𑐐𑐸𑐮𑐶 𑐟𑐠𑑂𑐫 𑐐𑐸𑐮𑐶 𑐎𑐵𑐮𑑂𑐥𑐣𑐶𑐎 ?

𑐣𑐾𑐰𑐵𑑅 𑐦𑐶𑐮𑑂𑐩𑐫𑑂 𑐣𑐾𑐥𑐵𑑅𑐫𑐵 𑐂𑐟𑐶𑐴𑐵𑐳

𑐣𑐾𑐰𑐵𑑅 𑐦𑐶𑐮𑑂𑐩 𑐏𑑂𑐫𑐮𑐫𑑂 𑐠𑑁𑑄𑐎𑐤𑐫𑑂 𑐟𑐳𑐎𑑄 𑐴𑐾 𑐧𑐫𑑂𑐧𑐫𑑂 𑐖𑐸𑐫𑐵 𑐰𑐫𑐵𑐔𑑂𑐰𑑄𑐐𑐸 𑐦𑐶𑐮𑑂𑐩 𑐢𑐫𑐵𑐐𑐸 “𑐖𑐵𑐩𑐣𑑅 𑐐𑐸𑐨𑐵𑐖𑐸” 𑐏𑑅 𑑋 𑐦𑐶𑐮𑑂𑐩 𑐏𑑂𑐫𑐮𑐫𑑂 𑐕𑐪 𑐧𑐵𑑄𑐮𑐵𑑅𑐪 𑐎𑑂𑐫𑐵𑐩𑐾𑐬𑐵𑐩𑑂𑐫𑐵𑐣𑐫𑐵 𑐬𑐸𑐥𑐫𑑂 𑐣𑐵𑑄𑐖𑐵𑑅𑐪 𑐬𑐰𑐶 𑐳𑐵𑐫𑑂𑐩𑐶𑐫𑐵 𑐣𑐶𑐬𑑂‍𑐡𑐾𑐱𑐣𑐫𑑂 𑐟𑐫𑐵𑐬 𑐖𑐹𑐐𑐸 𑐠𑑂𑐰 “𑐖𑐵𑐩𑐣𑑅 𑐐𑐸𑐨𑐵𑐖𑐸” 𑐥𑑂𑐫𑐳𑑅𑐡𑑃𑐟𑐶 𑐤𑑂𑐫𑑅 𑐫𑐾𑑃𑐫𑐵 𑐖𑐸𑐖𑐸 𑐥𑑂𑐬𑐟𑐵𑐥 𑐩𑐮𑑂𑐮𑐮𑐶𑐳𑐾 𑐳𑑂𑐰𑐵𑐥𑐹 𑐡𑐸𑐐𑐸 𑐋𑐟𑐶𑐴𑐵𑐳𑐶𑐎 𑐟𑐠𑑂𑐫𑑄 𑐖𑐵𑑅𑐐𑐸 𑐧𑐵𑐏𑑄 𑐡𑐸𑐐𑐸 𑐦𑐶𑐮𑑂𑐩 𑐏𑑅 𑑋

𑐤𑐵𑐥𑐵 𑐩𑐮𑑂𑐮𑐎𑐵𑐮, 𑐮𑐶𑐔𑑂𑐕𑐰𑐶𑐎𑐵𑐮𑐫𑑂 𑐣𑐾𑐥𑐵𑐮𑐩𑐞𑑂𑐜𑐮𑐫𑑂 𑐟𑐵𑐣𑑂𑐟𑑂𑐬𑐶𑐎 𑐰𑐶𑐢𑐶𑑄 𑐫𑐎𑑂𑐰 𑐴𑐾 𑐠𑐵𑐫𑑂 𑐎𑐫𑐵𑐟𑑅𑐐𑐸 𑐏𑐣𑐾𑐡𑐸 𑑋 𑐄𑐐𑐸 𑐂𑐮𑐫𑑂 𑐖𑐸𑐖𑐸𑐥𑐶𑑄𑐳𑑄 𑐟𑐵𑐣𑑂𑐟𑑂𑐬𑐶𑐎 𑐐𑐸𑐬𑐸𑐖𑐸𑐥𑐶𑐣𑐶𑐐𑐸 𑐳𑐮𑑂𑐮𑐵𑐴 𑐰 𑐐𑑂𑐰𑐵𑐴𑐵𑐮𑐶𑐫𑐵𑐟 𑐠𑑅𑐐𑐸 𑐱𑐵𑐳𑐣𑐫𑐵 𑐩𑐹 𑐁𑐢𑐵𑐬 𑐎𑐠𑑄 𑐎𑐵𑐂𑐐𑐸 𑐏𑑅 𑑋 𑐔𑐵𑐴𑐾 𑐣𑐾𑐥𑐵𑐮𑐩𑐞𑑂𑐜𑐮𑐫𑑂 𑐀𑐣𑐵𑐰𑐺𑐲𑑂𑐚𑐶 𑐖𑐸𑐫𑐵𑑅 𑐴𑐵𑐴𑐵𑐎𑐵𑐬 𑐖𑐸𑐫𑐵𑐔𑑂𑐰𑑄𑐐𑐸 𑐂𑐮𑐫𑑂 𑐎𑐵𑐩𑐵𑐬𑐸𑐎𑐵𑐩𑐵𑐎𑑂𑐲 𑐰𑐣𑐵𑑅 𑐳𑐴𑐎𑐵𑐮𑐫𑐵 𑐡𑑂𑐫𑑅 𑐧𑐸𑐒𑑂𑐐𑐡𑑂𑐫𑑅 𑐎𑐵𑑅𑐰𑐣𑐾𑐟 𑐏𑑂𑐰𑐥𑐫𑐵 𑐖𑐸𑐖𑐸 𑐣𑐬𑐾𑐣𑑂𑐡𑑂𑐬𑐡𑐾𑐰𑑄 𑐧𑐣𑑂𑐢𑐸𑐡𑐟𑑂𑐟 𑐣𑐵𑑄𑐫𑐵𑐪 𑐟𑐵𑐣𑑂𑐟𑑂𑐬𑐶𑐎 𑐐𑐸𑐬𑐸𑐖𑐸𑐫𑐵 𑐐𑑂𑐰𑐵𑐴𑐵𑐮𑐶 𑐎𑐵𑑅𑐐𑐸 𑐕𑐵𑐫𑑂 𑐩𑐖𑐸𑐂𑐩𑐵 𑐰𑐵 𑐏𑑂𑐰𑐥𑐫𑐵 𑐖𑐸𑐖𑐸 𑐬𑐵𑐑𑐰𑐡𑐾𑐰𑐫𑐵𑐟 𑐫𑐾𑑃𑐫𑐵 𑐏𑐸𑐳𑐷𑐫𑐵 𑐦𑐶 𑐮𑐸𑑃 𑐖𑐸𑐂𑐐𑐸 𑐏𑑃 𑐎𑐣𑐶𑐪 𑐟𑐵𑐣𑑂𑐟𑑂𑐬𑐶𑐎 𑐐𑐸𑐬𑐸𑐖𑐸 𑐳𑐶𑐡𑑂𑐢𑐶𑐰𑐣𑑂𑐟𑑄 𑐳𑐮𑑂𑐮𑐵𑐴 𑐧𑐶𑐄𑐐𑐸 𑐏𑑃 𑐠𑐩𑐖𑐸𑐂𑐩𑐵 𑐖𑐸𑐖𑐸𑐥𑐶𑑄𑐟 𑐟𑐵𑐣𑑂𑐟𑑂𑐬𑐶𑐎 𑐰𑐶𑐡𑑂𑐫𑐵 𑐳𑑅𑐥𑐶𑑄 𑐐𑐸𑐬𑐸𑐖𑐸𑐥𑐶𑑄𑐳𑑄 𑐧𑐶𑐄𑐐𑐸 𑐳𑐮𑑂𑐮𑐵𑐴𑐫𑐵 𑐡𑐳𑐸 𑐎𑐠𑑄 𑐎𑐵𑐫𑐾𑐖𑐶𑐄 𑑋 “𑐖𑐵𑐩𑐣𑑅 𑐐𑐸𑐨𑐵𑐖𑐸” 𑐣𑑄 𑐖𑐸𑐖𑐸 𑐥𑑂𑐬𑐟𑐵𑐥 𑐩𑐮𑑂𑐮𑐫𑐵 𑐥𑐵𑐮𑐫𑑂 𑐖𑐸𑐖𑐸𑐫𑐵𑐟 𑐳𑐮𑑂𑐮𑐵𑐴 𑐧𑐶𑐂𑐪 𑐟𑐵𑐣𑑂𑐟𑑂𑐬𑐶𑐎 𑐐𑐸𑐬𑐸𑐖𑐸 𑐖𑐵𑐩𑐣𑑅 𑐐𑐸𑐨𑐵𑐖𑐸𑐫𑐵 𑐧𑐵𑐏𑑄 𑐖𑑂𑐰𑐣𑐵𑐟𑑅𑐐𑐸 𑐦𑐶𑐮𑑂𑐩 𑐏𑑅 𑑋 𑐖𑐵𑐩𑐣𑑅 𑐐𑐸𑐨𑐵𑐖𑐸 𑐢𑐫𑐵𑐪 𑐫𑐾𑑃𑐫𑐵 𑐖𑐥𑐟𑐸𑑄𑐮𑐶𑐳𑐾 𑐳𑑂𑐰𑐵𑐥𑐹 𑐡𑐸𑐪 𑐟𑐵𑐣𑑂𑐟𑑂𑐬𑐶𑐎 𑐏𑑅𑐳𑐵 𑐄𑐐𑐸 𑐂𑐮𑐫𑑂 𑐣𑐾𑐥𑐵𑐮𑐩𑐞𑑂𑐜𑐮𑐫𑑂 𑐰𑐂𑐐𑐸 𑐴𑐬𑐾𑐎 𑐎𑐠𑑄𑐫𑐵 𑐁𑐥𑐟𑐰𑐶𑐥𑐟 𑐟𑐬𑐾 𑐫𑐵𑐣𑐵𑐧𑐷𑐪 𑐟𑐵𑐣𑑂𑐟𑑂𑐬𑐶𑐎 𑐏𑑅 𑑋

𑐀𑐣𑐵𑐧𑐺𑐲𑑂𑐚𑐶 𑐖𑐸𑐫𑐵𑑅 𑐀𑐣𑐶𑐎𑐵𑐮 𑐴𑐾 𑐖𑐹𑐐𑐸 𑐂𑐮𑐫𑑂 𑐳𑑂𑐰𑐫𑐩𑑂𑐨𑐹𑐫𑐵 𑐱𑐵𑐣𑑂𑐟𑐶𑐥𑐸𑐮𑐷 𑐡𑐸𑐣𑐾 𑐔𑑂𑐰𑑄𑐐𑐸 𑐣𑐵𑐐𑐫𑐵 𑐴𑐶𑑄 𑐔𑑂𑐰𑐫𑐵𑐟𑑅𑐐𑐸 𑐟𑐸𑐟𑑅 𑐥𑐶𑐟 𑐴𑐫𑐵𑑅 𑐣𑐶𑐨𑐵𑐮𑐫𑑂 𑐎𑑂𑐫𑑄𑐧𑐮𑐫𑑂 𑐰𑐵 𑐰𑑅𑐐𑐸 𑐢𑐂𑐐𑐸 𑐎𑐶𑐩𑑂𑐧𑐡𑐣𑑂𑐟𑐶 𑐡𑐸 𑑋 𑐖𑐵𑐩𑐣𑑅 𑐐𑐸𑐨𑐵𑐖𑐸, 𑐳𑐶𑐡𑑂𑐢𑐶𑐰𑐣𑑂𑐟 𑐰𑐵 𑐧𑐣𑑂𑐢𑐸𑐡𑐟𑑂𑐟𑐫𑐵 𑐧𑐵𑐏𑑄 𑐢𑐂𑐐𑐸 𑐄𑐐𑐸 𑐎𑐵𑐮𑐫𑐵 𑐖𑐸𑐖𑐸𑐥𑐶𑑄𑐮𑐶𑐳𑐾 𑐟𑐥𑑂𑐫𑑄𑐎 𑐴𑐾 𑐳𑑂𑐰𑐵𑐥𑐹 𑐡𑐫𑐵𑐔𑑂𑐰𑑄𑐐𑐸 𑐮𑑂𑐫𑐵𑐏𑑄 𑐠𑑂𑐰 𑐕𑐐𑐹 𑐂𑐟𑐶𑐴𑐵𑐳𑐫𑐵 𑐏𑑃 𑐏𑑅𑐳𑐵𑑄 𑐠𑐸𑐎𑐷 𑐕𑑂𑐫𑐮𑐵𑐟𑑅𑐐𑐸 𑐰𑐵 𑐗𑐷𑐳𑑄 𑐣𑑂𑐫𑐣𑐵 𑐰𑐫𑐵𑐔𑑂𑐰𑐣𑐵𑐐𑐸 𑐐𑐸𑐮𑐶𑐏𑐾 𑐏𑑃 𑐎𑐶𑑄𑐧𑐡𑐣𑑂𑐟𑐶𑐫𑐵 𑐬𑐸𑐥𑐫𑑂 𑐖𑐎 𑐣𑑂𑐫𑐣𑐵 𑐰𑐫𑐵𑐔𑑂𑐰𑐣𑐵𑐐𑐸 𑐏𑑅 𑑋

𑐋𑐟𑐶𑐴𑐵𑐳𑐶𑐎 𑐟𑐠𑑂𑐫 𑐄𑐮𑐶 𑐕𑑂𑐫𑐮𑐵𑐟𑑅𑐐𑐸 𑐏𑐣𑐾𑐩𑐡𑐸𑐳𑐵𑑄 𑐠𑑂𑐰 𑐂𑐟𑐶𑐴𑐵𑐳𑐫𑑂 𑐖𑐹𑐐𑐸 𑐴𑐾 𑐑𑐚𑐣𑐵 𑐖𑐹𑐐𑐸𑐮𑐶𑑄 𑐋𑐟𑐶𑐴𑐵𑐳𑐶𑐎 𑐎𑐠𑑄 𑐎𑐫𑐵𑐟𑑅𑐐𑐸 𑐡𑐸 𑑋 𑐠𑑂𑐰 𑐮𑑂𑐫𑐵𑐏𑑄 “𑐖𑐵𑐩𑐣𑑅 𑐐𑐸𑐨𑐵𑐖𑐸” 𑐕𑐐𑐹 𑐋𑐟𑐶𑐴𑐵𑐳𑐶𑐎 𑐦𑐶𑐮𑑂𑐩 𑐖𑐹𑐰𑑄𑐐𑐸 𑐡𑐸𑐳𑐵 𑐖𑐵𑐩𑐣𑑅 𑐐𑐸𑐨𑐵𑐖𑐸𑐫𑐵𑐟 𑐥𑐵𑐟𑑂𑐬 𑐎𑐠𑑄 𑐕𑑂𑐫𑐮𑐵𑑅 𑐠𑑂𑐰𑐳𑐶𑐧𑐾𑑄 𑐤𑐵𑐥𑐵 “𑐟𑐵𑐥𑐮𑐫𑑂” 𑐣𑑄 𑐥𑐶𑐡𑐣𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐠𑑂𑐰 𑐮𑑂𑐫𑐵𑐏𑑄 “𑐟𑐵𑐥𑐮𑐵𑐫𑑂” 𑐣𑑄 𑐋𑐟𑐶𑐴𑐵𑐳𑐶𑐎 𑐟𑐠𑑂𑐫 𑐡𑐸𑐐𑐸 𑐦𑐶𑐮𑑂𑐩 𑐏𑑅 𑑋

𑐀𑐠𑐾𑐴𑐾 𑐟𑐸𑑄 𑐠𑑁𑑄𑐎𑐤𑐾 𑐧𑐾𑐮𑐵𑐫𑐟𑐫𑑂 𑐔𑑂𑐰𑐣𑐵 𑐰𑐫𑐵𑐔𑑂𑐰𑑄𑐪 𑐳𑑄𑐫𑐸𑐎𑑂𑐟 𑐱𑑂𑐬𑐾𑐲𑑂𑐛𑑄 𑐡𑐫𑐾𑐎𑐹𑐐𑐸 “𑐱𑑄𑐏𑐢𑐬𑐫𑐵 𑐧𑐵𑐏𑑄” 𑐣𑐵𑑄𑐫𑐵𑐐𑐸 𑐊𑐣𑐶𑐩𑐾𑐚𑐾𑐜 𑐦𑐶𑐮𑑂𑐩 𑐣𑑄 𑐂𑐟𑐶𑐴𑐵𑐳𑐫𑐵 𑐕𑐧𑑂𑐰 𑐤𑑂𑐫𑐧𑑂𑐰𑐫𑐵𑐟𑑅𑐐𑐸 𑐣𑐾𑐰𑐵𑑅 𑐦𑐶𑐮𑑂𑐩 𑐏𑑅 𑑋 𑐠𑐸𑐎𑐷 𑐣𑐾𑐥𑐵𑐮 𑐳𑑄𑐰𑐟𑑂𑐫𑐵 𑐥𑑂𑐬𑐰𑐬𑑂‍𑐟𑐎 𑐱𑑄𑐏𑐢𑐬 𑐳𑐵𑐏𑑂𑐰𑐵𑑅𑐫𑐵 𑐧𑐵𑐏𑑄 𑐤𑑂𑐫𑐧𑑂𑐰𑐫𑐵𑐟𑑅𑐐𑐸 𑐡𑐸 𑑋

“𑐖𑐵𑐩𑐣𑑅 𑐐𑐸𑐨𑐵𑐖𑐸” 𑐦𑐶𑐮𑑂𑐩𑐫𑐵 𑐔𑐬𑑂‍𑐔𑐵 𑐫𑐵𑐫𑐾𑐧𑐮𑐫𑑂 𑐗𑐷𑐳𑑄 𑐁𑐥𑐵𑐮𑑄 𑐣𑑂𑐫𑐣𑐵𑐰𑐫𑐵𑐐𑐸 𑐴𑐶𑐣𑑂𑐡𑐸𑐳𑑂𑐟𑐵𑐣𑐫𑐵 𑐕𑐪 𑐔𑐚𑐎𑐾𑑄 𑐣𑐾𑐥𑐵𑑅𑐐𑐵𑐮𑐫𑑂 𑐰𑐫𑐵𑑅 𑐩𑐣𑐹𑐟𑐫𑑂𑐟 𑐨𑑂𑐬𑐩𑐶𑐟 𑐫𑐵𑐫𑐾 𑐎𑐠𑑄 𑐔𑐚𑐎 𑐎𑑂𑐫𑐣𑐷𑐧𑐮𑐫𑑂 𑐖𑐵𑐩𑐣𑑅 𑐐𑐸𑐨𑐵𑐖𑐸𑑄 𑐄𑐪 𑐔𑐚𑐎𑐾𑐫𑐵𑐟 𑐥𑐵𑐛 𑐳𑑂𑐫𑐣𑐷𑐐𑐸, 𑐀𑐮𑐾 𑐄𑐪 𑐔𑐚𑐎𑐾 𑐖𑐵𑐩𑐣𑑅 𑐐𑐸𑐨𑐵𑐖𑐸𑐫𑐵 𑐕𑐾𑑃𑐫𑑂 𑐰𑐣𑐷𑐧𑐮𑐫𑑂 𑐀𑐣 𑐕𑐾𑑃𑐫𑑂 𑐖𑐵𑐩𑐣𑑅 𑐐𑐸𑐨𑐵𑐖𑐸𑐫𑐵 𑐖𑐴𑐵𑐣𑑄 𑐠𑑅𑐐𑐸 𑐟𑐸𑐟𑐶 𑐨𑐸𑐟𑐸𑐮𑐷 𑐡𑐸𑐫𑐵𑑅 𑐩𑐶 𑐡𑐸𑐫𑐵𑐔𑑂𑐰𑐣𑐷𑐐𑐸, 𑐱𑐵𑐣𑑂𑐟𑐶𑐥𑐸𑐮𑐶 𑐖𑐸𑐖𑐸𑐫𑐵𑐟 𑐕𑑂𑐰𑐫𑐵𑑅 𑐟𑐸𑐟𑑅 𑐥𑐶𑐟 𑐴𑐂𑐐𑐸 𑐠𑐾𑑄𑐖𑑂𑐫𑐵𑑅𑐐𑐸 𑐎𑐶𑑄𑐧𑐡𑐣𑑂𑐟𑐶𑐫𑐵𑐟 𑐴𑐾 𑐖𑐎 𑐦𑐶𑐮𑑂𑐩𑐫𑑂 𑐎𑑂𑐫𑐣𑐵𑐟𑑅𑐐𑐸 𑐡𑐸𑐳𑐵 𑐣𑐶𑐬𑑂‍𑐡𑐾𑐱𑐎𑐫𑐵 𑐥𑐵𑐏𑐾𑑄 𑐩𑐾𑐐𑐸 𑐕𑐸𑑄 𑐣𑑄 𑐎𑐠𑑄𑐫𑐵 𑐋𑐟𑐶𑐴𑐵𑐳𑐶𑐎 𑐡𑐳𑐶 𑐤𑑂𑐫𑐧𑑂𑐰𑐫𑐾𑐐𑐸 𑐎𑐸𑐟𑑅 𑐖𑐹𑐐𑐸 𑐏𑐣𑐾𑐩𑐡𑐸 𑑋

𑐀𑐮𑐾 𑐠𑐠𑐾 𑐫𑐵𑐫𑐾𑐐𑐸 𑐢𑐂𑐐𑐸 𑐀𑑅𑐥𑐸𑐐𑐸 𑐖𑑂𑐫𑐵 𑐣𑑄 𑐩𑐏𑐸 𑑋 𑐤𑑂𑐫𑐵𑐐𑐸 𑐴𑐾 𑐖𑐹𑐳𑐵𑑄 𑐕𑐐𑐹 𑐂𑐟𑐶𑐴𑐵𑐳𑐫𑐵 𑐧𑐵𑐏𑑄𑐫𑐵𑐟 𑐦𑐶𑐮𑑂𑐩𑐫𑐵 𑐥𑐬𑑂‍𑐡𑐵𑐫𑑂 𑐴𑐫𑐾𑐟 “𑐖𑐵𑐩𑐣𑑅 𑐐𑐸𑐨𑐵𑐖𑐸” 𑐦𑐶𑐮𑑂𑐩 𑐳𑐦𑐮 𑐖𑐹𑐐𑐸 𑐡𑐸 𑑋 “𑐖𑐵𑐩𑐣𑑅 𑐐𑐸𑐨𑐵𑐖𑐸” 𑐦𑐶𑐮𑑂𑐩𑐫𑑂 𑐎𑑂𑐫𑐣𑐵𑐟𑑅𑐐𑐸 𑐮𑐸 𑐤𑐵𑐥𑐵 “𑐟𑐵𑐥𑐮𑐫𑑂” 𑐦𑐶𑐮𑑂𑐩𑐫𑑂 𑐣𑑄 𑐎𑑂𑐫𑐣𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐀𑐠𑐾𑐴𑐾𑐟𑐸𑑄 “𑐱𑑄𑐏𑐢𑐬𑐫𑐵 𑐧𑐵𑐏𑑄” 𑐦𑐶𑐮𑑂𑐩𑐫𑑂 𑐣𑑄 𑐖𑐸𑐖𑐸 𑐬𑐵𑐑𑐰𑐡𑐾𑐰𑐫𑐵 𑐱𑐵𑐳𑐣𑐎𑐵𑐮𑐫𑐵 𑐏𑑃 𑐤𑑂𑐫𑐧𑑂𑐰𑐫𑐾𑐟 𑐟𑐵𑑅𑐮𑐵𑑅𑐐𑐸 𑐰 𑐏𑑂𑐰𑐥𑑄𑐣𑐶𑐳𑐾𑑄 𑐖𑑂𑐫𑐵𑐩𑐶𑐟 𑐕𑑂𑐰𑐫𑐵𑐴𑐫𑐵𑑅 𑐮𑐸𑑃 𑐎𑐵𑑅𑐰𑑅𑐐𑐸 𑐏𑐣𑐵 𑐱𑑄𑐏𑐢𑐬𑐫𑐵𑐟 𑐱𑑄𑐎𑐵 𑐖𑐹𑐐𑐸 𑐑𑐚𑐣𑐵 𑐧𑐵𑐴𑐾𑐎 𑐩𑐾𑐐𑐸 𑐕𑐸𑑄 𑐎𑐠𑑄𑐫𑐵 𑐥𑑂𑐬𑐩𑐵𑐞 𑐩𑐵𑐮𑐾𑐐𑐸 𑐢𑐵𑑅𑐳𑐵 𑐎𑐸𑐟𑑅 𑐖𑐸𑐫𑐵𑐔𑑂𑐰𑑄𑐐𑐸 𑐩𑐡𑐸 𑑋

“𑐱𑑄𑐏𑐢𑐬𑐫𑐵 𑐧𑐵𑐏𑑄” 𑐡𑐫𑐾𑐎𑐹𑐪 𑐳𑑄𑐫𑐸𑐎𑑂𑐟 𑐱𑑂𑐬𑐾𑐲𑑂𑐛𑐫𑐵 𑐎𑐸𑐟𑐮𑑄 𑐠𑑁𑑄 𑐣𑐾𑐥𑐵𑐮𑐩𑐞𑑂𑐜𑐮𑑄 𑐁𑐖𑐸 𑐎𑐠𑑄 𑐎𑐫𑐵𑐟𑑅𑐪 𑐮𑐵𑐏𑐾𑐫𑐵 𑐧𑐵𑐏𑑄 𑐖𑑂𑐰𑐣𑐵𑑅 “𑐩𑐖𑐶𑐥𑐵 𑐮𑐵𑐏𑐾” 𑐣𑐵𑑄𑐫𑐵𑐐𑐸 𑐊𑐣𑐶𑐩𑐾𑐚𑐾𑐜 𑐦𑐶𑐮𑑂𑐩 𑐫𑐵𑐎𑐣𑑄 𑐴𑐾 𑐥𑐶𑐴𑐵𑑄 𑐰𑐂𑐐𑐸 𑐏𑑃 𑐡𑐸𑐳𑐵 𑐩𑐖𑐶𑐥𑐵𑑅𑐫𑐵 𑐠𑑂𑐰 𑐮𑐵𑐏𑐾𑐫𑐵 𑐧𑐵𑐏𑑄𑐫𑐵 𑐮𑐶𑐢𑑄𑐳𑐵𑐫𑑂 𑐣𑐶𑐬𑑂‍𑐡𑐾𑐱𑐎 𑐁𑐬𑑂‍𑐫𑐩 𑐣𑐎𑑅𑐩𑐶𑑄 “𑐮𑐵𑐏𑐾𑐨𑐵𑐖𑐸” 𑐣𑐵𑑄𑐫𑐵𑐐𑐸 𑐣𑐾𑐰𑐵𑑅 𑐦𑐶𑐮𑑂𑐩 𑐡𑐫𑐾𑐎𑐵𑐔𑑂𑐰𑑄𑐐𑐸 𑐡𑐸 𑑋

𑐣𑐾𑐥𑐵𑑅𑐫𑐵 𑐴𑐾 𑐮𑑀𑐎𑑄𑐴𑑂𑐰𑐵𑑅𑐪 𑐴𑐶𑐬𑑀𑐂𑐣 𑐁𑐱𑐶𑐲𑑂𑐩𑐵 𑐣𑐎𑑅𑐩𑐶𑐫𑐵 𑐴𑑀𑐩 𑐥𑑂𑐬𑑀𑐜𑐎𑑂𑐱𑐣𑐫𑐵 𑐬𑐸𑐥𑐫𑑂 𑐡𑐫𑐾𑐎𑐵𑐔𑑂𑐰𑑄𑐐𑐸 𑐠𑑂𑐰 𑐦𑐶𑐮𑑂𑐩𑐫𑐵 𑐣𑐵𑑄 “𑐮𑐵𑐏𑐾𑐨𑐵𑐖𑐸” 𑐢𑐎𑐵𑑅 𑐕𑐸𑐣𑐵𑐟𑑅𑐐𑐸 𑐏𑑃𑐫𑐵𑐟 𑐎𑐫𑐵𑑅 𑐩𑐖𑐶𑐥𑐵𑑅 𑐮𑐵𑐏𑐾𑐮𑐶𑐳𑐾 𑐳𑑂𑐰𑐵𑐥𑐹 𑐡𑐸𑐥𑐶𑑄𑐳𑑄 𑐎𑐸𑑄𑐏𑐶𑐣𑐵𑐔𑑂𑐰𑑄𑐐𑐸 𑐡𑐸𑐳𑐵 𑐄𑐩𑐶𑐐𑐸 𑐩𑐵𑐐 𑐢𑐂𑐐𑐸 𑐄𑐩𑐶𑐳𑑄 𑐥𑐬𑐩𑑂𑐥𑐬𑐵𑑄𑐣𑐶𑐳𑐾𑑄 𑐠𑑅 𑐁𑐬𑐵𑐢𑑂𑐫𑐡𑑂𑐫𑑅 𑐎𑐠𑑄 𑐥𑐸𑐖𑑂𑐫𑐵𑐣𑐵 𑐰𑐫𑐵𑐔𑑂𑐰𑑄𑐪 𑐁𑐖𑐸𑐫𑐵𑐟 𑐮𑐵𑐏𑐾𑐨𑐵𑐖𑐸 𑐢𑐎𑐵𑑅 𑐳𑐩𑑂𑐧𑑀𑐢𑐣 𑐩𑐫𑐵𑐳𑐾 𑐮𑐵𑐏𑐾𑐁𑐖𑐸 𑐢𑐎𑐵𑑅 𑐴𑐾 𑐦𑐶𑐮𑑂𑐩𑐫𑐵 𑐣𑐵𑑄 𑐕𑐸𑐂𑐩𑐵𑑅 𑐢𑐂𑐐𑐸 𑐏𑑅 𑑋

𑐠𑐸𑐎𑐷 𑐣𑐶𑐬𑑂‍𑐡𑐾𑐱𑐎 𑐁𑐬𑑂‍𑐫𑐩 𑐣𑐎𑑅𑐩𑐶𑐫𑐵 𑐢𑐵𑐥𑐹 𑐎𑐠𑑄 𑐠𑑂𑐰 𑐦𑐶𑐮𑑂𑐩 𑐳𑑂𑐰𑐫𑐾𑐢𑐸𑑄𑐎𑐵𑑅 𑐦𑐶𑐮𑑂𑐩𑐫𑐵 𑐣𑐵𑑄 𑐥𑑂𑐬𑐟𑐶 𑐧𑑂𑐰𑐮𑑄𑐐𑐸 𑐱𑑄𑐎𑐵 𑐔𑐶𑐮𑐵𑐰𑐣𑐷 𑐢𑐂𑐐𑐸 𑐏𑐣𑐾𑐡𑐸 𑑋 𑐠𑐸𑐎𑐠𑑄 𑐋𑐟𑐶𑐴𑐵𑐳𑐶𑐎 𑐑𑐚𑐣𑐵 𑐰𑐵 𑐥𑐵𑐟𑑂𑐬𑐫𑐵𑐟 𑐎𑐫𑐵𑑅 𑐦𑐶𑐮𑑂𑐩 𑐡𑐫𑐾𑐎𑐷𑐧𑐮𑐫𑑂 𑐠𑐖𑑂𑐫𑐵𑐐𑐸 𑐳𑑅 𑐠𑑂𑐰𑐂𑐐𑐸 𑐳𑑂𑐰𑐵𑐨𑐵𑐰𑐶𑐎 𑐴𑐾 𑐏𑑅 𑑋 𑐣𑐾𑐥𑐵𑐮𑐫𑑂 𑐡𑐫𑐾𑐎𑐹𑐐𑐸 “𑐰𑐷𑐬 𑐐𑐞𑐾𑐱𑐩𑐵𑐣” 𑐠𑐾𑑄𑐖𑑂𑐫𑐵𑑅𑐐𑐸 𑐧𑐵𑐫𑑀𑐥𑐶𑐎 𑐦𑐶𑐮𑑂𑐩𑐫𑐵 𑐧𑐵𑐬𑐾 𑐖𑐸𑐂𑐩𑐵 𑐔𑐵𑐴𑐾 “𑐧𑐳𑐣𑑂𑐟𑐷” 𑐠𑐾𑑄𑐖𑑂𑐫𑐵𑑅𑐐𑐸 𑐖𑐒𑑂𑐐𑐧𑐴𑐵𑐡𑐸𑐬𑐫𑐵 𑐄𑐡𑐫𑐫𑐵𑐟 𑐎𑐫𑐵𑑅 𑐔𑑂𑐰𑐫𑐵𑐟𑑅𑐐𑐸 𑐄𑐥𑐣𑑂𑐫𑐵𑐳𑐫𑐵 𑐮𑐶𑐢𑑄𑐳𑐵𑐫𑑂 𑐡𑐫𑐾𑐎𑐹𑐐𑐸 𑐦𑐶𑐮𑑂𑐩𑐫𑐵𑐟 𑐎𑐫𑐵𑑅 𑐖𑐸𑐂𑐩𑐵 𑐎𑐸𑑄𑐏𑐶𑐄𑑃𑐥𑐶𑑄 𑐮𑐵 𑐡 𑐴𑐾 𑐡𑐸 𑑋

𑐧𑐮𑐶𑐄𑐜𑐫𑑂 𑐎𑑄𑐐𑐣𑐵 𑐬𑐣𑑁𑐚𑐫𑐵 𑐩𑐾𑐣𑐬𑑀𑐮 𑐡𑐸𑐐𑐸 “𑐩𑐞𑐶𑐎𑐬𑑂‍𑐞𑐶𑐎𑐵” 𑐀𑐮𑐾 𑐬𑐞𑐰𑐷𑐬 𑐳𑐶𑑄𑐴, 𑐡𑐷𑐥𑐶𑐎𑐵 𑐥𑐵𑐡𑐸𑐎𑑀𑐣𑐾 𑐰 𑐱𑐵𑐴𑐷𑐡 𑐎𑐥𑐸𑐬 𑐡𑐸𑐐𑐸 “𑐥𑐡𑑂𑐩𑐵𑐰𑐟” 𑐠𑐖𑑂𑐫𑐵𑑅𑐐𑐸 𑐴𑐾 𑐡𑐳𑐸 𑐏𑑅 𑑋 𑐣𑐾𑐰𑐵𑑅 𑐦𑐶𑐮𑑂𑐩𑐫𑐵𑐟 𑐎𑐫𑐵𑑅 𑐔𑐬𑑂‍𑐔𑐵 𑐫𑐵𑐫𑐾𑐧𑐮𑐫𑑂 𑐤𑐵𑐥𑐵𑑄𑐐𑐸 𑐣𑐾𑐰𑐵𑑅 𑐦𑐶𑐮𑑂𑐩 “𑐳𑐶𑐮𑐸” 𑐀𑐮𑐾 𑐀𑐣𑑄 𑐮𑐶𑐥𑐵 “𑐬𑐵𑐖𑐩𑐟𑐶” 𑐠𑐾𑑄𑐖𑑂𑐫𑐵𑑅𑐐𑐸 𑐦𑐶𑐮𑑂𑐩𑐫𑐵 𑐥𑐬𑐶𑐰𑐾𑐱 𑐣𑑄 𑐋𑐟𑐶𑐴𑐵𑐳𑐶𑐎 𑐴𑐾 𑐏𑑅 𑑋 𑐖𑐧𑐎𑐶 𑐠𑑂𑐰 𑐣𑐶𑐐𑐸𑐮𑐶𑑄 𑐦𑐶𑐮𑑂𑐩𑐫𑑂 𑐕𑐸𑑄 𑐎𑐠𑑄𑐫𑐵 𑐱𑐵𑐳𑐣𑐎𑐵𑐮𑐫𑐵 𑐄𑐮𑑂𑐮𑐾𑐏 𑐢𑐵𑑅𑐳𑐵 𑐩𑐡𑐸 𑑋

𑐀𑐫𑑂𑐳𑐵𑑄 𑐦𑐶𑐮𑑂𑐩𑐫𑑂 𑐎𑑂𑐫𑐣𑐵𑐟𑑅𑐐𑐸 𑐮𑐎𑐳𑑄 𑐠𑑂𑐰 𑐁𑑅𑐫𑐵 𑐧𑐵𑐏𑑄 𑐩𑐏𑐸 𑐢𑐂𑐐𑐸 𑐫𑐵𑐄𑑃𑐎 𑐴𑐾 𑐎𑑂𑐫𑑄 𑑋 𑐀𑐠𑐾𑐴𑐾 𑐟𑐸𑑄 𑐗𑐶𑐣𑑂𑐫𑐵𑐡𑑃 𑐣𑐷𑐡𑑃𑐟𑐶 𑐤𑑂𑐫𑑅 𑐥𑐶𑐴𑐵𑑄𑐰𑑅𑐐𑐸 “𑐐𑐸𑐬𑐸𑐩𑐵𑐥𑐵” 𑐣𑐵𑑄𑐫𑐵𑐐𑐸 𑐦𑐶𑐮𑑂𑐩 𑐣𑑄 𑐂𑐟𑐶𑐴𑐵𑐳𑐮𑐶𑐳𑐾 𑐴𑐾 𑐳𑑂𑐰𑐵𑐥𑐹 𑐡𑐸𑐐𑐸 𑐦𑐶𑐮𑑂𑐩 𑐏𑑅 𑑋 𑐫𑐾𑑃𑐫𑐵 𑐂𑐟𑐸𑑄𑐧𑐴𑐵𑑅𑐮𑐶𑐳𑐾 𑐳𑑂𑐰𑐵𑐥𑐹 𑐡𑐸𑐐𑐸 𑐠𑑂𑐰 𑐦𑐶𑐮𑑂𑐩𑐫𑐵 𑐣𑐶𑐬𑑂‍𑐡𑐾𑐱𑐎 𑐱𑐵𑐣𑑂𑐟𑐬𑐵𑐖 𑐱𑐵𑐎𑑂𑐫 𑐏𑑅 𑑋 𑐱𑐵𑐣𑑂𑐟𑐬𑐵𑐖 𑐱𑐵𑐎𑑂𑐫𑐫𑐵 𑐴𑐾 𑐣𑐶𑐬𑑂‍𑐡𑐾𑐱𑐣𑐫𑑂 𑐥𑐶𑐴𑐵𑑄 𑐰𑑅𑐐𑐸 “𑐫𑐮𑐾𑐧𑐵𑐠𑑅”𑐮𑐵 𑐫𑐮𑐫𑐵 𑐂𑐟𑐶𑐴𑐵𑐳𑐮𑐶𑐳𑐾 𑐟𑐥𑑂𑐫𑑄𑐎 𑐴𑐾 𑐳𑑂𑐰𑐵𑐥𑐹 𑐡𑐸𑐐𑐸 𑐎𑐵𑐟𑑂𑐟𑐶 𑐥𑑂𑐫𑐵𑐏𑐣𑐫𑑂 𑐡𑐸𑐠𑑂𑐫𑐵𑐣𑐵𑐔𑑂𑐰𑑄𑐐𑐸 𑐧𑐵𑐏𑑄 𑐏𑑅 𑑋

𑐣𑐶𑐬𑑂‍𑐡𑐾𑐱𑐎 𑐁𑐬𑑂‍𑐫𑐩 𑐣𑐎𑑅𑐩𑐶𑐫𑐵 𑐳𑐵𑐥 𑐴𑐾 𑐧𑐫𑑂𑐧𑐫𑑂 𑐖𑐹𑐐𑐸 “𑐨𑐶𑐣𑑂𑐟𑐸𑐣𑐵” 𑐦𑐶𑐮𑑂𑐩𑐫𑑂 𑐣𑐾𑐥𑐵𑑅𑐫𑐵 𑐕𑐸𑑄 𑐋𑐟𑐶𑐴𑐵𑐳𑐶𑐎 𑐎𑐵𑐮𑐫𑐵𑐟 𑐰𑑂𑐫𑐵𑐏𑑂𑐫𑐵 𑐫𑐵𑐣𑐵𑐟𑑅𑐐𑐸 𑐩𑐡𑐸𑐳𑐵𑑄 𑐠𑐸𑐎𑐶𑐫𑐵 𑐥𑐬𑐶𑐰𑐾𑐱 𑐳𑐩𑐎𑐵𑐮𑐶𑐣 𑐃 𑐩𑐏𑐳𑐾 𑐋𑐟𑐶𑐴𑐵𑐳𑐶𑐎 𑐃 𑐫𑐵𑐣𑐵𑐟𑑅𑐐𑐸 𑐡𑐸 𑑋

𑐣𑐾𑐥𑐵𑐮 𑐀𑐣𑑂𑐟𑐬𑑂‍𑐬𑐵𑐲𑑂𑐚𑑂𑐬𑐶𑐫 𑐁𑐡𑐶𑐰𑐵𑐳𑐷 𑐔𑐮𑐔𑐶𑐟𑑂𑐬 𑐩𑐴𑑀𑐟𑑂𑐳𑐰𑐫𑑂 𑐡𑐎𑐮𑐫𑑂 𑐧𑐵𑑄𑐮𑐵𑑅𑐐𑐸 𑐦𑐶𑐮𑑂𑐩𑐫𑐵 𑐬𑐸𑐥𑐫𑑂 𑐎𑑂𑐬𑐶𑐚𑐶𑐎𑑂𑐳 𑐀𑐰𑐵𑐬𑑂‍𑐜𑐟𑐎𑑄 𑐟𑑂𑐫𑐵𑐎𑐹𑐐𑐸 𑐠𑑂𑐰 𑐦𑐶𑐮𑑂𑐩𑐫𑐵𑐟 𑐋𑐟𑐶𑐴𑐵𑐳𑐶𑐎 𑐦𑐶𑐮𑑂𑐩 𑐢𑐎𑐵𑑅 𑐩𑐢𑐵𑑅𑐳𑐵𑑄 𑐂𑐟𑐶𑐴𑐵𑐳𑐫𑐵 𑐮𑐎𑐳 𑐡𑐸𑐐𑐸 𑐦𑐶𑐮𑑂𑐩 𑐮𑐵 𑐥𑐎𑑂𑐎𑐵𑑄 𑐴𑐾 𑐏𑑅𑐳𑐵 𑐮𑐶𑐥𑐵 𑐁𑐬𑑂‍𑐫𑐩 𑐣𑐎𑑅𑐩𑐶𑑄 𑐩𑐫𑑂𑐖𑐸 𑐳𑐸𑐣𑐶𑐟𑐵 𑐬𑐵𑐖𑐨𑐞𑑂𑐜𑐵𑐬𑐷𑐮𑐶𑐳𑐾 𑐖𑐵𑐣𑐵𑑅 𑐡𑐫𑐾𑐎𑐹𑐐𑐸 “𑐩𑐵𑐫𑐵” 𑐦𑐶𑐮𑑂𑐩𑐫𑐵 𑐮𑐎𑐳 𑐣𑑄 𑐳𑐩𑐎𑐵𑐮𑐶𑐣 𑐃 𑐩𑐏𑐳𑐾 𑐥𑐸𑐮𑐵𑑄𑐐𑐸 𑐃 𑐫𑐵𑐣𑐶𑐎𑐶 𑐋𑐟𑐶𑐴𑐵𑐳𑐶𑐎 𑐥𑐬𑐶𑐰𑐾𑐱𑐫𑐵𑐟 𑐎𑑅𑐑𑐵𑐣𑐵𑐟𑑅𑐐𑐸 𑐡𑐸 𑑋

𑐁𑑅 𑐰𑐫𑐵 𑐳𑐘𑑂𑐔𑐵𑐬𑐎𑑅𑐩𑐶 𑐊𑐰𑑄 𑐦𑐶𑐮𑑂𑐩 𑐣𑐶𑐬𑑂‍𑐡𑐾𑐱𑐎 𑐡𑐬𑑂‍𑐱𑐣𑐰𑐷𑐬 𑐱𑐵𑐎𑑂𑐫𑑄 𑐡𑐫𑐾𑐎𑐹𑐐𑐸 “𑐡 𑐩𑐶𑐠 𑐖𑐶𑐬𑑀”𑐣𑐵𑑄𑐫𑐵𑐐𑐸 𑐱𑐬𑑂‍𑐚 𑐦𑐶𑐮𑑂𑐩𑐫𑑂 𑐠𑑁𑑄𑐫𑐵 𑐳𑐩𑐎𑐵𑐮𑐶𑐣 𑐃 𑐰 𑐪𑐶𑐐𑑅𑐫𑐵 𑐋𑐟𑐶𑐴𑐵𑐳𑐶𑐎 𑐃𑐫𑐵𑐟 𑐮𑑂𑐰𑐵𑐎𑐕𑑂𑐫𑐵𑐣𑐵𑐟𑑅𑐐𑐸 𑐡𑐸 𑑋 𑐣𑐾𑐰𑐵𑑅 𑐦𑐶𑐮𑑂𑐩𑐫𑑂 𑐂𑐟𑐶𑐴𑐵𑐳𑐫𑐵 𑐏𑑃𑐫𑐵𑐟 𑐎𑐫𑐵𑑅 𑐔𑐬𑑂‍𑐔𑐵 𑐫𑐵𑐫𑐾𑐧𑐮𑐫𑑂 𑐧𑐸𑐡𑑂𑐢𑐎𑐵𑐮𑐶𑐣 𑐧𑐵𑐏𑐣𑐫𑑂 𑐡𑐫𑐾𑐎𑐹𑐐𑐸 𑐦𑐶𑐮𑑂𑐩𑐫𑐵 𑐣𑐵𑑄 𑐣𑑄 𑐟𑑂𑐰𑑅𑐦𑐶𑐎𑐾 𑐩𑐖𑐶𑐄𑐐𑐸 𑐣𑐵𑑄𑐟 𑐏𑑅 𑑋

𑐠𑐸𑐏𑐾𑐥𑐵𑐏𑐾 𑐡𑐎𑐮𑐫𑑂 𑐤𑐵𑐥𑐵𑑄 𑐥𑐶𑐴𑐵𑑄𑐰𑑅𑐐𑐸 𑐢𑐫𑐵𑐐𑐸 “𑐔𑐵𑐞𑑂𑐜𑐵𑐮𑐶𑐎𑐵” 𑐏𑑅𑐳𑐵 𑐰 𑐢𑐸𑑄𑐎𑐵𑑅 “𑐥𑐚𑐵𑐔𑐵𑐬𑐵”, “𑐳𑐾𑐬𑐷𑐰 𑐧𑐘𑑂𑐖𑐵”, “𑐎𑐺𑐲𑐵 𑐐𑑁𑐟𑐩𑐷” 𑐥𑐶𑐡𑐣𑐾𑐢𑐸𑑄𑐎𑐹𑐐𑐸 𑐡𑐸𑐳𑐵 𑐁𑑅 “𑐑𑑀𑐲𑐎” 𑐰 “𑐎𑐬𑑂‍𑐩” 𑐥𑐶𑐡𑐣𑐾𑐐𑐸 𑐮𑑃𑐥𑐸𑐂 𑐡𑐸 𑑋 𑐠𑐸𑐎𑐠𑑄 𑐣𑐾𑐰𑐵𑑅 𑐦𑐶𑐮𑑂𑐩𑐫𑑂 𑐏𑐣𑐾𑐡𑐫𑐵𑐰𑐫𑐵𑐔𑑂𑐰𑑄𑐐𑐸 𑐂𑐟𑐶𑐴𑐵𑐳𑐫𑐵 𑐏𑑃𑐫𑑂 𑐁𑑅 𑐰𑐫𑐵𑑅 “𑐔𑑂𑐰𑐵𑐥𑐸𑐦𑐫𑑂” 𑐕𑐐𑐹 𑐤𑐹𑐐𑐸 𑐡𑐳𑐸 𑐖𑐸𑐫𑐵𑑅 𑐥𑐶𑐡𑐣𑐷𑐐𑐸 𑐳𑐩𑑂𑐨𑐵𑐰𑐣𑐵 𑐧𑑂𑐰𑐮𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐕𑐥𑐸 𑐥𑐸𑐮𑐵𑑄𑐐𑐸 𑐣𑐾𑐰𑐵𑑅 𑐎𑐵𑐰𑑂𑐫 “𑐖𑐶 𑐰𑐫𑐵 𑐮𑐵𑑅 𑐮𑐔𑑂𑐕𑐶 𑐩𑐡𑐸𑐣𑐶”𑐫𑐵 𑐮𑐶𑐢𑑄𑐳𑐵 𑐎𑐫𑐵𑑅 𑐡𑐫𑐾𑐎𑐵𑐔𑑂𑐰𑑄𑐐𑐸 𑐠𑑂𑐰 𑐦𑐶𑐮𑑂𑐩𑐫𑐵 𑐡𑐎𑑂𑐰 𑐢𑐫𑐵𑐠𑐾𑑄 𑐖𑑂𑐫𑐵 𑐎𑑂𑐰𑐔𑐵𑐫𑐾𑐢𑐸𑑄𑐎𑐹𑐐𑐸 𑐡𑐸𑐳𑐵 𑐁𑑅 𑐠𑐸𑐎𑐶𑐫𑐵 𑐮𑐶𑐥𑐵𑑄𑐐𑐸 𑐔𑐬𑐞𑐫𑐵 𑐖𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑂𑐰 𑐦𑐶𑐮𑑂𑐩𑐫𑑂 𑐤𑐵𑐥𑐵𑐤𑐵𑐥𑐵 𑐯𑐵𑐳𑐵𑐫𑑂 𑐰𑐣𑐵𑑅 𑐧𑐣𑐾𑐖𑑂𑐫𑐵 𑐫𑐵𑑅𑐰𑐣𑐷𑐥𑐶𑑄 𑐯𑐵𑐳𑐵𑐧𑐘𑑂𑐖𑐵𑑅𑐫𑐵 𑐩𑐟𑐶𑐣𑐵𑐫𑐵 𑐧𑐵𑐏𑑄 𑐏𑐣𑐾𑐡𑐂𑐐𑐸 𑐖𑐹𑐐𑐸 𑐡𑐸𑐳𑐵 𑐄𑐎𑐶𑐫𑐵 𑐴𑐾 𑐮𑐶𑐢𑑄𑐳𑐵𑐫𑑂 𑐄𑐐𑐸 𑐃𑐫𑐵 𑐖𑐷𑐰𑐣𑐱𑐿𑐮𑐷 𑐰 𑐬𑐵𑐖𑐣𑐿𑐟𑐶𑐎 𑐥𑐬𑐶𑐰𑐾𑐱 𑐣𑑄 𑐏𑐣𑐾𑐡𑐂𑐐𑐸 𑐏𑑃 𑐡𑐸 𑑋

𑐠𑑁𑑄𑐳𑐶𑐧𑐾𑑄 𑐐𑐸𑐳𑑅𑐟𑑂𑐫𑐵𑐡𑑃 𑐤𑑂𑐫𑑅 𑐳𑐣𑑂 𑑑𑑘𑑓𑑗 𑐥𑐵𑐏𑐾𑐫𑐵 𑐥𑐬𑐶𑐰𑐾𑐱𑐫𑐵𑐟 𑐠𑑂𑐰 𑐦𑐶𑐮𑑂𑐩𑐫𑑂 𑐳𑑂𑐰𑐫𑐾𑐡𑐂𑐐𑐸 𑐏𑑃 𑐡𑐸 𑑋 𑐠𑑂𑐰 𑐦𑐶𑐮𑑂𑐩𑐫𑐵𑐟 𑐎𑐫𑐵𑑅 𑐥𑐶𑐡𑑄𑐐𑐸 𑐏𑑃 𑐎𑐠𑑄 𑐠𑑂𑐰 𑐦𑐶𑐮𑑂𑐩𑐫𑑂 𑐄𑐐𑐸 𑐂𑐮𑐫𑑂 𑐕𑐪 𑐧𑐘𑑂𑐖𑐵𑑅𑐮𑐶𑐳𑐾 𑐂𑐴𑐶𑐥𑐵 𑐫𑐵𑐣𑐵𑑅 𑐨𑑁𑐩𑐔𑐵 𑐖𑐸𑐫𑐵𑑅 𑐕𑐾𑑃𑐫𑑂 𑐡𑐸𑐴𑐵𑑄 𑐰𑑅𑐪 𑐩𑐶𑐳𑐵𑑄 𑐯𑐵𑐳𑐵𑐫𑑂 𑐰𑐣𑐾𑐟𑑂𑐫𑑄𑐪 𑐠𑑅 𑐩𑐶𑐖𑑄𑐫𑐵𑐟 𑐰 𑐩𑐶𑐖𑑄𑐫𑐵𑐐𑐸 𑐕𑐾𑑄𑑃𑐫𑑂 𑐖𑐶 𑐰𑐫𑐵 𑐮𑐵 𑐮𑐕𑐶 𑐩𑐡𑐸𑐣𑐶 𑐕𑐶 𑐠𑐠𑐾 𑐟𑐵𑐥𑐮𑐫𑑂 𑐗𑐵𑐫𑐾𑐐𑐸 𑐮𑐵 𑐢𑐂𑐐𑐸 𑐤𑑂𑐫𑐳𑑅 𑐠𑑄𑐐𑐸 𑐏𑑃 𑐤𑑂𑐫𑐧𑑂𑐰𑐫𑐵𑐟𑑅𑐐𑐸 𑐡𑐸𑐳𑐵 𑐠𑑂𑐰𑐴𑐾 𑐩𑐹 𑐧𑐵𑐏𑑄𑐫𑐵 𑐖𑑅𑐏𑑅 𑐔𑑂𑐰𑐣𑐵𑑅 𑐄𑐐𑐸 𑐃𑐫𑐵 𑐣𑐾𑐰𑐵𑑅𑐟𑐫𑑂𑐐𑐸 𑐳𑐵𑐩𑐵𑐖𑐶𑐎 𑐥𑐬𑐶𑐰𑐾𑐱 𑐎𑑅𑐑𑐵𑐣𑐵𑐟𑑅𑐐𑐸 𑐢𑐂𑐐𑐸 𑐔𑐬𑑂‍𑐔𑐵 𑐡𑐸 𑑋

𑐠𑑂𑐰 “𑐔𑑂𑐰𑐵𑐥𑐸𑐦𑐫𑑂” 𑐦𑐶𑐮𑑂𑐩𑐫𑑂 𑐄𑐐𑐸 𑐂𑐮𑐫𑑂 𑐣𑐾𑐥𑐵𑑅𑐫𑐵 𑐱𑐵𑐳𑐣 𑐳𑐟𑑂𑐟𑐵𑐫𑑂 𑐖𑐒𑑂𑐐𑐧𑐴𑐵𑐡𑐸𑐬𑐫𑐵 𑐄𑐡𑐫 𑐩𑐖𑐹𑐣𑐶𑐐𑐸 𑐰 𑐟𑐟𑑂𑐎𑐵𑐮𑐶𑐣 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐨𑐶𑐩𑐳𑐾𑐣 𑐠𑐵𑐥𑐵𑐫𑐵 𑐥𑐟𑐣𑐫𑐵𑐟 𑐎𑑂𑐫𑐣𑐷𑐐𑐸 𑐡𑐸𑐳𑐵 𑐨𑐶𑐩𑐳𑐾𑐣 𑐠𑐵𑐥𑐵𑐫𑐵 𑐥𑐟𑐣 𑐮𑐶𑐥𑐵 𑐖𑐒𑑂𑐐𑐧𑐴𑐵𑐡𑐸𑐬 𑐎𑐸𑑃𑐰𑐬𑐫𑐵 𑐁𑐬𑑂‍𑐠𑐶𑐎 𑐳𑑂𑐠𑐶𑐟𑐶 𑐧𑐵𑑄𑐩𑐮𑐵𑐣𑐵𑑅 𑐰𑐣𑐷𑐧𑐮𑐫𑑂 𑐄𑐐𑐸 𑐃𑐫𑐵 𑐣𑐵𑑄𑐖𑐵𑑅𑐪 𑐧𑐘𑑂𑐖𑐵𑑅 𑐢𑐩𑐵𑑄𑐳𑐵𑐴𑐸𑑄 𑐰𑐫𑐵𑐟 𑐡𑐵𑑄 𑐟𑑂𑐫𑐵𑐫𑑂 𑐧𑐶𑐫𑐵𑑅 𑐐𑑂𑐰𑐵𑐴𑐵𑐮𑐶 𑐫𑐵𑑅𑐐𑐸 𑐏𑑃𑐫𑐵 𑐣𑐵𑐥𑐣𑐵𑐥𑑄 𑐣𑐾𑐰𑐵𑑅𑐟𑐫𑑂𑐐𑐸 𑐄𑐐𑐸 𑐃𑐫𑐵 𑐳𑑂𑐠𑐶𑐟𑐶𑐫𑐵𑐟 𑐣𑑄 𑐳𑑂𑐰𑐫𑐾𑐡𑐂𑐐𑐸 𑐔𑐬𑑂‍𑐔𑐵 𑐡𑐸 𑑋

𑐀𑐠𑐴𑐾 𑐟𑐸𑑄 𑐳𑐵𑐩𑑂𑐬𑐵𑐖𑑂𑐫𑐰𑐵𑐡𑐷 𑐧𑑂𑐬𑐶𑐚𑐶𑐱 𑐳𑐬𑐎𑐵𑐬𑑄 𑐠𑑅𑐐𑐸 𑐱𑐵𑐳𑐣𑐫𑐵𑐟 𑐟𑐧𑑂𑐫𑐵 𑐫𑐵𑐣𑐵𑐫𑑄𑐎𑐹𑐐𑐸 𑐗𑑂𑐰𑐮𑐫𑑂 𑐧𑐾𑐮𑐵𑐫𑐟𑐫𑐵 𑐡𑐹𑐟 𑐧𑑂𑐬𑐵𑐫𑐣 𑐴𑐜𑐳𑐣 𑐣𑐾𑐥𑐵𑑅 𑐰𑑅𑐐𑐸 𑐏𑑃 𑐣𑑄 “𑐔𑑂𑐰𑐵𑐥𑐸𑐦𑐫𑑂” 𑐦𑐶𑐮𑑂𑐩𑐫𑑂 𑐳𑑂𑐰𑐫𑐾𑐡𑐂𑐐𑐸 𑐖𑐹𑐐𑐸 𑐡𑐸𑐳𑐵 𑐠𑐸𑐎𑐶𑑄 𑐫𑐵𑐣𑐵𑑅 𑐠𑑂𑐰 𑐦𑐶𑐮𑑂𑐩𑐫𑐵𑐟 𑐣𑐾𑐥𑐵𑑅𑐫𑐵 𑐂𑐟𑐶𑐴𑐵𑐳𑐫𑐵𑐟 𑐎𑐸𑐮𑐵𑐟𑑅𑐐𑐸 𑐦𑐶𑐮𑑂𑐩𑐫𑐵 𑐬𑐸𑐥𑐫𑑂 𑐤𑑂𑐫𑑅𑐣𑐾 𑐰𑐂𑐐𑐸 𑐦𑐶𑐮𑑂𑐩 𑐎𑐠𑑄 𑐁𑐥𑐵𑑅𑐳𑐶𑐣𑑄 𑐔𑐬𑑂‍𑐔𑐵 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋