𑐧𑑂𑐰𑐣𑐾𑐎𑐸𑐠𑐶 𑐔𑐵𑐫𑐾𑐎𑐾𑐟 ‘𑐔𑑂𑐫𑐵𑐬𑐶𑐚𑐷 𑐜𑐶𑐣𑐬’ 𑐖𑑂𑐫𑐵𑐗𑑂𑐰𑑅

𑐐𑐸𑐠𑐶 𑐀𑐳𑑂𑐚𑑂𑐬𑐾𑐮𑐶𑐫𑐵𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐧𑑂𑐰𑐣𑐾𑐎𑐸𑐠𑐶 𑐔𑐵𑐫𑐾𑐎𑐷𑐐𑐸 𑐖𑐹𑐐𑐸 𑐡𑐸 𑑋 𑐐𑐸𑐠𑐶 𑐀𑐳𑑂𑐚𑑂𑐬𑐾𑐮𑐶𑐫𑐵𑑄‘𑐐𑐸𑐠𑐶 𑐧𑑂𑐰𑐣𑐾𑐎𑐸𑐠𑐶’ 𑐣𑐵𑐩𑑄 𑐧𑑂𑐰𑐣𑐾𑐎𑐸𑐠𑐶 𑐔𑐵𑐫𑐾𑐎𑐾𑐟𑑂𑐫𑑄𑐐𑐸 𑐏𑑅 𑑋 𑐧𑑂𑐰𑐣𑐾𑐎𑐸𑐠𑐶 𑐔𑐵𑐫𑐾𑐎𑐾𑐟 𑐎𑑀𑐲 𑐣𑐷𑐳𑑂𑐰𑐣𑐾𑐫𑐵 𑐣𑐶𑑄𑐟𑐶𑑄 𑐰𑑄𑐐𑐸 𑐱𑐣𑐶𑐰𑐵𑑅 𑐕𑐐𑐹 𑐟𑑅𑐖𑐶𑐐𑐸 ‘𑐔𑑂𑐫𑐵𑐬𑐶𑐚𑐷 𑐜𑐶𑐣𑐬’ 𑐖𑑂𑐫𑐵𑐗𑑂𑐰𑑅𑐫𑐵 𑐐𑑂𑐰𑐳𑐵𑑅 𑐐𑑂𑐰𑑅𑐐𑐸 𑐡𑐸 𑑋

𑐐𑐸𑐠𑐶 𑐀𑐳𑑂𑐚𑑂𑐬𑐾𑐮𑐶𑐫𑐵𑑄 𑐳𑑄𑐔𑐵𑐮𑐣 𑐫𑐵𑐫𑐾𑐟𑑂𑐫𑑄𑐐𑐸 𑐐𑐸𑐠𑐶 𑐧𑑂𑐰𑐣𑐾𑐎𑐸𑐠𑐶 𑐴𑐵𑐮𑐫𑑂 𑐖𑐎 𑐀𑐳𑑂𑐚𑑂𑐬𑐾𑐮𑐶𑐫𑐵𑑄 𑐳𑐬𑐎𑐵𑐬𑐫𑑂 𑐡𑐬𑑂𑐟𑐵 𑐣𑑄 𑐫𑐵𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐧𑑂𑐰𑐣𑐾𑐎𑐸𑐠𑐶 𑐡𑐬𑑂𑐟𑐵𑐮𑐶𑐳𑐾𑑄 𑐨𑐵𑐲𑐵 𑐎𑐎𑑂𑐲𑐵 𑐳𑑄𑐔𑐵𑐮𑐣 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸𑐳𑐵 𑐠𑑂𑐰 𑐗𑑂𑐰𑐮𑐫𑑂 𑐁𑑅 𑐨𑐵𑐲𑐵, 𑐎𑐮𑐵, 𑐳𑑄𑐳𑑂𑐎𑐺𑐟𑐶 𑐣𑑄 𑐀𑐢𑑂𑐫𑐫𑐣 𑐫𑐵𑐎𑐾𑐐𑐸 𑐮𑑂𑐫𑐵𑐏𑑄 𑐧𑑂𑐰𑐣𑐾𑐎𑐸𑐠𑐶𑐫𑐵 𑐬𑐸𑐥𑐫𑑂 𑐳𑑄𑐔𑐵𑐮𑐣 𑐫𑐵𑐫𑐾𑐐𑐸 𑐟𑐫𑐵𑐬𑐷 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐐𑐸𑐠𑐶𑐫𑐵 𑐀𑐳𑑂𑐚𑑂𑐬𑐾𑐮𑐶𑐫𑐵𑑄 𑐣𑐵𑐫𑑅 𑐄𑐩𑐾𑐱 𑐣𑐵𑐥𑐶𑐟𑑄 𑐐𑐸𑐠𑐶 𑐀𑐳𑑂𑐚𑑂𑐬𑐾𑐮𑐶𑐫𑐵𑑄𑐥𑐵𑐏𑐾𑑄 𑐳𑑄𑐔𑐵𑐮𑐣 𑐫𑐵𑐣𑐵𑐔𑑂𑐰𑑄𑐐𑐸 𑐧𑑂𑐰𑐣𑐾𑐎𑐸𑐠𑐶𑐫𑐵 𑐣𑐶𑑄𑐟𑐶𑑄 𑐔𑐣𑑂𑐡𑐵 𑐳𑑄𑐎𑐮𑐣 𑐫𑐵𑐫𑐾𑐐𑐸 𑐮𑑂𑐫𑐵𑐏𑑄 𑐔𑑂𑐫𑐵𑐬𑐶𑐚𑐷 𑐜𑐶𑐣𑐬 𑐖𑑂𑐫𑐵𑐗𑑂𑐰𑑅 𑐐𑑂𑐰𑐳𑐵𑑅 𑐐𑑂𑐰𑐫𑐵𑐐𑐸 𑐰 𑐖𑑂𑐫𑐵𑐗𑑂𑐰𑐮𑐫𑑂 𑐡𑐎𑑂𑐰𑑄 𑐳𑐵𑐩𑐸𑐡𑐵𑐫𑐶𑐎 𑐳𑑄𑐳𑑂𑐠𑐵, 𑐳𑑄𑐳𑑂𑐠𑐵𑐫𑐵 𑐡𑐸𑐖𑑅𑐮𑐶𑐳𑐾𑑄 𑐱𑐸𑐨𑐾𑐔𑑂𑐕𑐸𑐎𑐥𑐶𑑄𑐟 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑐣𑐾𑐎𑐸𑐠𑐶𑐫𑐵 𑐣𑐶𑑄𑐟𑐶𑑄 𑐎𑑀𑐲𑐫𑑂 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐟 𑐰 𑐄𑐎𑐶𑐫𑐵 𑐣𑐶𑑄𑐟𑐶𑑄 𑐜𑐶𑐣𑐬 𑐖𑑂𑐫𑐵𑐗𑑂𑐰𑐮𑐫𑑂 𑐧𑑂𑐰𑐟𑐶 𑐎𑐵𑐫𑐾𑐟 𑐂𑐣𑐵𑐥 𑐫𑐵𑐣𑐵𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋

𑐔𑑂𑐫𑐵𑐬𑐶𑐚𑐷 𑐜𑐶𑐣𑐬 𑐖𑑂𑐫𑐵𑐗𑑂𑐰𑐮𑐫𑑂 𑐀𑐳𑑂𑐚𑑂𑐬𑐾𑐮𑐶𑐫𑐵𑑄𑐫𑐵 𑐣𑐶𑑄𑐟𑐶𑑄 𑐣𑐾𑐥𑐵𑑅𑐫𑐵 𑐬𑐵𑐖𑐡𑐹𑐟 𑐎𑐿𑐮𑐵𑐱𑐬𑐵𑐖 𑐥𑑀𑐏𑐬𑐮𑐾 𑐩𑐹𑐥𑐵𑐴𑐵𑑄𑐎𑐠𑑄 𑐗𑐵𑐫𑐵𑐡𑐷𑐐𑐸 𑐏𑑅𑐳𑐵 𑐎𑑂𑐫𑐵𑐣𑑂𑐚𑐬𑐧𑐾𑐬𑐷𑐫𑐵 𑐳𑐵𑑄𑑄𑐳𑐡𑐮𑐶𑐳𑐾𑑄 𑐣𑑂𑐫𑐹 𑐳𑐵𑐄𑐠 𑐰𑐾𑐮𑑂𑐳𑐫𑐵 𑐍𑐡𑑂𑐫𑑀𑐐𑐶𑐎 𑐩𑐣𑑂𑐟𑑂𑐬𑐷, 𑐎𑐵𑐬𑑂𑐫 𑐳𑑂𑐰𑐵𑐳𑑂𑐠𑑂𑐫 𑐰 𑐳𑐸𑐬𑐎𑑂𑐲𑐵 𑐩𑐣𑑂𑐟𑑂𑐬𑐷 𑐰𑐶𑐱𑐾𑐲 𑐥𑐵𑐴𑐵𑑄𑐎𑐠𑑄 𑐧𑑂𑐰𑐟𑐶 𑐎𑐫𑐵𑐡𑐷𑐐𑐸 𑐏𑑅 𑑋

𑐐𑐸𑐠𑐶 𑐀𑐳𑑂𑐚𑑂𑐬𑐾𑐮𑐶𑐫𑐵𑑄𑐫𑐵 𑐳𑑄𑐳𑑂𑐠𑐵𑐥𑐎 𑐥𑐡𑐩 𑐱𑐵𑐎𑑂𑐫𑑄 𑐐𑐸𑐠𑐶 𑐀𑐳𑑂𑐚𑑂𑐬𑐾𑐮𑐶𑐫𑐵𑑄𑐫𑐵 𑐧𑑂𑐰𑐣𑐾𑐎𑐸𑐠𑐶𑐫𑐵 𑐣𑐶𑑄𑐟𑐶𑑄 𑐔𑐣𑑂𑐡𑐵 𑐳𑑄𑐎𑐮𑐣 𑐫𑐵𑐫𑐾𑐐𑐸 𑐮𑑂𑐫𑐵𑐏𑑄 𑐐𑑂𑐰𑐳𑐵𑑅 𑐐𑑂𑐰𑐫𑐵𑐐𑐸 𑐔𑑂𑐫𑐵𑐬𑐶𑐚𑐷 𑐜𑐶𑐣𑐬 𑐖𑑂𑐫𑐵𑐗𑑂𑐰𑐮𑐫𑑂 𑐡𑐎𑑂𑐰𑑄 𑐳𑐩𑐸𑐡𑐵𑐫𑐫𑐵 𑐥𑑂𑐬𑐟𑐶𑐣𑐶𑐢𑐶 𑐰 𑐡𑐸𑐖𑑅𑐥𑐶𑑄𑐟 𑐮𑐳𑐎𑐸𑐳 𑐫𑐵𑐫𑐾 𑐏𑐣𑐵𑑅 𑐠𑑅𑐥𑐶𑑄 𑐟𑐳𑐎𑑄 𑐮𑐫𑑂𑐟𑐵𑑅𑐐𑐸 𑐏𑑃 𑐎𑐣𑐵𑐡𑐶𑐮 𑑋 𑐮𑐶𑐳𑐾𑑄 𑐄𑐐𑐸 𑐖𑑂𑐫𑐵𑐗𑑂𑐰𑑅 𑐟𑐵𑑅𑐮𑐵𑐎𑐾𑐟 𑐥𑑂𑐬𑐵𑐫𑑀𑐖𑐣 𑐫𑐵𑐣𑐵𑐡𑐷𑐥𑐶𑑄, 𑐳𑐬𑑀𑐎𑐵𑐬𑐰𑐵𑐮𑐵 𑐰 𑐳𑐎𑐮 𑐣𑐾𑐥𑐵𑑅𑐩𑐶 𑐳𑐩𑐸𑐡𑐵𑐫𑐫𑐵𑐟 𑐣𑑄 𑐳𑐸𑐨𑐵𑐫𑑂 𑐡𑐾𑐕𑐵𑐳𑐾 𑐀𑐨𑐶𑐫𑐵𑐣𑑄 𑐐𑐟𑐶 𑐎𑐵𑐂𑐐𑐸 𑐰𑐶𑐱𑑂𑐰𑐵𑐳 𑐥𑑂𑐰𑑄𑐎𑐵𑐡𑐶𑐮 𑑋

𑐳𑑄𑐳𑑂𑐠𑐵 𑐡𑐸𑐖𑑅𑐮𑐶𑐳𑐾𑑄 𑐐𑐸𑐠𑐶 𑐧𑑂𑐰𑐣𑐾𑐎𑐸𑐠𑐶𑐫𑐵 𑐳𑑄𑐫𑑀𑐖𑐎 𑐱𑑂𑐫𑐵𑐩 𑐳𑐿𑑄𑐖𑐹𑑄 𑐠𑐸𑐎𑐠𑑄𑐫𑐵 𑐖𑑂𑐫𑐵𑐗𑑂𑐰𑑅 𑐧𑑂𑐰𑐣𑐾𑐎𑐸𑐠𑐶𑐫𑐵𑐟 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐟 𑐰 𑐩𑐵𑐣𑑂𑐫𑐟𑐵 𑐥𑑂𑐬𑐡𑐵𑐣 𑐫𑐵𑐎𑐾𑐫𑐵 𑐣𑐶𑑄𑐟𑐶𑑄 𑐐𑑂𑐰𑐳𑐵𑑅 𑐐𑑂𑐰𑐫𑐵𑐐𑐸 𑐰 𑐠𑑁𑑄𑐎𑐣𑑂𑐴𑐫𑑂 𑐧𑑂𑐰𑐣𑐾𑐎𑐸𑐠𑐶𑐂 𑑑𑑔 𑐩𑑂𑐴 𑐰𑐶𑐡𑑂𑐫𑐵𑐬𑑂𑐠𑐷𑐟 𑐀𑐢𑑂𑐫𑐫𑐣 𑐫𑐵𑐣𑐵𑐔𑑂𑐰𑑄𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋 𑐐𑐸𑐠𑐶 𑐀𑐳𑑂𑐚𑑂𑐬𑐾𑐮𑐶𑐫𑐵𑐫𑐵 𑐥𑐸𑐮𑐵𑑄𑐩𑑂𑐴 𑐣𑐵𑐫𑑅 𑐐𑐸𑐥𑑂𑐟 𑐱𑑂𑐬𑐾𑐲𑑂𑐛𑑄 𑐧𑑂𑐰𑐣𑐾𑐎𑐸𑐠𑐶𑐫𑐵 𑐀𑐢𑑂𑐫𑐎𑑂𑐲𑐫𑐵 𑐨𑐵𑐮𑐵 𑐎𑐫𑐵𑐔𑑂𑐰𑐣𑐵𑐡𑐷𑐐𑐸 𑐡𑐸 𑑋 𑐄𑐐𑐸 𑐂𑐮𑐫𑑂 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐫𑐵𑐗𑑂𑐰𑑅 𑐣𑑄 𑐣𑑂𑐴𑑂𑐫𑐧𑑂𑐰𑑅𑐐𑐸 𑐏𑑅 𑑋