𑐩𑐵𑑄𑐨𑐵𑐳𑑄 𑐱𑐶𑐎𑑂𑐲𑐵𑐫𑑂 𑐫𑐸𑐣𑐾𑐳𑑂𑐎𑑀𑐫𑐵 𑐧𑑅

𑐠𑑁𑑄 𑑒𑑔 𑐎𑑂𑐰𑑅𑐐𑐸 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐩𑐵𑐟𑐺𑐨𑐵𑐲𑐵 𑐡𑐶𑐰𑐳 𑐰𑐶𑐱𑑂𑐰𑐣𑑂𑐫𑑄𑐎𑑄 𑐠𑐷𑐠𑐷 𑐖𑑂𑐫𑐵𑐗𑑂𑐰𑑅 𑐫𑐵𑐳𑐾𑑄 𑐴𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑂𑐰 𑐡𑐶𑐰𑐳𑐫𑐵 𑐮𑐳𑐟𑐵𑐫𑑂 𑐬𑐵𑐲𑑂𑐚𑑂𑐬 𑐳𑑄𑐑𑐷𑐫 𑐣𑐶𑐎𑐵𑐫 𑐫𑐸𑐣𑐾𑐳𑑂𑐎𑑀𑐫𑐵 𑐥𑑂𑐬𑐩𑐸𑐏 𑐊𑐞𑑂𑐜𑑂𑐬𑐶𑐄 𑐊𑐖𑐵𑐄𑐮𑐾𑑄 𑐕𑐐𑐹 𑐳𑐣𑑂𑐡𑐾𑐱 𑐖𑐵𑐬𑐷 𑐫𑐵𑐳𑐾𑑄 𑐰𑐶𑐱𑑂𑐰𑐫𑐵 𑐦𑐸𑐎𑑂𑐎𑑄 𑐡𑐾𑐫𑑂𑐟𑐫𑑂𑐟 𑐩𑐵𑐟𑐺𑐨𑐵𑐲𑐵𑐫𑑂 𑐁𑐢𑐵𑐬𑐶𑐟 𑐧𑐴𑐸𑐨𑐵𑐲𑐷 𑐱𑐶𑐎𑑂𑐲𑐵 𑐣𑐷𑐟𑐶 𑐮𑐵𑐐𑐹 𑐫𑐵𑐫𑐾𑐟 𑐣𑐶𑐬𑑂𑐡𑐾𑐱𑐣 𑐧𑐶𑐄𑐐𑐸 𑐡𑐸 𑑋

𑐧𑐴𑐸𑐨𑐵𑐲𑐷 𑐱𑐶𑐎𑑂𑐲𑐵𑑄 𑐩𑐳𑑂𑐟𑐫𑑂𑐳𑑄 𑐫𑐵𑐎𑐣𑑄 𑐳𑐫𑐾𑐎𑐾 𑐦𑐂 𑐢𑐂𑐐𑐸 𑐏𑑃 𑐠𑐷𑐠𑐷 𑐀𑐢𑑂𑐫𑐫𑐣𑑄 𑐣𑑄 𑐥𑑂𑐬𑐩𑐵𑐞𑐶𑐟 𑐖𑐸𑐂𑐢𑐸𑑄𑐎𑐹𑐐𑐸 𑐡𑐸 𑐢𑐵𑐳𑐾𑑄 𑐫𑐸𑐣𑐾𑐳𑑂𑐎𑑀𑑄 𑐠𑐸𑐐𑐸 𑐡𑑃𑐫𑐵 𑐩𑐵𑐟𑐺𑐨𑐵𑐲𑐵 𑐡𑐶𑐰𑐳𑐫𑐵 𑐩𑐹 𑐣𑐵𑐬𑐵 𑐴𑐾 ‘𑐱𑐿𑐎𑑂𑐲𑐶𑐎 𑐬𑐸𑐥𑐵𑐣𑑂𑐟𑐬𑐞𑐫𑐵 𑐮𑐵𑐐𑐶𑑄 𑐧𑐴𑐸𑐨𑐵𑐲𑐷 𑐱𑐶𑐎𑑂𑐲𑐵’ 𑐢𑐎𑐵𑑅 𑐡𑐫𑐾𑐎𑐹𑐐𑐸 𑐡𑐸 𑑋

𑐰𑐶𑐱𑑂𑐰𑐣𑑂𑐫𑑄𑐎𑑄𑐫𑐵 𑐩𑐵𑑄𑐨𑐵𑐫𑑂𑐟 𑐧𑐔𑐾 𑐫𑐵𑐫𑐾𑐐𑐸 𑐮𑐵𑐐𑐶𑑄 𑐫𑐸𑐣𑐾𑐳𑑂𑐎𑑀𑑄 𑐳𑐣𑑂 𑑒𑑐𑑒𑑒 𑐣𑐶𑐳𑐾𑑄 𑑒𑑐𑑓𑑒 𑐟𑐎 𑐩𑐵𑑄𑐨𑐵𑐫𑑂 𑐡𑐱𑐎 𑐣𑑂𑐫𑐵𑐫𑐾𑐎𑐾𑐐𑐸 𑐢𑐎𑐵𑑅 𑐑𑑀𑐲𑐞𑐵 𑐫𑐵𑐣𑐵𑐟𑑅𑐐𑐸 𑐡𑐸 𑑋
𑐠𑑁𑑄𑐎𑐣𑑂𑐴𑐫𑑂 𑐰𑐶𑐱𑑂𑐰𑐫𑑂 𑐮𑑂𑐫𑐣𑐵𑐔𑑂𑐰𑑄𑐐𑐸 𑑖𑑗𑑐𑑐 𑐐𑐹 𑐨𑐵𑐫𑑂𑐟 𑐩𑐢𑑂𑐫𑑂 𑑔𑑐 𑐥𑑂𑐬𑐟𑐶𑐱𑐟 𑐨𑐵𑐲𑐵𑐫𑐵 𑐥𑐴𑐸𑑃𑐔 𑐱𑐶𑐎𑑂𑐲𑐵𑐫𑑂 𑐩𑐡𑐸𑐐𑐸 𑐰 𑐠𑑂𑐰 𑐨𑐵𑐫𑑂𑐟 𑐮𑑀𑐥 𑐖𑐸𑐂𑐐𑐸 𑐳𑐩𑑂𑐨𑐵𑐰𑐣𑐵 𑐫𑐎𑑂𑐰 𑐡𑐸 𑐢𑐵𑐳𑐾𑑄 𑐁𑑅 𑐱𑐶𑐎𑑂𑐲𑐵𑐫𑑂 𑐩𑐵𑑄𑐨𑐵𑐫𑑂𑐫𑐵 𑐥𑑂𑐬𑐫𑑀𑐐 𑐰𑑂𑐫𑐵𑐥𑐎 𑐬𑐸𑐥𑑄 𑐫𑐵𑐣𑐵 𑐫𑑄𑐎𑐾𑐩𑐵𑑅𑐐𑐸 𑐏𑑃 𑐣𑑄 𑐫𑐸𑐣𑐾𑐳𑑂𑐎𑑀𑑄 𑐢𑐵𑑅𑐐𑐸 𑐡𑐸 𑑋

𑐠𑑁𑑄 𑐩𑐵𑐨𑐵𑐫𑑂 𑐡𑐶𑐰𑐳𑐫𑐵 𑐮𑐳𑐟𑐵𑐫𑑂 𑐳𑑄𑐫𑐸𑐎𑑂𑐟 𑐬𑐵𑐲𑑂𑐚𑑂𑐬 𑐳𑑄𑐑𑐫𑐵 𑐖𑑂𑐫𑐵𑐎𑐸𑐠𑐷 𑐧𑑄𑐐𑐮𑐵𑐡𑐾𑐱𑐷 𑐬𑐵𑐖𑐡𑐹𑐟𑐵𑐰𑐵𑐳𑐫𑐵 𑐐𑑂𑐰𑐳𑐵𑐮𑐫𑑂 𑐕𑐐𑐹 𑐰𑐶𑐱𑐾𑐲 𑐐𑑀𑐲𑑂𑐛𑐷 𑐫𑐵𑐂𑐐𑐸 𑐖𑐹𑐐𑐸 𑐡𑐸 𑐐𑐸𑐎𑐷 𑐠𑐷𑐠𑐷 𑐡𑐾𑐫𑑂𑐫𑐵 𑐥𑑂𑐬𑐟𑐶𑐣𑐶𑐢𑐶𑐟𑐫𑑂𑐳𑑄 𑐧𑑂𑐰𑐟𑐶 𑐎𑐵𑐂 𑑋

𑐣𑐾𑐥𑐵𑐮𑐫𑑂 𑐣𑑄 𑐠𑑁𑐿𑑄 𑐣𑐾𑐥𑐵𑐮 𑐥𑑂𑐬𑐖𑑂𑐘𑐵 𑐥𑑂𑐬𑐟𑐶𑐲𑑂𑐛𑐵𑐣 𑐮𑐶𑐳𑐾𑑄 𑐠𑐷𑐠𑐷 𑐨𑐵𑐲𑐶𑐎 𑐏𑐮𑑅 𑐥𑐸𑐔𑑅𑐟𑐫𑑂𑐳𑑄 𑐩𑐵𑐟𑐺𑐨𑐵𑐲𑐵 𑐡𑐶𑐰𑐳 𑐣𑑂𑐫𑐵𑐫𑐾𑐎𑐾𑐐𑐸 𑐟𑐫𑐵𑐬𑐷 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐩𑐵𑐟𑐺𑐨𑐵𑐲𑐵 𑐡𑐶𑐰𑐳 𑐣𑑂𑐫𑐵𑐫𑐾𑐎𑐾𑐐𑐸 𑐖𑑂𑐫𑐵 𑐧𑑄𑐐𑐮𑐵𑐡𑐾𑐱𑑄 𑐱𑐸𑐬𑐸 𑐖𑐹𑐐𑐸 𑐖𑐸𑐫𑐵𑑅 𑐣𑐾𑐥𑐵𑑅 𑐳𑑂𑐠𑐶𑐟 𑐧𑑄𑐐𑐮𑐵𑐡𑐾𑐱 𑐡𑐹𑐟𑐵𑐰𑐵𑐳𑑄 𑐣𑑄 𑐖𑑂𑐫𑐵𑐗𑑂𑐰𑑅 𑐫𑐵𑐂𑐐𑐸 𑐐𑑂𑐰𑐳𑐵𑑅 𑐡𑐸 𑑋 𑐀𑐠𑐾 𑐴𑐾 𑐮𑐶𑐖𑑅 𑐣𑐾𑐥𑐵𑐮–𑐨𑐵𑐲𑐵 𑐎𑐰𑐶𑐟𑐵 𑐡𑐧𑐹𑐥𑐵𑐏𑐾𑑄 𑐱𑐣𑐶𑐰𑐵𑑅 𑐰 𑐣𑐾𑐰𑐵𑑅 𑐥𑐟𑑂𑐬𑐎𑐵𑐬 𑐬𑐵𑐲𑑂𑐚𑑂𑐬𑐶𑐫 𑐡𑐧𑐹𑐥𑐵𑐏𑐾𑑄 𑐱𑐸𑐎𑑂𑐬𑐰𑐵𑑅 𑐖𑑂𑐫𑐵𑐗𑑂𑐰𑑅 𑐫𑐵𑐫𑐾𑐟𑑂𑐫𑑄𑐐𑐸 𑐡𑐸 𑑋