𑐣𑐾𑐰𑐵𑑅 𑐰𑐶𑐡𑑂𑐫𑐵𑐬𑑂𑐠𑐶 𑐫𑐸𑐣𑐶𑐫𑐣𑐫𑐵 𑐐𑑂𑐰𑐳𑐵𑐮𑐫𑑂 𑐱𑐱𑐷 𑐡𑐾𑐰𑐷 𑐴𑑅𑐥𑐵𑑅 𑐳𑐶𑐬𑐥𑐵 𑐬𑐶𑐟𑐾𑐱 𑐩𑐮𑑂𑐮𑐫𑐵𑐟 𑐮𑑅 𑐮𑑂𑐴𑐵𑐟

𑐀𑐣𑑂𑐟𑐬𑐵𑐲𑑂𑐚𑑂𑐬𑐶𑐫 𑐩𑐵𑐟𑐺𑐨𑐵𑐲𑐵 𑐡𑐶𑐰𑐳𑐫𑐵 𑐮𑐳𑐟𑐵𑐫𑑂 𑐬𑐟𑑂𑐣𑐬𑐵𑐖𑑂𑐫𑐮𑐎𑑂𑐲𑑂𑐩𑐷 𑐎𑑂𑐫𑐵𑐩𑑂𑐥𑐳𑐫𑑂 𑐰𑑄𑐐𑐸 𑐦𑐵𑐐𑐸𑐣 𑑑𑑑 𑐐𑐟𑐾 𑐁𑐂𑐟𑐰𑐵𑑅 𑐣𑑂𑐴𑐵𑐥𑐵𑑄𑐐𑐸 𑐱𑐱𑐷 𑐡𑐾𑐰𑐷 𑐴𑑅𑐥𑐵𑑅 𑐳𑐶𑐬𑐥𑐵 𑐮𑑅𑐮𑑂𑐴𑐵𑐟 𑑋 𑐧𑐶.𑐊. 𑐳𑑂𑐰𑑄𑐐𑐸𑐐𑐹 𑐡𑑃𑐫𑑂 𑐣𑐾𑐥𑐵𑐮 𑐨𑐵𑐲𑐵 𑐎𑐫𑐵 𑐧𑑂𑐰𑐣𑐵𑐡𑐶𑐩𑑂𑐴 𑐬𑐶𑐟𑐾𑐱 𑐩𑐮𑑂𑐮𑐫𑐵𑐟 𑐠𑐹𑐐𑐸 𑐳𑐶𑐬𑐥𑐵 𑐮𑑅𑐮𑑂𑐴𑐵𑐐𑐸 𑐏𑑅 𑑋

𑐰𑐶.𑐳𑑄. 𑑒𑑐𑑗𑑔 𑐳𑐵𑐮𑐫𑑂 𑐳𑑂𑐣𑐵𑐟𑐎 𑐟𑐴 𑐧𑐷.𑐊. 𑐣𑑂𑐴𑐵𑐥𑐵𑑄𑐐𑐸 𑐡𑑃𑐫𑑂 𑐡𑐎𑑂𑐰𑑄 𑐰𑐶𑐲𑐫𑐮𑐫𑑂 𑐥𑐵𑐳 𑐖𑐹𑐐𑐸𑐮𑐶𑑄 𑐴𑑅𑐥𑐵𑑅 𑐳𑐶𑐬𑐥𑐵𑑅 𑐮𑑅 𑐮𑑂𑐴𑐵𑑅𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐰𑐶𑐱𑐾𑐲 𑐥𑐵𑐴𑐵𑑃 𑐎𑐠𑑄 𑐗𑐵𑐫𑐵𑐡𑐷𑐩𑑂𑐴 𑐣𑐾𑐥𑐵𑐮𑐨𑐵𑐲𑐵 𑐱𑐶𑐎𑑂𑐲𑐵 𑐀𑐨𑐶𑐫𑐵𑐣𑐫𑐵 𑐣𑐵𑐫𑑅 𑐰𑐶𑐲𑑂𑐞𑐸 𑐔𑐶𑐟𑑂𑐬𑐎𑐵𑐬𑐥𑐵𑐏𑐾𑑄 𑐧𑑂𑐰𑐣𑐵𑐩𑐶𑐥𑐶𑑄 𑐬𑐶𑐡𑐾𑐣 𑐩𑐴𑐬𑑂𑐖𑐣, 𑐂𑐣𑑂𑐡𑑂𑐬𑐩𑐵𑐣 𑐩𑐴𑐬𑑂𑐖𑐣, 𑐬𑐶𑐟𑐾𑐱 𑐩𑐮𑑂𑐮, 𑐱𑐶𑐰𑐬𑐵𑐩 𑐩𑐸𑐣𑐶𑐎𑐵𑐬, 𑐥𑑂𑐬𑐱𑐵𑐣𑑂𑐟 𑐜𑑄𑐐𑑀𑐮, 𑐩𑐴𑐾𑐱𑑂𑐰𑐬 𑐱𑑂𑐬𑐾𑐲𑑂𑐛, 𑐳𑐸𑐬𑐖 𑐟𑐞𑑂𑐜𑐸𑐎𑐵𑐬, 𑐬𑐵𑐖𑐾𑐱 𑐱𑑂𑐬𑐾𑐲𑑂𑐛, 𑐎𑐰𑐶𑐣 𑐩𑐴𑐬𑑂𑐖𑐣, 𑐖𑐾𑐣𑐶𑐱 𑐩𑐸𑐣𑐶𑐎𑐵𑐬, 𑐩𑐣𑐶𑐲 𑐎𑐸𑐩𑐵𑐬 𑐱𑑂𑐬𑐾𑐲𑑂𑐛 (𑐣𑐾𑐰𑐵𑑅), 𑐮𑐶𑐳𑐾𑑄 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐡𑐷𑐥𑐶𑑄 𑐳𑑂𑐰𑐧𑐶𑐫𑐹 𑐣𑐵𑐫𑑅 𑐟𑐥𑐾𑐣𑑂𑐡𑑂𑐬 𑐱𑐵𑐴𑐷 𑐮𑐐𑐵𑐫𑐟 𑐣𑑂𑐰𑐎𑐹 𑐱𑑂𑐬𑐷𑐎𑐺𑐲𑑂𑐞 𑐄𑐥𑑂𑐬𑐾𑐟𑐷𑐫𑐵𑐟 𑐴𑐣𑐵 𑐥𑑁𑐮𑐶𑐳𑐾𑑄 𑐨𑐐𑐰𑐵𑐣 𑐧𑐸𑐡𑑂𑐢𑐫𑐵 𑐩𑐸𑐬𑑂𑐟𑐶 𑐮𑑅 𑐮𑑂𑐴𑐵𑑅𑐐𑐸 𑐏𑑅 𑑋

𑐣𑐾𑐥𑐵𑐮 𑐨𑐵𑐲𑐵 𑐱𑐶𑐎𑑂𑐲𑐎 𑐩𑐡𑐣𑐳𑐾𑐣 𑐧𑐖𑑂𑐬𑐵𑐔𑐵𑐬𑑂𑐫𑑄 𑐠𑑅 𑐟𑐶𑐬𑐶𑐩𑐫𑑂𑐖𑐸 𑐩𑐡𑐸𑐐𑐸 𑐮𑐸𑐩𑐣𑑂𑐟𑐶𑐮𑐶𑐳𑐾𑑄 𑐣𑐾𑐥𑐵𑐮 𑐨𑐵𑐲𑐵𑐫𑐵 𑐳𑐩𑑂𑐧𑐬𑑂𑐢𑐣, 𑐥𑑂𑐬𑐰𑐬𑑂𑐢𑐣 𑐫𑐵𑐫𑐾𑐟 𑐠𑐸𑐐𑐸 𑐳𑐶𑐬𑐥𑐵 𑐣𑐶𑐳𑑂𑐰𑐣𑐵 𑐡𑐷𑐐𑐸 𑐏𑑅 𑑋 𑐴𑑅𑐥𑐵𑑅 𑐳𑐶𑐬𑐥𑐵 𑐣𑐷𑐡𑑂𑐰 𑐟𑐎𑐵 𑐣𑐐𑐡𑐫𑐵 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐩𑐹𑐥𑐵𑐴𑐵𑑃 𑐎𑐠𑑄 𑐜𑐵. 𑐩𑐴𑐾𑐱𑐩𑐵𑐣 𑐱𑑂𑐬𑐾𑐲𑑂𑐛𑐥𑐵𑐏𑐾𑑄 𑐴𑐣𑐵𑐥𑑁 𑐮𑑅 𑐮𑑂𑐴𑐵𑑅𑐐𑐸 𑐏𑑅 𑑋 𑐰𑐫𑐾𑐾𑐾𑐎𑐮𑑄 𑐡𑐎𑐮𑐾 𑐀𑐥𑑂𑐰𑑅 𑐮𑑂𑐫𑐵𑑅 𑐴𑐫𑐵𑐡𑐷𑐥𑐶𑑄 𑐩𑐢𑑂𑐫𑐾 𑐕𑐩𑑂𑐴𑐾𑐳𑐶𑐟 𑐧𑐶.𑐊. 𑐣𑑂𑐴𑐵𑐥𑐵𑑄𑐐𑐸, 𑐮𑐶𑐥𑐵𑑄𑐐𑐸, 𑐳𑑂𑐰𑑄𑐐𑐸𑐐𑐹 𑐰 𑐥𑑂𑐫𑑄𑐐𑐸𑐐𑐸 𑐡𑑃𑐫𑑂 𑐡𑐎𑑂𑐰 𑐧𑐶𑐲𑐫𑐮𑐫𑑂 𑐥𑐵𑐳 𑐖𑐹𑐐𑐸 𑐮𑐶𑐢𑑄𑐳𑐵𑐫𑑂 𑐳𑐶𑐬𑐥𑐵 𑐡𑐵𑑃 𑐀𑐥𑑂𑐰𑐫𑐾𑐎𑐵 𑐧𑐶𑐂𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐰𑐶𑐱𑐾𑐲 𑐥𑐵𑐴𑐵𑑃 𑐎𑐠𑑄 𑐗𑐵𑐫𑐵𑐡𑐷𑐩𑑂𑐴 𑐎𑑂𑐫𑐵𑐩𑑂𑐥𑐳 𑐥𑑂𑐬𑐩𑐸𑐏 𑐜𑐵. 𑐣𑐶𑐬𑑂𑐩𑐮𑐵 𑐎𑐸𑐩𑐵𑐬𑐷 𑐳𑐸𑐰𑐵𑐮𑑄 𑐠𑐸𑐐𑐸𑐳𑐷 𑐎𑑂𑐫𑐵𑐩𑑂𑐥𑐳𑐫𑑂 𑐴𑑂𑐫𑐹𑐩𑑂𑐫𑐵𑐣 𑐬𑐶𑐬𑑂𑐳𑑀𑐳 𑐩𑑂𑐴𑑀 𑐖𑐹𑐐𑐸𑐮𑐶𑑄 𑐩𑐵𑐳𑑂𑐚𑐬𑑂𑐳𑐫𑑂 𑐣𑐾𑐥𑐵𑐮 𑐨𑐵𑐲𑐵 𑐡𑐸𑐠𑑂𑐫𑐵𑐎𑐾𑐩𑐦𑐸𑐐𑐸 𑐣𑑂𑐴𑑂𑐫𑐠𑐣𑐵𑐡𑐶𑐮 𑑋 𑐰𑐂𑐐𑐸 𑐡𑑃𑐫𑑂 𑐩𑐵𑐳𑑂𑐚𑐬𑑂𑐳 𑐟𑐴𑐮𑐫𑑂 𑐣𑐾𑐥𑐵𑐮 𑐨𑐵𑐲𑐵 𑐡𑐸𑐠𑑂𑐫𑐵𑐎𑐾𑐐𑐸 𑐏𑑃𑐫𑑂 𑐎𑑂𑐫𑐵𑐩𑑂𑐥𑐳 𑐥𑑂𑐬𑐱𑐵𑐲𑐞 𑐳𑐎𑐵𑐟𑑂𑐩𑐎 𑐖𑐹𑐐𑐸 𑐣𑑂𑐴𑑂𑐫𑐠𑐣𑐵𑐡𑐷𑐮 𑑋

𑐩𑐹𑐥𑐵𑐴𑐵𑑃 𑐱𑑂𑐬𑐾𑐲𑑂𑐛𑐮𑐾 𑐠𑐸𑐐𑐸 𑐀𑐨𑐶𑐫𑐵𑐣𑐫𑑂 𑐳𑐎𑐺𑐫 𑐖𑐸𑐫𑐵𑐡𑐷𑐥𑐶𑑄 𑐧𑑂𑐰𑐣𑐵𑐩𑐶𑐥𑐶𑑄 𑐰 𑐱𑐶𑐎𑑂𑐲𑐶𑐎 𑐥𑐶𑐣𑐶𑐐𑐸 𑐎𑐸𑐟𑐮𑑄 𑐣𑐾𑐥𑐵𑐮 𑐨𑐵𑐲𑐵 𑐎𑐎𑑂𑐲𑐵 𑐫𑐵𑐫𑐾𑐦𑐸𑐐𑐸 𑐢𑐫𑐵𑐐𑐸 𑐕𑐐𑐹 𑐋𑐟𑐶𑐴𑐵𑐳𑐶𑐎 𑐮𑐶𑐳𑐾𑑄 𑐩𑐴𑐟𑑂𑐰𑐥𑐹𑐬𑑂𑐞 𑐖𑑂𑐫𑐵 𑐖𑐹𑐐𑐸 𑐣𑑂𑐴𑑂𑐫𑐠𑐣𑐵𑐡𑐶𑐮 𑑋
𑐰𑐫𑐾𑐾𑐎𑐮𑑄 𑐣𑐾𑐥𑐵𑐮 𑐨𑐵𑐲𑐵𑐫𑐵 𑐱𑐶𑐎𑑂𑐲𑐵 𑐏𑑂𑐫𑐮𑐫𑑂 𑐥𑐘𑑂𑐔𑐵𑐫𑐟𑐎𑐵𑐮 𑐳𑐶𑐧𑐾𑑄 𑐣𑑄 𑐠𑑁𑑄𑐫𑐵 𑐠𑐸𑐐𑐸 𑐃 𑐧𑐵𑑄𑐩𑐮𑐵𑑅𑐐𑐸 𑐎𑐵𑐮 𑐖𑐹𑐐𑐸 𑐏𑑃 𑐎𑐸𑐮𑐵𑐡𑐶𑐮 𑑋 𑐄𑐎𑐶𑐣𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐣𑐶𑐟𑐶𑑄 𑐕𑐐𑐹 𑐎𑐵𑐮 𑐴𑐾 𑐖𑐸𑐮 𑐢𑐎𑐵𑑅 𑐣𑐸𑐐𑑅 𑐏𑑃 𑐥𑑂𑐰𑑄𑐎𑐵𑐡𑐷𑐮 𑑋

𑐰𑐶.𑐳𑑄. 𑑒𑑐𑑔𑑖 𑐳𑐵𑐮𑐣𑐶𑐳𑐾𑑄 𑐁𑑅 𑐟𑐎𑑂𑐎𑑄 𑐣𑐾𑐥𑐵𑐮 𑐨𑐵𑐲𑐵𑐫𑐵 𑐱𑐿𑐎𑑂𑐲𑐶𑐎 𑐎𑑂𑐲𑐾𑐟𑑂𑐬𑐫𑑂 𑐏𑐵𑐳𑐿 𑐴𑐶𑐮𑐵𑐳𑐸 𑐩𑐰𑑅𑐐𑐸 𑐢𑑂𑐰𑐵𑐠𑐸𑐂𑐎𑐵𑐡𑐶𑐮 𑑋
𑐳𑑂𑐰𑐧𑐶𑐫𑐹 𑐳𑐡𑐳𑑂𑐫 𑐩𑐡𑐣 𑐨𑐞𑑂𑐜𑐵𑐬𑐷𑑄 𑐧𑑂𑐰𑐣𑐵𑐩𑐶𑐥𑐶𑐣𑐶𑐐𑐸 𑐣𑐶𑐟𑐶𑑄 𑐦𑐹𑐔𑐵𑑅𑐠𑐾𑑄 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐩𑐏𑑄𑐐𑐸 𑐏𑑃𑐫𑑂 𑐡𑐸𑐏𑑅 𑐥𑑂𑐰𑑄𑐎𑐵𑐡𑐶𑐳𑐾𑑄 𑐰𑐫𑑂𑐎𑐮𑑄 𑐰𑐂𑐐𑐸 𑐡𑐶𑐣𑐳𑑄 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑐣𑐵𑐩𑐶𑐥𑐶𑐣𑐶𑐐𑐸 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐟 𑐎𑐸𑐟𑑅 𑐫𑐵𑐣𑐵 𑐔𑑂𑐰𑐣𑐾𑐐𑐸 𑐢𑐵𑐥𑐹 𑐥𑑂𑐰𑑄𑐎𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐎𑑂𑐫𑐵𑐩𑑂𑐥𑐳 𑐳𑐴𑐵𑐫𑐎 𑐥𑑂𑐬𑐩𑐸𑐏 𑐐𑑀𑐧𑐶𑐣𑑂𑐡 𑐁𑐔𑐵𑐬𑑂𑐫, 𑐣𑐾𑐥𑐵𑐮 𑐨𑐵𑐲𑐵 𑐱𑐶𑐎𑑂𑐲𑐎 𑐜𑐵. 𑐔𑐣𑑂𑐡𑑂𑐬 𑐩𑐵𑐣 𑐧𑐖𑑂𑐬𑐵𑐔𑐵𑐬𑑂𑐫, 𑐱𑐶𑐎𑑂𑐲𑐶𑐎𑐵 𑐱𑑂𑐬𑐷𑐩𑐶𑐮𑐵 𑐳𑐸𑐰𑐵𑐮𑑄 𑐠𑑅𑐠𑑅𑐐𑐸 𑐢𑐵𑐥𑐹 𑐥𑑂𑐰𑑄𑐎𑐵𑐡𑐷𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐳𑐨𑐵 𑐣𑐵𑐫𑑅 𑐬𑐷𑐡𑐾𑐣 𑐩𑐴𑐬𑑂𑐖𑐣𑑄 𑐀𑐢𑐶𑐎𑐵𑐬𑐫𑐵 𑐣𑐷𑐟𑐶 𑐣𑐾𑐰𑐵𑑅 𑐮𑐐𑐵𑐫𑐟 𑐁𑐡𑐶𑐧𑐵𑐳𑐷𑐟𑐫𑑂𑐟 𑐖𑐸𑐫𑐵 𑐔𑑂𑐰𑑄𑐐𑐸 𑐨𑐵𑐲𑐶𑐎 𑐮𑐶𑐳𑐾𑑄 𑐠𑐷𑐠𑐷 𑐳𑐩𑐳𑑂𑐫𑐵𑐫𑑂 𑐬𑐵𑐖𑑂𑐫𑐥𑐵𑐏𑐾𑑄 𑐰𑐶𑐨𑐾𑐡𑐫𑑂 𑐮𑐵𑐎𑐵𑐟𑑅𑐐𑐸 𑐏𑑃𑐫𑑂 𑐳𑐎𑐮 𑐕𑐥𑑂𑐥𑑄 𑐕𑐢𑐷 𑐖𑐸𑐫𑐵 𑐡𑐣𑐾𑐩𑐵𑑅𑐐𑐸 𑐃 𑐰𑑅𑐐𑐸 𑐢𑐵𑐳𑐾𑑄 𑐠𑐸𑐐𑐸 𑐀𑐨𑐶𑐫𑐵𑐣𑐫𑐵 𑐳𑐎𑐮 𑐨𑐶𑑄𑐔𑐶𑐟𑐵𑐩𑐶 𑐮𑐶𑐳𑐾𑑄 𑐐𑑂𑐰𑐵𑐴𑐵𑐮𑐶𑐩𑐶𑐥𑐶𑐣𑑂𑐟 𑐳𑐸𑐨𑐵𑐫𑑂 𑐡𑐾𑐕𑐵𑐳𑐾 𑐖𑑂𑐫𑐵𑐗𑑂𑐰 𑐎𑑂𑐰𑐔𑐵𑐫𑐾𑐎𑐵𑐡𑐷𑐐𑐸 𑐏𑑅 𑑋