𑐀𑐣𑑂𑐟𑐬 𑐎𑑂𑐫𑐵𑐩𑑂𑐥𑐳 𑐔𑐶𑐣𑐵𑐏𑑃 𑐢𑐾𑑄𑐢𑐾𑑄 𑐧𑐮𑑂𑐮𑐵𑐏𑐫𑑂 𑐳𑐰𑐶𑐣𑐵 𑐩𑐴𑐬𑑂𑐖𑐣 𑐣𑑂𑐴𑐵𑐥

𑐫𑐾𑑃 – 𑐀𑐣𑑂𑐟𑐬 𑐎𑑂𑐫𑐵𑐩𑑂𑐥𑐳 𑐣𑐾𑐥𑐵𑐮𑐨𑐵𑐲𑐵 𑐔𑐶𑐣𑐵𑐏𑑃 𑐢𑐾𑑄𑐢𑐾𑑄 𑐧𑐮𑑂𑐮𑐵 𑐎𑐵𑐳𑐵𑐫𑑂 𑐎𑐰𑐫𑐶𑐟𑑂𑐬𑐷 𑐳𑐰𑐶𑐣𑐵 𑐩𑐴𑐬𑑂𑐖𑐣𑐫𑐵 𑐔𑐶𑐣𑐵𑐏𑑃 ‘𑐕𑑄 𑐧𑑂𑐫𑐹𑐐𑐸 𑐐𑑀𑐮𑐷𑑄’ 𑐣𑑂𑐴𑐵𑐥 𑐳𑐶𑐬𑐥𑐵𑑅 𑐟𑑂𑐫𑐵𑐎𑐾𑐟 𑐟𑐵𑑅𑐮𑐵𑑅𑐐𑐸 𑐡𑐸 𑑋

𑐫𑐮𑐫𑐵 𑐧𑐵𑐮𑐎𑐸𑐩𑐵𑐬𑐷𑐂 𑐂𑐥𑐶𑐊𑐳 𑐖𑑂𑐫𑐵𑐎𑐹 𑐣𑑂𑐴𑑂𑐫𑑅𑐣𑐾 𑐖𑐹𑐐𑐸 𑐐𑑀𑐮𑐷𑐎𑐵𑐞𑑂𑐜𑐫𑐵 𑐑𑐚𑐣𑐵𑐫𑐵𑐟 𑐎𑐫𑐵𑑅 𑐔𑑂𑐰𑐫𑐵𑐟𑑅𑐐𑐸 𑐩𑐴𑐬𑑂𑐖𑐣𑐫𑐵 𑐔𑐶𑐣𑐵𑐏𑑄 𑐣𑑂𑐴𑐵𑐥 𑐳𑐶𑐬𑐥𑐵𑑅 𑐰 𑐣𑐐𑐡 𑑑𑑕𑐡𑑂𑐰𑑅 𑐟𑐎𑐵𑐫𑐵 𑐳𑐶𑐬𑐥𑐵𑑅 𑐟𑑂𑐫𑐵𑐎𑐹𑐐𑐸 𑐏𑑅 𑑋

𑐣𑐾𑐥𑐵𑐮𑐨𑐵𑐲𑐵 𑐎𑐾𑐣𑑂𑐡𑑂𑐬𑐷𑐫 𑐰𑐶𑐨𑐵𑐐𑐫𑐵 𑐃𑐬𑐵 𑐐𑑁𑐬𑐷 𑐴𑐮𑐫𑑂 𑐠𑑁𑑄 𑐱𑐣𑐶𑐰𑐵𑑅 𑐎𑑂𑐰𑐔𑐵𑑅𑐐𑐸 𑐕𑐐𑐹 𑐖𑑂𑐫𑐵𑐗𑑂𑐰𑐮𑐫𑑂 𑐎𑐵𑐳𑐵𑐫𑐵 𑐮𑐶𑐔𑑂𑐰𑑅 𑐥𑐶𑐟𑐧𑑂𑐫𑐹𑐐𑐸 𑐏𑑅 𑑋

𑐎𑐵𑐳𑐵𑐫𑐵 𑐐𑑂𑐰𑐳𑐵𑑅 𑐏𑐮𑑅 𑐮𑐸𑐩𑐣𑑂𑐟𑐶 𑐡𑐧𑐹𑐫𑐵 𑐣𑐵𑐫𑑅 𑐬𑐵𑐩𑐾𑐱𑑂𑐰𑐬 𑐱𑑂𑐬𑐾𑐲𑑂𑐛𑐫𑐵 𑐳𑐨𑐵𑐣𑐵𑐫𑑅𑐳𑐸𑐂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐰𑐬𑐶𑐲𑑂𑐛 𑐎𑐰𑐶 𑐫𑑀𑐐𑐾𑐣𑑂𑐡𑑂𑐬 𑐥𑑂𑐬𑐢𑐵𑐣 𑐩𑐹𑐥𑐵𑐴𑐵𑑄𑐎𑐠𑑄 𑐗𑐵𑐫𑐵𑐡𑐷𑐐𑐸 𑐏𑑅 𑑋

𑐔𑐶𑐣𑐵𑐏𑑃 𑐢𑐾𑑄𑐢𑐾𑑄 𑐧𑐮𑑂𑐮𑐵𑐏𑐫𑑂 𑐣𑐾𑐥𑐵𑐮𑐨𑐵𑐲𑐵 𑐎𑐾𑐣𑑂𑐡𑑂𑐬𑐷𑐫 𑐰𑐶𑐨𑐵𑐐𑐫𑑂 𑐊𑐩.𑐊. 𑐰 𑐊𑐩.𑐦𑐶𑐮., 𑐬𑐟𑑂𑐣𑐬𑐵𑐖𑑂𑐫 𑐎𑑂𑐫𑐵𑐩𑑂𑐥𑐳𑐫𑑂 𑐰 𑐥𑐵𑐚𑐣 𑐳𑑄𑐫𑐸𑐎𑑂𑐟 𑐎𑑂𑐫𑐵𑐩𑑂𑐥𑐳𑐫𑑂 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑐣𑐵𑐔𑑂𑐰𑑄𑐥𑐶𑑄 𑑒𑑕 𑐩𑑂𑐴 𑐧𑑂𑐰𑑃𑐩𑐥𑐶𑑄𑐳𑑄 𑐧𑑂𑐰𑐟𑐶 𑐎𑐫𑐵𑐡𑐷𑐐𑐸 𑐏𑑅 𑑋

𑐔𑐶𑐣𑐵𑐏𑑃 𑐎𑐵𑐳𑐵𑐫𑑂 𑐣𑐰𑐷𑐣 𑐥𑑂𑐬𑐎𑐵𑐱 𑐱𑑂𑐬𑐾𑐲𑑂𑐛 (𑐊𑐩.𑐦𑐶𑐮𑑂 𑐥𑐶𑐊𑐔𑐜𑐷)𑐫𑐵 ‘𑐖𑐶𑐣𑑂𑐡𑐐𑐷𑐫𑐵 𑐥𑐬𑐶𑐨𑐵𑐲𑐵’ 𑐔𑐶𑐣𑐵𑐏𑑃𑐫𑐵𑐟 𑐮𑑂𑐫𑐹 𑐳𑐶𑐬𑐥𑐵 𑐮𑐵𑑅𑐐𑐸 𑐏𑑅𑐳𑐵 𑐬𑐟𑑂𑐣𑐬𑐵𑐖𑑂𑐫𑐮𑐎𑑂𑐲𑑂𑐩𑐷 𑐎𑑂𑐫𑐵𑐩𑑂𑐥𑐳𑐫𑐵 𑐊𑐩.𑐊. 𑐣𑑂𑐴𑐵𑐥𑐵𑑄𑐐𑐸 𑐳𑐾𑐩𑐾𑐲𑑂𑐚𑐬𑐫𑐵 𑐂𑐣𑑂𑐡𑑂𑐬 𑐩𑐴𑐬𑑂𑐖𑐣𑐫𑐵 ‘𑐗𑐷𑐳𑑄 𑐗𑐷𑐐𑐸 𑐖𑐶𑐣𑑂𑐡𑐐𑐷𑐫𑐵 𑐑𑑅𑐔𑐵𑑅’ 𑐱𑐷𑐬𑑂𑐲𑐫𑐵 𑐔𑐶𑐣𑐵𑐏𑑃𑐫𑐵𑐟 𑐮𑐶𑐫𑐵𑑄𑐮𑑂𑐫𑐹 𑐳𑐶𑐬𑐥𑐵𑑅 𑐮𑐵𑑅𑐐𑐸 𑐏𑑅 𑑋 𑐀𑐠𑐾 𑐴𑐾 𑐣𑐾𑐥𑐵𑐮𑐨𑐵𑐲𑐵 𑐎𑐾𑐣𑑂𑐡𑑂𑐬𑐷𑐫 𑐰𑐶𑐨𑐵𑐐 𑐊𑐩.𑐊.𑐫𑐵 𑐴𑐬𑐶𑐳𑐸𑐣𑑂𑐡𑐬 𑐥𑑀𑐟𑐵𑐩𑐵𑐴𑐵𑑃𑐫𑐵 ‘𑐗𑐮𑑂𑐮 𑐡𑐾𑐫𑐵 𑐎𑐶𑐥𑐵 𑐡𑑅’ 𑐰 𑐬𑐟𑑂𑐣𑐬𑐵𑐖𑑂𑐫𑐮𑐎𑑂𑐲𑑂𑐩𑐷 𑐎𑑂𑐫𑐵𑐩𑑂𑐥𑐳𑐫𑐵 𑐥𑑂𑐬𑐱𑐵𑐣𑑂𑐟 𑐜𑑄𑐐𑑀𑐮𑐫𑐵 ‘𑐟𑑂𑐰𑐴𑑅’ 𑐔𑐶𑐣𑐵𑐏𑑃𑐫𑐵𑐟 𑐴𑑅𑐥𑐵𑑅 𑐳𑐶𑐬𑐥𑐵𑑅 𑐮𑐵𑑅𑐐𑐸 𑐏𑑅 𑑋 𑐀𑐠𑐾 𑐴𑐾, 𑐖𑑂𑐫𑐵𑐗𑑂𑐰𑐮𑐫𑑂 𑐡𑐎𑐮𑐫𑑂 𑐧𑐵𑑄𑐮𑐵𑐎 𑐎𑐰𑐶𑐟𑐵 𑐰𑐵𑐔𑐣 𑐫𑐵𑑅𑐩𑑂𑐴 𑐖𑐶𑐟𑐾𑐣𑑂𑐡𑑂𑐬 𑐬𑐳𑐶𑐎𑐫𑐵𑐟 𑐣𑑄 𑐩𑐟𑐶𑐣𑐵𑐫𑐵 𑐔𑐶𑑄𑐮𑐶𑐳𑐾𑑄 𑐳𑐶𑐬𑐥𑐵𑑅 𑐡𑐾𑐕𑐵𑑅𑐐𑐸 𑐏𑑅 𑑋

𑐎𑐵𑐳𑐵𑐫𑑂 𑐣𑑂𑐴𑐵𑐥 𑐖𑐹𑐩𑑂𑐴𑐾𑐳𑐶𑐟 𑑑𑑕𑐡𑑂𑐰𑑅, 𑐮𑑂𑐫𑐹 𑐮𑑂𑐫𑐵𑑅𑐩𑑂𑐴𑐾𑐳𑐶𑐟 𑑑𑑐𑐡𑑂𑐰𑑅, 𑐮𑐶𑐫𑐵𑑄𑐮𑑂𑐫𑐹 𑐮𑐵𑑅𑐩𑑂𑐴𑐾𑐳𑐶𑐟 𑐣𑑂𑐫𑐵𑐡𑑂𑐰𑑅 𑐀𑐮𑐾 𑐴𑑅𑐥𑐵𑑅 𑐮𑐵𑑅𑐩𑑂𑐴𑐾𑐳𑐶𑐟 𑐣𑐶𑐡𑑂𑐰𑑅𑐟𑐎𑐵 𑐣𑐐𑐡 𑐳𑐶𑐬𑐥𑐵𑑅 𑐧𑑂𑐫𑐹𑐐𑐸 𑐏𑑅 𑑋

𑐰𑐶𑐖𑐫𑐷 𑐎𑐰𑐶𑐥𑐶𑑄𑐟 𑐩𑐹𑐥𑐵𑐴𑐵𑑄 𑐎𑐰𑐶 𑐫𑑀𑐐𑐾𑐣𑑂𑐡𑑂𑐬 𑐥𑑂𑐬𑐢𑐵𑐣𑑄 𑐳𑐶𑐬𑐥𑐵𑑅 𑐂𑐣𑐵𑐡𑐷𑐐𑐸, 𑐣𑐾𑐥𑐵𑐮𑐨𑐵𑐲𑐵 𑐎𑐾𑐣𑑂𑐡𑑂𑐬𑐷𑐫 𑐰𑐶𑐨𑐵𑐐𑐫𑐵 𑐥𑑂𑐬𑐩𑐸𑐏 𑐜𑐵. 𑐬𑐵𑐖𑐣𑐮𑐵𑐮 𑐖𑑀𑐱𑐷𑑄 𑐡𑐳𑐶𑐥𑑁 𑐧𑐶𑐫𑐵𑐡𑐷𑐐𑐸 𑐏𑑅𑐳𑐵 𑐡𑐧𑐹𑐫𑐵 𑐣𑐵𑐫𑑅 𑐬𑐵𑐩𑐾𑐱𑑂𑐰𑐬 𑐱𑑂𑐬𑐾𑐲𑑂𑐛𑑄 𑐣𑐐𑐡 𑐳𑐶𑐬𑐥𑐵 𑐧𑐶𑐫𑐵𑐡𑐷𑐐𑐸 𑐏𑑅 𑑋

𑐣𑐾𑐥𑐵𑐮𑐨𑐵𑐲𑐵𑐫𑐵 𑐰𑐬𑐶𑐲𑑂𑐛 𑐳𑐵𑐴𑐶𑐟𑑂𑐫𑐎𑐵𑐬 𑐊𑐰𑑄 𑐐𑐖𑐮𑐎𑐵𑐬 𑐨𑐹𑐲𑐞𑐥𑑂𑐬𑐳𑐵𑐡 𑐱𑑂𑐬𑐾𑐲𑑂𑐛𑐫𑐵 𑐎𑐖𑐶𑐳𑐸𑐂 𑐳𑐸𑐬𑐾𑐱𑐎𑐶𑐬𑐞 𑐩𑐵𑐣𑐣𑑂𑐢𑐬 𑐰 𑐣𑐵𑐬𑐡 𑐰𑐖𑑂𑐬𑐵𑐔𑐵𑐬𑑂𑐫𑐥𑐶𑑄 𑐡𑐸𑐖𑑅 𑐡𑐸𑐐𑐸 𑐣𑐶𑐬𑑂𑐞𑐵𑐫𑐎 𑐩𑐞𑑂𑐜𑐮𑑄 𑐎𑐵𑐳𑐵𑐫𑐵 𑐰𑐶𑐖𑐫𑐷𑐥𑐶𑑄 𑐮𑑂𑐫𑑅𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐮𑐳𑐎𑐸𑐳 𑐣𑑂𑐰𑐔𑐸 𑐮𑐸𑐩𑐣𑑂𑐟𑐶 𑐡𑐧𑐹𑐫𑐵 𑐡𑐵𑑄𑐨𑐬𑐶 𑐳𑑄𑐐𑐷𑐟𑐵 𑐩𑐴𑐬𑑂𑐖𑐣𑑄 𑐧𑐶𑐫𑐵𑐡𑐷𑐐𑐸, 𑐡𑐸𑐖𑑅 𑐳𑐸𑐡𑐶𑐥 𑐩𑐴𑐬𑑂𑐖𑐣𑑄 𑐳𑐸𑐨𑐵𑐫𑑂 𑐡𑐾𑐕𑐵𑐫𑐵𑐡𑐷𑐐𑐸 𑐏𑑅𑐳𑐵 𑐖𑑂𑐫𑐵𑐗𑑂𑐰𑑅 𑐡𑐧𑐹𑐫𑐵 𑐕𑑂𑐫𑐵𑐘𑑂𑐖𑐾 𑐥𑐘𑑂𑐔𑐮𑐵𑐮 𑐩𑐴𑐬𑑂𑐖𑐣𑑄 𑐣𑑂𑐴𑑂𑐫𑐵𑐎𑐵𑐡𑐷𑐐𑐸 𑐏𑑅 𑑋

𑐠𑐸𑐐𑐸 𑐎𑐵𑐳𑐵𑐫𑑂 𑐀𑐬𑑂𑐔𑐣𑐵 𑐟𑐸𑐮𑐵𑐢𑐬 (𑐣𑐾𑐨𑐵𑐎𑐾𑐰𑐶), 𑐰𑐶𑐱𑑂𑐰 𑐱𑐵𑐎𑑂𑐫 (𑐥𑐵𑐳𑑄𑐎𑑂𑐫𑐵), 𑐐𑑄𑐐𑐵 𑐳𑐶𑑄 (𑐣𑐾𑐨𑐵𑐎𑐾𑐰𑐶), 𑐖𑐹𑐣𑐵 𑐱𑐵𑐴𑐷 (𑐣𑐾𑐨𑐵𑐎𑐾𑐰𑐶), 𑐮𑐸𑐣𑐵 𑐔𑐶𑐟𑑂𑐬𑐎𑐵𑐬 (𑐬𑐬𑐵𑐎𑑂𑐫𑐵), 𑐩𑐶𑐣𑐬𑑂𑐰𑐵 𑐱𑐬𑑂𑐩𑐵 𑐬𑐵𑐖𑑀𑐥𑐵𑐢𑑂𑐫𑐵𑐫 (𑐣𑐾𑐨𑐵𑐎𑐾𑐰𑐶), 𑐣𑐶𑐬𑑂𑐩𑐮𑐵 𑐜𑑄𑐐𑑀𑐮 𑐳𑐶𑑄𑐴 (𑐣𑐾𑐨𑐵𑐎𑐾𑐰𑐶), 𑐬𑐵𑐢𑐾𑐱𑑂𑐫𑐵𑐩 𑐩𑐴𑐬𑑂𑐖𑐣 (𑐣𑐾𑐨𑐵𑐎𑐾𑐰𑐶), 𑐬𑐵𑐖𑐾𑐱 𑐩𑐴𑐬𑑂𑐖𑐣 (𑐣𑐾𑐨𑐵𑐎𑐾𑐰𑐶), 𑐬𑐵𑐖𑐾𑐱 𑐩𑐴𑐬𑑂𑐖𑐣 (𑐣𑐾𑐨𑐵𑐎𑐾𑐰𑐶), 𑐬𑐩𑐶𑐮𑐵𑐡𑐾𑐰𑐷 𑐱𑑂𑐬𑐾𑐲𑑂𑐛 (𑐣𑐾𑐨𑐵𑐎𑐾𑐰𑐶), 𑐬𑐷𑐣𑐵 𑐱𑐵𑐎𑑂𑐫 (𑐣𑐾𑐨𑐵𑐎𑐾𑐰𑐶), 𑐬𑐾𑐏𑐵 𑐬𑐵𑐖𑑀𑐥𑐵𑐢𑑂𑐫𑐵𑐫 (𑐣𑐾𑐨𑐵𑐎𑐾𑐰𑐶), 𑐬𑑀𑐖𑐶𑐣𑐵 𑐩𑐴𑐬𑑂𑐖𑐣 (𑐣𑐾𑐨𑐵𑐎𑐾𑐰𑐶), 𑐬𑐸𑐥𑐵 𑐱𑐵𑐴𑐷 (𑐬𑐬𑐵𑐎𑑂𑐫𑐵), 𑐱𑑂𑐬𑐷𑐎𑐺𑐲𑑂𑐞 𑐩𑐴𑐬𑑂𑐖𑐣 (𑐣𑐾𑐨𑐵𑐎𑐾𑐰𑐶), 𑐳𑐺𑐳𑑂𑐣𑐵 𑐎𑑄𑐳𑐵𑐎𑐵𑐬 (𑐣𑐾𑐨𑐵𑐎𑐾𑐰𑐶), 𑐫𑐵𑐡𑐰𑐥𑑂𑐬𑐳𑐵𑐡 𑐬𑑄𑐖𑐶𑐟 (𑐣𑐾𑐨𑐵𑐎𑐾𑐰𑐶), 𑐬𑐵𑐩𑐎𑐸𑐩𑐵𑐬𑐷 𑐬𑐸𑐧𑐷 𑐱𑑂𑐬𑐾𑐲𑑂𑐛 (𑐣𑐾𑐨𑐵𑐎𑐾𑐰𑐶) 𑐰 𑐖𑑂𑐘𑐵𑐣𑐎𑐸𑐩𑐵𑐬𑐷 𑐩𑐴𑐬𑑂𑐖𑐣 (𑐣𑐾𑐨𑐵𑐎𑐾𑐰𑐶) 𑐥𑐶𑑄𑐳𑑄 𑐧𑑂𑐰𑐟𑐶 𑐎𑐫𑐵𑐡𑐷𑐐𑐸 𑐏𑑅 𑑋