𑐣𑐾𑐥𑐵𑐮𑐨𑐵𑐲𑐵 𑐏𑑂𑐫𑐮𑐫𑑂 𑐱𑐾𑐫𑐬 𑐫𑐵𑐂𑐥𑐶𑑄 𑐩𑐣𑐹𑐟 𑐁𑐰𑐱𑑂𑐫𑐎 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸

𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵 𑑒 𑐰𑐜𑐵 𑐡𑑂𑐫𑑅𑐢𑑂𑐰𑐵𑐏𑐵𑐫𑑂 𑐔𑑂𑐰𑐣𑐵𑐡𑐷𑐩𑑂𑐴 𑐳𑐬𑐷𑐟𑐵 𑐧𑐖𑑂𑐬𑐵𑐔𑐵𑐬𑑂𑐫, 𑐠𑑁𑑄𑐎𑐣𑑂𑐴𑐫𑑂 𑐳𑑂𑐥𑐬𑑂𑐱 𑐩𑑂𑐫𑐹𑐖𑐶𑐎 𑐨𑐶𑐜𑐶𑐫𑑀 𑐀𑐰𑐵𑐬𑑂𑐜 𑑒𑑐𑑒𑑐 𑐫𑑂 𑐖𑐣𑐖𑐵𑐟𑐶 𑐰𑐶𑐢𑐵𑐫𑑂 𑐟𑑅𑐩𑐶𑐩𑑂𑐴..𑐧𑑀𑐮𑐫𑐵 𑐩𑑂𑐫𑐹𑐖𑐶𑐎 𑐨𑐶𑐜𑐶𑐫𑑀𑐥𑐵𑐏𑐾𑑄 𑐧𑐾𑐲𑑂𑐚 𑐦𑐶𑐩𑐾𑐮 𑐩𑑀𑐜𑐮 𑐚𑐥 𑑕 𑐫𑑂 𑐣𑑀𑐩𑐶𑐣𑐾𑐚 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐁𑐥𑐵𑐮𑑄 𑐔𑐶𑐴𑐵𑑅 𑐳𑑄𑐎𑐶𑐥𑐵 𑐮𑐶𑐳𑐾𑑄 𑐩𑑂𑐫𑐹𑐖𑐶𑐎 𑐨𑐶𑐜𑐶𑐫𑑀 𑐩𑑂𑐴𑐶𑐟𑐾𑐢𑐸𑑄𑐎𑐹𑐩𑑂𑐴 𑐳𑐬𑐷𑐟𑐵, 𑐠𑑁𑑄𑐎𑐣𑑂𑐴𑐫𑑂 𑐕𑐩𑑂𑐴 𑐰𑑂𑐫𑐳𑑂𑐟 𑐩𑑀𑐜𑐮𑐫𑐵 𑐬𑐸𑐥𑑄 𑐏𑐣𑐾𑐡𑐫𑐵𑐔𑑂𑐰𑑄𑐐𑐸 𑐡𑐸𑐳𑐵 𑐳𑐬𑐷𑐟𑐵 𑐠𑑁𑑄𑐎𑐣𑑂𑐴𑐫𑑂 𑐕𑐩𑑂𑐴 𑐩𑐾𑐎𑐀𑐥 𑐁𑐬𑑂𑐚𑐶𑐲𑑂𑐚𑐫𑐵 𑐬𑐸𑐥𑑄 𑐣𑑄 𑐣𑑂𑐴𑑂𑐫𑑅𑐣𑐾 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐰𑐫𑑂𑐎𑑅 𑐳𑐬𑐷𑐟𑐵 𑐧𑐖𑑂𑐬𑐵𑐔𑐵𑐬𑑂𑐫𑐮𑐶𑐳𑐾 𑐣𑐾𑐰𑐵𑑅 𑐀𑐣𑐮𑐵𑐂𑐣𑐣𑑂𑐫𑐹𑐖𑐫𑐵 𑐳𑐩𑑂𑐥𑐵𑐡𑐎 𑐮𑐮𑐾𑐣𑑂𑐡𑑂𑐬 𑐱𑐵𑐎𑑂𑐫𑑄 𑐫𑐵𑐣𑐵𑐡𑐷𑐐𑐸 𑐏𑑃𑐮𑑂𑐴𑐵𑐧𑐮𑑂𑐴𑐵𑐫𑐵 𑐕𑐸𑑄 𑐧𑑂𑐰 𑐣𑑂𑐴𑑂𑐫𑐧𑑂𑐰𑐫𑐵𑐔𑑂𑐰𑐣𑐵 𑑋

𑑑) 𑐡𑐎𑐮𑐾 𑐣𑑂𑐴𑐵𑐥𑐵𑑄 𑐳𑐬𑐷𑐟𑐵 𑐖𑐸, 𑐨𑐶𑑄𑐟𑐸𑐣𑐵 𑐡𑐸 𑐕𑐶 𑐳𑑂𑐥𑐬𑑂𑐱 𑐩𑑂𑐫𑐹𑐖𑐶𑐎 𑐨𑐶𑐜𑐶𑐫𑑀 𑐀𑐰𑐵𑐬𑑂𑐜 𑑒𑑐𑑒𑑐 𑐫𑑂 𑐖𑐣𑐖𑐵𑐟𑐶 𑐰𑐶𑐢𑐵𑐫𑑂 𑐧𑐾𑐲𑑂𑐚 𑐦𑐶𑐩𑐾𑐮 𑐩𑑀𑐜𑐮 𑐚𑐥 𑑕 𑐫𑑂 𑐕𑐣𑑀𑐚 𑐖𑐸𑐫𑐵𑐡𑐷𑐐𑐸𑐮𑐶𑑄 𑑋 𑐣𑐸𑐐𑐮𑐫𑑂 𑐐𑐸𑐖𑑂𑐰𑑅𑐐𑐸 𑐀𑐣𑐸𑐨𑐰 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 ?

𑐳𑐸𑐨𑐵𑐫𑑂 𑐡𑐸, 𑐩𑐣𑐫𑑂 𑐣𑐸𑐐𑑅𑐳𑑂𑐰𑐵𑑄 𑐴𑑂𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐖𑐶𑐐𑐸 𑐀𑐨𑐶𑐣𑐫𑐫𑐵𑐟 𑐎𑐡𑐬 𑐫𑐵𑑅𑐐𑐸 𑐡𑐸 𑐢𑐿𑐐𑐸 𑐖𑐶𑑄 𑐟𑐵𑐫𑐾𑐎𑐵 𑑋 𑐳𑐎𑐮𑐳𑐶𑐣𑑄 𑐖𑐶𑐟𑑅 𑐄𑐐𑐸 𑐀𑐰𑐵𑐬𑑂𑐜 𑐟𑑂𑐫𑐵𑐎𑐾𑐐𑐸 𑐣𑐶𑐟𑐶𑑄 𑐴𑑅𑐥𑐵𑑅 𑐰 𑐟𑐶𑐧𑑅 𑐧𑐶𑐫𑐵𑐡𑐷 𑐢𑐿𑐐𑐸 𑐨𑐮𑐳𑐵 𑐎𑐫𑐵𑐔𑑂𑐰𑐣𑐵𑐐𑐸 𑐡𑐸 𑑋

𑑒) 𑐎𑐮𑐵𑐫𑐵𑐟𑑂𑐬𑐵𑐫𑑂 𑐐𑐸𑐎𑐠𑑄 𑐥𑐮𑐵𑑅 𑐮𑐵𑐟 ?

𑐏𑐵𑐳 𑐢𑐵𑐫𑐾𑐐𑐸 𑐏𑑅𑐳𑐵 𑐎𑐮𑐵𑐫𑐵𑐟𑑂𑐬𑐵𑐫𑐵 𑐳𑐸𑐬𑐸𑐰𑐵𑐟 𑐢𑐿𑐐𑐸 𑐳𑑂𑐚𑐾𑐖 𑐥𑑂𑐬𑑀𑐐𑑂𑐬𑐵𑐩𑑄 𑐴𑐾 𑐖𑐹𑐐𑐸 𑐏𑑅 𑐏𑑂𑐫𑐵𑐮𑑅 𑐰 𑐴𑐸𑐮𑐵𑐥𑑂𑐫𑐵𑐏𑑄 𑐥𑐵𑐏𑐾𑑄 𑑋

𑑓) 𑐥𑑂𑐬𑐾𑐬𑐞𑐵 𑐧𑑂𑐫𑐹𑐩𑑂𑐴 𑐳𑐸 𑐏𑑅 ?

𑐏𑐵𑐳 𑐥𑑂𑐬𑐾𑐬𑐞𑐵 𑐢𑐎𑐵𑑅𑐮𑐵 𑐳𑐸𑑄 𑐣𑑄 𑐩𑐡𑐸 𑑋 𑐖𑐶 𑐣𑑂𑐴𑐵𑐥𑐵𑑄𑐣𑐶𑐳𑐾𑑄 𑐴𑐾 𑐣𑐾𑐰𑐵𑑅 𑐩𑑂𑐫𑐹𑐖𑐶𑐎 𑐨𑐶𑐜𑐶𑐫𑑀 𑐳𑑂𑐰𑐫𑐾𑐐𑐸 𑐁𑐥𑐵𑐮𑑄 𑐧𑐵𑐣𑐷 𑐡𑐸𑐩𑑂𑐴 𑐖𑐹𑐐𑐸𑐮𑐶𑑄 𑐖𑐶 𑐣𑑄 𑐠𑑂𑐰 𑐏𑑂𑐫𑐮𑐫𑑂 𑐰𑐫𑐾𑐐𑐸 𑐂𑐔𑑂𑐕𑐵 𑐣𑐸𑐐𑑅 𑐡𑐸𑐣𑐾 𑐧𑑂𑐰𑐮𑐣𑐵𑐰𑑅𑐐𑐸 𑐏𑑅 𑑋 𑐠𑐸𑐎𑐶𑐫𑐵 𑐴𑐸𑐣𑐶𑑄 𑐴𑐾 𑐖𑐶 𑐠𑑁𑑄 𑐎𑐮𑐵𑐎𑐵𑐬 𑐖𑐹𑐐𑐸 𑐖𑐸𑐂 𑑋

𑑔) 𑐳𑑄𑐎𑐶𑐥𑐵 𑐏𑑂𑐫𑐮𑐫𑑂 𑐰𑐫𑐾𑐣𑑂𑐴𑑂𑐫𑑅 𑐕𑐶𑑄 𑐕𑐸 𑐫𑐵𑐣𑐵𑐡𑐶𑐫𑐵 ?

𑐀𑑃…𑐠𑑂𑐰 𑐳𑑄𑐎𑐶𑐥𑐵 𑐏𑑂𑐫𑐮𑐫𑑂 𑐰𑐫𑐾𑐣𑑂𑐴𑑂𑐫𑑅 𑐣𑑂𑐴𑐵𑐥𑐵 𑐖𑐶𑐐𑐸 𑐖𑐵𑐐𑐶𑐬 𑐡𑐹𑐐𑐸 𑐏𑑅 𑑋 𑐀𑐮𑐾 𑐖𑐵𑐐𑐶𑐬 𑐣𑐵𑐥𑐣𑐵𑐥𑑄 𑐳𑑂𑐚𑐾𑐖 𑐱𑑀𑐫𑐵 𑐬𑐸𑐥𑑄 𑐏𑑂𑐫𑐵𑐮𑑅 𑐴𑐸𑐮𑐵𑐥𑑂𑐫𑐵𑐏𑑄 𑐣𑑂𑐴𑑂𑐫𑐧𑑂𑐰𑐫𑐵 𑐠𑑅𑐐𑐸 𑐥𑑂𑐬𑐟𑐶𑐨𑐵 𑐣𑑂𑐴𑑂𑐫𑐧𑑂𑐰𑐫𑐵𑑅 𑐰𑐫𑐵𑐔𑑂𑐰𑐣𑐵𑐐𑐸 𑐏𑑅 𑑋

𑑕) 𑐕𑐶𑐐𑐸 𑐡𑐎𑐮𑐾 𑐣𑑂𑐴𑐵𑐥𑐵𑑄𑐐𑐸 𑐳𑑄𑐎𑐶𑐥𑐵 𑐰 𑐩𑑂𑐫𑐹𑐖𑐶𑐎 𑐨𑐶𑐜𑐶𑐫𑑀 𑐕𑐸 𑐏𑑅 ?

𑐳𑑄𑐎𑐶𑐥𑐵 𑐢𑐎𑐵𑑅 𑐮𑐵 𑐩𑑂𑐴𑐶𑐟𑐵𑐐𑐸 𑐩𑐡𑐸𑐣𑐶 𑑋 𑐔𑐶𑐴𑐵𑑅 𑐳𑑄𑐎𑐶𑐥𑐵 𑐢𑐵𑑅𑐳𑐵 𑐫𑐎𑑂𑐰 𑐩𑑂𑐴𑐶𑐟𑐵𑐐𑐸 𑐡𑐸 𑑋 𑐖𑐶𑐐𑐸 𑐣𑑂𑐴𑐵𑐥𑐵𑑄𑐐𑐸 𑐔𑐶𑐴𑐵𑑅 𑐳𑑄𑐎𑐶𑐥𑐵 𑐢𑐿𑐐𑐸 𑐣𑐾𑐰𑐵𑑅 𑐫𑐹𑐚𑑂𑐫𑐸𑐧 𑐔𑑂𑐫𑐵𑐣𑐮𑐥𑐵𑐏𑐾𑑄 𑐣𑐶𑐬𑑂𑐩𑐵𑐞 𑐖𑐹𑐐𑐸 𑐳𑑂𑐰𑐵𑐥𑐹 𑐣𑐵𑑄𑐫𑐵 𑐔𑐶𑐴𑐵𑑅 𑐳𑑄𑐎𑐶𑐥𑐵 𑐏𑑅𑐳𑐵 𑐩𑑂𑐫𑐹𑐖𑐶𑐎 𑐨𑐶𑐜𑐶𑐫𑑀 𑐬𑐵𑐖𑐸 𑐩𑐵𑐣𑐣𑑂𑐢𑐬 𑐡𑐵𑐃𑐫𑐵𑐐𑐸 𑐩𑑂𑐫𑐾𑐫𑑂 𑐩𑑂𑐴𑐶𑐟𑐵𑐐𑐸 𑐏𑑅 𑑋

𑑖) 𑐁𑑅𑐟𑐎 𑐀𑐨𑐶𑐣𑐫 𑐫𑐵𑐣𑐵𑐡𑐶𑐫𑐵𑐐𑐸 𑐩𑑂𑐫𑐹𑐖𑐶𑐎 𑐨𑐶𑐜𑐶𑐫𑑀 𑐰 𑐳𑑄𑐎𑐶𑐥𑐵 𑐕𑐸 𑐕𑐸 𑐏𑑅 ?

𑐖𑐰𑐮𑑂𑐴𑐵𑑅𑐟𑑄 𑐀𑐣𑑂𑐟𑐷 𑐖𑑂𑐰𑐣𑐵, 𑐫𑑀𑐩𑐬𑐷, 𑐏𑐸𑐮𑐵 𑐏𑐸𑐮𑐵, 𑐩𑑀𑐴𑐣𑐷 𑐩𑑂𑐫𑐾, 𑐏𑐩𑐸𑐔𑐵, 𑐨𑑂𑐰𑐵𑐠𑑅𑐐𑐸 𑐎𑐸𑐳𑐵, 𑐎𑐵𑐮 𑐖𑐶𑐐𑐸, 𑐥𑐶𑐫𑐵 𑐔𑑂𑐰𑐣𑐾, 𑐨𑐸𑐟𑐸𑐩𑐵𑐮𑐷, 𑐩𑑂𑐴𑑄𑐖𑐎 𑐩𑑂𑐴𑑄𑐳𑐵, 𑐕 𑐣𑑂𑐴𑐶𑐮𑐵𑑅 𑐡, 𑐩𑐔𑐵 𑐕𑐩𑑂𑐴 𑐔𑐷𑐢𑐷 𑐟𑐸𑐟𑐸 𑐣𑐫𑐾𑐢𑐵𑐂, 𑐟𑑅𑐩𑐶𑐩𑑂𑐴, 𑐮𑐵𑐫𑐎𑐹 𑐡𑐬𑐧𑐵𑐬𑐫𑑂, 𑐣𑐫𑐾𑐟𑑂𑐰𑐣𑐾 𑐫𑐟𑐮𑐾, 𑐖𑐶𑐩𑐶 𑐥𑐵𑐖𑐸𑐥𑐶𑐣𑑂𑐟, 𑐫𑑅𑐳𑐵 𑐫𑑅𑐢𑐵, 𑐕𑐮𑐵 𑐩𑐏𑐸, 𑐩𑑂𑐴𑐐𑐳𑐾 𑐩𑑂𑐴𑐣𑐷𑐐𑐸 𑐏𑑅, 𑐎𑐾 𑐫𑐴𑐷 𑐴𑑀 𑐥𑑂𑐬𑐾𑐩𑐎𑑀 𑐀𑐬𑑂𑐠 𑐩𑑂𑐫𑐹𑐖𑐶𑐎 𑐨𑐶𑐜𑐶𑐫𑑀 𑐏𑑅𑐳𑐵 𑐔𑐶𑐴𑐵𑑅 𑐳𑑄𑐎𑐶𑐥𑐵 𑐰 𑐚𑐾𑐮𑐶𑐳𑐶𑐬𑐶𑐫𑐮𑐫𑑂 𑐏𑑀𑐟𑐵𑐧𑐖𑐶, 𑐩𑐵𑐦 𑐐𑐬𑑂𑐣𑐸𑐳 𑐩𑑂𑐫𑐵𑐜𑐩, 𑐳𑑂𑐰𑐵𑐥𑐹, 𑐮𑐶𑐨𑐶𑑄𑐐 𑐚𑐸𑐐𑐾𑐜𑐬, 𑐴𑐵𑐎𑐹𑐐𑐸 𑐥𑑁, 𑐢𑑂𑐰𑑅 𑐕𑐢𑑂𑐰𑑅 𑐬𑐾𑐏𑐵𑑄 𑐎𑑂𑐫𑐹𑐐𑐸, 𑐠𑑅 𑐎𑐟𑑅 𑐎𑐟𑑅 𑐠𑑅 𑑋

𑑗) 𑐣𑐾𑐰𑐵𑑅 𑐩𑑂𑐫𑐹𑐖𑐶𑐎 𑐨𑐶𑐜𑐶𑐫𑑀 𑐰 𑐳𑑄𑐎𑐶𑐥𑐵 𑐏𑑂𑐫𑑅 𑐠𑑁𑑄𑐎𑐣𑑂𑐴𑐫𑑂 𑐐𑐠𑐾 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑐬𑐸 𑐣𑐾𑐰𑐵𑑅 𑐏𑑂𑐫𑑅𑐫𑐵 𑐩𑑂𑐫𑐹𑐖𑐶𑐎 𑐨𑐶𑐜𑐶𑐫𑑀 𑐰 𑐳𑑄𑐎𑐶𑐥𑐵 𑐄𑐟𑑂𑐎𑐺𑐲𑑂𑐚 𑐩𑐖𑐹 𑐢𑐵𑐂, 𑐕𑐵𑐫𑑂 𑐬𑐸 𑐕𑐶𑐐𑐸 𑐰𑐶𑐔𑐵𑐮𑐫𑑂 ?

𑐩𑑂𑐫𑐹𑐖𑐶𑐎 𑐨𑐶𑐜𑐶𑐫𑑀 𑐢𑐵, 𑐳𑑄𑐎𑐶𑐥𑐵 𑐢𑐵, 𑐠𑑁𑑄𑐎𑐣𑑂𑐴𑐫𑑂 𑐣𑑂𑐴𑐵𑐥𑐵 𑐣𑑂𑐴𑐵𑐥𑐵 𑐣𑐶𑐬𑑂𑐩𑐵𑐞 𑐫𑐵𑐂𑐐𑐸 𑐳𑐶𑐧𑐾𑑄 𑐫𑐎𑑂𑐰 𑐫𑐎𑑂𑐰 𑐴𑐾 𑐧𑐵𑑄𑐮𑐵𑐣𑐵𑑅 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐨𑐰𑐶𑐲𑑂𑐫 𑐀𑐗 𑐣𑑄 𑐧𑐵𑑄𑐮𑐵𑐂𑐐𑐸 𑐁𑐳 𑐡𑐸 𑑋 𑐏𑐵𑐳 𑐖𑐶 𑐠𑑂𑐰 𑐏𑑂𑐫𑐮𑐫𑑂 𑐫𑐎𑑂𑐰 𑐥𑐸𑐮𑐵𑑄𑐩𑑂𑐴 𑐮𑐵 𑐩𑐏𑐸, 𑐀𑐠𑐾 𑐖𑐸𑐫𑐵𑑅 𑐖𑐶𑐟𑑅 𑐮𑐵 𑐐𑐸𑐮𑐶 𑐣𑑄 𑐣𑐶𑐬𑑂𑐩𑐵𑐞 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸, 𑐧𑐵𑑄𑐮𑐵𑑅 𑐴𑐾 𑐟𑐵𑑅 𑑋

𑑘) 𑐖𑐷𑐰𑐣 𑐰 𑐀𑐨𑐶𑐣𑐫 𑐏𑑂𑐫𑑅𑐫𑐵𑐟 𑐟𑐸𑐮𑐣𑐵 𑐫𑐵𑐫𑐾𑐧𑐮𑐫𑑂, 𑐕𑐶𑑄 𑐐𑐸𑐎𑐠𑑄 𑐫𑐵𑐣𑐵𑐡𑐷 ?

𑐔𑐬𑐶𑐟𑑂𑐬 𑐎𑐠𑑄𑐫𑐵 𑐫𑐠𑐵𑐬𑑂𑐠 𑐀𑐨𑐶𑐣𑐫 𑐴𑐾 𑐧𑐵𑐳𑑂𑐟𑐰𑐶𑐎 𑐖𑐶𑐰𑐣𑑂𑐟 𑐀𑐨𑐶𑐣𑐫 𑐏𑑅𑐳𑐵 𑐖𑐷𑐰𑐣 𑐢𑐿𑐐𑐸 𑐬𑑄𑐐𑐩𑐔𑐠𑐾𑑄 𑐴𑐾 𑐏𑑅 𑑋 𑐖𑐶 𑐠𑑂𑐰𑐴𑐾 𑐫𑐠𑐵𑐬𑑂𑐠𑐟𑐵𑐫𑑂 𑐡𑐸𑐣𑐾 𑐔𑑂𑐰𑐣𑐵𑑅 𑐀𑐨𑐶𑐣𑐫 𑐰 𑐖𑐷𑐰𑐣𑐫𑐵𑐟 𑐎𑑅𑐑𑐵𑐣𑐵𑑅 𑐎𑑂𑐫𑐵𑐩𑐾𑐬𑐵 𑐣𑑂𑐴𑑂𑐫𑑅𑐣𑐾 𑐠𑑅𑐟𑑅 𑐟𑑄𑐎𑐵𑑅 𑐥𑐬𑑂𑐡𑐵𑐫𑐵 𑐧𑐵𑐏𑐣𑐫𑑂 𑐡𑐸𑐧𑐶𑐣𑐾𑐐𑐸 𑐫𑐵𑐣𑐵𑐔𑑂𑐰𑐣𑐵 𑑋

𑑙) 𑐕𑐶𑐐𑐸 𑐖𑐷𑐰𑐣𑐫𑑂 𑐮𑑂𑐰𑑅𑐩𑑄𑐎𑐾 𑐩𑐦𑐹𑐐𑐸 𑐳𑐸𑐏 𑐰 𑐡𑐸𑑅𑐏𑐫𑐵 𑐎𑑂𑐲𑐞 𑐕𑐸 𑐏𑑅 ?

𑐖𑐶𑐐𑐸 𑐖𑐷𑐰𑐣𑐫𑑂 𑐮𑑂𑐰𑑅𑐩𑑄𑐎𑐾 𑐩𑐦𑐹𑐐𑐸 𑐳𑐸𑐏𑐫𑐵 𑐎𑑂𑐲𑐞 𑐢𑐿𑐐𑐸 𑐐𑐸𑐧𑐮𑐾 𑐖𑐶𑐩𑐶 𑐩𑐵𑑄 𑐖𑐶𑐐𑐸 𑐖𑑂𑐫𑐵 𑐏𑐣𑐵𑑅 𑐮𑐳𑐟𑐵 𑐥𑑂𑐰𑑄𑐎𑐵𑑅 𑐖𑐶𑐟𑑅 𑐳𑑂𑐫𑐵𑐧𑐵𑐳𑐷 𑐧𑐶𑐫𑐵𑐡𑐷, 𑐰 𑐖𑐶𑐐𑐸 𑐳𑐸𑐏𑐫𑐵 𑐎𑑂𑐲𑐞 𑐖𑐸𑐫𑐵𑐔𑑂𑐰𑐣𑐷 𑑋 𑐖𑐶𑐐𑐸 𑐡𑐸𑑅𑐏𑐫𑐵 𑐎𑑂𑐲𑐞 𑐢𑐿𑐐𑐸 𑐖𑐶 𑑑𑑕 𑐡𑑃 𑐡𑐸𑐧𑐮𑐫𑑂 𑐜𑐵𑐣𑑂𑐳 𑐚𑐶𑐔𑐬 𑐖𑐸𑐂𑐐𑐸 𑐁𑐖𑑂𑐖𑐸 𑐟𑐫𑐵𑑅 𑐎𑐶𑐥𑐸𑐮𑐷𑐣𑐶𑐳𑐾𑑄 𑐫𑐾𑑃𑐫𑐵 𑐨𑐶𑐩𑐳𑐾𑐣𑐐𑑀𑐮𑐵𑐟𑐎 𑐰𑐣𑐵𑑅 𑐜𑐵𑐣𑑂𑐳 𑐳𑐫𑐾𑐎𑑅 𑐰𑐣𑐵 𑑋 𑐟𑐬 𑐜𑐵𑐣𑑂𑐳 𑐎𑑀𑐬𑑂𑐳 𑐥𑐹𑐰𑑄𑐎𑐾 𑐩𑐦𑐸𑐟, 𑐠𑑂𑐰𑐴𑐾 𑐡𑐸𑑅𑐏𑐫𑐵 𑐎𑑂𑐲𑐞 𑐏𑑅 𑑋

𑑑𑑐) 𑐎𑐮𑐵𑐎𑐵𑐬𑐶𑐟𑐵 𑐏𑑂𑐫𑐮𑑄 𑐖𑐷𑐰𑐣 𑐣𑐶𑐬𑑂𑐰𑐵𑐴 𑐫𑐵𑐫𑐾𑐐𑐸 𑐮𑑃𑐥𑐸 𑐔𑐹𑐮𑐵𑑅 𑐎𑐶 𑐩𑐮𑐵𑑅 ?

𑐢𑐵𑐟𑑂𑐠𑐾𑑄 𑐢𑐵𑐫𑐾𑐐𑐸 𑐏𑑅𑐳𑐵 𑐁𑑅𑐟𑐎 𑐮𑐵 𑐠𑑂𑐰 𑐎𑐮𑐵𑐎𑐵𑐬𑐶𑐟𑐵 𑐏𑑂𑐫𑐮𑑄 𑐖𑐷𑐰𑐣 𑐣𑐶𑐬𑑂𑐰𑐵𑐴 𑐫𑐵𑐫𑐾𑐐𑐸 𑐮𑑃𑐥𑐸 𑐔𑐹𑐮𑐵𑐐𑐸 𑐩𑐡𑐸𑐣𑐶 𑑋 𑐟𑐬, 𑐠𑐠𑐾𑐴𑐾 𑐧𑐵𑑄𑐮𑐵𑐣𑐵m 𑐰𑐣𑐢𑐵𑑅𑐳𑐵 𑐥𑐎𑑂𑐎𑐵 𑐣𑑄 𑐔𑐹𑐮𑐵𑐂 𑐢𑐎𑐵𑑅 𑐨𑐮𑐳𑐵 𑐎𑐫𑐵𑐔𑑂𑐰𑐣𑐵 𑑋

𑑑𑑑) 𑐠𑑂𑐰 𑐏𑑂𑐫𑐮𑐫𑑂 𑐐𑑂𑐮𑐵𑐫𑐩𑐬 𑐣𑑄 𑐩𑐵𑑅 𑐢𑐵𑐂, 𑐕𑐶𑑄 𑐣𑑂𑐴𑑂𑐫𑐧𑑂𑐰𑐫𑐵𑐐𑐸 𑐡𑐸 𑐠𑐾𑑄 𑐔𑑂𑐰𑑄 𑐎𑐶 𑐩𑐔𑑂𑐰𑑄 ?

𑐴𑐵..𑐴𑐵..𑐴𑐵.. 𑐄𑐩𑑂𑐩𑑂 𑐩𑐵𑑅 𑑋 𑐁𑑅𑐟𑐎 𑐄𑐖𑑂𑐰𑑅𑐐𑐸 𑐐𑑂𑐮𑐵𑐫𑐩𑐬 𑐴𑐾 𑐣𑑂𑐴𑑂𑐫𑐧𑑂𑐰𑐫𑐾𑐩𑐵𑑅𑐐𑐸 𑐎𑐠𑑄𑐫𑐵 𑐧𑐵𑐏𑑄𑐫𑐵 𑐥𑑂𑐫𑐵𑐏𑑄 𑐗𑐷𑐐𑐸 𑐣𑐾𑐰𑐵𑑅 𑐏𑑂𑐫𑐮𑐫𑑂 𑐣𑐶𑐬𑑂𑐩𑐵𑐞 𑐖𑐹𑐐𑐸 𑐩𑐡𑐸𑐣𑐶𑐠𑐾𑑄 𑐔𑑂𑐰𑑄 𑑋

𑑑𑑒) 𑐩𑐵𑐫𑐵 𑐩𑐟𑐶𑐣𑐵𑐫𑐵 𑐥𑐬𑐶𑐨𑐵𑐲𑐵 𑐧𑐶𑐂𑐩𑐵𑐮 𑐢𑐵𑑅𑐳𑐵 𑐕𑐶𑑄 𑐐𑐸𑐎𑐠𑑄 𑐧𑐶𑐫𑐵𑐡𑐷 ?

𑐣𑐶𑑅𑐳𑑂𑐰𑐵𑐬𑑂𑐠 𑐨𑐵𑐰𑐣𑐵𑑄 𑐕𑐩𑑂𑐴𑑄 𑐩𑐾𑐩𑑂𑐴𑐾𑐳𑐶𑐟 𑐳𑐵𑐠 𑐧𑐶𑐂𑐐𑐸 𑐰 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐐𑐸 𑐴𑐾 𑐳𑐔𑑂𑐔𑐵 𑐩𑐵𑐫𑐵 𑐩𑐟𑐶𑐣𑐵 𑐏𑑅 𑑋

𑑑𑑓) 𑐎𑐣𑑂𑐴𑐾𑐫𑐵 𑐮𑐎𑑂𑐲𑑂𑐫 ?

𑐖𑐶𑐐𑐸 𑐮𑐎𑑂𑐲𑑂𑐫 (𑐁𑐖𑑂𑐖𑐸) 𑐢𑐿𑐐𑐸 𑐴𑐾 𑐀𑐨𑐶𑐣𑐫𑐫𑐵𑐟 𑐣𑐶𑐬𑐣𑑂𑐟𑐬𑐟𑐵 𑐧𑐶𑐫𑐵𑐰𑐣𑐾𑐐𑐸 𑐏𑑅 𑑋 𑐖𑐷𑐰𑐣𑐫𑑂 𑐀𑐨𑐶𑐣𑐫𑐥𑐵𑐏𑐾𑑄 𑐖𑐶𑐐𑐸 𑐩𑐵𑑄𑐨𑐵𑐫𑑂, 𑐖𑐵𑐟𑐶, 𑐎𑐮𑐵 𑐳𑑄𑐳𑑂𑐎𑐺𑐟𑐶 𑐰 𑐠𑑅𑐐𑐸 𑐡𑐾𑐫𑑂 𑐮𑐶𑐳𑐾𑑄 𑐠𑑅𑐟 𑐕𑐩𑑂𑐴 𑐧𑐵𑑄𑐮𑐵𑑅𑐩𑑂𑐴 𑐎𑐮𑐵𑐎𑐵𑐬𑐫𑐵 𑐬𑐸𑐥𑑄 𑐡𑐾𑐳𑑄 𑐡𑐾𑐫𑑂 𑐩𑑂𑐴𑐳𑐷𑐎𑐵 𑐧𑐶𑐂𑐐𑐸 𑐴𑐾 𑐮𑐎𑑂𑐲𑑂𑐫 𑐏𑑅 𑐖𑐶𑐐𑐸 𑑋

𑑑𑑔) 𑐏𑐳 𑐣𑐾𑐥𑐵𑐮𑐷 𑐨𑐵𑐲𑐵𑐫𑐵 𑐩𑑂𑐫𑐹𑐖𑐶𑐎 𑐨𑐶𑐜𑐶𑐫𑑀 𑐰 𑐳𑑄𑐎𑐶𑐥𑐵𑐫𑑂 𑐕𑐶 𑐏𑐣𑐾𑐩𑐡𑐸𑐠𑐾𑑄 𑐔𑑂𑐰𑑄, 𑐕𑐵𑐫𑑂 ?

𑐏𑐳 𑐨𑐵𑐲𑐵𑐫𑑂 𑐣𑑄 𑐡𑐸 𑑋 𑐟𑐬, 𑐩𑑂𑐫𑐹𑐖𑐶𑐎 𑐨𑐶𑐜𑐶𑐫𑑀 𑐰 𑐚𑐾𑐮𑐶𑐨𑐶𑐖𑐣 𑐳𑐶𑐬𑐶𑐫𑐮 𑐖𑐎 𑐎𑐵 𑑋

𑑑𑑕) 𑐠𑑂𑐰 𑐏𑑂𑐫𑐮𑐫𑑂 𑐕𑐶𑐐𑐸 𑐥𑑂𑐬𑐟𑐶𑐳𑑂𑐥𑐬𑑂𑐢𑐷𑐫𑐵 𑐣𑐵𑑄 𑐎𑐵𑐫𑐾𑐩𑐵𑐮 𑐢𑐵𑑅𑐳𑐵 𑐳𑐸𑐫𑐵𑐐𑐸 𑐣𑐵𑑄 𑐎𑐫𑐵𑐡𑐷 ?

𑐏𑐵𑐳 𑐥𑑂𑐬𑐟𑐶𑐳𑑂𑐥𑐬𑑂𑐢𑐵 𑐫𑐵𑐫𑐾𑐐𑐸 𑐬𑐸𑐥𑑄 𑐖𑐶𑑄 𑐐𑐸𑐧𑐮𑐾𑑄 𑐳𑐸𑐫𑐵𑐟 𑐣𑑄 𑐳𑑀𑐔𑐾𑐫𑐵𑐣𑐵𑐐𑐸 𑐩𑐡𑐸 𑑋 𑐖𑐶 𑐠𑑅𑐩𑑂𑐴𑑄 𑐐𑐸𑐮𑐶 𑐧𑐵𑑄𑐮𑐵𑐎𑐾𑐦𑐸, 𑐄𑐮𑐶 𑐴𑐾 𑐧𑐵𑑄𑐮𑐵𑐎𑑂𑐎 𑐎𑐸𑐟𑑅 𑐫𑐵𑐣𑐵𑑅 𑐣𑑂𑐴𑑂𑐫𑐵𑑄 𑐰𑐣𑐵𑐔𑑂𑐰𑐣𑐵𑐐𑐸 𑐡𑐸 𑑋

𑑑𑑖) 𑐣𑐾𑐰𑐵𑑅 𑐏𑑂𑐫𑑅𑐫𑐵 𑐠𑐸𑐐𑐸 𑐳𑑄𑐎𑐶𑐥𑐵 𑐩𑑂𑐫𑐹𑐖𑐶𑐎 𑐨𑐶𑐜𑐶𑐫𑑀 𑐩𑐣𑑀𑐬𑐘𑑂𑐖𑐣 𑐏𑑂𑐫𑐮𑐫𑑂 𑐐𑐸𑐚𑐧𑐣𑑂𑐡𑐷 𑐡𑐸 𑐢𑐵𑐂, 𑐄𑐎𑐶𑑄 𑐣𑐾𑐰𑐵𑑅 𑐎𑐮𑐵𑐎𑐵𑐬𑐥𑐶𑐣𑐶𑐐𑐸 𑐡𑐠𑐸𑐂 𑐴𑐾 𑐩𑐣𑐩𑐸𑐚𑐵𑐧 𑐡𑐸 𑐢𑐵𑐂, 𑐕𑐶𑑄 𑐕𑐸 𑐢𑐫𑐵𑐡𑐷 ?

𑐠𑑂𑐰 𑐏𑑃 𑐖𑐶𑑄 𑐣𑑄 𑐣𑑂𑐫𑐣𑐵𑐐𑐸 𑐡𑐸 𑑋 𑐟𑐬 𑐖𑐶𑑄 𑐨𑑀𑐐𑐾𑐫𑐵𑐫𑐾 𑐁𑑅𑐟𑐎 𑐩𑑂𑐰𑐵𑑅𑐐𑐸𑐮𑐶𑑄 𑐏𑐵𑐳 𑐴𑐾 𑐠𑐸𑐎𑐶𑐫𑐵 𑐰𑐶𑐲𑐫𑐳 𑐕𑐸𑑄 𑐩𑐳𑐶𑐮 𑑋

𑑑𑑗) 𑐡𑐎𑐮𑐾 𑐮𑐶𑐥𑐵 𑐕𑐸 𑐢𑐫𑐵𑐡𑐷 ?

𑐣𑐾𑐥𑐵𑐮𑐨𑐵𑐲𑐵 𑐏𑑂𑐫𑐮𑐫𑑂 𑐁𑐥𑐵𑐮𑑄 𑐳𑑄𑐎𑐶𑐥𑐵 𑐮𑐶𑐳𑐾𑑄 𑐩𑑂𑐫𑐹𑐖𑐶𑐎 𑐨𑐶𑐜𑐶𑐫𑑀 𑐣𑐶𑐬𑑂𑐩𑐵𑐞 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐟𑐬 𑐠𑑅𑐐𑐸 𑐩𑐵𑑄𑐨𑐵𑐲𑐵𑐫𑐵 𑐳𑑄𑐎𑐶𑐥𑐵 𑐰 𑐩𑑂𑐫𑐹𑐖𑐶𑐎 𑐨𑐶𑐜𑐶𑐫𑑀𑐫𑐵𑐟 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐐𑐸 𑐮𑐶𑐳𑐾𑑄 𑐱𑐾𑐫𑐬 𑐫𑐵𑐂𑐥𑐶𑑄 𑐩𑐣𑐹𑐟 𑐁𑐰𑐱𑑂𑐫𑐎 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐳𑐸𑐨𑐵𑐫𑑂 𑑋

NepalBhasa