𑐩𑐵𑑄𑐫𑐵 𑐣𑑂𑐴𑑂𑐫𑐳𑑅 (𑐧𑐵𑐏𑑃)

𑐰𑐶𑐖𑐫𑐬𑐟𑑂𑐣 𑐀𑐳𑑄𑐧𑐬𑐾

𑐕𑐏𑐵 𑐕𑐾𑑃 𑑋 𑐀𑐣 𑐕𑐾𑑃𑐫𑑂 𑐕𑐩𑑂𑐴 𑐩𑐵𑑄 𑐰 𑐎𑐵𑐫𑑂 𑐖𑐎 𑐡𑐸 𑑋 𑐩𑐵𑑄 𑐰 𑐎𑐵𑐫𑑂 𑐡𑐠𑐸𑐂 𑐟𑐳𑐎𑑄 𑐡𑐸𑐏𑐳𑐸𑐏 𑐧𑑂𑐫𑐵 𑑋 𑐂𑐩𑐶𑐐𑐸 𑐩𑐵𑐫𑐵 𑐩𑐟𑐶𑐣𑐵𑐫𑐵𑐟 𑐁𑐥𑐵𑐳𑐶𑐣𑑄 𑐕𑐐𑐹 𑐡𑐳𑐹 𑐎𑐠𑑄 𑐎𑐵𑐫𑐾𑐐𑐸 𑐣𑑄 𑐫𑐵𑑅 𑑋 𑐂𑐩𑐶𑐟 𑐩𑐐𑐵𑑅𑐩𑐔𑐵𑑅 𑐢𑐂𑐐𑐸 𑐕𑐸𑑄 𑐣𑑄 𑐩𑐡𑐸 𑑋 𑐣𑐶𑐕𑐵 𑐣𑐫𑐾𑐟 𑐠𑐵𑐎𑐸 𑐩𑐖𑐸 𑑋 𑐀𑐨𑐵𑐰 𑐕𑐸𑑄 𑐩𑐡𑐸 𑑋 𑐧𑐸𑐮𑐸𑐴𑐸𑑃 𑐩𑐵𑑄𑐩𑑂𑐴 𑐕𑐾𑑃𑐫𑑂 𑐨𑑁𑐩𑐔𑐵 𑐕𑐩𑑂𑐴𑐾𑐳𑐶𑐫𑐵 𑐀𑐨𑐵𑐰 𑐩𑐴𑐳𑐸𑐳 𑐫𑐵𑐣𑐵 𑐴𑐮 𑑋 𑐨𑑁𑐩𑐔𑐵 𑐳𑑂𑐰𑐫𑐾𑐐𑐸 𑐩𑐣 𑐡𑐫𑐾𑐎𑐮 𑑋 𑐨𑑁𑐩𑐔𑐵 𑐕𑐾𑑃𑐫𑑂 𑐡𑐸𑐟𑐶𑐣𑐾𑐐𑐸 𑐩𑐟𑐷𑐟𑐫𑐵𑑅 𑐩𑐵𑑄𑐩𑑂𑐴𑑄 𑐎𑐵𑐫𑑂𑐩𑑂𑐴𑐾𑐳𑐶𑐟 𑐩𑑂𑐴𑐵𑑅 𑐩𑑂𑐴𑐵𑑅 𑐢𑐵𑐫𑐾𑐎 𑐃𑐴𑐶𑐥𑐵 𑐫𑐵𑐣𑐵 𑐧𑐶𑐮 𑑋 𑐨𑑁𑐩𑐔𑐵 𑐡𑐸𑐴𑐵𑑃 𑐰𑑅𑐐𑐸 𑐡𑐶𑐣𑐏𑐸𑐣𑑂𑐴𑐸 𑐩𑐵𑑄𑐩𑑂𑐴𑐳𑐶𑐫𑐵 𑐏𑑂𑐰𑐵𑐮𑐫𑑂 𑐏𑐣𑐾𑐡𑐸𑐐𑐸 𑐮𑐳𑐟𑐵 𑐧𑐫𑐵𑐣 𑐫𑐵𑐫𑐾 𑐴𑐾 𑐠𑐵𑐎𑐸 𑑋 𑐣𑑂𑐴𑐶𑐄𑐐𑐸 𑐣𑑂𑐴𑐶𑐮𑑄𑐟𑐸𑑄 𑑋 𑐩𑑂𑐴𑐸𑐟𑐸𑐥𑑂𑐰𑐵𑑅 𑐴𑐾 𑐎𑐩𑐟𑐶𑐄 𑑋 𑐄𑐏𑐸𑐣𑑂𑐴𑐸 𑐩𑐵𑑄𑐩𑑂𑐴𑐾𑐳𑐶𑐫𑐵 𑐏𑑂𑐰𑐵𑑅 𑐔𑐎𑑄 𑑋 𑐟𑐬 𑐩𑐵𑑄 𑐰 𑐎𑐵𑐫𑑂 𑐡𑐠𑐸𑐂 𑐧𑑂𑐫𑐵𑐣𑐵 𑐔𑑂𑐰𑑄𑐐𑐸 𑐩𑐟𑐶𑐣𑐵 𑐢𑐵𑑅𑐳𑐵 𑐄𑐏𑐸𑐣𑑂𑐴𑐸 𑐣𑐶𑐳𑐾𑑄 𑐴𑐾 𑐮𑐶𑐎𑐸𑐣𑐵 𑐰𑐣 𑑋 𑐂𑐩𑐶𑐐𑐸 𑐩𑐟𑐶𑐣𑐵𑐫𑑂 𑐠𑑅𑐐𑐸 𑐧𑑂𑐰 𑐎𑐵𑐫𑐾𑐟 𑐁𑑅 𑐨𑑁𑐩𑐔𑐵 𑐂𑐩𑐶𑐐𑐸 𑐕𑐾𑑃𑐫𑑂 𑐡𑐸𑐴𑐵𑑃 𑐰𑐮 𑑋 𑐀𑐮𑐾 𑐎𑐵𑐫𑐾𑐩𑑂𑐴𑐾𑐳𑐶𑐣𑑄 𑐕𑐐𑐸 𑐀𑑄𑐱 𑐩𑐟𑐶𑐣𑐵 𑐎𑐮𑐵𑐩𑑂𑐴𑐾𑐳𑐶𑐫𑐵 𑐣𑐶𑑄𑐟𑐶𑑄 𑐣𑑄 𑐫𑐵𑐫𑐾𑐩𑐵𑐮 𑑋

𑐠𑑅𑐐𑐸 𑐩𑐟𑐶𑐣𑐵𑐫𑐵 𑐕𑐐𑐸 𑐀𑑄𑐱 𑐟𑑄𑑃𑐳𑐵𑑄 𑐩𑐵𑑄𑐩𑑂𑐴 𑐣𑑂𑐴𑐶𑐮𑐵 𑐴𑐾 𑐔𑑂𑐰𑐣 𑑋 𑐕𑐵𑐫𑑂𑐢𑐵𑑅𑐳𑐵𑑄 𑐰𑑄 𑐠𑑅 𑐎𑐵𑐫𑑂𑐫𑐵 𑐣𑑂𑐴𑐶𑐮𑐵𑐳𑐸𑐫𑐵𑐟 𑐴𑐾 𑐠𑑅 𑐮𑐳𑐟𑐵 𑐨𑐵𑑅𑐥𑐶𑐫𑐵 𑐎𑐵𑐮 𑑋 𑐕𑐣𑑂𑐴𑐸 𑐩𑐵𑑄𑐫𑐵 𑐏𑑂𑐰𑐵𑑅 𑐳𑑂𑐰𑐫𑐾𑐐𑐸 𑐡𑐶𑑄 𑐰𑐮 𑑋 𑐎𑐵𑐫𑑂𑐩𑑂𑐴𑐾𑐳𑐶𑐫𑐵 𑐟𑐳𑐎𑑄 𑐮𑐶𑐩𑐮𑐵 𑐄𑐎𑐸𑐣𑑂𑐴𑐸 𑑋 𑐠𑑅 𑐟𑐶𑐬𑐶𑐩𑐫𑑂𑐖𑐸 𑐩𑐵𑑄𑐫𑐵 𑐏𑑂𑐰𑐵𑑅 𑐳𑑂𑐰𑑅𑐰𑐣𑐶𑐐𑐸 𑐖𑐹𑐐𑐸𑐮𑐶𑑄 𑐖𑑀𑐬𑐖𑐵𑐩 𑐫𑐵𑑄𑐫𑐵 𑐴𑐾 𑐳𑐵𑐳𑑅 𑐮𑑂𑐴𑐵𑐫𑐾𑐮𑐵𑑅𑐐𑐸 𑐩𑐏𑐸 𑑋 𑐨𑐟𑐶𑐔𑐵 𑐮𑑄𑐎𑐵 𑐨𑑁𑐩𑐔𑐵 𑐠𑑅𑐕𑐾𑑃𑐫𑑂 𑐰𑐣 𑑋 𑐟𑐶𑐬𑐶𑐩𑐫𑑂𑐖𑐸 𑐰𑐣𑐾 𑐢𑐸𑑄𑐎𑐵 𑐎𑐵𑐫𑑂𑐩𑑂𑐴𑐾𑐳𑐶𑐟 𑐠𑑅𑐐𑐸 𑐕𑐾𑑃 𑐴𑐾 𑐗𑐶𑐗𑐵𑑄𑐩𑐶𑐗𑐵𑑄 𑐡𑑄𑐠𑐾𑑄 𑐟𑐵𑐫𑐵𑐰𑐮 𑑋 𑐰𑐫𑐵𑐟 𑐕𑐸𑐫𑐵𑐫𑑂 𑐕𑐸𑐫𑐵𑐫𑑂 𑐖𑐸𑐫𑐵𑐰𑐮 𑑋 𑐎𑐮𑐵𑐫𑐵𑐟 𑐩𑐵𑑄𑐫𑐵 𑐏𑑂𑐰𑐵𑑅 𑐳𑑂𑐰𑐫𑐾𑐎𑐾 𑐕𑑂𑐰𑐫𑐾 𑐣𑐶𑑄𑐟𑐶𑑄 𑐧𑑂𑐰𑐵𑑃𑐫𑑂 𑐧𑑂𑐰𑐵𑑃𑐫𑑂 𑐖𑐸𑐫𑐵𑑅 𑐟𑑂𑐫𑐵𑐣𑐸𑐔𑐵𑑅𑐩𑑂𑐴 𑐎𑐵𑐫𑑂𑐩𑑂𑐴 𑐮𑐵𑐳𑐵𑐫𑑂 𑐐𑑂𑐰𑐵𑐬𑐵𑐟𑐸𑐮 𑑋 𑐧𑐸𑐮𑐸𑑄𑐴𑐸𑑄 𑐩𑐶𑐏𑐵 𑐟𑐶𑐳𑐶𑐣𑐵 𑐣𑑂𑐴𑑂𑐫𑑅 𑐰𑐫𑐾𑐎𑐵𑐕𑑂𑐰𑐟 𑑋

𑐎𑐵𑐫𑑂𑐩𑑂𑐴𑐾𑐳𑐶𑐫𑐵 𑐠𑐖𑑂𑐫𑐵𑐐𑐸 𑐥𑐴𑑅 𑐏𑐣𑐵 𑐩𑐵𑑄𑐩𑑂𑐴𑐾𑐳𑐶𑐫𑐵 𑐩𑐶𑐏𑐵𑑄 𑐩𑐔𑐵𑐫𑐾𑐎 𑐏𑑂𑐰𑐧𑐶 𑐴𑐵𑐫𑐵𑐰𑐮 𑑋 𑐩𑐵𑑄𑐫𑐵 𑐏𑑂𑐰𑐵𑑅 𑐳𑑂𑐰𑑅 𑐰𑐣𑐾𑐐𑐸 𑐡𑐶𑑄𑐣𑐏𑐸𑐣𑑂𑐴𑐸 𑐠𑑅 𑐎𑐮𑐵𑐫𑐵𑐟 𑐩𑐵𑑄𑐫𑐵 𑐏𑑂𑐰𑐵𑑅 𑐳𑑂𑐰𑐎𑐾 𑐕𑑂𑐰𑐫𑐾 𑐮𑐸𑐩𑑄𑐩𑑂𑐴 𑐎𑐵𑐫𑑂𑐩𑑂𑐴 𑐄𑐎𑐶𑐫𑐵 𑐴𑐾 𑐟𑐣𑑂𑐟𑐵 𑐫𑐵𑐫𑐾𑐟 𑐧𑑂𑐰𑐵𑑃𑐫𑑂 𑐖𑐸𑐫𑐵 𑐟𑑂𑐫𑐵𑐣𑐸 𑐔𑐵𑑅𑐩𑑂𑐴 𑐎𑐵𑐫𑐾𑐩𑑂𑐴𑐾𑐳𑐶𑐣𑑄 𑐠𑑅 𑐣𑑄 𑐕𑐩𑑂𑐴 𑐩𑐵𑑄 𑐡𑐸 𑐢𑐫𑐵𑐐𑐸 𑐏𑑃 𑐐𑐠𑐾 𑐮𑑂𑐰𑐩𑑄𑐎𑐮 𑐬𑐸 𑐩𑐵𑑄𑐫𑐵 𑐏𑑂𑐰𑐵𑑅 𑐳𑑂𑐰𑐫𑐾 𑐩𑐵𑑅 𑐢𑐂𑐐𑐸 𑐐𑐠𑐾 𑐮𑑂𑐰𑐩𑑄𑐎𑐮 𑐬𑐸 𑐩𑐵𑑄𑐩𑑂𑐴𑑄 𑐠𑑂𑐰𑑅 𑐣𑑂𑐴𑑂𑐫𑐳𑑅𑐫𑐵 𑐮𑐶𑐳𑑅 𑐩𑐵𑐮𑐾𑐐𑐸 𑐎𑐸𑐟𑑅 𑐫𑐵𑐟 𑑋 𑐫𑐎𑑂𑐰𑑅 𑐎𑐸𑐟𑑅 𑐫𑐵𑐟 𑐣𑑄 𑐮𑐶𑐳𑑅 𑐩𑐮𑐸 𑑋 𑐮𑐸𑐂𑐎𑐾 𑐴𑐾 𑐩𑐦𑐹 𑑋