𑐣𑐾𑐥𑐵𑐮𑐮𑐶𑐥𑐶 𑐫𑐸𑐣𑐶𑐎𑑀𑐜𑐫𑑂 𑐡𑐸𑐠𑑂𑐫𑐵𑐎𑐹𑐐𑐸 𑐫𑑀𑐐𑐡𑐵𑐣𑐫𑐵𑐟 𑐎𑐫𑐵𑑅 𑐡𑐾𑐰𑐡𑐵𑐳𑐫𑐵𑐟 𑐮𑐸𑐩𑑄𑐎𑐮

𑐩𑐡𑐸𑐩𑑂𑐴 𑐨𑐵𑐲𑐵𑐳𑐾𑐰𑐷 𑐃. 𑐡𑐾𑐰𑐡𑐵𑐳 𑐩𑐵𑐣𑐣𑑂𑐢𑐬𑐫𑐵𑐟 𑐮𑐸𑐩𑑄𑐎𑐵𑑅 𑐣𑑂𑐴𑑂𑐫𑐵𑐎𑐵𑐔𑑂𑐰𑑄𑐐𑐸 𑐖𑐹𑐩 𑐖𑑂𑐫𑐵𑐗𑑂𑐰𑐮𑐫𑑂 𑐩𑐵𑐣𑐣𑑂𑐢𑐬𑑄 𑐫𑐵𑐣𑐵𑐡𑐷𑐐𑐸 𑐠𑐷𑐠𑐷 𑐖𑑂𑐫𑐵𑐗𑑂𑐰𑑅𑐫𑐵𑐟 𑐎𑐫𑐵𑑅 𑐠𑐷𑐠𑐷 𑐰𑑂𑐫𑐎𑑂𑐟𑐶𑐥𑐶𑑄𑐳𑑄 𑐰𑐫𑑂𑐎𑑅𑐫𑐵 𑐫𑑀𑐐𑐡𑐵𑐣𑐫𑐵𑐟 𑐎𑐫𑐵𑑅 𑐠𑑅𑐠𑑅𑐐𑐸 𑐧𑐶𑐔𑐵𑑅 𑐥𑑂𑐰𑑄𑐎𑐵𑐡𑐷𑐐𑐸 𑐡𑐸 𑑋

𑐱𑑂𑐬𑐲𑑂𑐚𑐵 𑐳𑐩𑐵𑐖 𑐀𑐩𑐾𑐬𑐶𑐎𑐵 𑐰 𑐮𑐎𑑂𑐲𑑂𑐩𑐷𑐡𑐵𑐳 𑐩𑐵𑐣𑐣𑑂𑐢𑐬 𑐮𑐸𑐩𑐣𑑂𑐟𑐶 𑐥𑐸𑐔𑑅𑐫𑐵 𑐐𑑂𑐰𑐳𑐵𑐮𑐫𑑂 𑐁𑐂𑐟𑐰𑐵𑑅 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐩𑐡𑐸𑐩𑑂𑐴 𑐩𑐵𑐣𑐣𑑂𑐢𑐬𑑄 𑐣𑐾𑐥𑐵𑐮 𑐮𑐶𑐥𑐶𑐫𑐵𑐟 𑐫𑐸𑐣𑐶𑐎𑑀𑐜𑐫𑑂 𑐡𑐸𑐠𑑂𑐫𑐵𑐎𑐾𑐐𑐸 𑐣𑐶𑑄𑐟𑐶𑑄 𑐫𑐵𑐣𑐵𑐡𑐷𑐐𑐸 𑐖𑑂𑐫𑐵𑐫𑐵𑐟 𑐎𑐫𑐵𑑅 𑐣𑑂𑐰𑐰𑐵𑐫𑐾𑐐𑐸 𑐗𑑂𑐰𑐮𑐫𑑂 𑐦𑐣𑑂𑐚 𑐜𑐶𑐖𑐵𑐂𑐣𑐬

𑐨𑐵𑐖𑐸 𑐳𑐩𑐷𑐬 𑐎𑐬𑑂𑐩𑐵𑐔𑐵𑐬𑑂𑐫𑑄 𑐰𑐫𑑂𑐎𑑅 𑐣𑑂𑐴𑑂𑐫𑐵𑐐𑑂𑐐𑐸 𑐖𑑂𑐫𑐵𑐫𑑂 𑐣𑑄 𑐡𑐸𑐧𑐶𑐣𑐵𑑅 𑐖𑑂𑐫𑐵 𑐫𑐵𑐫𑐾𑐦𑐸𑐩𑑂𑐴 𑐰𑑂𑐫𑐎𑑂𑐟𑐶𑐟𑑂𑐰 𑐖𑐹𑐐𑐸 𑐏𑑃 𑐎𑐣𑐵𑐡𑐶𑐳𑐾𑑄 𑐰𑐫𑑂𑐎𑐮𑑄 𑐣𑐾𑐥𑐵𑐮 𑐮𑐶𑐥𑐶𑐫𑐵𑐟 𑐫𑐸𑐣𑐶𑐎𑑀𑐜𑐫𑑂 𑐡𑐸𑐠𑑂𑐫𑐵𑐎𑐾𑐐𑐸 𑐣𑐶𑑄𑐟𑐶𑑄 𑐟𑑅𑐢𑑄𑐐𑐸 𑐴𑐾 𑐳𑑄𑐑𑐬𑑂𑐲 𑐰 𑐩𑐾𑐴𑐣𑐟 𑐫𑐵𑐣𑐵𑐡𑐷𑐐𑐸 𑐏𑑃 𑐎𑐣𑐵𑐡𑐷𑐐𑐸 𑐡𑐸 𑑋 𑐠𑑅𑐥𑐶𑑄 𑐩𑐵𑐣𑐣𑑂𑐢𑐬𑐮𑐶𑐳𑐾 𑐫𑐸𑐣𑐶𑐎𑑀𑐜𑐫𑑂 𑐣𑐾𑐥𑐵𑐮𑐮𑐶𑐥𑐶 𑐡𑐸𑐠𑑂𑐫𑐵𑐎𑐾𑐐𑐸 𑐣𑐶𑑄𑐟𑐶𑑄 𑐔𑐵𑑅𑐣𑑂𑐴𑐶𑑄 𑐩𑐢𑐵𑐳𑐾 𑐖𑑂𑐫𑐵 𑐫𑐵𑐣𑐵𑐐𑐸 𑐏𑑃𑐫𑐵𑐟 𑐮𑐸𑐩𑑄𑐎𑐸𑐳𑐾𑑄 𑐰𑐫𑑂𑐎𑑅 𑐖𑑂𑐰𑑅𑐩𑐡𑐸𑐩𑑂𑐴 𑐰𑑂𑐫𑐎𑑂𑐟𑐶𑐟𑑂𑐰 𑐖𑐹𑐐𑐸 𑐏𑑃 𑐎𑐣𑐵𑐡𑐶𑐮 𑑋

𑐀𑐠𑐾𑐴𑐾 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑑂𑐬𑐰𑐎𑑂𑐟𑐵 𑐣𑐵𑐥𑑄 𑑑𑑗 𑐰𑐜𑐵𑐫𑐵 𑐀𑐢𑑂𑐫𑐎𑑂𑐲 𑐣𑐰𑐷𑐣 𑐩𑐵𑐣𑐣𑑂𑐢𑐬𑑄 𑐡𑐾𑐰𑐡𑐵𑐳 𑐩𑐵𑐣𑐣𑑂𑐢𑐬𑐫𑐵 𑐎𑐸𑐟𑐮𑐫𑑂 𑐣𑐾𑐥𑐵𑐮 𑐩𑐿𑐟𑑂𑐬𑐷 𑐀𑐢𑑂𑐫𑐫𑐣 𑐩𑐞𑑂𑐜𑐮 𑐥𑐸𑐳𑑂𑐟𑐎𑐵𑐮𑐫𑐥𑐵𑐏𑐾𑑄 𑐣𑑂𑐴𑐹𑐡𑑃𑐧𑐮𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵 𑐣𑑂𑐴𑐵𑐥𑐵𑑄𑐐𑐸 𑐎𑑂𑐫𑐵𑐮𑐾𑐞𑑂𑐜𑐬 𑐥𑐶𑐎𑐵𑐫𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐰 𑐰𑐫𑑂𑐎𑑅𑐮𑐶𑐳𑐾 𑐠𑑅𑐥𑐶𑑄 𑐣𑑄 𑐄𑐐𑐸 𑐎𑑂𑐫𑐵𑐮𑐾𑐣𑑂𑐜𑐬 𑐩𑑂𑐫𑐹 𑐰𑐣𑐵𑐐𑐸 𑐀𑐣𑐸𑐨𑐰 𑐎𑐣𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐩𑐡𑐸𑐩𑑂𑐴 𑐩𑐵𑐣𑐣𑑂𑐢𑐬𑑄 𑐣𑐾𑐥𑐵𑐮 𑐮𑐶𑐥𑐶𑐫𑐵𑐟 𑐫𑐸𑐣𑐶𑐎𑑀𑐜𑐫𑑂 𑐫𑑄𑐎𑐾𑐐𑐸 𑐣𑐶𑑄𑐟𑐶𑑄 𑐳𑑄𑐑𑐬𑑂𑐲 𑐫𑐵𑑅𑐩𑑂𑐴 𑐖𑐎 𑐩𑐏𑐸, 𑐳𑐵𑑄𑐳𑑂𑐎𑐺𑐟𑐶𑐎 𑐏𑑂𑐫𑐮𑐫𑑂 𑐣𑑄
𑐟𑑂𑐰𑐵𑑅𑐫𑐵 𑐩𑐔𑐵𑑄𑐣𑐶𑐳𑐾𑑄 𑐟𑑅𑐢𑐶𑐎𑑅𑐥𑐶𑑄 𑐳𑐎𑐳𑐶𑐟𑑄 𑐖𑐵𑐐𑐺𑐟 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐫𑐵𑐣𑐵𑐡𑐷𑐐𑐸 𑐫𑑀𑐐𑐡𑐵𑐣𑐫𑐵 𑐔𑐬𑑂𑐔𑐵 𑐫𑐵𑐣𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐨𑐵𑐲𑐵𑐳𑐾𑐰𑐷 𑐰𑐶𑐲𑑂𑐞𑐸 𑐔𑐶𑐟𑑂𑐬𑐎𑐵𑐬𑑄 𑐡𑐾𑐰𑐡𑐵𑐳 𑐩𑐵𑐣𑐣𑑂𑐢𑐬𑐮𑐶𑐳𑐾 𑐣𑐾𑐥𑐵𑐮𑐮𑐶𑐥𑐶 𑐫𑐸𑐣𑐶𑐎𑑀𑐜𑐫𑑂 𑐡𑐸𑐠𑑂𑐫𑐵𑐎𑐾𑐐𑐸 𑐣𑐶𑐳𑐾𑑄 𑐣𑐾𑐥𑐵𑐮 𑐳𑑄𑐰𑐟𑑂𑐫𑐵 𑐎𑑂𑐫𑐵𑐮𑐾𑐞𑑂𑐜𑐬 𑐡𑐫𑐾𑐎𑐾𑐐𑐸 𑐖𑑂𑐫𑐵𑐫𑑂 𑐫𑐵𑐣𑐵𑐐𑐸 𑐖𑑂𑐫𑐵𑐏𑑃𑐫𑐵𑐟 𑐮𑐸𑐩𑑄𑐎𑐵𑑅 𑐡𑐾𑐰𑐡𑐵𑐳 𑐩𑐵𑐣𑐣𑑂𑐢𑐬 𑐕𑐩𑑂𑐴 𑐢𑐵𑐟𑑂𑐠𑐾𑑄𑐫𑐵𑐩𑑂𑐴 𑐨𑐵𑐲𑐵𑐳𑐾𑐰𑐷 𑐰 𑐧𑐴𑐸𑐁𑐫𑐵𑐩𑐶𑐎 𑐰𑑂𑐫𑐎𑑂𑐟𑐶𑐟𑑂𑐰 𑐖𑐹𑐐𑐸 𑐏𑑃 𑐎𑐣𑐵𑐡𑐶𑐮 𑑋 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐨𑐵𑐲𑐵 𑐏𑑂𑐫𑑅𑐫𑐵 𑐰𑑂𑐫𑐎𑑂𑐟𑐶𑐟𑑂𑐰𑐥𑐶𑑄 𑐬𑐵𑐖𑐾𑐱 𑐱𑐵𑐎𑑂𑐫, 𑐬𑐵𑐖𑐾𑐣𑑂𑐡𑑂𑐬𑐩𑐵𑐣 𑐱𑐵𑐎𑑂𑐫, 𑐳𑐶𑐖𑐣 𑐱𑑂𑐬𑐾𑐲𑑂𑐛, 𑐥𑑂𑐬𑐩𑐾𑐱 𑐱𑑂𑐬𑐾𑐲𑑂𑐛, 𑐬𑐶𑐟𑐵𑐡𑐾𑐰𑐷 𑐥𑑂𑐬𑐢𑐵𑐣 𑐰 𑐥𑑂𑐬𑐩𑐶𑐮𑐵 𑐩𑐵𑐣𑐣𑑂𑐢𑐬𑑄 𑐡𑐾𑐰𑐡𑐵𑐳𑑄 𑐫𑐵𑐣𑐵𑐡𑐷𑐐𑐸 𑐫𑑀𑐐𑐡𑐵𑐣𑐫𑐵𑐟 𑐎𑐫𑐵𑑅 𑐠𑑅𑐠𑑅𑐐𑐸 𑐣𑐸𑐐𑑅𑐏𑑃 𑐎𑐣𑐵𑐡𑐷𑐐𑐸 𑐏𑑅 𑑋

𑐖𑐹𑐩 𑐖𑑂𑐫𑐵𑐗𑑂𑐰𑑅 𑐣𑐾𑐥𑐵𑐮𑐨𑐵𑐲𑐵 𑐎𑐰𑐫𑐶𑐟𑑂𑐬𑐷 𑐥𑑂𑐬𑐟𑐶𑐳𑐬𑐵 𑐳𑐵𑐫𑑂𑐩𑐶 𑐰 𑐳𑑄𑐔𑐵𑐬𑐎𑑅𑐩𑐶 𑐳𑐶𑐮𑑂𑐨𑐶𑐫𑐵 𑐬𑐵𑐖𑑀𑐥𑐵𑐢𑑂𑐫𑐵𑐫𑑄 𑐣𑑂𑐴𑑂𑐫𑐵𑐎𑐵𑐡𑐷𑐐𑐸 𑐏𑑅 𑑋 𑐠𑐸𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐠𑑂𑐫𑑄𑐩𑐠𑑂𑐫𑑄 𑐳𑐕𑐶𑐩𑑂𑐴 𑐳𑑂𑐰𑐫𑐵𑑄 𑐀𑐥𑑂𑐰𑐳𑐶𑐣𑑄 𑐧𑑂𑐰𑐟𑐶 𑐎𑐵𑑅𑐐𑐸 𑐏𑑅𑐳𑐵 𑐧𑑂𑐰𑐟𑐶 𑐎𑐵𑑅𑐥𑐶𑑄 𑐳𑐎𑐮𑐳𑐶𑐟 𑐮𑐎𑑂𑐲𑑂𑐩𑐷𑐡𑐵𑐳 𑐩𑐵𑐣𑐣𑑂𑐢𑐬 𑐮𑐸𑐩𑐣𑑂𑐟𑐶 𑐥𑐸𑐔𑑅𑐫𑐵 𑐡𑐸𑐖𑑅𑐮𑐶𑐳𑐾𑑄 𑐡𑐾𑐰𑐡𑐵𑐳 𑐩𑐵𑐣𑐣𑑂𑐢𑐬𑐫𑐵 𑐖𑐴𑐵𑐣 𑐳𑐬𑑀𑐖 𑐩𑐵𑐣𑐣𑑂𑐢𑐬𑑄 𑐳𑐸𑐨𑐵𑐫𑑂 𑐡𑐾𑐕𑐵𑐣𑐵𑐡𑐷𑐐𑐸 𑐏𑑅 𑑋