𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐾𑐩𑐶𑐫𑐵 𑐎𑐰𑐶𑐟𑐵 𑐎𑐵𑐬𑑂𑐫𑐱𑐵𑐮𑐵 𑐐𑑀𑐲𑑂𑐛𑐶

𑐔𑐶𑐣𑐵𑐏𑑃 𑐰𑐶𑐢𑐵𑐫𑑂 𑐔𑑂𑐰𑐳𑐵 𑐣𑑂𑐴𑑂𑐫𑐵𑐎𑐵 𑐰𑐫𑐵𑐔𑑂𑐰𑑄𑐥𑐶𑑄 𑐣𑐾𑐰𑐵𑑅 𑐩𑐶𑐳𑐵 𑐳𑐵𑐴𑐶𑐟𑑂𑐫𑐎𑐵𑐬𑐟𑐫𑑂 𑐱𑑂𑐬𑐺𑐖𑐣𑐵 𑐰 𑐮𑐾𑐏𑐣𑐫𑐵𑐟 𑐎𑐫𑐵𑑅 𑐕𑐐𑐹 𑐎𑐵𑐬𑑂𑐫𑐱𑐵𑐮𑐵 𑐖𑐸𑐮 𑑋 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐾𑐩𑐶 𑐳𑐵𑐴𑐶𑐟𑑂𑐫 𑐎𑐰𑑅𑐫𑐵 𑐐𑑂𑐰𑐳𑐵𑐮𑐫𑑂 𑐰𑑄𑐐𑐸 𑐱𑐣𑐶𑐰𑐵𑑅 ‘𑐳𑐺𑐖𑐣𑐵𑐟𑑂𑐩𑐎 𑐔𑑂𑐰𑐫𑐵 𑐰 𑐎𑐰𑐶𑐟𑐵 𑐎𑐵𑐬𑑂𑐫𑐱𑐵𑐮𑐵 𑐐𑑀𑐲𑑂𑐛𑐶’ 𑐖𑑂𑐫𑐵𑐗𑑂𑐰𑑅 𑐖𑐹𑐐𑐸 𑐏𑑅 𑑋

𑐴𑑀𑐚𑐮 𑐴𑐶𑐮𑐳𑐵𑐂𑐜𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐮𑐳𑐎𑐸𑐳 𑐫𑐵𑐳𑐾𑑄 𑐊𑐎𑐾𑐡𑐾𑐩𑐶𑐫𑐵 𑐡𑐸𑐖𑑅𑐮𑐶𑐳𑐾𑑄 𑐳𑐵𑐴𑐶𑐟𑑂𑐫 𑐎𑐰𑑅𑐫𑐵 𑐎𑐖𑐶 𑐟𑑂𑐬𑐶𑐬𑐟𑑂𑐣 𑐱𑐵𑐎𑑂𑐫𑑄 𑐡𑐾𑐱𑐫𑑂 𑐱𑐵𑐳𑐣 𑐰𑑂𑐫𑐰𑐳𑑂𑐠𑐵𑐫𑑂 𑐴𑐶𑐄𑐥𑐵𑑅𑐫𑐵 𑐀𑐣𑐸𑐨𑐹𑐟𑐶 𑐏𑐳 𑐖𑐵𑐟𑐶 𑐕𑐠𑑂𑐰𑑅 𑐧𑐵𑐴𑐾𑐎𑑄 𑐣𑐾𑐰𑐵𑑅𑐮𑐶𑐳𑐾𑑄 𑐩𑐾𑐐𑐸 𑐐𑐸𑐐𑐸𑑄 𑐣𑑄 𑐖𑐵𑐟𑐶𑐫𑐵 𑐳𑐵𑐴𑐶𑐟𑑂𑐫 𑐏𑑂𑐫𑐮𑑄 𑐠𑐸𑐎𑐶𑐫𑐵 𑐀𑐣𑐸𑐨𑐹𑐟𑐶 𑐫𑐵𑐫𑐾 𑐏𑑄𑐐𑐸 𑐩𑐡𑐸 𑐢𑐫𑐵𑐡𑐶𑐮 𑑋 𑐮𑐶𑐳𑐾𑑄 𑐰𑐫𑑂𑐎𑐮𑑄 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐾𑐩𑐶𑐫𑐵𑐟 𑐣𑑄 𑐕𑐸𑑄 𑐣𑑄 𑐖𑑂𑐫𑐵 𑐫𑐵𑐫𑐾𑐐𑐸𑐮𑐶𑐂 𑐠𑐵𑐎𑐸𑐫𑐵𑐔𑑂𑐰𑑄𑐐𑐸 𑐏𑑃 𑐎𑐣𑐵𑐡𑐶𑐮 𑑋

𑐳𑑄𑐫𑑀𑐖𑐣 𑐰 𑐳𑐴𑐖𑐷𑐎𑐬𑐞 𑐫𑐵𑐣𑐵𑐡𑐷𑐩𑑂𑐴 𑐨𑐵𑐲𑐵𑐴𑑂𑐫𑐩𑐶 𑐜𑐵. 𑐖𑑂𑐫𑑀𑐟𑐶𑐥𑑂𑐬𑐨𑐵 𑐟𑐸𑐮𑐵𑐢𑐬𑑄 𑐊𑐎𑐾𑐡𑐾𑐩𑐶 𑐠𑐾𑑄𑐖𑑂𑐫𑐵𑑅𑐐𑐸 𑐣𑐾𑐰𑐵𑑅𑐟𑐫𑑂 𑐐𑑁𑐬𑐰𑐱𑐵𑐮𑐷 𑐥𑑂𑐬𑐵𑐖𑑂𑐘𑐶𑐎 𑐳𑑄𑐳𑑂𑐠𑐵𑑄 𑐕𑐸𑑄 𑐣𑑄 𑐖𑑂𑐫𑐵 𑐫𑐵𑐫𑐾𑐟 𑐳𑐵𑐢𑐣 𑐳𑑂𑐬𑑀𑐟𑐫𑐵 𑐀𑐨𑐵𑐰 𑐖𑐸𑐫𑐵𑐔𑑂𑐰𑑄𑐐𑐸 𑐢𑐂𑐐𑐸 𑐏𑑃 𑐣𑑂𑐫𑐣𑐾 𑐩𑐵𑐟𑑂𑐬𑑄 𑐣𑐸𑐐𑑅𑐩𑐕𑐶𑑄𑐳𑐾 𑐔𑑂𑐰𑑄 𑐢𑐵𑐳𑐾𑑄 𑐠𑐸𑐎𑐠𑑄𑐫𑐵 𑐣𑐾𑐥𑐵𑐮𑐨𑐵𑐲𑐵𑐫𑐵 𑐣𑑂𑐴𑐹𑐥𑐶𑑄 𑐰 𑐥𑐸𑐮𑐵𑑄𑐥𑐶𑑄 𑐎𑐰𑐫𑐶𑐟𑑂𑐬𑐷𑐥𑐶𑑄𑐟 𑐕𑐐𑐹 𑐴𑐾 𑐠𑐵𑐳𑐫𑑂 𑐩𑐸𑑄𑑄𑐎𑐵𑑅 𑐎𑐵𑐬𑑂𑐫𑐱𑐵𑐮𑐵 𑐐𑑂𑐰𑐳𑐵𑑅 𑐐𑑂𑐰𑑅𑐐𑐸 𑐔𑑂𑐰𑐕𑐵𑐫𑐾𑐧𑐴𑐖𑐹 𑐢𑐫𑐵𑐡𑐶𑐮 𑑋

𑐣𑐾𑐥𑐵𑐮𑐨𑐵𑐲𑐵𑐫𑐵 𑐣𑐵𑑄𑐖𑐵𑑅𑐩𑑂𑐴 𑐎𑐰𑐫𑐶𑐟𑑂𑐬𑐷 𑐩𑐫𑑂𑐖𑐸 𑐥𑑂𑐬𑐟𑐶𑐳𑐬𑐵 𑐳𑐵𑐫𑑂𑐩𑐶𑑄 𑐕𑐩𑑂𑐴 𑐩𑐶𑐳𑐵 𑐳𑑂𑐬𑐲𑑂𑐚𑐵𑐫𑐵 𑐖𑐷𑐰𑐣𑐫𑑂 𑐰𑐫𑐵𑐔𑑂𑐰𑐣𑐷𑐐𑐸 𑐴𑐵𑐠𑑂𑐫𑐵 𑐰 𑐳𑐺𑐖𑐣𑐵𑐫𑐵 𑐰𑐫𑐵𑐐𑐸 𑐣𑐶𑐬𑐣𑑂𑐟𑐬𑐟𑐵𑐫𑐵 𑐧𑐵𑐬𑐾 𑐠𑑅𑐐𑐸 𑐣𑐸𑐐𑑅𑐏𑑃 𑐟𑐫𑐵𑐡𑐷𑐐𑐸 𑐏𑑅 𑑋

𑐣𑐵𑑄𑐖𑐵𑑅𑐩𑑂𑐴 𑐮𑑂𑐫𑐵𑐫𑑂𑐩𑑂𑐴𑐩𑑂𑐴 𑐎𑐰𑐶 𑐣𑐵𑐥𑑄 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳 𑐣𑑂𑐴𑐶𑐥𑑁𑐫𑐵 𑐳𑐩𑑂𑐥𑐵𑐡𑐎 𑐳𑐸𑐬𑐾𑐱 𑐎𑐶𑐬𑐞 𑐩𑐵𑐣𑐢𑐬𑑄 𑐁𑐢𑐸𑐣𑐶𑐎 𑐔𑐶𑐣𑐵𑐏𑑃𑐫𑐵 𑐰𑐶𑐲𑐫𑐰𑐳𑑂𑐟𑐸 𑐰 𑐥𑑂𑐬𑐳𑑂𑐟𑐸𑐟𑐶𑐎𑐬𑐞𑐫𑐵 𑐧𑐵𑐬𑐾 𑐰 𑐳𑐵𑐴𑐶𑐟𑑂𑐫𑐎𑐵𑐬 𑐬𑐩𑐾𑐱𑐎𑐵𑐖𑐷 𑐳𑑂𑐠𑐵𑐥𑐶𑐟𑑄 𑐔𑐶𑐣𑐵𑐏𑑃𑐫𑑂 𑐡𑐫𑐾𑐩𑐵𑑅𑐐𑐸 𑐢𑑂𑐰𑐣𑐶, 𑐕𑐣𑑂𑐡 𑐰 𑐮𑐫𑑂 𑐧𑐵𑐬𑐾 𑐣𑐸𑐐𑑅𑐏𑑃 𑐟𑐫𑐵𑐡𑐷𑐐𑐸 𑐏𑑅 𑑋

𑐩𑐸𑑃𑐖𑑂𑐫𑐵𑐫𑐵 𑐣𑑂𑐴𑐵𑐥𑐵𑑄𑐐𑐸 𑐔𑐬𑐞𑐫𑑂 𑐧𑑂𑐰𑐟𑐶 𑐎𑐫𑐵𑐡𑐷𑐥𑐶𑑄 𑐳𑐎𑐳𑐶𑐣𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐔𑐶𑐣𑐵𑐏𑑃𑐫𑐵 𑐰𑐶𑐢𑐵 𑐩𑐡𑐶𑐎𑑂𑐎 𑐰𑐶𑐎𑐵𑐳𑐫𑐵 𑐮𑑃𑐥𑐸𑐂 𑐣𑑂𑐴𑑂𑐫𑐵𑐣𑐵 𑐔𑑂𑐰𑐣𑐾 𑐦𑐫𑐾𑐩𑐵 𑐢𑐎𑐵𑑅 𑐩𑐟 𑐠𑐶𑐫𑐵𑑅 𑐥𑐵𑑅 𑐦𑐫𑐾𑐎𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐏𑑅 𑑋 𑐣𑑂𑐴𑐵𑐥𑐵𑑄𑐐𑐸 𑐔𑐬𑐞𑐫𑐵 𑐖𑑂𑐫𑐵𑐗𑑂𑐰𑐮𑐫𑑂 𑐊𑐎𑐾𑐡𑐾𑐩𑐶𑐫𑐵 𑐨𑐵𑐂𑐳 𑐔𑐵𑐣𑑂𑐳𑐮𑐬𑐮𑐶𑐳𑐾𑑄 𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵 𑐩𑐮𑑂𑐮 𑐎𑐾. 𑐳𑐸𑐣𑑂𑐡𑐬, 𑐊𑐡𑐾𑐩𑐶𑐫𑐵 𑐳𑐡𑐳𑑂𑐫 𑐳𑐔𑐶𑐰 𑐣𑐵𑐥𑑄 𑐳𑐵𑐴𑐶𑐟𑑂𑐫𑐎𑐵𑐬 𑐜𑐵. 𑐥𑐸𑐲𑑂𑐥𑐬𑐵𑐖 𑐬𑐵𑐖𑐎𑐬𑑂𑐞𑐶𑐎𑐵𑐬𑐮𑐶𑐳𑐾𑑄 𑐡𑐸𑐖𑑅𑐥𑐶𑐣𑐶𑐐𑐸 𑐄𑐥𑐳𑑂𑐠𑐶𑐟𑐶 𑐡𑐸𑐐𑐸 𑐏𑑅 𑑋

𑐳𑐴 𑐳𑑄𑐫𑑀𑐖𑐎 𑐎𑐰𑐫𑐶𑐟𑑂𑐬𑐷 𑐬𑐖𑐣𑐷 𑐩𑐶𑐮𑐵𑑄 𑐳𑐺𑐖𑐣𑐵𑐟𑑂𑐩𑐎 𑐔𑑂𑐰𑐖𑑂𑐫𑐵𑐫𑑂 𑐔𑐶𑐣𑐵𑐏𑑃𑐫𑐵 𑐳𑐺𑐖𑐣𑐵, 𑐔𑐶𑐣𑐵𑐏𑑃𑐫𑐵 𑐬𑐸𑐥 𑐰 𑐔𑐶𑐣𑐵𑐏𑑃𑐫𑑂 𑐡𑐫𑐾𑐩𑐵𑑅𑐐𑐸 𑐟𑐟𑑂𑐰𑐫𑐵 𑐧𑐵𑐬𑐾 𑐎𑐣𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐬𑐱𑑂𑐩𑐶 𑐣𑐵𑐥𑐶𑐟, 𑐱𑑀𑐨𑐵 𑐩𑐴𑐬𑑂𑐖𑐣, 𑐴𑐶𑐳𑐶𑐮𑐶𑐣𑐵 𑐱𑐵𑐎𑑂𑐫, 𑐱𑐶𑐩𑐮𑐵 𑐱𑐬𑑂𑐩𑐵, 𑐩𑐶𑐣𑐬𑑂𑐨𑐵 𑐱𑐬𑑂𑐩𑐵 𑐮𑐐𑐵𑐫𑐟 𑐁𑐥𑐵𑐮𑑄 𑐣𑑂𑐴𑐹𑐥𑐶𑑄 𑐰 𑐥𑐸𑐮𑐵𑑄𑐥𑐶𑑄 𑐩𑐶𑐳𑐵 𑐳𑐵𑐴𑐶𑐟𑑂𑐫𑐎𑐵𑐬𑐥𑐶𑐣𑐶𑐐𑐸 𑐄𑐥𑐳𑑂𑐠𑐶𑐟𑐶 𑐡𑐸𑐐𑐸 𑐏𑑅 𑑋 𑐠𑑂𑐰 𑐴𑐾 𑐗𑑂𑐰𑐮𑐫𑑂 𑐫𑐵𑐎𑐣𑑄 𑐴𑐾 𑐩𑐶𑐳𑐵 𑐔𑑂𑐰𑐩𑐶𑐥𑐶𑐣𑐶𑐐𑐸 𑐔𑐶𑐣𑐵𑐏𑑃 𑐩𑐸𑐣𑐵 𑐖𑑂𑐫𑐵𑐗𑑂𑐰𑑅 𑐫𑐵𑐂𑐐𑐸 𑐖𑐹𑐐𑐸𑐸 𑐡𑐸 𑑋