𑐢𑐵𑑅𑐧𑐵𑐖𑐣𑐫𑑂 𑐤𑐹 𑐥𑐸𑐳𑑂𑐟𑐵𑐫𑐵 𑐁𑐎𑐬𑑂‍𑐲𑐞

𑐄𑐡𑐾𑐣 𑐤𑐹𑐳𑐵𑐫𑑂𑐩𑐶

‘𑐑𑐾𑑄 𑐡𑐶 𑐑𑐾𑑄𑐔𑐵, 𑐑𑐾𑑄 𑐡𑐶 𑐑𑐾𑑄𑐔𑐵
𑐑𑐾𑑄 𑐡𑐶 𑐑𑐾𑑄 𑐔𑐵𑐑𑐾𑑄 𑐔𑐵𑐑𑐾𑑄 𑐔𑐵𑐑𑐾𑑄𑐔𑐵
𑐑𑐾𑑄 𑐡𑐶 𑐑𑐾𑑄𑐔𑐵, 𑐑𑐾𑑄 𑐡𑐶 𑐑𑐾𑑄𑐔𑐵’

𑐠𑑂𑐰 𑐐𑐸𑑄𑐮𑐵 𑐧𑐵𑐖𑑄 𑐀𑐬𑑂‍𑐠𑐵𑐟 𑐢𑐵𑑅𑐧𑐵𑐖𑑄𑐫𑐵 𑐧𑑀𑐮 𑐏𑑅 𑑋 𑐠𑑂𑐰 𑐐𑐸𑑄𑐮𑐵 𑐮𑐕𑐶 𑐳𑐸𑐠𑐤𑐵𑐥𑐵𑑄 𑐠𑑂𑐰 𑐴𑐾 𑐧𑑀𑐮 𑐰𑐵 𑐧𑐵𑐖𑑄𑐫𑐵 𑐳𑑅 𑐖𑐎 𑐣𑑂𑐫𑐣𑐾 𑐡𑐫𑐵𑐔𑑂𑐰𑐣𑐷 𑑋 𑐫𑐾𑑃, 𑐫𑐮, 𑐏𑑂𑐰𑐥𑐫𑑂 𑐖𑐎 𑐩𑐏𑐸 𑐳𑑂𑐰𑐣𑐶𑐐𑐮𑑄𑐥𑐶𑐣𑐾 𑐣𑑄 𑐐𑐸𑑄𑐮𑐵 𑐮𑐕𑐶𑐫𑑄𑐎𑑄 𑐢𑐵𑑅𑐧𑐵𑐖𑑄 𑐠𑐵𑐣𑐵𑑅 𑐧𑑁𑐡𑑂𑐢 𑐔𑐿𑐟𑑂𑐫, 𑐰𑐶𑐴𑐵𑐬 𑐥𑐬𑐶𑐎𑑂𑐬𑐩𑐵 𑐫𑐵𑐫𑐾𑐐𑐸 𑐔𑐮𑐣 𑐡𑐸 𑑋 𑐰𑐶𑐱𑐾𑐲 𑐫𑐵𑐣𑐵𑑅 𑐫𑐾𑑃𑐫𑐵 𑐧𑑁𑐡𑑂𑐢𑐩𑐵𑐬𑑂‍𑐐𑐷𑐟 𑐐𑐸𑑄𑐮𑐵 𑐮𑐕𑐶𑐫𑑄𑐎𑑄 𑐳𑑂𑐰𑐫𑐩𑑂𑐨𑐹 𑐩𑐴𑐵𑐔𑐿𑐟𑑂𑐫𑐫𑑂 𑐰𑐣𑐾𑐐𑐸 𑐫𑐵𑐂𑐳𑐵 𑐫𑐮 𑐰 𑐏𑑂𑐰𑐥𑐫𑐵𑐥𑐶𑑄 𑐠𑐷𑐠𑐷 𑐧𑐴𑐵𑑅 𑐧𑐴𑐷 𑐔𑐵𑑅𑐴𑐶𑐮𑐾𑐐𑐸 𑐫𑐵𑐂 𑐢𑐵𑑅𑐧𑐵𑐖𑑄 𑐠𑐵𑐣𑐵𑑅 𑑋 𑐀𑐠𑐾 𑐴𑐾 𑐎𑐶𑐥𑐹, 𑐳𑐎𑑂𑐰, 𑐏𑐵𑐳𑑂𑐟𑐶 𑐁𑐡𑐶 𑐠𑐵𑐳𑐫𑑂 𑐔𑑂𑐰𑑄𑐥𑐶𑑄 𑐣𑐾𑐰𑐵𑑅 𑐧𑑁𑐡𑑂𑐢𑐩𑐵𑐬𑑂‍𑐐𑐷𑐟𑐫𑑂𑐳𑑄 𑐐𑐸𑑄𑐮𑐵𑐫𑐵 𑐂𑐮𑐫𑑂 𑐢𑐵𑑅𑐧𑐵𑐖𑑄 𑐠𑐵𑐫𑐾𑐐𑐸 𑐫𑐵𑑅 𑑋

𑐠𑑂𑐰 𑐢𑐵𑑅𑐧𑐵𑐖𑑄 𑐐𑐸𑑄𑐮𑐵𑐫𑐵 𑐂𑐮𑐫𑑂 𑐖𑐎 𑐩𑐏𑐳𑐾 𑐡𑐶𑐥𑑄𑐎𑐬 𑐟𑐠𑐵𑐐𑐟𑐫𑐵 𑐕𑐸𑑄 𑐖𑑂𑐫𑐵𑐗𑑂𑐰𑑅 𑐖𑐸𑐂𑐧𑐮𑐫𑑂, 𑐧𑐸𑐡𑑂𑐢𑐫𑐵 𑐥𑐰𑐶𑐟𑑂𑐬 𑐀𑐳𑑂𑐠𑐶𑐢𑐵𑐟𑐸 𑐫𑐵𑐟𑑂𑐬𑐵, 𑐤𑐹𑐡𑑃, 𑐧𑐴𑐵𑑅 𑐥𑐸𑐖𑐵 𑐁𑐡𑐶 𑐖𑑂𑐫𑐵𑐗𑑂𑐰𑑅 𑐖𑐸𑐂𑐐𑐸 𑐂𑐮𑐫𑑂 𑐣𑑄 𑐠𑐵𑐫𑐾𑐐𑐸 𑐫𑐵𑑅 𑑋 𑐠𑐣 𑐔𑑂𑐰𑐫𑑂 𑐤𑑂𑐫𑐠𑐣𑐵𑐐𑐸 𑐧𑐵𑐖𑑄𑐫𑐵 𑐧𑑀𑐮 𑐡𑑂𑐫𑑅 𑐯𑐵𑐫𑐾𑐐𑐸 𑐏𑑅 𑑋 𑐐𑐸𑑄𑐮𑐵 𑐧𑐵𑐖𑑄 𑐠𑐵𑐂𑐐𑐸 𑐡𑐎𑑂𑐰𑑄 𑐠𑐵𑐳𑐫𑑂 𑐀𑐥𑑂𑐰𑑅𑐠𑐾𑑄 𑐠𑑂𑐰 𑐴𑐾 𑐧𑑀𑐮𑐫𑑂 𑐡𑑂𑐫𑑅𑐯𑐵𑐫𑐾𑐐𑐸 𑐫𑐵𑐂 𑑋 𑐠𑐸𑐎𑐷 𑐕𑐸𑑄 𑐕𑐸𑑄 𑐧𑑀𑐮 𑐥𑐵𑑅 𑑋

𑐢𑐵𑑅 𑐧𑐵𑐖𑐣𑐫𑑂 𑐠𑐵𑐂𑐐𑐸 𑐩𑐾𑐩𑐾𑐐𑐸 𑐟𑐵𑐮𑐫𑑂 𑐔𑑂𑐰𑑅, 𑐮𑑄𑐟𑐵𑑅, 𑐥𑐮𑐾𑐩𑐵𑑄, 𑐀𑐳𑑂𑐟𑐬𑐵, 𑐐𑑂𑐬𑐴, 𑐐𑑂𑐰𑐵𑐬𑐵 𑐁𑐡𑐶 𑐏𑑅 𑑋 𑐠𑐸𑐎𑐷 𑐩𑐢𑑂𑐫𑐾 𑐧𑐵𑐖𑑄 𑐠𑐵𑐂𑐥𑐶𑑄𑐳𑑄 𑐡𑑂𑐫𑑅 𑐯𑐵𑐫𑐾𑐐𑐸 𑐰 𑐔𑑂𑐰𑑅 𑐡𑐎𑐮𑐫𑑂 𑐀𑑅𑐥𑐸 𑐟𑐵𑐫𑐾𑐎𑐷, 𑐀𑐮𑐾 𑐐𑑂𑐰𑐵𑐬𑐵, 𑐀𑐳𑑂𑐟𑐬𑐵, 𑐥𑐮𑐾𑐩𑐵𑑄 𑐁𑐡𑐶 𑐟𑐵𑐮 𑐠𑐵𑐎𑐸 𑐢𑐵𑐂 𑑋 𑐟𑐬 𑐠𑐵𑐠𑐵𑑄 𑐰𑐣𑐾𑐧𑐮𑐫𑑂 𑐰 𑐳𑐫𑐾𑐎𑐾𑐐𑐸 𑐎𑐸𑐟𑑅 𑐫𑐵𑐟 𑐢𑐵𑑅𑐳𑐵 𑐀𑐥𑐵𑐫𑑂𑐳𑐎𑑄 𑐠𑐵𑐎𑐸 𑐩𑐖𑐹 𑑋
𑐐𑐸𑐐𑐸𑑄 𑐂𑐮𑐫𑑂 𑐩𑐶𑐖𑑄𑐟𑐫𑑂𑐳𑑄 𑐖𑐎 𑐠𑐵𑐫𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐠𑑂𑐰 𑐢𑐵𑑅 𑐧𑐵𑐖𑑄 𑐰𑐵 𑐐𑐸𑑄𑐮𑐵 𑐧𑐵𑐖𑐣𑐫𑑂 𑐠𑑁𑑄𑐎𑐤𑐫𑑂 𑐤𑐹 𑐥𑐸𑐳𑑂𑐟𑐵 𑐄𑐎𑐶𑐳𑐣𑑄 𑐩𑐶𑐳𑐵𑐟𑐫𑑂 𑐣𑑄 𑐁𑐎𑐬𑑂‍𑐲𑐞 𑐀𑐥𑑂𑐰𑐫𑐵 𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑁𑑄𑐫𑐵 𑐤𑐹 𑐥𑐸𑐳𑑂𑐟𑐵 𑐗𑐷𑐐𑐸 𑐨𑐵𑐲𑐵, 𑐎𑐮𑐵, 𑐳𑑄𑐳𑑂𑐎𑐺𑐟𑐶𑐥𑐵𑐏𑐾𑑄 𑐟𑐵𑐥𑐵𑐣𑐵𑑅 𑐥𑐵𑐱𑑂𑐔𑐵𑐟𑑂𑐫 𑐳𑑄𑐳𑑂𑐎𑐺𑐟𑐶𑐂 𑐀𑐥𑑂𑐰𑑅 𑐢𑐾𑐔𑐸𑐫𑐵 𑐰𑐣𑐵𑐔𑑂𑐰𑐣 𑐢𑐎𑐵𑑅 𑐢𑐫𑐵 𑐰𑐫𑐵𑐔𑑂𑐰𑑄𑐐𑐸 𑐂𑐮𑐫𑑂 𑐐𑐸𑑄𑐮𑐵 𑐧𑐵𑐖𑐣𑐫𑑂 𑐤𑐹 𑐥𑐸𑐳𑑂𑐟𑐵𑐫𑐵 𑐀𑐥𑑂𑐰𑐫𑐵 𑐰𑐣𑐵𑐔𑑂𑐰𑑄𑐐𑐸 𑐁𑐎𑐬𑑂‍𑐲𑐞 𑐳𑑂𑐰𑐫𑐾𑐧𑐮𑐫𑑂 𑐠𑑂𑐰 𑐏𑑃 𑐳𑐟𑑂𑐫 𑐩𑐏𑐸 𑐢𑐵𑐫𑐾𑐕𑐶𑑄 𑑋

𑐠𑑁𑑄𑐎𑐤𑐫𑑂 𑑑𑑒 𑐐𑐹 𑐟𑐐𑐶𑑄 𑐳𑐶𑐢𑐫𑐾𑐎𑐵𑑅 𑐔𑑂𑐰𑐣𑐵𑐔𑑂𑐰𑑄𑐪 𑐩𑑂𑐫𑐵𑐣𑐾𑐖𑐩𑐾𑐣𑑂𑐚𑐫𑐵 𑐰𑐶𑐡𑑂𑐫𑐵𑐬𑑂‍𑐠𑐷 𑐥𑐮𑑂𑐥𑐳𑐵 𑐱𑐵𑐎𑑂𑐫𑑄 (𑐎𑐾𑐱𑐔𑐣𑑂𑐡𑑂𑐬 𑐐𑐸𑑄𑐮𑐵𑑅 𑐧𑐵𑐖𑑄) 𑐢𑐵𑑅𑐧𑐵𑐖𑑄 𑐠𑐵𑐫𑐾 𑐳𑐫𑐾𑐎𑐵𑐡𑐷𑐐𑐸 𑐮𑐕𑐶 𑐖𑐎 𑐡𑐟 𑑋 𑐠𑑂𑐰 𑐮𑐕𑐶𑐫𑐵 𑐀𑐰𑐢𑐶 𑐡𑐸𑐣𑐾 𑐥𑐮𑑂𑐥𑐳𑐵𑑄 𑐥𑑂𑐫𑑄𑐐𑐹 𑐟𑐵𑐮 𑐳𑐫𑐾𑐎𑐵𑐡𑐷 𑐢𑐸𑑄𑐎𑐹𑐐𑐸 𑐡𑐸 𑑋 ‘𑐡𑐎𑐮𑐫𑑂 𑐤𑐵𑐥𑐵𑑄 𑐧𑐵𑐖𑑄 𑐎𑐸𑐧𑐶𑐫𑐵𑑅 𑐀𑐨𑑂𑐫𑐵𑐳 𑐫𑐵𑐣𑐵𑐧𑐮𑐫𑑂 𑐠𑐵𑐎𑐸 𑐔𑐵𑑅𑐐𑐸 𑐏𑑅, 𑐁𑑅 𑐮𑐵 𑐧𑐵𑐣𑐶 𑐠𑐾𑑄 𑐖𑐸𑐂𑐢𑐸𑑄𑐎𑐮’ 𑐢𑐫𑐵𑐡𑐷𑐪 𑐥𑐮𑑂𑐥𑐳𑐵𑑄 𑐩𑐔𑐵𑑄𑐣𑐶𑐳𑐾𑑄 𑐴𑐾 𑐩𑐾𑐥𑐶𑑄𑐳𑑄 𑐧𑐵𑐖𑑄 𑐠𑐵𑑅𑐐𑐸 𑐳𑑂𑐰𑐳𑑂𑐰𑑄 𑐂𑐔𑑂𑐕𑐵 𑐖𑐸𑐫𑐵𑑅 𑐧𑐵𑐖𑑄 𑐠𑐵𑐫𑐾 𑐳𑐫𑐾𑐎𑐵𑐐𑐸 𑐎𑐣𑐵𑐡𑐶𑐮 𑑋
𑐐𑐸𑑄𑐮𑐵𑑄 𑐳𑑂𑐰𑐫𑐩𑑂𑐨𑐹𑐂 𑐰𑐫𑐾𑐧𑐮𑐫𑑂 𑐩𑐾𑐥𑐶𑑄𑐳𑑄 𑐠𑐵𑐣𑐵𑐔𑑂𑐰𑑄𑐐𑐸 𑐏𑐣𑐵𑑅 𑐀𑑅𑐥𑐸 𑐖𑐸𑐂, 𑐀𑐮𑐾 𑐠𑐵𑐫𑐾𑐧𑐮𑐫𑑂 𑐣𑑄 𑐤𑑂𑐫𑐂𑐥𑐸𑐳𑐾 𑐔𑑂𑐰𑐣𑐷𑐐𑐸 𑐟𑐵𑐫𑐾𑐎𑐵𑑅 𑐳𑐫𑐾𑐎𑐵𑐡𑐷𑐪 𑐰𑐫𑑂𑐎𑐮𑑄 𑐧𑐵𑐖𑑄𑐫𑐵 𑐡𑐎𑑂𑐰𑑄 𑐧𑑀𑐮 𑐎𑐵𑐥𑐷 𑐔𑑂𑐰𑐫𑐵𑐟𑐫𑐵𑐐𑐸𑐮𑐶𑑄 𑐮𑐸𑐩𑑄𑐎𑐾𑐟 𑐀𑑅𑐥𑐸𑐐𑐸 𑐢𑐫𑐵𑐡𑐷 𑑋

𑐠𑐸𑐎𑐠𑑄 𑐴𑐾 𑐥𑑂𑐬𑐎𑐺𑐟𑐶 𑐩𑐵𑐣𑐣𑑂𑐢𑐬𑑄 (𑐠𑑃𑐴𑐶𑐟𑐶 𑐩𑐵𑐣𑐣𑑂𑐢𑐬 𑐐𑐸𑐠𑐶)𑐣𑑄 𑐮𑐕𑐶𑐫𑐵 𑐡𑐸𑐣𑐾 𑐴𑐾 𑐢𑐵𑑅𑐧𑐵𑐖𑑄 𑐠𑐵𑐫𑐾 𑐳𑐫𑐾𑐎𑐵𑐡𑐷𑐐𑐸 𑐏𑑅 𑑋 𑐡𑑂𑐫𑑅𑐯𑐵𑐫𑐾𑐐𑐸, 𑐔𑑂𑐰𑑅, 𑐮𑑄𑐟𑐵𑑅 𑐠𑐾𑑄𑐖𑑂𑐫𑐵𑑅𑐐𑐸 𑐟𑐵𑐮 𑐳𑐫𑐾𑐎𑐵𑐡𑐷 𑐢𑐸𑑄𑐎𑐹𑐪 𑐰𑐫𑑂𑐎𑐮𑑄 𑐩𑐾𑐩𑐾𑐐𑐸 𑐟𑐵𑐮 𑐣𑑄 𑐳𑐫𑐾𑐎𑐾𑐐𑐸 𑐂𑐔𑑂𑐕𑐵 𑐡𑐸𑐐𑐸 𑐎𑐣𑐵𑐡𑐶𑐮 𑑋 𑐱𑐸𑐬𑐸 𑐱𑐸𑐬𑐸𑐂 𑐟𑐳𑐎𑑄 𑐀𑐮𑐩𑐮 𑐖𑐹𑐳𑐵𑑄 𑐁𑑅 𑐢𑐵𑑅𑐳𑐵 𑐤𑑂𑐫𑐂𑐥𑐸𑐳𑐾 𑐔𑑂𑐰𑑄𑐐𑐸 𑐢𑐫𑐵𑐡𑐶𑐮 𑑋
𑐠𑑃𑐴𑐶𑐟𑐶𑐫𑐵 𑐴𑐾 𑐥𑐮𑑂𑐥𑐳𑐵 𑐩𑐵𑐣𑐣𑑂𑐢𑐬𑑄 𑐧𑐵𑐳𑐸𑐬𑐶 𑐥𑐸𑐂𑐐𑐸 𑐰 𑐢𑐵𑑅𑐧𑐵𑐖𑑄 𑐠𑐵𑐫𑐾𑐐𑐸 𑐳𑐫𑐾𑐎𑐵𑐡𑐷𑐐𑐸 𑐡𑐸 𑑋 ‘𑐢𑐵𑑅𑐧𑐵𑐖𑑄 𑐠𑐵𑐫𑐾𑐐𑐸 𑐳𑑂𑐰𑐫𑐵𑑄 𑐧𑐵𑐳𑐸𑐬𑐶 𑐥𑐸𑐂 𑐀𑑅𑐥𑐸’ 𑐢𑐫𑐵𑐡𑐷𑐪 𑐥𑐮𑑂𑐥𑐳𑐵𑑄 𑐧𑐵𑐖𑑄 𑐳𑐫𑐾𑐎𑐾𑐐𑐸 𑐟𑑂𑐰𑑅𑐟𑐾𑐩𑐏𑐸 𑐢𑐫𑐵𑐡𑐷 𑑋

𑐴𑐸𑐮𑐵𑐥𑑂𑐫𑐵𑐏𑐣𑐫𑑂 𑐠𑑅𑐐𑐸 𑐧𑐶𑐳𑑂𑐎𑑄 𑐥𑑂𑐬𑐟𑐶𑐨𑐵 𑐤𑑂𑐫𑐧𑑂𑐰𑐫𑐵𑑅 𑐁𑐥𑐵𑐮𑑄 𑐳𑐶𑐬𑐥𑐵𑑅 𑐟𑑂𑐫𑐵𑐎𑐵𑐡𑐷 𑐢𑐸𑑄𑐎𑐹𑐪 𑐁𑐬𑑂‍𑐳𑐶𑐫𑐵 𑐩𑐵𑐣𑐣𑑂𑐢𑐬𑑄 (𑐠𑑃𑐴𑐶𑐟𑐶)𑐣𑑄 𑐦𑐸𑐬𑑂‍𑐳𑐡𑐫𑐵 𑐃𑐫𑐵𑐟 𑐳𑐡𑐸𑐥𑐫𑑀𑐐 𑐫𑐵𑐫𑐾𑐎𑐠𑑄 𑐢𑐵𑑅𑐧𑐵𑐖𑑄 𑐠𑐵𑐫𑐾𑐐𑐸 𑐳𑐫𑐾𑐎𑐵𑐡𑐷𑐐𑐸 𑐏𑑅 𑑋 𑐰𑐫𑑂𑐎𑐮𑑄 𑐣𑐶𑐡𑑃 𑐤𑑂𑐫𑐰𑑄𑐣𑐶𑐳𑐾𑑄 𑐢𑐵𑑅 𑐠𑐵𑐫𑐾𑐐𑐸 𑐳𑐫𑐾𑐎𑐵𑐡𑐷𑐐𑐸 𑐏𑑅 𑑋

𑐠𑑁𑑄𑐫𑐵 𑐤𑐹 𑐥𑐸𑐳𑑂𑐟𑐵𑑄 𑐢𑐵𑑅𑐧𑐵𑐖𑑄 𑐠𑐵𑐫𑐾𑐐𑐸 𑐳𑐫𑐾𑐎𑐾𑐐𑐸 𑐖𑐎 𑐩𑐏𑐸, 𑐠𑐪𑑄 𑐳𑑅𑐐𑐸 𑐩𑐾𑐥𑐶𑑄𑐟 𑐣𑑄 𑐳𑑂𑐫𑐣𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑃𑐴𑐶𑐟𑐶𑐫𑐵 𑐴𑐾 𑐳𑐸𑐧𑐶𑐎 𑐩𑐵𑐣𑐣𑑂𑐢𑐬𑑄 𑑖–𑑗 𑐡𑑃 𑐤𑑂𑐫𑑅 𑐧𑐵𑐖𑑄 𑐠𑐵𑐫𑐾 𑐳𑐫𑐾𑐎𑐵𑑅 𑐠𑑁𑑄𑐎𑐤𑐫𑑂 𑐠𑑅 𑐥𑐵𑐳𑐵𑐥𑐶𑑄𑐟 𑐳𑑂𑐫𑐣𑐾𑐐𑐸 𑐫𑐵𑐣𑐵𑐔𑑂𑐰𑐣𑐵𑐡𑐷𑐐𑐸 𑐡𑐸 𑑋 𑐰𑑄𑐐𑐸 𑐳𑑂𑐰𑐡𑑃 𑐤𑑂𑐫𑐰𑑄𑐣𑐶𑐳𑐾𑑄 𑐥𑐵𑐳𑐵𑐥𑐶𑑄 𑐰 𑐤𑐹𑐥𑐶𑑄𑐟 𑐧𑐵𑐖𑑄 𑐠𑐵𑐫𑐾𑐐𑐸 𑐳𑑂𑐫𑐣𑐵 𑐰𑐫𑐵𑐔𑑂𑐰𑐣𑐵𑐡𑐷𑐪 𑐰𑐫𑑂𑐎𑑅 𑐠𑑅 𑐴𑐾 𑐥𑑂𑐫𑑄𑐐𑐹 𑐐𑑂𑐰𑐵𑐬𑐵 𑐠𑐵𑐫𑐾 𑐳𑑅𑐳𑐵 𑐣𑐵𑐫𑑂𑐏𑐶𑑄𑐔𑐵𑐫𑑂 𑐣𑑄 𑐄𑐮𑐶 𑐴𑐾 𑐥𑑀𑐏𑑂𑐟 𑐖𑐸𑐫𑐵𑐡𑐷 𑑋

𑐕𑐐𑐹 𑐢𑐵𑐥𑐹 𑐡𑐸, ‘𑐐𑐸𑐬𑐸 𑐖𑐸𑐂 𑐀𑑅𑐥𑐸, 𑐔𑐾𑐮𑐵 𑐖𑐸𑐂 𑐠𑐵𑐎𑐸’ 𑐟𑐬 𑐳𑐸𑐧𑐶𑐎𑐫𑐵 𑐳𑐣𑑂𑐡𑐬𑑂‍𑐨𑐫𑑂 𑐢𑐵𑑅𑐳𑐵 𑐠𑑂𑐰 𑐢𑐵𑐥𑐹 𑐀𑑅𑐏𑑅 𑑋 𑐰𑐫𑑂𑐎𑐮𑑄 𑐢𑐫𑐵𑐡𑐷 ‘𑐠𑐪𑑄 𑐳𑐫𑐾𑐎𑐾𑐐𑐸 𑐳𑑂𑐰𑐫𑐵𑑄 𑐣𑑄 𑐩𑐾𑐥𑐶𑑄𑐟 𑐳𑑂𑐫𑐣𑐾 𑐟𑐳𑐎𑑄 𑐠𑐵𑐎𑐸 𑑋’

𑐠𑐸𑐎𑐠𑑄 𑐆𑐟𑐶 𑐟𑐸𑐮𑐵𑐢𑐬𑑄 (𑐣𑑂𑐫𑐟 𑐐𑐸𑑄𑐮𑐵𑐧𑐵𑐖𑑄 𑐏𑐮𑑅) 𑐢𑐵𑑅𑐧𑐵𑐖𑑄 𑐠𑐵𑐫𑐾𑐐𑐸 𑐳𑐫𑐾𑐎𑐵𑐡𑐷𑐐𑐸 𑐡𑐕𑐶 𑐤𑑂𑐫𑑅 𑐖𑐎 𑐏𑑅 𑑋 𑐩𑑂𑐫𑐵𑐣𑐾𑐖𑐩𑐾𑐣𑑂𑐚𑐫𑐵 𑐰𑐶𑐡𑑂𑐫𑐵𑐬𑑂‍𑐠𑐷 𑐆𑐟𑐶𑑄 𑐣𑑄 𑐮𑐕𑐶𑐫𑐵 𑐡𑐸𑐣𑐾 𑐴𑐾 𑐡𑑂𑐫𑑅𑐯𑐵𑐫𑐾𑐐𑐸, 𑐔𑑂𑐰𑑅 𑐰 𑐖𑐟𑐶 𑐠𑐵𑐫𑐾𑐐𑐸 𑐳𑐫𑐾𑐎𑐵𑐡𑐷𑐐𑐸 𑐡𑐸 𑑋 𑐰𑐫𑑂𑐎𑐮𑑄 𑐠𑑅𑐟 𑐔𑑂𑐰𑑅 𑐠𑐵𑐫𑐾 𑐀𑑅𑐥𑐸𑐳𑐵 𑐖𑐟𑐶 𑐠𑐵𑐫𑐾 𑐟𑐳𑐎𑑄 𑐠𑐵𑐎𑐸 𑐢𑐫𑐵𑐡𑐷 𑑋
𑐤𑐹 𑐥𑐸𑐳𑑂𑐟𑐵 𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶𑐥𑐵𑐏𑐾𑑄 𑐟𑐵𑐥𑐵𑐣𑐵 𑐰𑐣 𑐢𑐫𑐵𑐔𑑂𑐰𑑄𑐐𑐸 𑐂𑐮𑐫𑑂 𑐠𑐸𑐥𑐶𑑄 𑐠𑐾𑑄𑐖𑑂𑐫𑐵𑑅𑐥𑐶𑑄 𑐳𑑄𑐳𑑂𑐎𑐺𑐟𑐶𑐥𑐵𑐏𑐾 𑐣𑐸𑐐𑑅 𑐎𑑂𑐰𑐳𑐵𑐫𑐾𑐎𑐵𑑅 𑐰𑐫𑐵𑐔𑑂𑐰𑑄𑐐𑐸 𑐏𑑃𑐫𑑂 𑐕𑐵𑐫𑑂 𑐧𑐵𑐖𑑄 𑐠𑐵𑐫𑐾 𑐳𑐫𑐾𑐎𑐵𑐐𑐸 𑐢𑐂𑐐𑐸 𑐤𑑂𑐫𑐳𑑅𑐫𑐵 𑐮𑐶𑐳𑐮𑐫𑑂 𑐆𑐟𑐶𑑄 𑐢𑐫𑐵𑐡𑐷, ‘𑐗𑐷𑐐𑐸 𑐣𑐾𑐰𑐵𑑅 𑐳𑐩𑐵𑐖𑐫𑑂 𑐩𑐶𑐳𑐵𑐟 𑐟𑐳𑐎𑑄 𑐮𑐶𑐄𑐣𑐾 𑐮𑐵𑑅, 𑐠𑐸𑐎𑐶𑐫𑐵 𑐎𑐵𑐬𑐞 𑐣𑑄 𑐗𑐷𑐐𑐸 𑐳𑐩𑐵𑐖 𑐴𑐾 𑐏𑑅 𑑋 𑐩𑐶𑐳𑐵𑐟𑐫𑑂𑐟 𑐄𑐮𑐶 𑐠𑐵𑐫𑑂 𑐧𑐶𑐫𑐵𑐟𑑅𑐐𑐸 𑐩𑐡𑐸 𑑋’

‘𑐣𑐾𑐰𑐵𑑅 𑐳𑐩𑐵𑐖𑐫𑑂 𑐪𑑂𑐫𑐵𑐫𑑂𑐩𑐔𑐵 𑐰𑐵 𑐩𑐶𑐳𑐵𑐩𑐔𑐵𑐫𑐵𑐟 𑐐𑐧𑐮𑐾𑑄 𑐣𑑄 𑐧𑐵𑐖𑑄 𑐳𑑂𑐫𑐣𑐾𑐐𑐸 𑐔𑐮𑐣 𑐢𑐂𑐐𑐸 𑐴𑐾 𑐩𑐡𑐸 𑑋 𑐂𑐩𑐶𑐟 𑐤𑑂𑐫𑐵𑐧𑐮𑐾𑑄 𑐳𑑄𑐎𑐸𑐔𑐶𑐟 𑐫𑐵𑐣𑐵 𑐟𑐫𑐾𑐐𑐸 𑐳𑑂𑐰𑐂’ 𑐆𑐟𑐶𑑄 𑐢𑐫𑐵𑐡𑐷, ‘𑐳𑑄𑐳𑑂𑐎𑐺𑐟𑐶 𑐳𑑄𑐬𑐎𑑂𑐲𑐞 𑐫𑐵𑐫𑐾𑐐𑐸 𑐏𑑅𑐳𑐵 𑐩𑐶𑐳𑐵𑐟𑐫𑑂𑐟 𑐣𑑄 𑐤𑑂𑐫𑑅𑐣𑐾 𑐰𑐫𑐾𑐐𑐸 𑐀𑐰𑐳𑐬 𑐧𑐷𑐩𑐵𑑅 𑑋 𑐠𑐸𑐎𑐶𑐫𑐵 𑐣𑐶𑑄𑐟𑐶𑑄 𑐖𑐣𑐔𑐾𑐟𑐣𑐵 𑐠𑐣𑐾𑐩𑐵𑑅𑐐𑐸 𑐁𑐰𑐱𑑂𑐫𑐎 𑐖𑐹 𑑋’
𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶𑐫𑐵 𑐮𑑂𑐫𑑄𑐎𑐵 𑐟𑐫𑐾𑐐𑐸 𑐰𑐵 𑐄𑐎𑐶𑐫𑐵𑐟 𑐔𑑂𑐰𑐤𑑂𑐫𑐵𑐎𑐵 𑐫𑑄𑐎𑐾𑐐𑐸 𑐏𑑅𑐳𑐵 𑐮𑑂𑐫𑐵𑐫𑑂𑐪 𑐥𑐸𑐳𑑂𑐟𑐵 𑐱𑐎𑑂𑐟𑐶𑐫𑐵 𑐬𑐸𑐥𑐫𑑂 𑐤𑑂𑐫𑑅𑐣𑐾 𑐰𑐫𑐾𑐦𑐸, 𑐄𑐎𑐶𑐫𑐵𑐟 𑐄𑐔𑐶𑐟 𑐬𑐸𑐥𑑄 𑐕𑑂𑐫𑐮𑐾𑐐𑐸 𑐳𑑂𑐰𑐫𑐾𑐩𑐵𑑅 𑐢𑐫𑐵𑐡𑐷𑐪 𑐆𑐟𑐶 𑐢𑐵𑑅𑐧𑐵𑐖𑑄 𑐖𑐎 𑐩𑐏𑐸 𑐎𑐷–𑐧𑑀𑐬𑑂‍𑐜, 𑐳𑐶𑐟𑐵𑐬 𑐠𑐾𑑄𑐖𑑂𑐫𑐵𑑅𑐐𑐸 𑐟𑐵𑐮 𑐩𑐶𑐮𑐾 𑐫𑐵𑐫𑐾𑐟 𑐁𑐰𑐱𑑂𑐫𑐎 𑐬𑐶𑐡𑐩 𑐧𑐵𑐖𑑄 𑐣𑑄 𑐠𑐵𑐫𑐾𑐳𑑅 𑑋

𑐣𑑂𑐫𑐟 𑐐𑐸𑑄𑐮𑐵 𑐧𑐵𑐖𑑄𑐫𑐵 𑐴𑐾 𑐳𑐴𑐳𑑂𑐬𑐬𑐟𑑂𑐣 𑐟𑐸𑐮𑐵𑐢𑐬𑑄 𑐧𑐵𑐖𑑄 𑐠𑐵𑐫𑐾 𑐳𑐫𑐾𑐎𑐵𑐡𑐷𑐐𑐸 𑑔 𑐡𑑃 𑐡𑐫𑐾𑐢𑐸𑑄𑐎𑐮 𑑋 𑐕𑐵𑐫𑑂 𑐧𑐵𑐖𑑄 𑐳𑐫𑐾𑐎𑐵𑐐𑐸 𑐢𑐂𑐐𑐸 𑐤𑑂𑐫𑐳𑐮𑐫𑑂 ‘𑐩𑐾𑐩𑐾𑐥𑐶𑑄𑐳𑑄 𑐧𑐵𑐖𑑄 𑐠𑐵𑐣𑐵 𑐰𑐂𑐧𑐮𑐫𑑂 𑐠𑑅𑐟 𑐟𑐳𑐎𑑄 𑐪𑐵𑐂𑐥𑐸𑐳𑐾 𑐔𑑂𑐰𑐣𑐷, 𑐩𑐾𑐥𑐶𑑄𑐳𑑄 𑐠𑐵𑑅𑐐𑐸 𑐳𑑂𑐰𑐫𑐵𑐔𑑂𑐰𑐣𑐾𑐧𑐮𑐫𑑂 𑐠𑐪𑑄 𑐣𑑄 𑐠𑐵𑐫𑐾 𑐡𑐸𑐳𑐵 𑐖𑐶𑐄 𑐢𑐂𑐐𑐸 𑐩𑐟𑐷 𑐰𑐫𑐵𑐔𑑂𑐰𑐣𑐷𑐐𑐸, 𑐄𑐎𑐶𑑄 𑐧𑐵𑐖𑑄 𑐳𑐫𑐾𑐎𑐵𑐐𑐸 𑐏𑑅’ 𑐢𑐫𑐵𑐡𑐷 𑑋 𑐱𑐸𑐬𑐸 𑐱𑐸𑐬𑐸𑑄 𑐧𑐵𑐖𑑄 𑐠𑐵𑐫𑐾𑐧𑐮𑐫𑑂 𑐯𑐵𑑅 𑐩𑐰𑑄𑐐𑐸𑐮𑐶𑑄 𑐳𑐫𑐾𑐎𑐾𑐟 𑐴𑐾 𑐠𑐵𑐎𑐸 𑐢𑐫𑐵𑐡𑐷𑐪 𑐳𑐴𑐳𑑂𑐬𑐫𑐵𑐟 𑐧𑐵𑑄𑐮𑐵𑐎 𑐠𑐵𑐫𑐾 𑐩𑐳𑑅𑐟𑐮𑐾 𑐟𑐳𑐎𑑄 𑐩𑐕𑐶𑑄 𑐟𑐵𑐂𑐐𑐸 𑐏𑑅 𑑋 𑐁𑑅 𑐢𑐵𑑅𑐳𑐵 𑐠𑑅𑐐𑐸 𑐩𑑁𑐮𑐶𑐎 𑐧𑐵𑐖𑑄 𑐠𑐵𑐫𑐾 𑐳𑐫𑐾𑐎𑐾 𑐏𑑄𑐐𑐸𑐮𑐶𑑄 𑐐𑐬𑑂‍𑐰 𑐫𑐵𑐣𑐵𑐡𑐷𑐪 𑐰𑐫𑑂𑐎𑐮𑑄 𑐧𑐵𑐖𑑄 𑐠𑐵𑐫𑐾 𑐳𑑅𑐐𑐸𑐮𑐶𑑄 𑐠𑑅𑐐𑐸 𑐟𑑂𑐰𑐵𑑅𑐫𑐵 𑐣𑐵𑑄 𑐩𑐾𑐥𑐶𑐣𑐶 𑐤𑑂𑐫𑑅𑐣𑐾 𑐤𑑂𑐫𑐧𑑂𑐰𑐫𑐾 𑐏𑑄𑐐𑐸𑐮𑐶𑑄 𑐣𑑄 𑐠𑑅𑐟 𑐟𑐳𑐎𑑄 𑐮𑐳𑐟𑐵 𑐰𑐫𑐵𑐔𑑂𑐰𑐣𑐷𑐐𑐸 𑐢𑐫𑐵𑐡𑐷 𑑋

𑐀𑐠𑐾 𑐴𑐾 𑐡𑐕𑐶 𑐤𑑂𑐫𑑅 𑐖𑐎 𑐧𑐵𑐖𑑄 𑐠𑐵𑐫𑐾𑐐𑐸 𑐳𑐫𑐾𑐎𑐵𑐡𑐷𑐪 𑐣𑐶𑐖𑐮𑐵 𑐟𑐸𑐮𑐵𑐢𑐬𑑄 (𑐀𑐳𑑄 𑐧𑐵𑐖𑑄 𑐐𑐸𑐠𑐶) 𑐣𑑂𑐫𑐵𑐐𑐹 𑐟𑐵𑐮𑐫𑑂 𑐢𑐵𑑅𑐧𑐵𑐖𑑄 𑐳𑐫𑐾𑐎𑐵𑐡𑐷 𑐢𑐸𑑄𑐎𑐹𑐐𑐸 𑐡𑐸 𑑋 𑐩𑐾𑐩𑐾𑐐𑐸 𑐟𑐵𑐮𑐫𑐵 𑐧𑐵𑐖𑑄 𑐣𑐶𑐤𑐸–𑐳𑑂𑐰𑐤𑐸𑐫𑐵 𑐡𑐸𑐣𑐾 𑐳𑐫𑐾𑐎𑐵𑐡𑐷𑐪 𑐣𑐶𑐖𑐮𑐵𑐫𑐵𑐟 𑐡𑐎𑐮𑐫𑑂 𑐠𑐵𑐎𑐹𑐐𑐸 𑐢𑐵𑑅𑐳𑐵 𑐥𑑂𑐬𑐟𑐵𑐮 𑐏𑑅 𑑋 𑐀𑐫𑑂𑐣𑑄 𑐕𑐰𑐵𑑅𑐟𑐎 𑐩𑐾𑐴𑐣𑐟 𑐫𑐵𑐣𑐵𑑅 𑐰𑐫𑑂𑐎𑐮𑑄 𑐥𑑂𑐬𑐟𑐵𑐮 𑐣𑑄 𑐳𑐫𑐾𑐎𑐵𑐡𑐷𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐰𑐫𑑂𑐎𑐮𑑄 𑐩𑐔𑐵𑑄𑐣𑐶𑐳𑐾𑑄 𑐐𑐸𑑄𑐮𑐵𑐧𑐮𑐫𑑂 𑐳𑑂𑐰𑐫𑐩𑑂𑐨𑐹𑐂 𑐰𑐫𑐵𑐔𑑂𑐰𑐣𑐾𑐐𑐸 𑐰 𑐩𑐾𑐩𑐾𑐥𑐶𑑄𑐳𑑄 𑐠𑐵𑐣𑐵𑐔𑑂𑐰𑑄𑐐𑐸 𑐏𑐣𑐷𑐐𑐸𑐮𑐶𑑄 𑐳𑐫𑐾𑐎𑐾𑐐𑐸 𑐂𑐔𑑂𑐕𑐵 𑐡𑐸𑐐𑐸𑐮𑐶𑑄 𑐠𑐪 𑐣𑑄 𑐧𑐵𑐖𑑄 𑐠𑐵𑐫𑐾 𑐳𑐫𑐾𑐎𑐵𑐐𑐸 𑐢𑐫𑐵𑐡𑐷 𑑋 𑐧𑐵𑐖𑑄 𑐠𑐵𑐫𑐾 𑐳𑑅𑐐𑐸𑐮𑐶𑑄 𑐁𑑅 𑐠𑑅𑐟 𑐟𑐳𑐎𑑄 𑐐𑐬𑑂‍𑐰𑐫𑐵 𑐩𑐴𑐳𑐸𑐳 𑐖𑐹𑐐𑐸 𑐰 𑐠𑐸𑐎𑐶𑑄 𑐗𑐷𑐐𑐸 𑐳𑑄𑐳𑑂𑐎𑐺𑐟𑐶𑐫𑐵𑐟 𑐳𑑄𑐬𑐎𑑂𑐲𑐞 𑐫𑐵𑐫𑐾𑐐𑐸 𑐖𑑂𑐫𑐵𑐫𑑂 𑐕𑐸𑑄 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐟 𑐳𑐦𑐮 𑐖𑐹𑐐𑐸 𑐢𑐫𑐵𑐡𑐷 𑐣𑐶𑐖𑐮𑐵𑑄 𑑋

𑐐𑐸𑑄𑐮𑐵𑑄 𑐠𑐵𑐂𑐐𑐸 𑐢𑐵𑑅𑐧𑐵𑐖𑑄𑐫𑐵 𑐳𑐣𑑂𑐡𑐬𑑂‍𑐨𑐫𑑂 𑐤𑐵𑐥𑐵 𑐡𑐎𑑂𑐰 𑐢𑐂𑐠𑐾𑑄 𑐐𑐸𑑄𑐮𑐵 𑐧𑐵𑐖𑑄 𑐏𑐮𑐎𑑄 𑐎𑐣𑐵𑐠 𑐰 𑐚𑑂𑐬𑐩𑑂𑐥𑐾𑐚 𑐥𑐸𑐂𑐎𑐵𑑅 𑐢𑐵𑑅𑐧𑐵𑐖𑑄 𑐠𑐵𑐣𑐵 𑐰𑐂𑐐𑐸 𑐏𑑅𑐳𑐵 𑐠𑑁𑑄𑐎𑐤𑐫𑑂 𑐕𑐸𑑄 𑐕𑐸𑑄 𑐐𑐸𑑄𑐮𑐵 𑐧𑐵𑐖𑑄 𑐏𑐮𑐎𑑄 𑐠𑑅 𑐴𑐾 𑐐𑐸𑐠𑐶𑐫𑐵 𑐩𑐳𑑂𑐟𑐫𑑂𑐟 𑐧𑐵𑐳𑐸𑐬𑐶 𑐳𑑂𑐫𑐣𑐵𑑅 𑐧𑐵𑐳𑐸𑐬𑐶 𑐥𑐸𑐫𑐵𑑅 𑐢𑐵𑑅𑐧𑐵𑐖𑑄 𑐠𑐵𑐫𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐸𑐎𑐶𑑄 𑐫𑐵𑐣𑐵𑑅 𑐤𑐹 𑐥𑐸𑐳𑑂𑐟𑐵𑑄 𑐣𑐾𑐰𑐵𑑅 𑐮𑑀𑐎 𑐩𑑂𑐫𑐾𑑃 𑐰 𑐢𑐸𑐣 𑐳𑐫𑐾𑐎𑐾𑐐𑐸 𑐀𑐰𑐳𑐬 𑐣𑑄 𑐎𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐸𑐎𑐠𑑄 𑐳𑑂𑐰𑐫𑐾𑐧𑐮𑐫𑑂 𑐐𑐸𑑄𑐮𑐵 𑐧𑐵𑐖𑐣𑐫𑑂 𑐐𑐸𑐎𑐠𑑄 𑐠𑑁𑑄𑐫𑐵 𑐮𑑂𑐫𑐵𑐫𑑂𑐪 𑐥𑐸𑐳𑑂𑐟𑐵 𑐁𑐎𑐬𑑂‍𑐲𑐶𑐟 𑐖𑐸𑐫𑐵 𑐰𑐣𑐵𑐔𑑂𑐰𑑄𑐐𑐸 𑐡𑐸, 𑐰 𑐢𑐵𑐠𑐾𑑄 𑐕𑐐𑐹 𑐮𑐳𑐟𑐵𑐫𑐵 𑐏𑑃 𑐏𑑅 𑑋

source: https://nepalbhasatimes.com/11008