑀𑐴𑐣𑐷𑑄 ‘𑐚𑐬𑑂𑐔𑐬’ 𑐧𑐶𑐄𑐐𑐸 𑐎𑐵𑐬𑐞𑑄 𑐔𑑁𑐢𑐬𑐷𑑄 𑐁𑐟𑑂𑐩𑐴𑐟𑑂𑐫𑐵 𑐫𑐵𑑅𑐐𑐸 𑐢𑐵𑐳𑐾𑑄 𑐮𑑀𑐴𑐣𑐷𑐫𑐵𑐟 𑐣𑐶𑐮𑐩𑑂𑐧𑐣 𑐫𑐵𑐫𑐾𑐟 𑐩𑐵𑐐 𑐫𑐵𑑅𑐐𑐸 𑐡𑐸 𑑋 𑐥𑑂𑐬𑐢𑐵𑐣𑐵𑐢𑑂𑐫𑐵𑐥𑐎 𑐎𑑃𑐜𑐾𑐮𑑄 𑐰𑐶𑐡𑑂𑐫𑐵𑐬𑑂𑐠𑐷𑐫𑐵 𑐩𑐵𑐐 𑐎𑐠𑑄 𑐱𑐶𑐎𑑂𑐲𑐎, 𑐀𑐨𑐶𑐨𑐵𑐰𑐎, 𑐰𑐶𑐡𑑂𑐫𑐵𑐮𑐫 𑐰𑑂𑐫𑐰𑐳𑑂𑐠𑐵𑐥𑐣 𑐳𑐩𑐶𑐟𑐶 𑐰 𑐖𑐣𑐥𑑂𑐬𑐟𑐶𑐣𑐶𑐢𑐶𑐫𑐵 𑐧𑐿𑐛𑐎𑑄 𑐀𑐣𑐸𑐱𑐵𑐳𑐣 𑐮𑐶𑐳𑐾𑑄 𑐥𑐬𑐵𑐩𑐬𑑂𑐱 𑐰𑐶𑐨𑐵𑐐𑐫𑐵 𑐥𑑂𑐬𑐩𑐸𑐏 𑐮𑑀𑐴𑐣𑐷𑐫𑐵𑐟 𑐣𑐶𑐮𑐩𑑂𑐧𑐣 𑐫𑐵𑐫𑐾𑐢𑐸𑐣𑐵𑐐𑐸 𑐏𑑃 𑐎𑐣𑐵𑐡𑐷𑐐𑐸 𑐡𑐸 𑑋

School News