𑐳𑑄𑐳𑑂𑐎𑐺𑐟𑐶𑐰𑐶𑐡𑑂 𑐐𑐞𑐾𑐱𑐬𑐵𑐩 𑐮𑐵𑐕𑐶𑐫𑐵 𑑗𑑕 𑐎𑑂𑐰𑑅𑐐𑐸 𑐧𑐸𑐣𑑂𑐴𑐶 𑐴𑐣

𑐳𑑄𑐳𑑂𑐎𑐺𑐟𑐶𑐰𑐶𑐡𑑂 𑐐𑐞𑐾𑐱𑐬𑐵𑐩 𑐮𑐵𑐕𑐶𑐫𑐵 𑑗𑑕 𑐎𑑂𑐰𑑅𑐐𑐸 𑐧𑐸𑐣𑑂𑐴𑐶 𑐣𑐶𑐐𑐹 𑐳𑐦𑐹 𑐰𑐶𑐩𑑀𑐔𑐣 𑐫𑐵𑐳𑐾𑑄 𑐟𑑅𑐖𑐶𑐎 𑐴𑑄𑐐𑐸 𑐡𑐸 𑑋 𑐩𑐢𑑂𑐫𑐥𑐸𑐬 𑐎𑐮𑐵 𑐥𑐬𑐶𑐲𑐡𑑂 𑐰 𑐏𑑂𑐫𑐵𑐮𑐶𑐐𑐸𑐮𑐶 𑐐𑐸𑐠𑐶𑐫𑐵 𑐩𑑄𑐎𑐵𑑅 𑐐𑑂𑐰𑐳𑐵𑐮𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐨𑐵𑐖𑐸 𑐮𑐵𑐕𑐶𑐫𑐵 𑐖𑐷𑐰𑐣𑐷 𑐳𑐦𑐹 ‘𑐎𑐬𑑂𑐩𑐫𑑀𑐐𑐷 𑐐𑐞𑐾𑐱𑐬𑐵𑐩 𑐮𑐵𑐕𑐶’ 𑐰 𑐰𑐫𑑂𑐎𑐮𑑄 𑐔𑑂𑐰𑐫𑐵𑐡𑐷𑐐𑐸 ‘𑐣𑐾𑐥𑐵𑐮 𑐩𑐞𑑂𑐜𑐮 𑐧𑐵𑐐𑐩𑐟𑐶 𑐥𑑂𑐬𑐡𑐾𑐱𑐫𑐵 𑐳𑑄𑐐𑐷𑐟 𑐥𑐬𑐩𑑂𑐥𑐬𑐵’ 𑐰𑐶𑐩𑑀𑐔𑐣 𑐖𑐹𑐐𑐸 𑐏𑑅 𑑋 𑐀𑐎𑑂𑐲𑐫𑐩𑐵𑐬𑑂𑐐 𑐥𑑂𑐬𑐎𑐵𑐱𑐣𑐥𑐵𑐏𑐾𑑄 𑐥𑐶𑐠𑑃𑐐𑐸 𑐨𑐵𑐖𑐸 𑐮𑐵𑐕𑐶𑐫𑐵 𑐖𑐷𑐰𑐣𑐷 𑐳𑐦𑐹 𑐳𑐹𑐬𑑂𑐫𑐥𑑂𑐬𑐳𑐵𑐡 𑐮𑐵𑐎𑑀𑐖𑐸𑑄 𑐳𑐩𑑂𑐥𑐵𑐡𑐣 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑑅𑐫𑐵 𑐩𑐹 𑐥𑐵𑐴𑐵𑑃 𑐧𑐵𑐐𑐩𑐟𑐶 𑐥𑑂𑐬𑐡𑐾𑐱𑐫𑐵 𑐎𑐺𑐲𑐶 𑐟𑐠𑐵 𑐥𑐱𑐸𑐥𑑄𑐎𑑂𑐲𑐷 𑐰𑐶𑐎𑐵𑐳 𑐩𑐣𑑂𑐟𑑂𑐬𑐷 𑐜𑐵. 𑐬𑐵𑐖𑐾𑐣𑑂𑐡𑑂𑐬𑐩𑐵𑐣 𑐱𑑂𑐬𑐾𑐲𑑂𑐛𑑄 𑐳𑐦𑐹 𑐰𑐶𑐩𑑀𑐔𑐣 𑐫𑐵𑐣𑐵𑐡𑐶𑐳𑐾𑑄 𑐳𑑄𑐳𑑂𑐎𑐺𑐟𑐶𑐰𑐶𑐡𑑂 𑐮𑐵𑐕𑐶𑑄 𑐨𑐵𑐲𑐵, 𑐎𑐮𑐵, 𑐳𑑄𑐳𑑂𑐎𑐺𑐟𑐶 𑐳𑑄𑐬𑐎𑑂𑐲𑐞𑐫𑐵 𑐣𑐶𑑄𑐟𑐶𑑄 𑐫𑐵𑐣𑐵𑐡𑐷𑐐𑐸 𑐫𑑀𑐐𑐡𑐵𑐣𑐫𑐵𑐟 𑐎𑐫𑐵𑑅 𑐣𑑂𑐰𑐰𑐵𑐣𑐵𑐡𑐶𑐮 𑑋

𑐀𑐠𑐾𑐴𑐾 𑐰𑐶𑐱𑐾𑐲 𑐥𑐵𑐴𑐵𑑃 𑐩𑐢𑑂𑐫𑐥𑐸𑐬 𑐠𑐶𑐩𑐶 𑐣𑐐𑐬𑐥𑐵𑐮𑐶𑐎𑐵𑐫𑐵 𑐩𑐾𑐫𑐬 𑐳𑐸𑐬𑐾𑐣𑑂𑐡𑑂𑐬 𑐱𑑂𑐬𑐾𑐲𑑂𑐛𑑄 𑐨𑐵𑐖𑐸 𑐮𑐵𑐕𑐶𑐫𑐵𑐟 𑐧𑐸𑐣𑑂𑐴𑐶𑐫𑐵 𑐨𑐶𑑄𑐟𑐸𑐣𑐵 𑐡𑐾𑐕𑐵𑐳𑐾𑑄 𑐣𑐐𑐬𑐥𑐵𑐮𑐶𑐎𑐵𑑄 𑐳𑐩𑑂𑐥𑐡𑐵, 𑐎𑐮𑐵, 𑐳𑑄𑐳𑑂𑐎𑐺𑐟𑐶𑐫𑐵 𑐳𑑄𑐬𑐎𑑂𑐲𑐞 𑐫𑐵𑐣𑐵𑐔𑑂𑐰𑑄𑐐𑐸 𑐖𑑂𑐫𑐵𑐫𑐵 𑐧𑐵𑐬𑐾 𑐎𑐣𑐵𑐡𑐷𑐐𑐸 𑐡𑐸 𑑋 𑐀𑐠𑐾𑐴𑐾 𑐄𑐥𑐩𑐾𑐫𑐬 𑐰𑐶𑐖𑐫𑐎𑐺𑐲𑑂𑐞 𑐱𑑂𑐬𑐾𑐲𑑂𑐛𑑄 𑐠𑐶𑐩𑐶𑐫𑐵 𑐎𑐮𑐵 𑐳𑑄𑐳𑐎𑐺𑐟𑐶 𑐳𑑄𑐬𑐎𑑂𑐲𑐞 𑐫𑐵𑐫𑐾𑐟 𑐰 𑐠𑐣𑐫𑐵 𑐳𑐩𑑂𑐥𑐡𑐵𑐫𑐵 𑐧𑐵𑐬𑐾 𑐮𑐶𑐥𑐵𑑄𑐐𑐸 𑐥𑐸𑐳𑑂𑐟𑐵𑐫𑐵𑐟 𑐖𑐵𑐣𑐎𑐵𑐬𑐷 𑐧𑐷𑐟 𑐠𑐖𑑂𑐫𑐵𑑅𑐐𑐸 𑐳𑐦𑐹 𑐟𑐳𑐎𑑄 𑐁𑐰𑐱𑑂𑐫𑐎 𑐖𑐹𑐐𑐸 𑐏𑑃 𑐢𑐫𑐵𑐡𑐶𑐮 𑑋

𑐥𑐬𑐶𑐲𑐡𑑂𑐫𑐵 𑐀𑐢𑑂𑐫𑐎𑑂𑐲 𑐳𑐣𑑂𑐟𑐎𑐸𑐩𑐵𑐬 𑐥𑑂𑐬𑐖𑐵𑐥𑐟𑐶𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐨𑐵𑐖𑐸 𑐮𑐵𑐕𑐶𑐫𑐵 𑐟𑑅𑐢𑐶𑐎𑑅𑐩𑑂𑐴 𑐎𑐵𑐫 𑐳𑐣𑑂𑐟𑑀𑐲𑐬𑐵𑐩 𑐮𑐵𑐕𑐶𑑄 𑐳𑐵𑐴𑐶𑐟𑑂𑐫 𑐎𑑂𑐲𑐾𑐟𑑂𑐬𑐫𑑂 𑐎𑐺𑐫𑐵𑐱𑐷𑐮𑐥𑐶𑑄𑐟 𑐡𑑃𑐫𑑂𑐡𑐳𑑄 𑐳𑐶𑐬𑐥𑐵𑑅 𑐧𑐷𑐐𑐸 𑐣𑐶𑑄𑐟𑐶𑑄 𑐨𑐵𑐖𑐸 𑐐𑐞𑐾𑐱𑐬𑐵𑐩 𑐮𑐵𑐕𑐶𑐫𑐵 𑐣𑐵𑐩𑐫𑑂 𑐗𑐶𑐐𑐹 𑐮𑐵𑐏𑐫𑐵 𑐀𑐎𑑂𑐲𑐫 𑐎𑑀𑐲 𑐳𑑂𑐠𑐵𑐥𑐣𑐵 𑐫𑐵𑐫𑐾𑐐𑐸 𑐏𑑃 𑐑𑑀𑐲𑐞𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐠𑐷𑐠𑐷 𑐳𑑄𑐑𑐳𑑄𑐳𑑂𑐠𑐵𑐥𑐵𑐏𑐾𑑄 𑐨𑐵𑐖𑐸 𑐮𑐵𑐕𑐶𑐫𑐵𑐟 𑐴𑐣𑐵𑐥𑑁 𑐡𑐾𑐕𑐵𑐳𑐾𑑄 𑐳𑐐𑑄 𑐧𑐶𑐫𑐵𑑅 𑐴𑐣𑐾𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋