𑐠𑐶𑐩𑐶𑐫𑐵 𑐡𑐎𑑂𑐰𑑄 𑐰𑐶𑐡𑑂𑐫𑐵𑐮𑐫𑐫𑑂 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩

𑐠𑐶𑐩𑐶 – 𑐩𑐢𑑂𑐫𑐥𑐸𑐬 𑐠𑐶𑐩𑐶 𑐣𑐐𑐬𑐥𑐵𑐮𑐶𑐎𑐵𑑄 𑐠𑑅𑐐𑐸 𑐩𑐵𑐟𑐴𑐟𑐫𑑂 𑐮𑐵𑑅𑐐𑐸 𑐩𑐢𑑂𑐫𑐥𑐸𑐬 𑐠𑐶𑐩𑐶 𑐣𑐐𑐬𑐫𑐵 𑐡𑐎𑑂𑐰𑑄 𑐳𑐵𑐩𑐸𑐡𑐵𑐫𑐶𑐎 𑐰 𑐣𑐶𑐖𑐷 𑐰𑐶𑐡𑑂𑐫𑐵𑐮𑐫𑐫𑑂 𑐳𑑂𑐠𑐵𑐣𑐷𑐫 𑐥𑐵𑐛𑑂𑑂𑐫𑐎𑑂𑐬𑐩 𑐮𑐵𑐐𑐹 𑐫𑐵𑑅𑐐𑐸 𑐡𑐸 𑑋 𑐣𑐐𑐬𑐥𑐵𑐮𑐶𑐎𑐵𑑄 𑐰𑑄𑐐𑐸 𑐖𑐾𑐛 𑑒𑑕 𑐐𑐟𑐾 𑐳𑐶𑐠𑐶 𑐣𑐏𑑅𑐫𑐵 𑐣𑑂𑐴𑐶𑐎𑐸𑐣𑑂𑐴𑐸𑐣𑐶𑐳𑐾𑑄 𑐣𑐐𑐬 𑐡𑐸𑐣𑐾𑐫𑐵 𑐡𑐎𑑂𑐰𑑄 𑐰𑐶𑐡𑑂𑐫𑐵𑐮𑐫𑐫𑑂 𑐳𑑂𑐠𑐵𑐣𑐷𑐫 𑐥𑐵𑐛𑑂𑑂𑐫𑐎𑑂𑐬𑐩 𑐮𑐵𑐐𑐹 𑐫𑐵𑑅𑐐𑐸 𑐏𑑅 𑑋

𑐣𑐐𑐬𑐥𑑂𑐬𑐩𑐸𑐏 𑐩𑐡𑐣𑐳𑐸𑐣𑑂𑐡𑐬 𑐱𑑂𑐬𑐾𑐲𑑂𑐛𑑄 𑐧𑐶𑐫𑐵𑐡𑐷𑐐𑐸 𑐖𑐵𑐣𑐎𑐵𑐬𑐷𑐎𑐠𑑄 ‘𑐩𑐢𑑂𑐫𑐥𑐸𑐬 𑐠𑐶𑐩𑐶𑐫𑐵 𑐩𑑂𑐴𑐳𑐷𑐎𑐵’ 𑐣𑐵𑑄𑐫𑐵 𑐳𑑂𑐠𑐵𑐣𑐷𑐫 𑐥𑐵𑐛𑑂𑑂𑐫𑐎𑑂𑐬𑐩 𑐮𑐵𑐐𑐹 𑐫𑐵𑑅𑐐𑐸 𑐏𑑅 𑑋 𑐣𑐐𑐬𑐥𑐵𑐮𑐶𑐎𑐵𑑄 𑐣𑐐𑐬 𑐎𑑂𑐲𑐟𑑂𑐬𑐾 𑐡𑐸𑐣𑐾𑐫𑐵 𑑑𑑘 𑐐𑐹 𑐳𑐵𑐩𑐸𑐡𑐵𑐫𑐶𑐎 𑐰 𑑕𑑒 𑐐𑐹 𑐣𑐶𑐖𑐷 (𑐳𑑄𑐳𑑂𑐠𑐵𑐐𑐟) 𑐰𑐶𑐡𑑂𑐫𑐵𑐮𑐫 𑐫𑐵𑐣𑐵𑑅 𑐩𑐸𑐎𑑂𑐎𑑄𑑗𑑐 𑐐𑐹 𑐰𑐶𑐡𑑂𑐫𑐵𑐮𑐫𑐫𑑂 𑐳𑑂𑐠𑐵𑐣𑐷𑐫 𑐥𑐵𑐛𑑂𑑂𑐫𑐎𑑂𑐬𑐩 𑐟𑐫𑐵𑐬 𑐫𑐵𑐣𑐵𑑅 𑐮𑐵𑐐𑐹 𑐫𑐵𑐣𑐵𑐐𑐸 𑐣𑐐𑐬𑐥𑑂𑐬𑐩𑐸𑐏 𑐱𑑂𑐬𑐾𑐲𑑂𑐛𑑄 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋

𑐣𑐐𑐬𑐥𑐵𑐮𑐶𑐎𑐵𑑄 𑐣𑐾𑐰𑐵𑑅𑐟𑐫𑑂 𑐳𑐵𑑄𑐳𑑂𑐎𑐺𑐟𑐶𑐎 𑐩𑐴𑐟𑑂𑐰𑑄 𑐖𑐵𑑅𑐐𑐸 𑐳𑐶𑐠𑐶 𑐣𑐏𑑅𑐫𑐵 𑐣𑑂𑐴𑐶𑐎𑐸𑐣𑑂𑐴𑐸 𑐮𑐵𑐎𑐵𑑅 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩 𑐮𑐵𑐐𑐹 𑐫𑐵𑑅𑐐𑐸 𑐏𑑅 𑑋 𑐳𑐶𑐠𑐶 𑐣𑐏𑑅𑐎𑐸𑐣𑑂𑐴𑐸 𑐣𑐐𑐬 𑐎𑑂𑐲𑐾𑐟𑑂𑐬 𑐡𑐸𑐣𑐾𑐫𑐵 𑐡𑐎𑑂𑐰𑑄 𑐰𑐶𑐡𑑂𑐫𑐵𑐮𑐫 𑐠𑑅𑐠𑑅𑐐𑐸 𑐰𑐶𑐡𑑂𑐫𑐵𑐮𑐫 𑐮𑐶𑐎𑑂𑐎 𑐮𑐵𑑅𑐐𑐸 𑐠𑐵𑐳𑐫𑑂 𑐔𑑂𑐰𑑄𑐐𑐸 𑐮𑑅𑐫𑐵 𑐩𑐸𑐴𑐵𑐣, 𑐟𑐸𑑄, 𑐮𑑂𑐰𑐴𑑄𑐴𑐶𑐟𑐶, 𑐧𑐸𑑄𑐐𑐵𑑅, 𑐳𑐵𑐬𑑂𑐰𑐖𑐣𑐶𑐎 𑐴𑐶𑐟𑐶 𑐁𑐡𑐶 𑐳𑐸𑐔𑐸𑐎𑐸𑐔𑐸 𑐫𑐵𑐣𑐵𑑅 𑐰𑑂𑐫𑐰𑐴𑐵𑐬𑐶𑐎 𑐬𑐸𑐥𑑄 𑐴𑐾 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩 𑐮𑐵𑐐𑐹 𑐫𑐵𑑅𑐐𑐸 𑐏𑑅 𑑋

𑐩𑐢𑑂𑐫𑐥𑐸𑐬 𑐠𑐶𑐩𑐶 𑐣𑐐𑐬𑐥𑐵𑐮𑐶𑐎𑐵𑑄 𑐣𑐐𑐬 𑐎𑑂𑐲𑐾𑐟𑑂𑐬 𑐡𑐸𑐣𑐾𑐫𑐵 𑐰𑐶𑐡𑑂𑐫𑐵𑐮𑐫𑐫𑑂 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩 𑐮𑐵𑐐𑐹 𑐫𑐵𑐫𑐾𑐟 ‘𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩 𑐣𑐶𑐬𑑂𑐩𑐵𑐞 𑐳𑐩𑐶𑐟𑐶’ 𑐐𑐛𑐣 𑐫𑐵𑑅𑐐𑐸 𑐏𑑅 𑑋 𑐣𑐐𑐬𑐥𑐵𑐮𑐶𑐎𑐵𑑄 𑐰𑐬𑐶𑐲𑑂𑐛 𑐱𑐶𑐎𑑂𑐲𑐵𑐰𑐶𑐡𑑂 𑐮𑐶𑐳𑐾𑑄 𑐥𑑂𑐬𑐵. 𑐬𑐵𑐩𑐎𑐺𑐲𑑂𑐞 𑐡𑐸𑐰𑐵𑐮𑐫𑐵 𑐳𑑄𑐫𑑀𑐖𑐎𑐟𑑂𑐰𑐫𑑂 𑐧𑐵𑐮𑐥𑑂𑐬𑐾𑐩𑐷 𑐳𑑂𑐎𑐸𑐮𑐫𑐵 𑐥𑑂𑐬𑐢𑐵𑐣𑐵𑐢𑑂𑐫𑐵𑐥𑐎 𑐔𑐬𑐞𑐎𑐾𑐱𑐬𑐷 𑐱𑑂𑐬𑐾𑐲𑑂𑐛 𑐰 𑐀𑐩𑐶𑐣𑐶𑐚𑐷 𑐳𑑂𑐎𑐸𑐮𑐫𑐵 𑐥𑑂𑐬𑐶𑐣𑑂𑐳𑐶𑐥𑐮 𑐳𑐹𑐬𑑂𑐫𑐧𑐴𑐵𑐡𑐸𑐬 𑐨𑐞𑑂𑐜𑐵𑐬𑐷 𑐡𑐸𑐖𑑅𑐎𑐠𑑄 𑐡𑐸𑐠𑑂𑐫𑐵𑑅𑐐𑐸 𑐥𑐵𑐛𑑂𑐫𑐎𑑂𑐬𑐩 𑐣𑐶𑐬𑑂𑐩𑐵𑐞 𑐳𑐩𑐶𑐟𑐶 𑐐𑐛𑐣 𑐫𑐵𑑅𑐐𑐸 𑐏𑑅 𑑋

𑐳𑐩𑐶𑐟𑐶𑑄 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩 𑐮𑐵𑐐𑐹 𑐫𑐵𑐫𑐾𑐟 𑐠𑐷𑐠𑐷 𑐔𑐬𑐞𑐫𑑂 𑐣𑐐𑐬 𑐡𑐸𑐣𑐾𑐫𑐵 𑐱𑐶𑐎𑑂𑐲𑐵𑐰𑐶𑐡𑑂, 𑐱𑐶𑐎𑑂𑐲𑐵𑐮𑐶𑐳𑐾 𑐳𑐬𑑀𑐎𑐵𑐬 𑐡𑐸𑐥𑐶𑑄, 𑐰𑐶𑐡𑑂𑐫𑐵𑐮𑐫𑐫𑐵 𑐥𑑂𑐬𑐢𑐵𑐣𑐵𑐢𑑂𑐫𑐵𑐥𑐎 𑐰 𑐳𑐩𑑂𑐧𑐣𑑂𑐢𑐶𑐟 𑐰𑐶𑐲𑐫𑐫𑐵 𑐱𑐶𑐎𑑂𑐲𑐎𑐮𑐶𑐳𑐾 𑐳𑐴𑐮𑐴 𑐧𑑂𑐫𑐵𑐎𑐹𑐐𑐸 𑐏𑑅 𑑋𑐠𑐸𑐎𑐶𑐫𑐵𑐮𑐶𑐳𑐾𑑄 𑐡𑐾𑐫𑑂𑐫𑐵 𑑗𑑕𑑓 𑐠𑐹 𑐳𑑂𑐠𑐵𑐣𑐷𑐫 𑐟𑐴 𑐩𑐢𑑂𑐫𑐾 𑐠𑑅𑐐𑐸 𑐴𑐾 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩 𑐮𑐵𑐐𑐹 𑐫𑐵𑑅𑐐𑐸 𑐩𑐢𑑂𑐫𑐥𑐸𑐬 𑐠𑐶𑐩𑐶 𑐣𑐐𑐬𑐥𑐵𑐮𑐶𑐎𑐵 𑐣𑐶𑐐𑐹𑐐𑐸 𑐳𑑂𑐠𑐵𑐣𑐷𑐫 𑐟𑐴 𑐖𑐹𑐐𑐸 𑐡𑐸 𑑋