𑐮𑐶𑐥𑐶 𑐳𑑂𑐫𑐣𑐷𑐐𑐸 𑐚𑑂𑐫𑐸𑐚𑑀𑐬𑐶𑐫𑐮 𑐨𑐶𑐜𑐶𑐫𑑀 𑐰 𑐣𑐾𑐥𑐵𑐮𑐨𑐵𑐲𑐵 𑐜𑐶𑐎𑑂𑐳𑐣𑐬𑐷 𑐊𑐥 𑐳𑐵𑐬𑑂𑐰𑐖𑐣𑐶𑐎

𑐣𑐾𑐥𑐵𑐮 𑐮𑐶𑐥𑐶 𑐰 𑐬𑐘𑑂𑐖𑐣𑐵 𑐮𑐶𑐥𑐶 𑐔𑑂𑐰𑐫𑐾𑐐𑐸 𑐳𑑂𑐫𑐣𑐷𑐐𑐸 𑐚𑑂𑐫𑐸𑐚𑑀𑐬𑐶𑐫𑐮 𑐨𑐶𑐜𑐶𑐫𑑀 𑐰 𑐣𑐾𑐥𑐵𑐮𑐨𑐵𑐲𑐵 𑐜𑐶𑐎𑑂𑐳𑐣𑐬𑐷 𑐊𑐥 𑐥𑐶𑐡𑑄𑐐𑐸 𑐡𑐸 𑑋 𑐣𑐾𑐥𑐵𑐮 𑐮𑐶𑐥𑐶 𑐐𑐸𑐠𑐶 𑐰 𑐡𑐧𑐸𑐮𑐷 𑐣𑐾𑐥𑐵𑑅𑐫𑐵 𑐩𑑄𑐎𑐵𑑅 𑐎𑐸𑐟𑐮𑑄 𑐡𑐫𑐾𑐎𑐹𑐐𑐸 𑐠𑑂𑐰 𑐚𑑂𑐫𑐸𑐚𑑀𑐬𑐶𑐫𑐮𑑄 𑐣𑐾𑐥𑐵𑐮 𑐮𑐶𑐥𑐶 𑐰 𑐬𑐘𑑂𑐖𑐣𑐵 𑐮𑐶𑐥𑐶𑐫𑐵 𑐳𑑂𑐰𑐬 𑐰𑐬𑑂𑐞 𑐰 𑐰𑑂𑐫𑐘𑑂𑐖𑐣 𑐰𑐬𑑂𑐞 𑐐𑐸𑐎𑐠𑑄 𑐔𑑂𑐰𑐫𑐾𑐐𑐸 𑐢𑐫𑐵𑐐𑐸 𑐀𑑅𑐥𑐸𑐎 𑐳𑑂𑐫𑐣𑐵𑐧𑐷 𑑋 𑐠𑐸𑐐𑐸 𑐚𑑂𑐫𑐸𑐚𑑀𑐬𑐶𑐫𑐮𑐮𑐶𑐳𑐾𑑄 𑐳𑐵𑐬𑑂𑐰𑐖𑐣𑐶𑐎 𑐖𑐹𑐐𑐸 𑐣𑐾𑐥𑐵𑐮𑐨𑐵𑐲𑐵 𑐜𑐶𑐎𑑂𑐳𑐣𑐬𑐷 𑐊𑐥𑑂𑐳𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐏𑑃𑐐𑑂𑐰𑑅𑐫𑐵 𑐀𑐬𑑂𑐠 𑐠𑐸𑐂𑐎𑐾𑐐𑐸 𑐮𑐶𑐳𑐾𑑄 𑐣𑐾𑐥𑐵𑐮𑐨𑐵𑐲𑐵 𑐳𑐫𑐾𑐎𑐾𑐟 𑐣𑑄 𑐐𑑂𑐰𑐵𑐴𑐵𑐮𑐶 𑐫𑐵𑐂𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋

𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐐𑑂𑐰𑐵𑐴𑐵𑐮𑐶𑑄 𑐡𑐫𑐾𑐎𑐹𑐐𑐸 𑐠𑐸𑐐𑐸 𑐨𑐶𑐜𑐶𑐫𑑀 𑐰 𑐊𑐥 𑐧𑐶𑐴𑐶𑐰𑐵𑑅 𑐕𑐐𑐹 𑐖𑑂𑐫𑐵𑐗𑑂𑐰𑑅𑐫𑐵 𑐡𑐠𑐸𑐂 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐄𑐥𑐩𑐾𑐫𑐬 𑐳𑐸𑐣𑐶𑐟𑐵 𑐜𑑄𑐐𑑀𑐮, 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐾𑐩𑐶𑐫𑐵 𑐨𑐵𑐂𑐳 𑐔𑐵𑐣𑑂𑐳𑐮𑐬 𑐩𑐮𑑂𑐮 𑐎𑐾 𑐳𑐸𑐣𑑂𑐡𑐬, 𑐨𑐵𑐲𑐵 𑐁𑐫𑑀𑐐𑐫𑐵 𑐡𑐸𑐖𑑅 𑐳𑐸𑐬𑐾𑐱 𑐩𑐵𑐣𑐣𑑂𑐢𑐬 𑐰 𑐣𑐾𑐥𑐵𑐮𑐨𑐵𑐲𑐵 𑐎𑐾𑐣𑑂𑐡𑑂𑐬𑐷𑐫 𑐰𑐶𑐨𑐵𑐐𑐫𑐵 𑐥𑑂𑐬𑐩𑐸𑐏 𑐳𑐴 𑐥𑑂𑐬𑐵. 𑐜𑐵. 𑐬𑐵𑐖𑐣𑐮𑐵𑐮 𑐖𑑀𑐱𑐷𑑄 𑐥𑐶𑐟𑐧𑑂𑐰𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐜𑐶𑐎𑑂𑐳𑐣𑐬𑐷𑐂 𑐣𑑂𑐴𑐵𑐥𑐵𑑄𑐏𑐸𑐳𑐷 ‘𑐮𑐸𑐏𑐵’ 𑐏𑑃𑐐𑑂𑐰𑑅 𑐳𑐬𑑂𑐔 𑐫𑐵𑐣𑐵𑑅 𑐜𑐶𑐎𑑂𑐳𑐣𑐬𑐷𑐫𑐵 𑐮𑐸𑐏𑐵 𑐔𑐵𑐫𑐾𑐎𑐵𑐡𑐷𑐩𑑂𑐴 𑐄𑐥𑐩𑐾𑐫𑐬 𑐜𑑄𑐐𑑀𑐮𑑄 𑐣𑐾𑐥𑐵𑐮𑐨𑐵𑐲𑐵 𑐰 𑐮𑐶𑐥𑐶 𑐳𑐫𑐾𑐎𑐾𑐐𑐸 𑐣𑐶𑑄𑐟𑐶𑑄 𑐠𑐸𑐥𑐶𑑄 𑐊𑐥𑑄 𑐐𑑂𑐰𑐵𑐴𑐵𑐮𑐶 𑐫𑐵𑐂𑐐𑐸 𑐰𑐶𑐱𑑂𑐰𑐵𑐳 𑐥𑑂𑐰𑑄𑐎𑐵𑐡𑐶𑐮 𑑋 𑐠𑑁𑑄𑐎𑐣𑑂𑐴𑐫𑑂𑐫𑐵 𑐫𑐸𑐐 𑐥𑑂𑐬𑐰𑐶𑐢𑐶𑐫𑐵 𑐫𑐸𑐐 𑐖𑐹𑐐𑐸𑐮𑐶𑑄 𑐨𑐵𑐲𑐵 𑐮𑐶𑐥𑐶 𑐳𑑄𑐬𑐎𑑂𑐲𑐞𑐫𑐵 𑐣𑐶𑑄𑐟𑐶𑑄 𑐥𑑂𑐬𑐰𑐶𑐢𑐷𑐩𑐿𑐟𑑂𑐬𑐷 𑐖𑐸𑐂𑐩𑐵𑑅𑐐𑐸 𑐁𑐰𑐱𑑂𑐫𑐎 𑐟𑐵𑐫𑐾𑐎𑐵𑑅 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐋𑐥 𑐡𑐫𑐾𑐎𑐾𑐟 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐐𑐸 𑐏𑑃 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐰𑐰𑐵𑐣𑐵𑐡𑐶𑐳𑐾𑑄 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐾𑐩𑐶𑐫𑐵 𑐨𑐵𑐂𑐳 𑐔𑐵𑐣𑑂𑐳𑐮𑐬 𑐩𑐮𑑂𑐮 𑐎𑐾 𑐳𑐸𑐣𑑂𑐡𑐬𑑄 𑐣𑐾𑐰𑐵𑑅 𑐨𑐵𑐫𑑂, 𑐮𑐶𑐥𑐶, 𑐳𑑄𑐳𑑂𑐎𑐺𑐟𑐶 𑐳𑑄𑐬𑐎𑑂𑐲𑐞𑐫𑐵 𑐖𑑂𑐫𑐵𑐫𑑂 𑐠𑑁𑑄𑐎𑐣𑑂𑐴𑐫𑑂 𑐥𑑂𑐬𑐰𑐶𑐢𑐶𑐫𑐵𑐟 𑐕𑑂𑐫𑐮𑐵𑑅 𑐮𑑂𑐫𑐵𑐫𑑂𑐩𑑂𑐴 𑐥𑐸𑐳𑑂𑐟𑐵 𑐣𑑂𑐴𑑂𑐫𑐖𑑂𑐫𑐵𑐰𑑅𑐐𑐸 𑐏𑑃𑐫𑑂 𑐮𑐳𑐟𑐵 𑐥𑑂𑐰𑑄𑐎𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐢𑐫𑐵𑐡𑐷𑐐𑐸 𑐡𑐸, ‘𑐨𑐵𑐫𑑂, 𑐮𑐶𑐥𑐶 𑐳𑑄𑐬𑐎𑑂𑐲𑐞𑐫𑐵 𑐖𑑂𑐫𑐵𑐫𑑂 𑐠𑐸𑐎𑐠𑑄 𑐮𑑂𑐫𑐵𑐫𑑂𑐩𑑂𑐴 𑐥𑐸𑐳𑑂𑐟𑐵 𑐣𑑂𑐴𑑂𑐫𑐖𑑂𑐫𑐵𑑅𑐐𑐸 𑐰𑑅𑐐𑐸 𑐏𑐣𑐵𑑅 𑐟𑐳𑐎𑑄 𑐮𑐫𑑂𑐟𑐵𑑅 𑑋 𑐠𑑁𑑄𑐎𑐣𑑂𑐴𑐫𑑂𑐫𑐵 𑐮𑑂𑐫𑐵𑐫𑑂𑐩𑑂𑐴𑐟 𑐥𑑂𑐬𑐰𑐶𑐢𑐶 𑐕𑑂𑐫𑐮𑐵𑑅 𑐨𑐵𑐫𑑂 𑐮𑐶𑐥𑐶, 𑐳𑑄𑐳𑑂𑐎𑐺𑐟𑐶 𑐳𑑄𑐬𑐎𑑂𑐲𑐞𑐫𑑂 𑐰𑐫𑐵𑐔𑑂𑐰𑑄𑐐𑐸 𑐏𑐣𑐵𑐧𑐮𑐫𑑂 𑐖𑐶𑐟𑑅 𑐁𑑅 𑐗𑐷𑐐𑐸 𑐨𑐵𑐫𑑂, 𑐳𑑄𑐳𑑂𑐎𑐺𑐟𑐶 𑐳𑐸𑐣𑐵𑑄 𑐮𑑂𑐫𑑄𑐎𑐵𑐟𑐂, 𑐳𑐸𑐣𑐵𑑄 𑐳𑑄𑐬𑐎𑑂𑐲𑐞 𑐫𑐵𑐂 𑐢𑐫𑐵𑐐𑐸 𑐔𑐶𑐣𑑂𑐟𑐵 𑐩𑑄𑐟 𑑋’

𑐀𑐠𑐾𑐴𑐾 𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐰𑐰𑐵𑐣𑐵𑐡𑐶𑐳𑐾𑑄 𑐁𑐂𑐚𑐷 𑐰𑐶𑐖𑑂𑐘 𑐊𑐮𑐾𑐣 𑐰𑐿𑐮𑑀𑐔𑐣 𑐟𑐸𑐮𑐵𑐢𑐬𑑄 𑐊𑐥 𑐡𑐫𑐾𑐎𑐾𑐢𑐸𑑄𑐎𑐵𑑅 𑐠𑐸𑐎𑐶𑐫𑐵𑐟 𑐕𑑂𑐫𑐮𑐵𑐧𑐸𑐮𑐵𑐫𑑂 𑐴𑐫𑐾𑐐𑐸 𑐡𑐵𑐫𑐶𑐟𑑂𑐰 𑐁𑑅 𑐗𑐷𑐐𑐸 𑐳𑐩𑐵𑐖𑐫𑐵𑐎𑐾 𑐰𑑅𑐐𑐸 𑐏𑑃 𑐢𑐫𑐵𑐡𑐶𑐮 𑑋 ‘𑐊𑐥 𑐡𑐫𑐾𑐎𑐵𑑄 𑐖𑐎 𑐩𑐖𑐶𑐄, 𑐄𑐎𑐶𑐫𑐵 𑐕𑑂𑐫𑐮𑐵𑐧𑐸𑐮𑐵 𑐣𑑄 𑐖𑐸𑐂𑐩𑐵𑑅 𑑋 𑐕𑑂𑐫𑐮𑐵𑐧𑐸𑐮𑐵 𑐩𑐖𑐸𑐮 𑐢𑐵𑑅𑐳𑐵 𑐕𑐸𑑄 𑐣𑑄 𑐎𑐠𑑄𑐫𑐵 𑐊𑐥𑐫𑐵 𑐍𑐔𑐶𑐟𑑂𑐫 𑐡𑐂𑐩𑐏𑐸, 𑐄𑐎𑐶𑑄 𑐠𑐸𑐎𑐶𑐫𑐵 𑐕𑑂𑐫𑐮𑐵𑐧𑐸𑐮𑐵 𑐰𑑂𑐫𑐵𑐥𑐎 𑐫𑐵𑐫𑐾𑐐𑐸 𑐡𑐵𑐫𑐶𑐟𑑂𑐰 𑐗𑐷𑐎𑐾 𑐰𑑅𑐐𑐸 𑐡𑐸 𑑋 𑐄𑐎𑐶𑑄 𑐳𑐎𑐳𑐶𑐣𑑄 𑐠𑑂𑐰 𑐊𑐥𑐫𑐵𑐟 𑐱𑐾𑐫𑐬 𑐫𑐵𑐣𑐵𑑅 𑐨𑐵𑐂𑐬𑐮 𑐫𑐵𑐫𑐾𑐩𑐵𑑅’ 𑐰𑐫𑑂𑐎𑐮𑑄 𑐢𑐫𑐵𑐡𑐷𑐐𑐸 𑐡𑐸 𑑋

𑐣𑐾𑐥𑐵𑐮𑐨𑐵𑐲𑐵 𑐜𑐶𑐎𑑂𑐳𑐣𑐬𑐷 𑐊𑐥𑑂𑐳𑐫𑐵 𑐥𑑂𑐬𑑀𑐖𑐾𑐎𑑂𑐚 𑐥𑑂𑐬𑐩𑐸𑐏 𑐳𑐸𑐨𑐵𑐲𑐬𑐵𑐩 𑐥𑑂𑐬𑐖𑐵𑐥𑐟𑐶𑑄 𑐨𑐶𑐜𑐶𑐫𑑀 𑐳𑐣𑑂𑐡𑐾𑐱𑐩𑐵𑐬𑑂𑐦𑐟 𑐊𑐥𑑂𑐳𑐫𑐵𑐧𑐵𑐬𑐾 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐐𑐸 𑐏𑑅 𑑋 𑐰𑐫𑑂𑐎𑑅𑐫𑐵 𑐎𑐠𑑄 𑐠𑐸𑐐𑐸 𑐊𑐥𑑂𑐳𑐫𑑂 𑐡𑐾𑐰𑐣𑐵𑐐𑐬𑐷, 𑐬𑑀𑐩𑐣 𑐰 𑐣𑐾𑐥𑐵𑐮 𑐮𑐶𑐥𑐶 𑐕𑑂𑐫𑐮𑐵𑑅 𑐣𑐾𑐥𑐵𑐮𑐨𑐵𑐲𑐵𑐫𑐵 𑐏𑑃𑐐𑑂𑐰𑑅 𑐳𑐬𑑂𑐔 𑐫𑐵𑐫𑐾𑐦𑐂𑐳𑐵 𑐠𑐸𑐎𑐷 𑐏𑑃𑐐𑑂𑐰𑑅𑐫𑐵 𑐀𑐬𑑂𑐠𑐮𑐶𑐳𑐾𑑄 𑐄𑐐𑐸 𑐏𑑃𑐐𑑂𑐰𑑅𑐮𑐶𑐳𑐾 𑐳𑐩𑑂𑐧𑐣𑑂𑐢𑐷 𑐎𑐶𑐥𑐵 𑐣𑑄 𑐡𑐸𑐐𑐸 𑐏𑑃 𑐢𑐫𑐵𑐡𑐶𑐮 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐠𑐸𑐐𑐸 𑐜𑐶𑐎𑑂𑐳𑐣𑐬𑐷𑐂 𑐥𑐷𑐕𑐡𑑂𑐰𑐮𑑄 𑐀𑐥𑑂𑐰𑑅

 𑐏𑑃𑐐𑑂𑐰𑑅 𑐡𑐸𑐠𑑂𑐫𑐵𑑅𑐐𑐸 𑐰 𑐡𑑂𑐰𑐵𑐮𑑂𑐏𑐵 𑐨𑐵𑐫𑑂𑐫𑐵 𑐏𑑃𑐐𑑂𑐰𑑅𑐟 𑐣𑑄 𑐡𑐸𑐠𑑂𑐫𑐵𑑅𑐐𑐸 𑐖𑐵𑐣𑐎𑐵𑐬𑐷 𑐧𑐶𑐄𑐐𑐸 𑐏𑑅 𑑋 𑐠𑐸𑐐𑐸 𑐊𑐥 𑐊𑐣𑑂𑐜𑑂𑐬𑑀𑐂𑐜 𑐰 𑐌𑐊𑐳 𑐣𑐶𑐐𑐸𑐮𑐶𑐳𑐣𑑄 𑐔𑐮𑐾 𑐖𑐸𑐂 𑑋

𑐣𑐾𑐥𑐵𑐮 𑐮𑐶𑐥𑐶 𑐐𑐸𑐠𑐶𑐫𑐵 𑑔𑑔 𑐡𑑃 𑐧𑐸𑐣𑑂𑐴𑐶𑐫𑐵 𑐮𑐳𑐟𑐵𑐫𑑂 𑐮𑐵𑐎𑐵𑑅 𑐠𑐸𑐐𑐸 𑐊𑐥 𑐥𑐶𑐟𑐧𑑂𑐰𑐖𑑂𑐫𑐵 𑐖𑐹𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐳𑐨𑐵𑐥𑐟𑐶𑐫𑐵 𑐠𑐵𑐳𑑄 𑐣𑑂𑐰𑐰𑐵𑐳𑐾𑑄 𑐐𑐸𑐠𑐶𑐫𑐵 𑐀𑐢𑑂𑐫𑐎𑑂𑐲 𑐀𑐣𑐶𑐮 𑐳𑑂𑐠𑐵𑐥𑐶𑐟𑑄 𑐮𑐶𑐥𑐶 𑐐𑐸𑐠𑐶𑑄 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐖𑑂𑐫𑐵𑐫𑐵 𑐖𑐵𑐣𑐎𑐵𑐬𑐷 𑐧𑐶𑐳𑐾𑑄 𑐀𑐗 𑐥𑑂𑐬𑐰𑐶𑐢𑐶𑐩𑐿𑐟𑑂𑐬𑐷 𑐖𑐸𑐫𑐵𑑅 𑐣𑑂𑐴𑑂𑐫𑐵𑑅 𑐰𑐣𑐾𑐐𑐸 𑐣𑐶𑑄𑐟𑐶𑑄 𑐐𑐸𑐠𑐶𑑄 𑐫𑑀𑐖𑐣𑐵 𑐡𑐫𑐾𑐎𑐵𑐔𑑂𑐰𑑄𑐐𑐸 𑐏𑑃 𑐎𑐣𑐵𑐡𑐶𑐮 𑑋