𑐕𑐵𑐟𑑂𑐬𑐰𑐺𑐟𑑂𑐟𑐶 𑐩𑐧𑐶𑐄𑐐𑐸 𑐳𑑂𑐎𑐸𑐮𑐟𑐫𑑂 𑐣𑐵𑑄 𑐳𑐵𑐬𑑂𑐰𑐖𑐣𑐶𑐎

𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐕𑐵𑐟𑑂𑐬𑐰𑐺𑐟𑑂𑐟𑐶 𑐰𑐶𑐟𑐬𑐞 𑐰𑐶𑐰𑐬𑐞 𑐧𑐸𑐗𑐾 𑐩𑐫𑐵𑑅𑐐𑐸 𑐣𑐶𑐖𑐷 𑐳𑑂𑐎𑐸𑐮𑐫𑐵 𑐣𑐵𑑄 𑐩𑑂𑐴𑐶𑐐𑑅 𑐳𑐵𑐬𑑂𑐰𑐖𑐣𑐶𑐎 𑐫𑐵𑑅𑐐𑐸 𑐡𑐸 𑑋 𑐫𑐾𑑃 𑐩𑐣𑐥𑐵 𑐱𑐶𑐎𑑂𑐲𑐵 𑐰𑐶𑐨𑐵𑐐𑑄 𑑑𑑐 𑐟𑐐𑐶𑑄 𑐟𑐎𑐫𑐵 𑐰𑐶𑐡𑑂𑐫𑐵𑐬𑑂𑐠𑐷𑐫𑐵𑐟 𑐖𑐾𑐛 𑑑𑑕 𑐐𑐟𑐾 𑐟𑐎 𑐕𑐵𑐟𑑂𑐬𑐰𑐺𑐟𑑂𑐟𑐶 𑐂𑐣𑐵𑑅 𑐄𑐎𑐶𑐫𑐵 𑐰𑐶𑐰𑐬𑐞 𑐖𑐾𑐛 𑑑𑑖 𑐐𑐟𑐾 𑐡𑐸𑐣𑐾 𑐥𑐾𑐱 𑐫𑐵𑐫𑐾𑐟 𑐳𑐸𑐔𑑄 𑐥𑐶𑐠𑑄𑐐𑐸 𑐏𑑅 𑑋 𑐩𑑂𑐴𑐶𑐐𑑅 𑐩𑐣𑐥𑐵𑑄 𑐳𑐵𑐬𑑂𑐰𑐖𑐣𑐶𑐎 𑐫𑐵𑑅𑐐𑐸 𑐳𑐸𑐔𑐣𑐫𑑂 𑑓𑑔𑑒 𑐐𑐹 𑐣𑐶𑐖𑐷 𑐳𑑂𑐎𑐸𑐮𑑄 𑐕𑐵𑐟𑑂𑐬𑐰𑐺𑐟𑑂𑐟𑐶 𑐰𑐶𑐰𑐬𑐞 𑐳𑐵𑐬𑑂𑐰𑐖𑐣𑐶𑐎 𑐩𑐫𑐵𑑅𑐐𑐸 𑐏𑑃 𑐣𑑂𑐴𑑂𑐫𑐠𑐣𑐵𑐟𑑅𑐐𑐸 𑐡𑐸 𑑋

𑐫𑐾𑑃 𑐩𑐣𑐥𑐵 𑐡𑐸𑐣𑐾 𑑕𑑒𑑐 𑐐𑐹 𑐣𑐶𑐖𑐷 𑐳𑑂𑐎𑐸𑐮 𑐳𑐘𑑂𑐔𑐵𑐮𑐣 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐄𑐐𑐸 𑐳𑑂𑐎𑐸𑐮𑐫𑐵𑐟 𑐠𑑂𑐰𑐴𑐾 𑐰𑐂𑐐𑐸 𑐖𑐾𑐛 𑑒𑑘 𑐐𑐟𑐾 𑐡𑐸𑐣𑐾 𑐕𑐵𑐟𑑂𑐬𑐰𑐺𑐟𑑂𑐟𑐶 𑐰𑐶𑐰𑐬𑐞 𑐥𑐾𑐱 𑐫𑐵𑐫𑐾𑐟 𑐴𑐵𑐎𑐣𑑄 𑐩𑑂𑐫𑐵𑐡 𑐧𑐶𑐄𑐐𑐸 𑐡𑐸 𑑋 𑐳𑐸𑐔𑑄 𑐧𑐶𑐫𑐵𑐐𑐸 𑐃 𑐡𑐸𑐣𑐾 𑐣𑑄 𑐰𑐶𑐰𑐬𑐞 𑐥𑐾𑐱 𑐩𑐫𑐵𑐂𑐐𑐸 𑐳𑑂𑐎𑐸𑐮𑐫𑐵 𑐀𑐣𑐸𑐩𑐟𑐶÷𑐳𑑂𑐰𑐷𑐎𑐺𑐟𑐶 𑐬𑐡𑑂𑐡 𑐫𑐵𑐫𑐾𑐐𑐸 𑐰𑐵 𑐎𑐵𑐣𑐸𑐣 𑐎𑐠𑑄 𑐎𑐵𑐬𑐧𑐵𑐴𑐷 𑐫𑐵𑐫𑐾𑐐𑐸 𑐏𑑂𑐫𑐵𑐔𑑂𑐰𑑅 𑐣𑑄 𑐧𑐶𑐫𑐵𑐟𑑅𑐐𑐸 𑐡𑐸 𑑋

𑐱𑐶𑐎𑑂𑐲𑐵 𑐣𑐶𑐫𑐩𑐵𑐰𑐮𑐷 𑑒𑑐𑑕𑑙 𑐰 𑐩𑐴𑐵𑐐𑐣𑐬 𑐱𑐶𑐎𑑂𑐲𑐵 𑐋𑐣 𑑒𑑐𑑗𑑕 𑐰 𑐣𑐶𑐫𑐩𑐵𑐰𑐮𑐷𑐂 𑐣𑐶𑐖𑐷 𑐳𑑂𑐎𑐸𑐮𑐫𑑂 𑐧𑑂𑐰𑐣𑐵𑐔𑑂𑐰𑑄𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷 𑐩𑐢𑑂𑐫𑐾 𑐣𑐶𑐱𑑂𑐔𑐶𑐟 𑐥𑑂𑐬𑐟𑐶𑐱𑐟 𑐰𑐶𑐡𑑂𑐫𑐵𑐬𑑂𑐠𑐷𑐫𑐵𑐟 𑐕𑐵𑐟𑑂𑐬𑐰𑐺𑐟𑑂𑐟𑐶 𑐧𑐷𑐩𑐵𑑅𑐐𑐸 𑐰𑑂𑐫𑐰𑐳𑑂𑐠𑐵 𑐡𑐸 𑑋 𑐋𑐣𑐫𑑂 𑐡𑐸𑐐𑐸 𑐰𑑂𑐫𑐰𑐳𑑂𑐠𑐵 𑐥𑐵𑐮𑐣𑐵 𑐩𑐫𑐵𑐟 𑐢𑐵𑑅𑐳𑐵 𑐳𑑂𑐎𑐸𑐮𑐫𑐵 𑐳𑑂𑐰𑐷𑐎𑐺𑐟𑐶÷𑐀𑐣𑐸𑐩𑐟𑐶 𑐟𑐎𑑄 𑐬𑐡𑑂𑐡 𑐫𑐵𑐫𑐾 𑐦𑐂𑐐𑐸 𑐎𑐵𑐣𑐸𑐣𑐷 𑐥𑑂𑐬𑐵𑐰𑐢𑐵𑐣 𑐡𑐸 𑑋

𑐋𑐣𑐫𑑂 𑐡𑐸𑐐𑐸 𑐰𑑂𑐫𑐰𑐳𑑂𑐠𑐵 𑐎𑐠𑑄 𑐣𑐶𑐖𑐷 𑐳𑑂𑐎𑐸𑐮𑑄 𑐩𑐸𑐎𑑂𑐎𑑄 𑐨𑐬𑑂𑐣𑐵 𑐖𑐹𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷 𑐮𑑂𑐫𑐵𑑅𑐫𑐵 𑑑𑑐 𑐥𑑂𑐬𑐟𑐶𑐱𑐟 𑐰𑐶𑐡𑑂𑐫𑐵𑐬𑑂𑐠𑐷𑐫𑐵𑐟 𑐕𑐵𑐟𑑂𑐬𑐰𑐺𑐟𑑂𑐟𑐶 𑐧𑐷𑐩𑐵𑑅𑐐𑐸 𑐰𑑂𑐫𑐰𑐳𑑂𑐠𑐵 𑐡𑐸 𑑋 𑐄𑐎𑐶𑐫𑐵 𑐣𑐶𑐟𑐶𑑄 𑐳𑐩𑑂𑐧𑐣𑑂𑐢𑐶𑐟 𑐰𑐜𑐵𑐫𑐵 𑐰𑐜𑐵𑐢𑑂𑐫𑐎𑑂𑐲, 𑐰𑐶𑐡𑑂𑐫𑐵𑐮𑐫 𑐣𑐶𑐬𑐷𑐎𑑂𑐲𑐎, 𑐀𑐨𑐶𑐨𑐵𑐰𑐎𑐫𑐵 𑐥𑑂𑐬𑐟𑐶𑐣𑐶𑐢𑐶𑐫𑐵 𑐳𑐩𑐣𑑂𑐰𑐫𑐫𑑂 𑐕𑐵𑐟𑑂𑐬𑐰𑐺𑐟𑑂𑐟𑐶 𑐰𑐶𑐟𑐬𑐞 𑐳𑐩𑑂𑐧𑐣𑑂𑐢𑐷 𑐩𑐵𑐥𑐡𑐞𑑂𑐜 𑐎𑑂𑐰𑑅𑐕𑐷𑐩𑐵𑑅 𑑋 𑐟𑐬 𑐣𑐶𑐖𑐷 𑐳𑑂𑐎𑐸𑐮𑐟𑐫𑑂𑐳𑑄 𑐠𑑅 𑐫𑐟𑑂𑐠𑐾 𑐰𑐶𑐡𑑂𑐫𑐵𑐬𑑂𑐠𑐷 𑐮𑑂𑐫𑐫𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐀𑐨𑐶𑐨𑐵𑐰𑐎𑐫𑐵 𑐐𑐸𑐣𑐵𑐳𑑀 𑐰𑐫𑐾𑐰𑑄 𑐫𑐾𑑃 𑐩𑐣𑐥𑐵𑑄 𑐳𑐸𑐔𑑄 𑐥𑐶𑐠𑑄𑐐𑐸 𑐏𑑅 𑑋 𑐫𑐾𑑃 𑐩𑐣𑐥𑐵𑑄 𑐰𑑄𑐐𑐸 𑐰𑐿𑐱𑐵𑐏 𑑒𑑔 𑐐𑐟𑐾 𑐕𑐵𑐟𑑂𑐬𑐰𑐺𑐟𑑂𑐟𑐶 𑐂𑐣𑐾𑐟 𑐳𑑂𑐎𑐸𑐮𑐫𑐵𑐟 𑐥𑑁 𑐔𑑂𑐰𑑅𑐐𑐸 𑐏𑑅 𑑋

𑐠𑑂𑐰𑐴𑐾 𑐗𑑂𑐰𑐮𑐫𑑂 𑐩𑐾𑐫𑐬 𑐧𑐵𑐮𑐾𑐣 𑐳𑐵𑐴𑑄 𑐕𑐵𑐟𑑂𑐬𑐰𑐺𑐟𑑂𑐟𑐶 𑐧𑐸𑐗𑐾 𑐫𑐵𑑅𑐐𑐸 𑐰𑐶𑐡𑑂𑐫𑐵𑐮𑐫𑐫𑐵𑐟 𑐳𑐸𑐨𑐵𑐫𑑂 𑐧𑐷𑐐𑐸 𑐡𑐸 𑑋 𑐳𑐵𑐩𑐵𑐖𑐶𑐎 𑐳𑐘𑑂𑐖𑐵𑐮𑐫𑑂 𑐔𑑂𑐰𑐳𑐾𑑄 𑐩𑐾𑐫𑐬 𑐳𑐵𑐴𑑄 𑐫𑐾𑑃 𑐩𑐣𑐥𑐵 𑐡𑐸𑐣𑐾 𑐧𑑂𑐰𑐟𑐶 𑐔𑑂𑐰𑑄𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑑄 𑐣𑐶𑐫𑐩 𑐎𑐠𑑄 𑐎𑐵𑐫𑐾
𑐡𑐂𑐐𑐸 𑐀𑐢𑐶𑐎𑐵𑐬𑐫𑐵 𑐧𑐵𑐬𑐾𑐫𑑂 𑐐𑐩𑑂𑐨𑐷𑐬 𑐡𑐸𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋