𑐁𑑅 𑐧𑐵𑐖𑑄𑐫𑐵 𑐣𑐵𑐥𑐣𑐵𑐥𑑄 𑐨𑐵𑐲𑐵 𑐣𑑄 𑐳𑑂𑐫𑐣𑐷𑐐𑐸

𑐥𑐶𑐣𑐾 𑐥𑐶𑐣𑐾 𑐖𑐶𑐮𑑂𑐮𑐵𑐫𑑂 𑐧𑐵𑐖𑑄 𑐳𑑂𑐫𑑄 𑐰𑐣𑐷𑐥𑐶𑑄 𑐧𑐵𑐖𑑄 𑐐𑐸𑐬𑐸𑐥𑐶𑑄𑐳𑑄 𑐀𑐣 𑐧𑐵𑐖𑑄𑐫𑐵 𑐣𑐵𑐥𑐣𑐵𑐥𑑄 𑐣𑐾𑐰𑐵𑑅 𑐨𑐵𑐫𑑂 𑐣𑑄 𑐳𑑂𑐫𑐣𑐵 𑐰𑐫𑐾 𑐦𑐫𑐾𑐩𑐵 𑐢𑐎𑐵𑑅 𑐧𑐵𑐖𑑄 𑐐𑐸𑐬𑐸𑐥𑐶𑑄𑐟 𑐧𑐶𑐄𑐐𑐸 𑐨𑐵𑐲𑐵 𑐳𑑂𑐫𑐣𑐾𑐐𑐸 𑐥𑑂𑐬𑐱𑐶𑐎𑑂𑐲𑐞 𑐩𑑂𑐴𑐶𑐐𑑅 𑐎𑑂𑐰𑐔𑐵𑐮 𑑋

𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹𑐫𑐵 𑐁𑐴𑑂𑐰𑐵𑐣𑐫𑑂 𑐣𑐵𑐳𑑅 𑐳𑐺𑐲𑑂𑐚𑐶 𑐎𑐮𑐵𑐫𑐵 𑐐𑑂𑐰𑐵𑐴𑐵𑐮𑐶𑑄 𑐣𑐾𑐰𑐵𑑅 𑐳𑑂𑐫𑐣𑐵𑐩𑐶 𑐡𑐧𑐹𑐥𑐵𑐏𑐾𑑄 𑐳𑑂𑐰𑐣𑑂𑐴𑐸𑐫𑑄𑐎𑑄 𑐠𑑂𑐰 𑐟𑐵𑐮𑐶𑐩 𑐧𑐶𑐄𑐐𑐸 𑐏𑑅 𑑋 𑐠𑐣𑐫𑐵 𑐣𑐾𑐥𑐵𑐮 𑐁𑐡𑐬𑑂𑐱 𑐳𑑂𑐎𑐸𑐮𑐫𑑂 𑐖𑐹𑐐𑐸 𑐟𑐵𑐮𑐶𑐩𑐫𑐵 𑐣𑐷𑐩𑑂𑐴 𑐳𑐴𑐨𑐵𑐐𑐷𑐥𑐶𑑄𑐟 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹𑐫𑐵 𑐣𑐵𑐫𑑅 𑐥𑐧𑐶𑐟𑑂𑐬 𑐧𑐖𑑂𑐬𑐵𑐔𑐵𑐬𑑂𑐫𑑄 𑐡𑐳𑐶𑐥𑑁 𑐮𑑅𑐮𑑂𑐴𑐵𑐣𑐵𑐡𑐶𑐮 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐰𑐰𑐵𑐳𑐾𑑄 𑐰𑐫𑑂𑐎𑐮𑑄 𑐟𑐵𑐮𑐶𑐩 𑐎𑐫𑐵𑐡𑐷𑐥𑐶𑑄 𑐳𑐎𑐳𑐶𑐣𑑄 𑐁𑑅 𑐀𑐨𑐶𑐫𑐣𑑂𑐟𑐵 𑐴𑐾 𑐖𑐸𑐫𑐵𑑅 𑐨𑐵𑐲𑐵 𑐥𑑂𑐬𑐱𑐶𑐎𑑂𑐲𑐞 𑐧𑐷𑐟 𑐂𑐣𑐵𑐥 𑐫𑐵𑐣𑐵𑐡𑐶𑐮 𑑋

𑐣𑐾𑐰𑐵𑑅 𑐳𑑂𑐫𑐣𑐵𑐩𑐶 𑐡𑐧𑐹𑐫𑐵 𑐣𑑂𑐰𑐎𑐸 𑐎𑐺𑐲𑑂𑐞𑐨𑐎𑑂𑐟 𑐩𑐵𑐣𑐣𑑂𑐢𑐬𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐩𑐹𑐥𑑂𑐬𑐱𑐶𑐎𑑂𑐲𑐎 𑐧𑐬𑐸𑐞𑐥𑑂𑐬𑐳𑐵𑐡 𑐧𑐿𑐡𑑂𑐫𑑄 𑐮𑐳𑐎𑐸𑐳 𑐫𑐵𑐣𑐵𑐡𑐷𑐐𑐸 𑐏𑑅𑐳𑐵 𑐣𑐾𑐰𑐵𑑅 𑐳𑐺𑐲𑑂𑐚𑐶 𑐎𑐮𑐵𑐫𑐵 𑐣𑐵𑐫𑑅 𑐢𑐬𑑂𑐩 𑐩𑐸𑐣𑐶𑐎𑐵𑐬𑑄 𑐠𑑂𑐰 𑐟𑐵𑐮𑐶𑐩 𑐮𑐶𑐥𑐵 𑐁𑑅 𑐧𑐵𑐖𑑄 𑐳𑑂𑐫𑐣𑐷𑐥𑐶𑑄 𑐐𑐸𑐬𑐸𑐥𑐶𑑄𑐳𑑄 𑐁𑑅 𑐳𑑄𑐐𑐷𑐟 𑐩𑐵𑐢𑑂𑐫𑐩𑑄 𑐨𑐵𑐲𑐵 𑐣𑑄 𑐳𑑂𑐫𑐣𑐵 𑐠𑐎𑐾 𑐦𑐂𑐐𑐸 𑐏𑑃 𑐎𑐣𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐷𑐥𑐵𑐏𑐾𑑄 𑐧𑐵𑐖𑑄𑐐𑐸𑐬𑐸 𑐳𑐸𑐡𑐣 𑐩𑐸𑐣𑐶𑐎𑐵𑐬 𑐰 𑐳𑑄𑐐𑐷𑐟𑐵 𑐎𑐥𑐵𑐮𑐷𑐥𑐶𑑄𑐳𑑄 𑐠𑑅𑐐𑐸 𑐀𑐣𑐸𑐨𑐰 𑐣𑑂𑐫𑑄𑐎𑐵𑐡𑐷𑐐𑐸 𑐏𑑅 𑑋 𑐳𑑂𑐰𑐣𑑂𑐴𑐸𑐫𑑄𑐎𑑄 𑐖𑐹𑐐𑐸 𑐟𑐵𑐮𑐶𑐩𑐫𑑂 𑐠𑐷𑐠𑐷 𑐥𑑂𑐬𑐱𑐶𑐎𑑂𑐲𑐎𑐥𑐶𑑄𑐳𑑄 𑐥𑑂𑐬𑐱𑐶𑐎𑑂𑐲𑐞 𑐧𑐶𑐫𑐵𑐡𑐷𑐐𑐸 𑐏𑑅 𑑋