𑐊𑐳𑐃𑐃𑑅 𑐕𑐸 𑐐𑑂𑐬𑐾𑐜 𑐴𑑅𑐥𑐶𑐣𑑂𑐳𑑄 𑐕𑐸 𑐰𑐶𑐲𑐫 𑐧𑑂𑐰𑐣𑐾𑐏𑐣𑐷 !

𑐣𑐾𑐰𑐵: 𑐀𑐣𑐮𑐵𑐂𑐣 𑐣𑑂𑐫𑐸𑐖 | 𑑒𑑐𑑗𑑖 𑐁𑐲𑐵𑐝 𑑑𑑓, 𑐱𑐸𑐎𑑂𑐬𑐧𑐵𑐬 𑑑𑑕:𑑕𑑗:𑑑𑑔

𑐩𑐵𑐢𑑂𑐫𑐩𑐶𑐎 𑐱𑐶𑐎𑑂𑐲𑐵 𑐥𑐬𑐷𑐎𑑂𑐲𑐵(𑐊𑐳𑐃𑐃) 𑐳 𑐳𑐴𑐨𑐵𑐐𑐷 𑐰𑐶𑐡𑑂𑐫𑐷𑐬𑑂𑐠𑐷𑐫𑐵 𑐩𑐵𑐬𑑂𑐎𑐳𑐶𑐚𑐫𑑂 𑐀𑐣𑐸𑐟𑑂𑐟𑐷𑐬𑑂𑐞 𑐔𑑂𑐰𑐂𑐩𑐏𑐸 𑑋 𑐟𑐬 𑐦𑐸𑐎𑑂𑐎 𑐰𑐶𑐡𑑂𑐫𑐵𑐬𑑂𑐠𑐷𑑄 𑐎𑐎𑑂𑐲𑐵 𑑑𑑑 𑐫𑑂 𑐨𑐬𑑂𑐣𑐵 𑐖𑐸𑐂 𑐢𑐵𑑅𑐳𑐵 𑐏𑐣𑐷𑐩𑐏𑐸 𑑋

𑐟𑐟𑑂𑐎𑐵𑐮𑐷𑐣 𑐄𑐔𑑂𑐔 𑐩𑐵𑐢𑑂𑐫𑐩𑐶𑐎 𑐱𑐶𑐎𑑂𑐲𑐵 𑐥𑐬𑐶𑐲𑐡𑑄 𑑒𑑐𑑗𑑓 𑐀𑐳𑐵𑐬 𑑑𑑕 𑐐𑐟𑐾 𑐰 𑐱𑐶𑐎𑑂𑐲𑐵 𑐩𑐣𑑂𑐟𑑂𑐬𑐵𑐮𑐫𑑄 𑑒𑑐𑑗𑑔 𑐀𑐳𑐵𑐬 𑑕 𑐐𑐟𑐾 𑐫𑐵𑑅𑐐𑐸 𑐣𑐶𑐬𑑂𑐞𑐫 𑐎𑐠𑑄 𑐣𑑂𑐫𑐹𑐣𑐟𑐩 𑐖𑐷𑐥𑐷𑐊 𑑑.𑑖 𑐣𑐶𑐬𑑂𑐬𑑂𑐢𑐵𑐬𑐞 𑐫𑐵𑑅𑐐𑐸 𑐡𑐸 𑑋

𑑑.𑑖 𑐳𑐶𑐧𑐾𑑄 𑐩𑑂𑐴𑑀 𑐖𑐷𑐥𑐷𑐊 𑐎𑐵𑑅𑐥𑐶𑐣𑑂𑐳𑑄 𑐢𑐵𑑅𑐳𑐵 𑐎𑐎𑑂𑐲𑐵 𑑑𑑑 𑐳 𑐨𑐬𑑂𑐣𑐵 𑐖𑐸𑐂 𑐏𑐣𑐷𑐩𑐏𑐸 𑑋

𑐠𑐸𑐐𑐸 𑐡𑑃 𑑕𑑖 𑐴𑐖𑐵𑐬 𑑗 𑐳𑐫 𑑓𑑙 𑐩𑑂𑐴𑐾𑐳𑑂𑐫𑐵𑑄 𑑑.𑑖 𑐳𑐶𑐧𑐾𑑄 𑐩𑑂𑐴𑑀 𑐖𑐷𑐥𑐷𑐊 𑐎𑐵𑑅𑐐𑐸 𑐡𑐸 𑑋 𑐂𑐩𑐶𑐳𑑄 𑐎𑐎𑑂𑐲𑐵 𑑑𑑑 𑐫𑑂 𑐨𑐬𑑂𑐣𑐵 𑐖𑐸𑐂 𑐏𑐣𑐷𑐩𑐏𑐸 𑑋

𑐀𑐠𑐾𑐴𑐾, 𑐳𑐩𑑂𑐧𑐣𑑂𑐢𑐶𑐟 𑐰𑐶𑐲𑐫𑐳 𑐣𑑂𑐫𑐹𑐣𑐟𑐩 ‘𑐜𑐷 𑐥𑑂𑐮𑐳’ 𑐰𑐵 ‘𑐳𑐷 𑐥𑑂𑐮𑐳’ 𑐩𑐴𑑅𑐥𑐶𑐣𑑂𑐳𑑄 𑐣𑑄 𑐎𑐎𑑂𑐲𑐵 𑑑𑑑 𑐫𑑂 𑐨𑐬𑑂𑐣𑐵 𑐖𑐸𑐂 𑐏𑐣𑐷𑐩𑐏𑐸 𑑋

𑐥𑑂𑐬𑐵𑐰𑐶𑐢𑐶𑐎 𑐰𑐶𑐲𑐫𑐥𑐵𑐏𑐾 𑐢𑐵𑑅𑐳𑐵 𑐰𑐶𑐲𑐫𑐐𑐟 𑐣𑑂𑐫𑐹𑐣𑐟𑐩 𑐐𑑂𑐬𑐾𑐜 𑐎𑑂𑐰𑑅𑐕𑐶𑐣𑐵𑐟𑑅𑐐𑐸 𑐩𑐡𑐸 𑑋 𑐨𑑁𑐟𑐶𑐎𑐱𑐵𑐳𑑂𑐟𑑂𑐬, 𑐬𑐳𑐵𑐫𑐣𑐱𑐵𑐳𑑂𑐟𑑂𑐬, 𑐖𑐷𑐰𑐱𑐵𑐳𑑂𑐟𑑂𑐬, 𑐐𑐞𑐶𑐟, 𑐎𑐩𑑂𑐥𑑂𑐫𑐸𑐚𑐬 𑐳𑐵𑐂𑐣𑑂𑐳 𑐰 𑐎𑐺𑐲𑐶 𑐧𑑂𑐰𑐣𑐾𑐟 𑐢𑐵𑑅𑐳𑐵 𑐣𑑂𑐫𑐹𑐣𑐟𑐩 𑐖𑐷𑐥𑐷𑐊 𑑒.𑑐𑑐 𑐣𑐶𑐬𑑂𑐢𑐵𑐬𑐞 𑐫𑐵𑐣𑐵𑐟𑑅𑐐𑐸 𑐡𑐸 𑑋 𑐰𑐮𑐶𑐳𑐾𑑄 𑐰𑐶𑐖𑑂𑐘𑐵𑐣 𑐰 𑐐𑐞𑐶𑐟𑐫𑑂 𑐣𑑂𑐫𑐹𑐣𑐟𑐩 ‘𑐳𑐷 𑐥𑑂𑐮𑐳’ 𑐴𑐫𑐾𑐩𑐵𑑅 𑑋

𑐀𑐢𑐶𑐎𑐵𑑄𑐱 𑐰𑐶𑐲𑐫 𑐧𑑂𑐰𑐣𑐾𑐟 𑐀𑑄𑐐𑑂𑐬𑐾𑐖𑐷 𑐰 𑐳𑐵𑐩𑐵𑐖𑐶𑐎 𑐱𑐶𑐎𑑂𑐲𑐫𑑂 𑐣𑑂𑐫𑐹𑐣𑐟𑐩 ‘𑐜𑐷 𑐥𑑂𑐮𑐳’ 𑐎𑐵𑑅𑐐𑐸 𑐖𑐸𑐂 𑐴𑐾 𑐩𑐵𑑅 𑑋

𑐊𑐳𑐃𑐃 𑑒𑑐𑑗𑑕 𑐳 𑑑𑑗 𑐴𑐖𑐵𑐬 𑑕𑑘𑑐 𑐩𑑂𑐴𑐾𑐳𑑂𑐫𑐵𑑄 𑑓.𑑖 𑐣𑐶𑐳𑐾𑑄 𑑔.𑑐𑑐, 𑑕𑑑 𑐴𑐖𑐵𑐬 𑑑 𑐳𑐫 𑑓𑑗 𑐩𑑂𑐴𑐾𑐳𑑂𑐫𑐵𑑄 𑑓.𑑐 𑐣𑐶𑐳𑐾𑑄 𑑓.𑑖, 𑑖𑑓 𑐴𑐖𑐵𑐬 𑑗 𑐳𑐫 𑑔𑑑 𑐩𑑂𑐴𑐾𑐳𑑂𑐫𑐵𑑄 𑑒.𑑘 𑐣𑐶𑐳𑐾𑑄 𑑓.𑑒 𑐟𑐎 𑐖𑐷𑐥𑐷𑐊 𑐴𑑅𑐐𑐸 𑐡𑐸 𑑋

𑐀𑐠𑐾𑐴𑐾, 𑑒.𑑐𑑐 𑐣𑐶𑐳𑐾𑑄 𑑒.𑑔 𑐴𑑅𑐥𑐶𑑄 𑑙𑑘 𑐴𑐖𑐵𑐬 𑑒𑑐𑑗 𑐩𑑂𑐴, 𑑑.𑑖 𑐣𑐶𑐳𑐾𑑄 𑑒.𑑐 𑐴𑑅𑐥𑐶𑑄 𑑙𑑕 𑐴𑐖𑐵𑐬 𑑓𑑐𑑗 𑐩𑑂𑐴, 𑑑.𑑒 𑐣𑐶𑐳𑐾𑑄 𑑑.𑑖 𑐴𑑅𑐥𑐶𑑄 𑑔𑑓 𑐴𑐖𑐵𑐬 𑑘𑑔𑑑 𑐩𑑂𑐴 𑐰𑐶𑐡𑑂𑐫𑐵𑐬𑑂𑐠𑐷 𑐡𑐸 𑑋

𑐬𑐵𑐲𑑂𑐚𑑂𑐬𑐶𑐫 𑐥𑐬𑐷𑐎𑑂𑐲𑐵 𑐧𑑀𑐬𑑂𑐜𑐫𑐵 𑐎𑐠𑑄 𑐣𑐶𑐫𑐩𑐶𑐟𑐥𑐵𑐏𑐾 𑐳𑐿𑐡𑑂𑐢𑐵𑐣𑑂𑐟𑐶𑐎 𑐰𑐶𑐲𑐫𑐫𑐵 𑐀𑐥𑑂𑐰𑐮𑐫𑑂 𑐣𑐶𑐐𑐹 𑐰𑐶𑐲𑐫𑐟𑐎 ‘𑐳𑐷’ 𑐰𑐵 ‘𑐳𑐷’𑐳𑐶𑐧𑐾𑑄 𑐎𑑂𑐰𑐫𑑂 𑐐𑑂𑐬𑐾𑐜 𑐥𑑂𑐬𑐵𑐥𑑂𑐟 𑐫𑐵𑑅𑐐𑐸 𑐰𑐵 𑐣𑐶𑐐𑐹 𑐰𑐶𑐲𑐫𑐟𑐎 𑐀𑐣𑐸𑐥𑐳𑑂𑐠𑐶𑐟 𑐖𑐹𑐳𑐵 𑐥𑐬𑐷𑐎𑑂𑐲𑐵𑐬𑑂𑐠𑐷𑐥𑐶𑐣𑑂𑐳𑑄 𑐐𑑂𑐬𑐾𑐜 𑐧𑐺𑐡𑑂𑐢𑐶𑐫𑐵 𑐣𑐶𑐟𑐶𑑄 𑐥𑐹𑐬𑐎 𑐐𑐾𑑂𑐬𑐜 𑐰𑐺𑐡𑑂𑐢𑐶 𑐥𑐬𑐷𑐎𑑂𑐲𑐵 𑐧𑐶𑐂𑐏𑐣𑐷 𑑋