𑐎𑐷𑐥𑐹 𑐩𑐣𑑂𑐣𑐾𑐬𑐘𑑂𑐖𑐣𑑄 𑐖𑐵𑑅𑐐𑐸 𑐠𑑂𑐫𑑄𑐩𑐠𑑂𑐫𑑄 𑑓𑑐𑑐 𑐡𑑃 𑐥𑐸𑐮𑐵𑑄𑐐𑐸 𑐡𑐾𑐰𑐷 𑐣𑐵𑑃𑐔 – 𑐬𑐶𑐡𑐾𑐣 𑐩𑐴𑐬𑑂𑐖𑐣

𑐎𑐷𑐥𑐹 𑑋 𑐎𑐷𑐥𑐹 𑐩𑐣𑑂𑐣𑐾𑐬𑐘𑑂𑐖𑐣𑑄 𑐖𑐵𑑅𑐐𑐸 𑐠𑑂𑐫𑑄𑐩𑐠𑑂𑐫𑑄 𑑓𑑐𑑐 𑐡𑑃 𑐥𑐸𑐮𑐵𑑄𑐐𑐸 𑐡𑐾𑐰𑐷 𑐣𑐵𑑃𑐔 (𑐡𑐾𑐰 𑐥𑑂𑐫𑐵𑐏𑑄) 𑐥𑑂𑐫𑐵𑐏𑑄 𑑑 𑐎𑐵𑐬𑑂𑐟𑐶𑐎 𑐎𑐸𑐣𑑂𑐴𑐸 𑐎𑑂𑐰𑐔𑐵𑑅𑐐𑐸 𑐏𑑅 𑑋

𑐎𑐷𑐥𑐹𑐫𑐵 𑐟𑑅𑐣𑐣𑐷 𑐳𑑄𑐳𑑂𑐎𑐺𑐟𑐶𑐥𑑂𑐬𑐾𑐩𑐷 𑐫𑐸𑐰𑐵𑐥𑐶𑐣𑑂𑐳𑑄 𑐣𑑂𑐴𑐵𑐥𑐵𑑄𑐣𑐶𑐳𑐾𑑄 𑐣𑑂𑐴𑑂𑐫𑐧𑑂𑐰𑐫𑐵 𑐰𑐫𑐵𑐔𑑂𑐰𑑄𑐐𑐸 𑐡𑐵𑐦𑐵 𑐨𑐖𑐣𑐫𑑂 𑐁𑐢𑐵𑐬𑐶𑐟 𑐡𑐾𑐰𑐷 𑐥𑑂𑐫𑐵𑐵𑐏𑑄 𑐩𑑀𑐴𑐣𑐷 𑐔𑐵𑐮𑑄 𑐎𑐸𑐣𑑂𑐴𑐸𑐣𑐶𑐳𑐾𑑄 𑐣𑑂𑐴𑑂𑐫𑐵𑑅𑐐𑐸 𑐡𑐸 𑑋
𑐄𑐐𑐸 𑐡𑐶𑐣𑐫𑑂 𑐟𑐣𑑅𑐣𑐶 𑐁𑐏𑐵 𑐕𑐾𑑃𑐫𑑂 𑐮𑑃 𑐥𑑂𑐫𑐵𑐏𑑄 𑐎𑑂𑐫𑐣𑐵 𑐎𑐶𑐥𑐸 𑐡𑐾𑐫𑑂 𑐔𑐵𑐴𑐶𑐮𑐵 𑐢𑐸𑐁𑐖𑑂𑐖𑐸𑐫𑐵 𑐣𑐵𑐳𑑅 𑐡𑑂𑐫𑑅 𑐠𑐵𑐫𑑂 𑐣𑐵𑐳𑑅 𑐐𑑂𑐰𑐵𑐬𑐵 𑐰 𑐨𑐿𑐮𑑅 𑐐𑑂𑐰𑐵𑐬𑐵 𑐎𑑂𑐫𑐣𑐾𑐐𑐸 𑐫𑐵𑐂 𑑋
𑐀𑐩𑐵𑐳𑐷 𑐥𑐸𑐣𑑂𑐴𑐷 𑐎𑐸𑐣𑑂𑐴𑐸 𑐔𑐶𑐮𑑄𑐔𑑀 𑐖𑐐𑐟𑐥𑐵𑐮 𑐩𑐴𑐵𑐧𑐶𑐴𑐵𑐬𑐫𑑂 𑐔𑑂𑐰𑑄𑐐𑐸 𑐟𑐵𑐣𑑂𑐟𑑂𑐬𑐶𑐎 𑐐𑐸𑐬𑐸 𑐴𑐶𑐬𑐵𑐩𑐸𑐣𑐶 𑐧𑐖𑑂𑐬𑐵𑐔𑐵𑐬𑑂𑐫𑐫𑐵 𑐁𑐐𑑄 𑐕𑐾𑑃𑐫𑑂 𑐥𑑂𑐫𑐵𑐏𑑄 𑐮𑑂𑐴𑐸𑐂𑐐𑐸 𑐖𑑂𑐫𑐵 𑐖𑐹𑐐𑐸 𑐏𑑅 𑑋

𑐠𑑂𑐰 𑐡𑐾𑐰𑐷 𑐥𑑂𑐫𑐵𑐏𑑄 𑐧𑐺𑐴𑐳𑑂𑐥𑐟𑐶𑑄 𑐂𑐣𑑂𑐡𑑂𑐬𑐫𑐵𑐟 𑐎𑑄𑐐𑐸 𑐥𑑁𑐬𑐵𑐞𑐶𑐎 𑐮𑐵𑐮 𑐴𑐶𑐬𑐵 𑐧𑐵𑐏𑑄𑐫𑐵 𑐮𑐶𑐢𑑄𑐳𑐵𑐫𑑂 𑐎𑑂𑐫𑐣𑐾𑐐𑐸 𑐫𑐵𑐂 𑑋 𑐮𑐵𑐮 ‘𑐩𑐶𑐖𑑄𑐩𑐔𑐵’ 𑐴𑐶𑐬𑐵 𑐰 ‘𑐩𑐶𑐳𑐵𑐩𑐔𑐵’ 𑐥𑐵𑐟𑑂𑐬𑐫𑐵 𑐡𑐠𑐸𑐂 𑐧𑐵𑐫𑐵 𑐔𑑂𑐰𑐣𑐾𑐩𑐵𑐐𑐸 𑐂𑐮𑐫𑑂 𑐴𑐶𑐬𑐵 ‘𑐩𑐶𑐳𑐵𑐩𑐔𑐵𑑄’ 𑐱𑑂𑐬𑐷 𑐂𑐣𑑂𑐡𑑂𑐬𑐵𑐫𑐞𑐷 𑐩𑐵𑐟𑐵𑐫𑐵𑐟 𑐁𑐬𑐵𑐢𑐣𑐵 𑐫𑐵𑐫𑐾𑐢𑐸𑑄𑐎𑐵𑑅 𑐮𑐵𑐮𑐮𑐶𑐳𑐾𑑄 𑐩𑐶𑐮𑐣 𑐖𑐸𑐂 𑐮𑐳𑐟𑐵𑐫𑑂 𑐂𑐣𑑂𑐡𑑂𑐬𑐵𑐫𑐞𑐷 𑐩𑐵𑐟𑐵𑐫𑐵 𑐁𑐬𑐵𑐢𑐣𑐵 𑐫𑐵𑐂𑐐𑐸 𑐫𑐵𑐟 𑐥𑑂𑐫𑐵𑐏𑑄𑐫𑐵 𑐬𑐹𑐥𑐫𑑂 𑐎𑑂𑐫𑐣𑐾𑐐𑐸 𑐥𑐩𑑂𑐥𑐬𑐵 𑐡𑐸 𑑋 𑑋

𑐕𑐐𑐹 𑐂𑐮𑐫𑑂 𑐮𑑀𑐥 𑐖𑐸𑐂𑐟𑑂𑐫𑑄𑐐𑐸 𑐠𑐸𑐐𑐸 𑐥𑑂𑐫𑐵𑐏𑑄𑐫𑐵𑐟 𑐠𑑂𑐫𑑄𑐩𑐠𑑂𑐫𑑄 𑐣𑑂𑐫𑐵𑐡𑑃 𑐣𑑂𑐴𑑂𑐫𑑅 𑐠𑑂𑐰 𑐥𑑂𑐫𑐵𑐏𑑄 𑐎𑐷𑐥𑐹𑐫𑐵 𑐟𑑅𑐣𑐣𑐶 𑐟𑑂𑐰𑐵𑑅𑐫𑐵 𑐳𑑄𑐳𑑂𑐎𑐺𑐟𑐶𑐥𑑂𑐬𑐾𑐩𑐷 𑐰 𑐳𑐔𑐾𑐟 𑐮𑑂𑐫𑐵𑐫𑑂𑐩𑑂𑐴𑐟𑐫𑑂𑐐𑐸 𑐣𑐾𑐟𑐺𑐟𑑂𑐰𑐫𑑂 𑐣𑑂𑐴𑐹𑐐𑐸 𑐥𑐸𑐳𑑂𑐟𑐵𑐫𑐵𑐟 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋

𑐟𑑅𑐣𑐣𑐷 𑐡𑐵𑐦𑐵 𑐏𑐮𑑅𑐫𑐵 𑐣𑐵𑐫𑑅 𑐡𑐶𑐮𑐶𑐥 𑐩𑐴𑐬𑑂𑐖𑐣𑑄 𑐣𑑂𑐴𑐹𑐥𑐶𑑄 𑐮𑑂𑐫𑐵𑐫𑑂𑐩𑑂𑐴𑐟𑐫𑑂𑐟 𑐡𑐾𑐰𑐷 𑐥𑑂𑐫𑐵𑐏𑑄𑐫𑐵 𑐥𑑂𑐬𑐱𑐶𑐎𑑂𑐲𑐞 𑐮𑐶𑐥𑐵 𑐥𑑂𑐫𑐵𑐏𑑄 𑐮𑑂𑐴𑐸𑐂𑐎𑐵𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐐𑐸 𑐏𑑅 𑑋 𑐰𑐫𑑂𑐎𑑅𑐫𑐵 𑐎𑐠𑑄 𑐠𑑂𑐰 𑐥𑑂𑐫𑐵𑐏𑑄𑐫𑐵𑐟 𑐣𑐶𑐬𑐣𑑂𑐟𑐬𑐟𑐵 𑐧𑐷𑐐𑐸 𑐣𑐶𑐟𑐶𑑄 𑐂𑐣𑑂𑐡𑑂𑐬𑐵𑐫𑐞𑐷𑐫𑐵 𑑓 𑐥𑐵𑐟𑑂𑐬, 𑐧𑑂𑐬𑐩𑑂𑐴𑐵𑐫𑐞𑐷𑐫𑐵 𑑓 𑐥𑐵𑐟𑑂𑐬, 𑐨𑐿𑐬𑐰𑐫𑐵 𑑓 𑐥𑐵𑐟𑑂𑐬, 𑑒 𑐥𑐵𑐟𑑂𑐬 𑐎𑐰𑑄, 𑑑 𑐥𑐵𑐟𑑂𑐬 𑐡𑐵𑐐𑐶𑐣𑐷 𑐰 𑑓 𑐥𑐵𑐟𑑂𑐬 𑐡𑐾𑐰𑐐𑐞𑐫𑐵 𑐟𑐫𑐵𑐬𑐷𑐂 𑐡𑐸 𑑋