𑐳𑐾𑐣𑑂𑐚 𑐖𑐾𑐨𑐶𑐫𑐬𑑂𑐳𑐫𑑂 𑐩𑐴𑐵𑐣𑐐𑐬𑑄 𑐨𑐬𑑂𑐣𑐵 𑐥𑐣𑐵 𑐧𑐶𑐮

𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐖𑐵𑐄𑐮𑐵𑐏𑑂𑐫𑐮𑐫𑑂 𑐔𑑂𑐰𑑄𑐐𑐸 𑐳𑐾𑐣𑑂𑐚 𑐖𑐾𑐨𑐶𑐫𑐬𑑂𑐳 𑐳𑑂𑐎𑐸𑐮𑐫𑑂 𑐰𑐶𑐡𑑂𑐫𑐵𑐬𑑂𑐠𑐷 𑐨𑐬𑑂𑐣𑐵 𑐥𑐣𑐵 𑐧𑐶𑐄𑐐𑐸 𑐡𑐸 𑑋 𑐳𑑂𑐎𑐸𑐮𑑄 𑐳𑑄𑐰𑐿𑐢𑐵𑐣𑐶𑐎 𑐰 𑐎𑐵𑐣𑐸𑐣𑐷 𑐁𑐢𑐵𑐬𑐫𑑂 𑐨𑐬𑑂𑐣𑐵𑐫𑐵 𑐣𑐶𑐟𑐶𑑄 𑐎𑑀𑐚𑐵 𑐣𑐶𑐬𑑂𑐢𑐵𑐬𑐞 𑐩𑐫𑐵𑑅𑐐𑐸 𑐢𑐵𑐳𑐾𑑄 𑐨𑐬𑑂𑐣𑐵 𑐥𑑂𑐬𑐎𑑂𑐬𑐶𑐫𑐵 𑐥𑐣𑐵𑐧𑐶𑐄𑐐𑐸 𑐏𑑅 𑑋

𑐫𑐮 𑐩𑐣𑐥𑐵𑐫𑐵 𑐥𑑂𑐬𑐩𑐸𑐏 𑐥𑑂𑐬𑐱𑐵𑐳𑐎𑐷𑐫 𑐀𑐢𑐶𑐎𑐺𑐟𑑄 𑐳𑐾𑐣𑑂𑐚 𑐖𑐾𑐨𑐶𑐫𑐬𑑂𑐳𑐫𑐵 𑐎𑐬𑑂𑐩𑐔𑐵𑐬𑐷 𑐰 𑐖𑐾𑐳𑐶𑐚 𑐳𑑀𑐳𑐵𑐂𑐚𑐷𑐫𑐵 𑐩𑐣𑐹𑐟𑐫𑑂 𑐥𑐬𑐶𑐰𑐵𑐬𑐫𑐵 𑐰𑐶𑐡𑑂𑐫𑐵𑐬𑑂𑐠𑐷 𑐨𑐬𑑂𑐣𑐵 𑐫𑐵𑐫𑐾𑐢𑐸𑑄𑐎𑐵𑑅 𑐮𑑂𑐫𑑄 𑐡𑐸𑐐𑐸 𑐳𑐶𑐚𑐫𑑂 𑐖𑐎 𑐎𑑀𑐚𑐵 𑐎𑑂𑐰𑑅𑐕𑐶𑐣𑐵𑑅 ‘𑐮𑐚𑑂𑐬𑐷’ 𑐫𑐵𑑅𑐐𑐸𑐮𑐶𑑄 𑐄𑐎𑐶𑐫𑐵𑐟 𑐥𑐣𑐾𑐩𑐵𑑅𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋

𑐣𑐾𑐥𑐵𑐮 𑐖𑐾𑐳𑐶𑐚 𑐳𑑀𑐳𑐵𑐂𑐚𑐷 𑐀𑐣𑑂𑐟𑐬𑑂𑐐𑐟 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐱𑐿𑐎𑑂𑐲𑐶𑐎 𑐳𑑄𑐳𑑂𑐠𑐵𑐫𑑂 𑐖𑑂𑐫𑐵 𑐫𑐵𑐂𑐥𑐶𑑄 𑐩𑐣𑐹𑐟𑐫𑑂 𑐕𑐾𑑃𑐖𑑅𑐥𑐶𑑄𑐟 𑐀𑐥𑑂𑐰𑑅 𑐩𑑁𑐎𑐵 𑐧𑐷𑐐𑐸 𑐰 𑐳𑐬𑑂𑐰𑐳𑐵𑐢𑐵𑐬𑐞 𑐖𑐣𑐟𑐵𑐫𑐵 𑐩𑐳𑑂𑐟𑐫𑑂𑐳𑑄 𑐩𑑂𑐴𑑀 𑐖𑐎 𑐎𑑀𑐚𑐵 𑐎𑐵𑐫𑐾 𑐡𑐂𑐐𑐸 𑐀𑐰𑐳𑑂𑐠𑐵 𑐔𑐷𑐎𑐵𑑅 𑐣𑑂𑐫𑐵𑐫𑐥𑐹𑐬𑑂𑐞 𑐰𑐶𑐢𑐶 𑐣𑐵𑐮𑐾𑐟 𑐳𑑂𑐎𑐸𑐮𑐫𑐵𑐟 𑐢𑐫𑐵𑐐𑐸 𑐏𑑃 𑐥𑑂𑐬𑐱𑐵𑐳𑐎𑐷𑐫 𑐀𑐢𑐶𑐎𑐺𑐟 𑐐𑐞𑐾𑐱 𑐀𑐬𑑂𑐫𑐵𑐮𑑄 𑐎𑐣𑐵𑐡𑐷𑐐𑐸 𑐡𑐸 𑑋 𑐳𑐾𑐣𑑂𑐚 𑐖𑐾𑐨𑐶𑐫𑐬𑑂𑐳𑐫𑑂 𑐩𑐳𑑂𑐟 𑐨𑐬𑑂𑐣𑐵 𑐫𑐵𑐫𑐾𑐧𑐮𑐫𑑂 𑐣𑑂𑐫𑐵𑐫𑐥𑐹𑐬𑑂𑐞 𑐀𑐰𑐳𑑂𑐠𑐵 𑐡𑐫𑐾𑐎𑐾𑐐𑐸 𑐣𑐶𑐟𑐶𑑄 𑐟𑐟𑑂𑐎𑐵𑐮 𑐨𑐬𑑂𑐣𑐵 𑐥𑑂𑐬𑐎𑑂𑐬𑐶𑐫𑐵 𑐥𑐣𑐾𑐟 𑐥𑐟𑑂𑐬𑐵𑐔𑐵𑐬 𑐫𑐵𑐣𑐵𑐐𑐸 𑐏𑑃 𑐣𑑄 𑐰𑐫𑑂𑐎𑐮𑑄 𑐎𑐣𑐵𑐡𑐶𑐮 𑑋

𑐳𑐾𑐣𑑂𑐚 𑐖𑐾𑐨𑐶𑐫𑐬𑑂𑐳𑑄 𑐥𑐸𑐮𑐵𑑄𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐫𑐵 𑐩𑐳𑑂𑐟𑐫𑑂𑐟 𑑑𑑐 𑐥𑑂𑐬𑐟𑐶𑐱𑐟, 𑐧𑑂𑐰𑐣𑐵𑐔𑑂𑐰𑑄𑐥𑐶𑑄 𑐩𑐳𑑂𑐟𑐫𑑂 𑐎𑐶𑐖𑐵 𑐎𑐾𑐴𑐾𑑃𑐥𑐶𑑄𑐟 𑑑𑑐 𑐥𑑂𑐬𑐟𑐶𑐱𑐟, 𑐫𑐮 𑐩𑐣𑐥𑐵 𑑔 𑐣𑐩𑑂𑐧𑐬 𑐰𑐜𑐵𑐫𑐵 𑐰𑐶𑐡𑑂𑐫𑐵𑐬𑑂𑐠𑐷𑐫𑐵𑐟 𑑕 𑐥𑑂𑐬𑐟𑐶𑐱𑐟 𑐰 𑐫𑐮 𑐩𑐴𑐵𑐣𑐐𑐬 𑐡𑐸𑐣𑐾𑐫𑐵 𑐰𑐶𑐡𑑂𑐫𑐵𑐬𑑂𑐠𑐷𑐫𑐵𑐟 𑑑𑑐 𑐥𑑂𑐬𑐟𑐶𑐱𑐟 𑐎𑑀𑐚𑐵 𑐎𑑂𑐰𑑅𑐕𑐶𑐣𑐵𑐟𑑅𑐐𑐸 𑐡𑐸 𑑋 𑐠𑑂𑐰𑐫𑐵𑑄 𑐮𑐶𑐥𑐵 𑐮𑑂𑐫𑑄 𑐡𑐣𑐶𑐐𑐸 𑐳𑐶𑐚𑐫𑑂 𑐖𑐎 𑐏𑐸𑐮𑐵 ‘𑐮𑐚𑑂𑐬𑐷’ 𑐫𑐵𑐣𑐵𑑅 𑐨𑐬𑑂𑐣𑐵 𑐎𑐵𑐫𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐏𑑃 𑐣𑑄 𑐥𑑂𑐬𑐱𑐵𑐳𑐎𑐷𑐫 𑐀𑐢𑐶𑐎𑐺𑐟 𑐀𑐬𑑂𑐫𑐵𑐮𑑄 𑐎𑐣𑐵𑐡𑐷𑐐𑐸 𑐡𑐸 𑑋