𑐥𑑂𑐬𑐵𑐡𑐾𑐱𑐶𑐎 𑐨𑐵𑐲𑐵 𑐳𑑄𑐐𑑀𑐲𑑂𑐛𑐶 𑑑𑑒𑑓 𑐩𑐏𑐸 𑑑𑑑𑑔 𑐐𑐹 𑐨𑐵𑐫𑑂

𑐣𑐾𑐥𑐵𑐮𑐫𑑂 𑐠𑑁𑑄𑐎𑐣𑑂𑐴𑐫𑑂 𑐣𑐷𑐐𑐹 𑐨𑐵𑐫𑑂 𑐖𑐎 𑐳𑐸𑐬𑐎𑑂𑐲𑐶𑐟 𑐡𑐸𑐐𑐸 𑐟𑐠𑑂𑐫𑐵𑑄𑐎 𑐰𑐶𑐖𑑂𑐘𑐟𑐫𑑂𑐳𑑄 𑐣𑑂𑐴𑑂𑐫𑐧𑑂𑐰𑑅𑐐𑐸 𑐡𑐸 𑑋 𑐨𑐵𑐲𑐵 𑐁𑐫𑑀𑐐𑑄 𑐰𑑄𑐐𑐸 𑐕𑐸𑑄 𑐡𑐶𑑄 𑐣𑑂𑐴𑑂𑐫𑑅 𑐎𑐵𑐨𑑂𑐬𑐾𑐥𑐮𑐵𑐘𑑂𑐔𑑀𑐎𑐫𑐵 𑐢𑑁𑐏𑑂𑐫𑐮𑐫𑑂 𑐐𑑂𑐰𑐳𑐵𑑅 𑐐𑑂𑐰𑑅𑐐𑐸 𑐥𑑂𑐬𑐵𑐡𑐾𑐱𑐶𑐎 𑐳𑑄𑐐𑑀𑐲𑑂𑐛𑐶𑐂 𑐨𑐵𑐲𑐵𑐰𑐶𑐖𑑂𑐘 𑐮𑐶𑐳𑐾𑑄 𑐁𑐫𑑀𑐐𑐫𑐵 𑐰𑐶𑐖𑑂𑐘 𑐳𑐩𑐹𑐴𑐫𑐵 𑐳𑑄𑐫𑑀𑐖𑐎 𑐥𑑂𑐬𑐵. 𑐜𑐵. 𑐟𑐾𑐖𑐬𑐟𑑂𑐣 𑐎𑑄𑐳𑐵𑐎𑐵𑐬𑑄 𑐀𑐗𑑄 𑑙𑑔 𑐐𑐹 𑐨𑐵𑐫𑑂 𑐀𑐳𑐸𑐬𑐎𑑂𑐲𑐶𑐟 𑐖𑐸𑐫𑐵𑐔𑑂𑐰𑑄𑐐𑐸 𑐢𑐫𑐵𑐡𑐶𑐮 𑑋

𑐎𑑄𑐳𑐵𑐎𑐵𑐬 𑐣𑐾𑐥𑐵𑐮𑐫𑑂 𑑑𑑒𑑓 𑐐𑐹 𑐩𑐏𑐳𑐾 𑑑𑑑𑑔 𑐐𑐹 𑐨𑐵𑐫𑑂 𑐖𑐎 𑐡𑐸𑐐𑐸 𑐣𑑄 𑐡𑐵𑐰𑐷 𑐫𑐵𑐣𑐵𑐡𑐷𑐐𑐸 𑐡𑐸 𑑋 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮, ‘ 𑐕𑐐𑐹 𑐴𑐾 𑐖𑐵𑐟𑐶𑐫𑐵 𑐠𑐷𑐠𑐷 𑐳𑐩𑐹𑐴𑑄 𑐦𑐬𑐎 𑐦𑐬𑐎 𑐨𑐵𑐫𑑂 𑐥𑑂𑐬𑐫𑑀𑐐𑐫𑑂 𑐴𑐫𑐵𑐔𑑂𑐰𑑄𑐐𑐸 𑐡𑐸, 𑐐𑐣𑑄 𑐮𑐵 𑐠𑐵𑐫𑑂 𑐰𑐶𑐱𑐾𑐲𑐟𑐵𑐫𑑂 𑐮𑑂𑐴𑐵𑐂𑐐𑐸 𑐨𑐵𑐫𑑂𑐫𑐵𑐟 𑐣𑑄 𑐐𑐞𑐣𑐵 𑐫𑐵𑐣𑐵𑐟𑑅𑐐𑐸𑐮𑐶𑑄 𑐣𑐾𑐥𑐵𑐮𑐫𑑂 𑐨𑐵𑐫𑑂𑐫𑐵 𑐟𑑅𑐢𑑄𑐐𑐸 𑐴𑐾 𑐳𑑄𑐏𑑂𑐫𑐵 𑐡𑐸𑐐𑐸 𑐎𑑂𑐫𑐣𑐵𑐟𑑅𑐐𑐸 𑐡𑐸 𑑋’ 𑐰𑐫𑑂𑐎𑐮𑑄 𑐣𑐾𑐥𑐵𑐮𑐫𑑂 𑐮𑐶𑐥𑐶𑐰𑐡𑑂𑐢 𑐨𑐵𑐫𑑂 𑐖𑐎 𑐳𑐸𑐬𑐎𑑂𑐲𑐶𑐟 𑐨𑐵𑐫𑑂 𑐩𑐵𑐣𑐾 𑐫𑐵𑐂𑐐𑐸 𑐣𑑄 𑐢𑐫𑐵𑐡𑐶𑐮 𑑋

𑐎𑑄𑐳𑐵𑐎𑐵𑐬𑑄 𑐐𑐸𑑄𑐐𑐹 𑐨𑐵𑐫𑑂 𑐰𑐶𑐡𑐾𑐱𑐷 𑐖𑐹𑐐𑐸 𑐣𑑄 𑐡𑐵𑐰𑐷 𑐫𑐵𑐣𑐵𑐡𑐶𑐮 𑑋 ‘𑐐𑐸𑐐𑐸 𑐨𑐵𑐫𑑂𑐫𑐵 𑐠𑑅𑐐𑐸 𑐴𑐾 𑐮𑐶𑐥𑐶 𑐩𑐡𑐸, 𑐰 𑐀𑐳𑐸𑐬𑐎𑑂𑐲𑐶𑐟 𑐨𑐵𑐫𑑂 𑐏𑑅, 𑐰𑐶𑐡𑐾𑐱𑐷 𑐨𑐵𑐫𑑂 𑐧𑐵𑐴𑐾𑐎𑐫𑐵 𑐨𑐵𑐫𑑂𑐫𑐵𑐟 𑐣𑑄 𑐮𑐶𑐥𑐶𑐰𑐡𑑂𑐢 𑐫𑐵𑐫𑐾 𑐦𑐂’, 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮 𑑋 𑐣𑐾𑐥𑐵𑑅𑐫𑐵 𑐨𑐵𑐫𑑂𑐫𑐵𑐟 𑐗𑐶𑐐𑐹 𑐥𑐸𑐔𑐮𑐫𑑂 𑐰𑐶𑐨𑐵𑐖𑐣 𑐫𑐵𑐣𑐵𑑅 𑐕𑐵𑐣𑐰𑐶𑐣 𑐖𑐸𑐫𑐵𑐔𑑂𑐰𑑄𑐐𑐸 𑐣𑑂𑐴𑑂𑐫𑐠𑐣𑐵𑐡𑐶𑐳𑐾𑑄 𑐎𑑄𑐳𑐵𑐎𑐵𑐬𑑄 𑐣𑐾𑐥𑐵𑐮𑐫𑑂 𑐳𑐸𑐬𑐎𑑂𑐲𑐶𑐟 𑐨𑐵𑐫𑑂 𑐁𑐟𑐎 𑐳𑐬𑐎𑐵𑐬𑐷, 𑐳𑐵𑐴𑐶𑐟𑑂𑐫 𑐰 𑐠𑐷𑐠𑐷 𑐎𑐠𑑄𑐫𑐵 𑐰𑐶𑐢𑐵𑐫𑑂 𑐥𑑂𑐬𑐫𑑀𑐐 𑐖𑐸𑐫𑐵 𑐰𑐫𑐵𑐔𑑂𑐰𑑄𑐐𑐸 𑐢𑐫𑐵𑐡𑐶𑐮 𑑋

𑐥𑑂𑐬𑐡𑐾𑐱 𑐣𑑄. 𑑓 𑐫𑐵 𑐣𑑂𑐫𑐵𑐐𑐹 𑐖𑐶𑐮𑑂𑐮𑐵𑐫𑐵 𑐳𑑂𑐠𑐵𑐣𑐷𑐫 𑐖𑐣𑐥𑑂𑐬𑐟𑐶𑐣𑐶𑐢𑐶, 𑐨𑐵𑐲𑐶𑐎 𑐳𑑄𑐳𑑂𑐠𑐵 𑐳𑐩𑑂𑐰𑐡𑑂𑐢 𑐰𑐶𑐖𑑂𑐘 𑐰 𑐥𑑂𑐬𑐵𑐢𑑂𑐫𑐵𑐥𑐎𑐮𑐶𑐳𑐾 𑐀𑐣𑑂𑐟𑐎𑑂𑐬𑑂𑐬𑐶𑐫𑐵 𑐫𑐵𑐣𑐵𑑅 𑐥𑑂𑐬𑐡𑐾𑐱 𑐰 𑐳𑑂𑐠𑐵𑐣𑐷𑐫 𑐟𑐴𑐫𑑂 𑐳𑐬𑐎𑐵𑐬𑐷 𑐎𑐵𑐩𑐎𑐵𑐖𑐫𑐵 𑐨𑐵𑐫𑑂 𑐣𑐶𑐬𑑂𑐢𑐵𑐬𑐞 𑐫𑐵𑐫𑐾𑐟 𑐳𑐶𑐦𑐵𑐬𑐶𑐳 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐄𑐐𑐸 𑐳𑑄𑐐𑑀𑐲𑑂𑐛𑐶𑐫𑐵 𑐐𑑂𑐰𑐳𑐵𑑅 𑐐𑑂𑐰𑑅𑐐𑐸 𑐏𑑅 𑑋 𑐕𑐸𑑄 𑐨𑐵𑐲𑐵 𑐩𑑂𑐴𑑀, 𑐀𑐥𑑂𑐰𑑅 𑐰𑐎𑑂𑐟𑐵 𑐰 𑐨𑐵𑐲𑐵 𑐀𑐥𑑂𑐰𑑅 𑐰𑐎𑑂𑐟𑐵 𑐩𑑂𑐴𑑀 𑐖𑐹𑐐𑐸𑐮𑐶𑑄 𑐄𑐎𑐶𑐫𑐵𑐟 𑐎𑐫𑐵𑑅 𑐕𑐵𑐣𑐰𑐶𑐣 𑐫𑐵𑐣𑐵𑑅 𑐥𑑂𑐬𑐡𑐾𑐱 𑐰 𑐳𑑂𑐠𑐵𑐣𑐷𑐫 𑐟𑐴𑐫𑑂 𑐨𑐵𑐲𑐵 𑐣𑐶𑐬𑑂𑐢𑐵𑐬𑐞 𑐫𑐵𑐫𑐾𑐐𑐸 𑐫𑑀𑐖𑐣𑐵 𑐡𑐫𑐾𑐎𑐹𑐐𑐸 𑐡𑐸 𑑋

𑐄𑐐𑐸 𑐂𑐮𑐫𑑂 𑐣𑐾𑐎𑐥𑐵𑐫𑐵 𑐥𑑂𑐬𑐡𑐾𑐱 𑐎𑐩𑐶𑐚𑐷𑐫𑐵 𑐡𑐸𑐖𑑅 𑐂𑐣𑑂𑐡𑑂𑐬𑐧𑐴𑐵𑐡𑐸𑐬 𑐠𑐶𑐒𑑄 𑐮𑑀𑐥𑑀𑐣𑑂𑐩𑐸𑐏 𑐨𑐵𑐲𑐵𑐫𑐵 𑐳𑑄𑐬𑐎𑑂𑐲𑐞 𑐫𑐵𑐫𑐾𑐐𑐸 𑐡𑐵𑐫𑐶𑐟𑑂𑐰 𑐁𑐫𑑀𑐐𑐫𑐵 𑐖𑐹𑐐𑐸 𑐢𑐵𑐳𑐾𑑄 𑐨𑐵𑐲𑐵𑐫𑐵 𑐣𑐶𑑄𑐟𑐶𑑄 𑐟𑐟𑑅𑐢𑑄𑐐𑐸 𑐁𑐣𑑂𑐡𑑀𑐮𑐣 𑐖𑐹𑐐𑐸 𑐮𑐸𑐩𑑄𑐎𑐵𑐡𑐶𑐮 𑑋𑐐𑐵𑐄𑑃𑐥𑐵𑐮𑐶𑐎𑐵 𑐳𑑄𑐑𑐫𑐵 𑐀𑐢𑑂𑐫𑐎𑑂𑐲 𑐰𑐿𑐱𑐮𑐵𑐮 𑐟𑐵𑐩𑐵𑐒𑑄 𑐐𑐸𑐐𑐸 𑐨𑐵𑐫𑑂𑐫𑐵 𑐧𑐵𑐴𑐸𑐮𑑂𑐫𑐟𑐵 𑐡𑐸, 𑐄𑐎𑐶𑐫𑐵 𑐴𑐾 𑐮𑐶𑐢𑑄𑐳𑐵𑐫𑑂 𑐨𑐵𑐫𑑂𑐫𑐵 𑐣𑐶𑐬𑑂𑐢𑐵𑐬𑐞 𑐫𑐵𑐫𑐾𑐟 𑐳𑐸𑐗𑐵𑐰 𑐧𑐶𑐫𑐵𑐡𑐶𑐮 𑑋

𑐣𑐐𑐬𑐥𑐵𑐮𑐶𑐎𑐵 𑐳𑑄𑐑𑐫𑐵 𑐎𑐾𑐣𑑂𑐡𑑂𑐬𑐷𑐫 𑐡𑐸𑐖𑑅 𑐨𑐬𑐟 𑐎𑐾𑐳𑐷𑑄 𑐨𑐵𑐫𑑂𑐮𑐶𑐳𑐾 𑐩𑑂𑐴𑐳𑐷𑐎𑐵 (𑐥𑐴𑐶𑐔𑐵𑐣) 𑐣𑑄 𑐳𑑂𑐰𑐵𑐣𑐵𑐔𑑂𑐰𑐣𑐷𑐐𑐸 𑐖𑐹𑐐𑐸𑐮𑐶𑑄 𑐳𑐎𑐳𑐶𑐟𑑄 𑐳𑐴𑐖 𑐖𑐸𑐂𑐐𑐸 𑐨𑐵𑐫𑑂 𑐕𑑂𑐫𑐮𑐵𑐧𑐸𑐮𑐵𑐫𑑂 𑐴𑐫𑐾𑐟 𑐳𑐸𑐗𑐵𑐰 𑐧𑐶𑐫𑐵𑐡𑐶𑐮 𑑋

𑐁𑐫𑑀𑐐𑐫𑐵 𑐡𑐸𑐖𑑅 𑐄𑐲𑐵 𑐴𑐩𑐵𑐮𑑄 𑐥𑑂𑐫𑑄𑐐𑐹 𑐥𑑂𑐬𑐡𑐾𑐱𑐫𑑂 𑐥𑑂𑐬𑐵𑐡𑐾𑐱𑐶𑐎 𑐨𑐵𑐲𑐵 𑐳𑑄𑐐𑑀𑐲𑑂𑐛𑐶 𑐖𑑂𑐫𑐵𑐗𑑂𑐰𑑅 𑐎𑑂𑐰𑐔𑐵𑐫𑐾𑐢𑐸𑑄𑐎𑐹𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐳𑐾𑑄 𑐠𑑂𑐰 𑐳𑑂𑐰𑐫𑐵𑑄 𑐣𑑂𑐴𑑂𑐫𑑅 𑐐𑑂𑐰𑐳𑐵𑑅 𑐐𑑂𑐰𑐫𑐵𑐐𑐸 𑐳𑑄𑐐𑑀𑐲𑑂𑐛𑐶𑑄 𑐰𑑅𑐐𑐸 𑐳𑐸𑐗𑐵𑐰𑐫𑐵 𑐣𑐶𑐐𑐹 𑐥𑑂𑐬𑐟𑐶𑐰𑐾𑐡𑐣 𑐬𑐵𑐲𑑂𑐚𑑂𑐬𑐥𑐟𑐶 𑐖𑑂𑐫𑐵𑐎𑐸𑐠𑐶𑐂 𑐧𑐸𑐗𑐾 𑐫𑐵𑐫𑐾𑐢𑐸𑑄𑐐𑐸 𑐰 𑐔𑐵𑐮𑐸 𑐁𑐬𑑂𑐠𑐶𑐎 𑐡𑑃𑐫𑑂 𑐣𑑄 𑐄𑐎𑐠𑑄𑐫𑐵 𑐴𑐾 𑐥𑑂𑐬𑐟𑐶𑐰𑐾𑐡𑐣 𑐧𑐸𑐗𑐾 𑐫𑐵𑐫𑐾𑐐𑐸 𑐟𑐫𑐵𑐬𑐷 𑐖𑐸𑐫𑐵𑐔𑑂𑐰𑑄𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋

𑐁𑐫𑑀𑐐𑐫𑐵 𑐳𑐔𑐶𑐰 𑐮𑐎𑑂𑐲𑑂𑐩𑐷𑐥𑑂𑐬𑐳𑐵𑐡 𑐨𑐚𑑂𑐚𑐬𑐵𑐃𑑄 𑐩𑐵𑐟𑐺𑐨𑐵𑐲𑐵𑑄 𑐩𑐵𑐣𑑂𑐫𑐟𑐵 𑐎𑐵𑐫𑐾𑐟 𑐕𑐸 𑐕𑐸 𑐁𑐢𑐵𑐬𑐫𑑂 𑐣𑐶𑐬𑑂𑐢𑐵𑐬𑐞 𑐫𑐵𑐫𑐾 𑐦𑐂 𑐢𑐂𑐐𑐸 𑐰𑐶𑐲𑐫𑐫𑑂 𑐥𑑂𑐬𑐵𑐡𑐾𑐱𑐶𑐎 𑐳𑐴𑐮𑐴 𑐳𑑄𑐔𑐵𑐮𑐣 𑐫𑐵𑐣𑐵𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐨𑐵𑐲𑐵𑐫𑐵 𑐄𑐟𑑂𑐠𑐵𑐣 𑐰 𑐰𑐶𑐎𑐵𑐳𑐮𑐶𑐳𑐾𑑄 𑐳𑐬𑐎𑐵𑐬𑐷 𑐎𑐵𑐩𑐎𑐵𑐖 𑐰 𑐥𑐛𑐣𑐥𑐵𑐛𑐣𑐫𑑂 𑐥𑑂𑐬𑐫𑑀𑐐 𑐫𑐵𑐫𑐾𑐟 𑐳𑐬𑑀𑐎𑐵𑐬𑐰𑐵𑐮𑐵𑐫𑐵 𑐳𑐸𑐗𑐵𑐰 𑐩𑐴𑐟𑑂𑐰𑐥𑐹𑐬𑑂𑐞 𑐖𑐸𑐂 𑐢𑐫𑐵𑐡𑐶𑐮 𑑋

𑐥𑑂𑐬𑐡𑐾𑐱 𑐣𑑄. 𑑓 𑐫𑑂 𑐗𑐶𑑄𑐳𑑂𑐰𑑄𑐐𑐹 𑐖𑐶𑐮𑑂𑐮𑐵 𑐰 𑑑𑑔𑑙 𑐐𑐹 𑐳𑑂𑐠𑐵𑐣𑐷𑐫 𑐟𑐴 𑐡𑐸𑐠𑑂𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐁𑐫𑑀𑐐𑑄 𑐩𑐵𑐟𑐺𑐨𑐵𑐲𑐵𑐫𑐵 𑐳𑑂𑐟𑐬 𑐥𑐴𑐶𑐔𑐵𑐣𑐳𑐴𑐶𑐟 𑐨𑐵𑐲𑐵𑐫𑐵 𑐳𑑄𑐬𑐎𑑂𑐲𑐞 𑐰 𑐳𑑄𑐰𑐡𑑂𑐢𑐬𑑂𑐣 𑐫𑐵𑐣𑐵 𑐫𑑄𑐎𑐵𑑅 𑐳𑐬𑐎𑐵𑐬𑐷 𑐎𑐵𑐩𑐎𑐵𑐖𑐫𑐵 𑐨𑐵𑐫𑑂 𑐣𑐶𑐬𑑂𑐢𑐵𑐬𑐞 𑐫𑐵𑐣𑐵𑑅 𑐳𑐧𑐮 𑐨𑐵𑐲𑐶𑐎 𑐳𑐩𑐵𑐖 𑐣𑐶𑐬𑑂𑐩𑐵𑐞𑐫𑐵 𑐄𑐡𑑂𑐡𑐾𑐱𑑂𑐫 𑐡𑐫𑐾𑐎𑐹𑐐𑐸 𑐡𑐸 𑑋 𑐠𑐸𑐎𑐶𑐫𑐵 𑐣𑐶𑑄𑐟𑐶𑑄 𑐁𑐫𑑀𑐐𑑄 𑐳𑑄𑐑, 𑐥𑑂𑐬𑐡𑐾𑐱 𑐰 𑐳𑑂𑐠𑐵𑐣𑐷𑐫 𑐟𑐴𑐫𑑂 𑐐𑑀𑐲𑑂𑐛𑐶, 𑐀𑐣𑑂𑐟𑐎𑑂𑐬𑑂𑐬𑐶𑐫𑐵 𑐫𑐵𑐣𑐵𑑅 𑐳𑐬𑑀𑐎𑐵𑐬𑐰𑐵𑐮𑐫𑐵 𑐬𑐵𑐫 𑐳𑑄𑐎𑐮𑐣 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐠𑐣𑐶𑑄 𑐣𑐶𑐡𑑃 𑐣𑑂𑐴𑑂𑐫𑑅 𑐐𑐛𑐣 𑐖𑐹𑐐𑐸 𑐨𑐵𑐲𑐵 𑐁𑐫𑑀𑐐𑑄 𑐠𑑅𑐐𑐸 𑐀𑐰𑐢𑐶𑐫𑐵 𑐣𑑂𑐫𑐵𑐡𑑃𑐫𑐵 𑐡𑐸𑐣𑐾 𑐣𑐾𑐥𑐵𑑅𑐫𑐵 𑐡𑐎𑑂𑐰𑑄 𑐨𑐵𑐲𑐶𑐎 𑐥𑑂𑐬𑐟𑐶𑐰𑐾𑐡𑐣 𑐥𑑂𑐬𑐡𑐾𑐱 𑐰 𑐳𑑄𑐑𑐫𑐵 𑐩𑐣𑑂𑐟𑑂𑐬𑐵𑐮𑐫 𑐰 𑐬𑐵𑐲𑑂𑐚𑑂𑐬𑐥𑐟𑐶𑐫𑐵 𑐖𑑂𑐫𑐵𑐎𑐸𑐠𑐶𑐂 𑐧𑐸𑐗𑐾 𑐫𑐵𑐫𑐾𑐩𑐵𑑅𑐐𑐸 𑐰𑑂𑐫𑐰𑐳𑑂𑐠𑐵 𑐡𑐸 𑑋