“𑐳𑐩𑑂𑐩𑐵𑐣𑐫𑐵 𑐮𑐵𑐥𑐵“ -𑐡𑐶𑐧𑑂𑐫𑐵 𑐧𑐖𑑂𑐬𑐵𑐔𑐵𑐬𑑂𑐫

𑐏𑑂𑐰𑐷𑐳𑑂𑐰𑐎𑑅𑐐𑐸 𑐧𑐶𑐬𑐵𑐚 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐳𑐩𑑂𑐩𑐾𑐮𑐣𑐫𑑂 𑐳𑐵𑐴𑐶𑐟𑑂𑐫 𑐢𑐾𑑃 𑐢𑐾𑑃 𑐧𑐮𑑂𑐮𑐵𑐫 𑐧𑐵𑐏𑑄 𑐰𑐶𑐢𑐵𑐫𑑂 𑐮𑑂𑐫𑐸𑐫𑐵𑑄𑐮𑑂𑐫𑐸 𑐳𑐶𑐬𑐥𑐵 (3rd Prize) 𑐟𑑂𑐫𑐵𑐎𑐾𑐟 𑐟𑐵𑑅𑐮𑐵𑐐𑐸 𑐖𑐶𑐐𑐸 𑐔𑐶𑐧𑐵𑐏𑑄 𑑋

𑐖𑐶𑐐𑐸 𑐩𑑂𑐴𑐳𑐷𑐎𑐵 𑐩𑐵𑐮𑐾𑐟 𑐖𑐶𑐟𑑅 𑐩𑐾𑐥𑐶𑐣𑐶𑐐𑐸 𑐐𑑂𑐰𑐵𑐴𑐵𑐮𑐶 𑐩𑐵𑑅 𑑋 𑐖𑐶 𑐥𑐹𑐰𑑄𑐎 𑐴𑐾 𑐀𑐳𑑂𑐟𑐶𑐟𑑂𑐰𑐧𑐶𑐴𑐶𑐣 𑐠𑑂𑐰 𑐖𑐐𑐟𑐫𑑂 𑑋 𑐣𑐶𑐡𑑃 𑐳𑑂𑐰𑐡𑑃 𑐡𑐸𑐧𑐮𑐫𑑂 𑐣𑐶𑐳𑐾𑑄 𑐩𑐵𑑄𑐫𑐵 𑐎𑐶𑐔𑐮𑑄 𑐟𑐎 𑐴𑐾 𑐐𑐵𑐫𑐾𑐎𑐾 𑐩𑐏𑑄𑐩𑑂𑐴, 𑐁𑑅 𑐮𑐵 𑐖𑐶 𑐳𑐸𑐂𑐡𑑃 𑐦𑐸𑐂𑐟𑑂𑐫𑑄𑐐𑐸 𑐡𑐸 𑑋 𑐖𑐶𑐟𑑅 𑐧𑐵𑑅𑐣𑑄 𑐴𑐾 𑐩𑐵𑑄 𑐖𑐸𑐫𑐵𑑅 𑐧𑑂𑐰𑐮𑑄𑐎𑐮 𑑋 𑐩𑐔𑐵𑐧𑐮𑐫𑑂 𑐣𑐶𑐳𑐾𑑄 𑐠𑑁𑑄𑐟𑐎 𑐑𑑁𑐕𑐶 𑐩𑐟𑑂𑐰𑑅𑐟𑐹 𑐧𑐵𑑅𑐣𑑄 𑑋 𑐖𑐶 𑐡𑑂𑐫𑑅𑐫𑐵 𑐧𑐬𑐡𑐵𑐣 𑐢𑐵𑐂𑐐𑐸 𑐧𑐵𑑅𑐣𑑄 𑑋 𑐖𑐶𑑄 𑐠𑑂𑐰 𑐴𑐮𑐶𑐩𑐫𑑂 𑐥𑐮𑐵𑑅 𑐟𑐫𑐵𑐧𑐮𑐫𑑂 𑐧𑐵𑑅 𑐮𑐫𑑂𑐟𑐵𑐫𑐵𑑅 𑐴𑐳𑑂𑐥𑐶𑐟𑐮𑐫𑐵 𑐰𑐵𑐬𑑂𑐜𑐫𑑂 𑐔𑑂𑐰𑑄𑐥𑐶𑐣𑑂𑐟, 𑐠𑑅𑐮𑐵𑑅𑐥𑐶𑐣𑑂𑐟 𑐰 𑐖𑑅𑐮𑐵𑐏𑑅𑐮𑐵𑐥𑐶𑐣𑑂𑐟 𑐔𑐵𑐎𑐸𑐩𑐬𑐶 𑐂𑐣𑐵𑐧𑐶𑐫𑐵𑐐𑐸 𑐢𑐵𑑅𑐐𑐸 𑑋 𑐩𑐾𑐥𑐶𑑄 𑐩𑑂𑐴𑑂𑐫𑐵𑐫𑑂𑐩𑐔𑐵 𑐳𑐶𑐧𑐾𑑄 𑐩𑑂𑐴𑑂𑐰 𑐩𑐖𑐸𑐂𑐩𑐵 𑐢𑐎𑐵𑑅 𑐖𑐶𑐟𑑅 𑐩𑐾 𑐴𑐵𑐮𑐾𑐐𑐸 𑐳𑑂𑐫𑐣𑐵𑐟𑐮, 𑐔𑐶𑐟𑑂𑐬 𑐔𑑂𑐰𑐫𑐾𑐐𑐸 𑐳𑑂𑐫𑐣𑐵𑐟𑐮 𑑋 𑐧𑐵𑐖𑑄 𑐠𑐵𑐫𑐾𑐐𑐸 𑐳𑑂𑐫𑐣𑐵𑐟𑐮 𑑋 𑐥𑑂𑐫𑐵𑐏𑑄 𑐮𑑂𑐴𑐸𑐂𑐐𑐸 𑐳𑑂𑐫𑐣𑐵𑐟𑐮 𑑋 𑐧𑐵𑑅𑐫𑐵𑐐𑐸 𑐰 𑐴𑐾 𑐩𑐟𑐶𑐣𑐵𑑄 𑐩𑑂𑐰𑐵𑐫𑐾𑐟 𑐴𑑅𑐥𑐵𑑅 𑐖𑐹𑐫𑐵 𑐧𑑂𑐫𑐹𑐐𑐸 𑐡𑐸 𑑋
𑐠𑑁𑑄, 𑐖𑐶 𑐧𑐵𑑅 𑐰 𑐡𑐵𑐂𑐫𑐵 𑐮𑑂𑐴𑐵𑑅 𑐖𑑂𑐰𑐣𑐵𑑅 𑐕𑐐𑐹 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐫𑐵𑐗𑑂𑐰𑐮𑐫𑑂 𑐧𑑂𑐰𑐟𑐶 𑐎𑐵𑐫𑐾𑐟 𑐰𑐣𑐵𑐔𑑂𑐰𑐣𑐵 𑑋 𑐠𑑂𑐰 𑐴𑑂𑐰𑑅𑐟𑐵𑑅 𑐔𑐹𑐮𑐵𑑅𑐐𑐸 𑐣 𑐖𑐶𑐩𑐶 𑐧𑐵𑑅𑐫𑐵𑐐𑐸 𑐴𑐾 𑐡𑐾𑐣 𑐏𑑅 𑑋
𑐟𑑅𑐖𑐶𑐎 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐖𑐶𑐐𑐸 𑐧𑐵𑐖𑑄 𑐠𑐵𑐫𑐾𑐐𑐸 𑐰 𑐥𑑂𑐫𑐵𑐏𑑄 𑐮𑑂𑐴𑐸𑐂𑐐𑐸 𑐃 𑐰𑐫𑐵𑑅 𑐖𑑂𑐫𑐵𑐗𑑂𑐰𑑅 𑐣𑑂𑐴𑑂𑐫𑐵𑐎𑐵𑐩𑐶𑑄 𑐳𑑅𑐟𑐵𑐴𑐮 𑑋 𑐧𑐵𑑅𑐣𑑄 𑐖𑐶𑐟 𑐮𑑂𑐴𑐵𑑅 𑐖𑑂𑐰𑐣𑐵𑑅 𑐡𑐧𑐸𑐮𑐶𑐂 𑐠𑐟 𑐫𑑄𑐎𑐮 𑑋 𑐖𑐶𑑄 𑐳𑐫𑐾𑐎𑐵 𑐟𑐫𑐵𑐐𑐸 𑐩𑐾 𑐰𑐫𑐾𑐳𑐵𑐟 𑐴𑐾 𑐖𑐶 𑐥𑑂𑐫𑐵𑐏𑑄 𑐴𑐸𑐮𑐵 𑑋 𑐮𑐶𑐥𑐵 𑐧𑐵𑐖𑑄 (𑐩𑐵𑐡𑐮) 𑐠𑐵𑐣𑐵 𑑋 𑐧𑐵𑐖𑑄 𑐠𑐵𑐫𑐾 𑐳𑐶𑐢𑐫𑐾𑐎𑐵𑑅 𑐖𑐶𑐟𑑅 𑐧𑐵𑑅𑐣𑑄 𑐎𑐵𑑅 𑐰𑑅𑐧𑐮𑐫𑑂 𑐖𑐶𑑄 𑐖𑑂𑐫𑐵𑐗𑑂𑐰𑑅 𑐣𑑂𑐴𑑂𑐫𑐵𑐎𑐵𑐩𑐶𑐫𑐵𑐟 𑐕𑐐𑐹 𑐂𑐣𑐵𑐥 𑐫𑐵𑐣𑐵 𑑋 𑐰𑐫𑑂𑐎𑑅 𑐮𑐫𑑂𑐟𑐵𑐫𑐵𑑅 𑐩𑐵𑐂𑐎𑐫𑑂 𑐰𑐣𑐵𑑅 𑐳𑑅 𑐠𑑂𑐰𑐫𑐾𑐎𑐮 “𑐐𑑂𑐫𑐳𑐸𑐐𑑂𑐫𑑄𑐎 𑐥𑑂𑐫𑐵𑐏𑑄 𑐴𑐸𑐮𑐾𑐳𑑅𑐩𑑂𑐴 𑐀𑐮𑐾 𑐧𑐵𑐖𑑄 𑐠𑐵𑐫𑐾 𑐳𑑅𑐩𑑂𑐴 𑐳𑐵𑐢𑐣𑐵 𑐩𑐫𑑂𑐖𑐸𑑄 𑐗𑐷𑐟 𑐕𑐐𑐹 𑐧𑐶𑐔𑐵𑑅 𑐥𑑂𑐰𑑄𑐎𑐾 𑐢𑐎𑐵𑑅 𑐢𑐫𑐵𑐡𑐷𑐐𑐸𑐮𑐶𑑄 𑐠𑑂𑐰 𑐩𑐵𑐂𑐎 𑐰𑐫𑑂𑐎𑑅𑐫𑐵𑐟 𑐮𑑅𑐮𑑂𑐴𑐵𑐫𑐾 𑐟𑑂𑐫𑐣𑐵, 𑐁𑑅 𑐗𑐷 𑐰𑐫𑑂𑐎𑑅𑐫𑐵 𑐣𑐸𑐐𑑅𑐫𑐵 𑐏𑑃 𑐣𑑂𑐫𑐣𑐾 𑑋“
𑐩𑐵𑐂𑐎 𑐖𑐶𑐟𑑅 𑐮𑑅𑐮𑑂𑐴𑐵𑐫𑐾 𑐢𑐸𑑄𑐎𑐵𑑅 𑐖𑐶𑑄 𑐩𑐵𑐂𑐎 𑐖𑑂𑐰𑐣𑐵𑑅 𑐢𑐫𑐵, “𑐖𑐶𑐟𑑅 𑐧𑐵𑑅 𑐟𑐳𑑄𑐎 𑐫𑑅”
𑐖𑐶𑑄 𑐠𑐸𑐮𑐶 𑐣𑑂𑐰𑐰𑐵𑐫𑐾𑐰𑑄 𑐳𑐨𑐵𑐫𑑂 𑐁𑐥𑐵𑐮𑑄 𑐮𑐵𑐥𑐵 𑐠𑐵𑑅𑐐𑐸 𑐳𑑅 𑐠𑑂𑐰𑐮 𑑋 𑐖𑐶𑑄 𑐏𑐣𑐵, 𑐮𑐳𑐟𑐵 𑐰 𑐡𑐸𑑅𑐏 𑐣𑐶𑐟𑐵𑑄 𑐡𑐸𑐐𑐸 𑐏𑑂𑐰𑐧𑐶 𑐧𑐶𑐮𑐶𑐧𑐶𑐮𑐶 𑐖𑐵𑑅𑐐𑐸 𑐩𑐶𑐏𑐵 𑐧𑑂𑐰𑐫𑐵𑑅 𑐧𑐵𑑅 𑐩𑐸𑐳𑐸𑐎𑐫𑐵 𑐔𑑂𑐰𑐣 𑑋
𑐖𑑂𑐫𑐵𑐗𑑂𑐰𑑅 𑐎𑑂𑐰𑐔𑐵𑐫𑐾 𑐣𑑂𑐴𑑂𑐫𑑅 𑐖𑐶𑐟𑑅 𑐴𑐵𑐣𑑄 𑐡𑐧𑐸𑐮𑐶𑐂 𑐳𑑅𑐟𑐵𑐴𑐮 𑑋 𑐖𑐶 𑐴𑐵𑐣𑑄 𑐰𑐣𑐵 𑑋 𑐖𑑂𑐫𑐵𑐗𑑂𑐰𑑅𑐫𑐵 𑐣𑐵𑐫𑐮𑑄 𑐠𑑂𑐰 𑐡𑑃𑐫𑐵 ’𑐚𑐵𑐮𑐾𑐣𑑂𑐚𑐾𑐜 𑐜𑐵𑐄𑐣𑐳𑐶𑐣𑑂𑐜𑑂𑐬𑐩 𑐩𑐶𑐳𑐵’ 𑐢𑐎𑐵𑑅 𑐖𑐶𑐟𑑅 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑐟 𑑋 𑐧𑐵𑑅𑐫𑐵𑐟 𑐣𑑄 ’𑐠𑑂𑐰 𑐡𑑃𑐫𑐵 𑐴𑐶𑐬𑑀’ 𑐢𑐎𑐵𑑅 𑐴𑐣 𑑋 𑐰 𑐖𑑂𑐫𑐵𑐗𑑂𑐰𑐮𑐫𑑂 𑐖𑐶 𑐰 𑐖𑐶𑐩𑐶 𑐧𑐵𑑅𑐫𑐵 𑐣𑐶𑑄𑐟𑐶𑑄 𑐁𑐥𑐵𑐮𑑄 𑐁𑐥𑐵𑑅 𑐳𑐩𑑂𑐩𑐵𑐣𑐫𑐵 𑐮𑐵𑐥𑐵 𑐠𑐵𑑅𑐐𑐸 𑐳𑑅 𑐠𑑂𑐰𑐫𑐵𑐔𑑂𑐰𑐣 𑑋 𑐳𑑅 𑐟𑐵𑐄𑐧𑐶𑐎 𑐠𑑂𑐰𑐫𑐵𑐔𑑂𑐰𑐣 !