𑐣𑐾𑐰𑐵𑑅 𑐴𑐵𑐂𑐎𑐸 𑐳𑐦𑐹 𑐥𑐶𑐡𑐣

𑐧𑐸𑐡𑑂𑐢 𑐡𑐬𑑂𑐱𑐣, 𑐖𑑂𑐘𑐵𑐣, 𑐱𑐶𑐎𑑂𑐲𑐵𑐫𑐵𑐟 𑐩𑐹 𑐧𑐶𑐲𑐫 𑐡𑐫𑐾𑐎𑐵 𑐐𑑂𑐰𑐳𑐵𑑅𑐐𑑂𑐰𑑅𑐐𑐸 𑐧𑑁𑐡𑑂𑐢 𑐴𑐵𑐂𑐎𑐸 𑐳𑐵𑐴𑐶𑐟𑑂𑐫 𑐢𑐾𑑄𑐢𑐾𑑄𑐧𑐮𑑂𑐮𑐵𑐎𑐵𑐳𑐵𑐫𑐵 𑐟𑑂𑐫𑐵𑐎𑐵𑐩𑐶𑐥𑐶𑐣𑑂𑐟 𑐳𑐶𑐬𑐥𑐵𑑅 𑐣𑐵𑐥𑑄 𑐡𑐳𑐶𑐥𑑁 𑐮𑑅𑐮𑑂𑐴𑐵𑑅𑐐𑐸 𑐡𑐸 𑑋

𑑖𑑔 𑐩𑑂𑐴 𑐴𑐵𑐂𑐖𑐶𑐣𑐟𑐫𑐳𑑄 𑐧𑑂𑐰𑐟𑐶 𑐎𑐫𑐵𑐡𑐷𑐐𑐸 𑐢𑐾𑑄𑐢𑐾𑑄𑐧𑐮𑑂𑐮𑐵 𑐎𑐵𑐳𑐵𑐫𑑂 𑐧𑐶𑐩𑐮𑐥𑑂𑐬𑐨𑐵 𑐧𑐖𑑂𑐬𑐵𑐔𑐵𑐬𑑂𑐫, 𑐩𑐶𑐮𑐣 𑐱𑐵𑐎𑑂𑐫, 𑐬𑐵𑐩𑐾𑐱𑑂𑐰𑐬 𑐱𑑂𑐬𑐾𑐲𑑂𑐛 𑐖𑐮𑐣, 𑐬𑐵𑐩𑐾𑐱𑑂𑐰𑐬 𑐩𑐶𑐱𑑂𑐬𑐞 𑐱𑑂𑐬𑐾𑐲𑑂𑐛 𑐰 𑐬𑐶𑐟𑐵 𑐩𑐴𑐬𑑂𑐖𑐣 𑐫𑐵𑐣𑐵 𑐣𑑂𑐫𑐵𑐩𑑂𑐴 𑐄𑐟𑑂𑐎𑐺𑐲𑑂𑐚 𑐴𑐵𑐂𑐖𑐶𑐣 𑐑𑑀𑐲𑐞𑐵 𑐖𑐹𑐐𑐸 𑐏𑑅 𑑋 𑐁𑐣𑐣𑑂𑐡𑐳𑐶𑐡𑑂𑐢𑐶 𑐟𑐸𑐮𑐵𑐢𑐬, 𑐧𑐡𑑂𑐬𑐶 𑐧𑐾𑐡𑐣𑐵, 𑐧𑐸𑐡𑑂𑐢𑐮𑐎𑑂𑐲𑑂𑐩𑐷 𑐧𑐖𑑂𑐬𑐵𑐔𑐵𑐬𑑂𑐫, 𑐡𑐶𑐧𑑂𑐫𑐵 𑐟𑐵𑐩𑑂𑐬𑐵𑐎𑐵𑐬, 𑐥𑑂𑐬𑐡𑐷𑐥 𑐁𑐬. 𑐟𑐸𑐮𑐵𑐢𑐬, 𑐬𑐵𑐖𑐸 𑐣𑐵𑐥𑐶𑐟, 𑐬𑐶𑐟𑐵 𑐩𑐴𑐬𑑂𑐖𑐣 𑐰 𑐟𑐾𑐖𑐎𑐺𑐲𑑂𑐞 𑐱𑑂𑐬𑐾𑐲𑑂𑐛 𑐫𑐵𑐣𑐵 𑑘𑐩𑑂𑐴 𑐴𑐵𑐖𑐶𑐣𑐟𑐫𑐳𑑄 𑐴𑑅𑐥𑐵 𑐳𑐶𑐬𑐥𑐵 𑐟𑑂𑐫𑐵𑐎𑐵𑐡𑐷𑐐𑐸 𑐏𑑅 𑑋 𑐄𑐟𑑂𑐎𑐺𑐲𑑂𑐚 𑐰 𑐴𑑅𑐥𑐵 𑐫𑐵𑐣𑐵 𑐳𑐶𑐬𑐥𑐵𑑅 𑐟𑑂𑐫𑐵𑐎𑐵𑐡𑐷𑐥𑐶𑑄 𑑑𑑓𑐩𑑂𑐴𑐾𑐳𑐶𑐟 𑐣𑐾𑐥𑐵𑐮 𑐥𑑂𑐬𑐖𑑂𑐘𑐵𑐥𑑂𑐬𑐟𑐶𑐲𑑂𑐛𑐵𑐣𑐎𑐵 𑐄𑐥𑐎𑐸𑐮𑐥𑐟𑐶 𑐧𑐶𑐩𑐮 𑐣𑐶𑐨𑐵𑑅 𑐱𑑂𑐬𑐾𑐲𑑂𑐛𑑄 𑐳𑐶𑐬𑐥𑐵 𑐰 𑐡𑐳𑐶𑐥𑑁 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐢𑐾𑑄𑐢𑐾𑑄𑐧𑐮𑑂𑐮𑐵 𑐎𑐵𑐳𑐵𑐫𑑂 𑐡𑐸𑐠𑑂𑐫𑐵𑑅𑐥𑐶𑑄 𑐴𑐵𑐂𑐖𑐶𑐣𑐟𑐫𑐐𑐸 𑐗𑐶𑐥𑐸 𑐴𑐵𑐂𑐎𑐸 𑐩𑐢𑑂𑐫𑐾 𑐄𑐟𑑂𑐎𑐺𑐲𑑂𑐚 𑐣𑑂𑐫𑐵𑐥𑐸 𑐴𑐵𑐂𑐎𑐸 𑐩𑐸𑐣𑐵𑑅 𑐥𑐶𑐠𑑄𑐐𑐸 “𑐧𑑁𑐡𑑂𑐢 𑐴𑐵𑐂𑐎𑐸” 𑐳𑐦𑐹 𑐣𑑄 𑐔𑐶𑐏𑐶𑐦𑑂𑐫𑐣𑐾 𑐖𑑂𑐫𑐵 𑐖𑐹𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫 𑐄𑐥𑐎𑐸𑐮𑐥𑐟𑐶 𑐰𑐶𑐩𑐮 𑐣𑐶𑐨𑐵𑑅, 𑐮𑐸𑐩𑑂𑐧𑐶𑐣𑐷 𑐧𑑁𑐡𑑂𑐢 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑐵 𑐣𑐶𑐩𑐶𑐟𑑂𑐟 𑐄𑐥𑐎𑐸𑐮𑐥𑐟𑐶 𑐟𑐶𑐮𑐎𑐬𑐵𑐩 𑐁𑐔𑐵𑐬𑑂𑐫 𑐰 𑐜𑐶𑐣 𑐩𑐵𑐞𑐶𑐎𑐬𑐟𑑂𑐣 𑐱𑐵𑐎𑑂𑐫𑑄 𑐩𑑄𑐎𑐵𑑅𑐎𑐠𑑄 𑐄𑐐𑐸 𑐳𑐦𑐹𑐫𑐵 𑐔𑐶𑐏𑐶𑐦𑑂𑐫𑐣𑐾 𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐣𑐾𑐰𑐵𑑅 𑐴𑐵𑐂𑐎𑐸 𑐏𑑂𑐫𑑅 𑐰 𑐮𑐸𑐩𑑂𑐰𑐶𑐣𑐷 𑐧𑑁𑐡𑑂𑐢 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫 𑐧𑑁𑐡𑑂𑐢 𑐀𑐢𑑂𑐫𑐫𑐣 𑐳𑑄𑐎𑐵𑐫𑐫𑐵 𑐩𑑄𑐎𑐵𑑅 𑐐𑑂𑐰𑐳𑐵𑐮𑐫𑑂 𑐖𑐹𑐐𑐸 𑐢𑐾𑑄𑐢𑐾𑑄𑐧𑐮𑑂𑐮𑐵 𑐎𑐵𑐳𑐵𑑄 𑐣𑐾𑐥𑐵𑐮𑐩𑐞𑑂𑐜𑐮𑐫𑐵 𑐧𑑁𑐡𑑂𑐢 𑐂𑐟𑐶𑐴𑐵𑐳, 𑐳𑐨𑑂𑐫𑐟𑐵, 𑐎𑐮𑐵, 𑐳𑑄𑐳𑑂𑐎𑐺𑐟𑐶𑐫𑐵 𑐀𑐢𑑂𑐫𑐫𑐣 𑐀𑐢𑑂𑐫𑐵𑐥𑐣𑐫𑑂 𑐐𑑂𑐰𑐵𑐴𑐵𑐮𑐶 𑐰 𑐟𑐶𑐰𑑅 𑐖𑐸𑐂𑐩𑐵 𑐢𑐎𑐵𑑅 𑐧𑑁𑐡𑑂𑐢 𑐴𑐵𑐂𑐎𑐸 𑐢𑐾𑑄𑐢𑐾𑑄𑐧𑐮𑑂𑐮𑐵𑐎𑐵𑐳𑐵 𑐐𑑂𑐰𑐳𑐵𑑅𑐐𑑂𑐰𑐫𑐵𑐐𑐸 𑐣𑐾𑐰𑐵𑑅 𑐴𑐵𑐂𑐎𑐸 𑐏𑑂𑐫𑑅𑐫𑐵 𑐎𑐖𑐶 𑐳𑐸𑐬𑐾𑐱 𑐥𑑂𑐬𑐢𑐵𑐣𑑄 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋

𑐣𑐾𑐥𑐵𑐮𑐷 𑐳𑐵𑐴𑐶𑐟𑑂𑐫 𑐎𑑂𑐲𑐾𑐟𑑂𑐬𑐫𑑂 𑐧𑐸𑐮𑐸𑐴𑐸𑑄 𑐠𑐵𑐫𑑂 𑐎𑐫𑐵𑐔𑑂𑐰𑑄𑐐𑐸 𑐳𑐵𑐴𑐶𑐟𑑂𑐫𑐶𑐎 𑐰𑐶𑐢𑐵 𑐴𑐵𑐂𑐎𑐸 𑐖𑐹𑐐𑐸 𑐢𑐫𑐵𑐡𑐶𑐳𑐾𑑄 𑐠𑑂𑐰 𑐳𑐵𑐴𑐶𑐟𑑂𑐫 𑐎𑑂𑐲𑐾𑐟𑑂𑐬𑐫𑐵 𑐔𑐷𑐢𑑄𑐐𑐸 𑐳𑑂𑐰𑐬𑐸𑐥 𑐖𑐹𑐐𑐸 𑐣𑑄 𑐎𑐖𑐶 𑐥𑑂𑐬𑐢𑐵𑐣𑑄 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋

𑐢𑐾𑑄𑐢𑐾𑑄𑐧𑐮𑑂𑐮𑐵𑐫𑑂 𑐡𑐸𑐠𑑂𑐫𑐵𑐐𑐸 𑐴𑐵𑐂𑐎𑐸𑐫𑐵𑐟 𑐥𑑂𑐬𑐵.𑐜𑐵.𑐧𑐖𑑂𑐬𑐬𑐵𑐖 𑐱𑐵𑐎𑑂𑐫, 𑐜𑐵. 𑐥𑐸𑐲𑑂𑐥𑐬𑐵𑐖 𑐬𑐵𑐖𑐎𑐬𑑂𑐞𑐶𑐎𑐵𑐬 𑐰 𑐢𑑂𑐬𑐸𑐰 𑐩𑐢𑐶𑐎𑐬𑑂𑐩𑐷𑐫𑐵 𑐣𑐶𑐬𑑂𑐞𑐵𑐫𑐎 𑐩𑐞𑑂𑐜𑐮𑑄 𑐮𑑂𑐫𑐖𑑂𑐫𑐵𑐫𑐾𑐐𑐸 𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋