𑐣𑐾𑐰𑐵𑑅 𑐴𑐸𑐮𑐵𑐥𑑂𑐫𑐵𑐏𑑄 𑐎𑐵𑐳𑐵 𑐎𑑂𑐰𑐔𑐵𑐮

𑐰𑐶𑐱𑑂𑐰 𑐳𑐩𑑂𑐥𑐡𑐵𑐫𑐵 𑐢𑐮𑐏𑐫𑑂 𑐡𑐸𑐠𑑂𑐫𑐵𑐣𑐵𑐔𑑂𑐰𑑄𑐐𑐸 𑐠𑐣𑐫𑐵 𑐰𑐳𑐣𑑂𑐟𑐥𑐹 𑐮𑐵𑐫𑑂𑐎𑐹 𑐮𑐵𑐐𑐵𑐫𑑂 𑐰𑑄𑐐𑐸 𑐱𑐣𑐶𑐰𑐵𑑅 𑐣𑐾𑐰𑐵𑑅 𑐴𑐸𑐮𑐵𑐥𑑂𑐫𑐵𑐏𑑄 𑐢𑐾𑑄𑐢𑐾𑑄𑐧𑐮𑑂𑐮𑐵𑑅 𑐎𑐵𑐳𑐵 –𑑑𑑑𑑔𑑓 𑐖𑐸𑐮 𑑋 𑐣𑐾𑐥𑐵𑐮 𑐬𑐵𑐲𑑂𑐚𑑂𑐬𑐶𑐫 𑐏𑐜𑑂𑐐𑐷 𑐳𑐩𑐵𑐖 𑐫𑐾𑑃 𑐖𑐶𑐮𑑂𑐮𑐵 𑐱𑐵𑐏𑐵𑐫𑐵 𑐐𑑂𑐰𑐳𑐵𑐮𑐫𑑂 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐳𑐴𑐎𑐵𑐬𑑂𑐫𑐫𑑂 𑐄𑐐𑐸 𑐣𑐾𑐰𑐵𑑅 𑐴𑐸𑐮𑐵𑐥𑑂𑐫𑐵𑐏𑑄 𑐢𑐾𑑄𑐢𑐾𑑄𑐧𑐮𑑂𑐮𑐵𑑅 𑐎𑐵𑐳𑐵 𑐖𑐹𑐐𑐸 𑐏𑑅 𑑋

𑐰𑐳𑐣𑑂𑐟𑐥𑐹𑐳𑑂𑐠𑐶𑐟 𑐡𑐱𑐀𑐰𑐟𑐵𑐬 𑐡𑐾𑐐𑑅 𑐎𑑂𑐰𑐳𑑄 𑐔𑑂𑐰𑑄𑐐𑐸 𑐡𑐧𑐸𑐮𑐶𑐂 𑐖𑐹𑐐𑐸 𑐴𑐸𑐮𑐵𑐥𑑂𑐫𑐵𑐏𑑄 𑐎𑐵𑐳𑐵𑐫𑑂 𑐀𑐐𑑂𑐬𑐶𑐫𑐵 𑐳𑐶𑑄𑐴 𑐣𑑂𑐴𑐵𑐥, 𑐬𑐶𑐫𑐵𑐣𑐵 𑐩𑐵𑐣𑐣𑑂𑐢𑐬 𑐮𑐶𑐄, 𑐳𑐸𑐖𑐵𑐟𑐵 𑐣𑐎𑑅𑐩𑐶 𑐮𑐶𑐫𑐵𑑄𑐮𑐶𑐄 𑐮𑐵𑑅𑐐𑐸 𑐡𑐸𑐳𑐵 𑐳𑑂𑐰𑐳𑑂𑐟𑐶𑐴𑐶𑐬𑐵 𑐳𑐶𑐏𑑂𑐬𑐵𑐎𑐵𑐬 𑐰 𑐡𑐺𑐲𑑂𑐚𑐶 𑐩𑐵𑐣𑐣𑑂𑐢𑐬𑑄 𑐴𑑅𑐥𑐵𑑅 𑐳𑐶𑐬𑐥𑐵𑑅 𑐟𑑂𑐫𑐵𑐎𑐾𑐟 𑐟𑐵𑑅𑐮𑐵𑑅𑐐𑐸 𑐡𑐸 𑑋 𑐎𑐵𑐳𑐵𑐫𑑂 𑐣𑑂𑐴𑐵𑐥 𑐮𑐵𑑅𑐩𑑂𑐴 𑐳𑐶𑑄𑐴𑑄 𑐚𑑂𑐬𑐦𑐷𑐮𑐶𑐳𑐾𑑄 𑐗𑐶𑐡𑑂𑐰𑑅 𑐟𑐎𑐵 𑐮𑑂𑐴𑐵𑐟𑐫𑑂 𑐮𑐵𑐎𑐹𑐐𑐸 𑐡𑐸𑐳𑐵 𑐮𑐶𑐄 𑐮𑐵𑑅𑐩𑑂𑐴 𑐩𑐵𑐣𑐣𑑂𑐢𑐬𑑄 𑐣𑑂𑐴𑐫𑑂𑐡𑑂𑐰𑑅 𑐟𑐎𑐵 𑐰 𑐚𑑂𑐬𑐦𑐷, 𑐮𑐶𑐫𑐵𑑄𑐮𑐶𑐄 𑐮𑐵𑑅𑐩𑑂𑐴 𑐣𑐎𑑅𑐩𑐶𑑄 𑐚𑑂𑐬𑐦𑐷𑐮𑐶𑐳𑐾𑑄 𑐣𑑂𑐫𑐵𑐡𑑂𑐰𑑅 𑐟𑐎𑐵 𑐡𑐵𑑄 𑐟𑑂𑐫𑐵𑐎𑐾𑐟 𑐟𑐵𑑅𑐮𑐵𑑅𑐐𑐸 𑐡𑐸 𑑋 𑐴𑑅𑐥𑐵𑑅𑐎𑐠𑑄 𑐳𑐶𑐬𑐥𑐵𑑅 𑐟𑑂𑐫𑐵𑐎𑐾𑐟 𑐳𑐦𑐮 𑐳𑐶𑐏𑑂𑐬𑐵𑐎𑐵𑐬 𑐰 𑐩𑐵𑐣𑐣𑑂𑐢𑐬 𑐣𑐶𑐩𑑂𑐴𑐾𑐳𑐶𑐟𑑄 𑐚𑑂𑐬𑐦𑐷 𑐰 𑐩𑑂𑐴𑐟𑐶𑑄 𑐣𑐶𑐡𑑂𑐰𑑅 𑐟𑐎𑐵 𑐡𑐵𑑄 𑐮𑑅𑐮𑑂𑐴𑐵𑑅𑐐𑐸 𑐏𑑅𑐳𑐵 𑐖𑐸𑐬𑐷 𑐔𑑂𑐰𑐵𑐂𑐎𑐠𑑄 𑐳𑑀𑐴𑐣 𑐱𑐵𑐴𑐷 𑐰 𑐬𑐸𑐩𑐶𑐎𑐵 𑐬𑐵𑐃𑐫𑐵𑐟 𑐰𑐶𑐱𑐾𑐲 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋
𑐎𑐵𑐳𑐵𑐫𑑂 𑐳𑐸𑐲𑑂𑐩𑐵 𑐑𑐮𑐾𑑄 𑐄𑐟𑑂𑐎𑐺𑐲𑑂𑐚 𑐨𑐾𑐲𑐨𑐹𑐲𑐵, 𑐳𑐣𑐵𑐫𑐵 𑐱𑐵𑐴𑐷𑑄 𑐄𑐟𑑂𑐎𑐺𑐲𑑂𑐚 𑐴𑐵𑐄𑐨𑐵𑐄, 𑐌𑐖𑐳𑑂𑐰𑐷 𑐥𑑂𑐬𑐖𑐵𑐥𑐟𑐶𑑄 𑐄𑐟𑑂𑐎𑐺𑐲𑑂𑐚 𑐳𑐩𑐵𑑅𑐫𑐵 𑐳𑐶𑐬𑐥𑐵𑑅 𑐟𑑂𑐫𑐵𑐎𑐾𑐟 𑐟𑐵𑑅𑐮𑐵𑑅𑐐𑐸 𑐡𑐸 𑑋

𑐫𑐾𑑃, 𑐫𑐮, 𑐏𑑂𑐰𑐥𑐮𑐶𑐳𑐾𑑄 𑐎𑐶𑐥𑐸𑐮𑐶𑐂 𑐖𑐹𑐐𑐸 𑐀𑐜𑐶𑐳𑐣𑑄 𑐮𑑂𑐫𑑅𑐥𑐶𑑄 𑐎𑐵𑐳𑐵𑐩𑐶 𑐡𑐠𑐸𑐂 𑐰𑐳𑐣𑑂𑐟𑐥𑐸𑐮𑐶𑐂 𑐮𑐶𑐥𑐵𑑄𑐐𑐸 𑐢𑐾𑑄𑐢𑐾𑑄𑐧𑐮𑑂𑐮𑐵𑑅 𑐎𑐵𑐳𑐵 𑐖𑐹𑐐𑐸 𑐏𑑅 𑑋 𑐏𑑂𑐰𑐷𑐩𑑂𑐴 𑐳𑑂𑐰𑐫𑐵𑑄 𑐀𑐥𑑂𑐰𑑅 𑐎𑐵𑐳𑐵𑐩𑐶𑑄 𑐧𑑂𑐰𑐟𑐶 𑐎𑐵𑑅𑐐𑐸 𑐏𑑅𑐳𑐵 𑐠𑐸𑐥𑐶𑑄 𑐥𑑂𑐫𑑄𑐐𑐹 𑐠𑐵𑐳𑐫𑑂 𑐖𑐹𑐐𑐸 𑐀𑐜𑐶𑐳𑐣𑑄 𑐮𑐶𑐥𑐵𑑄𑐐𑐸 𑐎𑐵𑐳𑐵𑐫𑐵 𑐣𑐶𑑄𑐟𑐶𑑄 𑐥𑐷𑐣𑐶𑐩𑑂𑐴 𑐕𑐣𑑀𑐚 𑐖𑐹𑐐𑐸 𑐏𑑅 𑑋

𑐮𑐶𑐥𑐵𑑄𑐐𑐸 𑐎𑐵𑐳𑐵𑐫𑑂 𑐰𑐬𑐶𑐲𑑂𑐛 𑐣𑐺𑐟𑑂𑐫 𑐣𑐶𑐬𑑂𑐡𑐾𑐱𑐎𑐥𑐶𑑄 𑐣𑐵𑐬𑐵𑐫𑐞𑐡𑐾𑐰𑐷 𑐥𑑂𑐬𑐢𑐵𑐣, 𑐨𑐸𑐰𑐣𑐡𑐵𑐳 𑐱𑑂𑐬𑐾𑐲𑑂𑐛, 𑐬𑐵𑐖𑐸 𑐱𑐵𑐴 𑐰 𑐱𑑂𑐫𑐵𑐩𑐥𑑂𑐬𑐳𑐵𑐡 𑐏𑐜𑑂𑐐𑐷 𑐀𑐠𑐾 𑐴𑐾 𑐳𑑄𑐐𑐷𑐟𑐖𑑂𑐘 𑐀𑐩𑐬𑐬𑐵𑐖 𑐱𑐬𑑂𑐩𑐵, 𑐣𑐵𑑄𑐖𑐵𑑅𑐩𑑂𑐴 𑐳𑑄𑐐𑐷𑐟𑐎𑐵𑐬 𑐐𑑀𑐰𑐶𑐣𑑂𑐡 𑐴𑑂𑐫𑐹𑐩𑐟, 𑐳𑑄𑐐𑐷𑐟𑐎𑐵𑐬𑐮𑐶𑐳𑐾𑑄 𑐩𑑂𑐫𑐸𑐖𑐶𑐎 𑐋𑐣𑑂𑐖𑐬 𑐖𑐸𑐐𑐮 𑐜𑑄𑐐𑑀𑐮 𑐰 𑐧𑐵𑐮𑐎𑐺𑐲𑑂𑐞 𑐰𑑄𑐱𑐷 𑐣𑐶𑐬𑑂𑐞𑐵𑐫𑐎𑐩𑐞𑑂𑐜𑐮𑐫𑑂 𑐔𑑂𑐰𑐣𑐵𑐡𑐷𑐐𑐸 𑐏𑑅 𑑋 𑐀𑐠𑐾 𑐴𑐾 𑐀𑐜𑐶𑐳𑐣𑐫𑑂 𑐩𑐴𑐾𑐱𑐥𑑂𑐬𑐎𑐵𑐱 𑐴𑐵𑐜𑐵 𑐰 𑐧𑐵𑐮𑐩𑐸𑐎𑐸𑐣𑑂𑐡 𑐥𑑂𑐬𑐖𑐵𑐥𑐟𑐶 (𑐫𑐾𑑃), 𑐀𑐣𑑂𑐣𑐥𑐹𑐬𑑂𑐞𑐾𑐱𑑂𑐰𑐬𑐷 𑐱𑑂𑐬𑐾𑐲𑑂𑐛 𑐰 𑐟𑐶𑐩𑐶𑐮𑐵 𑐐𑑀𑐥𑐵𑐮𑐷 (𑐫𑐮), 𑐳𑑄𑐖𑐫 𑐱𑐬𑑂𑐩𑐵 𑐬𑐵𑐖𑑀𑐥𑐵𑐢𑑂𑐫𑐵𑐫 𑐰 𑐳𑑄𑐐𑐷𑐟𑐵 𑐱𑐵𑐴𑐷 (𑐎𑐶𑐥𑐹) 𑐰 𑐬𑐵𑐎𑐾𑐱 𑐠𑐵𑐥𑐵 𑐰 𑐨𑑀𑐐𑐾𑐣𑑂𑐡𑑂𑐬 𑐩𑐵𑐣𑐣𑑂𑐢𑐬 (𑐏𑑂𑐰𑐥) 𑐣𑐶𑐬𑑂𑐞𑐵𑐫𑐎𑐎𑐠𑑄 𑐔𑑂𑐰𑐣𑐵𑐡𑐷𑐐𑐸 𑐏𑑅 𑑋

𑐳𑐩𑐵𑐖𑐫𑐵 𑐫𑐾𑑃 𑐖𑐶𑐮𑑂𑐮𑐵𑐫𑐵 𑐣𑐵𑐫𑑅 𑐳𑐸𑐨𑐵𑐲 𑐱𑐵𑐴𑐷𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐩𑐹𑐥𑐵𑐴𑐵𑑄𑐎𑐠𑑄 𑐗𑐵𑐫𑐵𑐡𑐷𑐩𑑂𑐴 𑐎𑐾𑐣𑑂𑐡𑑂𑐬𑐷𑐫 𑐣𑐵𑐫𑑅 𑐣𑐣𑑂𑐡𑐎𑐶𑐱𑑀𑐬 𑐱𑐵𑐴𑐷𑑄 𑐎𑐵𑐳𑐵𑐫𑑂 𑐟𑑂𑐫𑐵𑑅𑐥𑐶𑑄𑐟 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋 𑐫𑐾𑑃 𑐖𑐶𑐮𑑂𑐮𑐵𑐫𑐵 𑐕𑑂𑐫𑐵𑐘𑑂𑐖𑐾 𑐥𑑂𑐬𑐟𑐶𑐎 𑐱𑐵𑐴𑐷𑑄 𑐮𑐳𑐎𑐸𑐳 𑐫𑐵𑐣𑐵𑐡𑐷𑐐𑐸 𑐎𑐵𑐳𑐵𑐫𑐵 𑐳𑑄𑐫𑑀𑐖𑐣 𑐬𑐵𑐖𑐣 𑐱𑐵𑐴𑐷 𑐫𑐵𑐣𑐵𑐡𑐷𑐐𑐸 𑐏𑑅𑐳𑐵 𑐖𑑂𑐫𑐵𑐗𑑂𑐰𑐮𑐫𑑂 𑐠𑐷𑐠𑐷𑐎𑐠𑑄 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐡𑐷𑐥𑐶𑑄𑐟 𑐣𑑄 𑐩𑐟𑐶𑐣𑐵𑐫𑐵 𑐔𑐶𑑄 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋