𑐢𑐸𑐮𑑄 𑐟𑑂𑐰𑐥𑐸𑐣𑐵𑐔𑑂𑐰𑑄𑐐𑐸 𑐱𑐴𑐬

 

𑐳𑑂𑐰𑐣𑐶𑐐𑑅 𑐡𑐸𑐣𑐾 𑐧𑐶𑐬𑐵𑐩𑐷 𑐖𑐸𑐂𑐥𑐶𑐣𑐶 𑐮𑑂𑐫𑐵𑑅 𑐕𑐎𑑂𑐰𑐮𑑄 𑐀𑐥𑑂𑐰𑐫𑐵 𑐰𑑄𑐐𑐸 𑐡𑐸 𑑋 𑐥𑑂𑐬𑐵𑐫𑑅 𑐩𑐣𑐹𑐟 𑐖𑑂𑐰𑐬 𑐰𑐂𑐐𑐸, 𑐳𑐾𑐏𑑄 𑐔𑐵𑐂𑐐𑐸, 𑐩𑐸𑐳𑐸 𑐰𑐂𑐐𑐸 𑐰 𑐎𑐠𑐸 𑐳𑑂𑐫𑐵𑐂𑐐𑐸 𑐳𑐩𑐳𑑂𑐫𑐵𑑄 𑐐𑑂𑐬𑐳𑑂𑐟 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐀𑐳𑑂𑐥𑐟𑐵𑐮𑐫𑑂 𑐠𑐖𑑂𑐫𑐵𑑅𑐥𑐶𑑄 𑐧𑐶𑐬𑐵𑐩𑐷𑐟𑐫𑑂 𑐮𑑂𑐫𑐵𑑅 𑐤𑐶𑐫𑐵𑐤𑐶𑐠𑑄 𑐀𑐥𑑂𑐰𑐫𑐾𑐰𑑄 𑐰𑐵𑐟𑐵𑐰𑐬𑐞𑐰𑐶𑐡𑑂𑐟𑐫𑑂𑐳𑑄 𑐳𑐟𑐬𑑂‍𑐎 𑐖𑐸𑐂𑐟 𑐁𑐴𑑂𑐰𑐵𑐣 𑐫𑐵𑑅𑐐𑐸 𑐡𑐸 𑑋 𑐔𑐶𑐎𑐸𑐮𑐵𑐫𑐵 𑐃 𑐖𑐹𑐐𑐸𑐮𑐶𑑄 𑐀𑐠𑐾𑐣𑑄 𑐩𑐣𑐹𑐟 𑐧𑐶𑐬𑐵𑐩𑐷 𑐀𑐥𑑂𑐰𑑅 𑐖𑐸𑐂𑐐𑐸 𑐫𑐵𑐂 𑑋 𑐠𑐸𑐐𑐸𑐳𑐷 𑐢𑐵𑑅𑐳𑐵 𑐎𑐾𑐰𑐮 𑐔𑐶𑐎𑐹𑐐𑐸 𑐎𑐵𑐬𑐞𑑄 𑐖𑐎 𑐧𑐶𑐬𑐵𑐩𑐷𑐫𑐵 𑐮𑑂𑐫𑐵𑑅 𑐀𑐥𑑂𑐰𑑅𑐐𑐸 𑐩𑐏𑐸 𑑋 𑐠𑐣 𑐡𑐸𑐣𑐾 𑐀𑐥𑑂𑐰𑐫𑐵𑐰𑑄𑐐𑐸 𑐰𑐵𑐫𑐸 𑐥𑑂𑐬𑐡𑐸𑐲𑐞𑐫𑐵 𑐎𑐵𑐬𑐞𑑄 𑐧𑐶𑐬𑐵𑐩𑐷 𑐖𑐹𑐥𑐶𑐣𑐶 𑐮𑑂𑐫𑐵𑑅 𑐀𑐥𑑂𑐰𑑅 𑐖𑐹𑐐𑐸 𑐏𑑅 𑑋

𑐕𑐾𑑃 𑐣𑑄 𑐥𑐶𑐴𑐵𑑄 𑐰𑐣𑐾𑐰𑑄 𑐩𑐵𑐳𑑂𑐎 𑐟𑐫𑐵𑑅 𑐖𑐸𑐂𑐩𑐵𑑅𑐐𑐸 𑐧𑐵𑐢𑑂𑐫𑐟𑐵 𑐡𑐸 𑑋 𑐟𑐬 𑐰𑐵𑐫𑐸 𑐥𑑂𑐬𑐡𑐸𑐲𑐞𑐫𑐵 𑐩𑐵𑐟𑑂𑐬𑐵 𑐠𑐸𑐮𑐶 𑐀𑐥𑑂𑐰𑐫𑐾𑐢𑐸𑑄𑐎𑐹𑐐𑐸 𑐡𑐸 𑐎𑐶 𑐳𑐵𑐩𑐵𑐣𑑂𑐫 𑐩𑐵𑐳𑑂𑐎𑑄 𑐟𑐎𑑄 𑐠𑐸𑐎𑐶𑐫𑐵𑐟 𑐥𑐣𑐾 𑐦𑐂𑐐𑐸 𑐀𑐰𑐳𑑂𑐠𑐵 𑐩𑐡𑐫𑐾𑐢𑐸𑑄𑐎𑐮 𑑋
𑐰𑐶𑐱𑑂𑐰 𑐳𑑂𑐰𑐵𑐳𑑂𑐠𑑂𑐫 𑐳𑑄𑐐𑐛𑐣𑑄 𑐰𑐵𑐫𑐸𑐫𑐵 𑐐𑐸𑐞𑐳𑑂𑐟𑐬 𑐩𑐵𑐥𑐣 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐰𑐵𑐫𑐸𑐫𑐵 𑐎𑐞𑐫𑐵 𑐁𑐎𑐵𑐬𑐫𑐵 𑐁𑐢𑐵𑐬𑐫𑑂 𑐀𑐣𑐫𑐵 𑐀𑐰𑐳𑑂𑐠𑐵𑐫𑐵 𑐟𑐠𑑂𑐫𑐵𑑄𑐎 𑐳𑑄𑐎𑐮𑐣 𑐫𑐵𑐂𑐐𑐸 𑐰𑐶𑐢𑐶 𑐡𑐫𑐾𑐎𑐵𑐟𑑅𑐐𑐸 𑐡𑐸 𑑋 𑐫𑐡𑐶 𑐰𑐵𑐫𑐸𑐫𑐵 𑐎𑐞𑐟 𑑒.𑑕 𑐩𑐵𑐂𑐎𑑂𑐬𑑀𑐩𑐶𑐚𑐬 𑐰𑐵 𑐰 𑐳𑑂𑐰𑐫𑐵𑑄 𑐔𑐶𑐐𑑂𑐰𑑅 𑐖𑐹𑐳𑐵 𑐄𑐎𑐶𑐫𑐵𑐟 𑐥𑐷𑐊𑐩 𑑒.𑑕 𑐎𑐠𑑄 𑐰 𑑑𑑐 𑐩𑐵𑐂𑐎𑑂𑐬𑑀𑐩𑐶𑐚𑐬 𑐖𑐹𑐳𑐵 𑐄𑐎𑐶𑐫𑐵𑐟 𑐥𑐷𑐊𑐩 𑑑𑑐 𑐎𑐠𑑄 𑐩𑐵𑐥𑐣 𑐫𑐵𑐫𑐾𑐐𑐸 𑐰𑐶𑐢𑐶 𑐣𑐶𑐬𑑂‍𑐢𑐵𑐬𑐞 𑐫𑐵𑐣𑐵𑐟𑑅𑐐𑐸 𑐡𑐸 𑑋 𑐩𑐵𑐥𑐡𑐞𑑂𑐜 𑐎𑐠𑑄 𑐣𑐷𑐥𑑂𑐫𑐑𑑁𑐫𑐵 𑐣𑐶𑑄𑐟𑐶𑑄 𑐥𑐷𑐊𑐩 𑑒.𑑕 𑐫𑐵 𑑒𑑕 𑐰 𑐥𑐷𑐊𑐩 𑑑𑑐 𑐫𑐵 𑑕𑑐 𑐩𑐵𑐂𑐎𑑂𑐬𑑀𑐐𑑂𑐬𑐵𑐩 𑐩𑐶𑐚𑐬𑐎𑑂𑐫𑐸 𑐟𑐫𑐵𑐟𑑅𑐐𑐸 𑐡𑐸 𑑋 𑐟𑐬 𑐣𑐾𑐥𑐵𑑅𑐫𑐵 𑐬𑐵𑐲𑑂𑐚𑑂𑐬𑐶𑐫 𑐩𑐵𑐥𑐡𑐞𑑂𑐜 𑐎𑐠𑑄 𑐣𑐷𑐥𑑂𑐫𑐑𑑁𑐫𑐵 𑐣𑐶𑑄𑐟𑐶𑑄 𑐥𑐷𑐊𑐩 𑑒.𑑕 𑐫𑐵 𑑔𑑐 𑐰 𑐥𑐷𑐊𑐩 𑑑𑑐 𑐫𑐵 𑑔𑑐 𑐩𑐵𑐂𑐎𑑂𑐬𑑀𑐐𑑂𑐬𑐵𑐩 𑐩𑐶𑐚𑐬𑐎𑑂𑐫𑐸𑐫𑐵 𑐩𑐵𑐥𑐡𑐞𑑂𑐜 𑐡𑐫𑐾𑐎𑐵𑐟𑑅𑐐𑐸 𑐡𑐸 𑑋

𑐀𑐣𑑂𑐟𑐬𑑂‍𑐬𑐵𑐲𑑂𑐚𑑂𑐬𑐶𑐫 𑐩𑐵𑐥𑐡𑐞𑑂𑐜 𑐳𑑂𑐰𑐫𑐵𑑄 𑐣𑐶𑐡𑐸𑐐𑑄 𑐀𑐥𑑂𑐰𑑅 𑐟𑐫𑐵𑑅 𑐬𑐵𑐲𑑂𑐚𑑂𑐬𑐶𑐫 𑐩𑐵𑐥𑐡𑐞𑑂𑐜 𑐡𑐫𑐾𑐎𑐹𑐐𑐸 𑐏𑑅𑐳𑐵𑑄 𑐳𑑂𑐰𑐣𑐶𑐐𑑅𑐫𑐵 𑐰𑐵𑐫𑐸 𑐰 𑐳𑑂𑐰𑐫𑐵𑑄 𑐣𑑄 𑐖𑐷𑐬𑑂‍𑐞 𑐀𑐰𑐳𑑂𑐠𑐵𑐫𑑂 𑐮𑐵𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐎𑐵𑐬𑐞– 𑐢𑐹 𑐰 𑐎𑐸𑑃 𑑋 𑐡𑐎𑐮𑐫𑑂 𑐀𑐥𑑂𑐰𑑅 𑐐𑐵𑐜𑐷𑐥𑐵𑐏𑐾𑑄 𑐥𑐶𑐴𑐵𑑄 𑐰𑐂𑐐𑐸 𑐎𑐸𑑃𑐫𑐵 𑐎𑐵𑐬𑐞𑑄 𑐱𑐴𑐬𑐷 𑐎𑑂𑐲𑐾𑐟𑑂𑐬𑐫𑑂 𑐥𑑂𑐬𑐡𑐸𑐲𑐞𑐫𑐵 𑐩𑐵𑐟𑑂𑐬𑐵 𑐀𑐥𑑂𑐰𑐫𑐾𑐎𑐵𑐔𑑂𑐰𑑄𑐐𑐸 𑐏𑑅 𑑋 𑐣𑐵𑐥𑐣𑐵𑐥𑑄 𑐰𑐶𑐎𑐵𑐳 𑐣𑐶𑐬𑑂‍𑐩𑐵𑐞𑐫𑐵 𑐣𑐵𑐩𑐫𑑂 𑐖𑐸𑐫𑐵𑐔𑑂𑐰𑑄𑐐𑐸 𑐝𑐶𑐮𑐵𑐳𑐸𑐳𑑂𑐟𑐶 𑐖𑑂𑐫𑐵𑑄 𑐫𑐵𑐣𑐵𑑅 𑐰𑐵𑐫𑐸 𑐥𑑂𑐬𑐡𑐸𑐲𑐞𑐫𑑂 𑐠𑐥 𑐮𑐶𑐔𑑂𑐰𑑅 𑐮𑐵𑐎𑐵𑐔𑑂𑐰𑑄𑐐𑐸 𑐡𑐸 𑑋 𑐰𑐶𑐱𑐾𑐲 𑐫𑐵𑐣𑐵𑑅 𑐩𑐾𑐮𑐩𑑂𑐔𑐷 𑐏𑐵𑐣𑐾𑐥𑐵𑐣𑐷𑐫𑐵 𑐣𑐵𑐩𑐫𑑂 𑐥𑐵𑐂𑐥 𑐮𑐵𑐂𑐣 𑐰 𑐢𑑅𑐫𑐵 𑐰𑑂𑐫𑐰𑐳𑑂𑐠𑐵 𑐫𑐵𑐫𑐾𑐟 𑐠𑐵𑐫𑑂 𑐠𑐵𑐳𑐫𑑂 𑐳𑐟𑐎 𑐪𑐸𑐂𑐐𑐸 𑐰 𑐳𑐟𑐎 𑐰𑐶𑐳𑑂𑐟𑐵𑐬𑐫𑐵 𑐣𑐵𑐩𑐫𑑂 𑐕𑐾𑑃 𑐠𑐸𑐣𑐾𑐐𑐸 𑐰 𑐳𑐟𑐎 𑐟𑐧𑑂𑐫𑐵 𑐫𑐵𑐫𑐾𑐐𑐸 𑐖𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐖𑐸𑐮 𑑋 𑐀𑐗 𑐄𑐎𑐶𑐫𑐵𑐟 𑐣𑐶𑐱𑑂𑐔𑐶𑐟 𑐃𑐫𑐵 𑐡𑐸𑐣𑐾 𑐖𑑂𑐫𑐵 𑐩𑐫𑐵𑐫𑐾𑐐𑐸 𑐧𑐵𑐣𑐷𑑄 𑐫𑐵𑐣𑐵𑑅 𑐳𑐩𑐳𑑂𑐫𑐵𑐫𑐵𑐟 𑐀𑐗 𑐰𑐶𑐎𑐬𑐵𑐮 𑐫𑐵𑐣𑐵 𑐧𑐶𑐄𑐐𑐸 𑐡𑐸 𑑋

𑐕𑐐𑐹 𑐟𑐠𑑂𑐫𑐵𑑄𑐎 𑐎𑐠𑑄 𑐥𑑂𑐫𑐪 𑐩𑐣𑐹𑐟 𑐩𑐢𑑂𑐫𑐾 𑐕𑐪 𑐩𑐣𑐹 𑐰𑐵𑐟𑐵𑐰𑐬𑐞 𑐥𑑂𑐬𑐡𑐸𑐲𑐞𑐫𑐵 𑐎𑐵𑐬𑐞𑑄 𑐳𑐷𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐰𑐵𑐟𑐵𑐰𑐬𑐞 𑐥𑑂𑐬𑐡𑐸𑐲𑐞𑐫𑐵 𑐎𑐵𑐬𑐞𑑄 𑐩𑐣𑐹𑐟𑐫𑑂 𑐳𑑂𑐰𑐵𑐳𑑂𑐠𑑂𑐫𑐫𑑂 𑐖𑐎 𑐮𑐶𑐔𑑂𑐰𑑅 𑐮𑐵𑐎𑐵𑐔𑑂𑐰𑑄𑐐𑐸 𑐩𑐏𑐸 𑐎𑐶 𑐠𑐸𑐎𑐶𑐫𑐵 𑐎𑐵𑐬𑐞𑑄 𑐴𑐾 𑐩𑐣𑐹𑐟 𑐳𑐷𑐐𑐸 𑐐𑑂𑐫𑐵𑐣𑐵𑐥𑐸𑐐𑐸 𑐟𑐠𑑂𑐫𑐵𑑄𑐎 𑐟𑐎𑑄 𑐡𑐸 𑑋 𑐟𑐠𑑂𑐫𑐵𑑄𑐎 𑐎𑐠𑑄 𑐰𑐵𑐫𑐸 𑐥𑑂𑐬𑐡𑐸𑐲𑐞 𑐰 𑐰𑐵𑐫𑐸𑐮𑐫𑑂 𑐡𑐂𑐐𑐸 𑐥𑑂𑐬𑐡𑐸𑐲𑐶𑐟 𑐎𑐞𑐟 𑐔𑐸𑐬𑑀𑐳 𑐟𑑂𑐰𑐣𑐾𑐐𑐸, 𑐚𑐶𑐫𑐸𑐧𑐬𑐎𑑂𑐮𑑀𑐳𑐶𑐳 𑐰 𑐊𑐔𑐁𑐃𑐨𑐷 𑐊𑐜𑑂𑐳 𑐳𑑂𑐰𑐫𑐵𑑄 𑐐𑑂𑐫𑐵𑐣𑐵𑐥𑐸 𑑋 𑐠𑐸𑐎𑐶𑑄 𑐠𑐷𑐠𑐷 𑐎𑐠𑑄𑐫𑐵 𑐮𑑂𑐰𑐫𑑂𑐫𑐵 𑐱𑐶𑐎𑐵𑐬 𑐖𑐸𑐂𑐩𑐵𑐮𑐷𑐐𑐸 𑐣𑐵𑐥𑑄 𑐱𑐵𑐬𑐷𑐷𑐶𑐎 𑐰 𑐩𑐵𑐣𑐳𑐶𑐎 𑐳𑐩𑐳𑑂𑐫𑐵𑐫𑐵 𑐎𑐵𑐬𑐞 𑐖𑐸𑐂𑐦𑐸 𑑋

𑐣𑐎𑐟𑐶𑐣𑐶 𑐖𑐎 𑐠𑐵𑐂𑐮𑑂𑐫𑐵𑐞𑑂𑐜𑐫𑐵 𑐧𑐿𑑄𑐎𑐎𑐫𑑂 𑐠𑐖𑑂𑐫𑐵𑑅𑐐𑐸 𑐴𑐾 𑐳𑐩𑐳𑑂𑐫𑐵 𑐰𑐶𑐎𑐬𑐵𑐮 𑐖𑐸𑐂𑐰𑑄 𑐀𑐣𑐫𑐵 𑐳𑐬𑐎𑐵𑐬𑑄 𑐥𑑂𑐬𑐡𑐸𑐲𑐞 𑐣𑐶𑐫𑐣𑑂𑐟𑑂𑐬𑐞 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐳𑐵𑐩𑐵𑐣𑑂𑐫 𑐥𑐮𑐵𑑅 𑐯𑑂𑐰𑑄𑐐𑐸 𑐡𑐸 𑑋 𑐧𑐿𑑄𑐎𑐎𑐫𑐵 𑐥𑑂𑐬𑐡𑐸𑐲𑐞𑐫𑐵 𑐎𑐵𑐬𑐞𑑄 𑐩𑐣𑐹𑐟𑐫𑑂 𑐤𑐵𑐳𑑄 𑐰 𑐪𑐸𑐟𑐸𑑄 𑐴𑐶 𑐟𑐎𑑄 𑐧𑐵𑑅 𑐰𑑅𑐐𑐸 𑐏𑑅 𑑋 𑐧𑐿𑑄𑐎𑐎𑐫𑐵 𑐰𑐵𑐫𑐸 𑐥𑑂𑐬𑐡𑐸𑐲𑐞 𑐥𑐷𑐊𑐩 𑑒.𑑕 𑐫𑐵 𑐩𑐵𑐥𑐡𑐞𑑂𑐜 𑐳𑑂𑐰𑐫𑐵𑑄 𑐀𑐥𑑂𑐰𑑅 𑐖𑐹𑐐𑐸 𑐡𑐸 𑑋 𑐀𑐣𑐫𑐵 𑐰𑐵𑐟𑐵𑐰𑐬𑐞 𑐥𑑂𑐬𑐡𑐸𑐲𑐞𑐫𑐵 𑐩𑐹 𑐎𑐵𑐬𑐵𑐞 𑐳𑐰𑐵𑐬𑐷 𑐳𑐵𑐢𑐣 𑐰 𑐟𑐟𑑅𑐢𑑄𑐐𑐸 𑐰𑐶𑐎𑐵𑐳 𑐥𑐬𑐶𑐫𑑀𑐖𑐣𑐵 𑐎𑐠𑑄 𑐎𑐫𑐵𑐟𑑅𑐐𑐸 𑐡𑐸 𑑋 𑐥𑑂𑐬𑐡𑐸𑐲𑐞 𑐟𑐳𑐎𑑄 𑐐𑑂𑐫𑐵𑐣𑐵𑐥𑐸𑐐𑐸 𑐀𑐰𑐳𑑂𑐠𑐵𑐫𑑂 𑐠𑑂𑐫𑐣𑐾𑐰𑑄 𑐳𑐬𑐎𑐵𑐬𑑄 𑐀𑐣𑐫𑐵 𑐰𑐶𑐡𑑂𑐫𑐵𑐮𑐫𑐟 𑐧𑐣𑑂𑐡 𑐫𑐵𑐣𑐵 𑐧𑐶𑐄𑐐𑐸 𑐡𑐸 𑑋

𑐰𑐵𑐫𑐸 𑐥𑑂𑐬𑐡𑐸𑐲𑐞 𑐫𑐵𑐂𑐐𑐸 𑐳𑐰𑐵𑐬𑐷 𑐳𑐵𑐢𑐣𑐫𑑂 𑐬𑑀𑐎 𑐮𑐐𑐾 𑐫𑐵𑐫𑐾𑐐𑐸 𑐣𑐵𑐥𑑄 𑐏𑐸𑐮𑑂𑐮𑐵 𑐠𑐵𑐳𑐫𑑂 𑐩𑐶 𑐔𑑂𑐫𑐵𑐎𑐾 𑐩𑐡𑐂𑐐𑐸, 𑐔𑐶𑐣𑐶𑐫𑐵𑑃 𑐤𑐹𑐡𑑃𑐫𑐵 𑐂𑐮𑐫𑑂 𑐢𑐸𑑄 𑐰 𑐢𑐸𑐥𑐵𑑃𑐫𑑂 𑐩𑐔𑑂𑐫𑐵𑐎𑐾𑐟 𑐂𑐣𑐵𑐥 𑐫𑐵𑑅𑐐𑐸 𑐡𑐸 𑑋 𑐣𑐵𑐥𑑄 𑐳𑐬𑐎𑐵𑐬𑑄 𑐜𑑂𑐬𑑀𑐣𑐥𑐵𑐏𑐾𑑄 𑐮𑑅 𑐕𑑂𑐰𑐵𑐎𑐾𑐐𑐸 𑐖𑑂𑐫𑐵𑐫𑐵𑐟 𑐟𑐷𑐰𑑂𑐬𑐟𑐵 𑐧𑐶𑐄𑐐𑐸 𑐡𑐸 𑑋 𑐟𑐬, 𑐰𑐵𑐟𑐵𑐰𑐬𑐞𑐰𑐶𑐡𑑂𑐟𑐫𑑂𑐳𑑄 𑐧𑐿𑑄𑐎𑐎𑐫𑐵 𑐰𑐵𑐫𑐸 𑐥𑑂𑐬𑐡𑐸𑐲𑐞 𑐣𑐶𑐫𑐣𑑂𑐟𑑂𑐬𑐞 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐳𑐬𑐎𑐵𑐬𑑄 𑐟𑐳𑐎𑑄 𑐮𑐶𑐧𑐵𑐎𑑂𑐎 𑐥𑐮𑐵𑑅 𑐯𑑂𑐰𑑄𑐐𑐸 𑐰 𑐁𑑅𑐫𑐵 𑐥𑐮𑐵𑑅𑐥𑐵𑐏𑐾𑑄 𑐳𑑂𑐠𑐵𑐫𑐷 𑐳𑐩𑐵𑐢𑐵𑐣 𑐩𑐖𑐸𑐂𑐐𑐸 𑐔𑐶𑐄𑐟𑐵𑑅 𑐥𑑂𑐰𑑄𑐎𑐵𑐔𑑂𑐰𑑄𑐐𑐸 𑐡𑐸 𑑋

𑐥𑐷𑐊𑐩 𑑒.𑑕 𑐫𑐵 𑐰𑐵𑐫𑐸 𑐎𑐞𑐟 𑐏𑐣𑐾𑐡𑐫𑐾𑐰𑑄 𑐧𑐿𑑄𑐎𑐎𑐫𑑂 𑐠𑐵𑐃 𑐳𑐬𑐎𑐵𑐬𑐥𑐵𑐏𑐾𑑄 𑐮𑐶𑐧𑐵𑐎𑑂𑐎 𑐖𑐹𑐳𑐵𑑄 𑐕𑐸𑑄 𑐥𑐮𑐵𑑅 𑐯𑑂𑐰𑑄𑐐𑐸 𑐏𑐣𑐾𑐡𑐟 𑑋 𑐀𑐖𑑂𑐫𑐵𑑅𑐐𑐸 𑐥𑐷𑐊𑐩 𑑒.𑑕 𑐫𑐵 𑐎𑐞𑐟 𑐳𑑂𑐰𑐣𑐶𑐐𑑅 𑐡𑐸𑐣𑐾 𑐣𑑄 𑐟𑐳𑐎𑑄 𑐐𑑂𑐫𑐵𑐣𑐵𑐥𑐸𑐎𑑂𑐎 𑐦𑐿𑐮𑐾 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐟𑐬 𑐠𑐣 𑐰𑐵𑐫𑐸 𑐥𑑂𑐬𑐡𑐸𑐲𑐞 𑐣𑐶𑐫𑐣𑑂𑐟𑑂𑐬𑐞 𑐫𑐵𑐫𑐾𑐟 𑐳𑐬𑐎𑐵𑐬𑑄 𑐕𑐸𑑄 𑐣𑑄 𑐎𑐠𑑄𑐫𑐵 𑐥𑐮𑐵𑑅 𑐯𑑂𑐰𑐣𑐾𑐐𑐸 𑐁𑐰𑐱𑑂𑐫𑐎𑐟𑐵 𑐟𑐵𑐫𑐾𑐎𑐵𑐔𑑂𑐰𑑄𑐐𑐸 𑐩𑐡𑐸 𑑋 𑐧𑐿𑑄𑐎𑐎𑐫𑑂 𑐠𑐾𑑄 𑐳𑑂𑐰𑐣𑐶𑐐𑑅 𑐡𑐸𑐣𑐾 𑐣𑑄 𑐰𑐵𑐫𑐸 𑐥𑑂𑐬𑐡𑐸𑐲𑐞 𑐣𑐶𑐫𑐣𑑂𑐟𑑂𑐬𑐞 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐠𑐷𑐠𑐷 𑐎𑐠𑑄𑐫𑐵 𑐥𑐮𑐵𑑅 𑐯𑑂𑐰𑐣𑐾𑐐𑐸 𑐮𑐶𑐧𑐵𑐫𑐾 𑐢𑐸𑑄𑐎𑐮 𑑋 𑐄𑐏𑐾𑐥𑐵𑐏𑐾 𑐳𑐬𑐎𑐵𑐬𑐫𑐵 𑐢𑑂𑐫𑐵𑐣 𑐎𑐾𑐣𑑂𑐡𑑂𑐬𑐶𑐟 𑐖𑐸𑐂𑐦𑐸𑐐𑐸 𑐩𑐡𑐸𑐣𑐶 𑑋

𑐳𑑂𑐰𑐣𑐶𑐐𑑅 𑐡𑐸𑐣𑐾 𑐂𑐮𑐫𑑂 𑐥𑐮𑐵𑑅 𑐯𑑂𑐰𑐣𑐾𑐐𑐸 𑐏𑑅𑐳𑐵 𑐠𑐣𑐫𑐵 𑐰𑐵𑐟𑐵𑐰𑐬𑐞 𑐳𑐸𑐢𑐵𑐬 𑐫𑐵𑐫𑐾 𑐦𑐂𑐐𑐸 𑐰𑐵𑐟𑐵𑐰𑐬𑐞𑐰𑐶𑐡𑑂𑐟𑐫𑑂𑐳𑑄 𑐟𑑅𑐎𑑂𑐰𑑅 𑐢𑐵𑐫𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐥𑐷𑐊𑐩 𑑒.𑑕𑐫𑐵 𑐎𑐞𑐟 𑐳𑑂𑐰𑐣𑐶𑐐𑑅 𑐡𑐸𑐣𑐾 𑐏𑐣𑐾𑐡𑐸𑐐𑐸𑐮𑐶𑑄 𑐠𑐸𑐎𑐶𑐫𑐵𑐟 𑐂𑐮𑐫𑑂 𑐣𑐶𑐫𑐣𑑂𑐟𑑂𑐬𑐞 𑐫𑐵𑐫𑐾𑐟 𑐡𑐧𑐵𑐧 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐳𑐸𑐢𑐵𑐬 𑐰 𑐣𑐶𑐫𑐣𑑂𑐟𑑂𑐬𑐞 𑐫𑐵𑐫𑐾𑐐𑐸 𑐖𑑂𑐫𑐵 𑐎𑐾𑐰𑐮 𑐣𑐶𑐖𑐷 𑐎𑑂𑐲𑐾𑐟𑑂𑐬𑐫𑐵 𑐊𑐎𑐮 𑐎𑐸𑐟𑐮𑑄 𑐩𑐖𑐸𑐂𑐐𑐸𑐮𑐶𑑄 𑐳𑐬𑐎𑐵𑐬 𑐴𑐾 𑐠𑐸𑐐𑐸 𑐖𑑂𑐫𑐵𑐫𑑂 𑐀𑐐𑑂𑐬𑐳𑐬 𑐖𑐸𑐫𑐵𑑅 𑐥𑑂𑐬𑐟𑑂𑐫𑐎𑑂𑐲 𑐬𑐸𑐥𑑄 𑐳𑑄𑐮𑐐𑑂𑐣 𑐖𑐸𑐂𑐩𑐵𑑅𑐐𑐸 𑐁𑐰𑐱𑑂𑐫𑐎𑐟𑐵 𑐡𑐸 𑑋

𑐟𑐟𑑂𑐎𑐵𑐮 𑐳𑑂𑐰𑐣𑐶𑐐𑑅𑐰𑐵𑐳𑐷𑐟𑐫𑑂𑐟 𑐖𑑂𑐰𑐬𑑀 𑐰𑐂𑐐𑐸, 𑐳𑐾𑐏𑑄 𑐔𑐵𑐂𑐐𑐸, 𑐩𑐸𑐳𑐸 𑐰𑐂𑐐𑐸 𑐮𑐐𑐵𑐫𑐟 𑐳𑐩𑐳𑑂𑐫𑐵 𑐖𑐎 𑐏𑐣𑐾 𑐡𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐫𑐡𑐶 𑐂𑐮𑐫𑑂 𑐰𑐵𑐫𑐸 𑐥𑑂𑐬𑐡𑐸𑐲𑐞𑐫𑐵𑐟 𑐣𑐶𑐫𑐣𑑂𑐟𑑂𑐬𑐞 𑐫𑐵𑐫𑐾𑐐𑐸 𑐖𑑂𑐫𑐵 𑐩𑐖𑐹𑐳𑐵 𑐠𑐸𑐎𑐶𑑄 𑐩𑐵𑐣𑐰 𑐳𑑂𑐰𑐵𑐳𑑂𑐠𑑂𑐫𑐫𑑂 𑐟𑐳𑐎𑑄 𑐐𑑂𑐫𑐵𑐣𑐵𑐥𑐸𑐐𑐸 𑐮𑐶𑐔𑑂𑐰𑑅 𑐮𑐵𑐎𑐾𑐦𑐸 𑑋 𑐰𑐵𑐫𑐸 𑐥𑑂𑐬𑐡𑐸𑐲𑐞𑐫𑐵𑐟 𑐴𑐮𑑂𑐎𑐵 𑐝𑑄𑐐𑑄 𑐖𑐎 𑐩𑐎𑐵𑐳𑐾 𑐎𑐤𑐫𑑂𑐫𑐵 𑐳𑑂𑐰𑐣𑐶𑐐𑑅𑐫𑐵 𑐨𑐰𑐶𑐲𑑂𑐫𑐣𑐵𑐥 𑐣𑑄 𑐳𑑂𑐰𑐵𑐎𑐵𑑅 𑐳𑑂𑐰𑐫𑐾𑐩𑐵𑑅𑐐𑐸 𑐁𑐰𑐱𑑂𑐫𑐎𑐟𑐵 𑐡𑐸 𑑋 𑐫𑐡𑐶 𑐠𑐖𑑂𑐫𑐵𑑅𑐐𑐸 𑐥𑑂𑐬𑐡𑐸𑐲𑐞𑐫𑐵𑐟 𑐠𑑁𑑄 𑐴𑐾 𑐣𑐶𑐫𑐣𑑂𑐟𑑂𑐬𑐞 𑐫𑐵𑐫𑐾𑐐𑐸 𑐥𑐵𑐏𑐾 𑐥𑐮𑐵𑑅 𑐩𑐯𑑂𑐰𑐣𑐾𑐐𑐸 𑐏𑑅𑐳𑐵 𑐠𑐸𑐎𑐶𑑄 𑐳𑑂𑐰𑐣𑐶𑐐𑑅𑐫𑐵𑐟 𑐨𑐫𑐵𑐰𑐴 𑐀𑐰𑐳𑑂𑐠𑐵𑐫𑑂 𑐠𑑂𑐫𑑄𑐎𑐵 𑐧𑐷 𑑋

𑐰𑐵𑐫𑐸 𑐥𑑂𑐬𑐡𑐸𑐲𑐞𑐫𑐵 𑐎𑐵𑐬𑐞𑑄 𑐩𑐵𑐣𑐰𑐷𑐫 𑐳𑑂𑐰𑐵𑐳𑑂𑐠𑑂𑐫𑐫𑑂 𑐮𑐶𑐔𑑂𑐰𑑅 𑐮𑐵𑐎𑐷𑐐𑐸 𑐰 𑐩𑐣𑐹𑐟 𑐳𑐷𑐐𑐸 𑐖𑐎 𑐩𑐏𑐸 𑐠𑐸𑐎𑐶𑑄 𑐖𑐮𑐰𑐵𑐫𑐸 𑐥𑐬𑐶𑐰𑐬𑑂‍𑐟𑐣𑐫𑑂 𑐮𑐶𑐔𑑂𑐰𑑅 𑐮𑐵𑐎𑐷𑐐𑐸 𑐰 𑐎𑐺𑐲𑐶𑐖𑐣𑑂𑐫 𑐖𑐩𑐶𑐣𑐫𑑂 𑐟𑐎𑑄 𑐟𑐳𑐎𑑄 𑐣𑐎𑐵𑐬𑐵𑐟𑑂𑐩𑐎 𑐮𑐶𑐔𑑂𑐰𑑅 𑐮𑐵𑐎𑐷 𑑋 𑐕𑐐𑐹 𑐀𑐢𑑂𑐫𑐫𑐣 𑐎𑐠𑑄 𑐀𑐖𑑂𑐫𑐵𑑅𑐐𑐸 𑐨𑐫𑐵𑐰𑐴 𑐀𑐰𑐳𑑂𑐠𑐵 𑐫𑐸𑐡𑑂𑐢𑐫𑐵 𑐀𑐰𑐳𑑂𑐠𑐵 𑐳𑑂𑐰𑐫𑐵𑑄 𑐣𑑄 𑐐𑑂𑐫𑐵𑐣𑐵𑐥𑐸𑐂 𑑋 𑐠𑐣𑐶𑑄𑐣𑐶𑐳𑐾𑑄 𑐥𑐮𑐵𑑅 𑐯𑑂𑐰𑐣𑐾𑐐𑐸 𑐏𑑅𑐳𑐵 𑐀𑐖𑑂𑐫𑐵𑑅𑐐𑐸 𑐀𑐰𑐳𑑂𑐠𑐵𑐫𑐵𑐟 𑐥𑐣𑐾 𑐦𑐂𑐐𑐸 𑐳𑐩𑑂𑐨𑐵𑐰𑐣𑐵 𑐡𑐂 𑑋 𑐎𑐤𑐫𑑂𑐫𑐵 𑐳𑑂𑐰𑐣𑐶𑐐𑑅𑐫𑐵 𑐨𑐰𑐶𑐲𑑂𑐫 𑐗𑐷𑐐𑐸 𑐠𑑁𑑄𑐫𑐵 𑐥𑐮𑐵𑑅𑐥𑐵𑐏𑐾𑑄 𑐣𑐶𑐬𑑂‍𑐢𑐵𑐬𑐞 𑐫𑐵𑐂 𑑋 𑐐𑐖𑑂𑐫𑐵𑑅𑐐𑐸 𑐥𑐮𑐵𑑅 𑐯𑑂𑐰𑐣𑐾𑐐𑐸 𑐏𑑅, 𑐰 𑐠𑑁𑑄 𑐗𑐷𑐐𑐸 𑐴𑐾 𑐯𑐵𑐟𑐫𑑂 𑐡𑐸 𑑋