𑐱𑑀𑐢𑐵𑐬𑑂𑐠𑐷 𑐬𑐵𑐩𑐾𑐱𑑂𑐰𑐬 𑐱𑑂𑐬𑐾𑐲𑑂𑐛𑑄 𑐢𑐬𑑂𑐩𑐴𑐷𑐬𑐵 𑐥𑑂𑐬𑐟𑐶𑐲𑑂𑐛𑐵𑐣𑐫𑐵𑐟 𑐱𑑀𑐢𑐥𑑂𑐬𑐧𑐣𑑂𑐢 𑐮𑑅𑐮𑑂𑐴𑐵𑐟

𑐣𑐾𑐳𑑄 𑑑𑑑𑑔𑑕 𑐎𑐕𑐮𑐵𑐠𑑂𑐰 𑑙, 𑐫𑐮 𑑋 𑐬𑐵𑐩𑐾𑐱𑑂𑐰𑐬 𑐱𑑂𑐬𑐾𑐲𑑂𑐛𑑄 𑐠𑑅𑐐𑐸 𑐱𑑀𑐢 𑐥𑑂𑐬𑐰𑐣𑑂𑐢 𑐎𑑂𑐰𑐔𑐵𑑅𑐐𑐸 𑐖𑐵𑐣𑐎𑐵𑐬𑐷 𑐢𑐬𑑂𑐩𑐴𑐷𑐬𑐵 𑐳𑑂𑐩𑐺𑐟𑐶 𑐥𑑂𑐬𑐟𑐶𑐲𑑂𑐛𑐵𑐣𑐫𑐵𑐟 𑐧𑑂𑐫𑐹𑐐𑐸 𑐡𑐸 𑑋 𑐩𑑂𑐴𑐶𑐐𑑅 𑐣𑐾𑐥𑐵𑐮𑐨𑐵𑐲𑐵 𑐎𑐾𑐣𑑂𑐡𑑂𑐬𑐷𑐫 𑐰𑐶𑐨𑐵𑐐𑐫𑐵 𑐖𑑂𑐫𑐵𑐎𑐸𑐠𑐷 𑐔𑑂𑐰𑑄𑐐𑐸 𑐢𑐬𑑂𑐩𑐴𑐷𑐬𑐵 𑐱𑑀𑐢𑐥𑑂𑐬𑐧𑐣𑑂𑐢 𑐰𑐶𑐡𑑂𑐰𑐟𑑂‌𑐰𑐺𑐟𑑂𑐟𑐶 𑐣𑐶𑐬𑑂𑐞𑐵𑐫𑐎 𑐥𑐸𑐔𑑅𑐫𑐵 𑐩𑐸𑑃𑐖𑑂𑐫𑐵𑐫𑑂 𑐰𑐫𑑂‌𑐎𑐮𑑄 𑐠𑑅𑐐𑐸 𑐱𑑀𑐢 𑐥𑑂𑐬𑐰𑐣𑑂𑐢 𑐎𑑂𑐰𑐔𑐵𑑅𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐐𑐸 𑐏𑑅 𑑋 𑐨𑐵𑐖𑐸 𑐱𑑂𑐬𑐾𑐲𑑂𑐛𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑑂𑐣𑐵𑐟𑐎𑑀𑐟𑑂𑐟𑐬 𑐟𑐐𑐶𑑄𑐫𑐵 𑐎𑐎𑑂𑐲𑐵 𑐥𑐵𑐛 𑐥𑐹𑐰𑑄𑐎𑐾𑐟 ‘𑐢𑐬𑑂𑐩𑐬𑐟𑑂𑐣 𑐫𑐩𑐶𑐫𑐵 𑐄𑐥𑐣𑑂𑐫𑐵𑐳𑐫𑑂‌ 𑐣𑐵𑐬𑐷𑐥𑐵𑐟𑑂𑐬’ 𑐣𑐵𑑄 𑐫𑐵 𑐱𑑀𑐢𑐥𑑂𑐬𑐧𑐣𑑂𑐢 𑐔𑑂𑐰𑐫𑐵𑐡𑐷𑐐𑐸 𑐏𑑅 𑑋

𑐩𑑂𑐴𑐶𑐐𑑅 𑐔𑑂𑐰𑑄𑐐𑐸 𑐩𑐸𑑃𑐖𑑂𑐫𑐵𑐫𑑂 𑐱𑑀𑐢𑐵𑐬𑑂𑐠𑐶 𑐱𑑂𑐬𑐾𑐲𑑂𑐛𑑄 𑐥𑑂𑐬𑐟𑐶𑐲𑑂𑐛𑐵𑐣𑐫𑐵 𑐡𑐸𑐖𑑅 𑐩𑐫𑑂‌𑐖𑐸 𑐔𑐶𑐬𑐶𑐎𑑅𑐱𑑀𑐨𑐵 𑐟𑐵𑐩𑑂𑐬𑐵𑐎𑐵𑐬𑐖𑐸𑐫𑐵𑐟 𑐠𑑅𑐐𑐸 𑐱𑑀𑐢𑐥𑑂𑐬𑐰𑐣𑑂𑐢 𑐮𑑅𑐮𑑂𑐴𑐵𑐣𑐵𑐡𑐶𑐮 𑑋 𑐩𑐸𑑃𑐖𑑂𑐫𑐵𑐫𑑂 𑐣𑐾𑐥𑐵𑐮𑐨𑐵𑐲𑐵 𑐎𑐾𑐣𑑂𑐡𑑂𑐬𑐷𑐫 𑐰𑐶𑐨𑐵𑐐𑐫𑐵 𑐰𑐶𑐨𑐵𑐐𑐷𑐫 𑐥𑑂𑐬𑐩𑐸𑐏 𑐳𑐥𑑂𑐬𑐵 𑐜𑐵. 𑐬𑐵𑐖𑐣𑐮𑐵𑐮 𑐖𑑀𑐱𑐷𑐖𑐸𑑄 𑐢𑐬𑑂𑐩𑐴𑐷𑐬𑐵 𑐳𑑂𑐩𑐺𑐟𑐶 𑐥𑑂𑐬𑐟𑐶𑐲𑑂𑐛𑐵𑐣𑑄 𑐱𑑀𑐢𑐥𑑂𑐬𑐧𑐣𑑂𑐢 𑐰𑐶𑐡𑑂𑐰𑐟𑑂‌𑐰𑐺𑐟𑑂𑐟𑐶𑐫𑐵 𑐐𑑂𑐰𑐳𑐵𑑅𑐐𑑂𑐰𑐫𑐵 𑐧𑑂𑐰𑐩𑐶𑐥𑐶𑐣𑐶 𑐟𑑅𑐢𑑄𑐐𑐸 𑐴𑑁𑐳𑐮𑐵 𑐠𑐴𑐵𑑃𑐰𑑄𑐐𑐸 𑐏𑑃 𑐢𑐫𑐵𑐡𑐶𑐮 𑑋 𑐩𑐸𑑃𑐖𑑂𑐫𑐵𑐫𑑂 𑐀𑐣𑐸𑐥 𑐳𑐶𑑄 𑐳𑐸𑐰𑐵𑐮𑑄 𑐢𑐬𑑂𑐩𑐬𑐟𑑂𑐣 𑐫𑐩𑐶 𑐰 𑐴𑐶𑐬𑐵𑐡𑐾𑐰𑐷 𑐎𑐳𑐵: 𑐫𑐩𑐶𑐫𑐵 𑐠𑐷 𑐠𑐷 𑐥𑐎𑑂𑐲𑐫𑐵𑐟 𑐎𑐫𑐵𑑅 𑐱𑑀𑐢 𑐣𑑂𑐴𑑂𑐫𑐵𑐎𑐾 𑐮𑑂𑐫𑑄𑐡𑐣𑐶𑐐𑐸 𑐧𑐶𑐔𑐵𑑅 𑐥𑑂𑐰𑑄𑐎𑐵𑑅𑐡𑐶𑐮 𑑋 𑐔𑐶𑐬𑐶𑐎𑑅𑐱𑑀𑐨𑐵 𑐟𑐵𑐩𑑂𑐬𑐵𑐎𑐵𑐬𑑄 𑐠𑐸𑐐𑐸 𑐱𑑀𑐢𑐥𑑂𑐬𑐧𑐣𑑂𑐢 𑐫𑐵𑐎𑐣𑑄 𑐴𑐾 𑐳𑐦𑐹𑐫𑐵 𑐬𑐹𑐥𑐫𑑂‌ 𑐥𑐶𑐟𑐧𑐷𑐐𑐸 𑐏𑑃 𑐎𑐣𑐵𑐡𑐶𑐮 𑑋

𑐢𑐬𑑂𑐩𑐴𑐷𑐬𑐵 𑐳𑑂𑐩𑐺𑐟𑐶 𑐥𑑂𑐬𑐟𑐶𑐲𑑂𑐛𑐵𑐣𑑄 𑐣𑐾𑐳𑑄 𑑑𑑑𑑔𑑔 𑐣𑐶𑐳𑐾𑑄 𑐢𑐬𑑂𑐩𑐬𑐟𑑂𑐣 𑐫𑐩𑐶 𑐰 𑐴𑐶𑐬𑐵𑐡𑐾𑐰𑐷 𑐎𑐳𑐵: 𑐫𑐩𑐶𑐫𑐵 𑐬𑐵𑐖𑐣𑐿𑐟𑐶𑐎 𑐖𑐷𑐰𑐣, 𑐳𑐵𑐴𑐶𑐟𑑂𑐫, 𑐳𑐩𑐵𑐖𑐫𑑂 𑐧𑐶𑐫𑐵𑐡𑐷𑐐𑐸 𑐫𑑀𑐐𑐡𑐵𑐣𑐫𑐵𑐟 𑐎𑐫𑐵𑑅 𑐣𑐾𑐥𑐵𑐮𑐨𑐵𑐲𑐵 𑐳𑑂𑐣𑐵𑐟𑐎𑑀𑐟𑑂𑐟𑐬 𑐟𑐐𑐶𑐩𑐫𑑂 𑐱𑑀𑐢 𑐫𑐵𑐂𑐥𑐶𑑄 𑐩𑐢𑑂𑐫𑐾 𑐕𑐩𑑂𑐴𑐾𑐳𑐶𑐟 𑐣𑑂𑐫𑐫𑑂‌𑐡𑑂𑐰𑑅 𑐟𑐎𑐵𑐫𑐵 𑐢𑐬𑑂𑐩𑐴𑐷𑐬𑐵 𑐱𑑀𑐢𑐥𑑂𑐬𑐧𑐣𑑂𑐢 𑐰𑐶𑐡𑑂𑐰𑐟𑑂‌𑐰𑐺𑐟𑑂𑐟𑐶 𑐧𑑂𑐫𑐹𑐐𑐸 𑐏𑑅 𑑋 𑐠𑐸𑐐𑐸𑐳𑐶𑐫𑐵 𑐢𑐬𑑂𑐩𑐴𑐷𑐬𑐵 𑐱𑑀𑐢𑐥𑑂𑐬𑐧𑐣𑑂𑐢 𑐰𑐶𑐡𑑂𑐰𑐟𑑂‌𑐰𑐺𑐟𑑂𑐟𑐶 𑐬𑐵𑐩𑐾𑐱𑑂𑐰𑐬 𑐱𑑂𑐬𑐾𑐲𑑂𑐛𑐫𑐵𑐟 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋 𑐠𑐸𑐐𑐸𑐳𑐶𑐫𑐵 𑐣𑐾𑐥𑐵𑐮 𑐨𑐵𑐲𑐵 𑐳𑑂𑐣𑐵𑐟𑐎𑑀𑐟𑑂𑐟𑐬 𑐎𑐎𑑂𑐲𑐵𑐫𑑂 𑐣𑑂𑐴𑐵𑐥 𑐖𑐸𑐫𑐵 𑐡𑐷𑐩𑑂𑐴 𑐨𑐵𑐖𑐸 𑐱𑑂𑐬𑐾𑐲𑑂𑐛 𑐣𑐾𑐥𑐵𑐮𑐨𑐵𑐲𑐵 𑐎𑐾𑐣𑑂𑐡𑑂𑐬𑐷𑐫 𑐰𑐶𑐨𑐵𑐐𑐫𑐵 𑐰𑐶𑐡𑑂𑐫𑐵𑐬𑑂𑐠𑐶 𑐏𑑅 𑑋