𑐮𑐮𑐶𑐟𑐎𑐮𑐵 𑐥𑑂𑐬𑐟𑐶𑐲𑑂𑐛𑐵𑐣𑐫𑑂 𑐥𑑁𑐨𑐵𑑅 𑐔𑐶𑐟𑑂𑐬𑐎𑐮𑐵 𑐰𑐶𑐲𑐫𑐫𑑂 𑐐𑑀𑐲𑑂𑐛𑐶

𑐫𑐾𑑃 – 𑐣𑐾𑐥𑐵𑐮 𑐮𑐮𑐶𑐟𑐎𑐮𑐵 𑐥𑑂𑐬𑐖𑑂𑐘𑐵 𑐥𑑂𑐬𑐟𑐶𑐲𑑂𑐛𑐵𑐣𑐫𑑂 𑐰𑑄𑐐𑐸 𑐕𑐸𑑄 𑐡𑐶𑑄 𑐤𑑂𑐫𑑅 ‘𑐣𑐾𑐥𑐵𑐮𑐷 𑐥𑐬𑐩𑑂𑐥𑐬𑐵𑐐𑐟 𑐥𑑁𑐨𑐵 𑐰 𑐠𑐵𑑄𑐎𑐵 𑐔𑐶𑐟𑑂𑐬𑐎𑐮𑐵𑐫𑑂 𑐱𑐶𑐮𑑂𑐥𑐫𑐵 𑐰𑐬𑑂‍𑐟𑐩𑐵𑐣 𑐔𑐸𑐣𑑁𑐟𑐶’ 𑐰𑐶𑐲𑐫𑐫𑐵𑐟 𑐎𑐫𑐵𑑅 𑐕𑐐𑐹 𑐐𑑀𑐲𑑂𑐛𑐶 𑐖𑐸𑐮 𑑋 𑐥𑑂𑐬𑐟𑐶𑐲𑑂𑐛𑐵𑐣𑐫𑐵 𑐥𑐬𑐩𑑂𑐥𑐬𑐵𑐐𑐟 𑐔𑐶𑐟𑑂𑐬𑐎𑐮𑐵 𑐰 𑐱𑐶𑐮𑑂𑐥𑐎𑐮𑐵 𑐰𑐶𑐨𑐵𑐐𑐫𑐵 𑐐𑑂𑐰𑐳𑐵𑐮𑐫𑑂 𑐄𑐐𑐸 𑐐𑑀𑐲𑑂𑐛𑐶 𑐖𑐹𑐐𑐸 𑐏𑑅 𑑋 𑐐𑑀𑐲𑑂𑐛𑐶𑐂 𑐱𑐶𑐮𑑂𑐥𑐎𑐮𑐵𑐫𑑂 𑐁𑐰𑐱𑑂𑐫𑐎 𑐱𑐵𑐳𑑂𑐟𑑂𑐬𑐷𑐫 𑐖𑑂𑐘𑐵𑐣𑐫𑐵 𑐥𑑂𑐬𑐱𑐶𑐎𑑂𑐲𑐞 𑐧𑐷𑐐𑐸 𑐳𑑄𑐳𑑂𑐠𑐵𑐫𑐵 𑐪𑑀𑐟𑐶 𑐡𑐸𑐐𑐸𑐮𑐶𑑄 𑐠𑐸𑐐𑐸 𑐰𑑂𑐫𑐰𑐳𑐵𑐫 𑐴𑐾 𑐳𑑄𑐎𑐚𑐫𑑂 𑐮𑐵𑐣𑐵𑐔𑑂𑐰𑑄𑐐𑐸 𑐏𑑃𑐫𑑂 𑐰𑐎𑑂𑐟𑐵𑐟𑐫𑑂𑐳𑑄 𑐔𑐶𑐄𑐟𑐵𑑅 𑐥𑑂𑐰𑑄𑐎𑐹𑐐𑐸 𑐡𑐸 𑑋

𑐮𑐶𑐳𑐾𑑄 𑐥𑐬𑐩𑑂𑐥𑐬𑐵𑐐𑐟 𑐱𑐶𑐮𑑂𑐥𑐎𑐮𑐵 𑐳𑑄𑐬𑐎𑑂𑐲𑐞𑐫𑐵 𑐣𑐶𑑄𑐟𑐶𑑄 𑐠𑑂𑐰 𑐳𑐩𑑂𑐧𑐣𑑂𑐢𑐷 𑐖𑑂𑐘𑐵𑐣𑐫𑐵𑐟 𑐥𑐸𑐮𑐵𑑄𑐐𑐸 𑐥𑐸𑐳𑑂𑐟𑐵𑑄 𑐤𑐹 𑐥𑐸𑐳𑑂𑐟𑐵𑐫𑐵𑐟 𑐮𑑅𑐯𑐵𑐣𑐵 𑐰𑐣𑐾𑐩𑐵𑑅𑐐𑐸 𑐏𑑃𑐫𑑂 𑐣𑑄 𑐳𑐬𑑀𑐎𑐵𑐬𑐵𑐰𑐵𑐮𑐵𑐟𑐫𑑂𑐳𑑄 𑐧𑑅 𑐧𑐶𑐄𑐐𑐸 𑐡𑐸 𑑋 𑐥𑑂𑐬𑐟𑐶𑐲𑑂𑐛𑐵𑐣𑐫𑐵 𑐎𑐸𑐮𑐥𑐟𑐶 𑐎𑐾𑐎𑐾 𑐎𑐬𑑂‍𑐩𑐵𑐔𑐵𑐬𑑂‍𑐫𑑄 𑐥𑐬𑐩𑑂𑐥𑐬𑐵𑐐𑐟 𑐬𑐸𑐥𑑄 𑐡𑐫𑐾𑐎𑐵𑐟𑑅𑐐𑐸 𑐳𑑂𑐰𑐡𑐾𑐱𑐷 𑐱𑐶𑐮𑑂𑐥, 𑐎𑐮𑐵 𑐰 𑐩𑑁𑐮𑐶𑐟𑐎𑐵𑑄 𑐡𑐾𑐫𑑂𑐫𑐵𑐟 𑐀𑐣𑑂𑐟𑐬𑑂‍𑐬𑐵𑐲𑑂𑐚𑑂𑐬𑐶𑐫𑐳𑑂𑐟𑐬𑐫𑑂 𑐪𑐳𑐷𑐎𑐵 𑐫𑑄𑐎𑐵𑐔𑑂𑐰𑑄𑐐𑐸 𑐢𑐵𑐳𑐾𑑄 𑐣𑐾𑐥𑐵𑐮𑐷 𑐩𑑁𑐮𑐶𑐎 𑐱𑐿𑐮𑐷 𑐰 𑐥𑐬𑐩𑑂𑐥𑐬𑐵𑐫𑐵 𑐰𑐶𑐱𑐾𑐲𑐟𑐵 𑐰 𑐄𑐎𑐶𑐫𑐵𑐟 𑐁𑐎𑐬𑑂‍𑐲𑐞𑐫𑐵𑐟 𑐎𑐫𑐵𑑅 𑐰𑐶𑐡𑐾𑐱𑐫𑑂 𑐟𑐎𑑄 𑐀𑐨𑑂𑐫𑐵𑐳 𑐫𑐵𑐫𑐾𑐐𑐸 𑐎𑐸𑐟𑑅 𑐖𑐸𑐫𑐵 𑐰𑐫𑐵𑐔𑑂𑐰𑑄𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋

𑐀𑐠 𑐴𑐾 𑐰𑐶𑐨𑐵𑐐𑐫𑐵 𑐥𑑂𑐬𑐩𑐸𑐏 𑐧𑐸𑐡𑑂𑐢𑐶𑐧𑐴𑐵𑐡𑐸𑐬 𑐐𑐸𑐬𑐸𑑄𑐐𑑄 𑐥𑑁𑐨𑐵𑑅 𑐰 𑐠𑐵𑑄𑐎𑐵 𑐔𑐶𑐟𑑂𑐬𑐎𑐮𑐵𑐫𑑂 𑐏𑐣𑐾 𑐡𑐫𑐵𑐔𑑂𑐰𑑄𑐐𑐸 𑐳𑐩𑐳𑑂𑐫𑐵 𑐰 𑐄𑐎𑐶𑐫𑐵 𑐳𑐩𑐵𑐢𑐵𑐣𑐫𑐵 𑐮𑑃𑐥𑐸 𑐩𑐵𑐮𑐵𑑅 𑐠𑐸𑐐𑐸 𑐏𑑂𑐫𑑅𑐫𑐵𑐟 𑐮𑑂𑐫𑑄𑐎𑐵 𑐟𑐫𑐾𑐐𑐸 𑐣𑐶𑑄𑐟𑐶𑑄 𑐰𑐶𑐨𑐵𑐐𑑄 𑐖𑑂𑐫𑐵𑐗𑑂𑐰𑑅𑐟 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋 𑐮𑐶𑐳𑐾𑑄 𑐰𑐫𑑂𑐎𑐮𑑄 𑐥𑑂𑐬𑐵𑐔𑐷𑐣 𑐱𑐶𑐮𑑂𑐥𑐎𑐮𑐵𑐫𑐵 𑐀𑐢𑑂𑐫𑐫𑐣𑐫𑑂 𑐴𑐵𑐠𑑂𑐫𑐵 𑐏𑐣𑐾 𑐡𑐫𑐵𑐔𑑂𑐰𑑄𑐐𑐸𑐮𑐶𑑄 𑐠𑑂𑐰 𑐥𑐾𑐱𑐵 𑐴𑐾 𑐮𑑀𑐥 𑐖𑐸𑐂𑐐𑐸 𑐀𑐰𑐳𑑂𑐠𑐵𑐫𑑂 𑐟𑐎𑑄 𑐠𑑂𑐫𑐣𑐵𑐔𑑂𑐰𑑄𑐐𑐸 𑐡𑐸 𑐢𑐫𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐥𑑂𑐬𑐟𑐶𑐲𑑂𑐛𑐵𑐣𑐫𑐵 𑐥𑑂𑐬𑐵𑐖𑑂𑐘 𑐢𑐬𑑂‍𑐩𑐬𑐵𑐖 𑐱𑐵𑐎𑑂𑐫 𑐰 𑐰𑐶𑐖𑑂𑐘 𑐥𑐹𑐬𑑂‍𑐞𑐥𑑂𑐬𑐳𑐵𑐡 𑐴𑑂𑐫𑑀𑐖𑐸𑑄 𑐖𑑂𑐫𑐵𑐥𑑁 𑐤𑑂𑐫𑐧𑑂𑐰𑐫𑐵𑐡𑐶𑐳𑐾𑑄 𑐥𑑁𑐨𑐵𑑅 𑐰 𑐠𑐵𑑄𑐎𑐵 𑐣𑐶𑐐𑐸𑐮𑐶𑑄 𑐢𑐵𑐬𑑂‍𑐩𑐶𑐎 𑐰𑐶𑐲𑐫 𑐖𑐹𑐐𑐸 𑐰𑐶𑐔𑐵𑑅 𑐥𑑂𑐰𑑄𑐎𑐵𑐡𑐷𑐐𑐸 𑐏𑑅 𑑋