𑐖𑐶𑐐𑐸 𑐕𑐾𑑄

𑐎𑐺𑐲𑑂𑐞𑐨𑐎𑑂𑐟 𑐰𑑀𑐜𑐾
𑐰𑑄 𑐩𑐾𑐩𑐾𑐥𑐶𑐣𑐾 𑐨𑐩𑑂𑐔𑐵 𑐐𑐠𑐾 𑐔𑑂𑐰𑑄 𑐢𑐎𑐵 𑐠𑐸𑐂𑐎𑐾𑐐𑐸 𑐖𑑂𑐫𑐵 𑐫𑐵𑐣𑐵 𑐔𑑂𑐰𑐣 𑑋 𑐐𑐸𑐩𑑂𑐴𑐾𑐳𑐶𑐫𑐵𑑄 𑐕𑐾𑑄𑐫𑐵 𑐖𑑂𑐫𑐵 𑐏𑑃𑐫𑑂 𑐔𑑂𑐫𑐹𑐟𑐵 𑐴𑐾 𑐩𑐟𑐵𑐂𑐥𑐶𑑄 𑑋 𑐩𑐵𑐖𑐸 𑐧𑐵𑐖𑐸𑐫𑐵 𑐏𑑄 𑐴𑐾 𑐩𑐣𑑂𑐫𑐣𑐶𑐥𑐶𑑄 𑑋 𑐐𑐸𑐩𑑂𑐴𑐾𑐳𑐶𑐫𑐵 𑐩𑐵𑐖𑐸 𑐧𑐵𑐖𑐸 𑐫𑐵𑐟 𑐡𑑂𑐫𑑅𑐨𑐵𑐥𑐶𑐥𑐶𑑄 𑑋 𑐕𑐸𑑄 𑐢𑐵𑐫𑑂 𑐢𑐶 𑐩𑑂𑐰𑐵𑐫𑐎 𑐕𑐾𑑄 𑐖𑑂𑐫𑐵 𑐫𑐵𑐂𑐥𑐶𑑄 𑑋
𑐰𑐫𑐵 𑐣𑑄 𑐡𑐸𑐩𑑂𑐴 𑐕𑐩𑑂𑐴 𑐎𑐵𑐫𑑂 𑐫𑐵𑐟 𑐧𑑂𑐫𑐵𑐴𑐵 𑐫𑐵𑐣𑐵 𑐧𑐷 𑐟𑑂𑐫𑑅𑐐𑐸𑐮𑐶𑑄 𑐨𑐶𑑄𑐩𑑂𑐴, 𑐧𑐵𑑄𑐮𑐵𑐩𑑂𑐴, 𑐢𑐵𑐫𑑂 𑐮𑑂𑐴𑐵𑐫 𑐩𑑂𑐰𑐵𑐫𑐎 𑐠𑐩𑑂𑐴𑑄 𑐳𑑂𑐰𑐫𑐵 𑐖𑑂𑐫𑐵 𑐫𑐵𑐣𑐵 𑐔𑑂𑐰𑐣𑐶𑐩𑑂𑐴 𑐨𑐩𑑂𑐔𑐵 𑐕𑐩𑑂𑐴 𑐮𑐵𑐫𑐩𑐵𑑅 𑐢𑐎𑐵 𑐠𑑅𑐡𑐸𑐣𑐾𑐫𑐵 𑐣𑐸𑐐𑑅𑐣𑐵𑐥𑑄 𑐏𑑄 𑐧𑑂𑐫𑐵𑐎𑐵 𑐔𑑂𑐰𑐣 𑑋
𑐠𑐩𑑂𑐴𑑄 𑐢𑐫𑐵𑐩𑑂𑐴 𑐠𑐾𑑄 𑐕𑐩𑑂𑐴𑑅 𑐮𑐸𑐫𑐵 𑐰𑐫𑐵𑐮𑐶𑑄 𑐧𑑂𑐫𑐵𑐴𑐵 𑐫𑐵𑐣𑐵 𑐧𑐶𑐫𑐾𑐐𑐸 𑐖𑑂𑐫𑐵 𑐖𑐸𑐮 𑑋
𑐨𑐩𑑂𑐔𑐵𑐫𑐵𑐟 𑐟𑐵𑑅𑐔𑐵 𑐥𑑂𑐰𑐵𑑃𑐫𑑂 𑐮𑑅𑐮𑑂𑐴𑐵𑐣𑐵 𑐧𑐶𑐫𑐵𑐮𑐶𑑄 𑐕𑐾𑑄 𑐫𑐵 𑐖𑑂𑐫𑐵 𑐏𑑄𑐟 𑐦𑐸𑐎𑑂𑐎 𑐎𑐣𑐵 𑐧𑐶𑐮 𑑋
—‘𑐎𑐵𑑅 𑐨𑐩𑑂𑐔𑐵 𑐠𑑁𑑄 𑐣𑐶𑐳𑐾𑑄 𑐠𑑂𑐰 𑐕𑐾𑑄 𑐕𑑄𑐐𑐸 𑐖𑐸𑐮 𑑋 𑐕𑑄 𑐳𑑂𑐰𑐫𑐵 𑐢𑐵𑐫𑑂 𑐮𑑂𑐴𑐵𑐫𑑂 𑐩𑑂𑐰𑐵𑐫𑑂𑐎𑐵 𑐫𑐵𑐣𑐵 𑐧𑑂𑐫𑐸 𑑋’
—‘𑐴𑐳𑑂 𑐧𑐵 ! 𑐖𑐶𑐐𑐸 𑐕𑐾𑑄 𑐖𑐸𑐮 𑑋 𑐖𑐶𑑄 𑐳𑑂𑐰𑐫𑐵 𑐫𑐵𑐫𑑂 ! 𑐕𑐶𑐎𑐥𑐶𑐣𑑂𑐳𑑄 𑐔𑑂𑐫𑐹𑐟𑐵 𑐎𑐫𑐵 𑐡𑐶𑐩𑑂𑐰𑐵𑑅 𑑋 𑐕𑐶𑐎𑐥𑐶𑐣𑑂𑐟 𑐫𑐵𑐄𑑃𑐎 𑐟𑐫𑐵 𑐟𑐫𑐾 𑑋
𑐨𑐩𑑂𑐔𑐵𑐫𑐵 𑐠𑑂𑐰 𑐏𑑄 𑐣𑑂𑐫𑐣𑐵 𑐩𑐵𑐖𑐸 𑐧𑐵𑐖𑐸𑐥𑐶𑑄 𑐟𑐳𑑂𑐳𑐎𑑄 𑐮𑐫𑑂𑐟𑐵𑐫𑐵 𑐟𑐸𑐟𑐶 𑐧𑑃𑐫𑑂𑐴𑐾 𑐩𑐠𑑂𑐫𑐸 𑐠𑐾𑑄 𑐟𑐵𑐮 𑑋
𑐣𑑂𑐴𑑂𑐫𑐵𑐐𑐸 𑐏𑑄 𑐣𑑄 𑐣𑑂𑐫𑐣𑐶𑐐𑐸 𑑋 𑐩𑐦𑐸 𑐩𑐖𑑂𑐫𑐹 𑐐𑐧𑑂𑐮𑐾𑐳𑑄 𑐢𑐵𑐫 𑐩𑐦𑐸 𑑋 𑐠𑐸𑐎𑐠𑑄 𑐩𑐵𑐖𑐸 𑐧𑐵𑐖𑐸𑐫𑐵 𑐣𑑂𑐴𑐵𑐫 𑐟𑐫𑐐𑐸 𑐠𑐵𑐫 𑐡𑐟 𑑋 𑐢𑐵𑑅𑐠𑐾𑑄 𑐏𑑅𑐩𑑂𑐴 𑐴𑐾 𑐨𑐩𑑂𑐔𑐵 𑐮𑐵𑐟 𑐢𑐿𑐠𑐾 𑐳𑐸𑐣𑐵𑐣𑑄 𑐩𑐣𑑂𑐫𑑄𑐳𑐵𑑄 𑐠𑐩𑑂𑐴𑑄𑐴𑐾 𑐩𑐾𑐩𑐾𑐥𑐶𑐣𑑂𑐟 𑐎𑐣𑐾𑐟 𑐮𑐷𑐦 𑐩𑐳𑑂𑐰𑑅 𑑋
—‘𑐠𑑂𑐰 𑐰𑐳𑑅 𑐨𑐟𑐶𑐔𑐵 𑐴𑐵𑐎𑐸𑐠𑐾𑑄 𑐔𑑂𑐰𑐣 𑑋 𑐕𑐎𑑅 𑐴𑐶𑐫𑐵 𑐧𑑂𑐫𑐸 𑐣𑑂𑐴𑐾 𑐨𑐩𑑂𑐔𑐵 𑑋’
—‘𑐴𑐳𑑂 𑐧𑐵 𑑋 𑐖𑐵 𑐕𑐎 𑐣𑐶𑑄 𑐠𑐸𑐃 𑑋 𑐀𑐮𑐾 𑐴𑐷 𑑋’
𑐨𑐩𑑂𑐔𑐵𑐫𑐵 𑐐𑐧𑑂𑐮𑐳𑑄 𑐮𑐷𑐮𑐵 𑐢𑐿𑐐𑐸 𑐴𑐾 𑐩𑐣𑑂𑐟 𑑋 𑐩𑐵𑐖𑐸 𑐧𑐵𑐖𑐸𑑄 𑐣𑑂𑐴𑑂𑐫𑐵𑐐𑐸 𑐣𑑄 𑐄𑐐𑐸𑑄 𑐠𑐸𑐐𑐸𑑄 𑐖𑑂𑐫𑐵 𑐧𑑂𑐰𑐫𑐵 𑐔𑑂𑐰𑐣𑐶 𑑋 𑐨𑐩𑑂𑐔𑐵 𑐑𑑁 𑐥𑐮𑐏 𑐴𑐾 𑐳𑐸𑐩𑑂𑐎 𑐔𑑂𑐰𑐣𑐵 𑐣𑐃 𑐢𑐎𑐵 𑐐𑑂𑐫𑐵 𑑋
—‘𑐧𑐖𑐶 𑐡𑐫𑑂𑐎𑐾 𑐢𑐸𑑄𑐐𑐸 𑐏𑑅𑐮𑐵 𑐨𑐩𑑂𑐔𑐵 ? 𑐮𑐶𑐥𑐵 𑐮𑐵𑐟 𑑋 𑐥𑑂𑐰𑐵𑐠𑐫𑑂 𑐥𑐶𑐟𑑂𑐫𑐵𑐟 𑑋’
—‘𑐧𑐖𑐶 𑐩𑐡𑐫𑐎𑐵 𑐣𑐶 𑐧𑐵 𑑋 𑐁𑑅 𑐡𑐫𑑂𑐎𑐾 𑐴𑐾 𑐟𑑂𑐫𑐮 𑑋 𑐠𑑂𑐰 𑐧𑐵𑐧𑐸𑐔𑐵 𑐏𑑂𑐰𑑅𑐐𑐸 𑐏𑑂𑐰𑐫𑐵𑐟𑐸𑑄 𑐔𑑂𑐰𑐣 𑑋 𑐕𑐥𑑂𑐟𑐷 𑐴𑐾 𑐩𑐔𑑂𑐰𑑄 𑑋 𑐕𑐸 𑐖𑐸𑐮 𑐕𑐸 𑐖𑐸𑐮  𑑋 𑐥𑐸𑐬𑐸𑐥𑐸𑐬𑐸 𑐗𑐵𑐬𑐵 𑐣𑑄 𑐔𑑂𑐰𑐣𑐶𑐐𑐸 𑑋 𑐧𑑃𑐫𑑂 𑐖𑐎 𑐔𑑂𑐰𑐣 𑑋 𑐏𑑂𑐰𑐵𑑃𑐄 𑐠𑐶𑐮𑐮𑐵 𑐕𑐸 𑐕𑐸 𑑋 𑐁𑑅 𑐡𑐸𑐬𑐸 𑐕𑐎 𑐣𑐶𑑄 𑐟𑑂𑐰𑑄𑐎𑐾 𑑋
—‘𑐣𑑂𑐴𑐵𑐔 𑐣𑐶𑐳𑐾𑑄 𑐕𑐸 𑐫𑐵𑐣𑐵 𑐔𑑂𑐰𑐣𑐵𑐮𑐾 ?’
—‘𑐖𑐵 𑐖𑐶 𑐣𑐫𑐵 𑐨𑐵𑐬𑐵𑐨𑐶𑐬𑐶 𑐕𑐎 𑐳𑐶𑐮𑐵 𑐕𑐶𑐎𑐥𑐶𑐣𑐶𑐐𑐸 𑐰𑐳𑑅 𑐀𑐮𑐾 𑐠𑑂𑐰 𑐩𑐔𑐵𑐫𑐵 𑐰𑐳𑑅 𑐴𑐶𑐖𑐵 𑐕𑐎 𑐴𑐷 𑐢𑐎𑐵 𑐴𑐶𑐫𑐵𑐐𑐸 𑐩𑐔𑐵𑐫𑐵 𑐣𑐫 𑐩𑐵𑐮𑐮𑐵 𑐴𑐸 𑐠𑐾𑑄 𑐏𑑂𑐰𑑅𑐐𑐸 𑐏𑑂𑐰𑐫𑐵𑐟𑐸𑑄𑐎𑐵𑑅 𑑋 𑐩𑐔𑐵 𑐣𑐶𑑄 𑐎𑐵𑐫𑑂𑐮𑐵 𑐴𑐶𑐖𑐵 𑐣𑐶𑑄 𑐴𑐶𑐫𑑂𑐮𑐵 ………𑑋
𑐣𑑂𑐴𑑂𑐫𑐵𑐎𑑂𑐰 𑐴𑐾 𑐮𑐷𑐩𑐮𑐵 𑐦𑐩𑐮𑐵 𑐑𑑀𑑄 𑐑𑑀𑑄 𑐳𑐶𑐫𑐵 𑐖𑑂𑐫𑐵 𑐳𑑄𑐳𑐵𑑄 𑐟𑐧𑐶 𑐣𑑄 𑐩𑐵𑐖𑐸 𑐧𑐵𑐖𑐸𑐫𑐵 𑐨𑐩𑑂𑐔𑐵𑐩𑑂𑐴 𑐨𑑂𑐫𑐵𑐨𑐟𑐶𑐔𑐵𑐴𑐾 𑐳𑐸𑐩𑑂𑐎 𑐔𑑂𑐰𑐣𑐶 𑐠𑐾𑑄 𑐔𑐶𑐰𑐵𑑅𑐖𑐎 𑐎𑐫𑐵 𑐔𑑂𑐰𑐔𑑂𑐰𑑄 𑐮𑐷𑐩𑐮𑐵 𑑋
𑐠𑐠𑐾 𑐃 𑐧𑐶𑐣𑐵𑐟𑐸𑑄 𑐰𑐣 𑑋
—‘𑐔𑑂𑐫𑐵 𑐕𑐎 𑐟𑑂𑐰𑐣𑐾 𑐡𑑅𑐳𑐵 𑐖𑑂𑐫𑐸 𑑋’
—‘𑐩𑐔𑐵𑐫𑐵𑐟 𑐁𑐔𑐶 𑐕𑐎 𑐣𑐶𑑄 𑐦𑐵𑐎𑐾 𑑋’
—‘𑐰𑐳𑑅 𑐕𑐎 𑐴𑐷 𑐩𑐵𑑅𑐐𑐸 𑑋’
—‘𑐩𑐔𑐵 𑐩𑐔𑑂𑐰𑑄 𑐠𑑁𑑄 𑐴𑐷 𑐩𑐏𑐸𑐟 𑑋’
—‘𑐖𑐵 𑐧𑐸𑐟𑐮𑐵 𑐨𑐩𑑂𑐔𑐵 ?’
—‘𑐖𑐵 𑐴𑐾 𑐩𑐠𑐸𑐫𑐵 𑐣𑐶 𑐧𑐵 𑑋’
—‘𑐠𑑁 𑐰𑐳𑐶 𑐧𑑄 𑐟𑐎 𑐴𑐾 𑐩𑐥𑐸𑐫𑐵𑐣𑐶𑐮𑐵 𑐨𑐩𑑂𑐔𑐵 ?’
—‘𑐥𑐸𑐂𑐴𑐾 𑐮𑐷𑐩𑐮𑐵𑐟 𑐧𑐵 𑑋’
—‘𑐥𑑂𑐰𑐵𑐠𑐫𑑂 𑐥𑐶𑐟𑑂𑐫𑐵𑐟 𑐁𑑅𑐕𑐸𑐫𑐵𑐫𑐐𑐸𑐮𑐾 𑐨𑐩𑑂𑐔𑐵 ?’
—‘𑐠𑑁𑑄𑐮𑐵 𑐖𑐶𑑄 𑐖𑑂𑐰𑐬𑐾 𑐫𑐵𑐫𑐴𑐾 𑐩𑐮𑐵𑐟 𑐧𑐵 𑑋 𑐴𑐠𑐵𑐫𑐐𑐸 𑐖𑑂𑐫𑐵 𑐕𑐐𑐹 𑐡𑐸 𑐥𑐶𑐴𑐵𑑄 𑐕𑐎 𑐩𑐰𑑄𑐳𑐾 𑐩𑐖𑐶𑐮 𑑋
𑐥𑑂𑐰𑐵𑐠𑐫𑑂 𑐥𑐶𑐟𑑂𑐫𑐵𑐐𑐸 𑐟𑐩𑐫 𑐰 𑐴𑐷 𑐩𑐷 𑐔𑐵𑐫𑐵 𑐴𑐵𑐮 𑑋 ‘𑐩𑐏𑐸 𑐕𑐸 𑐢𑐿𑐐𑐸 𑐢𑐫𑐵𑐣𑐶 𑐨𑐩𑑂𑐔𑐵 ? 𑐟𑑅𑐣𑑂𑐴𑐹 𑐴𑐾 𑐡𑐟 𑐕𑑄 𑐧𑑂𑐫𑐰𑐴𑐵𑐬𑐫𑑂 𑐥𑐵𑐎𑐵 𑐴𑑅𑐐𑐸 𑑋

𑐣𑑂𑐴𑑂𑐫𑐵𑐐𑐸 𑐢𑐵𑑅 𑐮𑐷𑐩𑐮𑐵 𑐢𑐿𑐐𑐸 𑑋 𑐩𑐖𑑂𑐫𑐸 𑐢𑐿𑐐𑐸 𑑋 𑐣𑑂𑐴𑐵𑐥𑐵 𑐀𑐠𑐾 𑐩𑐏𑐸 𑑋 𑐨𑐶𑑄𑐩𑑂𑐴, 𑐧𑐵𑑄𑐮𑐵𑐩𑑂𑐴, 𑐢𑐿𑐠𑐾 𑐐𑑂𑐫𑑄𑐩𑑂𑐴𑑅 𑐢𑐎𑐵 𑐔𑑂𑐰𑐣𑐵𑐐𑐸𑐮𑐵 ……𑑋

𑐠𑑁𑑄 𑐕𑐸𑐖𑐸𑐫𑐵 𑐰𑑅𑐐𑐸 𑐢𑐿𑐐𑐸𑐣𑐶 𑑋 𑐕𑐸 𑐖𑐸𑐮 𑐕𑐣𑑂𑐟 ? 𑐕𑐸 𑐩𑐐𑐵𑐎 𑐟𑐮 𑐕𑐣𑑂𑐟 ? 𑐏𑐶𑐔𑐵 𑐫𑐵𑐟 𑐑𑑂𑐫𑑅 𑐩𑐣𑐶𑑄 𑑋 𑐀𑐮𑐎𑑂𑐲𑐞𑐵𑐩𑑂𑐴…..𑑋 𑐰 𑐢𑐵𑑅 𑐠𑑂𑐰 𑐢𑐵𑑅 𑐩𑐢𑐵𑐫𑐎 𑐢𑐵𑐫𑐵 𑐳𑐳𑑅𑐀𑐧𑐸𑐩𑑂𑐴 𑐟𑑄 𑐔𑐵𑐮 𑑋 𑐠𑑁𑑄 𑐨𑐩𑑂𑐔𑐵𑐩𑑂𑐴 𑐣𑑄 𑐩𑑂𑐴𑐸𑐟𑐸𑐂 𑐢𑑁 𑐦𑐶𑐣𑐵 𑐩𑐔𑑂𑐰𑐣 𑑋 𑐀𑐳𑐴𑑂𑐫𑐐𑐸 𑐥𑐶𑐜𑐵 𑐧𑑂𑐰𑐫𑐾𑐐𑐸 𑐎𑐸𑐟𑑅 𑐫𑐵𑐟 𑑋 𑐰𑑄 𑐣𑑄 𑐮𑐵𑐎𑑂𑐰𑐥𑐵𑐎𑑂𑐰 𑐢𑐵𑐫𑐵 𑐩𑑂𑐴𑐸𑐟𑐸 𑐖𑑂𑐰𑐫𑐾𑐎𑐮 𑑋 𑐣𑐶𑐩𑑂𑐴𑐾𑐳𑐶𑐫𑐵 𑐡𑐠𑐸𑐂 𑐖𑐰𑐵𑑅𑐳𑐰𑐵𑑅 𑐖𑐸𑐮 𑑋 𑐨𑐩𑑂𑐔𑐵𑐩𑑂𑐴𑐾𑐳𑐶𑐣𑐣𑑄 𑐢𑐫𑐵 𑐴𑐾 𑐕𑐰𑐟
—‘𑐕𑐶𑐎 𑐥𑐶𑐣𑐶𑐐𑐸 𑐎𑐩𑐵𑐃 𑐣𑐫𑐵 𑐢𑐵𑑅 𑐢𑐵𑑅 𑐐𑐸 𑐣𑑂𑐫𑐟𑐮𑐾 𑐖𑐶𑐟𑐶 𑐨𑐶𑑄𑐩𑑂𑐴 𑐳𑐸𑑄 𑐩𑐡𑐸 𑑋 𑐠𑑁𑑄 𑐀𑐮𑐎𑑂𑐲𑐞𑐵 𑐎𑐵𑑅 𑐩𑐏𑐸𑐮𑐵 𑐖𑐶 ? 𑐕𑐶𑐎𑐥𑐶𑐣𑐶𑐐𑐸 𑐂𑐔𑑂𑐕𑐵 𑐖𑐎 𑐥𑐸𑐰𑑄𑐎𑐾𑐟 𑐳𑑂𑐰𑐟 𑑋 𑐟𑐮𑐧 𑐧𑐷 𑐩𑑂𑐰𑐵𑑅𑐩𑑂𑐴 𑐔𑑂𑐫𑑅 𑐨𑑂𑐰𑐵𑐟𑐶𑑄 𑐟𑐵𑐫𑑂𑐎𑐮 𑑋 𑐖𑐶𑐐𑐸 𑐣𑑄 𑐐𑐵𑐎𑑂𑐎 𑐂𑐔𑑂𑐕𑐵 𑐡𑐸 𑑋 𑐳𑑄𑐐𑐸 𑐕𑐥𑐸 𑐐𑐶𑐔𑑂𑐕𑐶 𑐣𑑂𑐫𑐣𑐵𑐡𑐶𑐫𑐵𑐮𑐵 ?

Articles