𑐱𑐸𑐎𑑂𑐬𑐰𑐵𑑅 𑐎𑐶𑐥𑐸𑐮𑐷 𑐣𑐷𑐮𑑅 𑐳𑐵𑑄𑐳𑑂𑐎𑐺𑐟𑐶𑐎 𑐥𑐸𑐔𑑅𑐫𑐵 𑐰𑐺𑐴𑐟𑑂 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐫𑐵𑐗𑑂𑐰𑑅

𑐣𑐾𑐰𑐵: 𑐀𑐣𑐮𑐵𑐂𑐣 𑐣𑑂𑐫𑐸𑐖 – 𑐮𑐮𑐾𑐣𑑂𑐡𑑂𑐬 𑐱𑐵𑐎𑑂𑐫 | 𑑒𑑐𑑗𑑕 𑐔𑐿𑐟𑑂𑐬 𑑒𑑘, 𑐧𑐶𑐴𑐶𑐧𑐵𑐬 𑑑𑑗:𑑒𑑔:𑑔𑑓

• 𑐩𑐹𑐥𑐵𑐴𑐵𑑃 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵𑐫𑐵 𑐩𑐾𑐫𑐬 𑐬𑐩𑐾𑐱 𑐩𑐴𑐬𑑂‍𑐖𑐣
• 𑐁𑐎𑐬𑑂‍𑐲𑐎 𑐮𑐵𑐃𑐚–𑐩𑐘𑑂𑐔–𑐳𑐵𑐄𑐞𑑂𑐜 𑐳𑐶𑐲𑑂𑐚𑐩𑐮𑐶𑐳𑐾𑑄 𑐎𑐣𑑂𑐳𑐬𑑂‍𑐚, 𑐔𑐔𑐵𑐥𑑂𑐫𑐵𑐏𑑄, 𑐮𑐵𑐏𑐾𑐥𑑂𑐫𑐵𑐏𑑄, 𑐬𑐵𑐖𑐎𑐸𑐩𑐵𑐬 𑐰 𑐮𑐵𑐏𑐾 𑐎𑑂𑐰𑑅𑐠𑐮𑐾𑐐𑐸 𑐥𑑂𑐫𑐵𑐏𑑄, 𑐩𑑂𑐫𑐾, 𑐴𑐸𑐮𑐵𑐥𑑂𑐫𑐵𑐏𑑄𑑄 𑐰 𑐴𑐣𑐵𑐖𑑂𑐫𑐵𑐗𑑂𑐰𑑅

𑐧𑐶.𑐳𑑄. 𑑒𑑐𑑖𑑔 𑐩𑑄𑐳𑐷𑐬 𑑕 𑐐𑐟𑐾 𑐎𑐶𑐥𑐹𑐫𑐵 𑐤𑐹𑐥𑐶𑑄 𑐰 𑐥𑐸𑐮𑐵𑑄𑐥𑐶𑑄 𑐳𑑄𑐐𑐷𑐟𑐎𑑅𑐩𑐶 𑐰 𑐳𑑄𑐐𑐷𑐟𑐴𑑂𑐫𑑅𑐩𑐶𑐥𑐶𑑄 𑐖𑐵𑐣𑐵𑑅 𑐣𑐷𑐳𑑂𑐰𑑄𑐐𑐸 𑐣𑐷𑐮𑑅 𑐳𑐵𑑄𑐳𑑂𑐎𑐺𑐟𑐶𑐎 𑐥𑐸𑐔𑑅 𑐠𑐣𑐷 𑑑𑑒 𑐡𑑃𑐫𑑂 𑐔𑑂𑐰𑑄𑐐𑐸 𑐡𑐸 𑑋 𑐄𑐐𑐸 𑐣𑐷𑐮𑑅 𑐳𑐵𑑄𑐳𑑂𑐎𑐺𑐟𑐶𑐎 𑐥𑐸𑐔𑑅 𑑑𑑒 𑐡𑑃 𑐎𑑂𑐫𑑄𑐐𑐸 𑐮𑐳𑐟𑐵𑐫𑑂 𑐎𑐶𑐥𑐹𑐫𑐵 𑑑 𑐰𑐜𑐵 𑐮𑐵𑐫𑐎𑐹 𑐟𑑂𑐰𑐵𑐮𑐫𑑂 𑐟𑑅𑐖𑐶𑐐𑐸 𑐳𑐵𑑄𑐐𑐶𑐟𑐶𑐎 𑐰 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐫𑐵𑐗𑑂𑐰𑑅𑐫𑐵 𑐐𑑂𑐰𑐳𑐵𑑅 𑐣𑐷𑐮𑑅 𑐳𑐵𑑄𑐳𑑂𑐎𑐺𑐟𑐶𑐎 𑐥𑐸𑐔𑐮𑑄 𑐐𑑂𑐰𑐫𑐵𑐟𑑅𑐐𑐸 𑐡𑐸 𑑋

𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐩𑐹𑐥𑐵𑐴𑐵𑑃 𑐎𑐠𑑄 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵𑐫𑐵 𑐩𑐾𑐫𑐬 𑐬𑐩𑐾𑐱 𑐩𑐴𑐬𑑂‍𑐖𑐣 𑐗𑐵𑐫𑐵𑐡𑐷𑐐𑐸 𑐖𑐵𑐣𑐎𑐵𑐬𑐷 𑐐𑑂𑐰𑐳𑐵𑑅 𑐏𑐮𑑅 𑐣𑐷𑐮𑑅 𑐳𑐵𑑄𑐳𑑂𑐎𑐺𑐟𑐶𑐎 𑐥𑐸𑐔𑐮𑑄 𑐧𑑂𑐫𑐹𑐐𑐸 𑐡𑐸 𑑋

𑐣𑐷𑐮𑑅 𑐳𑐵𑑄𑐳𑑂𑐎𑐺𑐟𑐶𑐎 𑐥𑐸𑐔𑑅𑐫𑐵 𑐳𑑄𑐳𑑂𑐠𑐵𑐥𑐎 𑐣𑐵𑐫𑑅 𑐟𑐾𑐖𑐩𑐵𑐣 𑐧𑐖𑑂𑐬𑐵𑐔𑐵𑐬𑑂‍𑐫𑑄 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷 𑐎𑐠𑑄 𑐎𑐤𑐫𑑂 𑐔𑐿𑐟𑑂𑐬 𑑒𑑙 𑐐𑐟𑐾 𑐱𑐸𑐎𑑂𑐬𑐰𑐵𑑅 𑐤𑐶𑐣𑐳𑐶𑐫𑐵 𑐥𑐵𑐫𑐕𑐶 𑑔 𑐟𑐵 𑐂𑐮𑐫𑑂 𑐄𑐐𑐸 𑐟𑑅𑐖𑐶𑐐𑐸 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐫𑐵𑐗𑑂𑐰𑑅 𑐤𑑂𑐫𑐵𑐎𑐾𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐐𑐸 𑐡𑐸 𑑋

𑐳𑑄𑐳𑑂𑐠𑐵𑐥𑐎 𑐣𑐵𑐫𑑅 𑐨𑐵𑐖𑐸 𑐧𑐖𑑂𑐬𑐵𑐔𑐵𑐬𑑂‍𑐫𑐫𑐵 𑐎𑐠𑑄 𑐄𑐐𑐸 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐫𑐵𑐗𑑂𑐰𑐮𑐫𑑂 𑐫𑐮𑐫𑐵 𑐮𑑀𑐎𑑄 𑐴𑑂𑐰𑐵𑐣𑐵𑑅 𑐰𑐫𑐵𑐔𑑂𑐰𑑄𑐐𑐸 𑐩𑐸𑐎𑑂𑐎𑑄 𑐣𑐾𑐰𑐵𑑅𑐟𑐫𑑂𑐐𑐸 𑐳𑐵𑑄𑐐𑐶𑐟𑐶𑐎 𑐧𑑂𑐫𑐵𑐞𑑂𑐜 𑐎𑑂𑐫𑐵𑐣𑐚𑐵𑐚𑐵 𑐧𑑂𑐫𑐵𑐞𑑂𑐜𑐫𑐵 𑐎𑐣𑑂𑐳𑐬𑑂‍𑐚𑐮𑐶𑐳𑐾𑑄 𑐎𑐶𑐥𑐹𑐫𑐵 𑐣𑐵𑑄𑐖𑐵𑑅𑐥𑐶𑑄 𑐩𑑂𑐫𑐾𑐴𑐵𑐮𑐵𑐩𑐶𑐥𑐶𑑄 𑐬𑐵𑐖𑐾𑐱 𑐩𑐴𑐬𑑂‍𑐖𑐣 𑐣𑐾𑐰𑐵𑑅, 𑐳𑐸𑐰𑐶𑐣 𑐱𑑂𑐬𑐾𑐲𑑂𑐛, 𑐬𑐵𑐣𑐷𑐱𑑀𑐨𑐵 𑐩𑐴𑐬𑑂‍𑐖𑐣𑐥𑐶𑐣𑑂𑐳𑑄 𑐳𑐵𑑄𑐐𑐶𑐟𑐶𑐎 𑐖𑑂𑐫𑐵𑐗𑑂𑐰𑑅 𑐤𑑂𑐫𑐧𑑂𑐰𑐂𑐐𑐸 𑐖𑐹𑐐𑐸 𑐡𑐸𑐳𑐵 𑐣𑐵𑑄𑐖𑐵𑑅𑐥𑐶𑑄 𑐩𑑂𑐫𑐾𑐴𑐵𑐮𑐵𑐩𑐶𑐥𑐶𑑄 𑐬𑑀𑐖𑐷 𑐱𑑂𑐬𑐾𑐲𑑂𑐛 𑐜𑑄𑐐𑑀𑐮, 𑐖𑑂𑐫𑐵𑐎 𑐩𑐴𑐬𑑂‍𑐖𑐣, 𑐬𑐵𑐖𑐾𑐣𑑂𑐡𑑂𑐬 𑐜𑑄𑐐𑑀𑐮, 𑐎𑐶𑐬𑐞 𑐀𑐩𑐵𑐟𑑂𑐫𑐥𑐶𑐣𑐶𑐐𑐸 𑐳𑐵𑑄𑐐𑐶𑐟𑐶𑐎 𑐧𑑂𑐰𑐖𑑂𑐫𑐵 𑐖𑐸𑐂𑐐𑐸 𑐖𑐵𑐣𑐎𑐵𑐬𑐷 𑐨𑐵𑐖𑐸 𑐧𑐖𑑂𑐬𑐵𑐔𑐵𑐬𑑂‍𑐫𑑄 𑐧𑐶𑐫𑐵𑐡𑐷𑐐𑐸 𑐡𑐸 𑑋

𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐫𑐾𑑃𑐫𑐵 𑐡𑐎𑑂𑐲𑐶𑐞–𑐥𑐱𑑂𑐔𑐶𑐩 𑐨𑐾𑐐𑐫𑐵 𑐧𑑀𑐳𑐶𑐐𑐵𑑄𑐫𑐵 𑐥𑐸𑐮𑐵𑑄𑐐𑐸 𑐮𑑀𑐎𑑄𑐴𑑂𑐰𑐵𑑅𑐐𑐸 𑐬𑐵𑐖𑐎𑐸𑐩𑐵𑐬 𑐰 𑐮𑐵𑐏𑐾 𑐎𑑂𑐰𑑅𑐠𑐮𑐾𑐐𑐸 𑐥𑑂𑐫𑐵𑐏𑑄𑐮𑐶𑐳𑐾𑑄 𑐮𑐵𑐏𑐾𑐥𑑂𑐫𑐵𑐏𑑄 𑐮𑐶𑐳𑐾𑑄 𑐠𑐷𑐠𑐷 𑐤𑑂𑐫𑐵𑐂𑐥𑐸𑐐𑐸 𑐴𑐸𑐮𑐵𑐥𑑂𑐫𑐵𑐏𑑄 𑐧𑑂𑐰𑐖𑑂𑐫𑐵 𑐖𑐸𑐂𑐐𑐸 𑐖𑐹𑐐𑐸 𑐡𑐸 𑑋

𑐀𑐠𑐾𑐴𑐾, 𑐄𑐐𑐸 𑐴𑐾 𑐖𑑂𑐫𑐵𑐗𑑂𑐰𑐮𑐫𑑂 𑐫𑐮𑐫𑐵 𑐔𑐶𑐔𑐵𑐢𑐶𑐎𑑅𑐪 𑐩𑐔𑐵 𑐀𑐬𑑂‍𑐳𑐣𑐶𑐟𑐵 𑐱𑐵𑐎𑑂𑐫𑐫𑐵 𑐎𑐸𑐩𑐵𑐬𑐷 𑐰 𑐁𑐬𑑂‍𑐫𑐟𑐵𑐬𑐵 𑐔𑐔𑐵 𑐥𑑂𑐫𑐵𑐏𑑄 𑐤𑑂𑐫𑐧𑑂𑐰𑐂𑐐𑐸 𑐖𑐹𑐐𑐸 𑐖𑐵𑐣𑐎𑐵𑐬𑐷 𑐣𑑄 𑐨𑐵𑐖𑐸 𑐧𑐖𑑂𑐬𑐵𑐔𑐵𑐬𑑂‍𑐫𑑄 𑐧𑐶𑐫𑐵𑐡𑐷𑐐𑐸 𑐡𑐸 𑑋

𑐣𑐷𑐮𑑅 𑐳𑐵𑑄𑐳𑑂𑐎𑐺𑐟𑐶𑐎 𑐥𑐸𑐔𑑅 𑑑𑑒 𑐡𑑃 𑐎𑑂𑐫𑑄𑐐𑐸 𑐮𑐳𑐟𑐵𑐫𑑂 𑐖𑐸𑐂𑐐𑐸 𑐄𑐐𑐸 𑐳𑐵𑑄𑐐𑐶𑐟𑐶𑐎 𑐰 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐫𑐵𑐗𑑂𑐰𑐮𑐫𑑂 𑐎𑐶𑐥𑐹𑐫𑐵 𑐧𑐬𑐶𑐲𑑂𑐛 𑐳𑑄𑐐𑐷𑐟 𑐀𑐣𑑂𑐰𑐾𑐲𑐎 𑐬𑐵𑐩𑐎𑐺𑐲𑑂𑐞 𑐡𑐸𑐰𑐵𑑅𑐫𑐵 𑐀𑐣𑐸𑐳𑐣𑑂𑐢𑐵𑐣𑐵𑐟𑑂𑐩𑐎 𑐳𑐵𑑄𑐐𑐶𑐟𑐶𑐎 𑐧𑑂𑐰𑐖𑑂𑐫𑐵 𑐮𑐶𑐳𑐾𑑄 𑐎𑐶𑐥𑐹𑐫𑐵 𑐴𑐾 𑐮𑑀𑐎𑐎𑐰𑐶 𑐬𑐵𑐖𑐨𑐵𑐃 𑐖𑐎𑑅𑐩𑐶𑐫𑐵 𑐔𑐶𑐣𑐵𑐏𑑃 𑐧𑑂𑐰𑐖𑑂𑐫𑐵 𑐖𑐸𑐂𑐐𑐸 𑐖𑐵𑐣𑐎𑐵𑐬𑐷 𑐣𑑄 𑐥𑐸𑐔𑑅𑐫𑐵 𑐳𑑄𑐳𑑂𑐠𑐵𑐥𑐎 𑐣𑐵𑐫𑑅 𑐟𑐾𑐖𑐩𑐵𑐣 𑐧𑐖𑑂𑐬𑐵𑐔𑐵𑐬𑑂‍𑐫𑑄 𑐧𑐶𑐫𑐵𑐡𑐷𑐐𑐸 𑐡𑐸 𑑋

𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐣𑐷𑐮𑑅 𑐳𑐵𑑄𑐳𑑂𑐎𑐺𑐟𑐶𑐎 𑐥𑐸𑐔𑑅𑐫𑐵 𑐰𑐶𑐱𑐾𑐲 𑐬𑐸𑐥𑑄 𑐠𑐷𑐠𑐷 𑐮𑑀𑐎𑐢𑐹𑐣𑐮𑐶𑐳𑐾𑑄 𑐴𑐸𑐮𑐵𑐥𑑂𑐫𑐵𑐏𑑄 𑐧𑑂𑐰𑐖𑑂𑐫𑐵 𑐖𑐸𑐂𑐳𑐵 𑐖𑑂𑐫𑐵𑐗𑑂𑐰𑐮𑐫𑑂 𑐣𑐷𑐮𑑅 𑐳𑐵𑑄𑐳𑑂𑐎𑐺𑐟𑐶𑐎 𑐥𑐸𑐔𑑅𑐫𑐵𑐟 𑐁𑐬𑑂‍𑐠𑐶𑐎𑐮𑐶𑐳𑐾𑑄 𑐨𑑁𑐟𑐶𑐎 𑐬𑐸𑐥𑑄 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐡𑐷𑐥𑐶𑑄 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵 𑐰𑐜𑐵 𑐮𑑂𑐫𑐵𑑅 𑑕 𑐫𑐵 𑐰𑐜𑐵𑐢𑑂𑐫𑐎𑑂𑐲 𑐬𑐵𑐖𑐾𑐣𑑂𑐡𑑂𑐬𑐎𑐸𑐩𑐵𑐬 𑐩𑐴𑐬𑑂‍𑐖𑐣, 𑐬𑐵𑐩𑐥𑑂𑐬𑐳𑐵𑐡 𑐩𑐴𑐬𑑂‍𑐖𑐣 𑐰 𑐡𑐶𑐣𑐾𑐱 𑐡𑐬𑑂‍𑐱𑐣𑐫𑐵𑐟 𑐖𑑂𑐫𑐵𑐗𑑂𑐰𑑅𑐫𑐵 𑐩𑐹𑐥𑐵𑐴𑐵𑑃 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵𑐫𑐵 𑐩𑐾𑐫𑐬 𑐬𑐩𑐾𑐱 𑐩𑐴𑐬𑑂‍𑐖𑐣𑑄 𑐡𑑀𑐳𑐮𑑂𑐮𑐵 𑐣𑑂𑐫𑐫𑐾𑐎𑐵𑑅 𑐴𑐣𑐾𑐐𑐸 𑐖𑑂𑐫𑐵𑐗𑑂𑐰𑑅 𑐡𑐹𑐐𑐸 𑐖𑐵𑐣𑐎𑐵𑐬𑐷 𑐐𑑂𑐰𑐳𑐵𑑅 𑐏𑐮𑐎𑑄 𑐧𑑂𑐫𑐹𑐐𑐸 𑐡𑐸 𑑋

𑐣𑐷𑐮𑑅 𑐳𑐵𑑄𑐳𑑂𑐎𑐺𑐟𑐶𑐎 𑐥𑐸𑐔𑑅𑐫𑐵 𑐳𑑄𑐳𑑂𑐠𑐵𑐥𑐎 𑐣𑐵𑐫𑑅 𑐟𑐾𑐖𑐩𑐵𑐣 𑐧𑐖𑑂𑐬𑐵𑐔𑐵𑐬𑑂‍𑐫𑑄 𑐠𑑁𑑄𑐎𑐤𑐫𑑂 𑐧𑐖𑑂𑐬𑐵𑐔𑐵𑐬𑑂‍𑐫 𑐳𑐵𑐄𑐞𑑂𑐜, 𑐮𑐵𑐃𑐚 𑐰 𑐳𑑂𑐚𑐾𑐖 𑐳𑐬𑑂‍𑐨𑐶𑐳𑐫𑐵 𑐖𑑂𑐫𑐵 𑐫𑐵𑐣𑐵𑐔𑑂𑐰𑐣𑐵𑐡𑐷𑐐𑐸 𑐡𑐸 𑑋 𑐰𑐫𑑂𑐎𑐮𑑄 𑐣𑐷𑐮𑑅 𑐳𑐵𑑄𑐳𑑂𑐎𑐺𑐟𑐶𑐎 𑐥𑐸𑐔𑑅𑐫𑐵 𑑑𑑒 𑐡𑑃 𑐎𑑂𑐫𑑄𑐐𑐸 𑐮𑐳𑐟𑐵𑐫𑑂 𑐖𑐸𑐂𑐐𑐸 𑐳𑐵𑑄𑐐𑐶𑐟𑐶𑐎 𑐰 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐫𑐵𑐗𑑂𑐰𑑅𑐫𑐵 𑐣𑐶𑐟𑐶𑑄 𑐁𑐎𑐬𑑂‍𑐲𑐎 𑐳𑑂𑐚𑐾𑐖 𑐰 𑐮𑐵𑐃𑐚𑐫𑐵 𑐧𑑂𑐫𑐰𑐳𑑂𑐠𑐵 𑐖𑐸𑐂𑐐𑐸 𑐮𑐶𑐳𑐾𑑄 𑐳𑐵𑐄𑐞𑑂𑐜 𑐳𑐶𑐲𑑂𑐚𑐩 𑐣𑑄 𑐄𑐟𑑂𑐎𑐺𑐲𑑂𑐚 𑐬𑐸𑐥𑑄 𑐕𑑂𑐫𑐮𑐾𑐐𑐸 𑐏𑑃𑐫𑐵 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐐𑐸 𑐡𑐸 𑑋

𑐣𑐷𑐮𑑅 𑐳𑐵𑑄𑐳𑑂𑐎𑐺𑐟𑐶𑐎 𑐥𑐸𑐔𑑅 𑐠𑐣𑐷 𑑑𑑒 𑐡𑑃 𑐤𑑂𑐫𑑅 𑐳𑐟𑐎𑐫𑑂 𑐰 𑐟𑑂𑐰𑐵𑑅𑐟𑑂𑐰𑐵𑐮𑐫𑑂 𑐳𑐵𑑄𑐳𑑂𑐎𑐺𑐟𑐶𑐎 𑐰 𑐳𑐵𑑄𑐐𑐶𑐟𑐶𑐎 𑐧𑑂𑐰𑐖𑑂𑐫𑐵 𑐫𑐵𑐣𑐵𑐰𑑅𑐐𑐸 𑐥𑐸𑐔𑑅 𑐏𑑅 𑑋 𑐄𑐎𑐶𑑄 𑑑𑑒 𑐡𑑃 𑐎𑑂𑐫𑑄𑐐𑐸 𑐮𑐳𑐟𑐵𑐫𑑂 𑐳𑐟𑐎𑐫𑐵 𑐟𑑂𑐰𑐵𑐮𑐫𑑂 𑐴𑐾 𑐏𑐸𑐮𑑂𑐮𑐵 𑐬𑐸𑐥𑑄 𑐥𑐸𑐔𑑅𑐫𑐵 𑑑𑑒 𑐡𑑃 𑐎𑑂𑐫𑑄𑐐𑐸 𑐮𑐳𑐟𑐵𑐫𑑂 𑐰𑐶𑐱𑐾𑐲 𑐖𑑂𑐫𑐵𑐗𑑂𑐰𑑅𑐫𑐵 𑐐𑑂𑐰𑐳𑐵𑑅 𑐐𑑂𑐰𑐫𑐵𑐐𑐸 𑐖𑐵𑐣𑐎𑐵𑐬𑐷 𑐥𑐸𑐔𑑅𑐫𑐵 𑐳𑑄𑐳𑑂𑐠𑐵𑐥𑐎 𑐣𑐵𑐫𑑅 𑐟𑐾𑐖𑐩𑐵𑐣 𑐧𑐖𑑂𑐬𑐵𑐔𑐵𑐬𑑂‍𑐫𑑄 𑐧𑐶𑐫𑐵𑐡𑐷𑐐𑐸 𑐡𑐸 𑑋

𑐐𑑂𑐰𑐳𑐵𑑅 𑐏𑐮𑑅 𑐣𑐷𑐮𑑅 𑐳𑐵𑑄𑐳𑑂𑐎𑐺𑐟𑐶𑐎 𑐥𑐸𑐔𑐮𑑄 𑐔𑐿𑐟𑑂𑐬 𑑒𑑙 𑐐𑐟𑐾 𑐱𑐸𑐎𑑂𑐬𑐰𑐵𑑅𑐫𑐵 𑐳𑐵𑑄𑐐𑐶𑐟𑐶𑐎 𑐰 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐫𑐵𑐗𑑂𑐰𑐮𑐫𑑂 𑐳𑐎𑐮𑐳𑐶𑐟 𑐳𑐴𑐨𑐵𑐐𑐶𑐟𑐵𑐫𑐵 𑐣𑐶𑐟𑐶𑑄 𑐂𑐣𑐵𑐥 𑐫𑐵𑑅𑐐𑐸 𑐡𑐸 𑑋

(𑐠𑐣 𑐎𑑂𑐮𑐷𑐎 𑐫𑐵𑐣𑐵𑑅 𑐥𑑂𑐬𑑀𑐩𑑀 𑐳𑑂𑐰𑐫𑐵𑐡𑐶𑐳𑑃)