𑐰𑐵𑐬𑑂𑐣𑐶𑐒 !!!

𑐖𑐶𑑄 𑐣𑑂𑐴𑐵𑐥𑐵 𑐣𑑄 𑐢𑐫𑐵𑐐𑐸 𑐏:, 𑐥𑐵𑐳𑐵𑐥𑐶𑑄 𑐣𑐵𑐥 𑐳𑐴𑐮𑐴 𑐖𑐹 𑐧𑐮𑐫, 𑐳𑑂𑐎𑐵𑐂𑐥, 𑐴𑑂𑐫𑐵𑐒𑐁𑐄𑐚 𑐰 𑐨𑐵𑐂𑐰𑐬 𑐩𑐶𑐚𑐶𑐒 𑐖𑐹 𑐧𑐮𑐫𑑂, 𑐀𑐣𑑁𑐥𑐔𑐵𑐬𑐷𑐎 𑐖𑐩𑐑𑐚 𑐖𑐹 𑐧𑐮𑐫𑑂, 𑐔𑐷 𑐔𑐷 𑐢𑑄𑐐𑐸 𑐩𑐸𑐣𑐵 𑐖𑐹 𑐧𑐮𑐫𑑂; 𑐐𑐸𑐮𑐶𑐳𑐶𑐣𑑄 𑐮𑐸𑐩𑑄𑐎𑐸 𑐖𑐸𑐂, 𑐐𑐸𑐮𑐶𑐳𑐶𑐣𑑄 𑐮𑑂𑐰:𑐩𑑄𑐎𑐵 𑐕𑑂𑐰𑐟 𑐖𑐸𑐂 𑑋 𑐁: 𑐴𑐵𑐎𑐣𑑄 𑐢𑐵𑐫𑐾 – 𑐬𑐵𑐖𑑂𑐫 𑐳𑐘𑑂𑐔𑐵𑐮𑐣𑐫𑑂 𑐮𑐸𑐔𑑂𑐔𑐵𑐥𑐶𑑄 𑐔𑑂𑐰𑑄 𑐰𑐮 𑐢𑐵:𑐳𑐵 𑐂𑐩𑐶𑐳𑑄 𑐣𑑂𑐴𑑂𑐫𑐵𑐧𑐮𑐾𑑄 𑐐𑐠𑐾 𑐫𑐵𑐣𑐵 𑐖𑐣𑐟𑐵𑐫𑐵𑐟 𑐮𑐸𑐚𑐾𑐫𑐵𑐫𑐾 𑐢𑐎𑐵: 𑐖𑐎 𑐟𑐵𑐟𑐸𑐣𑐵 𑐔𑑂𑐰𑐣𑐷 𑑋 𑐖𑐣𑐟𑐵𑐫𑐵𑐟 𑐬𑐵𑐴𑐟 𑐧𑐶𑐂𑐟 𑐕𑐸 𑐕𑐸 𑐫𑐵𑐫𑐾𑐩𑐵𑐮𑐷 𑐢𑐫𑐵𑐐𑐸 𑐏𑑃 𑐂𑐩𑐶𑐳𑑄 𑐀𑐧𑐮𑐫𑑂 𑐖𑐎 𑐳𑑀𑐔𑐾 𑐫𑐵𑐂 𑐐𑐧𑐮𑐫𑑂 𑐀𑐠𑐾 𑐬𑐵𑐴𑐟 𑐧𑐶𑐫𑐵 𑐂𑐩𑐶𑐐𑐸 𑐮𑐸𑐔𑑂𑐔𑐵 𑐳𑐟𑑂𑐟𑐵𑐫𑐵𑐟 𑐳𑐩𑐬𑑂𑐠𑐣 𑐩𑐸𑑄𑐎𑐵: 𑐟:𑐴𑐵𑐎: 𑐃 𑐟𑐎 𑐱𑐵𑐳𑐣 𑐫𑐵𑐫𑐾 𑐦𑐂 𑑋 𑐀𑐮𑐾 𑐬𑐵𑐖𑑂𑐫𑑄 𑐮𑐸𑐚𑐾𑐫𑐵𑐂𑐐𑐸 𑐢𑐫𑐵𑐐𑐸 𑐐𑐬𑐷𑐰-𑐳𑐬𑑂𑐰𑐴𑐵𑐬𑐵 𑐥𑐶𑐣𑑂𑐎𑐾 𑐩𑐏𑐸, 𑐢𑐣𑐷 𑐥𑐸𑑃𑐖𑐶𑐥𑐟𑐶 𑐥𑐶𑐣𑑂𑐎𑐾 𑐣𑑄 𑐩𑐏𑐸, 𑐮𑐸𑐔𑑂𑐔𑐵 𑐬𑐵𑐖𑑂𑐫𑑄 𑐣𑑂𑐴𑑂𑐫𑐵𑐧𑐮𑐾 𑐣𑑄 𑐣𑐶𑐩𑑂𑐣 𑐩𑐢𑑂𑐫𑐩 𑐰𑐬𑑂𑐐𑐫𑐵 𑐥𑐶𑐣𑑂𑐟 𑐮𑐸𑐚𑐾𑐫𑐵𑐫𑐾𑐐𑐸 𑐣𑐷𑐟𑐶 𑐖𑑂𑐰𑐣𑐷, 𑐕𑐵𑐫𑑂 𑐢𑐵:𑐳𑐵 𑐂𑐩𑐶𑐳𑑄 𑐳𑐱𑐎𑑂𑐟 𑐰𑐶𑐬𑑀𑐢 𑐫𑐵𑐫𑐾 𑐦𑐂𑐩𑐏𑐸 𑑋 𑐄𑐔𑑂𑐔 𑐩𑐢𑑂𑐫𑐩 𑐰𑐬𑑂𑐐𑐫𑐵 𑐥𑐶𑐣𑑂𑐟 𑐣𑑄 𑐮𑐸𑐚𑐾𑐫𑐵𑐂, 𑐮𑐸𑐚𑐾𑐫𑐵𑐫𑐾𑐟 𑐂𑐩𑐶𑐳𑑄 𑐄𑐔𑑂𑐔 𑐩𑐢𑑂𑐫𑐩 𑐰𑐬𑑂𑐐𑐫𑐵𑐟 𑐐𑐠𑐾 𑐫𑐵𑐣𑐵 𑐣𑐶𑐩𑑂𑐣 𑐩𑐢𑑂𑐫𑐩 𑐰𑐬𑑂𑐐𑐫𑑂 𑐎𑑂𑐰𑐦𑐵𑐣𑐵 𑐕𑑂𑐰𑐫𑐾𑐐𑐸 𑐢𑐎𑐵 𑐣𑐷𑐟𑐶 𑐖𑑂𑐰𑐣𑐷, 𑐢𑐵𑐫𑐾𑐟 𑐡𑐾𑐱 𑐰𑐶𑐎𑐵𑐳 𑐫𑐵𑐫𑐾𑐐𑐸 𑐢𑐵𑐂, 𑐣𑐶𑐩𑑂𑐣 𑐰𑐬𑑂𑐐𑐫𑐵𑐥𑐶𑐣𑑂𑐟 𑐄𑐔𑑂𑐔 𑐰𑐬𑑂𑐐𑐫𑑂 𑐫𑑄𑐎𑐾𑐐𑐸 𑐢𑐵𑐂, 𑐟𑐬 𑐩𑐹-𑐮𑐎𑑂𑐲 𑐢𑐵:𑐳𑐵 𑐄𑐔𑑂𑐔 𑐩𑐢𑑂𑐫𑐩 𑐰𑐬𑑂𑐐 𑐫𑐵𑐟 𑐣𑐶𑐩𑑂𑐣 𑐩𑐢𑑂𑐫𑐩 𑐰𑐬𑑂𑐐𑐫𑑂 𑐴𑐶𑐂𑐎𑐾𑐐𑐸, 𑐀𑐮𑐾 𑐣𑐶𑐩𑑂𑐣 𑐩𑐢𑑂𑐫𑐩 𑐰𑐬𑑂𑐐𑐫𑐵𑐟 𑐮𑐸𑐚𑐾 𑐫𑐵𑐣𑐵𑐔𑑂𑐰𑐣𑐾𑐐𑐸 𑑋

𑐠𑑂𑐰 𑐰𑐬𑑂𑐐𑐶𑐫 𑐳𑐩𑐶𑐎𑐬𑐞 𑐴𑐮𑐶𑐩𑐫𑑂 𑐫𑐎𑑂𑐰𑐠𑐵𑐳𑐫𑑂 𑐏𑐣𑐾 𑐡𑐸𑐳𑐵𑑄 𑐟𑐰𑐶, 𑐣𑐾𑐥𑐵𑐮𑐫 𑐢𑐵:𑐳𑐵 𑐨𑐟𑐷𑐔𑐵 𑐥𑐵: 𑑋 𑐣𑐾𑐥𑐵𑐮𑐫𑑂 𑐰𑐬𑑂𑐐𑐶𑐫 𑐳𑐩𑐶𑐎𑐬𑐞 𑐣𑐵𑐥𑐣𑐵𑐥𑑄 𑐖𑐵𑐟𑐷𑐫 𑐳𑐩𑐶𑐎𑐬𑐞 𑐣𑑄 𑐮𑑂𑐰𑐵𑐎𑐖𑑂𑐫𑐵: 𑑋 𑐣𑐾𑐰𑐵:𑐟 𑐣𑐾𑐥𑐵𑐮𑐫𑐵 𑐳𑐟𑑂𑐟𑐵𑐢𑐵𑐬𑐷𑐥𑐶𑐣𑐶𑐐𑐸 𑐣𑐶𑐟𑐶𑑄 𑐩𑐸𑐏𑑂𑐫 𑐏𑐟𑐬𑐵 𑐏:𑑋 𑐢𑐵𑐫𑐾𑐟 𑐮𑐵 𑐠𑐣 𑐩𑐾𑐩𑐾𑐐𑐸 𑐖𑐵𑐟𑐷𑐫 𑐥𑐸𑐔: 𑐣𑑄 𑐫𑐎𑑂𑐰 𑐡𑐸, 𑐟𑐬 𑐬𑐵𑐖𑑂𑐫𑐳𑑂𑐬𑑀𑐟𑐫𑑂 𑐎𑐰𑑂𑐖𑐵 𑐫𑐵𑐣𑐵𑐔𑑂𑐰𑑄𑐥𑐶𑐣𑑂𑐟 𑐏𑐟𑐬𑐵 𑐖𑐸𑐂𑐎 𑐣𑑂𑐴𑑂𑐫:𑐣𑐾 𑐰𑐣𑐾𑐐𑐸 𑐖𑑂𑐘𑐵𑑄, 𑐧𑐸𑐡𑑂𑐢𑐶, 𑐎𑑂𑐲𑐩𑐟𑐵 𑐰 𑐥𑐎𑐜 𑐡𑐸𑐥𑐶𑑄 𑐣𑐾𑐰𑐵:𑐟 𑐖𑐎 𑐖𑐸𑐂𑐦𑐂𑐐𑐸 𑐖𑐸𑐫𑐵 𑐳𑐟𑑂𑐟𑐵𑐢𑐵𑐬𑐷𑐥𑐶𑐣𑑂𑐳𑑄 𑐣𑐾𑐰𑐵:𑐟𑐫𑑂‌𑐟 𑐕𑐸𑑄 𑐕𑐸𑑄 𑐳𑐸𑐰𑐶𑐢𑐵 𑐧𑐶𑐫𑐵𑐟:𑐐𑐸 𑐡𑐸 𑑋 𑐥𑑂𑐬𑐱𑐵𑐳𑐣 𑐎𑐾𑐣𑑂𑐡𑑂𑐬 𑐟 𑐣𑐾𑐰𑐵:𑐟𑐫𑑂‌𑐟 𑐥𑐵𑐫𑐎 𑐖𑐸𑐂𑐐𑐸 𑐠𑐵𑐳𑐫𑑂 𑐟𑐫𑐾𑐐𑐸, 𑐧𑑂𑐰𑐣𑐾𑐎𑐸𑐠𑐶, 𑐀𑐳𑑂𑐟𑐵𑐮, 𑐰𑐶𑐎𑐵𑐳 𑐖𑑂𑐫𑐵𑐗𑑂𑐰:𑐟 𑐣𑐾𑐰𑐵:𑐟𑐫𑑂‌𑐐𑐸 𑐠𑐵𑐳𑐫𑑂 𑐰𑐶𑐳𑑂𑐟𑐵𑐬 𑐫𑐵𑐫𑐾𑐐𑐸 𑐖𑑂𑐫𑐵 𑐟 𑐥𑐘𑑂𑐔𑐵𑐫𑐟𑐫𑐵 𑐂𑐮𑐫 𑐫𑐎𑑂𑐰 𑐖𑐹𑐐𑐸 𑐏𑐣𑐾 𑐡𑐸 𑑋

𑐀𑐖𑐵:𑐐𑐸 𑐀𑐰𑐳𑑂𑐠𑐵 𑐀𑐧𑐮𑐫𑑂 𑐫𑐵 𑐣𑐾𑐰𑐵:𑐟𑐳𑐾𑑄 𑐳𑐟𑑂𑐟𑐵𑐢𑐵𑐬𑐷𑐥𑐶𑐣𑑂𑐟 𑐮𑐫𑐾𑐟𑐵𑐫𑐾𑐎𑐵: 𑐖𑐹𑐐𑐸𑐮𑐶𑑄 𑐰:𑐐𑐸 𑐩𑐏𑐸 𑑋 𑐧𑐬𑐸 𑐣𑐾𑐰𑐵: 𑐥𑐸𑐬𑑂𑐏𑐵𑐥𑐶𑐣𑑂𑐳𑑄 𑐡𑐫𑐾𑐎𑐵:𑐠𑐎𑐸𑐐𑐸 𑐧𑐳𑑂𑐟𑐶, 𑐧𑐖𑐵:, 𑐮𑑃, 𑐝:, 𑐁𑐡𑐶 𑐁𑐢𑐵𑐬𑐨𑐹𑐟 𑐳𑑄𑐬𑐔𑐣𑐵𑐫𑐵 𑐧𑑂𑐰𑐴𑐮𑐫𑑂 𑐰𑐶𑐎𑐵𑐳 𑐫𑐵𑐫𑐾 𑐀:𑐥𑐸𑐂𑐐𑐸 𑐖𑐸𑐫𑐵 𑐫𑐵𑐎𑐣𑑄 𑐖𑑂𑐫𑐵 𑐎𑑂𑐫𑐣𑐾𑐩𑐵:𑐥𑐶𑐣𑑂𑐳𑑄 𑐀:𑐥𑐸𑐐𑐸 𑐮𑑃 𑐩𑐵𑐮𑐵𑐳𑑂𑐰:𑐧𑐮𑐫𑑂 𑐣𑐾𑐰𑐵:𑐟𑐫𑑂‌𑐟 𑐦𑐵𑐂𑐡𑐵 𑐖𑐹𑐐𑐸 𑐖𑐎 𑐏: 𑑋 𑐣𑑂𑐴𑐹 𑐣𑑂𑐴𑐹 𑐳𑐸𑐰𑐶𑐢𑐵 𑐟𑐣𑐾𑐟 𑐣𑐾𑐰𑐵:𑐟𑐫𑐳𑑄 𑐰𑐶𑐎𑐵𑐳 𑐫𑐵𑐣𑐵 𑐠𑐎𑐸𑐐𑐸 𑐠𑐵𑐳𑐫𑑂 𑐧𑐵𑐴𑐾𑐎 𑐩𑐾𑐠𑐵𑐫𑑂 𑐫𑐎𑑂𑐰 𑐠𑐵𑐎𑐸𑐂𑐐𑐸 𑐖𑐸𑐫𑐵 𑐳𑐟𑑂𑐟𑐵𑐢𑐵𑐬𑐷𑐥𑐶𑐣𑐶𑐐𑐸 𑐩𑑄 𑐄𑐏𑐾𑐠𑐸𑐏𑐾 𑐩𑐰𑐣 𑑋 𑐄𑐎𑐶𑑄𑐫𑐵 𑐮𑐶𑐔𑑂𑐰:𑐎𑐠𑑄 𑐣𑐾𑐰𑐵:𑐰𑐳𑑂𑐟𑐶𑐂 𑐰𑐶𑐎𑐵𑐳 𑐡𑐸𑐴𑐵𑑃 𑐰𑐮 𑐢𑐵:𑐳𑐵, 𑐣𑐾𑐰𑐵:𑐟𑐳𑐾𑑄 𑐣𑑄 𑐳𑐟𑑂𑐟𑐵𑐢𑐵𑐬𑐷𑐥𑐶𑑄 𑐣𑐵𑐥𑐣𑐵𑐥𑑄 𑐔𑑂𑐰𑐣𑐵 𑐦𑐵𑐂𑐡𑐵 𑐨𑐟𑐶𑐨𑐟𑐶 𑐎𑐵𑐫𑐾 𑐏𑐣 𑑋 𑐀𑐠𑐾 𑐖𑐸𑐫𑐵 𑐠𑑁𑑄 𑐣𑑄 𑐫𑐎𑑂𑐰 𑐁𑐡𑐶𑐰𑐵𑐳𑐶 𑐖𑐣𑐖𑐵𑐟𑐶 𑐩𑐢𑐾𑐱𑐷 𑐥𑐶𑐣𑐶𑐐𑐸 𑐩𑐶𑐏𑐵𑐫𑑂 𑐧𑐵𑐴𑐸𑐣-𑐎𑑂𑐲𑐾𑐟𑑂𑐬𑐷-𑐣𑐾𑐰𑐵𑐬 𑐢𑐵𑐮𑐎𑐶 𑐳𑐩𑑂𑐨𑑂𑐬𑐵𑐣𑑂𑐟 𑐥𑐶𑑄 𑐢𑐿𑐐𑐸 𑐕𑐵𑐥 𑐮𑑂𑐫𑐣𑐵𑐔𑑂𑐰𑑄𑐐𑐸 𑐡𑐣𑐶 𑑋

𑐟𑐬 𑐳𑐟𑑂𑐟𑐵𑐢𑐵𑐬𑐷𑐥𑐶𑐣𑐶𑐐𑐸 𑐣𑐷𑐟𑐶 𑐢𑐵:𑐳𑐵 𑐕𑐸𑑄 𑐄𑐔𑑂𑐔 𑐰𑐬𑑂𑐐𑐫𑐵 𑐣𑐾𑐰𑐵:𑐟 𑐮𑑂𑐴𑐵𑐟𑐫𑑂 𑐎𑐵𑐫𑐾𑐐𑐸, 𑐕𑐸𑑄 𑐄𑐔𑑂𑐔 𑐩𑐢𑑂𑐫𑐩 𑐰𑐬𑑂𑐐𑐫𑐵 𑐣𑐾𑐰𑐵:𑐟𑐫𑑂‌𑐟 𑐮𑐫𑐾𑐟𑐵𑐫𑐾𑐎𑐾𑐐𑐸, 𑐀𑐮𑐾 𑐩𑐾𑐥𑐶𑑄 𑐡𑐎𑑂𑐰𑑄 𑐣𑐾𑐰𑐵: 𑐳𑐩𑐵𑐖𑐫𑐵𑐟 𑐧𑐸𑐮𑐸𑐴𑐸𑑃 𑐣𑐶𑐩𑑂𑐣 𑐩𑐢𑑂𑐫𑐩 𑐰𑐬𑑂𑐐𑐫𑐵 𑐴𑐿𑐳𑐶𑐫𑐟𑐫𑑂 𑐠𑑂𑐫𑑄𑐎𑐾𑐟 𑐑𑑂𑐰𑐵𑐣𑐵 𑐫𑑄𑐎𑐾𑐐𑐸 𑐴𑐾 𑐏: 𑑋 𑐀𑐖𑐵:𑐐𑐸 𑐎𑐸𑐟: 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐣𑐾𑐰𑐵:𑐳𑐩𑐵𑐖𑑄 𑐂𑐮𑐫 𑐰𑐵: 𑐔𑐵𑐫𑐾𑐎𑐾 𑐩𑐦𑐸 𑑋 𑐨𑐵𑐫𑑂 𑐰 𑐳𑑄𑐳𑑂𑐎𑐺𑐟𑐶𑐫𑐵𑐟 𑐡𑐩𑐣 𑐫𑐵𑐣𑐵 𑐩𑐕𑑂𑐰:𑐐𑐸 𑐖𑐹𑐳𑐵 𑐱𑐵𑐫𑐡 𑐣𑐾𑐰𑐵:𑐳𑐩𑐵𑐖𑑄 𑐠:𑐥𑐶𑐣𑑂𑐟 𑐬𑐵𑐖𑑂𑐫𑐱𑐎𑑂𑐟𑐶𑑄 𑐧𑐴𑐶𑐲𑑂𑐎𑐵𑐬 𑐫𑐵𑐣𑐵𑐟:𑐐𑐸 𑐡𑐸 𑐢𑐿𑐐𑐸 𑐔𑐾𑐟𑐣𑐵 𑐣𑑄 𑐩𑐰𑐂𑐐𑐸 𑐏𑐫𑐾𑐦𑐸 𑑋 𑐖𑐸𑐖𑐸𑐥𑐶𑐣𑑂𑐟 𑐳𑐩𑑂𑐫𑐎 𑐥𑐸𑐖𑐵 𑐕𑐵𑐫𑐾𑐐𑐸, 𑐖𑐸𑐖𑐸𑐏𑐮: 𑐏𑐜𑑂𑐐 𑐴𑐶𑐮𑐾𑐐𑐸, 𑐣𑐰𑐡𑐸𑐬𑑂𑐐𑐵𑐫𑐵 𑐥𑑂𑐬𑐳𑐵𑐡 𑐣𑐎𑐾𑐐𑐸, 𑐣𑐶𑐳𑐾𑑄 𑐡𑐎𑑂𑐰 𑐡𑐎𑑂𑐰 𑐣𑐾𑐰𑐵: 𑐴𑐣𑐵𑐧𑐣𑐵𑐫𑑂 𑐳𑐟𑑂𑐟𑐵𑐢𑐵𑐬𑐷𑐥𑐶𑑄𑐟 𑐕𑑂𑐫𑐣𑐾𑐫𑑂 𑐎𑑂𑐰𑐧𑐶𑐫𑐵: 𑐣𑐾𑐰𑐵:𑐳𑐩𑐵𑐖 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐫𑐠𑐵𑐬𑑂𑐠 𑐂𑐟𑐶𑐴𑐵𑐳 𑐮𑑂𑐫𑐹𑐣𑐾 𑐐𑐖𑐵:𑐐𑐸 𑐩𑐣𑐳𑑂𑐠𑐷𑐟𑐶 𑐰 𑐳𑑀𑐔𑐥𑑂𑐬𑐞𑐵𑐮𑐷 𑐖𑑂𑐫𑐵 𑐫𑐵𑐣𑐵 𑐔𑑂𑐰𑐣 𑐢𑐎𑐵 𑐳𑑂𑐰𑐟 𑐢𑐵:𑐳𑐵 𑐣𑐾𑐰𑐵:𑐳𑐩𑐵𑐖𑑄 𑐠:𑐐𑐸 𑐟𑐸𑐟𑐶𑐂 𑐠:𑐩𑑂𑐴𑑄 𑐥𑐵𑐮𑐵𑐔𑑂𑐰𑑄𑐐𑐸 𑐰𑐵:𑐔𑐵𑐫𑐾𑐎𑐾 𑐩𑐦𑐸 𑐢𑐎𑐵: 𑐫𑐔𑑂𑐔𑐸𑐎 𑐳𑐷 𑐡𑐸 𑑋

𑐖𑐸𑐖𑐸𑐥𑐶𑑄 𑐮𑐵 𑐩𑐣𑑂𑐟 𑑋 𑐟𑐬 𑐖𑐸𑐖𑐸 𑐖𑐸𑐂𑐩𑐵:𑐥𑐶𑐣𑑂𑐟 𑐣𑑂𑐴𑑂𑐫:𑐣𑐾 𑐟𑐫𑐵 𑐳𑐟𑑂𑐟𑐵 𑐴𑐵𑑃𑐎𑐾𑐫𑐵𑐣𑐵𑐔𑑂𑐰𑑄𑐥𑐶𑑄 𑐐𑐠𑐾 𑐏: 𑐀𑐠𑐾 𑐴𑐾 𑐟𑐶𑐣𑐶 𑑋 𑐂𑐩𑐶𑐳𑑄 𑐣𑑂𑐴𑐵𑐥𑐮𑐵𑐎 𑐕𑐸 𑐰𑐵: 𑐔𑐵𑐫𑐾𑐎𑐮 𑐢𑐵:𑐳𑐵 𑐣𑐾𑐰𑐵:𑐳𑐩𑐵𑐖 𑐱𑐎𑑂𑐟𑐶𑐱𑐵𑐮𑐷 𑐖𑐸𑐫𑐵𑐔𑑂𑐰𑑄𑐐𑐸 𑐩𑐹 𑐁𑐢𑐵𑐬 𑐢𑐫𑐵𑐐𑐸 𑐳𑑂𑐰𑐣𑐶𑐐: 𑐏: 𑑋 𑐳𑑂𑐰𑐣𑐶𑐐:𑐫𑐵 𑐣𑐾𑐰𑐵:𑐟 𑐧𑐮𑑂𑐮𑐵:𑐟𑐮𑐫𑑂 𑐡𑐾𑐫𑑂 𑐣𑑂𑐫𑑄𑐎 𑐔𑑂𑐰𑑄𑐥𑐶𑑄 𑐣𑐾𑐰𑐵:𑐟 𑐧𑐮𑑂𑐮𑐵𑐣𑐵 𑐴𑐾 𑐔𑑂𑐰𑐣𑐷 𑑋 𑐳𑑂𑐰𑐣𑐶𑐐:𑐫𑐵 𑐣𑐾𑐰𑐵:𑐟 𑐧𑐮𑑂𑐮𑐵𑐣𑐵𑐔𑑂𑐰𑑄𑐐𑐸 𑑓𑐐𑐸 𑑔𑐐𑐸 𑐁𑐢𑐵𑐬 𑐟 𑐡𑐸 𑑋 𑐰 𑐁𑐢𑐵𑐬 𑐢𑑂𑐰𑐳𑑂𑐟 𑐩𑐫𑐵𑐎 𑐳𑑂𑐰𑐣𑐶𑐐: 𑐎𑐩𑐖𑑀𑐬 𑐖𑐸𑐂𑐩𑐏𑐸, 𑐳𑑂𑐰𑐣𑐶𑐐: 𑐎𑐩𑐖𑑀𑐬 𑐩𑐖𑐸𑐂𑐎 𑐣𑐾𑐰𑐵:𑐳𑐩𑐵𑐖 𑐱𑐎𑑂𑐟𑐶𑐴𑐷𑐣 𑐖𑐸𑐂𑐩𑐏𑐸 𑑋 𑐰 𑐁𑐢𑐵𑐬 𑐢𑐫𑐵𑐐𑐸 𑐠𑐠𑐾 𑐏:

(𑑑) 𑐣𑐾𑐰𑐵:𑐟𑐫𑑂‌𑐎𑐾 𑐡𑐸𑐐𑐸 𑐧𑐸𑑃 – 𑐎𑑂𑐰𑐵𑐣𑑂𑐚𑐶𑐚𑐶

(𑑒) 𑐣𑐾𑐰𑐵:𑐟𑐫𑑂‌𑐎𑐾 𑐡𑐸𑐐𑐸 𑐧𑐸𑑃 – 𑐎𑑂𑐰𑐵𑐮𑐶𑐚𑐶

(𑑓) 𑐣𑐾𑐰𑐵:𑐟𑐫𑑂‌𑐐𑐸 𑐳𑐩𑐵𑐖 𑐳𑑄𑐬𑐔𑐣𑐵

(𑑔) 𑐣𑐾𑐰𑐵:𑐟𑐫𑑂‌𑐐𑐸 𑐔𑐬𑐶𑐟𑑂𑐬

𑐠𑑂𑐰 𑑔𑐐𑐸 𑐁𑐢𑐵𑐬 𑐢𑑂𑐰𑐳𑑂𑐟 𑐫𑐵𑐫𑐾𑐟 𑐳𑐟𑑂𑐟𑐵𑐢𑐵𑐬𑐷𑐥𑐶𑐣𑑂𑐳𑑄 𑐣𑐶𑐫𑑀𑐖𑐶𑐟 𑐎𑐠𑑄 𑐢𑐩𑐵𑐢𑐩 𑐣𑑂𑐴𑐹 𑐣𑑂𑐴𑐹 𑐣𑐶𑐫𑐩𑐟 𑐡𑐫𑐾𑐎𑐵 𑐴𑐮, 𑐣𑑂𑐴𑐹 𑐣𑑂𑐴𑐹 𑐳𑐩𑐳𑑂𑐫𑐵𑐟 𑐟𑐣𑐵 𑐴𑐮, 𑐡𑐾𑐫𑑂 𑐣𑑂𑐫𑑄𑐎𑐫𑐵 𑐐𑐟𑐶𑐰𑐶𑐢𑐶𑐫𑐵𑐟 𑐎𑐾𑐣𑑂𑐡𑑂𑐬𑐶𑐟 𑐫𑐵𑐣𑐵 𑐳𑑂𑐰𑐣𑐶𑐐𑐮𑐫𑑂 𑐩𑐸𑑄𑐎𑐵 𑐴𑐫𑐵 𑐠𑑂𑐰 𑐠𑐵𑐳𑑄 𑐣𑐾𑐰𑐵:𑐟 𑐧𑐶𑐳𑑂𑐠𑐵𑐥𑐶𑐟 𑐫𑐵𑐫𑐾𑐐𑐸 𑐫𑐵𑐣𑐵 𑐴𑐮 𑑋 𑐠𑑂𑐰 𑐁𑐢𑐵𑐬𑐫𑐵 𑐰𑐶𑐳𑑂𑐟𑐺𑐟 𑐔𑐬𑑂𑐔𑐵 𑐫𑐵𑐫𑐾𑐟 𑐂𑐮𑑄 𑐳𑐵𑐠 𑐩𑐧𑑂𑐫𑐹, 𑐀𑐠𑐾 𑐖𑐹𑐳𑐵𑑄 𑐕𑐸𑑄 𑐨𑐟𑐶𑐔𑐵 𑐠𑐣 𑐣𑑂𑐴𑑂𑐫𑐧𑑂𑐰𑐫𑐾 𑑋

(𑑑) 𑐣𑑂𑐴𑐵𑐥𑐵 𑐣𑐾𑐰𑐵:𑐟𑐫𑑂‌𑐎𑐾 𑐡𑐸𑐐𑐸 𑐧𑐸𑑃𑐫𑐵 𑐩𑐵𑐮𑐶𑐎 𑐐𑐸𑐠𑐶 𑐏: 𑑋 𑐣𑐶𑐖𑐶 𑐮𑐵𑐮𑐥𑐸𑐬𑑂𑐖𑐵 𑐡𑐫𑐾𑐎𑐵: 𑐧𑐸𑑃𑐫𑐵 𑐳𑑂𑐰𑐵𑐩𑐶𑐟𑑂𑐰 𑐠:𑐎𑐾 𑐟𑐫𑐾𑐐𑐸 𑐩𑐫𑐵𑐳𑐾𑑄 𑐐𑐸𑐠𑐶 𑐀𑐣𑑂𑐟𑐬𑑂𑐐𑐟 𑐳𑐵𑐩𑐸𑐴𑐶𑐎 𑐳𑑂𑐰𑐵𑐩𑐶𑐟𑑂𑐟𑑂𑐰𑐫𑑂 𑐧𑐸𑑃𑐫𑐵𑐟 𑐟𑐫𑐵:𑐟:𑐐𑐸 𑐏: 𑑋 𑐠𑑁𑑄 𑐳𑑂𑐰𑐫𑐵 𑑑𑑐𑑐 𑐡𑑃 𑐣𑑂𑐴𑑂𑐫: 𑐳𑑂𑐰𑐣𑐶𑐐:𑐫𑐵 𑑙𑑙.𑑙% 𑐧𑐸𑑃 𑐣𑐾𑐰𑐵:𑐟𑐫𑑂‌𑐐𑐸 𑐳𑑂𑐰𑐵𑐩𑐶𑐟𑑂𑐟𑑂𑐰𑐫𑑂 𑐮𑐵𑐣𑐵𑐔𑑂𑐰𑑄𑐐𑐸 𑐏: 𑑋 𑐱𑐵𑐴, 𑐬𑐵𑐞𑐵 𑐖𑐸𑐖𑐸𑐥𑐶𑑄 𑐰 𑐂𑐩𑐶𑐐𑐸 𑐥𑐵𑐏𑐾𑑄 𑐧𑐎𑑂𑐳𑐶𑐳 𑐎𑐫𑐵𑐟:𑐥𑐶𑑄 𑐧𑐬𑑂𑐩𑐹 𑐰 𑐏𑑃𑐫𑑂 𑐟𑐫𑑂‌‌𑐎𑐾 𑐮𑐸𑐟𑐾𑐫𑐵𑐣𑐵 𑐎𑐵:𑐐𑐸 𑐧𑐵𑐴𑐾𑐎 𑐩𑐾𑐐𑐸 𑐧𑐸𑑃 𑐴𑐾 𑐩𑐡𑐸 𑑋 𑐂𑐩𑐶𑐳𑑄 𑐡𑐵𑑄 𑐥𑐸𑐮𑐵 𑐧𑐸𑑄 𑐣𑑂𑐫𑐵𑐣𑐵 𑐎𑐵𑐫𑐾𑐟 𑐣𑐾𑐰𑐵:𑐟𑐫𑑂‌𑐎𑐾 𑐩𑐷𑐐𑐸 𑐧𑐸𑑃 𑐴𑐾 𑐩𑐡𑐸 𑑋 𑐐𑐸𑐠𑐶𑐫𑐵 𑐧𑐸𑑃 𑐢𑐫𑐵𑐐𑐸 𑐣𑐶𑐖𑐶 𑐩𑐏𑐸 𑑋 𑐳𑑂𑐰𑐣𑐶𑐐:𑐫𑐵 𑐱𑐵𑐳𑐣 𑐟𑑂𑐰:𑐟𑐵𑐰𑑄𑐥𑐶𑑄 𑐠𑐎𑐸𑐖𑐸𑐖𑐸 𑐥𑐶𑐣𑐶𑐐𑐸 𑐮𑐵𑐫𑑂‌𑐎𑐸 𑐰 𑐠𑐎𑐸 𑐖𑐸𑐖𑐸𑐥𑐶𑐣𑑂𑐳𑑄 𑐨𑑀𑐐𑐔𑐮𑐣 𑐫𑐵𑐣𑐵𑐔𑑂𑐰𑑄𑐐𑐸 𑐧𑐸𑑃 𑐖𑐎 𑐱𑐵𑐴-𑐬𑐵𑐞𑐵 𑐥𑐶𑐣𑑂𑐳𑑄 𑐬𑐵𑐖𑐣𑐷𑐟𑐶𑐎 𑐴𑑂𑐫𑐹𑐥𑐵:𑐫𑐵 𑐮𑐶𑐔𑑂𑐰: 𑐎𑐠𑑄 𑐳𑑂𑐰𑐵𑐩𑐶𑐟𑑂𑐟𑑂𑐰 𑐎𑐵𑐮 𑐢𑐵𑐫𑐾 𑐦𑐿 𑑋 𑐰 𑐧𑐵𑐴𑐾𑐎 𑐩𑐾𑐐𑐸 𑐂𑐩𑐶𑐐𑐸 𑐀𑐢𑐶𑐣𑐫𑑂 𑐐𑐸𑐮𑐶 𑐣𑑄 𑐧𑐸𑑃 𑐫𑐵 𑐳𑑂𑐰𑐵𑐩𑐶𑐟𑑂𑐟𑑂𑐰 𑐡𑐸, 𑐰 𑐂𑐩𑐶𑐳𑑄 𑐣𑐾𑐰𑐵:𑐖𑐣𑐟𑐵𑐫𑐵 𑐧𑐸𑑃 𑐮𑐸𑐟𑐾𑐫𑐵𑐣𑐵 𑐎𑐵:𑐐𑐸 𑐏: 𑑋 𑐂𑐩𑐶𑐳𑑄 𑐀𑐠𑐾 𑐮𑐏𑐣𑐄 𑐮𑐹𑐚 𑐠𑐾𑑄 𑐮𑐸𑐟𑐾𑐫𑐵𑐣𑐵 𑐎𑐵:𑐳𑐵𑑄 𑐟𑐰𑐶 𑐡𑐎𑑂𑐰 𑐧𑐸𑑃 𑐐𑐸𑐠𑐶𑐫𑐵 𑐳𑑂𑐰𑐵𑐩𑐶𑐟𑑂𑐟𑑂𑐰𑐫𑑂 𑐔𑑂𑐰𑐣𑐵𑐔𑑂𑐰𑑄𑐐𑐸 𑐰 𑐐𑐸𑐠𑐶𑐫𑐵𑐟 𑐢𑐬𑑂𑐩𑐣𑐵𑐥 𑐳𑑂𑐰𑐵𑐣𑐵𑐟:𑐐𑐸 𑐖𑐸𑐫𑐵 𑐂𑐩𑐶𑐟 𑐫:𑐫:𑐠𑐾 𑐮𑐸𑐟𑐾𑐫𑐵𑐫𑐾 𑐩𑐕𑐶𑐣 𑑋 𑐣𑐾𑐰𑐵:𑐖𑑂𑐫𑐵𑐥𑐸 𑐥𑐶𑐣𑐶𑐐𑐸 𑐧𑐸𑑃 𑐮𑐸𑐟𑐾𑐫𑐵𑐣𑐵 𑐏𑐳𑐧𑐬𑑂𑐩𑐹𑐥𑐶𑐣𑑂𑐟 𑐰𑐶𑐬𑑂𑐟𑐵 𑐢𑐎𑐵 𑐡𑐵𑐣 𑐧𑐶𑐫𑐵 𑐢𑐬𑑂𑐩 𑐎𑐩𑐾 𑐫𑐵𑐫𑐾𑐐𑐸 𑐧𑐸𑐡𑑂𑐢𑐶 𑐧𑐶𑐂𑐥𑐶𑑄 𑐧𑐬𑑂𑐩𑐹𑐥𑐶𑐣𑑂𑐳𑑄 𑐣𑑄 𑐡𑑂𑐫:𑐐𑐸𑐠𑐶𑐫𑐵 𑐣𑐵𑐩𑐫𑑂 𑐟𑐫𑐵𑐟:𑐐𑐸 𑐧𑐸𑑃 𑐧𑐬𑑂𑐩𑐹𑐫𑐵𑐟 𑐡𑐵𑐣 𑐧𑐶𑐫𑐵 𑐐𑐠𑐾 𑐫𑐵𑐣𑐵 𑐢𑐬𑑂𑐩 𑐮𑐵𑐂 𑐢𑐎𑐵 𑐧𑑂𑐫𑐵𑐏𑑂𑐫𑐵 𑐫𑐵𑐫𑐾𑐟 𑐠𑐵𑐎𑐸𑐎𑐵 𑐧𑐶𑐮 𑑋 𑐀𑐮𑐾 𑐂𑐩𑐶𑐳𑑄 𑐣𑑂𑐴𑐹𑐐𑐸 𑐣𑐷𑐟𑐶 𑐴𑐮 𑐎𑐶 𑐐𑐸𑐠𑐶𑐫𑐵𑐟 𑐴𑐾 𑐢𑑂𑐰𑐳𑑂𑐟 𑐫𑐵𑐣𑐵 𑐕𑑂𑐰𑐫𑐾𑐐𑐸 𑑋 𑐀𑐠𑐾 𑐫𑐵𑐫𑐾𑐟 𑐣𑑂𑐴𑐵𑐥𑐮𑐵𑐎 𑐐𑐸𑐠𑐶𑐫𑐵 𑐧𑐸𑑃 𑐬𑐿𑐎𑐬 𑐫𑐵𑐫𑐾𑐐𑐸 𑐮𑑃 𑐔𑐵𑐫𑐾𑐎𑐮, 𑐬𑐿𑐎𑐬 𑐫𑐵𑐣𑐵 𑐩𑐷 𑐖𑐶𑐂𑐰𑑄 𑐮𑑀𑐨𑑄 𑐣𑐾𑐰𑐵:𑐳𑐩𑐵𑐖𑐫𑐵𑐟 𑐎𑐮 𑑋 𑐀𑐮𑐾 𑐠𑑁𑑄 𑐰 𑐣𑐷𑐟𑐶𑐫𑐵 𑐧𑐮𑐫𑑂 𑐧𑐸𑑃 𑐩𑐶𑐫𑐵 𑐢𑐶𑐧𑐵 𑐎𑐩𑐾𑐫𑐵𑐫𑐾𑐐𑐸 𑐮𑑀𑐨𑑄 𑐣𑐾𑐰𑐵:𑐳𑐩𑐵𑐖𑐫𑐵 𑐧𑐸𑑃 𑐕𑐸 𑐐𑐟𑐶 𑐖𑐸𑐮 𑐕𑐶𑐎𑐥𑐶𑐣𑑂𑐳𑑄 𑐏𑑃 𑐴𑐾 𑐏𑑄 𑑋 𑐮𑐶𑐥𑐵𑑄𑐐𑐸 𑐟𑐠𑑂𑐫𑐵𑑄𑐎 𑐎𑐠𑑄 𑐳𑑂𑐰𑐣𑐶𑐐:𑐫𑐵 𑐧𑐸𑑃 𑐁: 𑐣𑐾𑐰𑐵:𑐟𑐫𑐐𑐸 𑐳𑑂𑐰𑐵𑐩𑐶𑐟𑑂𑐰𑐫𑑂 𑑓𑑐% 𑐣𑑄 𑐧𑐵𑑃𑐎𑐶 𑐩𑐣𑑂𑐟 𑐴𑑃 𑑋

(𑑒) 𑐖𑐶𑐐𑐸 𑐬𑐵𑐖𑐣𑐷𑐟𑐶𑐎 𑐚𑐶𑐥𑑂𑐥𑐞𑐷 𑐧𑑂𑐰𑐣𑐷𑐥𑐶𑑄 𑐫𑐎𑑂𑐰 𑐥𑐵𑐳𑐵𑐥𑐶𑐣𑑂𑐳𑑄 𑐩𑐳𑑂𑐫𑐹 𑐖𑐸𑐂, 𑐖𑐶 𑐖𑐮𑐳𑑂𑐬𑑀𑐟𑐫𑐵 𑐰𑐶𑐖𑑂𑐘𑐟𑐵 𑐡𑐸𑐩𑑂𑐴 𑐩𑐣𑐹 𑐏: 𑐢𑐎𑐵 𑑋 𑐳𑐣 𑑑𑑙𑑙𑑙 𑐳𑑄 𑐳𑐶𑐔𑐵𑐂𑐫𑐵 𑐩𑐵𑐳𑑂𑐚𑐬𑑂𑐳 𑐮𑐾𑐰𑐮 𑐧𑑂𑐰𑐣𑐵𑐧𑐮𑐫𑑂 𑐧𑐸𑑃 𑐄𑐟𑑂𑐥𑐵𑐡𑐎𑐟𑑂𑐰𑐫𑑂 𑐴𑐮𑐶𑐩𑐫𑑂 𑐖𑐵𑐥𑐵𑐣 𑐡𑐎𑐮𑐫𑑂 𑐣𑑂𑐴𑑂𑐫:𑐣𑐾 𑐮𑐵: 𑐢𑐎𑐵 𑐧𑑂𑐰𑐣𑐾𑐩𑐵𑐮 𑑋 𑐀𑐮𑐾 𑐖𑐶𑑄 𑐖𑐵𑐥𑐵𑐣𑐫𑐵 𑐥𑐬 𑐫𑐹𑐣𑐶𑐚 𑐫𑐶𑐮𑑂𑐜 𑐎𑑂𑐫𑐵𑐥𑐵𑐳𑐶𑐚𑐶 𑐳𑑂𑐰𑐫𑐵𑐧𑐮𑐫𑑂 𑐕𑐸 𑐏𑐣 𑐢𑐵:𑐳𑐵 𑐄𑐮𑐶 𑐄𑐟𑑂𑐥𑐵𑐡𑐣 𑐮𑐵 𑐖𑐶𑐩𑐶 𑐀𑐖𑐸𑑄 𑐧𑐸𑑃 𑐫𑐵𑐣𑐵𑐔𑑂𑐰𑑄𑐐𑐸 𑐂𑐡𑑂𑐰𑐮𑐫𑑂 𑐣𑑄 𑐖𑐹 𑑋 𑐎𑐮𑑂𑐕𑐶 𑐴𑐾 𑐩𑐡𑐸𑐐𑐸 𑐕𑐎𑐹𑐔𑐵 𑐎𑑂𑐫𑐧𑐫𑑂 𑐳𑐂𑐐𑐸 𑐟𑐬𑐎𑐵𑐬𑐷 𑐖𑐶𑐩𑐶𑐟 𑐡𑐔𑑂𑐕𑐶𑐣𑑂𑐴𑐸𑑄 𑐣𑐫𑐵𑑄 𑐦𑐸𑐎𑐾 𑐩𑐦𑐸 𑑋 𑐀𑐮𑐾 𑐖𑐶𑑄 𑐠𑐸𑐮, 𑐌𑐴𑑀, 𑐳𑑂𑐰𑐣𑐶𑐐:𑐫𑐵 𑐔𑐵 𑐮𑐵 𑐔𑐵 𑐩𑐏𑐸 𑐮𑐸𑑃 𑐏𑐣𑐷 𑐳𑐵 𑑋 𑐐𑐣 𑐖𑐵𑐥𑐵𑐣𑐫𑐵 𑐩𑐾𑐱𑐶𑐣, 𑐬𑐳𑐵𑐫𑐣, 𑐥𑑂𑐬𑐰𑐶𑐢𑐶 𑐰 𑐀𑐣𑐸𑐳𑐣𑑂𑐢𑐵𑐣𑐫𑐵 𑐐𑑂𑐰𑐴𑐵𑐮𑐶𑑄 𑐥𑐶𑐎𑐫𑐵 𑐔𑑂𑐰𑑄𑐐𑐸 𑐧𑐵𑐮𑐷, 𑐐𑐣 𑐗𑐷𑐠𑐵𑐫𑑂 𑐰 𑐴𑐾 𑐥𑐬𑐩𑑂𑐥𑐬𑐵𑐐𑐟 𑐥𑑂𑐬𑐰𑐶𑐢𑐶 𑐰 𑐮𑑂𑐴𑐵𑐟𑑄 𑐥𑐵𑐮𑐾𑐐𑐸 𑐎𑐹 𑐖𑑂𑐰𑐣𑐵 𑐫𑐵𑐣𑐵𑐔𑑂𑐰𑑄𑐐𑐸 𑐧𑐸𑑃𑐖𑑂𑐫𑐵𑐫𑐵 𑐧𑐵𑐮𑐷 – 𑐠𑐥𑐵𑐫𑑂‌𑐔𑑂𑐰 𑐨𑐶𑑄𑐐𑐸 𑐔𑐵 𑐳𑑂𑐫𑑄𑐎𑐾 𑐩𑐖𑑂𑐫𑐹, 𑐧𑐸𑑃 𑐩𑐶𑐂𑐩𑐖𑑂𑐫𑐹, 𑐧𑐸𑑃 𑐩𑐶𑐫𑐵 𑐕𑐾𑑃 𑐡𑐣𑐾 𑐩𑐖𑑂𑐫𑐹 – 𑐴𑐵𑐮𑐷𑐩𑑂𑐴 𑐖𑐶 𑐫𑐵𑐎:𑐔𑐵 – 𑐣𑑂𑐴𑑂𑐫𑐵𑐩𑑂𑐴𑐳𑐶𑐟 𑐢𑐵:𑐳𑐵 𑐣𑑄 𑐣𑑂𑐴𑐶𑐮𑐷𑐐𑐸 𑐖𑐎 𑑋 𑐁: 𑐳𑑂𑐰𑐫𑐵𑐡𑐶𑐳𑑃 𑐳𑑂𑐰𑐣𑐶𑐐:𑐫𑐵 𑐀𑐖𑐵:𑐐𑐸 𑐨𑐶𑑄𑐐𑐸 𑐔𑐵 𑐐𑐣𑑄 𑐀𑐥𑑂𑐥𑐵 𑐡𑐫𑐾𑐎𑐾𑐐𑐸 𑐨𑐟𑑂𑐟𑐶 𑐟𑐫𑐵 𑐚𑐥𑐳𑑀𑐂𑐮 𑐡𑐎𑑂𑐰𑑄 𑐢𑑂𑐰𑐳𑑂𑐟 𑐫𑐵𑐣𑐵 𑐕𑑂𑐰𑐟, 𑐐𑐣𑑄 𑐕𑐾𑑃 𑐖𑐎 𑐡𑐣𑐵𑑄 𑐎𑑄𑐎𑑂𑐬𑐶𑐚 𑐖𑑄𑐐𑐮 𑐟𑐫𑐵 𑐢𑑂𑐰𑐳𑑂𑐟 𑐫𑐵𑐣𑐵 𑐕𑑂𑐰𑐟 𑑋 𑐀𑐮𑐾 𑐳𑑂𑐰𑐣𑐶𑐐𑐮𑐫 𑐔𑑂𑐰𑑄𑐥𑐶𑐣𑑂𑐟 𑐖𑐵𑐎𑐶 𑐣𑐶𑐳𑐾𑑄 𑐰𑐵𑐄𑑃𑐔𑐵 𑐟𑐎 𑐥𑐶𑐣𑐾𑑄 𑐣𑑂𑐫𑐵𑐣𑐵 𑐴𑐫𑐾𑐩𑐦𑐸𑐳𑐵 𑐣𑐫𑐾 𑐟𑐎𑑄 𑐩𑐏𑐣𑐷𑐐𑐸 𑐀𑐰𑐳𑑂𑐠𑐵𑐫𑑂 𑐠𑑂𑐫𑑄𑐎𑐵 𑐧𑐶𑐮 𑑋

(𑑓) 𑐣𑐾𑐰𑐵:𑐟𑐫𑑂‌𑐐𑐸 𑐳𑐩𑐵𑐖 𑐳𑑄𑐬𑐔𑐣𑐵𑐫𑐵 𑐕𑐐𑐹 𑐩𑐹 𑐁𑐢𑐵𑐬 𑐢𑐫𑐵𑐐𑐸 𑐮𑐖𑐐𑐵: 𑐏: 𑑋 𑐀𑐧𑐸 𑐀𑐖𑐸𑐫𑐵 𑐮𑐖𑐐𑐵: 𑐖𑑂𑐰𑐣 𑐢𑐵:𑐳𑐵 𑐐𑐧𑑂𑐮𑐾𑑄 𑐡𑑂𑐫𑐵𑑄 𑐮𑐵𑐂𑐩𑐏𑐸 𑐢𑐎𑐵 𑐢𑐫𑐵 𑐟𑐂𑐐𑐸 𑐏: 𑑋 𑐟𑐬 𑐰 𑐳𑐩𑐵𑐖 𑐳𑑄𑐬𑐔𑐣𑐵 𑐧𑐸𑐮𑐸𑐴𑐸𑑃 𑐳𑑂𑐫𑐣𑐵 𑐰𑐣 𑑋 𑐳𑑂𑐫𑐣𑐵 𑐰𑐣 𑐖𑐎 𑐩𑐏𑐸 𑐎𑐶 𑐳𑐟𑑂𑐟𑐵𑐫𑐵 𑐣𑐷𑐟𑐶 𑐣𑑂𑐴𑑂𑐫𑐵𑐧𑐮𑐾𑑄 𑐰 𑐳𑑄𑐬𑐔𑐣𑐵 𑐳𑑂𑐫𑑄𑐎𑐾𑐟 𑐐𑑂𑐰𑐴𑐵𑐮𑐶 𑐖𑐸𑐂𑐐𑐸 𑐎𑐠𑑄 𑐴𑐾 𑐖𑐎 𑐖𑐸𑐫𑐵𑐧𑐶𑐮 𑑋 𑐣𑐾𑐰𑐵: 𑐳𑐩𑐵𑐖 𑐳𑑄𑐬𑐔𑐣𑐵𑐫𑐵𑐟 𑐩𑐵:𑐎𑐠𑑄 𑐫𑐵 𑐱𑐶𑐎𑑂𑐲𑐵 𑐣𑐷𑐟𑐶 𑐖𑐸𑐂𑐩𑐦𑐸𑐟, 𑐮𑐖𑐐𑐵:𑐫𑐵 𑐐𑑂𑐫𑐵𑐬𑐾𑐣𑑂𑐟𑐶 𑐰 𑐧𑐶𑐳𑑂𑐟𑐵𑐬 𑐫𑐵𑐫𑐾𑐐𑐸 𑐳𑐶𑐰𑐾 𑐣𑑄 𑐠: 𑐩𑐵𑐮𑐶𑐎 𑐖𑐸𑐂𑐐𑐸 𑐮𑐖𑐐𑐵: 𑐟𑑂𑐰:𑐠𑐵 𑐎𑐬𑑂𑐎𑐶𑐫𑐵 𑐔𑑂𑐫: 𑐖𑐸𑐂𑐐𑐸, 𑐖𑐵𑐐𑐶𑐬 𑐣𑐫𑐾𑐐𑐸 𑐮𑐖𑐐𑐵: 𑐫𑐵𑐂𑐥𑐶𑐣𑑂𑐟 𑐀𑐥𑑂𑐰: 𑐟𑐶𑐧: 𑐧𑐶𑐂𑐐𑐸 𑐮𑐎𑐳 𑐡𑐫𑐾𑐎𑐵 𑐴𑐮 𑑋 𑐠:𑐐𑐸 𑐴𑐾 𑐮𑐖𑐐𑐵: 𑐫𑐵𑐫𑐾 𑐢𑐵𑐂𑐥𑐶𑐣𑑂𑐟 𑐴𑐾𑐧𑐵𑐫𑑂 𑐔𑐧𑐵𑐫𑑂 𑐫𑐵𑐫𑐾𑐐𑐸 𑐖𑑂𑐫𑐵 𑐗𑐷 𑐣𑐾𑐰𑐵:𑐳𑐩𑐵𑐖𑑄 𑐣𑑄 𑐫𑐵𑐣𑐵 𑐔𑑂𑐰𑐣 𑑋 𑐮𑐖𑐐𑐵𑐫𑐵 𑐁𑐢𑐵𑐬𑐫𑑂 𑐡𑐫𑐵𑐔𑑂𑐰𑑄𑐐𑐸 𑐳𑐩𑐵𑐖 𑐳𑑄𑐬𑐔𑐣𑐵𑐫𑐵𑐟 𑐧𑐶𑐎𑐺𑐟 𑐫𑐵𑐣𑐵 𑐖𑐵𑐟𑐨𑐵𑐟𑐫𑑂 𑐟𑐎𑑂𑐫𑑄𑐎𑐵 𑐧𑐶𑐫𑐵 𑐣𑐾𑐰𑐵:𑐳𑐩𑐵𑐖𑑄 𑐠:𑐐𑐸 𑐟𑐸𑐟𑐶𑐂 𑐠:𑐩𑑂𑐴 𑐴𑐾 𑐥𑐵𑐮 𑑋 𑐳𑐟𑑂𑐟𑐵𑐢𑐵𑐬𑐷 𑐰𑐬𑑂𑐐𑐥𑐶𑐣𑑂𑐳𑑄 𑐣𑑄 𑐣𑐾𑐰𑐵:𑐟𑐫𑑂‌𑐐𑐸 𑐀𑐖𑐵:𑐐𑐸 𑐐𑐮𑑂𑐟𑐶 𑐥𑐣𑐾𑐟 𑐐𑐧𑑂𑐮𑐾𑑄 𑐣𑑄 𑐩𑐳𑑂𑐰:, 𑐧𑐬𑐸 𑐩𑐸𑐮𑑂𑐎𑐶 𑐋𑐣 𑐡𑐫𑐾𑐎𑐵: 𑐣𑐾𑐰𑐵:𑐟𑐫𑑂‌𑐐𑐸 𑐮𑐖𑐐𑐵 𑐳𑑄𑐬𑐔𑐣𑐵𑐫𑐵𑐟 𑐖𑐵𑐟𑐨𑐵𑐟 𑐳𑑄𑐬𑐔𑐣𑐵 𑐴𑐾 𑐏: 𑐢𑐫𑐵𑐐𑐸 𑐥𑑂𑐬𑐩𑐵𑐞𑐶𑐟 𑐫𑐵𑐫𑐾𑐐𑐸 𑐡𑐳𑑂𑐟𑐵𑐰𑐾𑐖 𑐡𑐫𑐾𑐎𑐵 𑐧𑐶𑐫𑐵 𑐣𑐾𑐰𑐵:𑐳𑐩𑐵𑐖 𑐳𑑄𑐬𑐔𑐣𑐵𑐫𑐵𑐟 𑐨𑐖𑑂𑐫𑑄𑐎 𑐳𑑂𑐫𑑄𑐎𑐾𑐟 𑐐𑑂𑐰𑐴𑐵𑐮𑐶 𑐫𑐵𑐟 𑑋

(𑑔) 𑐔𑐬𑐶𑐟𑑂𑐬𑐫𑐵 𑐴𑐶𑐳𑐵𑐰𑑄 𑐳𑑂𑐰𑐟 𑐢𑐵:𑐳𑐵 𑐣𑐾𑐰𑐵:𑐟 𑐢𑐫𑐵𑐥𑐶𑑄 𑐳𑐶𑐬𑑂𑐖𑐣𑐱𑐷𑐮, 𑐳𑐎𑑂𑐬𑐶𑐫 𑐰 𑐂𑐩𑐵𑐣𑑂𑐡𑐵𑐬 𑐏: 𑑋 𑐕𑐸𑑄 𑐎𑐶 𑐕𑐸𑑄 𑐖𑑂𑐫𑐵 𑐫𑐵𑐫𑐾𑐟 𑐩𑐵𑐮𑐵 𑐖𑐸𑐂𑐥𑐶𑑄, 𑐣𑐾𑐰𑐵:𑐟 𑐠:𑐩𑑂𑐴𑐳𑐶𑐣𑑄 𑐐𑐸𑐮𑐶 𑐖𑑂𑐫𑐵 𑐫𑐵𑐫𑐾 𑐦𑐸, 𑐄𑐮𑐶 𑐖𑐎 𑐫𑐵𑐫𑐾 𑐦𑐸 𑐢𑐎𑐵 𑐢𑐵𑐂𑐥𑐶𑑄 𑐣𑑄 𑐏: 𑑋 𑐩𑐦𑐸𑐳𑐵 𑐧𑐬𑐸 𑐩𑐦𑐸 𑐢𑐵𑐫𑐾𑐐𑐸, 𑐟𑐬 𑐫𑐵𑐫𑐾 𑐩𑐦𑐸𑐐𑐸 𑐖𑑂𑐫𑐵 𑐫𑐵𑐫𑐾 𑐦𑐸 𑐢𑐎𑐵 𑐩𑐵𑐎:𑐦𑐸𑑃𑐂 𑐩𑐫𑐵𑐫𑐾𑐐𑐸 𑐔𑐬𑐷𑐟𑑂𑐬 𑐣𑐾𑐰𑐵:𑐟𑐫𑑂‌𑐐𑐸 𑐁𑐢𑐵𑐬𑐨𑐹𑐟 𑐔𑐬𑐶𑐟𑑂𑐬 𑐏:𑑋 𑐠𑑂𑐰 𑐔𑐬𑐶𑐟𑑂𑐬 𑐳𑐸𑐣𑐵𑑄 𑐡𑐫𑐾𑐎𑐾 𑐢𑐎𑐵 𑐡𑐫𑐵 𑐰𑐂𑐐𑐸 𑐩𑐏𑐸, 𑐳𑐸𑐣𑐵𑑄 𑐴𑐶𑐮𑐾 𑐢𑐎𑐵 𑐴𑐶𑐮𑐵 𑐰𑐣𑐷𑐐𑐸 𑐩𑐏𑐸 𑑋 𑐔𑐬𑐶𑐟𑑂𑐬 𑐢𑐫𑐵𑐐𑐸 𑐳𑑄𑐳𑑂𑐎𑐵𑐬, 𑐳𑐵𑐩𑐵𑐖𑐶𑐎 𑐩𑐵𑐣𑑂𑐫𑐟𑐵, 𑐰𑐶𑐱𑑂𑐰𑐵𑐳 𑐰 𑐀𑐣𑐸𑐨𑐰𑐫𑐵 𑐮𑐶𑐔𑑂𑐰: 𑐎𑐠𑑄 𑐰𑐶𑐎𑐵𑐳 𑐖𑐸𑐂𑐐𑐸 𑐏: 𑑋 𑐕𑐸𑑄 𑐣𑑄 𑐖𑑂𑐫𑐵 𑐫𑐵𑐫𑐾𑐐𑐸 𑐀𑐣𑐸𑐨𑐰 𑐩𑐡𑐸𑐩𑑂𑐴𑐾𑐳𑐶𑐣𑑄 𑐣𑑂𑐴𑑂𑐫𑐵𑐐𑐸 𑐖𑑂𑐫𑐵 𑐣𑑄 𑐫𑐵𑐫𑐾𑐦𑐸 𑐢𑐎𑐵 𑐟𑐵𑐫𑐾𑐎𑐶𑐂, 𑐕𑐵𑐫𑑂 𑐢𑐵:𑐳𑐵 𑐰𑑄 𑐐𑐧𑑂𑐮𑐾𑑄 𑐖𑑂𑐫𑐵 𑐩𑐫𑐵𑐐𑐸 𑐖𑐸𑐫𑐵 𑐖𑑂𑐫𑐵 𑐫𑐵𑐫𑐾𑐐𑐸 𑐐𑐸𑐮𑐶 𑐠𑐵𑐎𑐸 𑐢𑐎𑐵 𑐩𑐳𑑂𑐫𑐹 𑑋 𑐀𑐠𑐾 𑐖𑐸𑐫𑐵 𑐮𑐵 𑐢𑐵𑐂, 𑐢𑐵𑐫𑐾𑐧𑐮𑐫𑑂 𑐀:𑐥𑐸 – 𑐢𑐬:𑐐𑑂𑐰𑐵𑐬𑐵 𑐟:𑐥𑐸 𑑋 𑐟𑐬 𑐮𑐶𑐥𑐵 𑐣𑐾𑐰𑐵:𑐳𑐩𑐵𑐖 𑐴𑐶𑐮𑐵 𑐰𑑄 𑐮𑐶𑐳𑐾 𑐣𑐾𑐰𑐵: 𑐔𑐬𑐶𑐟𑑂𑐬 𑐣𑑄 𑐴𑐶𑐮𑐵 𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐏:𑐳𑐵𑑄 𑐩𑐏𑐸𑐳𑐵𑑄 𑐫𑐵𑐫𑐾 𑐦𑐸, 𑐫𑐵𑐣𑐵 𑐧𑐷, 𑐎𑑂𑐫𑐣𑐵 𑐧𑐷, 𑐢𑐫𑐵 𑐧𑐷, 𑐴𑐫𑐵 𑐧𑐷 𑐢𑐎𑐵 𑐧𑐎𑐸𑐟𑑂𑐫𑐵𑐬 𑐏𑑃 𑐮𑑂𑐴𑐵𑐣𑐵 𑐖𑐸𑐂𑐥𑐶𑑄 𑐣𑐾𑐰𑐵:𑐟 𑐀𑐥𑑂𑐰𑐫𑐵: 𑐰:𑐐𑐸 𑐡𑐸 𑑋 𑐠:𑐟 𑐦𑐵𑐂𑐡𑐵 𑐖𑐸𑐂𑐐𑐸 𑐖𑐹𑐳𑐵 𑐎𑐟𑐶𑐮𑐵𑐥𑐵𑐎: 𑐥𑐴: 𑐎𑑂𑐫𑐣𑐷𑐥𑐶𑑄, 𑐕𑐎𑐹𑐔𑐵 𑐦𑐵𑐂𑐡𑐵 𑐫𑐵 𑐣𑐶𑐟𑐶𑑄 𑐀𑐣𑑂𑐫𑐵𑐫 𑐳𑐴𑐫𑐵𑐣𑐵 𑐔𑑂𑐰𑐣𑐷𑐥𑐶𑑄 𑐣𑐾𑐰𑐵:𑐟 𑐫𑐎𑑂𑐰 𑐫𑐎𑑂𑐰 𑐴𑐾 𑐡𑐫𑐵 𑐰𑐮 𑑋 𑐠:𑐎𑐾 𑐁𑐟𑑂𑐩𑐰𑐶𑐱𑑂𑐰𑐵𑐳 𑐡𑐸𑐥𑐶𑑄 𑐣𑐾𑐰𑐵:𑐟 𑐫𑐎𑑂𑐰 𑐴𑐾 𑐩𑑂𑐴𑑀 𑐖𑐎 𑐏𑐣𑐾 𑐡𑐸 𑑋 𑐳𑑄𑐳𑑂𑐎𑐵𑐬 𑐳𑑂𑐫𑐣𑐵𑐰𑑄𑐐𑐸, 𑐳𑐵𑐩𑐵𑐖𑐶𑐎 𑐩𑐵𑐣𑑂𑐫𑐟𑐵 𑐢𑑂𑐰𑐳𑑂𑐟 𑐖𑐸𑐫𑐵 𑐰𑑄𑐐𑐸, 𑐢𑑀𑐏𑐵 𑐧𑐶𑐫𑐾𑐐𑐸, 𑐰 𑐖𑑂𑐫𑐵𑐫𑐵 𑐀𑐣𑐸𑐨𑐰 𑐫𑐵𑐫𑐾 𑐩𑐏𑑄𑐐𑐸 𑐴𑐸𑐣𑐶𑑄 𑐫𑐵𑐣𑐵 𑐣𑐾𑐰𑐵:𑐔𑐬𑐶𑐟𑑂𑐬 𑐫𑐎𑑂𑐰 𑐴𑐾 𑐎𑑂𑐰𑐴𑑂𑐫𑐣𑐵 𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐠𑐠𑐾 𑐔𑑂𑐰𑐫𑐾 𑐢𑐫𑐵𑐎𑐠𑑄 𑑔𑐐𑐸 𑐁𑐢𑐵𑐬𑐫𑑂 𑐁𑐎𑑂𑐬𑐩𑐞 𑐫𑐵𑐣𑐵 𑐧𑐶𑐂𑐰𑑄 𑐣𑐾𑐰𑐵:𑐳𑐩𑐵𑐖 𑐴𑐶𑐮𑐵𑐰𑐣 𑑋 𑐟𑐬 𑐳𑐩𑐵𑐖𑐫𑑂 𑐴𑑂𑐫𑐹𑐥𑐵: 𑐔𑐮𑐵𑐫𑐩𑐵𑐣 𑐖𑐸𑐂 𑑋 𑐣𑐶𑐎𑐵𑐳 𑐩𑐵𑐮𑐾𑐐𑐸 𑐮𑑃𑐥𑐸𑐂 𑐣𑐾𑐰𑐵:𑐟𑐳𑐾𑑄 𑐣𑑄 𑐐𑐣 𑐐𑐣 𑐦𑐸 𑐀𑐣 𑐀𑐣 𑐠:𑐥𑐶𑐣𑑂𑐟 𑐊𑐜𑑂𑐖𑐳𑑂𑐚 𑐫𑐵𑐣𑐵 𑐫𑑄𑐎𑐮 𑑋 𑐁𑐏: 𑐧𑑂𑐰𑐣𑐵 𑐥𑑂𑐬𑐱𑐵𑐳𑐣, 𑐰 𑐥𑑂𑐬𑐵𑐰𑐶𑐢𑐶𑐎 (𑐜𑐵𑐎𑑂𑐚𑐬, 𑐂𑐘𑑂𑐖𑐶𑐣𑐶𑐫𑐬, 𑐥𑐵𑐂𑐮𑐚, 𑐁𑐡𑐶) 𑐎𑑂𑐲𑐾𑐟𑑂𑐬𑐫𑑂 𑐫𑐎𑑂𑐰 𑐡𑐸𑐴𑐵𑑃 𑐰𑐣 𑑋 𑐧𑐶𑐡𑐾𑐱𑐫𑑂 𑐣𑑄 𑐠:𑐐𑐸 𑐎𑑂𑐲𑐩𑐟𑐵 𑐎𑑂𑐫𑐣𑐵 𑐟:𑐟:𑐢𑑄𑐐𑐸 𑐖𑐶𑐩𑑂𑐩𑐾𑐰𑐵𑐬𑐷 𑐎𑐸𑐧𑐶𑐫𑐵 𑐔𑑂𑐰𑑄𑐥𑐶𑑄 𑐣𑐾𑐰𑐵:𑐟 𑐫𑐎𑑂𑐰 𑐴𑐾 𑐡𑐸 𑑋 𑐣𑐾𑐰𑐵:𑐟 𑐩𑐠𑑂𑐫𑑄𑐐𑐸 𑐡𑐾𑐫𑑂 𑐩𑐡𑐸, 𑐣𑐾𑐰𑐵:𑐟𑐳𑐾𑑄 𑐮𑑂𑐴𑐵:𑐩𑐟:𑐐𑐸 𑐎𑑂𑐲𑐾𑐟𑑂𑐬 𑐩𑐡𑐸 𑐢𑐫𑐵 𑐠𑐾𑑄 𑐔𑑂𑐰𑑄 𑑋 𑐠:𑐐𑐸 𑐳𑐩𑐵𑐖 𑐳𑑄𑐬𑐔𑐣𑐵𑐫𑑂 𑐮𑐶𑐎𑐸𑐣𑐵 𑐔𑑂𑐰𑐣𑐵 𑐩𑑂𑐰𑐵𑐫𑐾 𑐦𑐿𑐩𑐏𑐸𑐟 𑐢𑐎𑐵 𑐣𑑂𑐴𑐹 𑐣𑑂𑐴𑐹 𑐮𑑃𑐥𑐸 𑐩𑐵𑐮𑐵 𑐰𑑄𑐥𑐶𑑄 𑐣𑐾𑐰𑐵:𑐟 𑐩𑐵𑐮𑐵: 𑐰𑐣 𑐢𑐵:𑐳𑐵 𑐠𑐸𑐮𑐶𑐩𑐕𑐶 𑐠𑐵𑐳𑐫𑑂 𑐣𑐾𑐰𑐵:𑐟 𑐠𑑂𑐫𑐣𑐵𑐔𑑂𑐰𑑄𑐐𑐸 𑐡𑐸 𑐎𑐶 𑐂𑐩𑐶𑐐𑐸 𑐮𑑂𑐫𑐵:𑐔𑐵: 𑐳𑐸𑐣𑐵𑑄 𑐟𑐫𑐾𑐦𑐫𑐵𑐔𑑂𑐰𑑄𑐐𑐸 𑐩𑐡𑐸 𑑋

𑐠𑐠𑐾 𑐣𑐾𑐰𑐵:𑐟 𑐴𑐮𑐶𑐩𑐫𑑂 𑐣𑑂𑐫𑐣𑐵𑑄 𑐰𑐣𑐵𑐔𑑂𑐰𑑄𑐐𑐸 𑐳𑑂𑐰𑐫𑐾𑐧𑐮𑐫𑑂 𑐣𑐾𑐰𑐵:𑐳𑐩𑐵𑐖𑐫𑐵𑐟 𑐗𑐣 𑐧𑐵𑑃𑐮𑐵𑐟 𑐣𑐶 𑐢𑐵𑐫𑐾𑐐𑐸 𑐩𑐟𑐶𑐂 𑐣𑑄 𑐰𑐣𑐾 𑐦𑐸 𑑋 𑐟𑐬 𑐀𑐠𑐾 𑐩𑐏𑐸 𑑋 𑐠𑐠𑐾 𑐳𑐩𑐵𑐖 𑐳𑑄𑐬𑐔𑐣𑐵 𑐥𑐵𑐏𑐾 𑐧𑐶𑐩𑐸𑐏 𑐖𑐹𑐫𑐵 𑐰𑑄𑐥𑐶𑑄 𑐣𑐾𑐰𑐵:𑐥𑐶𑐣𑐶𑐐𑐸 𑐁𑐢𑐵𑐬𑐨𑐸𑐟 𑐳𑑀𑐔 𑐥𑑂𑐬𑐞𑐵𑐮𑐶𑐂 𑐥𑐘𑑂𑐔𑐵𑐫𑐟𑐶 𑐱𑐶𑐎𑑂𑐲𑐵𑑄 𑐥𑐸𑐳𑐵 𑐥𑐶𑐣𑐵𑐧𑑂𑐫𑐹𑐐𑐸 𑐩𑐴𑐾𑐣𑑂𑐡𑑂𑐬𑐧𑐵𑐡𑐷 𑐔𑐶𑐣𑑂𑐟𑐣𑑄 𑐴𑐵𑐐: 𑐎𑐫𑐵 𑐧𑐶𑐮 𑑋 𑐀𑐮𑐾 𑐳𑐩𑐵𑐖 𑐧𑐶𑐏𑐞𑑂𑐜𑐶𑐟 𑐖𑐸𑐖𑐸𑑄 𑐣𑐾𑐰𑐵:𑐟 𑐔𑐷𑐢𑑄𑐐𑐸 𑐡𑐵𑐫𑐬𑐵 𑐡𑐸𑐣𑐾 𑐔𑑂𑐰𑐣𑐾𑐫𑐂𑐥𑐶𑑄, 𑐠:𑐐𑐸 𑐣𑐶𑐖𑐶 𑐳𑑂𑐰𑐵𑐬𑑂𑐠 𑐰 𑐣𑐶𑐖𑐶 𑐖𑐶𑐣𑑂𑐡𑐐𑐶𑐫𑐵𑐟 𑐖𑐎 𑐥𑑂𑐬𑐵𑐠𑐩𑐶𑐎𑐟𑐵 𑐧𑐶𑐂𑐥𑐶𑑄, 𑐧𑑂𑐫𑐎𑑂𑐟𑐶𑐧𑐵𑐡𑐷, 𑐳𑑂𑐰𑐵𑐬𑑂𑐠𑐷 𑐩𑐣𑐹𑐫𑐵 𑐥𑐸𑐔: 𑐎𑐠𑑄 𑐴𑐶𑐮𑐵 𑐰𑐣 𑑋 𑐠:𑐥𑐶𑑄 𑐕𑐵𑐫𑑂 𑐣𑐾𑐰𑐵: 𑐏:, 𑐣𑐾𑐰𑐵: 𑐖𑐸𑐫𑐵 𑐫𑐵 𑐎𑐬𑑂𑐟𑐰𑑂𑐫 𑐕𑐸 𑐏: 𑐢𑐎𑐵 𑐰𑐵𑐳𑑂𑐟𑐵 𑐫𑐵𑐫𑐾𑐐𑐸 𑐳𑐸𑐂𑐟𑑄 𑐩𑐫𑐫𑐵 𑐰𑐮 𑑋 𑐣𑐾𑐰𑐵:𑐳𑐩𑐵𑐖𑐫𑐵 𑐧𑐵𑐬𑐾 𑐔𑐶𑐣𑑂𑐟𑐣 𑐩𑐣𑐣 𑐫𑐵𑐫𑐾𑐐𑐸 𑐎𑑂𑐲𑐩𑐟𑐵 𑐩𑐡𑐫𑐾𑐎𑐵 𑐧𑐶𑐮 𑑋 𑐣𑐵𑑄𑐫𑐵 𑐮𑑂𑐫𑐹𑐣𑐾 𑐔𑑂𑐰𑑄𑐐𑐸 𑐧𑐶𑐣𑐵𑑄 (𑐠𑐬) 𑐳𑑂𑐰𑐫𑐵 𑐖𑐎 𑐠:𑐟 𑐣𑐾𑐰𑐵: 𑐢𑐵𑐂𑐥𑐶𑑄 𑐰 𑐨𑑂𑐰𑐫𑑂 𑐣𑐫𑐵 𑐣𑐾𑐰𑐵:𑐔𑐴𑐥𑐴 𑐮𑑂𑐫𑑄𑐎𑐵 𑐟𑐫𑐵 𑐢𑐎𑐵 𑐩𑐟𑐶𑐂 𑐟𑐂𑐥𑐶𑑄 𑐖𑐸𑐫𑐵 𑐰𑐮 𑑋 𑐠:𑐟 𑐴𑐾 𑐩𑑂𑐴-𑐩𑐳𑐶𑐫𑐵 𑐰𑐫𑐾𑐰𑑄 𑐁: 𑐣𑐾𑐰𑐵:𑐟 𑐧𑐵𑑃𑐩𑐮𑐵𑐎 𑐎𑐩𑐖𑑀𑐬 𑐖𑐸𑐂 𑐢𑐸𑑄𑐎𑐮 𑑋 𑐎𑑂𑐲𑐩𑐟𑐵 𑐡𑐫𑐵 𑐣𑑄 𑐀𑐳𑐎𑑂𑐲𑐩 𑐥𑐶𑐣𑐶 𑐖𑐩𑐵𑐟 𑐠𑐾𑑄 𑐖𑐸𑐖𑐸𑑄 𑐰𑐣 𑑋

𑐣𑑂𑐴𑐵𑐥𑐵 𑐣𑑂𑐴𑐵𑐥𑐵 𑐟𑑂𑐰𑐵𑐮𑐫𑑂 𑐕𑐐𑐹 𑐦𑐮𑑂𑐔𑐵 𑐰 𑐡𑐾𑐐: 𑐡𑐫𑐾𑐎𑐾 𑐩𑐵𑐮 𑐢𑐵:𑐳𑐵 𑐩𑑂𑐴𑐶𑐔𑐵𑑄 𑐖𑐵𑐫𑐾𑐎 𑐖𑐵𑐫𑐾𑐎 𑐢𑐣 𑐥𑑂𑐰: 𑐥𑑂𑐰𑑄𑐎𑐾 𑐴𑐂𑐥𑐶𑑄 𑐣𑐾𑐰𑐵:𑐟 𑐡𑐸 𑐢𑐎𑐵 𑐧𑐵𑐏𑑃 𑐣𑑂𑐫𑐣𑐵 𑐟𑐫𑐵𑐥𑐶𑑄 𑐗𑐷 𑐣𑐾𑐰𑐵:𑐟, 𑐁: 𑐨𑑂𑐰𑐏𑐵𑐔𑑄 𑐨𑐹𑐧𑐵𑐫𑐵 𑐔𑑂𑐰𑑄𑐐𑐸 𑐠:𑐐𑐸 𑐕𑐾𑑃 𑐨𑐶𑑄𑐎𑐾𑐟 𑐣𑑄 ‘𑐐𑑂𑐰𑐴𑐵𑐮𑐶 𑐦𑑂𑐰𑐣𑐾’ 𑐢𑐎𑐵 𑐣𑐶𑐰𑐾𑐡𑐣 𑐟𑐫𑐵 𑐖𑐸𑐂𑐥𑐶𑑄 𑐣𑐾𑐰𑐵:𑐟 𑐳𑑂𑐰𑐫𑐵 𑐔𑑂𑐰𑐣𑐾 𑐩𑐵𑐮𑐵: 𑐰𑐮 𑑋 𑐠𑐖𑐵:𑐐𑐸 𑐰𑐶𑐰𑐱𑐟𑐵𑐫𑐵 𑐡𑐠𑐸𑐂 𑐴𑐵𑐎𑐣𑑄 𑐎𑑂𑐰𑐵𑐮𑑂𑐕𑐶 𑐧𑐸𑑃𑐫𑐵 𑐏𑑃𑐫𑑂 𑐳𑐬𑑂𑐰𑐫𑑂 𑐣𑐵𑐳 𑐖𑐸𑐂𑐎 𑐠:𑐠:𑐴𑐾 𑐡𑐵𑐖𑐸𑐎𑐶𑐖𑐵 𑐟𑐴𑐎𑐾𑐴𑐾𑑃 𑐥𑐶𑑄 𑐣𑐵𑐥 𑐩𑐸𑐡𑑂𑐡𑐵 𑐩𑑂𑐴𑐶𑐟𑐶𑐂𑐥𑐶𑑄 𑐣𑑄 𑐗𑐷 𑐣𑐾𑐰𑐵:𑐟 𑐖𑐸𑐫𑐵𑐰𑐮 𑑋

𑐥𑐵𑐬𑐷𑐰𑐵𑐬𑐷𑐎 𑐟𑐸𑐲𑑄 𑐖𑐎 𑐣𑐾𑐰𑐵:𑐟𑐫𑐟 𑐀𑐳𑐎𑑂𑐲𑐩 𑐫𑐵𑐣𑐵 𑐟:𑐐𑐸 𑐩𑐏𑐸, 𑐬𑐵𑐖𑐣𑐷𑐟𑐶𑐎 𑐬𑐸𑐥𑑄 𑐣𑑄 𑐣𑐾𑐰𑐵:𑐟 𑐧𑐶𑐨𑐵𑐖𑐶𑐟 𑐖𑐸𑐫𑐵 𑐰𑐣 𑑋 𑐐𑐸𑐩𑑂𑐴𑑄 𑐊𑐩𑐵𑐮𑐾, 𑐐𑐸𑐩𑑂𑐴𑑄 𑐎𑐵𑑃𑐐𑑂𑐬𑐾𑐳, 𑐐𑐸𑐩𑑂𑐴𑑄 𑐩𑐵𑐌𑐧𑐵𑐡𑐷, 𑐐𑐸𑐩𑑂𑐴𑑄 𑐬𑐵𑐥𑑂𑐬𑐥𑐵 𑐢𑐎𑐵 𑐠𑐷 𑐠𑐷 𑐥𑐵𑐬𑑂𑐚𑐷𑐂 𑐧𑐶𑐨𑐵𑐖𑐶𑐟 𑐖𑐹𑐥𑐶𑑄 𑐣𑐾𑐰𑐵:𑐟𑐳𑐾𑑄 𑐀𑐣𑑂𑐟𑐶𑐩𑐫𑑂 𑐕𑐸 𑐕𑐸 𑐫𑐵𑐟 𑐮𑐾 𑐢𑐎𑐵 𑐳𑑂𑐰:𑐳𑐵: 𑐟:𑐢𑑄 𑐢𑐵:𑐥𑐶𑑄 𑐣𑐾𑐟𑐵 𑐖𑐸𑐂𑐩𑐵, 𑐔𑐷𑐢𑑄𑐐𑐸 𑐟𑐴𑐫𑐵 𑐎𑐵𑐬𑑂𑐫𑐎𑐬𑑂𑐟𑐵 𑐖𑐸𑐂𑐩𑐵 – 𑐂𑐥𑐶𑑄 𑐡𑐎𑑂𑐰 𑐰𑐣𑐵 𑐴𑐵𑐎𑐣𑑄 𑐰 𑐴𑐾 𑐖𑐵𑐟𑐷𑐫 𑐳𑐟𑑂𑐟𑐵 𑐳𑐘𑑂𑐔𑐵𑐮𑐣 𑐫𑐵𑐣𑐵 𑐔𑑂𑐰𑑄𑐥𑐶𑐣𑐶𑐐𑐸 𑐔𑑂𑐫: 𑐖𑐸𑐫𑐵 𑐴𑐾 𑐖𑐷𑐰𑐣 𑐦𑐸𑐎𑐵 𑐔𑑂𑐰𑐣 𑑋 𑐖𑐶𑑄 𑐩𑐔𑐵𑐧𑐮𑐫𑑂 𑐖𑐶𑐣𑑂𑐡𑐵𑐧𑐵𑐡 𑐩𑐸𑐬𑑂𑐡𑐵𑐧𑐵𑐡𑐫𑐵 𑐀𑐬𑑂𑐠 𑐩𑐠𑐹𑐧𑐮𑐫𑑂 𑐥𑐵𑐬𑑂𑐚𑐷𑐫𑐵 𑐟:𑐢𑑄𑐐𑐸 𑐥𑑀𑐳𑑂𑐚𑐫𑑂 𑐔𑑂𑐰𑑄𑐩𑑂𑐴 𑐨𑐸𑐩𑐶𑐐𑐟 𑐣𑐾𑐟𑐵 𑐢𑐎𑐵 𑐩𑑂𑐴𑐳𑑂𑐫𑐹𑐥𑐶𑑄 𑐣𑐾𑐰𑐵:𑐣𑐾𑐟𑐵 𑐠𑑁𑑄 𑐎𑐣𑑂𑐴𑐫 𑐟𑐎 𑐣𑑄 𑐕𑐸𑑄 𑐴𑐾 𑐖𑐶𑐩𑑂𑐩𑐾𑐰𑐵𑐬𑐷𑐂 𑐩𑐡𑐸 𑑋 𑐥𑐵𑐬𑑂𑐚𑐷𑐫𑐵 𑐁𑐡𑐾𑐱 𑐎𑐵𑐫𑐾𑐐𑐸, 𑐄𑐏𑐾𑑄 𑐠𑐸𑐏𑐾𑑄 𑐧𑑂𑐰𑐵𑑃𑐫 𑐰𑐣𑐾𑐐𑐸 – 𑐧𑐳 𑐄𑐮𑐶 𑐴𑐾 𑐖𑐎 𑑋 𑐣𑐾𑐰𑐵: 𑐳𑐩𑐵𑐖 𑐐𑐣𑑄 𑐣𑐶𑐳𑐾𑑄 𑐐𑐣 𑐟𑐎 𑐠𑑂𑐫𑐣, 𑐕𑐸𑑄 𑐴𑐾 𑐰𑐶𑐔𑐵: 𑐩𑐡𑐸, 𑐐𑐣 𑐠𑑂𑐫𑑄𑐎𑐾𑐐𑐸 𑐮𑐾, 𑐕𑐸𑑄 𑐴𑐾 𑐫𑑀𑐖𑐣𑐵 𑐩𑐡𑐸 𑑋 𑐢𑐵𑐮𑐢𑐵:𑐳𑐵 ‘𑐗𑐷𑐳𑑄 𑐣𑐾𑐰𑐵: 𑐖𑐎 𑐩𑐏𑐸, 𑐣𑐾𑐥𑐵𑐮𑐫𑐵 𑐏𑑃 𑐮𑑂𑐴𑐵𑐫𑐾𑐩𑐵:’ 𑐢𑐎𑐵 𑐢𑐵𑐂 𑑋 𑐎𑐵 𑐩𑑂𑐰𑐵:𑐮 𑐎𑐵 𑐣𑐾𑐥𑐵𑐮𑐫𑐵 𑐴𑐾 𑐏𑑃 𑐢𑐫𑐵𑐡𑐶𑐳𑑃 𑐬𑐾 𑐢𑐵:𑐳𑐵 ‘𑐁: 𑐥𑐵𑐬𑑂𑐚𑐷 𑐥𑐵𑐏𑐾 𑐣𑐶𑐬𑑂𑐞𑐫 𑐰𑐮 𑐎𑐶 𑐢𑐵𑐫𑐾’ 𑐢𑐵𑐂 – 𑐩𑐟𑐮𑐰 𑐥𑐵𑐬𑑂𑐚𑐷𑐫𑐵 𑐣𑐶𑐬𑑂𑐞𑐫𑑂‌?? – 𑐰 𑐮𑐵 𑐗𑐷𑐳𑑄 𑐣𑑂𑐫𑐣𑐵𑐔𑑂𑐰𑐣𑐵𑐐𑐸 𑑓𑑕 𑐡𑑃 𑐡𑐫𑐾𑐢𑐸𑑄𑐎𑐮, 𑐩𑐏𑐸𑐮𑐵? 𑐢𑐵:𑐳𑐵 ‘𑐕𑐶𑐩𑐶𑐳𑑄 𑐬𑐵𑐖𑐣𑐷𑐟𑐶 𑐴𑐾 𑐩𑐠𑐹’ 𑐢𑐎𑐵 𑐢𑐵𑐂 𑑋

𑐢𑐵𑐫𑐾 𑐩𑐵𑐮𑐾 𑐢𑐸𑑄𑐎𑐮 – ‘𑐠𑐹 – 𑐕𑐣𑑂𑐟 𑐕𑐶𑐩𑐶 𑐥𑐵𑐬𑑂𑐚𑐷𑐫𑐵 𑐣𑐾𑐟𑐵 𑐟𑐳𑐾𑑄 𑐐𑐫𑑂 𑐫𑐵𑐣𑐵 𑐑𑑀𑐜𑐵 𑐐𑐫𑐵𑐔𑑂𑐰𑐣, 𑐡𑐎𑑂𑐰𑑄 𑐠𑐹 𑑋 𑐮𑑂𑐫𑐵𑐫𑐩𑑂𑐴𑐔𑐵𑐩𑑂𑐴 𑐴𑐶𑐬𑑀 𑐫𑐵𑐟 𑐨𑐬𑑂𑐣𑐵 𑐫𑐵𑐣𑐵 ‘𑐳𑐎𑑂𑐬𑐶𑐫 𑐳𑐡𑐳𑑂𑐫’𑐫𑐵 𑐟𑐵𑐬𑐞𑑄 𑐔𑐶𑐣𑐵 𑐔𑑂𑐫: 𑐡𑐫𑐾𑐎𑐸 𑐡𑐫𑐾𑐎𑐸𑑄 𑐁: 𑐳𑑃 𑐨𑐸𑐂𑐳𑐾 𑐔𑑂𑐰𑑄𑐩𑑂𑐴 𑐧𑐸𑐴𑑂𑐬𑐵 𑐖𑐸𑐂 𑐢𑐸𑑄𑐎𑐮, 𑐀𑐗 𑐣𑑄 𑐕𑑄 𑐬𑐵𑐖𑐣𑐷𑐟𑐶 𑐩𑐠𑐹 𑐣𑐶, 𑐟𑐬 𑐖𑐶𑐩𑐶𑐳𑑄 𑐠𑐹 𑑋’

𑐥𑐶𑐣𑐾𑑄 𑐥𑐶𑐣𑐾𑑄 𑐣𑑂𑐴𑑂𑐫𑐵𑐐𑑂𑐐𑐸 𑐬𑐵𑐖𑐣𑐷𑐟𑐶𑐎 𑐁𑐰𑐬𑐞 𑐟𑐫𑐵 𑐟:𑐳𑐵𑑄 𑐡𑐸𑐣𑐾𑑄 𑐡𑐸𑐣𑐾𑑄 𑐠𑐣 𑐳𑐟𑑂𑐟𑐵𑐫𑑂 𑐰𑐣𑐾𑐟 𑐖𑐵𑐟𑐷𑐫 𑐳𑐩𑐷𑐎𑐬𑐞 𑐴𑐾 𑐡𑐎𑐮𑐫𑑂 𑐱𑐎𑑂𑐟𑐶𑐱𑐵𑐮𑐷 𑐧𑐣𑑂𑐢𑐣 𑐡𑐸 𑑋 𑐰 𑐴𑐾 𑐣𑐷𑐟𑐶 𑐎𑐠𑑄 𑐳𑑂𑐰𑐣𑐶𑐐:𑐫𑐵 𑐣𑐾𑐰𑐵:𑐳𑐩𑐵𑐖𑐫𑐵𑐟 𑐎𑐩𑐖𑑀𑐬 𑐫𑐵𑐫𑐾𑐟 𑐠𑐣 𑐁𑐥𑑂𑐬𑐰𑐵𑐳𑐣 𑐀𑐥𑑂𑐰𑐫𑐾𑐎𑐵 𑐥𑐶𑐣𑐾𑑄 𑐰𑐂𑐥𑐶𑑄 𑐩𑐣𑐹 𑐟 𑐟𑐣𑐾𑐐𑐸 𑐖𑑂𑐫𑐵 𑐖𑐸𑐮 𑑋 𑐐𑐸𑐩𑑂𑐴𑑄 𑐁𑐏:𑐧𑑂𑐰𑐣𑐾𑐟, 𑐐𑐸𑐩𑑂𑐴𑑄 𑐮𑐖𑐐𑐵: 𑐫𑐵𑐫𑐾𑐟, 𑐐𑐸𑐩𑑂𑐴𑑄 𑐧𑐾𑐥𑐵: 𑐫𑐵𑐫𑐾𑐟 𑐢𑐵𑐢𑐵𑑄 𑐁𑐥𑑂𑐬𑐰𑐵𑐳𑐣 𑐀𑐥𑑂𑐰𑐫𑐵 𑐰𑐣 𑑋 𑐐𑐸𑐮𑐶 𑐐𑐸𑐮𑐶 𑐁𑐥𑑂𑐬𑐰𑐵𑐳𑐣 𑐀𑐥𑑂𑐰𑐮, 𑐄𑐮𑐶 𑐄𑐮𑐶 𑐬𑐦𑑂𑐟𑐵𑐬𑑄 𑐣𑐾𑐰𑐵:𑐟𑐫𑑂‌𑐐𑐸 𑐧𑐸𑑃 𑐴𑐳𑑂𑐟𑐵𑐣𑑂𑐟𑐬𑐞 𑐖𑐸𑐖𑐸𑑄 𑐰𑐣 𑑋 𑐖𑑂𑐫𑐵 𑐫𑐵𑐣𑐵 𑐣𑐫𑐾𑐩𑐵:𑐥𑐶𑑄 𑐣𑐾𑐰𑐵:𑐟 𑐖𑑂𑐫𑐵 𑐩𑐫𑐵𑐳𑐾𑑄 𑐕𑐾𑑃 𑐧𑐵𑐮𑑄 𑐧𑐶𑐫𑐵: 𑐣𑐫𑐾 𑐥𑐮𑑂𑐎𑐾 𑐠𑐹𑐫𑐵 𑐰𑐮 𑑋 𑐖𑑂𑐫𑐵 𑐩𑐫𑐵𑐂𑐥𑐶𑑄 𑐣𑐾𑐰𑐵:𑐥𑐸𑐔: 𑐏𑐣𑐾 𑐡𑐫𑐵 𑐰𑐮 𑑋 𑐣𑐾𑐰𑐵: 𑐳𑐩𑐵𑐖 𑐳𑑂𑐫𑑄𑐳𑑂𑐫𑑄 𑐰𑐣 𑑋 𑐣𑐾𑐰𑐵: 𑐔𑐬𑐶𑐟𑑂𑐬 𑐨𑑂𑐬𑐲𑑂𑐚 𑐖𑐸𑐖𑐸𑑄 𑐰𑐣 𑑋 𑐀𑐮𑐾 𑐁𑐥𑑂𑐬𑐰𑐵𑐳𑐣𑐫𑐵𑐟 𑐐𑐟𑐶 𑐟𑐔𑑂𑐰𑐫𑐾𑐎𑐾𑐟 ‘𑐖𑐣𑐫𑐹𑐡𑑂𑐢’𑐫𑐵 𑐣𑐵𑐩𑐫𑑂 𑐥𑐶𑐣𑐾 𑐥𑐶𑐣𑐾 𑐁𑐟𑑄𑐎𑐫𑐵 𑐰𑐵𑐟𑐵𑐰𑐬𑐞 𑐡𑐫𑐾𑐎𑐵𑐧𑐶𑐮 𑑋 𑐠𑐠𑐾 𑐖𑐹𑐧𑐮𑐫𑑂 𑐳𑑂𑐰𑐣𑐶𑐐:𑐫𑐵 𑐧𑐸𑑃𑐫𑐵 𑐨𑐵: 𑐴𑑂𑐰𑐵𑐬𑐵𑐎𑑂𑐎 𑐠𑐴𑐵𑑃 𑐰𑐣 𑑋 𑐢𑐶𑐧𑐵𑐫𑐵 𑐮𑑀𑐨𑐫𑑂 𑐣𑐾𑐰𑐵:𑐟𑐫𑑂‌𑐳𑑄 𑐧𑐸𑑃 𑐩𑐶𑐂𑐐𑐸 𑐣𑑄 𑐟𑐶𑐧𑑂𑐬 𑐫𑐵𑐣𑐵 𑐫𑑄𑐎𑐮 𑑋 𑐕𑐾𑑃 𑐡𑐣𑐾𑐐𑐸 𑐣𑑄 𑐟𑐶𑐧𑑂𑐬 𑐖𑐸𑐮, 𑐟𑐮𑑂𑐮𑐵 𑐠𑐕𑑂𑐰𑐫𑐾𑐐𑐸 𑐣𑑄 𑐟𑐶𑐧𑑂𑐬 𑐖𑐸𑐮 𑑋 𑐧𑐸𑑃 𑐡𑐮𑐵𑐮 𑐰 𑐬𑐶𑐫𑐵𑐮𑑂𑐚𑐬 𑐜𑐶𑐩𑐵𑐣𑑂𑐜𑑄 𑐳𑑂𑐰𑐣𑐶𑐐:𑐫𑐵 𑐀𑐬𑑂𑐠𑐟𑐣𑑂𑐟𑑂𑐬 𑐴𑐾 𑐎𑑂𑐰𑐵𑐬𑐵𑐎𑑂𑐰𑐵𑐬𑐵 𑐳𑑄𑐎𑐵 𑐧𑐶𑐮 𑑋 𑐩𑑂𑐴𑐶𑐐:𑐟𑐎 ‘𑐏𑐾𑐟𑐩𑐵 𑐎𑐵𑐩 𑐐𑐬𑐾𑐬 𑐏𑐵𑐣𑐾 𑐣𑐾𑐰𑐵𑐬’ 𑐢𑐵𑐫𑐾𑐎𑐵 𑐔𑑂𑐰𑐣𑐾𑐩𑐵:𑐥𑐶𑑄 𑐕𑐎𑑂𑐰𑐮𑑄 ‘𑐎𑐬𑑀𑐜𑐥𑐟𑐶 𑐳𑐵𑐴𑐸𑐖𑐶’ 𑐖𑐹 𑐰𑐣 𑑋 𑐮𑐵𑐫𑑂 𑐟𑐫𑐾𑐐𑐸 𑐮𑐎𑐳 𑐩𑐡𑐸, 𑐟𑐬 𑐩𑑂𑐴𑐶𑐔𑐵𑐫𑑂 𑐢𑐶𑐧𑐵 𑐢𑐵:𑐳𑐵 𑐐𑐵𑐎𑑂𑐎 𑐡𑐸 𑑋 𑐀𑐠𑐾 𑐖𑐹𑐧𑐮𑐫𑑂 𑐢𑐶𑐧𑐵 𑐩𑐸𑑄𑐎𑐾 𑐦𑐸𑐥𑐶𑐣𑐶 𑐢𑐶𑐧𑐵 𑐣𑑄 𑐬𑐶𑐫𑐵𑐮𑑂𑐚𑐬 𑐩𑐵𑐬𑑂𑐎𑐾𑐚𑐫𑑂 𑐴𑐾 𑐡𑐸𑐴𑐵𑑃 𑐰𑐣 𑑋 𑐀𑐮𑐾 𑐧𑐸𑑃𑐫𑐵 𑐨𑐵: 𑐎𑐺𑐟𑐶𑐩 𑐬𑐸𑐥𑑄 𑐠𑐴𑐵𑑃 𑐠𑐴𑐵𑑃 𑐰𑐣 𑑋 𑐰 𑐣𑐵𑐥𑐣𑐵𑐥𑑄 𑐳𑐴𑐎𑐵𑐬𑐷 𑐦𑐿𑐮𑐾 𑐖𑐹 𑐰𑑄 𑐧𑐮𑐫𑑂 𑐢𑐶𑐧𑐵 𑐔𑐵:𑐴𑐶𑐮𑐷𑐐𑐸 𑐔𑐎𑑂𑐬 𑐣𑑄 𑐗𑐣 𑐟𑐶𑐧𑑂𑐬 𑐖𑐹 𑐰𑐣 𑑋 𑐠𑑂𑐰 𑐡𑐎𑑂𑐰𑐫𑐵 𑐮𑐶𑐔𑑂𑐰: 𑐎𑐠𑑄 𑐩𑐸𑐡𑑂𑐬𑐵𑐳𑑂𑐦𑐶𑐟𑐶 𑐟𑐳𑑂𑐎𑑄 𑐟𑐔𑑂𑐰𑐫𑐵 𑐰𑐣 𑑋

𑐠𑑂𑐰 𑐔𑐎𑑂𑐬𑑄 𑐫𑐵𑐣𑐵 𑐣𑐾𑐰𑐵:𑐳𑐩𑐵𑐖𑐫𑐵𑐟 𑐐𑑂𑐫𑐵𑐣𑐵𑐥𑐸𑐐𑐸 𑐁𑐬𑑂𑐠𑐶𑐎 𑐨𑐰𑐶𑐲𑑂𑐫𑐥𑐵𑐏𑐾 𑐑𑑂𑐰𑐵𑐣𑐵 𑐫𑑄𑐎𑐵𑐔𑑂𑐰𑑄𑐐𑐸 𑐡𑐸 𑑋 𑐏: 𑐧𑑂𑐫𑐎𑑂𑐟𑐶𑐐𑐟 𑐦𑐵𑐂𑐡𑐵𑐫𑐵 𑐏𑐾𑐮𑐫𑐵𑐟 𑐳𑑂𑐰𑐫𑐾𑐐𑐸 𑐏:𑐳𑐵 𑐠𑑂𑐰 𑐎𑐵𑐣𑐹𑐣𑐴𑐶𑐣 𑐳𑐩𑐵𑐖, 𑐳𑑂𑐰𑐟𑐣𑑂𑐟𑑂𑐬 𑐧𑐖𑐵𑐬 𑐰 𑐀𑐣𑐶𑐫𑐣𑑂𑐟𑑂𑐬𑐶𑐟 𑐎𑐵𑐬𑑀𑐧𑐵𑐬 𑐢𑐿𑐐𑐸 𑐡𑐵𑑄 𑐎𑐩𑐾𑐫𑐵𑐫𑐾𑐐𑐸 𑐀𑐰𑐳𑐬 𑐏𑐫𑐾𑐦𑐸 𑑋 𑐕𑐵𑐫𑑂 𑐢𑐵:𑐳𑐵 𑐠𑐣 𑐣𑑂𑐴𑑂𑐫𑐵𑐐𑐸 𑐮𑐵𑐫𑑂 𑐣𑑄 𑐟𑐳𑑂𑐎𑑄 𑐏𑐟𑐬𑐵𑐫𑑂 𑐡𑐸, 𑐐𑐣 𑐏𑐟𑐬𑐵 𑐡𑐂 𑐀𑐣 𑐀𑐰𑐳𑐬 𑐣𑑄 𑐡𑐂 𑐢𑐫𑐵𑐐𑐸 𑐀𑐬𑑂𑐠𑐱𑐵𑐳𑑂𑐟𑑂𑐬𑐫𑐵 𑐣𑐶𑐫𑐩 𑐴𑐾 𑐖𑐸𑐮 𑑋 𑐟𑐬 𑐩𑐸𑐎𑑂𑐎𑑄 𑐳𑐩𑐵𑐖𑐫𑐵𑐟 𑐳𑑂𑐰𑐟 𑐢𑐵:𑐳𑐵 𑐠𑐣 𑐨𑐶𑑄 𑐖𑐸𑐂𑐐𑐸 𑐕𑐸𑑄 𑐴𑐾 𑐮𑐎𑑂𑐲𑐞 𑐩𑐡𑐸 𑑋 𑑕𑐩𑑂𑐴 𑐩𑐣𑐹𑐫𑐵 𑐳𑐩𑐵𑐖𑐫𑑂 𑐕𑐩𑑂𑐴 𑐩𑐣𑐹 𑐢𑐣𑐶 𑐖𑐸𑐫𑐵 𑑔 𑐩𑑂𑐴 𑐩𑐣𑐹 𑐐𑐬𑐷𑐰 𑐖𑐸𑐫𑐵 𑐰𑐣𑐷𑐐𑐸 𑐖𑐸𑐮 𑐢𑐵:𑐳𑐵 𑐁𑐏𑐶𑐬𑐫𑑂 𑐰 𑐳𑐩𑐵𑐖 𑐐𑐬𑐷𑐰 𑐴𑐾 𑐖𑐸𑐂𑐐𑐸 𑐏: 𑑋 𑑕 𑐩𑑂𑐴𑑄 𑐩𑐣𑐹 𑐢𑐣𑐷 𑐖𑐸𑐫𑐵 𑐰𑐣𑐷𑐐𑐸 𑐖𑐹𑐳𑐵 𑐖𑐎 𑐰 𑐳𑐩𑐵𑐖 𑐢𑐣𑐷 𑐖𑐸𑐂𑐐𑐸 𑐏: 𑑋

𑐣𑑂𑐴𑑂𑐫𑐵𑐐𑐸 𑐥𑐵𑐬𑑂𑐚𑐷𑐂 𑐔𑑂𑐰𑐣𑐵𑐔𑑂𑐰𑑄𑐥𑐶𑑄 𑐣𑐾𑐰𑐵:𑐟 𑐖𑐹𑐳𑐵𑑄 𑐣𑑄 𑐣𑐾𑐰𑐵: 𑐩𑐸𑐡𑑂𑐡𑐵𑐫𑑂 𑐳𑐎𑐮𑐾𑑄 𑐣𑐾𑐰𑐵:𑐟 𑐕𑐠𑐵𑐫𑑂 𑐩𑐸𑐣𑐾𑐟 𑐥𑐵𑐬𑑂𑐚𑐷 𑐟𑑂𑐰:𑐟𑐵: 𑐰𑐣𑐾𑐩𑐵:𑐳𑐵𑑄 𑐟𑐫𑐵𑐬 𑐖𑐸𑐂𑐥𑐶𑑄 𑐣𑐾𑐰𑐵:𑐟 𑐡𑐫𑐾𑐩𑐵: 𑐢𑐎𑐵 𑐳: 𑐥𑐶𑐖𑑂𑐰:𑐧𑐮𑐫𑑂 𑐠:𑐠:𑐐𑐸 𑐥𑐵𑐬𑑂𑐚𑐷 𑐟𑑂𑐰:𑐟𑐾𑐟 𑐟𑐫𑐵𑐬 𑐖𑐸𑐂𑐥𑐶𑑄 𑐣𑐾𑐰𑐵:𑐟 𑐏𑐣𑐾𑐩𑐣𑑂𑐟 𑑋 𑐣𑐾𑐰𑐵:𑐫𑐵 𑐣𑐵𑐩𑐫𑑂 𑐡𑐬𑑂𑐟𑐵 𑐫𑐵𑐣𑐵𑐴:𑐐𑐸 𑐥𑐵𑐬𑑂𑐚𑐷 𑐣𑑄 𑐄𑐮𑐶 𑐐𑐟𑐶 𑐩𑐮𑐵𑐟 𑑋 𑐧𑐵𑐧𑐸𑐬𑐵𑐩𑐫𑐵 𑐳𑐬𑐎𑐵𑐬𑐫𑐵 𑐥𑐵𑐮𑐫𑑂 𑐮𑑃 𑐟𑐧𑑂𑐫𑐵 𑐫𑐵𑐫𑐾𑐐𑐸 𑐢𑐎𑐵 𑐣𑐾𑐰𑐵:𑐟𑐫𑐐𑐸 𑐕𑐾𑑄 𑐠𑐸𑐣𑐵𑐴:𑐧𑐮𑐫𑑂 𑐧𑐶𑐎𑐵𑐳𑐫𑐵 𑐖𑑂𑐫𑐵𑐫𑑂 𑐧𑐶𑐬𑑀𑐢 𑐫𑐵𑐫𑐾𑐩𑐖𑑂𑐫𑐹 𑐢𑐎𑐵 𑐳𑐸𑐩𑑂𑐎 𑐔𑑂𑐰𑐣𑐵𑐧𑐶𑐮 𑑋 𑐀𑐧𑐮𑐫𑑂 𑐗𑐷𑐳𑑄 𑐫𑐎𑑂𑐰 𑐴𑐾 𑐂𑐣𑐵𑐥 𑐫𑐵𑐣𑐵 𑐎𑐶 𑐕𑐩𑑂𑐴 𑐣𑐾𑐰𑐵:𑐫𑐵𑐟 𑐖𑐹𑐐𑐸 𑐀𑐣𑑂𑐫𑐵𑐫𑑂‌𑐫𑐵 𑐰𑐶𑐬𑑀𑐢𑐫𑑂 𑐳𑐎𑐮𑐾𑑄 𑐣𑐾𑐰𑐵:𑐟𑐳𑐾𑑄 𑐳: 𑐟𑐫𑐾𑐩𑐵:𑑋 𑐰𑐶𑐎𑐵𑐳𑐫𑐵 𑐣𑐵𑐩𑐫𑑂 𑐳𑐵𑐬𑑂𑐰𑐨𑑁𑐩 𑐖𑐣𑐟𑐵𑐫𑐵 𑐕𑐾𑑃 𑐧𑐸𑑃 𑐖𑐧𑐬𑐖𑐳𑑂𑐟𑐶 𑐀𑐢𑐶𑐐𑑂𑐬𑐴𑐞 𑐫𑐵𑐫𑐾 𑐡𑐿𑐩𑐏𑐸 𑑋 𑐂𑐩𑐶𑐟 𑐄𑐔𑐶𑐟 𑐰𑐶𑐎𑐮𑑂𑐥 𑐧𑐶𑐫𑐾𑐐𑐸 𑐖𑐶𑐩𑑂𑐩𑐾𑐰𑐵𑐬𑐷 𑐥𑐸𑐩𑐰𑑄𑐎 𑐖𑐣𑐟𑐵𑐫𑐵 𑐕𑐾𑑃 𑐧𑐸𑐮𑐜𑑀𑐖𑐬𑑄 𑐠𑐸𑐣𑐾𑐩𑐖𑑂𑐫𑐹 𑑋 𑐟𑐬 𑐡𑐎𑑂𑐰 𑐣𑐾𑐰𑐵:𑐟 𑐳𑐸𑐩𑑂𑐎 𑐔𑑂𑐰𑐣𑐵𑐧𑐶𑐮 𑑋 𑐧𑐶𑐎𑐵𑐳𑐫𑐵 𑐖𑑂𑐫𑐵𑐫𑐵 𑐣𑐵𑐩𑐫𑑂 𑐠𑐠𑐾 𑐖𑐸𑐫𑐵𑐰𑐣 𑐢𑐵:𑐳𑐵 𑐮𑐶𑐥𑐵 𑐩𑐾𑐩𑐾 𑐠𑐵𑐫𑑂 𑐣𑑄 𑐮𑑃 𑐟𑐧𑑂𑐫𑐵: 𑐫𑐵𑐣𑐵 𑐴𑐂𑐧𑐮𑐫𑑂 𑐳𑐸𑐣𑐵𑑄 𑐣𑑄 𑐳: 𑐟𑐂𑐩𑐏𑐸 𑑋 𑐀𑐳𑐣-𑐂𑐣𑑂𑐡𑑂𑐬𑐔𑑀𑐎 𑐫𑐵 𑐮𑑃 𑑒𑑐 𑐩𑐶𑐚𑐬 𑐟𑐧𑑂𑐫𑐵 𑐫𑐵𑐫𑐾𑐩𑐵𑐮 𑐢𑐎𑐵 𑐧𑐸𑐮𑐜𑑀𑐖𑐬 𑐣𑑂𑐴𑑂𑐫𑐵𑐎𑐵𑐴𑐮 𑐢𑐵:𑐳𑐵 𑐮𑐵𑐖𑐶𑐩𑑂𑐥𑐵𑐚𑐫𑐵 𑐣𑐾𑐰𑐵:𑐟 𑐁: 𑐧𑐶𑐬𑑀𑐢 𑐫𑐵𑐂 𑐮𑐵? 𑐕𑐵𑐫𑐾 𑐫𑐵𑐂? 𑐫𑐮𑐢𑑂𑐰𑐵𑐎𑐵 𑐩𑑄𑐐𑐮𑐧𑐖𑐵𑐬𑐫𑐵 𑐮𑑃 𑑑𑑕 𑐩𑐶𑐚𑐬 𑐟𑐧𑑂𑐫𑐵 𑐫𑐵𑐫𑐾𑐩𑐵𑐮 𑐢𑐵:𑐳𑐵 𑐣𑑄 𑐴𑐵𑐮𑐷𑐥𑐶𑑄 𑐩𑐰𑐫𑐾𑐦𑐸 𑑋 𑐣𑐾𑐰𑐵: 𑐧𑐳𑑂𑐟𑐶𑐫𑐵 𑐐𑐮𑑂𑐮𑐶 𑐐𑐮𑑂𑐮𑐶𑐂 𑐣𑑂𑐴𑐹 𑐕𑐾𑑃 𑐡𑐣𑐾𑐟 𑑕 𑐦𑐶𑐚 𑐟𑑂𑐰:𑐟𑐾𑐩𑐵:𑐐𑐸 𑐢𑐎𑐵 𑐖𑐎 𑐢𑐵𑐫𑐾𑐰𑑄 𑐴𑐾 𑐩𑐬𑑂𑐎𑐵𑐫𑑂 𑐮𑐵𑐂𑐥𑐶𑑄 𑐣𑐾𑐰𑐵:𑐟 ‘𑐧𑐶𑐎𑐵𑐳𑐫𑐵 𑐖𑑂𑐫𑐵𑐫𑑂 𑐧𑐶𑐬𑑀𑐢 𑐫𑐵𑐫𑐾𑐩𑐖𑑂𑐫𑐹’ 𑐢𑐎𑐵 𑐣𑐾𑐰𑐵:𑐟𑐫𑑂‌𑐐𑐸 𑐴𑐾 𑐕𑐾𑑃 𑐠𑐸𑐣𑐵 𑐮𑑃 𑐟𑐧𑑂𑐫𑐵 𑐫𑐵𑐣𑐵𑐴:𑐧𑐮𑐫𑑂 𑐩𑑂𑐴𑐸𑐟𑐸𑐂 𑐢𑑁 𑐦𑐶𑐣𑐵 𑐔𑑂𑐰𑐣𑐵 𑐧𑐶𑐮 𑑋

𑐣𑐾𑐰𑐵:𑐟𑐫𑑂‌𑐐𑐸 𑐠𑐖𑑂𑐫𑐵𑐐𑐸 𑐥𑐴𑐮𑑄 𑐫𑐵𑐣𑐵 𑐳𑐟𑑂𑐟𑐵𑐢𑐵𑐬𑐷𑐥𑐶𑐣𑐶𑐐𑐸 𑐖𑐧𑐬𑑂𑐖𑐳𑑂𑐟𑐶𑐣𑐵𑐥 𑐁: 𑐣𑐾𑐰𑐵:𑐟 𑐎𑐮𑐾𑐎𑑂𑐚𑐶𑐨 𑐧𑐵𑐬𑑂𑐐𑐾𑐣 𑐫𑐵𑐣𑐵 𑐮𑑂𑐰𑐵𑐫𑐾𑐐𑐸 𑐁𑑃𑐚 𑐩𑐡𑐫𑐵 𑐰𑐣 𑑋 𑐳𑑂𑐰𑐫𑐵𑐡𑐶𑐳𑑃, 𑐮𑑃 𑐟𑐧𑑂𑐫𑐵: 𑐫𑐵𑐫𑐾𑐐𑐸 𑐣𑐵𑐩𑐫𑑂 𑐁: 𑐣𑑄 𑐎𑐮𑑄𑐎𑐶 𑐠𑐵𑐣𑐎𑑀𑐚 𑐬𑐸𑐚𑐫𑐵 𑐡𑑂𑐰𑐮𑑄 𑐡𑑂𑐰: 𑐥𑐶 𑐣𑐾𑐰𑐵:𑐟𑐫𑑂‌𑐐𑐸 𑐧𑐸𑑃 𑐮𑐵𑐎𑐵 𑐎𑐵𑐫𑐾𑐟𑑂𑐫𑑄𑐐𑐸 𑐡𑐸 𑑋 𑐀𑐣 𑐠:𑐠:𑐐𑐸 𑐕𑐾𑑃 𑐰 𑐧𑐸𑑃 𑐮𑐵𑐎𑐵 𑐔𑑂𑐰𑐣𑐾𑐩𑐵:𑐥𑐶𑑄 𑐨𑐟𑐶𑐔𑐵 𑐨𑐟𑐶𑐔𑐵 𑐴𑐵𑐮𑐵𑐔𑑂𑐰𑑄𑐐𑐸 𑐡𑐸, ‘𑐏𑑀𑐳𑐾𑐬 𑐮𑐶𑐣 𑐥𑐵𑐂𑐡𑐿𑐣, 𑐄𑐔𑐶𑐟 𑐎𑑂𑐲𑐟𑐶𑐥𑐸𑐬𑑂𑐟𑐶 𑐡𑐾𑐄’𑑋 𑐠𑑂𑐰 𑐐𑐖𑐵:𑐐𑐸 𑐴𑑂𑐰𑐵𑐖𑑂𑐫: 𑐩𑐵𑐐? 𑐗𑐷 𑐣𑐾𑐰𑐵: 𑐩𑐸𑐮𑐧𑐵𑐳𑐷 𑐥𑐶𑐣𑐶𑐐𑐸 𑐠𑐵𑐳𑐫𑑂 𑐁𑐥𑑂𑐬𑐰𑐵𑐳𑐷 𑐟 𑐰𑐫𑐵 𑐗𑐷𑐐𑐸 𑐧𑐸𑑃 𑐀𑐢𑐶𑐐𑑂𑐬𑐴𑐞 𑐫𑐵𑐂𑐐𑐸, 𑐀𑐮𑐾 𑐗𑐷𑐳𑑄 𑐂𑐥𑐶𑑄 𑐣𑐵𑐥 𑐎𑐵𑐫𑐾𑐐𑐸 𑐖𑐹𑐳𑐵 𑐎𑐵, 𑐖𑐶𑐩𑐶𑐟 𑐡𑐵𑑃𑐥𑑂𑐰: 𑐖𑐎 𑐴𑐖𑐶 𑐢𑐎𑐵 𑐦𑑂𑐰𑐣𑐾𑐐𑐸 𑐴𑑃 𑑋 𑐢𑐶𑐎𑑂𑐎𑐵𑐬 𑐢𑐵𑐫𑐾𑐩𑐵𑐳𑑂𑐟𑐾 𑐰: 𑑋 ‘𑐎𑑂𑐲𑐟𑐶𑐥𑐸𑐬𑑂𑐟𑐶 𑐡𑐾𑐄’ 𑐩𑐢𑐵𑐳𑐾𑑄 ‘𑐴𑐵𑐩𑑂𑐬𑑀 𑐛𑐵𑐄𑑃𑐩𑐵 𑐴𑐵𑐩𑐷 𑐣𑐿 𑐧𑐵𑐚𑑀 𑐧𑐣𑐵𑐄𑑃𑐕𑑁, 𑐴𑐵𑐩𑐷𑐮𑐵𑐂 𑐣𑐶𑐬𑑂𑐞𑐫 𑐐𑐬𑑂𑐣 𑐡𑐾𑐄, 𑐴𑐵𑐩𑐷𑐮𑐵𑐂 𑐀𑐢𑐶𑐎𑐵𑐬 𑐡𑐾𑐄’ 𑐢𑐎𑐵 𑐢𑐵𑐫𑐾𑐩𑐵:𑐐𑐸 𑐩𑐏𑐸𑐮𑐵? 𑐧𑐶𑐎𑐵𑐳𑐫𑐵 𑐖𑑂𑐫𑐵 𑐢𑐎𑐵 𑐧𑐶𑐬𑑀𑐢 𑐫𑐵𑐫𑐾𑐩𑐖𑑂𑐫𑐹 𑐢𑐎𑐵 𑐢𑐵𑐂𑐥𑐶𑐣𑑂𑐳𑑄 𑐧𑐶𑐎𑐵𑐳𑐫𑐵 𑐖𑑂𑐫𑐵𑐫𑑂 𑐥𑐧𑑂𑐮𑐶𑐎 𑐥𑐵𑐬𑑂𑐚𑐶𑐳𑐶𑐥𑐾𑐱𑐣 𑐫𑐵𑐎𑐾𑐩𑐵: 𑐢𑐎𑐵: 𑐢𑐵𑐫𑐾 𑐩𑐳:𑐮𑐵? 𑐩𑐳:𑐐𑐸 𑐩𑐏𑐸, 𑐩𑐢𑐵:𑐐𑐸 𑐏:𑑋 𑐱𑐵𑐫𑐡 𑐀𑐣 𑐳𑑂𑐰𑐵𑐬𑑂𑐠𑐫𑐵 𑐎𑐵𑐮𑐰𑐶𑐮 𑐖𑐹𑐐𑐸 𑐡𑐸 𑐖𑐸𑐂𑐦𑐸 𑑋 𑐠𑐠𑐾, 𑐣 𑐧𑐶𑐬𑑀𑐢 𑐫𑐵𑐂𑐥𑐶𑐣𑑂𑐳𑑄 𑐐𑐟𑐶𑐮𑐵𑐎 𑐧𑐶𑐬𑑀𑐢 𑐫𑐵𑐫𑐾𑐳𑐮, 𑐣 𑐳𑐩𑐬𑑂𑐠𑐣 𑐫𑐵𑐂𑐥𑐶𑐣𑑂𑐳𑑄 𑐐𑐟𑐶𑐮𑐵𑐎 𑐳𑐩𑐵𑐢𑐵𑐣 𑐧𑐶𑐂𑐳𑐮, 𑐣𑑂𑐴𑑂𑐫𑐵𑐠𑐾 𑐫𑐵𑐣𑐵𑑄 𑐣𑑄 𑐩𑐬𑑂𑐎𑐵𑐫𑑂 𑐮𑐵𑐂𑐥𑐶𑑄 𑐣𑐾𑐰𑐵:𑐟 𑐖𑐎 𑐖𑐸𑐫𑐵𑐔𑑂𑐰𑐣 𑑋 𑐟𑐬 𑐳𑐱𑐎𑑂𑐟 𑐧𑐶𑐬𑑀𑐢 𑐫𑐵𑐫𑐾𑐐𑐸 𑐁𑑃𑐚 𑐣𑐾𑐰𑐵:𑐳𑐩𑐵𑐖 𑐫𑐵‌𑐎𑐾 𑐩𑐡𑐫𑐾 𑐢𑐸𑑄𑐎𑐮 𑑋 𑐣𑐾𑐰𑐵: 𑐳𑐩𑐵𑐖𑐫𑐵 𑐣𑐶𑐟𑐶𑑄 𑐮𑑂𑐰𑐵𑐫𑐾, 𑐴𑐵𑐮𑐾, 𑐫𑑀𑐐𑐡𑐵𑐣 𑐧𑐶𑐫𑐾 𑐢𑐎𑐵 𑐐𑐠𑐣 𑐫𑐵𑐣𑐵 𑐟:𑐐𑐸 𑐳𑐎𑐮𑐾𑑄 𑐏𑐮:𑐥𑐸𑐔:𑐳𑑄𑐳𑑂𑐠𑐵 𑐟 𑐳𑐷𑐐𑐸 𑐧𑐬𑐵𑐧𑐬 𑐖𑐸𑐂 𑐢𑐸𑑄𑐎𑐮 𑑋 𑐣𑐾𑐰𑐵: 𑐬𑐵𑐖𑑂𑐫 𑐩𑐵𑐮 𑐢𑐎𑐵 𑐴𑐵𑐮𑐵 𑐖𑐸𑐂𑐥𑐶𑑄 𑐟𑐎 𑐴𑐾 𑐣𑐾𑐰𑐵:𑐟𑐫𑑂‌𑐐𑐸 𑐕𑐾𑑃 𑐧𑐸𑑃 𑐠𑐸𑐣𑐾 𑐡𑐿𑐩𑐏𑐸 𑐢𑐵𑐫𑐾𑐐𑐸 𑐴𑐶𑐩𑑂𑐩𑐟 𑐩𑐫𑐵𑐫𑐾 𑐢𑐸𑑄𑐎𑐮 𑑋 𑐩𑑂𑐴𑐶𑐐: 𑐐𑑂𑐬𑐾𑐚𑐬 𑐬𑐶𑐒𑐬𑑀𑐜 𑐡𑐫𑐾𑐎𑐾𑐟 𑐳𑑂𑐰:𑐧𑐮𑐫𑑂 𑐧𑐶𑐬𑑀𑐢 𑐫𑐵𑐣𑐵 𑐥𑐣𑐾𑐦𑐸𑐥𑐶𑑄 𑐣𑐾𑐰𑐵:𑐟 𑐁: 𑐴𑐵𑐎𑐣𑑄 𑐰 𑐴𑐾 𑐫𑑀𑐖𑐣𑐵 𑐴𑐮 𑐢𑐵:𑐳𑐵 𑐥𑐣𑐾 𑐩𑐦𑐿𑐐𑐸 𑐀𑐰𑐳𑑂𑐠𑐵𑐫𑑂 𑐰𑐣𑐾 𑐢𑐸𑑄𑐎𑐮 𑑋

𑐬𑐵𑐖𑐣𑐷𑐟𑐶𑐂 𑐳𑐎𑑂𑐬𑐶𑐫 𑐥𑐶𑑄 𑐕𑐸𑑄 𑐨𑐟𑐷𑐔𑐵 𑐣𑐾𑐰𑐵:𑐟 𑐧𑐵𑐴𑐾𑐎 𑐩𑐾𑐥𑐶𑑄 𑐣𑐾𑐰𑐵:𑐟𑐫𑑂‌𑐎𑐾 𑐁𑐟𑑂𑐩𑐰𑐶𑐱𑑂𑐰𑐵𑐳 𑐟𑐳𑑂𑐎𑑄 𑐎𑐩 𑐖𑐸𑐂𑐢𑐸𑑄𑐎𑐮 𑑋 𑐐𑐣𑑄 𑐕𑐸𑑄 𑐩𑐏𑐹𑐐𑐸 𑐖𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐏𑐣 𑐢𑐵:𑐳𑐵 𑐄𑐂𑐟 𑐥𑐣𑐾𑐐𑐸, 𑐩𑐏𑐹𑐐𑐸 𑐖𑑂𑐫𑐵 𑐫𑐵𑐫𑐾𑐩𑐟𑐾 𑐢𑐎𑐵 𑐴𑐟𑐎𑐾𑐐𑐸, 𑐰 𑐩𑐏𑐸𑐐𑐸 𑐖𑑂𑐫𑐵𑑄 𑐥𑐶𑐜𑐶𑐟 𑐖𑐹 𑐥𑐶𑐣𑑂𑐟 𑐐𑑂𑐰𑐴𑐵𑐮𑐶 𑐫𑐵𑐫𑐾𑐐𑐸 𑐁𑑃𑐚 𑐣𑐾𑐰𑐵:𑐳𑐩𑐵𑐖𑐫𑐵𑐎𑐾 𑐢𑐩𑐵𑐢𑐩 𑐩𑐡𑐫𑐵 𑐰𑐣 𑑋 𑐀𑐣𑑂𑐫𑐵𑐫 𑐖𑐹𑐳𑐵𑑄 𑐀𑐣𑑂𑐫𑐵𑐫 𑐖𑐹𑐐𑐸 𑐏:𑐮𑐵 𑐩𑐏𑐸𑐮𑐵 𑐢𑐎𑐵 𑐩𑐠𑐸𑐂𑐐𑐸, 𑐀𑐮𑐾 𑐠𑐸𑐫𑐵 𑐰:𑐳𑐵 𑐣𑑄 ‘𑐎𑐵: 𑐀𑐠𑐾 𑐫𑐵𑐫𑐾 𑐩𑐖𑑂𑐫𑐹’ 𑐢𑐎𑐵 𑐟𑐸𑐮𑐸𑐟𑐸𑐮𑐸 𑐳𑑂𑐰𑐫𑐵 𑐔𑑂𑐰𑐣𑐾𑐐𑐸 𑐧𑐵𑐣𑐶 𑐏𑐣𑐾 𑐡𑐫𑐵 𑐰𑐮 𑑋 𑐀𑐗 𑐐𑑂𑐫𑐵𑐣𑐵𑐥𑐸𑐐𑐸 𑐏𑑃 𑐮𑐵 𑐠𑑂𑐰 𑐏: 𑐎𑐶 𑐀𑐣𑑂𑐫𑐵𑐫 𑐖𑐸𑐮 𑐢𑐎𑐵 𑐠𑐹𑐥𑐶𑑄 𑐣𑐾𑐰𑐵:𑐟 𑐣𑑄 𑐩𑐠𑐹 𑐥𑐴 𑐫𑐵𑐣𑐵 𑐧𑐸𑐗 𑐥𑐔𑐾𑐫𑐵𑐣𑐵 𑐔𑑂𑐰𑐣𑐷𑐐𑐸 𑐖𑐸𑐫𑐵𑐰𑐮 𑑋 𑐠𑐸𑐮 𑐢𑐎𑐵 𑐥𑑂𑐬𑐟𑐶𑐎𑑂𑐬𑐶𑐫𑐵 𑐎𑑂𑐫𑐣 𑐎𑐶 𑐧𑐶𑐬𑑀𑐢 𑐫𑐵𑐫𑐾𑐩𑐵𑐮𑐷, 𑐧𑐶𑐬𑑀𑐢 𑐫𑐵𑐟 𑐎𑐶 𑐠:𑐟 𑐩𑐕𑐶𑐣𑐶 𑐢𑐎𑐵: 𑐐𑑂𑐫𑐵𑐣𑐵 𑐧𑐬𑐸 𑐀:𑐥𑐸𑐎 𑐴𑐾 ‘𑐊!! 𑐀𑐠𑐾𑐮𑐵 𑐖𑐶𑑄 𑐳𑐶 𑐴𑐾 𑐩𑐳𑑂𑐫𑐹 𑐎𑐵 𑐐𑑂𑐰:’ 𑐢𑐎𑐵 𑐰𑐵𑐳𑑂𑐫𑐵𑐎𑑂𑐎 𑐣𑑂𑐴𑐶𑐮𑐵 𑐎𑑂𑐫𑐣𑐾𑐐𑐸 𑐫𑐵𑐂𑐥𑐶𑑄 𑐣𑐾𑐰𑐵:𑐟 𑐫𑐎𑑂𑐰 𑐡𑐫𑐵𑐰𑐮 𑑋

𑐣𑐾𑐰𑐵:𑐟 𑐎𑐮𑐾𑐎𑑂𑐚𑐶𑐨 𑐧𑐵𑐬𑑂𑐐𑐾𑐣 𑐫𑐵𑐫𑐾𑐐𑐸 𑐴𑐿𑐳𑐶𑐫𑐟 𑐩𑐣𑑂𑐟 𑐢𑐎𑐵: 𑐳𑐶𑐂𑐎𑐾𑐐𑐸 𑐕𑐐𑐹 𑐡𑐳𑐹 𑐁: 𑐣𑐎𑐟𑐶𑐣𑐶 𑐥𑐶𑐟 𑐴:𑐐𑐸 ‘𑐧𑐸𑑃 𑐧𑐵𑑃𑐗𑑀 𑐟𑐫𑐾 𑐩𑐡𑐸𑐐𑐸 𑐣𑐶𑐫𑐩’𑐫𑑂 𑐣𑐾𑐰𑐵:𑐟𑐳𑐾𑑄 𑐕𑐸𑑄 𑐣𑑄 𑐳: 𑐩𑐟:𑐐𑐸 𑐏𑑃 𑐣𑑄 𑐕𑐐𑐹 𑐡𑐳𑐹 𑐏:𑑋 𑐏𑐫𑐾𑐦𑐸, 𑐣𑐾𑐰𑐵:𑐟𑐫𑑂‌𑐎𑐾 𑐣𑑂𑐴𑐵𑐥𑐵 𑐠𑐾𑑄 𑐫𑐎𑑂𑐰 𑐧𑐸𑑃 𑐩𑐣𑑂𑐟, 𑐟𑐬 𑐐𑐸𑐮𑐶 𑐡𑐣𑐶, 𑐰 𑐩𑑂𑐴𑐵𑐳𑐾 𑐫𑐵𑐫𑐾 𑐩𑐖𑑂𑐫𑐹 𑐢𑐫𑐵𑐐𑐸 𑐨𑐵𑐰𑐣𑐵 𑐧𑐮𑑂𑐮𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐀𑐮𑐾 𑐧𑐸𑑃𑐖𑑂𑐫𑐵 𑐥𑐵𑐏𑐾𑑄 𑐧𑐶𑐩𑐸𑐏 𑐖𑐹𑐥𑐶𑑄 𑐣𑑂𑐴𑐹 𑐥𑐸𑐳𑑂𑐟𑐵 𑐰 𑐧𑐸𑑃𑐖𑑂𑐫𑐵 𑐫𑐵𑐫𑐾 𑐩𑐦𑐫𑐵 𑐰𑑄𑐥𑐶𑑄 𑐥𑐸𑐮𑐵𑑃 𑐥𑐸𑐳𑑂𑐟𑐵𑐫𑐵 𑐡𑐠𑐸𑐂 𑐟𑐵𑐮𑐩𑐾𑐮 𑐩𑐶𑐮𑐾𑐩𑐖𑐸𑐫𑐵 𑐧𑐸𑑃 𑐧𑐵𑑃𑐗𑑀 𑐖𑐸𑐂𑐎𑐵 𑐔𑑂𑐰𑐣𑐾𑐩𑐵:𑐥𑐶𑑄 𑐣𑐾𑐰𑐵:𑐟 𑐢𑐩𑐵𑐢𑐩 𑐀𑐥𑑂𑐰: 𑐖𑐸𑐖𑐸𑑄 𑐰𑐣𑐵𑐔𑑂𑐰𑑄𑐐𑐸 𑐡𑐸𑑋 𑐣𑐾𑐰𑐵:𑐟𑐫𑑂‌𑐐𑐸 𑐳𑑂𑐰𑐵𑐩𑐶𑐟𑑂𑐰𑐫𑐵 𑐧𑐸𑑃 𑐢𑐫𑐵𑐐𑐸 𑐁: 𑐖𑑂𑐫𑐵 𑐳𑐣𑐵𑑄 𑐄𑐟𑑂𑐥𑐵𑐡𑐣 𑐫𑐵𑐫𑐾𑐐𑐸 𑐧𑐸𑑃 𑐳𑐶𑐰𑐾 𑐣𑑄 𑐥𑑂𑐮𑐚𑐶𑐒 𑐫𑐵𑐣𑐵 𑐨𑐵: 𑐠𑐎𑐵𑐣𑐵 𑐩𑐶𑐂𑐐𑐸 𑐧𑐸𑑃 𑐎𑐠𑑄 𑐴𑐶𑐮𑐵𑐔𑑂𑐰𑑄𑐐𑐸 𑐡𑐸 𑑋

𑐁: 𑐠𑑂𑐰 𑐧𑐸𑑃 𑐧𑐵𑑃𑐗𑑀 𑐟𑐫𑐾𑐩𑐡𑐸𑐐𑐸 𑐣𑐶𑐫𑐩 𑐥𑐶𑐠𑐣𑐵𑑄 𑐎𑐣𑑂𑐴𑐫𑑂 𑐮𑐵𑐐𑐹 𑐖𑐸𑐂𑐧𑐮𑐫𑑂 𑐣𑑂𑐴𑐵𑐥𑐮𑐵𑐎 𑐕𑐸 𑐴𑐸𑐩𑑂𑐮𑐵 𑐖𑐸𑐩𑑂𑐮𑐵𑐫𑐵 𑐧𑐸𑑃 𑐧𑐵𑑃𑐗𑑀 𑐟𑐮 𑐢𑐎𑐵 𑐎𑐵𑐬𑐰𑐵𑐴𑐶 𑐫𑐵𑐣𑐵 𑐴𑐂𑐐𑐸 𑐏:𑐮𑐵? 𑐎𑐶 𑐳𑐶𑐬𑐵𑐴𑐵 𑐳𑐥𑑂𑐟𑐬𑐷𑐫𑐵 𑐧𑐸𑑃 𑐧𑐵𑑃𑐗𑑀 𑐟𑐮 𑐢𑐎𑐵 𑐎𑐵𑐬𑐰𑐵𑐴𑐶 𑐴𑐫𑐾𑐟 𑐠𑑂𑐰 𑐣𑐶𑐫𑐩 𑐡𑐫𑐾𑐎𑐵: 𑐴:𑐐𑐸 𑐏:𑐮𑐵? 𑐖𑐶𑑄 𑐳𑑂𑐰𑐫𑐾𑐧𑐮𑐫𑑂 𑐠𑑂𑐰 𑐣𑐶𑐫𑐩 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄 𑐳𑑂𑐰𑐣𑐶𑐐𑐮𑐫𑑂 𑐮𑐵𑐐𑐹 𑐫𑐵𑐣𑐵 𑐴𑐂 𑑋 𑐳𑑂𑐰𑐣𑐶𑐐𑐮𑐫 𑐧𑐸𑑃 𑐧𑐵𑑃𑐗𑑀 𑐏𑐣𑐾𑐰𑑄 𑐕𑐵𑐫𑑂 𑐧𑐵𑑃𑐗𑑀 𑐟𑐫𑐵𑐐𑐸 𑐢𑐎𑐵 𑐎𑐵𑐬𑐰𑐵𑐴𑐶 𑐫𑐵𑐣𑐵 𑐴𑐫𑐾𑐐𑐸 𑐟𑐵𑐟𑐸𑐣𑐵 𑐠𑑂𑐰 𑐣𑐶𑐫𑐩 𑐡𑐫𑐾𑐎𑐸𑐐𑐸 𑐖𑐸𑐂𑐦𑐸 𑑋 𑐳𑑂𑐰𑐫𑐵 𑐔𑑂𑐰𑐣𑐵𑐡𑐶𑐳𑑃, 𑐳𑑂𑐰𑐣𑐶𑐐:𑐫𑐵 𑐧𑐵𑑃𑐗𑑀 𑐧𑐸𑑃 𑐏𑐣𑐢𑐵:𑐳𑐵 𑐧𑐸𑑃𑐠𑐸𑐰𑐵: 𑐣𑑄 𑐧𑐸𑑃 𑐫𑐵𑐫𑐾 𑐩𑐏𑐸𑐳𑐵 𑐩𑐾𑐥𑐶𑐣𑑂𑐟 𑐫𑐵𑐎𑐶 𑐢𑐎𑐵 𑐡𑐧𑐵𑐰 𑐧𑐶𑐫𑐵 𑐴𑐫𑐾𑐟 𑐣𑑄 𑐠𑑂𑐰 𑐣𑐶𑐫𑐩 𑐴:𑐐𑐸 𑐖𑐸𑐂𑐦𑐸 𑑋 𑐠𑐠𑐾 𑐖𑐸𑐮 𑐢𑐵:𑐳𑐵 𑐧𑐸𑑃𑐖𑑂𑐫𑐵 𑐟𑑂𑐰:𑐟𑐶𑐂𑐥𑐶𑑄 𑐧𑐴𑐸𑐳𑑄𑐏𑑂𑐫𑐎 𑐣𑐾𑐰𑐵:𑐟𑐫𑑂‌𑐟 𑐠:𑐐𑐸 𑐳𑑂𑐰𑐵𑐩𑐶𑐟𑑂𑐟𑑂𑐰𑐫𑑂 𑐡𑐫𑐵𑐔𑑂𑐰𑑄𑐐𑐸 𑐧𑐸𑑃 𑐮𑑂𑐫𑑄𑐎𑐵:𑐟𑐫𑐾𑐟 𑐠𑐵𑐎𑐸𑐫𑐵 𑐰𑐂 𑑋 𑐀𑐮𑐫𑑂 𑐢𑐩𑐵𑐢𑐩 𑐧𑐸𑑃 𑐡𑐎𑑂𑐰𑑄 𑐩𑐶𑐫𑐵: 𑐴𑐂 𑑋

𑐄𑐮𑐷 𑐖𑐎 𑐩𑐏𑐸, 𑐩𑐾𑐐𑐸 𑐰𑐶𑐎𑐺𑐟𑐶 𑐣𑑄 𑐰𑐫𑐾𑐦𑐸 𑑋 𑐐𑐠𑐾 𑐎𑐶, 𑐐𑐣 𑐐𑐣 𑐐𑐸𑐠𑐶𑐫𑐵 𑐖𑐐𑑂𑐐𑐵 𑐟𑐫𑐵𑐟:𑐐𑐸 𑐡𑐸 𑐢𑐎𑐵 𑐩𑐵𑐮𑐵 𑐖𑐸𑐂𑐥𑐶𑑄 𑐨𑐸-𑐩𑐵𑐦𑐶𑐫𑐵𑐥𑐶𑐣𑐶𑐐𑐸 𑐔𑐎𑑂𑐎𑐬𑐫𑑂 𑐠𑑁𑑄𑐎𑐣𑑂𑐴𑐫𑑂 𑐩𑐵𑐮𑐥𑑀𑐟 𑐎𑐵𑐬𑑂𑐫𑐵𑐮𑐫𑑂 𑐡𑐸𑐣𑐾 𑐎𑐬𑑀𑐜𑑁 𑐀𑐬𑐧𑑁𑐫𑐵 𑐔𑐮𑐏𑐾𑐮 𑐡𑐸 𑑋 𑐨𑐸-𑐩𑐵𑐦𑐶𑐫𑐵 𑐥𑐶𑐣𑑂𑐳𑑄 𑐥𑐸𑐬𑑂𑐖𑐵 𑐩𑐡𑐸𑐐𑐸 𑐧𑐸𑑃𑐫𑐵 𑐥𑐸𑐬𑑂𑐖𑐵 𑐡𑐫𑐾𑐎𑐾𑐐𑐸, 𑐩𑐏𑐸𑐩𑑂𑐴 𑐧𑐸𑑃𑐠𑐸𑐰𑐵 𑐡𑐫𑐾𑐎𑐵: 𑐧𑐸𑑃 𑐩𑐷𑐐𑐸, 𑐏𑐸𑐳𑐶, 𑐏𑑂𑐫:, 𑐔𑐸𑐎 𑐁𑐡𑐶𑐫𑐵 𑐥𑐬𑑂𑐟𑐶 𑐧𑐸𑑃𑐫𑐵𑐟 𑐣𑐶𑐖𑐶 𑐫𑐵𑐣𑐵 𑐕𑑂𑐰𑐫𑐾𑐐𑐸 𑐁𑐡𑐶 𑐀𑐣𑐾𑐎 𑐨𑑂𑐬𑐲𑑂𑐚𑐵𑐔𑐵𑐬 𑐫𑐵𑐣𑐵 𑐢𑐶𑐧𑐵 𑐎𑐩𑐾𑐫𑐵𑐣𑐵 𑐔𑑂𑐰𑐣 𑑋 𑐠𑐶𑐩𑐶 𑐫𑐵 𑐴𑐣𑐸𑐩𑐣𑑂𑐟𑐾 𑐏𑐸𑐳𑐶𑐂 𑐧𑐐:𑐫𑐵 𑐳𑐵𑑃𑐢 𑐳𑐶𑐩𑐵𑐣𑐵 𑐴𑐾 𑐜𑑀𑐖𑐬𑑄 𑐟𑑂𑐫𑐮𑐵 𑐖𑐧𑐬𑐖𑐳𑑂𑐟𑐶 𑐣𑐾𑐰𑐵:𑐟𑐫𑑂॒𑐐𑐸 𑐥𑐸𑐬𑑂𑐖𑐵 𑐡𑐹 𑐥𑐟𑑂𑐟𑐶 𑐧𑐸𑑃𑐂 𑐏𑐸𑐳𑐶 𑐑𑑂𑐰𑐵𑐣𑐵 𑐕𑑂𑐰𑐫𑐾𑐐𑐸 𑐀𑐮𑐾 𑐏𑐸𑐳𑐶𑑄 𑐣𑑂𑐴𑐵𑐥𑐵 𑐕𑑂𑐫𑐮𑐵𑐟:𑐐𑐸 𑐧𑐐:𑐫𑐵𑐟 𑐣𑐶𑐖𑐶 𑐧𑐸𑑃 𑐡𑐫𑐾𑐎𑐵 𑐩𑐶𑐫𑐾𑐐𑐸 𑐔𑐎𑑂𑐎𑐬𑐫𑑂 𑐨𑐹-𑐩𑐵𑐦𑐶𑐫𑐵 𑐥𑐶𑐣𑑂𑐳𑑄 𑐐𑐸𑐮𑐶𑐩𑐕𑐶 𑐔𑐵𑐮 𑐩𑑂𑐴𑐶𑐟𑐵𑐔𑑂𑐰𑑄𑐐𑐸 𑐏𑑃 𑐕𑐶𑐎𑐥𑐶𑐣𑑂𑐳𑑄 𑐳𑑂𑐫𑐹 𑐴𑐾 𑐖𑐸𑐂𑐩𑐵: 𑑋 𑐎𑐵𑐣𑐹𑐣, 𑐥𑑂𑐬𑐱𑐵𑐳𑐣, 𑐳𑑂𑐠𑐵𑐣𑐶𑐫 𑐣𑐶𑐎𑐵𑐫𑑂 𑐰 𑐥𑐵𑐬𑑂𑐚𑐷 𑐟 𑐳𑐎𑐮𑐾𑑄 𑐩𑑂𑐴𑐸𑐟𑐸𑑄 𑐢𑐵:𑐳𑐵 𑐣𑐾𑐰𑐵:𑐟𑐫𑑂‌𑐟 𑐀𑐣𑑂𑐫𑐵: 𑐖𑐸𑐂𑐎𑐾 𑐧𑐷 𑐩𑐏𑐸 𑐢𑐎𑐵 𑐢𑐵𑐂, 𑐟𑐬 𑐔𑐵𑐣𑑂𑐴𑐫𑑂 𑐔𑐵𑐣𑑂𑐴𑐫𑑂 𑐳𑐮𑑄𑐳: 𑐐𑐸𑐣𑑂𑐡𑐵 𑐫𑐵 𑐳𑐸𑐬𑐎𑑂𑐲𑐵 𑐧𑐶𑐫𑐵 𑐜𑑀𑐖𑐬𑑄 𑐧𑐸𑑃𑐂 𑐐𑐵: 𑐩𑑂𑐴𑐸𑐫𑐵 𑐴𑐂𑐧𑐮𑐫𑑂 𑐣 𑐥𑐸𑐮𑐶𑐳-𑐥𑑂𑐬𑐱𑐵𑐳𑐣𑑄 𑐳𑐵𑐠 𑐧𑑂𑐫𑐹, 𑐣𑑄 𑐣𑐾𑐰𑐵:𑐟 𑐖𑐵𑐣𑐵: 𑐴𑐾 𑐮𑑂𑐰𑐵𑐫𑐾 𑐦𑐸 – 𑐠𑐠𑐾 𑐀𑐟𑑂𑐫𑐵𑐔𑐵𑐬𑐫𑐵 𑐔𑐎𑑂𑐬𑑄 𑐎𑐵𑐫𑐮 𑐖𑐸𑐂𑐰𑑄 𑐣𑐾𑐰𑐵:𑐟 𑐢𑐩𑐵𑐢𑐩 𑐧𑐸𑑃 𑐩𑐶𑐫𑐵 𑐴𑐫𑐾𑐟 𑐧𑐵𑐢𑑂𑐫 𑐖𑐸𑐂𑐐𑐸 𑐀𑐰𑐳𑑂𑐠𑐵𑐫𑑂 𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐠𑑂𑐰 𑐴𑐾 𑐔𑐎𑑂𑐬 𑐴𑐶𑐮𑐵 𑐰𑐣𑐵 𑐎𑐣𑑂𑐴𑐫 𑐳𑐸𑐫𑐵 𑐳𑐸𑐫𑐵 𑐧𑐸𑑃 𑐧𑐵𑑃𑐗𑑀 𑐟𑐫𑐵𑐟𑐮 𑐢𑐎𑐵 𑐔𑐵:𑐴𑑂𑐫𑐹 𑐖𑐸𑐂𑐥𑐶𑑄 𑐨𑐸-𑐩𑐵𑐦𑐶𑐫𑐵 𑐥𑐶𑐴𑐵𑑃 𑐰𑐫𑐾𑐦𑐸 𑑋 𑐠:𑐩𑑂𑐴𑐳𑐶𑐣𑑄 𑐫𑐵𑐣𑐵𑐟𑐫𑐵𑐐𑐸 𑐧𑐸𑑃 𑐣𑑄 𑐧𑐵𑑃𑐗𑑀 𑐟𑐫𑐵𑐟𑐮 𑐢𑐎𑐵 𑐣𑐵𑐮𑐶𑐳 𑐟𑐫𑐵 𑐴𑐫𑐾 𑐦𑐸 𑑋 𑐧𑐸𑑃 𑐫𑐵𑐫𑐾𑐟 𑐰𑐣 𑐢𑐵:𑐳𑐵 𑐐𑐸𑐣𑑂𑐡𑐵𑐟𑐳𑐾𑑄 𑐫𑐵𑐎𑐾 𑐩𑐧𑐷𑐐𑐸 𑐀𑐮𑐾 𑐥𑑂𑐬𑐱𑐵𑐳𑐣𑐫𑐵 𑐐𑑂𑐰𑐴𑐵𑐮𑐶 𑐎𑐫𑐵 𑐧𑐸𑑄 𑐩𑐫𑐵𑐳𑐾𑑄 𑐟𑐮 𑐢𑐎𑐵 𑐡𑐸:𑐏 𑐧𑐶𑐂𑐐𑐸 𑐔𑐎𑑂𑐬 𑐡𑐸𑐴𑐵𑑃 𑐰𑐫𑐾𑐦𑐸 𑑋 𑐠𑐖𑐵:𑐐𑐸 𑐔𑐎𑑂𑐬𑐫𑑂 𑐟𑐎𑑂𑐫𑐣𑐵 𑐩𑐔𑑂𑐰𑐣𑐾𑐟 𑐩𑐾𑐥𑐶𑐣𑑂𑐟 𑐧𑐸𑑃 𑐫𑐵𑐎𑐾𑐩𑐵𑐮𑐷𑐐𑐸, 𑐰 𑐧𑐸𑑃 𑐫𑐵𑐂𑐩𑑂𑐴𑐳𑐶𑐟 𑐴𑐵𑐎𑐣𑑄 𑐮𑐶𑐥𑐵 𑐩𑑀𑐴𑐶𑐫𑐵𑐣𑐶 𑐴𑐎𑐫𑐵 𑐣𑐵𑐩𑑄 𑐧𑐸𑑃 𑐎𑑂𑐰𑐥𑐵𑐮𑐾 𑐩𑐵𑐮𑐷𑐐𑐸 𑐀𑐰𑐳𑑂𑐠𑐵 𑐖𑐸𑐫𑐵 𑐰𑐫𑐾𑐦𑐸 𑑋 𑐠𑑂𑐰 𑐐𑑂𑐫𑐵𑐣𑐵𑐥𑐸𑐐𑐸 𑐏𑐾𑐮 𑐫𑐵 𑐮𑑂𑐫𑐹𑐣𑐾 𑐳𑐸𑐮𑐵𑐔𑑂𑐰𑑄𑐐𑐸 𑐔𑐵𑐮𑐧𑐵𑐖𑐶 𑐣𑐾𑐰𑐵:𑐳𑐩𑐵𑐖𑐫𑐵 𑐴𑐶𑐟𑐫𑐵 𑐀:𑐏: 𑐖𑐸𑐂𑐐𑐸 𑐥𑐎𑑂𑐎𑐵 𑐡𑐸, 𑐟𑐬 𑐣𑐾𑐰𑐵:𑐟𑐫𑑂‌𑐟 𑐩𑐟𑐮𑐰 𑐩𑐡𑐸 𑑋

𑐠𑐠𑐾 𑐧𑐸𑑃 𑐧𑐵𑑃𑐗𑑀 𑐟𑐫𑐾 𑐩𑐡𑐸, 𑐕𑐾𑑃 𑐏𑐵𑐮𑐷 𑐟𑐫𑐾𑐩𑐡𑐸, 𑐕𑐾𑑃𑐫𑑂 𑑔𑐩𑑂𑐴 𑐖: 𑐡𑐸𑐳𑐵 𑑖 𑐐𑐸 𑐎𑑂𑐰𑐠𑐵 𑐖𑐎 𑐠:𑐥𑐶𑐣𑑂𑐟 𑐟𑐫𑐵 𑐩𑐾𑐐𑐸 𑐎𑑂𑐰𑐠𑐵 𑐧𑐵𑐮𑑄 𑐧𑐶𑐂𑐩𑐵: 𑐢𑐫𑐵 𑐠𑐾𑑄 𑐀𑐡𑐨𑐸𑐟 𑐣𑐶𑐫𑐩 𑐡𑐫𑐾𑐎𑐵 𑐴𑐂𑐟𑐶𑐣𑐶 𑐢𑐎𑐵 𑑕𑐡𑑃 𑑖𑐡𑑃 𑐣𑑂𑐴𑑂𑐫: 𑐣𑑄 𑐢𑐫𑐵𑐐𑐸 𑐏: 𑑋 𑐧𑐸𑑃 𑐧𑐵𑑃𑐗𑑀 𑐟𑐫𑐾 𑐩𑐡𑐸 𑐢𑐎𑐵 𑐣𑐶𑐫𑐩 𑐮𑐵 𑐡𑐫𑐾𑐎𑐵 𑐴𑐾 𑐴𑐮 𑑋 𑐁: 𑐕𑐾𑑃 𑐏𑐵𑐮𑐷 𑐟𑐫𑐾𑐩𑐡𑐸 𑐢𑐎𑐵 𑐣𑑄 𑐡𑐫𑐾𑐎𑐵: 𑐴𑐂𑐟𑐶𑐣𑐶 𑑋 𑐠𑑂𑐰 𑐏𑑃 𑐰𑐵𑐬𑑂𑐣𑐶𑐒 𑐫𑐵 𑐎𑐠𑑄 𑐴𑐾 𑐠𑐸𑐂𑐎𑐵: 𑐡𑐷𑐳𑐵𑑄 𑐖𑑂𑐫𑐹 𑑋

𑐧𑑂𑐫𑐰𑐳𑑂𑐠𑐵 𑐨𑐶𑑄𑐎𑐾𑐐𑐸 𑐟𑑂𑐰𑐴: 𑐟𑐫𑐵 𑐣𑐾𑐰𑐵:𑐳𑐩𑐵𑐖𑐫𑐵 𑐳𑑄𑐬𑐔𑐣𑐵 𑐳𑑂𑐫𑑄𑐎𑐾𑐐𑐸 𑐰 𑐣𑐾𑐰𑐵:𑐳𑐩𑐵𑐖𑐫𑐵𑐟 𑐕𑐶𑐔𑐬𑐧𑐶𑐔𑐬 𑐫𑐵𑐣𑐵 𑐧𑐶𑐳𑑂𑐠𑐵𑐥𑐶𑐟 𑐫𑐵𑐣𑐵 𑐫𑑄𑐎𑐾𑐐𑐸 𑐣𑐷𑐟𑐶𑐎𑐠𑑄 𑐳𑐟𑑂𑐟𑐵𑐫𑑂 𑐔𑑂𑐰𑑄𑐥𑐶𑐣𑑂𑐳𑑄 𑐐𑐖𑐵:𑐐𑐸 𑐨𑐸𑐩𑐶𑐎𑐵 𑐩𑑂𑐴𑐶𑐟𑐵:𑐔𑑂𑐰𑐣 𑐢𑐎𑐵 𑐳𑑂𑐰𑐫𑐾𑐟 𑐐𑑂𑐰𑐮𑐫𑑂 𑐔𑑂𑐰𑑄𑐥𑐶𑑄 𑐣𑐾𑐰𑐵:𑐥𑐶𑐣𑑂𑐟 𑐧𑐳𑑂𑐟𑐶𑐳𑑄 𑐴𑐾 𑐄𑐛𑐶𑐰𑐵𑐳 𑐫𑐵𑐣𑐵𑐕𑑂𑐰𑐫𑐾𑐟 𑐴:𑐐𑐸 𑐣𑐷𑐟𑐶 𑐳𑑂𑐰:𑐳𑐵 𑐐𑐵: 𑑋 𑐐𑑂𑐰𑐮𑐫𑑂 𑐔𑑂𑐰𑑄𑐥𑐶𑑄 𑐣𑐾𑐰𑐵:𑐥𑐶𑐣𑑂𑐟 𑐄𑐛𑐶𑐰𑐵𑐳 𑐫𑐵𑐫𑐾𑐐𑐸 𑐖𑑂𑐫𑐵𑐗𑑂𑐰: 𑐠𑑂𑐰𑐮𑑄 𑐣𑑂𑐴𑑂𑐫: 𑐣𑑄 𑐣𑑂𑐴𑑂𑐫𑐵𑐎𑐸𑐐𑐸 𑐏: 𑑋 𑐟𑐬 𑐣𑐾𑐰𑐵:𑐟𑐳𑐾𑑄 𑐕𑐥𑑂𑐥𑑄 𑐖𑐵𑐣𑐵: 𑐳:𑐟𑐫𑐾 𑐩𑐦𑐸𑐟 𑑋 𑐰𑐶𑐳𑑂𑐠𑐵𑐥𑐶𑐟 𑐖𑐸𑐂𑐎𑐵:𑐔𑑂𑐰𑐣𑐾𑐩𑐵:𑐥𑐶𑐣𑑂𑐳𑑄 𑐧𑐮 𑐡𑐟𑑂𑐟𑐮𑐾 𑐴𑐵𑐮𑐷, 𑐨𑐔𑐵 𑐨𑐔𑐵 𑐥𑑂𑐬𑐟𑐶𑐬𑑀𑐢 𑐫𑐵𑐂, 𑑒-𑑔 𑐮𑐵𑐏 𑐩𑐸𑐁𑐰𑑂𑐖𑐵 𑐮𑑂𑐴𑐵𑐟𑐫𑑂 𑐮𑐵𑐫𑐾𑐰𑑄 𑐳𑐎𑐮𑐾𑑄 𑐳𑐸𑐩𑑂𑐎 𑐔𑑂𑐰𑐣𑐷 𑑋 𑐟𑐬 𑑘𑐡𑑃 𑑑𑑐𑐡𑑃 𑐮𑐶𑐥𑐵 𑐂𑐩𑐶𑐳𑑄 𑑒-𑑔 𑐮𑐵𑐏 𑐩𑐸𑐁𑐰𑑂𑐖𑐵 𑐎𑐫𑐵 𑐟𑑂𑐰:𑐟𑐸𑐐𑐸 𑐠𑐵𑐫𑑂 𑑒-𑑔 𑐎𑐬𑑀𑐜 𑐩𑐹 𑐰𑐣𑐵𑐧𑐶𑐂 𑑋 𑐠𑑂𑐰 𑐢𑐫𑐵𑐐𑐸 𑐕𑐸 𑐏:? 𑐠𑑂𑐰 𑐢𑐫𑐵𑐐𑐸 𑐎𑐬𑑀𑐜𑑁 𑐎𑐬𑑀𑐜𑐫𑐵 𑐣𑐾𑐰𑐵:𑐳𑐩𑑂𑐥𑐟𑑂𑐟𑐶 𑐮𑐸𑐟𑐾𑐫𑐵𑐣𑐵 𑐎𑐵:𑐐𑐸 𑐖𑐎 𑐩𑐏𑐸𑐮𑐵?

𑐳𑐟𑑂𑐟𑐵𑐢𑐵𑐬𑐷𑐥𑐶𑐣𑐶𑐐𑐸 𑐁:𑐫𑐵 𑐣𑐷𑐟𑐶 𑐣𑐶𑐬𑐣𑑂𑐟𑐬 𑐖𑐸𑐫𑐵 𑐰𑐣 𑐢𑐵:𑐳𑐵 𑐩𑐾𑐐𑐸 𑑑𑑐 𑐡𑑃 𑐡𑐸𑐣𑐾 𑐳𑑂𑐰𑐣𑐶𑐐:𑐫𑐵 𑐩𑐣𑐹 𑐮𑑂𑐫𑐵: 𑑑 𑐎𑐬𑑀𑐜 𑐳𑐶𑐧𑐾 𑐣𑑄 𑐀𑐥𑑂𑐰: 𑐖𑐸𑐂𑐟𑐶𑐣𑐶 𑑋 𑐁𑐄𑐚𑐬 𑐬𑐶𑐒𑐬𑑀𑐜𑐫𑐵 𑐜𑐶𑐖𑐵𑐂𑐣 𑐴𑐾 𑐳𑑂𑐰𑐣𑐶𑐐𑐮𑐫𑑂 𑑒𑑕 𑐮𑐵𑐏 𑐠𑐥 𑐩𑐣𑐹 𑐟𑐫𑐾𑐐𑐸 𑐮𑐎𑐳 𑐡𑐫𑐾𑐎𑐾𑐫𑐵 𑐣𑐶𑐟𑐶𑑄 𑐖𑐹𑐐𑐸 𑐏:𑑋 𑐖𑐧 𑐰 𑑒𑑕 𑐮𑐵𑐏 𑐩𑐣𑐹 𑐡𑐸𑐴𑐵𑑃 𑐰𑐂, 𑐀𑐮𑐫𑑂 𑐁𑐄𑐚𑐬 𑐬𑐶𑐒𑐬𑑀𑐜 𑐔𑐶𑐧𑑂𑐫𑐵: 𑐖𑐸𑐫𑐵 𑐰𑐣𑐷, 𑐀𑐣 𑐴𑐵𑐎𑐣𑑄 𑐩𑐾𑐐𑐸 𑑕-𑑖 𑐩𑐶𑐚𑐬 𑐮𑑃 𑐟𑐧𑑂𑐫𑐵: 𑐫𑐵𑐫𑐾𑐩𑐵𑐮 𑐢𑐎𑐵 𑐫𑑀𑐖𑐣𑐵 𑐥𑐶𑐴𑐵𑑃 𑐰𑐂 𑑋 𑐀𑐮𑐾 𑐁: 𑐬𑐶𑐒𑐬𑑀𑐜𑑄 𑐠𑐶𑐮 𑐢𑐎𑐵 𑐩𑐏𑑂𑐏 𑐖𑐹𑐥𑐶𑑄 𑐳𑐎𑐮𑐾𑑄 𑐕𑑂𑐫𑑄 𑐟𑐶𑐫𑐵: 𑐏𑑂𑐰𑐫𑐵: 𑐏𑑂𑐰𑐫𑐵: 𑐔𑑂𑐰𑐣𑐾𑐩𑐵𑐮𑐷𑐟𑐶𑐣𑐶 𑑋

𑐠𑑁𑑄 𑐳𑑂𑐰𑐫𑐵 𑐡𑐶𑐳𑑃, 𑐣𑐾𑐰𑐵:𑐟𑐫𑑂‌𑐐𑐸 𑐧𑐸𑑃 𑐎𑑂𑐫𑐵𑐩𑑂𑐥𑐳 𑐟𑐫𑐾𑐐𑐸 𑐣𑐵𑐩𑐫𑑂, 𑐦𑑂𑐫𑐵𑐎𑑂𑐚𑐬𑐷 𑐟𑐫𑐾𑐐𑐸 𑐣𑐵𑐩𑐫𑑂, 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫 𑐡𑐫𑐾𑐎𑐾𑐐𑐸 𑐣𑐵𑐩𑐫𑑂, 𑐀𑐳𑑂𑐟𑐵𑐮 𑐡𑐫𑐾𑐎𑐾𑐐𑐸 𑐣𑐵𑐩𑐫𑑂, 𑐀𑐣𑐾𑐎 𑐎𑐠𑑄𑐫𑐵 𑐟𑑂𑐰𑐴: 𑐔𑐶𑐣𑐵 𑐐𑐸𑐮𑐶 𑐡𑑄𑐎 𑐡𑑄𑐎 𑐟𑑂𑐰:𑐟𑐎𑐵 𑐎𑐵𑐮 𑑋 𑐀𑐮𑐾 𑐧𑐸𑑃 𑐟𑑂𑐰:𑐟𑐵: 𑐰𑑄𑐮𑐶𑐳𑐾 𑐣𑐾𑐰𑐵:𑐳𑐩𑐵𑐖𑐫𑐵 𑐳𑑄𑐬𑐔𑐣𑐵 𑐐𑐠𑐾 𑐴𑐶𑐮𑐵 𑐰𑐣? 𑐣𑐾𑐰𑐵:𑐔𑐬𑐶𑐟𑑂𑐬 𑐐𑐠𑐾 𑐳𑑂𑐏𑐮𑐶𑐟 𑐖𑐸𑐫𑐵 𑐰𑐣? 𑐣𑐾𑐰𑐵:𑐟𑐫𑑂‌𑐎𑐾 𑐧𑐸𑑃 𑐩𑐣𑑂𑐟, 𑐧𑐸𑑃𑐫𑐵 𑐁𑐩𑑂𑐡𑐵𑐩𑐶 𑐩𑐣𑑂𑐟, 𑐀𑐮𑐾 𑐰 𑐁𑐩𑑂𑐡𑐵𑐩𑐶𑐫𑐵 𑐖𑐐𑐫𑑂 𑐡𑐫𑐾𑐎𑐵:𑐟:𑐐𑐸 𑐳𑐩𑐵𑐖𑐳𑑄𑐬𑐔𑐣𑐵 𑐰 𑐔𑐬𑐶𑐟𑑂𑐬 𑐣𑑄 𑐩𑐣𑑂𑐟 𑑋 𑐣𑐾𑐰𑐵:𑐟 𑐣𑐾𑐰𑐵: 𑐖𑐸𑐫𑐵 𑐩𑑂𑐰𑐵𑐫𑐾𑐐𑐸 𑐁𑐢𑐵𑐬 𑐟 𑐩𑐣𑑂𑐟 𑑋 𑐳𑐟𑑂𑐟𑐵𑐢𑐵𑐬𑐷𑐥𑐶𑐣𑑂𑐳𑑄 𑐐𑐧𑑂𑐮𑐾 𑐫: 𑐀𑐧𑑂𑐮𑐾 𑐧𑐶𑐳𑑂𑐠𑐵𑐥𑐶𑐟 𑐫𑐵𑐣𑐵𑐕𑑂𑐰𑐫𑐾𑐟 𑐕𑐸𑑄 𑐠𑐵𑐎𑐸 𑐩𑐖𑐸𑐂𑐥𑐶𑑄, 𑐳𑐬𑐎𑐵𑐬𑑄 𑐡𑐫𑐾𑐎𑐸𑐐𑐸 𑐣𑐶𑐫𑐩𑐫𑑂 𑐠:𑐐𑐸 𑐢𑐵𑐫𑐾𑐐𑐸 𑐕𑐸𑑄 𑐩𑐡𑐸𑐥𑐶𑑄, 𑐦𑐐𑐟 𑐖𑑂𑐫𑐵𑐮𑐵 𑐎𑐩𑐾𑐫𑐵𑐣𑐵 𑐣𑐫𑐵 𑐔𑑂𑐰𑐣𑐷𑐥𑐶𑑄 𑐡𑐵𑐳 𑐥𑐶𑐣𑐶𑐐𑐸 𑐳𑐩𑐵𑐖 𑐠𑐾𑑄 𑐣𑐾𑐰𑐵:𑐳𑐩𑐵𑐖 𑐴𑐶𑐮𑐵 𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐣𑐾𑐰𑐵:𑐳𑐩𑐵𑐖 𑐳𑐩𑑂𑐥𑐹𑐬𑑂𑐞 𑐬𑐸𑐥𑑄 𑐀𑐱𑐎𑑂𑐟𑐶𑐎𑐬𑐞𑐫𑐵 𑐮𑑃𑐥𑐸𑐂 𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐳𑑂𑐰𑐣𑐶𑐐: 𑐁: 𑐣𑐾𑐰𑐵:𑐟𑐫𑑂‌𑐐𑐸 𑐳𑑂𑐰𑐣𑐶𑐐: 𑐠𑐾𑑄 𑐩𑐔𑑂𑐰𑐣𑐾𑐢𑐸𑑄𑐎𑐮 𑑋

𑐁𑐡𑐶𑐰𑐵𑐳𑐶𑐥𑐶𑐣𑑂𑐟 𑐰𑐶𑐳𑑂𑐠𑐵𑐥𑐶𑐟 𑐫𑐵𑐂𑐐𑐸 𑐰𑐶𑐎𑐵𑐳 𑐣𑐷𑐟𑐶 𑐰𑐵𑐳𑑂𑐟𑐰𑐫𑑂 𑐰𑐶𑐎𑐵𑐳 𑐴𑐾 𑐩𑐏𑐸, 𑐰 𑐮𑐵 𑐰𑐶𑐣𑐵𑐱𑐣𑐷𑐟𑐶 𑐏: 𑑋 𑐟𑐬 𑐗𑐷 𑐣𑐾𑐰𑐵:𑐟𑐫𑑂‌𑐟 𑐢𑐵:𑐳𑐵 𑐰 𑐴𑐾 𑐰𑐶𑐣𑐵𑐱 𑐣𑐷𑐟𑐶𑐫𑐵𑐟 𑐧𑐶𑐎𑐵𑐳 𑐢𑐎𑐵 𑐳𑐩𑐬𑑂𑐠𑐣 𑐫𑐵𑐣𑐵 𑐖𑐸𑐂𑐐𑐸 𑐳𑑂𑐫𑐣𑐵𑐟𑐮 𑑋 ‘𑐠𑐠𑐾 𑐩𑐏𑐸, 𑐠𑐖𑑂𑐫𑐵𑐐𑐸 𑐣𑐷𑐟𑐶𑑄 𑐣𑐾𑐰𑐵:𑐥𑐶𑐣𑑂𑐟 𑐴𑐵𑐣𑐶 𑐫𑐵𑐂’ 𑐢𑐎𑐵 𑐢𑐵𑐂𑐥𑐶𑐣𑐶𑐐𑐸 𑐏𑑃 𑐣𑑂𑐫𑐣𑐾 𑐩𑐟𑐾, 𑐣𑑂𑐫𑐣𑐾 𑐩𑐖𑑂𑐫𑐹 𑐢𑐿𑐐𑐸 𑐮𑐎𑐳 𑐡𑐫𑐾𑐎𑐵:𑐧𑐶𑐫𑐵:𑐟𑐮 𑑋 𑐬𑐶𑐫𑐵𑐮𑑂𑐚𑐬 𑐩𑐵𑐬𑑂𑐎𑐾𑐚𑑄 𑐁𑐎𑑂𑐳𑐶𑐮𑐬𑐾𑐚 𑐫𑐵𑐣𑐵𑐧𑑂𑐫𑐹𑐐𑐸 𑐬𑐶𑐳𑐵𑐂𑐎𑐮𑑂𑐜 𑐀𑐬𑑂𑐠𑐟𑐣𑑂𑐟𑑂𑐬𑐫𑐵𑐟 𑐣𑐾𑐰𑐵:𑐟𑐳𑐾𑑄 𑐠:𑐥𑐶𑑄 𑐳𑐩𑑂𑐥𑐣𑑂𑐣 𑐖𑐹𑐐𑐸 𑐨𑑂𑐬𑐩𑐫𑑂 𑐡𑐸𑐰𑐶𑑄𑐎𑐵 𑐧𑐶𑐮 𑑋 𑐎𑑂𑐫𑐵𑐳 𑐨𑑂𑐫𑐵𑐮𑐸 𑐰 𑐣𑐾𑐚 𑐰𑐬𑑂𑐠 𑐀𑐥𑑂𑐰: 𑐏𑐣𑐾 𑐡𑐸𑐳𑐵𑑄 𑐣𑑄 𑐣𑐾𑐚 𑐥𑑂𑐬𑑀𑐜𑐎𑑂𑐳𑐣 𑐩𑐵𑐂𑐣𑐳𑐫𑑂 𑐡𑐸 𑐢𑐿𑐐𑐸 𑐰𑐵:𑐔𑐵𑐫𑐾𑐎𑐾 𑐩𑐦𑐸𑐣𑐶 𑑋 𑐀𑐠𑐾 𑐖𑐸𑐫𑐵: 𑐩𑐣𑐹𑐟 𑐐𑐸𑐮𑐶 𑐐𑐸𑐮𑐶 𑐳𑐩𑑂𑐥𑐣𑑂𑐣 𑐢𑐎𑐵 𑐟𑐵𑐫𑐾𑐎𑐵: 𑐔𑑂𑐰𑐣 𑐄𑐮𑐶 𑐄𑐮𑐶𑐂 𑐖𑐷𑐰𑐣 𑐣𑑂𑐴𑑂𑐫𑐵𑐾𑐟 𑐠𑐵𑐎𑐸𑐫𑐵 𑐰𑐫𑐵 𑐔𑑂𑐰𑑄𑐐𑐸 𑐏: 𑐢𑐎𑐵 𑐠𑐸𑐂𑐎𑐾 𑐩𑐦𑐸𑐣𑐶 𑑋 𑐠𑑂𑐰 𑐡𑐎𑑂𑐰𑑄𑐫𑐵 𑐣𑐶𑐔𑑀𑐜 𑐕𑐐𑐹 𑐴𑐾 𑐏: 𑐎𑐶 𑐣𑐾𑐰𑐵:𑐟 𑐀𑐱𑐎𑑂𑐟𑐶𑐎𑐬𑐞 𑐖𑐸𑐖𑐸𑑄 𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐀𑐱𑐎𑑂𑐟𑐶𑐎𑐬𑐞 𑐥𑐵𑐏𑐾 𑐳𑐱𑐎𑑂𑐟𑐶𑐎𑐬𑐞𑐫𑑂 𑐫𑑄𑐎𑐾𑐟 𑐀𑐖 𑐣𑑄 𑐮𑑃𑐥𑐸 𑐮𑑂𑐫𑑄 𑐡𑐣𑐷 𑑋 𑐟𑐬 𑐀𑐠𑐾 𑐫𑐵𑐫𑐾𑐟 𑐄𑐮𑐷 𑐀:𑐥𑐸 𑐖𑐸𑐂𑐩𑐏𑐸𑐟 𑑋 𑐁: 𑐳𑐎𑐮𑐾𑑄 𑐣𑑂𑐴𑑂𑐫𑐮𑑄 𑐔𑐵𑐫𑐾𑐎𑐵: 𑐣𑐾𑐰𑐵:𑐳𑐩𑐵𑐖 𑐫𑐵𑐟 𑐣𑐾𑐰𑐵: 𑐁𑐡𑐶𑐨𑐸𑐩𑐶 𑐥𑐵𑐏𑐾𑑄 𑐰𑐶𑐳𑑂𑐠𑐵𑐥𑐶𑐟 𑐩𑐫𑐵𑐫𑐾𑐐𑐸 𑐖𑐹𑐳𑐵 𑐗𑐷𑐳𑑄 𑐫𑐎𑑂𑐰 𑐴𑐾 𑐰𑐶𑐔𑐵:𑐫𑐵𑐣𑐵 𑐠:𑐠:𑐥𑐶𑐣𑑂𑐟 𑐴𑐾 𑐴𑐶𑐮𑐵 𑐴𑐫𑐾𑐩𑐵𑐣𑐶 𑑋 𑐩𑐏𑐸𑐳𑐵 𑐣𑐾𑐰𑐵:𑐳𑐩𑐵𑐖 𑐰𑐶𑐳𑑂𑐠𑐵𑐥𑐶𑐟 𑐖𑐸𑐫𑐵 𑐰𑐣𑐷𑐐𑐸 𑐥𑐵𑐏𑐾𑑄 𑐥𑐣𑐾 𑐦𑐿𑐩𑐏𑐸𑐟 𑐢𑐎𑐵 𑐖𑐶𑑄 𑐳𑐎𑐮 𑐣𑐾𑐰𑐵: 𑐡𑐵𑐖𑐸𑐎𑐶𑐖𑐵 𑐟𑐟𑐵𑐎𑐾𑑃𑐴𑐾 𑐥𑐶𑐣𑑂𑐟 𑐁: 𑐴𑐾 𑐎𑐣𑐵 𑐟𑐫𑐾 𑑋