𑐗𑐷𑐐𑐸 𑐣𑑄 𑐳𑐵𑐴𑐶𑐟𑑂𑐫 𑐦𑐾𑐳𑑂𑐚𑐶𑐨𑐮 !

𑐬𑐵𑐖𑐾𑐣 𑐩𑐵𑐣𑐣𑑂𑐢𑐬
𑐫𑐵𑐎𑑅𑐔𑐵 𑐖𑐶 𑑋 𑐩𑑀𑐧𑐵𑐂𑐮 𑐣𑑄 𑐕𑐾𑑃𑐫𑑂 𑐟𑑂𑐰𑑅𑐦𑐶𑐟 𑑋 𑐰𑐣𑐵𑐔𑑂𑐰𑐣𑐵 𑑋 𑐰𑐣𑐵𑐔𑑂𑐰𑐣𑐵, 𑐰𑐣𑐵𑐔𑑂𑐰𑐣𑐵 𑑋 𑐰𑐣𑐵𑐔𑑂𑐰𑐣𑐎𑐶 𑐮𑐵 𑐠𑑂𑐫𑐣𑐷𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐖𑐶 𑐣𑑄 𑐠𑑂𑐫𑐣 𑐀𑐣, 𑐐𑐣 𑐠𑑂𑐫𑑄𑐐𑐸 𑐢𑐵𑑅𑐳𑐵 𑐖𑐶𑑄 𑐩𑐳𑐶𑐄 𑑋 𑐡𑐎𑑂𑐰𑑄 𑐩𑐸𑐳𑐸𑐩𑐸𑐳𑐸 𑐎𑐵𑑅 𑑋 𑐏𑑂𑐰𑐵𑐮𑐫𑑂 𑐴𑑂𑐫𑐵𑐄𑑃𑐐𑐸 𑐀𑐧𑐶𑐬, 𑐐𑑅𑐥𑐟𑐫𑑂 𑐴𑑂𑐫𑐵𑐄𑑃𑐐𑐸 𑐎𑑂𑐰𑐏𑐵 𑑋 𑐣𑑂𑐴𑐵𑐫𑑂𑐥𑐣𑐫𑑂 𑐎𑐵𑐎𑐵𑐟𑑅𑐐𑐸 𑐳𑑂𑐰𑐵𑑄 𑐣𑑄 𑐠𑐸𑐎𑐸𑐠𑐸𑐎𑐸 𑐳𑑄 𑑋 𑐳𑐬𑑂𑐐𑑅 𑐔𑐎𑑂𑐎𑑄, 𑐩𑑂𑐴𑐶𑐐𑑅 𑐰𑐵 𑐰𑐫𑐵𑑅 𑐠𑑁𑑄 𑐣𑑂𑐴𑐶𑐮𑐵 𑐏𑑂𑐰𑐵𑑅 𑐰𑑅 𑐰𑐫𑐵 𑑋 𑐔𑐵𑐥𑐵𑑅𑐔𑐶𑐥𑐵𑑅 𑐳𑐸𑐥𑐵𑐫𑑂 𑐣𑑄 𑐄𑐏𑐾𑑄 𑐠𑐸𑐏𑐾𑑄 𑐴𑑂𑐰𑐮𑐵𑐟𑑅𑐐𑐸 𑐮𑐵 𑐡𑐸 𑐟𑐬 𑐣𑑄 𑐕𑐸𑑄 𑐫𑐵𑐣𑐵𑐣𑐂𑐠𑐾𑑄 𑐏𑑂𑐰𑐵𑑅 𑐩𑐰𑑅 𑑋
𑐧𑐸𑐬𑐵𑐥𑐶𑑄, 𑐧𑐸𑐬𑐶𑐥𑐶𑑄, 𑐮𑑂𑐫𑐵𑐫𑑂𑐩𑑂𑐴𑐥𑐶𑑄, 𑐮𑑂𑐫𑐵𑐳𑐾𑐥𑐶𑑄 𑐄𑐏𑐾𑑄 𑐠𑐸𑐏𑐾, 𑐠𑐸𑐏𑐾𑑄 𑐄𑐏𑐾 𑑋 𑐮𑐶𑐩𑐮𑐵𑑅 𑐳𑐵𑐥 𑑋 𑐮𑐶𑐮𑐵𑐂𑐐𑐸 𑐣𑑄 𑐐𑐣𑑄, 𑐨𑑂𑐰𑐫𑑂 𑐣𑑂𑐫𑐵𑑅 𑐂𑐩𑐶 𑑋 𑐩𑐳𑑂𑐟 𑐣𑑄 𑐮𑐶𑐟𑑂𑐟𑐸 𑐮𑐶𑐣𑐵 𑐩𑑂𑐴𑐶𑐟𑐵𑐔𑑂𑐰𑐣 𑑋 𑐟𑑂𑐫𑐮 𑐎𑐵𑐳𑐵 𑑋 𑐐𑐣𑑄 𑐢𑐶𑐩𑐫𑑂 𑐠𑐵𑑅 𑐟𑐵𑐫𑐾𑐡𑐸, 𑐐𑐣𑑄 𑐢𑐵𑑅, 𑐐𑐣𑑄 𑐏𑐶𑑄, 𑐐𑐣𑑄 𑐥𑐕𑐶𑐩𑐵, 𑐀𑐮𑐾 𑐐𑐣𑑄 𑐑𑐶𑐣𑑂𑐟𑐵𑑄𑐩𑐣𑐶 𑑋 𑐡𑐎𑑂𑐰𑐳𑑂𑐫𑐵 𑐏𑑂𑐰𑐵𑐮𑐫𑑂 𑐕𑐐𑐹 𑐄𑐟𑑂𑐳𑐵𑐴, 𑐄𑐩𑑄𑐐 𑑋 𑐡𑐾𑐫𑑂 𑐴𑐾 𑐟𑑂𑐫𑐵𑐎𑐵𑐎𑐵𑐫𑐾𑐟𑑂𑐫𑑄𑐠𑐾𑑄 𑑋 𑐩𑐖𑐸𑐂𑐐𑐸 𑐣𑑄 𑐐𑐣𑑄 𑑋 𑐄𑐩𑐶 𑐠𑑁𑑄 𑐰𑐶𑐱𑐾𑐲 𑐡𑐶𑑄 𑑋 𑐏𑐮𑐵 𑐄𑐥𑐶𑑄 𑐩𑐣𑐹𑐟 𑐴𑐾 𑐀𑐖𑑂𑐫𑐵𑑅𑐥𑐶𑑄, 𑐴𑐬𑐾𑐎 𑐡𑐶𑑄𑐫𑐵𑐟 𑐣𑑄 𑐰𑐶𑐱𑐾𑐲 𑐡𑐶𑑄 𑐡𑐫𑐾𑐎𑐾 𑐳𑑅𑐥𑐶𑑄 𑑋 𑐄𑐎𑐶𑐳𑑄 𑐠𑑁𑑄 𑐮𑐵 𑐢𑐵𑐠𑐾𑑄 𑐰𑐶𑐱𑐾𑐲 𑐡𑐶𑑄 — 𑐠𑑁𑑄 𑐄𑐩𑐶 𑐖𑐵𑐟𑑂𑐬𑐵 𑑋 𑐩𑐾𑐩𑐾𑐐𑐸 𑐠𑐖𑑂𑐫𑐵𑑅𑐐𑐸 𑐡𑑂𑐫𑑅𑐏𑑅 𑐔𑐵𑑅𑐴𑐶𑐂𑐎𑐾𑐐𑐸 𑐖𑐵𑐟𑑂𑐬𑐵 𑐩𑐏𑐸 𑑋 𑐠𑑂𑐰 𑐮𑐵 𑐦𑐾𑐳𑑂𑐚𑐶𑐨𑐮, 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐦𑐾𑐳𑑂𑐚𑐶𑐨𑐮 𑑋
𑐀𑐥𑐵𑐫𑑂𑐩𑐕𑐶 𑐢𑑄𑐐𑐸 𑐩𑑄𑐎𑐵𑑅 𑐕𑐾𑑃 𑑋 𑐠𑑂𑐰 𑐄𑐩𑐶𑐐𑐸 𑐠𑑅𑐠𑐩𑑂𑐴𑑄 𑐢𑑂𑐫𑐧𑐵 𑐮𑑂𑐴𑐵𑐣𑐵𑑅 𑐡𑐫𑐾𑐎𑐹𑐐𑐸 𑐴𑑃 𑑋 𑐴𑐵𑐣𑑄 𑐄𑐏𑐾 𑐣𑐾𑐥𑐵𑐮𑐨𑐵𑐲𑐵𑐫𑐵 𑐕𑐐𑐹 𑐳𑐦𑐹𑐢𑐸𑐎𑐹 𑐡𑐫𑐾𑐎𑐵 𑐴𑐾 𑐔𑑂𑐰𑐣𑐟𑐶𑐣𑐶 𑑋 𑐄𑐩𑐶 𑐣𑑂𑐴𑐵𑐥𑐵𑑄 𑐣𑐶𑐳𑐾𑑄 𑐄𑐡𑑂𑐫𑑀𑐐, 𑐰𑑂𑐫𑐵𑐥𑐵𑐬 𑐟𑐳𑐎𑑄 𑐔𑑂𑐰𑐖𑐵𑑅 𑑋 𑐢𑑂𑐫𑐧𑐵 𑐮𑐵 𑐮𑐣𑐵𑑅 𑐎𑐵𑐮𑐧𑐶𑐮 𑐫𑐵𑐂𑐥𑐶𑑄 𑐴𑑃 𑑋 𑐄𑐎𑐶𑑄 𑐮𑐵 𑐡𑐫𑐾𑐎𑐦𑐟 𑐣𑐶 𑐄𑐩𑐶𑐳𑑄 𑑋 𑐩𑐾𑐥𑐶𑐣𑑂𑐳𑑄 𑐦𑐸 𑐮𑐵? 𑐰𑐵𑐄𑑃𑐐𑐸 𑐑𑐵𑑃𑐫𑑂 𑐮𑐵 𑐮𑐵𑐳𑐵 𑐮𑐵𑐣𑐵𑐟𑑅𑐐𑐸, 𑐩𑐶𑐏𑐵𑑄 𑐴𑐾 𑐣𑑂𑐴𑑂𑐫𑐵𑐫𑐾𑐩𑐡𑐫𑐾𑐎 𑑋 𑐠𑐵𑐫𑑂𑐠𑐵𑐳𑐫𑑂 𑐳𑐵𑐮𑐶𑐎 𑐢𑑄𑐎𑐵𑐟𑐮 𑐖𑐸𑐖𑐸 𑐩𑐴𑐶𑐣𑑂𑐡𑑂𑐬 𑐩𑐮𑑂𑐮𑐣𑐶𑐳𑐾𑑄 𑐳𑐶𑐡𑑂𑐢𑐶𑐡𑐵𑐳, 𑐫𑑀𑐐𑐰𑐶𑐬, 𑐖𑐐𑐟𑐳𑐸𑐣𑑂𑐡𑐬, 𑐢𑐬𑑂𑐩𑐵𑐡𑐶𑐟𑑂𑐫, 𑐔𑐶𑐟𑑂𑐟𑐢𑐬 𑐀𑐮𑐾 𑐩𑐾𑐥𑐶𑑄 𑐡𑐬𑑂𑐖𑐣𑑁𑑄 𑑋 𑐡𑐸𑐥𑐶𑐣𑐶𑐐𑐸 𑐣𑑄 𑐳𑐵𑐮𑐶𑐎 𑐡𑐸 𑐩𑐡𑐸𑐥𑐶𑐣𑐶𑐐𑐸 𑐣𑑄 𑐳𑐵𑐮𑐶𑐎 𑐡𑐸 𑑋 𑐔𑑂𑐰𑐖𑐵𑐟𑐫𑐵 𑐣𑑄 𑐳𑐵𑐮𑐶𑐎 𑐡𑐸, 𑐎𑑂𑐰𑐖𑐵𑐟𑐫𑐵 𑐣𑑄 𑐳𑐵𑐮𑐶𑐎 𑐡𑐸 𑑋 𑐳𑐵𑐮𑐶𑐎𑐫𑐵 𑐎𑑂𑐰𑐫𑑂 𑐴𑑂𑐫𑐵𑐄𑑃 𑐀𑐧𑐶𑐬 𑐰 𑐕𑐦𑐵𑐳𑑅 𑐣𑐶𑐦𑐵𑐳𑑅 𑐳𑑂𑐰𑐵𑑄 𑐕𑐵𑐣𑐵𑐟𑑅𑐐𑐸 𑑋 𑐄𑐥𑐶𑑄 𑐡𑐎𑑂𑐰𑐳𑐶𑐫𑐵 𑐀𑐣 𑐄𑐮𑐶 𑐴𑐾 𑐴𑐎 𑐡𑐸, 𑐡𑐎𑑂𑐰𑑄 𑐄𑐟𑐶𑐐𑑂𑐫𑑄 𑑋 𑐕𑐵𑐫𑑂 𑐢𑐵𑑅𑐳𑐵 𑐄𑐥𑐶𑑄 𑐡𑐎𑑂𑐰 𑐠𑑅𑐠𑑅 𑐩𑐵𑑄𑐨𑐵𑐫𑑂𑐫𑐵 𑐳𑐾𑐰𑐵 𑐫𑐵𑐂𑐥𑐶𑑄, 𑐳𑐵𑐴𑐶𑐟𑑂𑐫𑐎𑐵𑐬𑐥𑐶𑑄, 𑐁𑐏𑑅𑐫𑐵 𑐩𑐣𑐹𑐟 𑑋
𑐩𑐣𑐹𑐟 𑐩𑑀𑐚𑐬, 𑐩𑑀𑐚𑐬𑐳𑐵𑐂𑐎𑐮 𑐥𑐵𑐬𑑂𑐎𑐫𑐵𑐣𑐵𑑅 𑐠𑐸𑐏𑐾𑐥𑐵𑐏𑐾 𑐰𑐫𑐵𑐔𑑂𑐰𑐣 𑑋 𑐟𑐶𑐳𑐵 𑐰𑐳𑑅 𑐔𑐎𑐩𑐎 𑐢𑐵𑑅 𑑋 𑐖𑐶𑐟𑑅 𑐮𑐵 𑐩𑐕𑐵𑐳𑐾 𑐢𑐎𑐵𑑅 𑐔𑑂𑐰𑐣 𑑋 𑐡𑐎𑑂𑐰 𑐖𑐶𑐠𑐵𑐫𑑂 𑐴𑐾 𑐰𑐫𑐵𑐔𑑂𑐰𑑄𑐐𑐸 𑐠𑐾𑑄𑐔𑑂𑐰𑑄 𑑋 𑐡𑐎𑑂𑐰𑐳𑑂𑐫𑐵𑑄 𑐖𑐶𑐟𑑅 𑐴𑐾 𑐳𑑂𑐰𑐫𑐵𑐔𑑂𑐰𑑄𑐐𑐸𑐠𑐾𑑄 𑐔𑑂𑐰𑑄 𑑋 𑐀𑐖𑑂𑐫𑐵𑑅𑐐𑐸 𑐨𑐶𑑄𑐐𑐸 𑐧𑐵𑑄𑐮𑐵𑑅𑐐𑐸 𑐠𑐵𑐳𑐫𑑂 𑐰𑐫𑐾𑐟 𑐖𑐶𑑄 𑐰𑐳𑑅 𑐕𑐖𑐸 𑐢𑐎𑐵𑑅 𑐴𑐾 𑐐𑐟𑐶𑐮𑐵𑑅𑐐𑐸 𑐥𑐸𑐣𑐵 𑐩𑐰𑐫𑐵 𑑋 𑐮𑑄 𑐴𑐸𑐮𑐶𑐴𑐸𑐮𑐶 𑐔𑐸𑐮𑐶𑐔𑐸𑐮𑐶 𑑋 𑐮𑐵𑐎𑐵𑑄 𑐥𑐵𑐟𑐵𑐥𑐵𑐟𑐵 𑑋 𑐥𑐶𑐴𑐵𑑃 𑐰𑐫𑐾𑐟 𑐣𑑂𑐴𑐵𑐫𑑂𑐎𑑄 𑐕𑐎𑑅 𑐖𑐎𑑄 𑐳𑑂𑐰𑐫𑐾 𑐰𑐫𑐾 𑐮𑑂𑐰𑑅𑐩𑐣 𑐢𑐫𑐵𑑄 𑑋 𑐳𑑃 𑐣𑑄 𑐨𑐸𑐂𑐨𑐵𑐂 𑐢𑐵𑑅𑐖𑐸𑐂 𑑋 𑐠𑐠𑐾 𑐨𑑂𑐰𑐫𑑂 𑐠𑐾𑑄 𑐖𑐸𑐂 𑐢𑐎𑐵𑑅 𑐳𑐶𑐄𑐳𑐵 𑐮𑐵 𑐖𑐶 𑐣𑑄 𑐦𑐶𑐣𑐵 𑐰𑐫𑐾𑐐𑐸 𑐣𑐶 𑑋 𑐖𑐶𑐟𑑅 𑐖𑐶 𑐴𑐾 𑐐𑐣𑑄 𑐫𑑄𑐎𑐵𑑅 𑐳𑐸𑐔𑐸𑐎𑐾𑐫𑑄𑐎𑐾 𑐠𑐾𑑄 𑐖𑐸𑐮 𑑋 𑐢𑐵𑐠𑐾𑑄 𑐗𑐷𑐐𑐸 𑐳𑐵𑐴𑐶𑐟𑑂𑐫𑐫𑐵 𑐏𑑂𑐫𑑅 𑐣𑑄 𑐠𑐠𑐾 𑐳𑑂𑐰𑐫𑐾𑐖𑐶𑐂 𑐢𑐸𑑄𑐎𑐮 𑐏𑐣𑐷 𑑋 𑐖𑐶 𑐮𑐵 𑐴𑑀𑐳 𑐴𑐾 𑐩𑐡𑐸 𑑋
𑐗𑑂𑐰𑑅𑐮𑐶𑐎 𑐳𑐵𑐴𑐶𑐟𑑂𑐫𑐶𑐎 𑐳𑑄𑐳𑑂𑐠𑐵𑐟𑐫𑑂𑐐𑐸 𑐠𑑅𑐠𑑅𑐐𑐸 𑐳𑑂𑐚𑐮 𑐔𑐵𑐣𑐵𑐔𑑂𑐰𑐣 𑑋 𑐄𑐩𑐶𑐳𑑄 𑐡𑐕𑐶𑐫𑐵 𑐡𑐸𑐣𑐾 𑐫𑐵𑑅𑐐𑐸 𑐖𑑂𑐫𑐵𑐫𑐵 𑐧𑑂𑐰𑐖𑑂𑐫𑐵 𑐖𑐸𑐫𑐵𑐔𑑂𑐰𑐣 𑑋 𑐴𑐬𑐾𑐎 𑐳𑑄𑐳𑑂𑐠𑐵𑑄 𑐡𑐕𑐶𑐫𑐵 𑐡𑐸𑐣𑐾 𑐐𑑂𑐰𑑅𑐐𑐸 𑐳𑐦𑐹 𑐥𑐶𑐠𑐣, 𑐐𑑂𑐰𑑅𑐎𑑅 𑐳𑐵𑐴𑐶𑐟𑑂𑐫𑐶𑐎 𑐩𑐸𑑃𑐖𑑂𑐫𑐵 𑐫𑐵𑐟, 𑐐𑑂𑐰𑑅𑐩𑑂𑐴 𑐩𑐡𑐸𑐩𑑂𑐴 𑐩𑐦𑐸𑐩𑑂𑐴 𑐳𑐵𑐴𑐶𑐟𑑂𑐫𑐎𑐵𑐬𑐫𑐵𑐟 𑐐𑑂𑐰𑐴𑐵𑐮𑐶 𑐫𑐵𑐟, 𑐳𑐵𑐴𑐶𑐟𑑂𑐫𑐫𑐵 𑐰𑐬𑑂𑐟𑐩𑐵𑐣 𑐀𑐰𑐳𑑂𑐠𑐵𑐫𑐵𑐟 𑐎𑐫𑐵𑑅 𑐐𑑂𑐰𑑅𑐎𑑅 𑐳𑐮𑐴𑐮, 𑐀𑐣𑑂𑐟𑐬𑐎𑑂𑐬𑐶𑐫𑐵 𑐫𑐵𑐟 𑐢𑐎𑐵𑑅 𑐏𑑃 𑐖𑐸𑐫𑐵𑐔𑑂𑐰𑐣 𑑋 𑐠𑑅𑐐𑐸 𑐖𑑂𑐫𑐵𑐫𑐵𑐟 𑐱𑐧𑑂𑐡𑑄 𑐧𑑂𑐰𑐫𑐾 𑐩𑐕𑐶𑐣𑐵𑑅 𑐟𑐳𑐧𑐶𑐬, 𑐥𑐵𑐂𑐔𑐵𑐬𑑂𑐚 𑐟𑐫𑐵𑑅 𑐎𑑂𑐫𑐣𑐵𑐔𑑂𑐰𑐣 𑑋 𑐳𑐡𑐳𑑂𑐫 𑐖𑐸𑐂𑐥𑐶𑐣𑐶𑐐𑐸 𑐮𑐵𑐐𑐶 𑐰 𑐮𑑂𑐴𑐵𑐥𑑄 𑐧𑐶𑐂𑐥𑐶𑐣𑐶𑐐𑐸 𑐮𑐵𑐐𑐶 𑐀𑐮𑐐 𑐀𑐮𑐐 𑐬𑐳𑐶𑐡 𑐥𑑂𑐫𑐵𑐡 𑑋 𑐮𑑂𑐫𑐵𑐫𑑂𑐩𑑂𑐴 𑐮𑑂𑐫𑐵𑐳𑐾𑐥𑐶𑑄 𑐨𑑀𑐮𑐶𑐣𑑂𑐚𑐶𑐬𑐥𑐶𑐣𑑂𑐳𑑄 𑐬𑐎𑐶𑐡 𑐎𑐵𑐚𑐾𑐫𑐵𑐣𑐵𑐔𑑂𑐰𑐣 𑑋 𑐳𑐡𑐳𑑂𑐫 𑐖𑐹𑐰𑐥𑐶𑑄 𑐐𑑂𑐰𑐵𑑅 𑐐𑑂𑐰𑐵𑑅 𑑋 𑐳𑐸𑐫𑐵𑐟𑑄 𑐡𑐸𑐎𑐵𑐫𑐾𑐩𑐏𑐸 𑐢𑐂𑐐𑐸 𑐥𑑅𑐏𑐵𑑅 𑐐𑐸𑐐𑐸𑑄 𑐳𑐳𑑂𑐠𑐵𑐫𑑂 𑐣𑑄 𑐩𑐡𑐸, 𑐳𑐸𑐫𑐵𑑄 𑐠𑑂𑐰 𑐳𑑄𑐳𑑂𑐠𑐵𑐫𑑂 𑐰𑐣𑐾𑐩𑐏𑐸 𑐰 𑐳𑑄𑐳𑑂𑐠𑐵𑐫𑑂 𑐰𑐣𑐾𑐩𑐏𑐸 𑐢𑐂𑐐𑐸 𑐎𑐫𑑂𑐎𑐹𑑄𑐐𑐸 𑐨𑐵𑐰𑐣𑐵 𑐣𑑄 𑐏𑐣𑐾𑐩𑐡𑐸 𑑋
𑐴𑐬𑐾𑐎 𑐳𑐵𑐴𑐶𑐟𑑂𑐫𑐶𑐎 𑐳𑑄𑐳𑑂𑐠𑐵𑐟𑐫𑑂𑐐𑐸 𑐳𑑂𑐚𑐮𑐫𑑂 𑐖𑑂𑐫𑐵𑐳𑐣𑐵𑐥𑐸𑐔𑑅𑐫𑐵 𑐥𑐡𑐵𑐢𑐶𑐎𑐵𑐬𑐷𑐟 𑐏𑑃 𑐦𑐫𑐾𑐟 𑐔𑑂𑐰𑐣𑐵𑐔𑑂𑐰𑐣 𑑋 𑐰𑐫𑐵𑑄 𑐮𑐶𑐄𑐣𑐾 𑐄𑐎𑐶𑐫𑐵 𑐥𑐸𑐮𑐵𑑄𑐥𑐶𑑄 𑐀𑐢𑑂𑐫𑐎𑑂𑐲 𑐮𑐫𑐵𑐐𑐟𑐫𑐵 𑐳𑑄𑐳𑑂𑐠𑐵𑐥𑐎 𑐡𑐸𑐖𑑅𑐥𑐶𑑄 𑐣𑑂𑐴𑐵𑐫𑑂 𑐟𑐥𑐸𑐎𑐵𑑅 𑐦𑑂𑐫𑐟𑐸𑐣𑐵𑐔𑑂𑐰𑐣 𑑋 𑐄𑐐𑐸 𑐳𑑄𑐳𑑂𑐠𑐵𑐫𑐵 𑐡𑐸𑐖𑑅𑐥𑐶𑐣𑑂𑐳𑑄 𑐧𑐵𑑄𑐮𑐵𑑅𑐐𑐸𑐫𑐵𑐟 𑐟𑐵𑐬𑐶𑐦 𑐣𑑄 𑐫𑐵𑐣𑐵𑐔𑑂𑐰𑐣, 𑐧𑐵𑑄𑐩𑐵𑐮𑐵𑑅𑐐𑐸 𑐏𑑃𑐫𑐵𑐟 𑐣𑑂𑐴𑑂𑐫𑑅𑐣𑐾 𑐟𑐕𑐫𑐵𑐣𑐵𑑅 𑐁𑐮𑑀𑐔𑐣𑐵 𑐣𑑄 𑐫𑐵𑐣𑐵𑐔𑑂𑐰𑐣 𑑋 𑐥𑐡𑐵𑐢𑐶𑐎𑐵𑐬𑐷𑐟 𑐏𑑂𑐰𑐵𑑅 𑐴𑑂𑐫𑐵𑐄𑑃𑐳𑐵𑑄 𑐩𑐸𑐳𑐸𑐩𑐸𑐳𑐸 𑐣𑑂𑐴𑐶𑐮𑐵𑑅 𑐮𑐶𑐳𑑅 𑐧𑐶𑐫𑐵𑐔𑑂𑐰𑐣, 𑐠𑑅𑐐𑐸 𑐨𑐹𑐮 𑐖𑐹𑐠𑐵𑐫𑑂 𑐎𑑂𑐰𑐩𑐵𑐮𑐶 𑐖𑐸𑐫𑐵𑑅 𑐎𑑂𑐲𑐩𑐵 𑐣𑑄 𑐦𑑂𑐰𑐣𑐵𑐔𑑂𑐰𑐣 𑑋 𑐁𑐰𑑄𑐮𑐶 𑐀𑐠𑐾 𑐖𑐸𑐂𑐩𑐏𑐸𑐟 𑐢𑐎𑐵𑑅 𑐥𑐵𑑅 𑐣𑑄 𑐦𑐫𑐾𑐎𑐵𑐔𑑂𑐰𑐣 𑑋 𑐄𑐮𑐶 𑐢𑐵𑐫𑐾𑐢𑐸𑐣𑐾𑐰𑑄 𑐰 𑐮𑐵 𑐡𑑂𑐫𑑅 𑐢𑐎𑐵𑑅 𑐖𑐸𑐫𑐵𑐧𑐶𑐮 𑑋 𑐏𑑃 𑐟𑑅𑐰𑑅𑐥𑐶𑐣𑑂𑐟 𑐁𑑅 𑐕𑐶𑐎𑐥𑐶𑐣𑑂𑐳𑑄 𑐣𑐾𑐟𑐺𑐟𑑂𑐰 𑐎𑐵𑐫𑐾𑐩𑐵𑐮 𑐢𑐎𑐵𑑅 𑐂𑐣𑐵𑐥 𑐣𑑄 𑐫𑐵𑐣𑐵𑐔𑑂𑐰𑐣 𑑋
𑐳𑐵𑐴𑐶𑐟𑑂𑐫𑐶𑐎 𑐳𑑄𑐳𑑂𑐠𑐵𑐟𑐫𑑂 𑐡𑐠𑐸𑐂 𑐳𑐴𑐮𑐴 𑐖𑐸𑐫𑐵𑐔𑑂𑐰𑐣 𑑋 𑐕𑐐𑐹 𑐳𑑄𑐳𑑂𑐠𑐵𑐫𑐵𑐥𑐶𑑄 𑐩𑐣𑐹𑐟 𑐩𑐾𑐐𑐸 𑐳𑑄𑐳𑑂𑐠𑐵𑐫𑑂 𑐰𑐣𑐵𑑅 𑐣𑑄 𑐏𑑃 𑐮𑑂𑐴𑐵𑑅𑐰𑐣𑐵𑐔𑑂𑐰𑐣 𑑋 𑐀𑐖𑑂𑐫𑐵𑑅𑐐𑐸 𑐏𑑃 𑐮𑑂𑐴𑐵𑐫𑐾𑐟 𑐡𑐸𑐖𑑅𑐥𑐶𑑄 𑐩𑐾𑐐𑐸 𑐳𑑄𑐳𑑂𑐠𑐵𑐫𑑂 𑐩𑐣𑐔𑐎𑑄𑐎𑐵𑑅 𑐏𑑃 𑐣𑑂𑐫𑑄𑐰𑐣𑐵𑐔𑑂𑐰𑐣, 𑐀𑐣𑐸𑐨𑐰𑐫𑐵 𑐎𑐵𑐮𑐧𑐶𑐮 𑐖𑐸𑐫𑐵𑐔𑑂𑐰𑐣 𑑋 𑐕𑐐𑐹 𑐳𑑄𑐳𑑂𑐠𑐵𑐫𑐵 𑐖𑑂𑐫𑐵𑐳𑐣𑐵𑐥𑐸𑐔𑐮𑑄 𑐩𑐾𑐐𑐸 𑐳𑑄𑐳𑑂𑐠𑐵𑐫𑐵𑐟 𑐴𑑅𑐥𑐵𑑅 𑐧𑐶𑐫𑐵𑐔𑑂𑐰𑐣, 𑐩𑐳𑑅 𑐩𑐳𑐶𑐄𑐠𑐵𑐫𑑂 𑐳𑑂𑐫𑐣𑐾𑐎𑐣𑐾 𑐫𑐵𑐣𑐵𑐔𑑂𑐰𑐣 𑑋 𑐡𑐎𑑂𑐰𑑄 𑐕𑐥𑑃 𑐀𑐣, 𑐡𑐎𑑂𑐰𑑄 𑐕𑐢𑐷 𑐀𑐣 𑑋 𑐡𑐎𑑂𑐰𑑄 𑐣𑐾𑐰𑐵𑑅 𑐀𑐣 𑑋
𑐕𑐏𑐾 𑐡𑐧𑐸𑐮𑐶𑐂 𑐳𑐵𑐴𑐶𑐟𑑂𑐫 𑐧𑐵𑐔𑐣 𑐖𑐸𑐫𑐵𑐔𑑂𑐰𑐣 𑑋 𑐰𑐵 𑐰𑐂𑐐𑐸 𑐖𑐹𑐐𑐸𑐮𑐶𑑄 𑐥𑐵𑐮 𑐣𑑄 𑐟𑐫𑐵𑐟𑑅𑐐𑐸 𑐡𑐸 𑑋 𑐩𑐾𑐔 𑐣𑑄 𑐐𑐸𑐮𑐶 𑐴𑐶𑐳𑐶𑐔𑐵 𑐡𑐸, 𑐡𑐎𑑂𑐰𑑄 𑐕𑐟𑐵 𑐴𑐾 𑐬𑑄𑐐𑐫𑐵 𑑋 𑐮𑐶𑐄𑐣𑐾 𑐥𑑂𑐫𑐵𑐖𑐷 𑐬𑑄𑐐𑐫𑐵 𑐬𑐶𑐧𑐣 𑑋 𑐧𑑃𑐫𑑂𑐫𑐵 𑐏𑑂𑐰𑐵𑐄𑑃 𑐠𑐵𑐴𑐵𑑃 𑐰𑐂𑐢𑐎𑐵𑑅 𑐎𑐵𑐬𑑂𑐥𑐾𑐚 𑐣𑑂𑐴𑐵𑐥𑐵𑑄 𑐮𑐵𑐣𑐵𑐟𑑅𑐐𑐸 𑑋 𑐣𑑂𑐴𑐹𑐥𑐶𑑄 𑐥𑐸𑐮𑐵𑑄𑐥𑐶𑑄 𑐎𑐰𑐶𑐥𑐶𑐣𑑂𑐳𑑄 𑐎𑐰𑐶𑐟𑐵 𑐣𑑂𑐫𑑄𑐎𑐵𑐔𑑂𑐰𑐣 𑑋 𑐰𑐵𑐴 𑐰𑐵𑐴 𑐩𑐢𑐵𑐳𑐾 𑐱𑑂𑐬𑑀𑐟𑐵𑐟 𑐔𑑂𑐰𑐣𑐾 𑐴𑐾 𑐩𑐏𑐸 𑑋 𑐣𑑂𑐫𑐣𑐵𑐔𑑂𑐰𑑄𑐥𑐶𑑄 𑐣𑐶𑐳𑑅 𑐳𑑂𑐰𑐳𑑅 𑐡𑐂 𑑋 𑐔𑑂𑐰𑐣𑐾𑐠𑐵𑐫𑑂 𑐴𑐾 𑐩𑐡𑐸, 𑐎𑐵𑐟𑐹𑐎𑐵𑑅, 𑐑𑑂𑐰𑐵𑐟𑐹𑐑𑑂𑐰𑐵𑑅 𑑋 𑐡𑐎𑑂𑐰 𑐄𑐟𑐶𑐎𑑄 𑐄𑐟𑑂𑐳𑐸𑐎, 𑐖𑐸𑐬𑐸𑐎𑑂𑐎 𑐖𑐸𑐬𑐸𑐎𑑂𑐎 𑐠𑐣𑐵𑐴𑐂 𑑋
𑐀𑐖𑑂𑐫𑐵𑑅𑐠𑐵𑐫𑑂 𑐠𑐵𑐳𑐫𑑂 𑐩𑐾𑐐𑐸 𑐡𑐧𑐹 𑐐𑑂𑐰𑐫𑐵𑐟𑐮 𑑋 𑐩𑐘𑑂𑐔𑐫𑑂 𑐕𑐩𑑂𑐴𑐠𑐾 𑐕𑐩𑑂𑐴 𑐡𑐶𑐐𑑂𑐐𑐖𑐥𑐶𑑄 𑐳𑐵𑐴𑐶𑐟𑑂𑐫𑐎𑐵𑐬𑐥𑐶𑑄 𑐦𑑂𑐫𑐟𑐸𑐣𑐵𑐔𑑂𑐰𑐣 𑑋 𑐖𑑂𑐫𑐵𑐠𑐥𑐶𑑄, 𑐖𑐶𑐠𑐶𑐥𑐶𑑄, 𑐮𑑂𑐫𑐵𑐫𑑂𑐩𑑂𑐴𑐥𑐶𑑄 𑐮𑑂𑐫𑐵𑐳𑐾𑐥𑐶𑑄 𑑋 𑐐𑐸𑐮𑐶𑑄 𑐩𑐴𑐵𑐎𑐵𑐰𑑂𑐫 𑐔𑑂𑐰𑐂𑐥𑐶𑑄, 𑐐𑐸𑐮𑐶𑑄 𑐎𑐰𑐶𑐟𑐵 𑐴𑐾 𑐠𑑁𑑄𑐫𑐵 𑐩𑑂𑐴𑐳𑐶𑐎𑐵 𑐢𑐵𑐂𑐥𑐶𑑄, 𑐐𑐸𑐮𑐶𑑄 𑐄𑐥𑐣𑑂𑐫𑐵𑐳𑐎𑐵𑐬, 𑐐𑐸𑐮𑐶𑑄 𑐣𑐶𑐧𑐣𑑂𑐢𑐎𑐵𑐬, 𑐐𑐸𑐮𑐶𑑄 𑐀𑐣𑐸𑐳𑐣𑑂𑐢𑐵𑐣𑐎𑐬𑑂𑐟𑐵 𑑋 𑐡𑐎𑑂𑐰 𑐡𑐎𑑂𑐰 𑐔𑑂𑐰𑐂𑐥𑐶𑑄𑐫𑐵 𑐔𑑂𑐰𑐂𑐥𑐶𑑄 𑐖𑐎 𑑋
𑐄𑐩𑐶𑐳𑑄 𑐠𑑅𑐠𑑅𑐐𑐸 𑐳𑐵𑐴𑐶𑐟𑑂𑐫 𑐳𑐶𑐬𑑂𑐖𑐣𑐵 𑐫𑐵𑐣𑐵𑐫𑐵 𑐀𑐣𑐸𑐨𑐰 𑐂𑐣𑐵𑐔𑑂𑐰𑐣 𑑋 𑐐𑐸𑐮𑐶𑐳𑑂𑐫𑐵𑑄 𑐠𑑅 𑐳𑐸𑐥𑐵𑐏𑐾𑑄 𑐥𑑂𑐬𑐨𑐵𑐰𑐶𑐟 𑐖𑐸𑐫𑐵 𑐢𑐎𑐵𑑅 𑐰𑐶𑐡𑐾𑐱𑐷 𑐰 𑐣𑐾𑐥𑐵𑑅𑐫𑐵 𑐩𑐾𑐩𑐾𑐐𑐸 𑐨𑐵𑐫𑑂𑐫𑐵 𑐠𑑅𑐟 𑐫𑑅𑐥𑐶𑑄 𑐮𑐾𑐏𑐎𑐥𑐶𑐣𑐶𑐐𑐸 𑐣𑐵𑑄 𑐎𑐫𑐵𑐔𑑂𑐰𑐣 𑑋 𑐐𑐸𑐮𑐶𑐳𑑂𑐫𑐵𑑄 𑐥𑐱𑑂𑐔𑐶𑐩𑐷 𑐩𑐸𑐮𑐎𑐫𑑂 𑐁𑑅 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐢𑐵𑐬 𑐰 𑐧𑐵𑐡𑐥𑐵𑐏𑐾𑑄 𑐠𑑅 𑐐𑐠𑐾 𑐥𑑂𑐬𑐨𑐵𑐰𑐶𑐟 𑐖𑐸𑐮 𑐢𑐎𑐵𑑅 𑐎𑐣𑐵𑐔𑑂𑐰𑐣 𑑋 𑐐𑐸𑐮𑐶𑐳𑐶𑐟 𑐥𑑂𑐬𑐎𑐵𑐱𑐎𑑄 𑐫𑐵𑐎𑐣𑑄 𑐥𑐵𑐞𑑂𑐜𑐸𑐮𑐶𑐥𑐶 𑐩𑐵𑐮 𑐢𑐎𑐵𑑅 𑐟𑐵𑐎𑐾𑐟𑐵 𑐫𑐵𑑅 𑐰𑐫𑐵𑐔𑑂𑐰𑐣 𑐴𑑃 𑑋 𑐄𑐩𑐶𑐐𑐸 𑐐𑐸𑐮𑐶𑐏𑐾 𑐳𑐦𑐹 𑐮𑐵 𑐰𑐶𑐡𑐾𑐱𑐫𑑂 𑐣𑑄 𑐣𑐵𑑄 𑐖𑐵𑑅 𑐏𑐣𑐷 𑑋 𑐐𑐸𑐮𑐶𑐳𑐶𑐟 𑐰𑐶𑐡𑐾𑐱𑐷𑐟𑐫𑑂𑐳𑑄 𑐠𑑅𑐐𑐸 𑐨𑐵𑐳𑑄 𑐨𑐵𑐫𑑂 𑐴𑐶𑐮𑐾𑐟 𑐀𑐣𑐸𑐩𑐟𑐶 𑐎𑐵𑑅 𑐰𑐫𑐵𑐔𑑂𑐰𑐣 𑐴𑑃 𑑋 𑐄𑐩𑐶 𑐳𑐸𑐫𑐵𑑄 𑐥𑐸𑐮𑐵𑑄𑐐𑐸 𑐏𑑃 𑐮𑑂𑐴𑐵𑐫𑐾𑐐𑐸 𑐦𑐸𑐬𑑂𑐳𑐡 𑐩𑐡𑐸 𑑋 𑐧𑐵𑐖𑑂𑐫𑐵𑑄 𑐑𑑂𑐫𑑅𑐖𑐵 𑐣𑑅𑐐𑐸 𑐏𑑃 𑐎𑐣𑐾𑐟 𑐰𑑅𑐥𑐶𑑄 𑐳𑐸𑑄 𑐩𑐡𑐸 𑐀𑐣 𑑋 𑐳𑑂𑐰𑐷𑐡𑑃 𑐣𑑂𑐴𑑂𑐫𑑅 𑐔𑑂𑐰𑐫𑐵𑐐𑐸 𑐧𑐵𑐏𑑄𑐫𑐵 𑐧𑐵𑐏𑑄 𑐎𑐣𑐾𑐐𑐸 𑐩𑐣 𑐩𑐡𑐸 𑑋 𑐁𑐎𑐶𑐰𑑄 𑐕𑐸 𑐔𑑂𑐰𑐫𑐾𑐐𑐸, 𑐂𑐰𑑄 𑐐𑑂𑐰𑑅𑐐𑐸 𑐳𑐦𑐹 𑐥𑐶𑐎𑐵𑐫𑐾𑐐𑐸 𑐢𑐂𑐐𑐸 𑐫𑑀𑐖𑐣𑐵 𑐖𑐎 𑐄𑐩𑐶𑐐𑐸 𑐩𑐶𑐏𑐵 𑐣𑑂𑐴𑑂𑐫𑑅𑐣𑐾 𑐔𑐵𑑅𑐴𑐶𑐮𑐵𑐔𑑂𑐰𑑄𑐐𑐸 𑐡𑐸 𑑋
𑐰𑐶𑐨𑐶𑐣𑑂𑐣 𑐥𑐸𑐳𑑂𑐟𑐵𑐫𑐵𑐥𑐶𑑄 𑐔𑑂𑐰𑐩𑐶𑐥𑐶𑑄 𑐕𑐐𑐹 𑐴𑐾 𑐩𑐘𑑂𑐔𑐫𑑂 𑑋 𑐠𑑅𑐠𑑅𑐐𑐸 𑐔𑑂𑐰𑐫𑐾𑐐𑐸 𑐱𑐿𑐮𑐷, 𑐠𑑅𑐠𑑅 𑐧𑑂𑐰𑐩𑐶𑐥𑐶𑑄 𑑋 𑐥𑐸𑐮𑐵𑑄𑐥𑐶𑐣𑑂𑐳𑑄 𑐣𑑂𑐴𑐹𑐥𑐶𑐣𑑂𑐟 𑐠𑐠𑐾 𑐫𑐵𑐣𑐵𑑅 𑐔𑑂𑐰𑐫𑐾𑐩𑐵𑑅 𑐢𑐎𑐵𑑅 𑐳𑑂𑐫𑐣𑐵𑐔𑑂𑐰𑐣, 𑐴𑑁𑐳𑐮𑐵 𑐧𑐶𑐫𑐵𑐔𑑂𑐰𑐣 𑑋 𑐣𑑂𑐴𑐹𑐥𑐶𑐣𑑂𑐳𑑄 𑐣𑑄 𑐥𑐸𑐮𑐵𑑄𑐥𑐶𑐣𑐶𑐐𑐸 𑐧𑑂𑐰𑐣𑐾𑐡𑐫𑐵𑑅 𑐖𑐶𑐥𑐶𑑄 𑐟𑐳𑐎𑑄 𑐄𑐟𑑂𑐳𑐵𑐴𑐶𑐟 𑐖𑐸𑐫𑐵 𑐢𑐎𑐵𑑅 𑐎𑐣𑐵𑐔𑑂𑐰𑐣 𑑋 𑐥𑐸𑐮𑐵𑑄𑐥𑐶𑐣𑑂𑐳𑑄 𑐢𑐵𑐮, 𑐕𑐶𑐩𑐶𑐳𑑄 𑐮𑑂𑐴𑑂𑐰𑑄𑐐𑐸 𑐰𑐶𑐲𑐫 𑐮𑐵 𑐖𑐶𑐩𑐶𑐐𑐸 𑐮𑐵𑐐𑐶 𑐣𑑂𑐴𑐹𑐐𑐸 𑐴𑐾 𑐎𑐵 𑑋 𑐣𑑂𑐴𑐹𑐥𑐶𑐣𑑂𑐳𑑄 𑐟𑐣, 𑐕𑐶𑐎𑐶𑐥𑐶𑐣𑑂𑐳𑑄 𑐔𑑂𑐰𑐫𑐵𑐡𑐶𑐄𑐐𑐸 𑐧𑑂𑐰𑐣𑐵𑑅 𑐮𑐵 𑐖𑐶𑐩𑐶𑐐𑐸 𑐎𑐮𑐩 𑐣𑑂𑐴𑑂𑐫𑐵𑑅𑐐𑐸 𑐏𑑅 𑐣𑐶 𑑋 𑐕𑐏𑐵 𑐴𑐾 𑐕𑐾𑑃𑐫𑐵 𑐡𑐸𑐖𑑅𑐥𑐶𑑄 , 𑐕𑐾𑑃 𑐳𑐮𑑂𑐮𑐵𑐴, 𑐡𑐸𑐏𑐳𑐸𑐏𑐫𑐵 𑐏𑑃 𑑋
𑐳𑐖𑐴𑐎𑐬𑑂𑐟𑐵𑑄 𑐣𑑂𑐴𑑂𑐫𑐳𑑅 𑐟𑐫𑐵𑐔𑑂𑐰𑐣 𑑋 𑐣𑑂𑐴𑑂𑐫𑐥𑐸 𑐴𑐾 𑐦𑐣𑐦𑐣 𑐔𑐵𑑅𑐴𑐶𑐂𑐎𑐷𑐐𑐸 𑑋 𑐕𑐸𑐥𑐵𑐏𑐾𑑄 𑐕𑐶 𑐥𑑂𑐬𑐨𑐵𑐰𑐶𑐟 𑐖𑐸𑐫𑐵𑐡𑐶𑐫𑐵? 𑐕𑐶𑐐𑐸 𑐳𑐶𑐬𑑂𑐖𑐣𑐵 𑐳𑐩𑐵𑐖𑐫𑐵 𑐐𑐸𑐐𑐸 𑐰𑐬𑑂𑐐𑐫𑐵 𑐣𑐶𑑄𑐟𑐶𑑄 ? 𑐕𑐶 𑐮𑐵 𑐦𑐮𑐣𑐵 𑐬𑐵𑐖𑐣𑐷𑐟𑐶𑐎 𑐥𑐵𑐬𑑂𑐚𑐷𑐫𑐵 𑐎𑐵𑐬𑑂𑐫𑐎𑐬𑑂𑐟𑐵 𑐢𑐂𑐐𑐸 𑐏𑑃 𑐰𑐮 𑐣𑐶, 𑐕𑐶 𑐥𑐵𑐬𑑂𑐚𑐷𑐫𑐵 𑐩𑐣𑐹 𑐮𑐵𑐎𑐶 𑐖𑐣𑐟𑐵𑐫𑐵 𑐩𑐣𑐹 ? 𑐄𑐎𑐸𑐣𑑂𑐴𑐸 𑐟𑐶𑐣𑐶 𑐕𑐶𑑄 𑐳𑐸𑐫𑐵𑐐𑐸 𑐐𑐸𑐐𑐸 𑐳𑐦𑐹 𑐧𑑂𑐰𑐣𑐵𑐡𑐶𑐫𑐵? 𑐠𑐐𑐸𑐣𑐾 𑐮𑐵 𑐕𑐶𑑄 𑐕𑐐𑐹 𑐣𑑄 𑐳𑐦𑐹 𑐔𑑂𑐰𑐫𑐵𑐩𑐡𑐷, 𑐎𑐮𑐩 𑐟𑐣 𑐮𑐵𑐎𑐶 𑐕𑐸? 𑐕𑐶𑐐𑐸 𑐳𑐦𑐹 𑐮𑐵 𑐦𑐮𑐣𑐵 𑐨𑐵𑐫𑑂𑐫𑐵 𑐠𑐸𑐐𑐸 𑐳𑐦𑐹𑐫𑐵 𑐣𑐎𑑂𑐎𑐮 𑐖𑐎 𑐏𑑅 𑐢𑐂𑐐𑐸 𑐣𑑄 𑐏𑑃 𑐰𑐫𑐵𑐔𑑂𑐰𑐣, 𑐕𑐶𑑄 𑐮𑐵 𑐗𑐶𑐡𑑃 𑐣𑐶𑐳𑐾𑑄 𑐰 𑐴𑐾 𑐱𑐿𑐮𑐷 𑐥𑐵𑐕𑐵𑐫𑐵𑐔𑑂𑐰𑐣𑐵𑐡𑐶𑐮, 𑐕𑐸 𑐢𑐫𑐵𑐡𑐷 ?
𑐰 𑐴𑐾 𑐩𑐘𑑂𑐔𑐫𑑂 𑐕𑐩𑑂𑐴𑐠𑐾 𑐕𑐩𑑂𑐴 𑐳𑐩𑐵𑐮𑑀𑐔𑐎𑐥𑐶𑑄 𑐣𑑄 𑑋 𑐀𑐣 𑐡𑐸𑐥𑐶𑑄 𑐰 𑐩𑐡𑐸𑐥𑐶𑑄 𑐴𑐬𑐾𑐎 𑐔𑑂𑐰𑐩𑐶𑐫𑐵 𑐴𑐬𑐾𑐎 𑐳𑐦𑐹𑐫𑐵 𑐔𑐶𑐬𑐦𑐵𑐬 𑐫𑐵𑐣𑐵𑑅 𑐎𑑂𑐫𑐣𑐵𑐧𑐶𑐫𑐵𑐔𑑂𑐰𑐣 𑑋 𑐠𑐸𑐎𑐷 𑐠𑑂𑐰 𑐐𑐵𑑅 𑐠𑑂𑐰 𑐩𑐐𑐵𑑅, 𑐣𑑂𑐴𑐵𑐥𑐵𑐫𑐵𑐐𑐸 𑐠𑑂𑐰𑐫𑐵𑐐𑐸 𑐳𑐦𑐹 𑐳𑑂𑐰𑐫𑐵𑑅 𑐠𑑂𑐰𑐥𑐵𑐮𑐫𑑂𑐫𑐵 𑐳𑐦𑐹 𑐧𑐵𑑄𑐮𑐵𑑅 𑐰𑐵 𑐧𑐵𑑄𑐩𑐮𑐵𑑅 𑑋 𑐠𑑂𑐰 𑐮𑐾𑐏𑐎𑑄 𑐄𑐐𑐸 𑐡𑐾𑐫𑑂𑐫𑐵 𑐢𑐵𑐬𑐮𑐶𑐳𑐾 𑐠𑑅𑐟 𑐳𑐟𑐶𑐎𑐵𑐔𑑂𑐰𑑄𑐐𑐸 𑐏𑐣𑐾𑐡𑐸, 𑐰 𑐮𑐾𑐏𑐎 𑐮𑐵 𑐁𑑅 𑐧𑐸𑐮𑐸𑐳𑐾𑐔𑑂𑐰𑐣𑐵 𑐰𑐣 𑑋
𑐣𑑂𑐫𑐣𑐵𑐔𑑂𑐰𑑄𑐥𑐶𑑄 𑐡𑐬𑑂𑐱𑐎 𑐣𑑄 𑐎𑐩 𑐩𑐖𑐹 𑑋 𑐕𑐩𑑂𑐴𑐠𑐾 𑐕𑐩𑑂𑐴 𑐡𑐎𑑂𑐰 𑐠𑑅 𑐫𑑅𑐫𑑅𑐥𑐶𑑄 𑐮𑐾𑐏𑐎𑐥𑐶𑐣𑑂𑐟 𑐣𑑂𑐴𑑂𑐫𑐳𑑅 𑐟𑐫𑐵𑐔𑑂𑐰𑐣, 𑐄𑐩𑐶𑐐𑐸 𑐎𑐩𑐖𑑀𑐬𑐷, 𑐐𑐮𑑂𑐟𑐷 𑐄𑐮𑐵𑑅 𑐎𑑂𑐫𑐣𑐵𑐧𑐶𑐫𑐵𑐔𑑂𑐰𑐣 𑑋 𑐴𑐬𑐾𑐎 𑐥𑐵𑐛𑐎 𑐡𑐸𑐐𑑂𑐫𑑄𑐩𑑂𑐴 𑐳𑐩𑐵𑐮𑑀𑐔𑐎 𑐖𑐸𑐫𑐵𑑅 𑐡𑑄𑐰𑐫𑐵𑐔𑑂𑐰𑐣 𑑋
𑐩𑐾𑐏𑐾 𑐳𑐵𑐴𑐶𑐟𑑂𑐫𑐳𑐵 𑐳𑐦𑐹 𑐧𑑂𑐰𑐖𑑂𑐫𑐵 𑐖𑐸𑐫𑐵𑐔𑑂𑐰𑐣 𑑋 𑐴𑐬𑐾𑐎 𑐥𑑂𑐬𑐎𑐵𑐱𑐣𑑄 𑐠𑑅𑐐𑐸 𑐣𑑂𑐴𑐹𑐐𑐸 𑐥𑐸𑐮𑐵𑑄𑐐𑐸 𑐳𑐦𑐹 𑐧𑑂𑐰𑐫𑐵𑐔𑑂𑐰𑐣 𑑋 𑐣𑑂𑐫𑐵𑑅𑐰𑑅𑐥𑐶𑑄 𑐩𑐣𑐹𑐟 𑐐𑑂𑐰𑐵𑑅 𑐐𑑂𑐰𑐵𑑅 𑑋 𑐑𑑂𑐰𑐵𑐟𑐹𑐑𑑂𑐰𑐵𑐣𑐵𑑅 𑐴𑐾 𑐠𑑅𑐟 𑐩𑐵𑑅𑐐𑐸 𑐳𑐦𑐹 𑐎𑐵𑑅 𑐖𑐸𑐫𑐵𑐔𑑂𑐰𑐣 𑑋 𑐢𑑂𑐫𑐧𑐵 𑐥𑐸𑐮𑐾𑐐𑐸 𑐎𑐵𑐄𑐣𑑂𑐚𑐬𑐫𑑂 𑐮𑐵𑐂𑐣 𑐴𑐾 𑐐𑐥𑐵𑐫𑑂 𑐴𑐵𑐎𑑅 𑑋 𑐖𑐶 𑐣𑑄 𑐠𑑅𑐟 𑐩𑐵𑑅𑐩𑐵𑑅𑐐𑐸 𑐣𑑂𑐴𑐹 𑐰𑑅𑐐𑐸 𑐕𑐥𑑃 𑐳𑐦𑐹 𑐖𑑂𑐰𑐣𑐵𑑅 𑐢𑑂𑐫𑐧𑐵 𑐥𑐸𑐮𑐾𑐟 𑐮𑐵𑐂𑐣 𑐔𑑂𑐰𑐣𑐵𑐕𑑂𑐰𑐫𑐵 𑑋
𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐣𑐏𑑅 𑐩𑐖𑐹𑐣𑐶𑐧𑐮𑐫𑑂 𑐳𑐣𑑂 𑑒𑑐𑑑𑑔𑐫𑑂 𑐎𑐮𑑂𑐥𑐣𑐵 𑐫𑐵𑐣𑐵𑐐𑐸 𑑋
𑐳𑐣𑑂𑐢𑑂𑐫𑐵 𑐚𑐵𑐂𑐩𑑂𑐳𑐥𑐵𑐏𑐾𑑄 𑐮𑑂𑐴𑑂𑐫𑐵𑐎𑐫𑐵𑐐𑐸 𑑋