𑐳𑐶𑐎𑑂𑐎𑐶𑐩𑐫𑑂 𑐣𑐾𑐰𑐵𑑅 𑐨𑐵𑐳𑑄 𑐀𑐣𑐮𑐵𑐂𑐣 𑐚𑐶𑐨𑐷

𑐫𑐾𑑃 – 𑐨𑐵𑐬𑐟𑐫𑐵 𑐳𑐶𑐎𑑂𑐎𑐶𑐩 𑐬𑐵𑐖𑑂𑐫 𑐳𑐬𑐎𑐵𑐬𑑄 𑐁𑑅 𑐰𑐵𑐮𑐫𑑂 𑐕𑐎𑑂𑐰𑑅 𑐣𑐾𑐰𑐵𑑅 𑐨𑐵𑐳𑑄 𑐀𑐣𑐮𑐵𑐂𑐣 𑐚𑐶𑐨𑐷 𑐧𑐸𑐮𑐾𑐚𑐶𑐣 𑐥𑑂𑐬𑐱𑐵𑐬𑐞 𑐳𑐸𑐬𑐸 𑐫𑐵𑑅𑐐𑐸 𑐡𑐸 𑑋
𑐳𑐶𑐎𑑂𑐎𑐶𑐩 𑐳𑐬𑐎𑐵𑐬 𑐰 𑐀𑐣𑐫𑐵 𑐩𑐸𑐏𑑂𑐫𑐩𑐣𑑂𑐟𑑂𑐬𑐷 𑐥𑐰𑐣 𑐔𑐵𑐩𑐮𑐶𑐒 𑐳𑑄𑐮𑐐𑑂𑐣 𑐖𑐸𑐂𑐐𑐸 𑐠𑐷𑐠𑐷 𑐰𑐶𑐎𑐵𑐳 𑐐𑐟𑐶𑐰𑐶𑐢𑐶 𑐧𑐵𑐬𑐾 𑐖𑐵𑐣𑐎𑐵𑐬𑐷 𑐧𑐷𑐐𑐸 𑐮𑑂𑐫𑐵𑐏𑑄 𑐳𑐬𑐎𑐵𑐬𑑄 𑐠𑐷𑐠𑐷 𑐨𑐵𑐳𑑄 𑐧𑐸𑐮𑐾𑐚𑐶𑐣 𑐥𑑂𑐬𑐱𑐵𑐬𑐞 𑐫𑐵𑑅𑐐𑐸 𑐏𑑅𑐳𑐵 𑐄𑐎𑐷 𑐣𑐾𑐰𑐵𑑅 𑐨𑐵𑐫𑑂 𑐕𑐐𑐹 𑐣𑑄 𑐡𑐸𑐠𑑂𑐫𑐵𑑅𑐐𑐸 𑐏𑑅 𑑋

𑐳𑐶𑐎𑑂𑐎𑐶𑐩 𑐳𑐬𑐎𑐵𑐬𑑄 𑐣𑐾𑐰𑐵𑑅 𑐨𑐵𑐫𑑂𑐫𑐵𑐟 𑐣𑑄 𑐳𑐬𑐎𑐵𑐬𑐷 𑐩𑐵𑐣𑑂𑐫𑐟𑐵 𑐧𑐶𑐫𑐵𑐟𑑅𑐐𑐸 𑐡𑐸 𑑋 𑐳𑐶𑐎𑑂𑐎𑐶𑐩 𑐳𑐬𑐎𑐵𑐬𑑄 𑐥𑑂𑐬𑐱𑐵𑐬𑐞 𑐫𑐵𑐣𑐵𑐔𑑂𑐰𑑄𑐐𑐸 𑐣𑐾𑐰𑐵𑑅 𑐨𑐵𑐫𑑂𑐫𑐵 𑐀𑐣𑐮𑐵𑐂𑐣 𑐚𑐶𑐨𑐷 𑐧𑐸𑐮𑐾𑐚𑐶𑐣 𑐩𑐫𑑂𑐖𑐸 𑐩𑐷𑐣𑐵 𑐥𑑂𑐬𑐢𑐵𑐣𑑄 𑐳𑐩𑑂𑐥𑐵𑐡𑐣 𑐊𑐰𑑄 𑐰𑐵𑐔𑐣 𑐫𑐵𑐫𑐾𑐐𑐸 𑐖𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐩𑐫𑑂𑐖𑐸 𑐥𑑂𑐬𑐢𑐵𑐣𑑄 𑐕𑐸𑑄 𑐡𑑃 𑐤𑑂𑐫𑑅 𑐫𑐾𑑃𑐫𑑂 𑐰𑐫𑐵𑑅 𑐣𑐾𑐰𑐵𑑅 𑐨𑐵𑐫𑑂, 𑐮𑐶𑐥𑐶, 𑐎𑐮𑐵, 𑐳𑑄𑐳𑑂𑐎𑐺𑐟𑐶 𑐁𑐡𑐶 𑐧𑐵𑐬𑐾 𑐳𑐫𑐾𑐎𑐵𑑅 𑐮𑐶𑐴𑐵𑑄 𑐗𑐵𑑅𑐪 𑐏𑑅 𑑋 𑐩𑐫𑑂𑐖𑐸 𑐥𑑂𑐬𑐢𑐵𑐣𑐫𑐵 𑐎𑐠𑑄 𑐠𑑁𑑄𑐎𑐤𑐫𑑂 𑐠𑑂𑐰 𑐀𑐣𑐮𑐵𑐂𑐣 𑐚𑐶𑐨𑐷 𑐧𑐸𑐮𑐾𑐚𑐶𑐣 𑐰𑐵𑐮𑐫𑑂 𑐕𑐎𑑂𑐰𑑅 𑐰 𑐫𑐎𑑂𑐰 𑐳𑐩𑐵𑐔𑐵𑐬 𑐡𑐸𑐳𑐵 𑐰𑐵𑐮𑐫𑑂 𑐣𑐶𑐎𑑂𑐰𑑅 𑐣𑑄 𑐥𑑂𑐬𑐱𑐵𑐬𑐞 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐳𑐶𑐎𑑂𑐎𑐶𑐩 𑐳𑐬𑐎𑐵𑐬𑑄 𑐠𑑅𑐥𑐶𑐣𑐶 𑐐𑐟𑐶𑐰𑐶𑐢𑐶 𑐧𑐵𑐬𑐾 𑐳𑐵𑐬𑑂‍𑐰𑐖𑐣𑐶𑐎 𑐖𑐵𑐣𑐎𑐵𑐬𑐷 𑐧𑐷𑐐𑐸 𑐮𑐵𑐐𑐶𑑄 𑐠𑐷𑐠𑐷 𑐨𑐵𑐳𑑄 ‘𑐳𑐶𑐎𑑂𑐎𑐶𑐩 𑐴𑐾𑐬𑐵𑐮𑑂𑐜’ 𑐣𑐵𑑄𑐐𑐸 𑐰𑐵𑑅𑐥𑑁 𑐣𑑄 𑐥𑑂𑐬𑐎𑐵𑐱𑐣 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐄𑐎𑐷 𑐣𑐾𑐰𑐵𑑅 𑐨𑐵𑐫𑑂 𑐣𑑄 𑐡𑐸𑐠𑑂𑐫𑐵𑑅 𑑋 𑐣𑐾𑐰𑐵𑑅 𑐨𑐵𑐳𑑄 𑐥𑐶𑐡𑐣𑐷𑐐𑐸 ‘𑐳𑐶𑐎𑑂𑐎𑐶𑐩 𑐴𑐾𑐬𑐵𑐮𑑂𑐜’𑐫𑐵 𑐳𑐩𑑂𑐥𑐵𑐡𑐎 𑐣𑑄 𑐩𑐫𑑂𑐖𑐸 𑐥𑑂𑐬𑐢𑐵𑐣 𑐴𑐾 𑐏𑑅 𑑋 𑐠𑑂𑐰 𑐰𑐵𑑅𑐥𑑁 𑐢𑐵𑑅𑐳𑐵 𑐠𑑁𑑄𑐎𑐤𑐫𑑂 𑐳𑑂𑐠𑐐𑐶𑐟 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸𑐳𑐵𑑄 𑐁𑑅 𑐫𑐵𑐎𑐣𑑄 𑐴𑐾 𑐤𑐹𑐐𑐸 𑐳𑐵𑐖𑐳𑐖𑑂𑐖𑐵 𑐳𑐴𑐶𑐟 𑐥𑐶𑐴𑐵𑑄 𑐰𑐂𑐐𑐸 𑐖𑐵𑐣𑐎𑐵𑐬𑐷 𑐣𑑄 𑐰𑐫𑑂𑐎𑐮𑑄 𑐧𑐶𑐫𑐵𑐡𑐷𑐐𑐸 𑐡𑐸 𑑋

𑐳𑐶𑐎𑑂𑐎𑐶𑐩 𑐳𑐬𑐎𑐵𑐬𑑄 𑐴𑑅𑐥𑐵𑑅 𑐰 𑐟𑐶𑐧𑑅 𑐧𑐶𑐄𑐐𑐸 𑐖𑐸𑐫𑐵𑑅 𑐠𑑁𑑄𑐎𑐤𑐫𑑂 𑐳𑐶𑐎𑑂𑐎𑐶𑐩𑐫𑐵 𑐳𑑂𑐎𑐹𑐮𑐫𑑂 𑐣𑐾𑐰𑐵𑑅 𑐨𑐵𑐫𑑂 𑐧𑑂𑐰𑐣𑐾𑐐𑐸 𑐰𑑂𑐫𑐰𑐳𑑂𑐠𑐵 𑐳𑐩𑐾𑐟 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐣𑐵𑐥𑑄 𑐣𑐾𑐥𑐵𑑅𑐥𑐵𑐏𑐾𑑄 𑐂𑐮𑐫𑑂 𑐧𑑂𑐫𑐮𑐫𑑂 𑐰𑐶𑐖𑑂𑐘𑐥𑐶𑑄 𑐳𑐶𑐎𑑂𑐎𑐶𑐩𑐫𑑂 𑐰𑐣𑐵𑑅 𑐣𑐾𑐰𑐵𑑅 𑐨𑐵𑐫𑑂, 𑐮𑐶𑐥𑐶, 𑐎𑐮𑐵, 𑐳𑑄𑐳𑑂𑐎𑐺𑐟𑐶 𑐁𑐡𑐶𑐫𑐵 𑐧𑐵𑐬𑐾 𑐳𑐴𑐮𑐴 𑐧𑑂𑐫𑐵𑐎𑐾𑐐𑐸 𑐖𑑂𑐫𑐵 𑐣𑑄 𑐖𑐸𑐫𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋

-𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳