𑐳𑐶𑐡𑑂𑐢𑐶𑐡𑐵𑐳 𑐧𑐸𑐣𑑂𑐴𑐶𑐫𑐵 𑐣𑐳𑑄𑐔𑐵 𑐩𑑂𑐫𑐾𑑃 𑐥𑐶𑐡𑐣

𑐫𑐾𑑃(𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)- 𑐩𑐴𑐵𑐎𑐰𑐶 𑐳𑐶𑐡𑑂𑐢𑐶𑐡𑐵𑐳 𑐩𑐴𑐵𑐖𑐸 (𑐀𑐩𑐵𑐟𑑂𑐫)𑐫𑐵 𑐧𑐸𑐣𑑂𑐴𑐶𑐫𑐵 𑐮𑐳𑐟𑐵𑐫𑑂 𑐣𑐳𑑄𑐔𑐵 𑐄𑐮𑐷𑐐𑐸 𑐂𑐮𑐫𑑂 𑐴𑐵𑐮𑐵 𑐰𑐫𑐵𑐔𑑂𑐰𑑄𑐐𑐸 𑐧𑑂𑐫𑐵𑐴𑐵𑑄𑐔𑐸𑐮𑐶 𑐩𑑂𑐫𑐾𑑃 𑐮𑐫𑑂𑐧𑐡𑑂𑐢 𑐫𑐵𑐣𑐵𑑅 𑐥𑐶𑐠𑑄𑐐𑐸 𑐡𑐸 𑑋

𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑐵 𑐥𑐸𑐣𑑅𑐖𑐵𑐐𑐬𑐞𑐎𑐵𑐮𑐫𑐵 𑐥𑑂𑐫𑑄𑐐𑑅𑐠𑐵𑑄𑐩𑐢𑑂𑐫𑐾 𑐕𑐐𑑅 𑐩𑐴𑐵𑐎𑐰𑐶 𑐳𑐶𑐡𑑂𑐢𑐶𑐡𑐵𑐳 𑐩𑐴𑐵𑐖𑐸𑐫𑐵 𑐧𑐸𑐣𑑂𑐴𑐶𑐫𑐵 𑐮𑐳𑐟𑐵𑐫𑑂 𑐣𑐳𑑄𑐔𑐵 𑐄𑐮𑐷𑐐𑐸 𑐂𑐮𑐫𑑂 𑐴𑐵𑐮𑐵 𑐰𑐫𑐵𑐔𑑂𑐰𑑄𑐐𑐸 ‘𑐠𑑁𑑄𑐫𑐵 𑐡𑐶𑐣 𑐎𑐰𑐶 𑐐𑐸𑐬𑐸 𑐳𑐶𑐡𑑂𑐢𑐶𑐡𑐵𑐳 𑐧𑐹𑐐𑐸 𑐬𑐾’ 𑐧𑑂𑐫𑐵𑐴𑐵𑑄𑐔𑐸𑐮𑐶 𑐮𑐳𑐫𑑂 𑐮𑐫𑑂𑐧𑐡𑑂𑐢 𑐫𑐵𑐣𑐵𑑅 𑐥𑐶𑐠𑑄𑐐𑐸 𑐏𑑅 𑑋

𑐖𑐣𑐎𑐰𑐶 𑐡𑐸𑐬𑑂𑐐𑐵𑐮𑐵𑐮 𑐱𑑂𑐬𑐾𑐲𑑂𑐛𑑄 𑐔𑑂𑐰𑐫𑐵𑐡𑐷𑐐𑐸 𑐧𑑂𑐫𑐵𑐴𑐵𑑄𑐔𑐸𑐮𑐶 𑐩𑑂𑐫𑐾𑑃𑐫𑐵 𑐳𑑄𑐐𑐷𑐟 𑐳𑑄𑐫𑑀𑐖𑐣 𑐖𑐷𑐰𑐶𑐟 𑐖𑐮𑑂𑐩𑐷𑑄 𑐫𑐵𑐣𑐵𑐡𑐷𑐐𑐸 𑐏𑑅𑐳𑐵 𑐥𑐰𑐶𑐟𑑂𑐬 𑐎𑐳𑐵𑑅, 𑐡𑐷𑐥𑐵 𑐩𑐴𑐬𑑂𑐖𑐣, 𑐀𑐩𑑀𑐑𑐰𑐷𑐬 𑐰𑐖𑑂𑐬𑐵𑐔𑐵𑐬𑑂𑐫, 𑐀𑐣𑐸 𑐱𑐵𑐎𑑂𑐫, 𑐳𑐶𑐡𑑂𑐢𑐵𑐬𑑂𑐠 𑐱𑐵𑐎𑑂𑐫, 𑐳𑑀𑐣𑐶𑐎𑐵 𑐩𑐵𑐣𑐣𑑂𑐢𑐬, 𑐣𑐶𑐨𑐵 𑐜𑑄𑐐𑑀𑐮𑑄 𑐳𑑅 𑐧𑐶𑐫𑐵𑐡𑐷𑐐𑐸 𑐡𑐸 𑑋

𑐰𑑄𑐐𑐸 𑐱𑐸𑐎𑑂𑐬𑐰𑐵𑑅 𑐁𑐮𑐸𑐥𑐵𑐮𑐸 𑐬𑐾𑐲𑑂𑐚𑐸𑐬𑐾𑐣𑑂𑐚𑐫𑑂 𑐖𑐹𑐐𑐸 𑐧𑑅𑐔𑐵𑐢𑑄𑐐𑐸 𑐖𑑂𑐫𑐵𑐗𑑂𑐰𑑅𑐫𑐵 𑐡𑐠𑐸𑐂 𑐨𑐵𑐲𑐵𑐳𑐾𑐰𑐷 𑐖𑑂𑐘𑐵𑐣𑐾𑐣𑑂𑐡 𑐩𑐵𑐣𑐣𑑂𑐢𑐬𑑄 𑐥𑐶𑐟𑐧𑑂𑐰𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐠𑐸𑐐𑐸 𑐧𑑂𑐫𑐵𑐴𑐵𑑄𑐔𑐸𑐮𑐶 𑐩𑑂𑐫𑐾𑑃𑐫𑐵 𑐨𑐶𑐜𑐶𑐫𑑀 𑐣𑑄 𑐣𑐶𑐬𑑂𑐩𑐵𑐞 𑐫𑐵𑑅𑐐𑐸 𑐏𑑅𑐳𑐵 𑐠𑐸𑐎𑐶𑐫𑐵 𑐕𑐵𑑃𑐫𑐵𑐎𑐣 𑐥𑐰𑐶𑐟𑑂𑐬 𑐎𑐳𑐵𑑅 𑐰 𑐬𑐵𑐖𑐾𑐱 𑐜𑑄𑐐𑑀𑐮𑑄 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐩𑐴𑐵𑐎𑐰𑐶 𑐳𑐶𑐡𑑂𑐢𑐶𑐡𑐵𑐳 𑐩𑐴𑐵𑐖𑐸𑐫𑐵 𑐧𑐸𑐣𑑂𑐴𑐶 𑐣𑐾.𑐳𑑄. 𑑙𑑘𑑗 𑐫𑑄𑐮𑐵𑐐𑐵 𑐡𑐸𑐟𑐶𑐫𑐵𑐎𑐸𑐣𑑂𑐴𑐸 𑐏𑑅𑐳𑐵 𑐡𑑃𑐫𑑂𑐡𑐳𑑄 𑐫𑑄𑐮𑐵𑐐𑐵 𑐡𑐸𑐟𑐶𑐫𑐵𑐎𑐸𑐣𑑂𑐴𑐸 𑐣𑐳𑑄𑐔𑐵 𑐄𑐮𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐕𑐸𑑄 𑐡𑑃 𑐣𑑂𑐴𑑂𑐫𑑅𑐣𑐶𑐳𑐾𑑄 𑐡𑐶𑐣𑐵𑐔𑑂𑐰𑑄𑐐𑐸 𑐣𑐳𑑄𑐔𑐵 𑐄𑐮𑐾𑐐𑐸 𑐖𑑂𑐫𑐵𑐗𑑂𑐰𑑅 𑐠𑐸𑐐𑐸𑐳𑐷 𑐴𑐵𑐎𑐣𑑄 𑐣𑑂𑐴𑑂𑐫𑐵𑐎𑐷𑐐𑐸 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋