𑐣𑐷𑐥𑑂𑐫𑐎𑑂𑐰𑑅𑐐𑐸 𑐰𑐶𑐰𑐶𑐢 𑐨𑐵𑐲𑐵 𑐳𑐵𑐴𑐶𑐟𑑂𑐫 𑐳𑐩𑑂𑐩𑐾𑐮𑐣 𑐎𑑂𑐰𑐔𑐵𑐮

𑐣𑐷𑐥𑑂𑐫𑐎𑑂𑐰𑑅𑐐𑐸 𑐰𑐶𑐰𑐶𑐢 𑐨𑐵𑐲𑐵 𑐳𑐵𑐴𑐶𑐟𑑂𑐫 𑐳𑐩𑑂𑐩𑐾𑐮𑐣 𑐩𑐢𑑂𑐫𑐥𑐸𑐬 𑐠𑐶𑐩𑐶𑐫𑐵 𑐟𑐵𑐴𑐵𑐣𑐣𑐶 𑐖𑐸𑐮 𑑋 𑐰𑑄𑐐𑐸 𑐩𑑄𑐐𑐮𑐰𑐵𑑅 𑐖𑐹𑐐𑐸 𑐳𑐩𑑂𑐩𑐾𑐮𑐣𑐫𑐵 𑐄𑐮𑐾𑐖𑑂𑐫𑐵 𑐣𑐾𑐥𑐵𑐮 𑐩𑐖𑐡𑐸𑐬 𑐎𑐶𑐳𑐵𑐣 𑐥𑐵𑐬𑑂𑐚𑐷𑐫𑐵 𑐣𑐵𑐫𑑅 𑐣𑐵𑐬𑐵𑐫𑐞𑐩𑐵𑐣 𑐧𑐶𑐖𑐸𑐎𑑂𑐕𑐾𑑃 𑐬𑑀𑐴𑐶𑐟𑑄 𑐫𑐵𑐣𑐵𑐡𑐐𑐶𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐣𑐰𑐵𑐳𑐾𑑄 𑐩𑐹𑐥𑐵𑐴𑐵𑑄 𑐧𑐶𑐖𑐸𑐎𑑂𑐕𑐾𑑄 𑐩𑑄𑐳𑐶𑐬 𑑔 𑐐𑐟𑐾 𑐖𑐸𑐂𑐐𑐸 𑐣𑐶𑐬𑑂𑐰𑐵𑐔𑐣𑐫𑑂 𑐐𑐛𑐧𑐣𑑂𑐢𑐣𑐫𑐵𑐟 𑐟𑑂𑐫𑐵𑐎𑐮 𑐢𑐵𑑅𑐳𑐵 𑐡𑐾𑐫𑑂𑐫𑐵 𑐀𑐳𑑂𑐟𑐶𑐟𑑂𑐰 𑐡𑐂𑐩𑐏𑐸 𑐢𑐵𑐳𑐾𑑄 𑐁𑑅 𑐴𑐾 𑐣𑑄 𑐣𑐾𑐥𑐵𑑅𑐫𑐵 𑐟𑐬𑐵𑐃 𑐎𑑂𑐲𑐾𑐟𑑂𑐬𑐫𑑂 𑐩𑐣𑐹𑐟 𑑕𑑒 𑐥𑑂𑐬𑐟𑐶𑐱𑐟𑑄 𑐩𑐮𑑂𑐫𑐵𑐎 𑐡𑐫𑐾𑐢𑐸𑑄𑐎𑐹𑐐𑐸 𑐰 𑐣𑐵𑐐𑐬𑐶𑐎 𑐋𑐣 𑐮𑐵𑐐𑐹 𑐖𑐸𑐮 𑐢𑐵𑑅𑐳𑐵 𑐗𑐷𑐐𑐸 𑐡𑐾𑐫𑑂 𑐣𑑄 𑐡𑐂𑐩𑐏𑐸 𑐢𑐫𑐵𑐡𑐶𑐮 𑑋

𑐖𑐵𑐟𑐷𑐫 𑐬𑐵𑐖𑑂𑐫𑑄 𑐡𑐾𑐫𑑂𑐫𑐵 𑐨𑐰𑐶𑐲𑑂𑐫 𑐏𑐟𑐬𑐵𑐫𑑂 𑐮𑐵𑐂𑐐𑐸 𑐖𑐎 𑐩𑐏𑐸 𑐠𑐸𑐎𑐠𑑄𑐫𑐵 𑐬𑐵𑐖𑑂𑐫𑑄 𑐴𑐶𑐣𑑂𑐡𑐹 𑐰 𑐩𑐸𑐳𑑂𑐮𑐶𑐩𑐫𑐵 𑐠𑐾𑑄 𑐫𑐸𑐡𑑂𑐢𑐫𑐵 𑐏𑐟𑐬𑐵𑑄 𑐣𑑄 𑐧𑑂𑐰𑐮𑐣𑐷𑐐𑐸 𑐡𑐵𑐰𑐷 𑐫𑐵𑐣𑐵𑐡𑐶𑐮𑑋
𑐏𑑂𑐰𑐥 𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑑂𑐬𑐩𑐸𑐏 𑐳𑐸𑐣𑐶𑐮 𑐥𑑂𑐬𑐖𑐵𑐥𑐟𑐶𑑄 𑐡𑐾𑐫𑑂𑐫𑐵 𑐁𑐥𑐵𑐮𑑄 𑐋𑐟𑐶𑐴𑐵𑐳𑐶𑐎 𑐮𑐵𑐫𑑂𑐎𑐹 𑐰 𑐳𑐩𑑂𑐥𑐡𑐵 𑐩𑐵𑐌𑐰𑐵𑐡𑐷𑑄 𑐧𑐩 𑐟𑐫𑐵𑑅 𑐢𑑂𑐰𑐳𑑂𑐟 𑐫𑐵𑐣𑐵 𑐧𑐶𑐄𑐐𑐸 𑐟𑐬 𑐏𑑂𑐰𑐥𑐫𑐵 𑐀𑐖𑑂𑐫𑐵𑑅𑐐𑐸 𑐳𑐩𑑂𑐥𑐡𑐵 𑐳𑑄𑐬𑐎𑑂𑐲𑐞 𑐫𑐵𑐣𑐵𑐟𑑅𑐐𑐸𑐮𑐶𑑄 𑐴𑐾 𑐏𑑂𑐰𑐥𑐫𑑂 𑐁𑐣𑑂𑐟𑐬𑐶𑐎 𑐰 𑐧𑐵𑐴𑑂𑐫 𑐥𑐬𑑂𑐫𑐚𑐎𑐟 𑐀𑐥𑑂𑐰𑐫𑐵 𑐰𑐣𑐵𑐔𑑂𑐰𑑄𑐐𑐸 𑐏𑑅 𑐢𑐫𑐵𑐡𑐶𑐮 𑑋

𑐏𑑂𑐰𑐥 𑐩𑐵.𑐰𑐶.𑐫𑐵 𑐥𑑂𑐬𑐵𑐔𑐵𑐬𑑂𑐫 𑐥𑑂𑐬𑐎𑐵𑐱 𑐢𑑁𑐧𑐖𑐶𑑄 𑐏𑑂𑐰𑐥 𑐣𑐐𑐬𑐥𑐵𑐮𑐶𑐎𑐵𑑄 𑐳𑑄𑐔𑐵𑐮𑐣 𑐫𑐵𑐣𑐵𑐔𑑂𑐰𑑄𑐐𑐸 𑐱𑐿𑐎𑑂𑐲𑐶𑐎 𑐳𑑄𑐳𑑂𑐠𑐵𑐫𑑂 𑐳𑐬𑑂𑐰𑐳𑐵𑐢𑐵𑐬𑐞 𑐖𑐣𑐟𑐵𑑄 𑐩𑑂𑐴𑑀 𑐱𑐸𑐮𑑂𑐎𑐫𑑂 𑐐𑐸𑐞𑐳𑑂𑐟𑐬𑐷𑐫 𑐄𑐔𑑂𑐔 𑐱𑐶𑐎𑑂𑐲𑐵 𑐴𑐵𑐳𑐶𑐮 𑐫𑐵𑐫𑐾 𑐏𑐣𑐵𑐔𑑂𑐰𑑄𑐐𑐸 𑐡𑐸 𑐢𑐫𑐵𑐡𑐶𑐮 𑑋

𑐩𑐢𑑂𑐫𑐥𑐸𑐬 𑐠𑐶𑐩𑐶 𑐣𑐐𑐬𑐥𑐵𑐮𑐶𑐎𑐵 𑑘 𑐰𑐜𑐵𑐀𑐢𑑂𑐫𑐎𑑂𑐲 𑐬𑐩𑐾𑐱 𑐠𑐵𑐥𑐵 𑐱𑑂𑐬𑐾𑐲𑑂𑐛𑑄 𑐰𑐶𑐰𑐶𑐢 𑐨𑐵𑐲𑐵 𑐳𑐵𑐴𑐶𑐟𑑂𑐫 𑐳𑐩𑑂𑐩𑐾𑐮𑐣𑐫𑐵 𑐂𑐟𑐶𑐴𑐵𑐳 𑐧𑐵𑐬𑐾 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐳𑐾𑑄 𑐠𑐶𑐩𑐶𑐫𑐵 𑐩𑐴𑐵𑐮𑐎𑑂𑐲𑑂𑐩𑐷𑐳𑑂𑐠𑐵𑐣𑐫𑑂 𑐩𑐵𑐣𑐰 𑐀𑑄𑐐 𑐥𑑂𑐬𑐟𑑂𑐫𑐵𑐬𑑀𑐥𑐞 𑐀𑐳𑑂𑐥𑐟𑐵𑐮 𑐣𑐶𑐬𑑂𑐩𑐵𑐞𑐫𑐵 𑐣𑐶𑑄𑐟𑐶𑑄 𑐖𑐐𑑂𑐐𑐵 𑐄𑐥𑐮𑐧𑑂𑐢 𑐫𑐵𑐎𑐾𑐟 𑐳𑐶𑐦𑐵𑐬𑐶𑐳 𑐕𑑂𑐰𑐫𑐾𑐢𑐸𑑄𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋

𑐱𑐶𑐎𑑂𑐲𑐵𑐳𑐾𑐰𑐷 𑐮𑐶𑐳𑐾𑑄 𑐳𑐩𑐵𑐖𑐳𑐾𑐰𑐷 𑐎𑐺𑐲𑑂𑐞𑐧𑐴𑐵𑐡𑐸𑐬 𑐥𑑂𑐬𑐖𑐵𑐥𑐟𑐶𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐖𑐶𑐮𑑂𑐮𑐵 𑐧𑐔𑐟 𑐟𑐠𑐵 𑐆𑐞 𑐳𑐴𑐎𑐵𑐬𑐷 𑐳𑑄𑐑𑐫𑐵 𑐎𑐺𑐲𑑂𑐞𑐐𑑀𑐰𑐶𑐣𑑂𑐡 𑐮𑐵𑐏𑐾, 𑐜𑐵. 𑐬𑐰𑐶𑐣𑑂𑐡𑑂𑐬𑐨𑐎𑑂𑐟 𑐥𑑂𑐬𑐢𑐵𑐣𑐵𑐜𑑂𑐜𑑄 𑐣𑑄 𑐣𑐸𑐐𑑅𑐏𑑃 𑐟𑐫𑐵𑐡𑐷𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐩𑐹𑐥𑐵𑐴𑐵𑑄 𑐧𑐶𑐖𑐸𑐎𑑂𑐕𑐾𑑄 𑐰𑐵𑐡𑑂𑐫 𑐐𑐸𑐬𑐸 𑐱𑑂𑐬𑐷𑐐𑑀𑐥𑐵𑐮 𑐥𑑂𑐬𑐖𑐵𑐥𑐟𑐶, 𑐖𑑂𑐫𑐾𑐲𑑂𑐛 𑐣𑐵𑐐𑐬𑐶𑐎 𑐴𑐶𑐬𑐵𑐎𑐵𑐖𑐷 𑐥𑑂𑐬𑐖𑐵𑐥𑐟𑐶, 𑐩𑐵𑐣𑐣𑑂𑐢𑐬 𑐐𑐸𑑄𑐮𑐵 𑐧𑐵𑐖𑑄, 𑐩𑐢𑑂𑐫𑐥𑐸𑐬 𑐐𑐸𑑄𑐮𑐵 𑐧𑐵𑐖𑑄, 𑐠𑐶𑐩𑐶 𑐐𑐸𑑄𑐮𑐵 𑐧𑐵𑐖𑑄, 𑐧𑑀𑐜𑐾 𑐣𑐷𑐮𑐧𑐵𑐬𑐵𑐴𑐷 𑐐𑑄𑐥𑑂𑐫𑐵𑐏𑑄, 𑐧𑑀𑐜𑐾 𑐖𑐵𑐟𑑂𑐬𑐵𑐫𑑂 𑐩𑑂𑐫𑐾 𑐥𑑂𑐰𑐵𑑅 𑐏𑐣𑐵𑐡𑐷𑐩𑑂𑐴 𑐧𑐸𑐡𑑂𑐢𑐎𑐺𑐲𑑂𑐞 𑐧𑐵𑐐 𑐱𑑂𑐬𑐾𑐲𑑂𑐛𑐫𑐵𑐟 𑐴𑐣𑐾𑐖𑑂𑐫𑐵 𑐣𑑄 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐣𑐾𑐥𑐵𑐮𑐨𑐵𑐲𑐵 –