𑐄𑐡𑑂𑐑𑑀𑐲𑐞 𑐟𑐵𑐮𑐶𑐩 𑐳𑐩𑐵𑐥𑐣

𑐠𑐶𑐩𑐶 – 𑐨𑐎𑑂𑐟𑐥𑐸𑐬 𑐖𑐶𑐮𑑂𑐮𑐵 𑐩𑐵𑐣𑐣𑑂𑐢𑐬 𑐫𑐸𑐰𑐵 𑐳𑑄𑐑𑐫𑐵 𑐐𑑂𑐰𑐳𑐵𑐮𑐫𑑂 𑐖𑐹𑐐𑐸 𑐗𑐶𑑄𑐳𑑂𑐰𑐤𑐸𑐫𑐵 𑐎𑑂𑐲𑐩𑐟𑐵 𑐀𑐨𑐶𑐰𑐺𑐡𑑂𑐢𑐶 𑐟𑐵𑐮𑐶𑐩 𑐎𑑂𑐰𑐔𑐵𑑅𑐐𑐸 𑐡𑐸 𑑋𑐳𑐩𑐵𑐥𑐣 𑐖𑑂𑐫𑐵𑐗𑑂𑐰𑐮𑐫𑑂 𑐣𑐰𑐵𑐳𑐾𑑄 𑐳𑑄𑐑𑐫𑐵 𑐣𑐵𑐫𑑅 𑐤𑐸𑐕𑐾𑐬𑐟𑑂𑐣 𑐩𑐵𑐣𑐣𑑂𑐢𑐬𑑄 𑐠𑐖𑑂𑐫𑐵𑑅𑐐𑐸 𑐟𑐵𑐮𑐶𑐩𑑄 𑐖𑐶𑐮𑑂𑐮𑐵𑐫𑐵 𑐠𑐷𑐠𑐷 𑐠𑐵𑐳𑐫𑑂 𑐔𑑂𑐰𑐣𑐵𑐔𑑂𑐰𑑄𑐥𑐶𑑄 𑐩𑐵𑐣𑐣𑑂𑐢𑐬 𑐳𑐩𑐸𑐡𑐵𑐫𑐫𑐵 𑐱𑐿𑐎𑑂𑐲𑐶𑐎, 𑐁𑐬𑑂𑐠𑐶𑐎, 𑐳𑐵𑑄𑐳𑑂𑐎𑐺𑐟𑐶𑐎 𑐰 𑐎𑐵𑐳𑐵 𑐏𑑂𑐫𑐮𑐫𑑂 𑐎𑑂𑐲𑐩𑐟𑐵 𑐀𑐨𑐶𑐰𑐺𑐡𑑂𑐢𑐶 𑐫𑐵𑐫𑐾𑐐𑐸𑐮𑐶𑐂 𑐟𑐶𑐧𑑅 𑐖𑐹 𑐰𑐣𑐷𑐐𑐸 𑐰𑐶𑐱𑑂𑐰𑐵𑐳 𑐥𑑂𑐰𑑄𑐎𑐵𑐡𑐶𑐮 𑑋

𑐠𑑅𑐥𑐶𑑄𑐳𑑄 𑐳𑐩𑐸𑐡𑐵𑐫𑐫𑐵 𑐎𑑂𑐲𑐩𑐟𑐵 𑐀𑐨𑐶𑐰𑐺𑐡𑑂𑐢𑐶𑐫𑐵 𑐮𑐎𑑂𑐲𑑂𑐫 𑐎𑐫𑐵𑐐𑐸 𑐡𑐸 𑐢𑐵𑐳𑐾𑑄 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮, ‘𑐳𑑄𑐳𑑂𑐠𑐵𑐐𑐟 𑐥𑑂𑐬𑑀𑐟𑑂𑐳𑐵𑐴𑐣 𑐧𑐶𑐫𑐵𑑅 𑐦𑐬𑐎 𑐥𑐾𑐱𑐵 𑐰 𑐰𑑂𑐫𑐰𑐳𑐵𑐫𑐫𑑂 𑐮𑐐𑐾 𑐖𑐸𑐫𑐵𑐔𑑂𑐰𑑄𑐥𑐶𑑄 𑐩𑐵𑐣𑐣𑑂𑐢𑐬𑐟𑐫𑑂 𑐖𑐷𑐰𑐣𑐳𑑂𑐟𑐬 𑐳𑐸𑐢𑐵𑐬𑐫𑐵 𑐣𑐶𑑄𑐟𑐶𑑄 𑐎𑐸𑐟𑑅 𑐫𑐵𑐫𑐾𑐐𑐸 𑐖𑐸𑐂’, 𑐀𑐢𑑂𑐫𑐎𑑂𑐲 𑐩𑐵𑐣𑐣𑑂𑐢𑐬𑑄 𑐢𑐫𑐵𑐡𑐶𑐮 𑑋𑐣𑐾𑐥𑐵𑐮 𑐩𑐵𑐣𑐰𑐀𑐢𑐶𑐎𑐵𑐬 𑐳𑑄𑐐𑐛𑐣 𑐏𑑂𑐰𑐥𑐫𑐵 𑐀𑐢𑑂𑐫𑐎𑑂𑐲 𑐬𑐵𑐩𑐎𑐺𑐲𑑂𑐞 𑐩𑐵𑐣𑐣𑑂𑐢𑐬𑑄 𑐥𑑂𑐬𑐳𑑂𑐟𑐸𑐟𑐶 𑐱𑐿𑐮𑐷 𑐁𑐰𑐱𑑂𑐫𑐎 𑐖𑐹𑐐𑐸 𑐰𑐶𑐲𑐫𑐫𑑂 𑐠𑑅𑐐𑐸 𑐰𑐶𑐔𑐵𑑅 𑐟𑐫𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐬𑐵𑐲𑑂𑐚𑑂𑐬𑐶𑐫 𑐀𑐣𑐸𑐳𑐣𑑂𑐢𑐵𑐣 𑐰𑐶𑐨𑐵𑐐𑐥𑐵𑐏𑐾𑑄 𑐀𑐰𑐎𑐵𑐳 𑐎𑐫𑐵𑐡𑐷𑐪 𑐬𑐟𑑂𑐣 𑐳𑐵𑐫𑑂𑐩𑐶, 𑐣𑐰𑐬𑐟𑑂𑐣 𑐳𑑂𑐎𑐸𑐮𑐫𑐵 𑐥𑑂𑐬𑐵𑐔𑐵𑐬𑑂𑐫 𑐳𑐸𑐬𑐾𑐣𑑂𑐡𑑂𑐬 𑐱𑑂𑐬𑐾𑐲𑑂𑐛, 𑐳𑐶𑐰𑐵𑑅 𑐳𑐵𑐫𑑂𑐩𑐶 𑐏𑐮𑑅𑐫𑐵 𑐣𑐵𑐫𑑅 𑐀𑐲𑑂𑐚𑐬𑐟𑑂𑐣 𑐩𑐵𑐣𑐣𑑂𑐢𑐬 𑐮𑐐𑐵𑐫𑐟 𑐠𑐷𑐠𑐷 𑐳𑑄𑐑𑐳𑑄𑐳𑑂𑐠𑐵𑐫𑐵 𑐥𑑂𑐬𑐟𑐶𑐣𑐶𑐢𑐶𑐟𑐫𑑂𑐳𑑄 𑐣𑑄 𑐠𑑅𑐠𑑅𑐐𑐸 𑐰𑐶𑐔𑐵𑑅 𑐟𑐫𑐵𑐡𑐷𑐐𑐸 𑐏𑑅 𑑋𑐬𑐵𑐖𑐾𑐱 𑐩𑐵𑐣𑐣𑑂𑐢𑐬 𑐰 𑐳𑐸𑐔𑐶𑐟𑑂𑐬𑐵 𑐩𑐵𑐣𑐣𑑂𑐢𑐬𑐫𑐵 𑐳𑑄𑐫𑑀𑐖𑐎𑐟𑑂𑐰𑐫𑑂 𑐖𑐹𑐐𑐸 𑐟𑐵𑐮𑐶𑐩 𑐳𑑄𑐔𑐵𑐬𑐎𑑅𑐩𑐶 𑐎𑐾𑐎𑐾 𑐩𑐵𑐣𑐣𑑂𑐢𑐬𑑄 𑐧𑐶𑐫𑐵𑐡𑐷𑐐𑐸 𑐏𑑅𑐳𑐵 𑐩𑐾𑐪 𑐳𑑄𑐔𑐵𑐬𑐎𑑅𑐩𑐶 𑐣𑐵𑐥𑑄 𑐣𑐵𑑄𑐖𑐵𑑅𑐪 𑐩𑑂𑐫𑐾𑑃 𑐴𑐵𑐮𑐵𑐩𑐶 𑐳𑐸𑐬𑐖𑐰𑐷𑐬 𑐰𑐖𑑂𑐬𑐵𑐔𑐵𑐬𑑂𑐫𑑄 𑐣𑑄 𑐕𑐤𑐸𑐫𑐵 𑐥𑑂𑐬𑐱𑐶𑐎𑑂𑐲𑐞 𑐧𑐶𑐫𑐵𑐡𑐷𑐐𑐸 𑐏𑑅 𑑋

𑐤𑐶𑑄 𑐣𑐶𑐑𑑁𑐫𑐵 𑐮𑑂𑐫𑐵𑐏𑑄 𑐳𑑄𑐔𑐵𑐮𑐣 𑐖𑐹𑐐𑐸 𑐟𑐵𑐮𑐶𑐩𑐫𑑂 𑐬𑐵𑐖𑐣𑐷𑐟𑐶𑐖𑑂𑐘, 𑐔𑐶𑐎𑐶𑐟𑑂𑐳𑐎, 𑐑𑐬𑐾𑐮𑐸 𑐟𑐠𑐵 𑐳𑐵𑐣𑐵 𑐄𑐡𑑂𑐫𑑀𑐐𑐷, 𑐂𑐣𑑂𑐖𑐶𑐣𑐶𑐫𑐬𑐶𑐒𑐫𑐵 𑐰𑐶𑐡𑑂𑐫𑐵𑐬𑑂𑐠𑐷𑐣𑐶𑐳𑐾𑑄 𑐐𑐺𑐴𑐶𑐞𑐷, 𑐩𑐳𑑂𑐟𑐫𑑂 𑐳𑐴𑐨𑐵𑐐𑐶𑐟𑐵 𑐡𑐸𑐐𑐸 𑐏𑑅 𑑋