𑐣𑐐𑐬𑐎𑑀𑐚𑐫𑑂 𑐧𑐵𑐏𑑄 𑐡𑐧𑐹𑐫𑐵 𑐧𑐵𑐏𑑄 𑐩𑐸𑑃𑐖𑑂𑐫𑐵

𑐧𑐵𑐏𑑄 𑐡𑐧𑐹𑐫𑐵 𑐐𑑂𑐰𑐳𑐵𑐮𑐫𑑂 𑐳𑑂𑐰𑐣𑐶𑐐𑑅𑐫𑐵 𑐥𑐬𑑂𑐫𑐚𑐎𑐷𑐫𑐵 𑐮𑐐𑐵𑐫𑐵 𑐣𑐐𑐬𑐎𑑀𑐚𑐫𑑂 𑐧𑐵𑐏𑑄 𑐩𑐸𑑃𑐖𑑂𑐫𑐵 𑐖𑐸𑐮 𑑋 𑐡𑐧𑐹𑐫𑐵 𑐐𑑂𑐰𑐳𑐵𑐮𑐫𑑂 𑐰𑑄𑐐𑐸 𑐱𑐸𑐎𑑂𑐬𑐰𑐵𑑅 𑐰 𑐱𑐣𑐶𑐰𑐵𑑅 𑐣𑐶𑐣𑑂𑐴𑐸𑐫𑑄𑐎𑑄 𑐄𑐐𑐸 𑐧𑐵𑐏𑑄 𑐩𑐸𑑃𑐖𑑂𑐫𑐵 𑐖𑐹𑐐𑐸 𑐏𑑅 𑑋

𑐣𑐵𑑄𑐖𑐵𑑅𑐩𑑂𑐴 𑐧𑐵𑐏𑑄 𑐔𑑂𑐰𑐩𑐶 𑐩𑐡𑐸𑐩𑑂𑐴 𑐮𑐎𑑂𑐲𑑂𑐩𑐞 𑐬𑐵𑐖𑐰𑑄𑐱𑐷𑐫𑐵𑐟 𑐳𑐨𑐵𑐥𑐟𑐶 𑐡𑐫𑐾𑐎𑐵𑑅 𑐣𑑂𑐴𑑂𑐫𑐵𑑅𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐰𑐫𑑂𑐎𑐮𑑄 𑐣𑐾𑐥𑐵𑐮𑐨𑐵𑐲𑐵 𑐧𑐵𑐏𑑄 𑐏𑑂𑐫𑐮𑐫𑑂 𑐧𑐶𑐫𑐵𑐡𑐷𑐐𑐸 𑐫𑑀𑐐𑐡𑐵𑐣 𑐰 𑐧𑐵𑐏𑑄 𑐡𑐧𑐹 𑐣𑐷𑐳𑑂𑐰𑐣𑐾𑐟 𑐩𑑂𑐴𑐶𑐟𑐵𑐡𑐷𑐐𑐸 𑐨𑐹𑐩𑐶𑐎𑐵𑐫𑐵𑐟 𑐎𑐫𑐵𑑅 𑐣𑑄 𑐔𑐬𑑂𑐔𑐵 𑐫𑐵𑑅𑐐𑐸 𑐏𑑅 𑑋

𑐧𑐵𑐏𑑄 𑐡𑐧𑐹𑐫𑐵 𑐳𑑄𑐳𑑂𑐠𑐵𑐥𑐎 𑐡𑐸𑐖𑑅 𑐮𑑀𑐔𑐣𑐟𑐵𑐬𑐵 𑐟𑐸𑐮𑐵𑐢𑐬𑑄 𑐮𑐳𑐎𑐸𑐳 𑐫𑐵𑐣𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐴𑐸𑐕𑐾𑐨𑐎𑑂𑐟 𑐎𑐰𑐵𑑄, 𑐱𑑂𑐫𑐵𑐩 𑐁𑐱𑐵, 𑐎𑐾𑐡𑐵𑐬 𑐳𑐶𑐟𑐸, 𑐟𑐾𑐖𑐎𑐺𑐲𑑂𑐞 𑐱𑑂𑐬𑐾𑐲𑑂𑐛, 𑐣𑐶𑐖𑐶𑐬𑑀𑐳 𑐱𑑂𑐬𑐾𑐲𑑂𑐛, 𑐨𑐐𑐟𑐡𑐵𑐳 𑐱𑑂𑐬𑐾𑐲𑑂𑐛, 𑐎𑐶𑐬𑐞𑐎𑐾𑐣 𑐬𑑄𑐖𑐶𑐟, 𑐮𑑀𑐔𑐣𑐟𑐵𑐬𑐵 𑐟𑐸𑐮𑐵𑐢𑐬, 𑐰𑐶𑐩𑐮𑐥𑑂𑐬𑐨𑐵 𑐰𑐖𑑂𑐬𑐵𑐔𑐵𑐬𑑂𑐫, 𑐳𑐸𑐬𑐾𑐣𑑂𑐡𑑂𑐬 𑐨𑐸𑐖𑐸, 𑐳𑐩𑐵𑐣𑑂𑐟, 𑐩𑑀𑐴𑐶𑐣𑐷 𑐔𑐶𑐟𑑂𑐬𑐎𑐵𑐬, 𑐀𑐘𑑂𑐖𑐣𑐵 𑐟𑐵𑐩𑑂𑐬𑐵𑐎𑐵𑐬, 𑐩𑐷𑐣𑐵 𑐰𑐖𑑂𑐬𑐵𑐔𑐵𑐬𑑂𑐫, 𑐰𑐶𑐩𑐮𑐵 𑐱𑐵𑐎𑑂𑐫, 𑐩𑐶𑐮𑐣 𑐱𑐵𑐎𑑂𑐫𑐮𑐶𑐳𑐾𑑄 𑐣𑐷𑐣𑐶𑐩𑑂𑐴𑐾𑐳𑐶𑐣𑑄 𑐧𑐵𑐏𑑄 𑐧𑑂𑐰𑐣𑐵𑑅 𑐣𑑂𑐫𑑄𑐎𑐵𑐡𑐷𑐐𑐸 𑐏𑑅 𑑋

𑐩𑐸𑑃𑐖𑑂𑐫𑐵𑐫𑑂 𑐧𑑂𑐰𑑄𑐐𑐸 𑐧𑐵𑐏𑑄𑐫𑐵𑐟 𑐎𑐫𑐵𑑅 𑐣𑐵𑑄𑐖𑐵𑑅𑐩𑑂𑐴 𑐳𑐩𑐵𑐮𑑀𑐔𑐎 𑐥𑐹𑐬𑑂𑐞 𑐟𑐵𑐩𑑂𑐬𑐵𑐎𑐵𑐬𑑄 𑐳𑐩𑐷𑐎𑑂𑐲𑐵 𑐰 𑐎𑐾𑐡𑐵𑐬 𑐳𑐶𑐟𑐸𑑄 𑐚𑐶𑐥𑑂𑐥𑐞𑐷 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐩𑐸𑑃𑐖𑑂𑐫𑐵𑐫𑐵 𑐗𑑂𑐰𑐮𑐫𑑂 𑐧𑐵𑐏𑑄 𑐔𑑂𑐰𑐩𑐶𑐥𑐶𑐣𑐶 𑐡𑐠𑐸𑐂 𑐧𑐵𑐏𑑄 𑐳𑐵𑐴𑐶𑐟𑑂𑐫𑐫𑐵𑐟 𑐎𑐫𑐵𑑅 𑐳𑐴𑐮𑐴 𑐣𑑄 𑐖𑐹𑐐𑐸 𑐏𑑅 𑑋 𑐮𑐶𑐳𑐾𑑄 𑐧𑐵𑐏𑑄 𑐏𑑂𑐫𑑅𑐫𑐵𑐟 𑐀𑐗 𑐔𑑂𑐰𑐣𑑂𑐴𑑂𑐫𑐵𑐎𑐵 𑐫𑑄𑐎𑐾𑐐𑐸 𑐣𑐶𑑄𑐟𑐶𑑄 𑐣𑐶𑐫𑐩𑐶𑐟 𑐬𑐸𑐥𑑄 𑐳𑐴𑐮𑐴 𑐫𑐵𑐣𑐵𑐔𑑂𑐰𑐣𑐾𑐩𑐵𑑅𑐐𑐸 𑐏𑑃𑐫𑑂 𑐣𑑄 𑐩𑐸𑑃𑐖𑑂𑐫𑐵𑐫𑑂 𑐧𑑂𑐰𑐟𑐶 𑐎𑐫𑐵𑐡𑐷𑐥𑐶𑑄𑐳𑑄 𑐰𑐶𑐔𑐵𑑅 𑐟𑐫𑐵𑐡𑐷𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐧𑐵𑐏𑑄 𑐔𑑂𑐰𑐩𑐶 𑐧𑐡𑑂𑐬𑐷 𑐰𑐾𑐡𑐣𑐵𑑄 𑐳𑐸𑐨𑐵𑐫𑑂 𑐡𑐾𑐕𑐵𑐣𑐵𑐡𑐷𑐐𑐸 𑐏𑑅 𑑋