𑐳𑑂𑐰𑑄𑐐𑐹 𑐳𑐦𑐹 𑐰𑐶𑐩𑑀𑐔𑐣

𑐰𑐶𑐱𑑂𑐰 𑐎𑐰𑐶𑐟𑐵 𑐡𑐶𑐰𑐳𑐫𑐵 𑐮𑐳𑐟𑐵𑐫𑑂 𑐳𑑂𑐰𑑄𑐐𑐹 𑐳𑐦𑐹 𑐰𑐶𑐩𑑀𑐔𑐣 𑐖𑐹𑐐𑐸 𑐡𑐸 𑑋 𑐐𑐵𑐖𑐮𑑄 𑐡𑐵𑑅𑐐𑐸 𑐔𑐵, 𑐔𑐶𑐣𑑂𑐟𑐣𑐫𑐵 𑐮𑑃𑐫𑑂 𑐖𑐶 𑐰 𑐀𑐩𑐸𑐮𑐶𑐂 𑐥𑑂𑐫𑐎𑐵𑐮𑑃𑐫𑑂 𑐖𑐶 𑐖𑐶 𑐣𑐵𑑄𑐫𑐵 𑐳𑐦𑐹 𑐰𑐶𑐩𑑀𑐔𑐣 𑐖𑐹𑐐𑐸 𑐏𑑅 𑑋 𑐣𑐾𑐥𑐵𑐮𑐨𑐵𑐲𑐵 𑐎𑐾𑐣𑑂𑐡𑑂𑐬𑐷𑐫 𑐰𑐶𑐨𑐵𑐐𑐫𑐵 𑐥𑑂𑐬𑐩𑐸𑐏 𑐜𑐵. 𑐬𑐵𑐖𑐣 𑐮𑐵𑐮 𑐖𑑀𑐱𑐷, 𑐥𑑂𑐬𑐵𑐖𑑂𑐘 𑐢𑑂𑐬𑐸𑐰 𑐩𑐢𑐶𑐎𑐬𑑂𑐩𑐷 𑐰 𑐳𑐵𑐴𑐶𑐟𑑂𑐫𑐎𑐵𑐬 𑐥𑐹𑐬𑑂𑐞 𑐟𑐵𑐩𑑂𑐬𑐎𑐵𑐬𑑄 𑐩𑑄𑐎𑐵𑑅 𑐎𑐠𑑄 𑐳𑐦𑐹 𑐰𑐶𑐩𑑀𑐔𑐣 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐏𑐸𑐐𑐹 𑐡𑐳𑐎 𑐣𑑂𑐴𑑂𑐫𑑅 𑐣𑑄 𑐥𑑂𑐬𑐎𑐵𑐱𑐣𑐫𑑂 𑐰𑐫𑐾𑐢𑐸𑑄𑐎𑐹𑐐𑐸 𑐜𑐵. 𑐁𑐣𑐣𑑂𑐡 𑐖𑑀𑐱𑐷 𑐰 𑐰𑐶𑐩𑐮 𑐟𑐵𑐩𑑂𑐬𑐎𑐵𑐬𑑄 𑐳𑐩𑑂𑐥𑐵𑐡𑐣 𑐫𑐵𑑅𑐐𑐸 ‘𑐐𑐵𑐖𑐮𑑄 𑐡𑐵𑑅𑐐𑐸 𑐔𑐵’𑐫𑐵 𑐣𑐶𑐐𑐹𑐐𑐸 𑐳𑑄𑐳𑑂𑐎𑐬𑐞 𑐥𑐶𑐡𑑄𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐰𑐰𑐵𑐳𑐾𑑄 𑐜𑐵. 𑐁𑐣𑐣𑑂𑐡 𑐖𑑀𑐱𑐷𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑐵𑐴𑐶𑐟𑑂𑐫𑐫𑐵 𑐀𑐰𑐳𑑂𑐠𑐵𑐥𑑂𑐬𑐟𑐶 𑐔𑐶𑐣𑑂𑐟𑐵 𑐥𑑂𑐰𑑄𑐎𑐵𑐡𑐶𑐮 𑑋 ‘𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑐵𑐴𑐶𑐟𑑂𑐫 𑐡𑐎𑑂𑐲𑐶𑐞 𑐊𑐱𑐶𑐫𑐵𑐫𑐵 𑐴𑐾 𑐄𑐟𑑂𑐎𑐺𑐲𑑂𑐚 𑐳𑐵𑐴𑐶𑐟𑑂𑐫 𑐩𑐢𑑂𑐫𑐾 𑐕𑐐𑐹 𑐏𑑅 𑑋 𑐡𑐳𑐎𑑁𑑄 𑐣𑑂𑐴𑑂𑐫𑑅 𑐴𑐾 𑐠𑐷𑐠𑐷 𑐰𑐶𑐢𑐵𑐫𑑂 𑐔𑑂𑐰𑐫𑐾𑐐𑐸 𑐳𑐸𑐬𑐸 𑐖𑐸𑐂𑐢𑐸𑑄𑐎𑐹𑐐𑐸 𑐳𑐵𑐴𑐶𑐟𑑂𑐫𑐫𑐵𑐳𑑂𑐟𑐬 𑐣𑑂𑐴𑐶𑐣𑑂𑐴𑐶𑐠𑑄 𑐧𑐵𑑄𑐩𑐮𑐵𑐣𑐵 𑐰𑐣𑐾𑐐𑐸 𑐧𑐵𑑄𑐮𑐵𑑅𑐐𑐸 𑐰𑐶𑐲𑐫 𑐩𑐏𑐸’, 𑐢𑐫𑐵𑐡𑐶𑐳𑐾𑑄 𑐰𑐫𑑂𑐎𑐮𑑄 𑐳𑐵𑐴𑐶𑐟𑑂𑐫𑐫𑐵𑐟 𑐰𑑂𑐫𑐵𑐰𑐳𑐵𑐫𑐶𑐎 𑐫𑐵𑐣𑐵𑑅 𑐳𑑂𑐟𑐬𑐧𑐺𑐡𑑂𑐢𑐶 𑐫𑐵𑐫𑐾𑐩𑐵𑑅𑐐𑐸 𑐏𑑃𑐫𑑂 𑐧𑑅 𑐧𑐶𑐫𑐵𑐡𑐶𑐮 𑑋

𑐬𑐸𑐰𑐬𑐶𑐎 𑐰 𑐎𑐸𑐟𑑅 𑐥𑐶𑐎𑐵𑐎𑐎𑑀 𑐁𑐫𑑀𑐖𑐣𑐵𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐐𑐵𑐫𑐎 𑐳𑐟𑑂𑐫𑐣𑐵𑐬𑐵𑐫𑐞 𑐩𑐵𑐣𑐣𑑂𑐢𑐬𑑄 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑐵 𑐁𑐡𑐶𑐎𑐰𑐶 𑐩𑐴𑐶𑐣𑑂𑐡𑑂𑐬 𑐩𑐮𑑂𑐮𑑄 𑐬𑐔𑐣𑐵 𑐫𑐵𑑅𑐐𑐸 𑐎𑐰𑐶𑐟𑐵𑐫𑐵𑐟 𑐩𑑂𑐫𑐾𑑃 𑐎𑐠𑑄 𑐣𑑂𑐫𑑄𑐎𑐵𑐡𑐷𑐐𑐸 𑐏𑑅 𑑋