𑐱𑐶𑐟𑐮𑐵 𑐩𑐵.𑐰𑐶.𑐂 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄𑐐𑐸 𑐎𑑀𑐜 𑐎𑑂𑐮𑐧

𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑑑𑑖 𑐰𑐜𑐵 𑐮𑑂𑐴𑐸𑐟𑐶𑐳𑑂𑐠𑐶𑐟 𑐱𑐶𑐟𑐮𑐵 𑐩𑐵𑐢𑑂𑐫𑐩𑐶𑐎 𑐰𑐶𑐡𑑂𑐫𑐵𑐮𑐫𑐫𑑂 𑐡𑐾𑐫𑑂𑐫𑐵 𑐴𑐾 𑐣𑑂𑐴𑐵𑐥𑐵𑑄𑐐𑐸 ‘𑐎𑑀𑐜 𑐎𑑂𑐮𑐧’𑐫𑐵 𑐳𑑂𑐠𑐵𑐥𑐣𑐵 𑐫𑐵𑑅𑐐𑐸 𑐡𑐸 𑑋 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐄𑐥𑐥𑑂𑐬𑐩𑐸𑐏 𑐳𑐸𑐣𑐶𑐟𑐵 𑐜𑑄𑐐𑑀𑐮𑑄 𑐰𑑄𑐐𑐸 𑐱𑐸𑐎𑑂𑐬𑐰𑐵𑑅 𑐕𑐐𑐹 𑐖𑑂𑐫𑐵𑐗𑑂𑐰𑑅𑐫𑐵 𑐡𑐠𑐸𑐂 𑐰𑐶𑐡𑑂𑐫𑐵𑐮𑐫𑐫𑑂 𑐳𑑂𑐠𑐵𑐥𑐣𑐵 𑐫𑐵𑑅𑐐𑐸 𑐎𑑀𑐜 𑐎𑑂𑐮𑐧𑐫𑐵 𑐄𑐮𑐾𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐄𑐐𑐸 𑐂𑐮𑐫𑑂 𑐄𑐥𑐥𑑂𑐬𑐩𑐸𑐏 𑐜𑑄𑐐𑑀𑐮𑐮𑐶𑐳𑐾𑑄 𑐱𑐶𑐎𑑂𑐲𑐵 𑐰𑐶𑐨𑐵𑐐 𑐥𑑂𑐬𑐩𑐸𑐏 𑐳𑐶𑐟𑐵𑐬𑐵𑐩 𑐎𑑀𑐂𑐬𑐵𑐮𑐵, 𑐱𑐶𑐎𑑂𑐲𑐵 𑐳𑐮𑑂𑐮𑐵𑐴𑐎𑐵𑐬 𑐬𑐾𑐱𑐸 𑐝𑐸𑑄𑐐𑐵𑐣𑐵 𑐀𑐬𑑂𑐫𑐵𑐮, 𑐁𑐂𑐚𑐷 𑐰𑐶𑐖𑑂𑐘 𑐳𑐐𑐸𑐣 𑐝𑐸𑑄𑐐𑐵𑐣𑐵 𑐮𑐐𑐵𑐫𑐟𑐫𑐵 𑐥𑐸𑐔𑐮𑑄 𑐰𑐶𑐡𑑂𑐫𑐵𑐮𑐫𑐫𑐵 𑐧𑐸𑐎 𑐦𑑂𑐬𑐶 𑐦𑑂𑐬𑐵𑐂𑐜𑐾, 𑐱𑐶𑐎𑑂𑐲𑐵𑐫𑑂 𑐳𑐷𑐥 𑐰𑐶𑐎𑐵𑐳 𑐀𑐣𑑂𑐟𑐬𑑂𑐐𑐟 𑐧𑑂𑐫𑐸𑐚𑐶𑐳𑐶𑐫𑐣 𑐰 𑐴𑐾𑐫𑐬 𑐳𑑂𑐚𑐵𑐂𑐮, 𑐣𑐶𑐫𑐩𑐶𑐟 𑐬𑐸𑐥𑑄 𑐎𑐎𑑂𑐲𑐵𑐫𑑂 𑐖𑐸𑐫𑐵𑐔𑑂𑐰𑑄𑐐𑐸 𑐴𑑂𑐫𑐵𑐞𑑂𑐜𑐳 𑐀𑐣 𑐀𑐣𑑂𑐟𑐬𑑂𑐐𑐟 𑐠𑐷𑐠𑐷 𑐐𑐟𑐶𑐰𑐶𑐢𑐶 𑐰 𑐎𑑂𑐬𑐶𑐫𑐵𑐎𑐮𑐵𑐥𑐫𑐵 𑐀𑐣𑐸𑐐𑐩𑐣 𑐣𑑄 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐰𑐶𑐡𑑂𑐫𑐵𑐮𑐫𑐫𑑂 𑐳𑑂𑐎𑐵𑐄𑐚, 𑐣𑐾𑐥𑐵𑐮𑐨𑐵𑐲𑐵 𑐳𑑄𑐐𑐷𑐟, 𑐎𑐶𑐥𑐵 𑐔𑑂𑐰𑐖𑑂𑐫𑐵 𑐠𑐾𑑄𑐖𑑂𑐫𑐵𑑅𑐐𑐸 𑐳𑐷𑐥 𑐟𑐵𑐮𑐶𑐩 𑐮𑐐𑐵𑐫𑐟𑐫𑐵 𑐰𑐶𑐲𑐫𑐫𑑂 𑐳𑑂𑐫𑐣𑐾𑐎𑐣𑐾 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐰𑐶𑐡𑑂𑐫𑐵𑐮𑐫𑐫𑐵 𑐥𑑂𑐬𑐢𑐵𑐣𑐵𑐢𑑂𑐫𑐵𑐥𑐎 𑐮𑐎𑑂𑐲𑑂𑐩𑐞 𑐱𑑂𑐬𑐾𑐲𑑂𑐛𑑄 𑐰𑐫𑑂𑐎𑑅𑐥𑐶𑑄 𑐰𑐶𑐡𑑂𑐫𑐵𑐮𑐫𑐫𑑂 𑐖𑐸𑐣𑐶𑐫𑐬 𑐬𑐾𑐜𑐎𑑂𑐬𑐳 𑐳𑐬𑑂𑐎𑐮 (𑐖𑐸𑐬𑐾𑐳), 𑐂𑐎𑑀 𑐎𑑂𑐮𑐧, 𑐖𑐬𑑂𑐣𑐮 𑐥𑑂𑐬𑐎𑐵𑐱𑐣𑐎𑑂𑐮𑐧, 𑐜𑐷𑐁𑐬𑐁𑐬 𑐎𑑂𑐮𑐧, 𑐳𑑂𑐎𑐵𑐄𑐚 𑐎𑑀𑐜 𑐎𑑂𑐮𑐧, 𑐧𑐵𑐮𑐎𑑂𑐮𑐧, 𑐜𑐶𑐧𑐾𑐚 𑐎𑑂𑐮𑐧 𑐮𑐐𑐵𑐫𑐟 𑐠𑐷𑐠𑐷 𑐗𑐶𑐐𑐹 𑐎𑑂𑐮𑐧 𑐳𑑄𑐔𑐵𑐮𑐣 𑐖𑐸𑐫𑐵𑐔𑑂𑐰𑑄𑐐𑐸𑐣𑐵𑐥𑑄 𑐄𑐎𑐶𑐫𑐵 𑐐𑐟𑐶𑐰𑐶𑐢𑐶𑐫𑐵 𑐧𑐵𑐬𑐾 𑐣𑑄 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐐𑐸 𑐏𑑅 𑑋

𑐰𑑂𑐫𑐰𑐳𑑂𑐠𑐵𑐥𑐣 𑐳𑐩𑐶𑐟𑐶𑐫𑐵 𑐀𑐢𑑂𑐫𑐎𑑂𑐲 𑐱𑐸𑐎𑑂𑐬𑐮𑐵𑐮 𑐱𑑂𑐬𑐾𑐲𑑂𑐛𑑄 𑐰𑐶𑐡𑑂𑐫𑐵𑐮𑐫𑐫𑑂 𑐐𑐛𑐣 𑐫𑐵𑐣𑐵𑐟𑑅𑐐𑐸 𑐡𑐎𑑂𑐰𑑄 𑐎𑑂𑐮𑐧 𑐳𑐎𑑂𑐬𑐶𑐫 𑐡𑐸𑐐𑐸 𑐰 ‘𑐱𑐶𑐎𑑂𑐲𑐵𑐫𑑂 𑐳𑐷𑐥’ 𑐖𑑂𑐫𑐵𑐗𑑂𑐰𑑅 𑐀𑐣𑑂𑐟𑐬𑑂𑐐𑐟 𑐳𑑁𑐣𑑂𑐡𑐬𑑂𑐫 𑐎𑐮𑐵 𑐰 𑐴𑐾𑐫𑐬 𑐳𑑂𑐚𑐵𑐂𑐮 𑐳𑐩𑑂𑐧𑐣𑑂𑐢𑐷 𑐟𑐵𑐮𑐶𑐩𑐫𑑂 𑐰𑐶𑐡𑑂𑐫𑐵𑐮𑐫𑐫𑐵 𑐩𑐶𑐳𑐵 𑐰 𑐩𑐶𑐖𑑄 𑐰𑐶𑐡𑑂𑐫𑐵𑐬𑑂𑐠𑐷𑐫𑐵 𑐄𑐟𑐶𑐎𑑄 𑐳𑐴𑐨𑐵𑐐𑐶𑐟𑐵 𑐡𑐸𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋

𑐎𑑀𑐜 𑐎𑑂𑐮𑐧𑐫𑐵 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐳𑑄 𑐏𑐸𑐮𑑂𑐮𑐵 𑐔𑑁𑐬 𑐰𑐵 𑐏𑑂𑐫𑐮𑐫𑑂 𑐩𑑂𑐴𑐶𑐟𑐷𑐐𑐸 𑐦𑐸𑐚𑐧𑐮, 𑐧𑐵𑐳𑑂𑐎𑐾𑐚𑐧𑐮, 𑐨𑐮𑐶𑐧𑐮 𑐠𑐾𑑄𑐖𑑂𑐫𑐵𑑅𑐐𑐸 𑐎𑐵𑐳𑐵 𑐩𑑂𑐴𑐶𑐟𑐵𑑅 𑐣𑑂𑐴𑑂𑐫𑐂𑐥𑐸𑐎 𑐎𑐩𑑂𑐥𑑂𑐫𑐸𑐚𑐬𑐫𑑂 𑐣𑑂𑐴𑐹𑐐𑐸 𑐎𑐵𑐳𑐵 𑐡𑐫𑐾𑐎𑐾 𑐦𑐂 𑑋 𑐠𑐸𑐎𑐶𑐫𑐵 𑐮𑐶𑐢𑑄𑐳𑐵 𑐢𑐂𑐐𑐸 𑐳𑑂𑐎𑑂𑐬𑐵𑐫𑑂𑐔 𑐎𑑀𑐜𑐶𑐒 𑐏𑑅 𑑋 𑐠𑐸𑐎𑐠𑑄 𑐣𑐶𑐬𑑂𑐩𑐵𑐞 𑐫𑐵𑑅𑐐𑐸 𑐖𑑂𑐫𑐵𑐗𑑂𑐰𑑅𑐟 𑑑𑑖𑑐 𑐐𑐹 𑐡𑐾𑐫𑑂𑐫𑐵 𑐰𑐶𑐡𑑂𑐫𑐵𑐠𑐷𑐟𑐫𑑂 𑐣𑐾𑐚𑐰𑐬𑑂𑐎𑐫𑑂 𑐠𑑂𑐫𑐣𑐷 𑑋 𑐀𑐮𑐾 𑐠𑑂𑐰 𑐥𑑂𑐮𑐾𑐚 𑐦𑐵𑐬𑑂𑐩𑐥𑐵𑐏𑐾𑑄 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫𑐳𑑂𑐟𑐬𑐫𑑂 𑐟𑐎𑑄 𑐢𑐾𑑄𑐢𑐾𑑄𑐧𑐮𑑂𑐮𑐵𑑅 𑐫𑐵𑐫𑐾 𑐦𑐂 𑑋

𑐗𑐶𑑄𑐥𑑂𑐫𑑄𑐐𑐹 𑐰𑐶𑐡𑑂𑐫𑐵𑐮𑐫𑐫𑑂 𑐱𑐸𑐬𑐸 𑐫𑐵𑐫𑐾𑐟𑑂𑐫𑑄𑐐𑐸 𑐎𑑀𑐜 𑐎𑑂𑐮𑐧 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐡𑐸𑐣𑐾𑐫𑐵 𑐡𑐎𑑂𑐰𑑄 𑐳𑐵𑐬𑑂𑐰𑐖𑐣𑐶𑐎 𑐰𑐶𑐡𑑂𑐫𑐵𑐮𑐫𑐫𑑂 𑐳𑑂𑐠𑐵𑐥𑐣𑐵 𑐫𑐵𑐫𑐾𑐐𑐸 𑐟𑐫𑐵𑐬𑐷 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐄𑐐𑐸 𑐎𑑂𑐮𑐧𑐥𑐵𑐏𑐾𑑄 𑐧𑑂𑐰𑑃𑐩𑐶𑐥𑐶𑑄𑐳𑑄 𑐎𑑀𑐜𑐶𑐒, 𑐊𑐣𑐶𑐩𑐾𑐳𑐣, 𑐳𑐵𑐩𑐵𑐣𑑂𑐫 𑐥𑑂𑐬𑑀𑐐𑑂𑐬𑐵𑐩𑐶𑐒𑐮𑐶𑐳𑐾𑑄 𑐰𑐾𑐧𑐳𑐵𑐂𑐚 𑐰 𑐠𑐷𑐠𑐷 𑐎𑐠𑑄𑐫𑐵 𑐊𑐥𑑂𑐮𑐶𑐎𑐾𑐱𑐣 (𑐊𑐥𑑂𑐳) 𑐡𑐫𑐾𑐎𑐾𑐐𑐸 𑐎𑑂𑐬𑐶𑐫𑐵𑐎𑐮𑐵𑐥 𑐧𑐵𑐬𑐾 𑐳𑐫𑐾𑐎 𑐳𑐷𑐎𑐾 𑐫𑐵𑐫𑐾 𑐦𑐂 𑑋

𑐜𑐶𑐖𑐶𑐚𑐮 𑐱𑐶𑐎𑑂𑐲𑐵 𑐥𑐬𑐶𑐡𑐺𑐱𑑂𑐫 𑐄𑐟𑑂𑐠𑐵𑐣 𑐫𑐵𑐫𑐾𑐟 𑐰 𑐧𑑂𑐰𑑃𑐩𑐶 𑐰 𑐳𑑂𑐫𑐣𑐵𑐩𑐶𑐥𑐶𑑄𑐟 𑐣𑑂𑐴𑐹 𑐣𑑂𑐴𑐹𑐐𑐸𑐎𑐠𑑄𑐫𑐵 𑐥𑑂𑐬𑐵𑐰𑐶𑐢𑐶𑐎 𑐄𑐥𑐎𑐬𑐞𑐮𑐶𑐳𑐾 𑐳𑐱𑐎𑑂𑐟 𑐫𑐵𑐣𑐵 𑐫𑑄𑐎𑐾𑐐𑐸 𑐰𑐶𑐔𑐵𑑅𑐎𑐠𑑄 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 ‘𑐜𑐶𑐖𑐶𑐚𑐮 𑐊𑐞𑑂𑐜 𑐧𑐶𑐫𑑀𑐣𑑂𑐜’𑐮𑐶𑐳𑐾 𑐳𑐴𑐎𑐵𑐬𑑂𑐫 𑐫𑐵𑐣𑐵𑑅 𑐥𑑂𑐬𑐟𑑂𑐫𑐾𑐎 𑐳𑐵𑐩𑐸𑐡𑐵𑐫𑐶𑐎 𑐧𑑂𑐰𑐣𑐾𑐎𑐸𑐠𑐶𑐂 𑐔𑑂𑐧𑐎𑐄𑐡𑐨𑐔𑐔𑐠–𑐊𑐲𑑂 𑑃𑐫𑐐𑐮𑐩𑐧𑐟𑐲𑑂𑐫𑐮 𑐆𑐫𑐩𑐨 𑐆𑐐𑐶𑐡 𑐐𑐛𑐣 𑐫𑐵𑐫𑐾𑐐𑐸 𑐱𑐸𑐬𑐸 𑐫𑐵𑑅𑐐𑐸 𑐰𑐶𑐡𑑂𑐫𑐵𑐮𑐫𑐫𑐵 𑐥𑑂𑐬𑐢𑐵𑐣𑐵𑐢𑑂𑐫𑐵𑐥𑐎 𑐱𑑂𑐬𑐾𑐲𑑂𑐛𑑄 𑐎𑐣𑐵𑐡𑐶𑐮 𑑋

𑐁𑐂𑐚𑐷 𑐰𑐶𑐖𑑂𑐘 𑐝𑐸𑑄𑐐𑐵𑐣𑐵𑐫𑐵𑐎𑐠𑑄 𑐟𑐐𑐶𑑄 𑑔 𑐣𑐶𑐳𑐾𑑄 𑐟𑐐𑐶𑑄 𑑙 𑐟𑐎𑐫𑐵 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐟 𑐄𑐩𑐾𑐬 𑐳𑐩𑐹𑐴𑐫𑑂 𑐟𑐫𑐵𑑅 𑐎𑑀𑐜𑐶𑐒 𑐳𑐩𑑂𑐧𑐣𑑂𑐢𑐷 𑐖𑑂𑐫𑐵𑐗𑑂𑐰𑑅 𑐳𑑄𑐔𑐵𑐮𑐣 𑐫𑐵𑐫𑐾𑐐𑐸 𑐰 𑐠𑐸𑐎𑐠𑑄𑐫𑐵 𑐖𑑂𑐫𑐵𑐗𑑂𑐰𑐮𑑄 𑐧𑑂𑐰𑐣𑐵𑐩𑐶𑐟𑐫𑑂 𑐳𑐷𑐥, 𑐱𑐿𑐎𑑂𑐲𑐶𑐎 𑐰 𑐳𑑀𑐔𑐫𑐵𑐮𑐶𑐳𑐾𑑄 𑐁𑐮𑑀𑐔𑐣𑐵𑐟𑑂𑐩𑐎 𑐰𑐶𑐔𑐵𑐬𑐫𑐵 𑐰𑐶𑐎𑐵𑐳𑐫𑑂 𑐣𑑄 𑐐𑑂𑐰𑐵𑐴𑐵𑐮𑐶 𑐖𑐹 𑐰𑐣𑐷𑐐𑐸 𑐰𑐶𑐱𑑂𑐰𑐵𑐳 𑐫𑐵𑑅𑐐𑐸 𑐡𑐸 𑑋

𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐰 𑐱𑐶𑐟𑐮𑐵 𑐩𑐵𑐢𑑂𑐫𑐩𑐶𑐎 𑐰𑐶𑐡𑑂𑐫𑐵𑐮𑐫𑐫𑐵 𑐳𑐴𑐎𑐵𑐬𑑂𑐫𑐫𑑂 𑐰𑐶𑐡𑑂𑐫𑐵𑐮𑐫𑐫𑐵 𑐠𑑅𑐐𑐸 𑐴𑐾 𑐰𑐾𑐧𑐳𑐵𑐂𑐚 𑐣𑐶𑐬𑑂𑐩𑐵𑐞 𑐳𑐩𑑂𑐥𑐣𑑂𑐣 𑐫𑐵𑐣𑐵𑑅 𑐎𑐣𑑂𑐚𑐾𑐣𑑂𑐚 𑐩𑑂𑐫𑐵𑐣𑐾𑐩𑐾𑐣𑑂𑐚𑐫𑐵 𑐖𑑂𑐫𑐵 𑐣𑑄 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐸𑐎𑐶𑑄 𑐳𑐵𑐩𑐸𑐡𑐵𑐫𑐶𑐎 𑐰𑐶𑐡𑑂𑐫𑐵𑐮𑐫𑑄 𑐠𑑅𑐐𑐸 𑐩𑑂𑐴𑐳𑐷𑐎𑐵 𑐰𑐶𑐱𑑂𑐰𑐫𑐵 𑐣𑑂𑐴𑑂𑐫𑑅𑐣𑐾 𑐠𑑂𑐫𑑄𑐎𑐾𑐟 𑐐𑑂𑐰𑐵𑐴𑐵𑐮𑐶 𑐖𑐸𑐂 𑑋

𑐄𑐥𑐥𑑂𑐬𑐩𑐸𑐏 𑐜𑑄𑐐𑑀𑐮𑑄 𑐱𑐶𑐟𑐮𑐵 𑐩𑐵𑐢𑑂𑐫𑐩𑐶𑐎 𑐰𑐶𑐡𑑂𑐫𑐵𑐮𑐫𑑄 𑐫𑐵𑑅𑐐𑐸 𑐠𑐸𑐎𑐠𑑄𑐫𑐵 𑐥𑑂𑐬𑐐𑐟𑐶𑐥𑐵𑐏𑐾𑑄 𑐠𑑅 𑐀𑐟𑐶𑐎𑑄 𑐮𑐫𑑂𑐟𑐵𑑅𑐐𑐸 𑐰 𑐰𑐶𑐡𑑂𑐫𑐵𑐮𑐫𑐫𑐵 𑐣𑐶𑑄𑐟𑐶𑑄 𑐳𑐎𑐟𑐵𑑄𑐎𑐠𑑄𑐫𑐵 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐟 𑐟𑐫𑐵𑐬 𑐡𑐸 𑐢𑐫𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐱𑐶𑐎𑑂𑐲𑐵 𑐰 𑐳𑑂𑐰𑐵𑐳𑑂𑐠𑑂𑐫𑐫𑐵 𑐁𑐩𑐹𑐮 𑐥𑐬𑐶𑐰𑐬𑑂𑐟𑐣𑐫𑑂 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐩𑐴𑐟𑑂𑐰𑐎𑐵𑑄𑐎𑑂𑐲𑐷 𑐖𑑂𑐫𑐵𑐗𑑂𑐰𑑅𑐮𑐶𑐳𑐾𑑄 𑐣𑑂𑐴𑑂𑐫𑐵𑑅 𑐰𑐣𑐵𑐔𑑂𑐰𑑄𑐐𑐸𑐮𑐶𑑄 𑐳𑐎𑐳𑐶𑐐𑐸 𑐳𑐵𑐠 𑐰 𑐐𑑂𑐰𑐵𑐴𑐵𑐮𑐶𑐫𑐵 𑐁𑐰𑐱𑑂𑐫𑐎𑐟𑐵 𑐡𑐸𑐐𑐸 𑐣𑑄 𑐢𑐫𑐵𑐡𑐶𑐮 𑑋