𑐩𑐔𑐵 𑐳𑐵𑐴𑐶𑐟𑑂𑐫 𑐔𑑂𑐰𑐣𑑂𑐴𑑂𑐫𑐵𑐎𑐾𑐟 𑐳𑐴𑐮𑐴

𑐩𑑂𑐴𑑀 𑐖𑐸𑐫𑐵 𑐰𑐣𑐵𑐔𑑂𑐰𑑄𑐐𑐸 𑐣𑐾𑐥𑐵𑐮𑐨𑐵𑐲𑐵 𑐩𑐔𑐵 𑐳𑐵𑐴𑐶𑐟𑑂𑐫 𑐔𑑂𑐰𑐣𑑂𑐴𑑂𑐫𑐵𑐎𑐾𑐐𑐸 𑐟𑐵𑑅 𑐟𑐫𑐵𑑅 𑐩𑑂𑐴𑐶𑐐𑑅 𑐫𑐾𑑃𑐫𑑂 𑐕𑐐𑐹 𑐳𑐴𑐮𑐴 𑐐𑑀𑐲𑑂𑐛𑐷 𑐖𑐸𑐮 𑑋 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹 𑐫𑐾𑑃 𑐩𑐣𑐥𑐵 𑑒𑑓 𑐰𑐜𑐵 𑐎𑐔𑐵𑐫𑐵 𑐐𑑂𑐰𑐳𑐵𑐮𑐫𑑂 𑐖𑐹𑐐𑐸 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑑒𑑓 𑐰𑐜𑐵 𑐎𑐔𑐵𑑄 𑐁𑑅 𑐠𑑅𑐥𑐶𑑄𑐳𑑄 𑐩𑐔𑐵 𑐳𑐵𑐴𑐶𑐟𑑂𑐫𑐫𑑂 𑐖𑐎 𑐎𑐾𑐣𑑂𑐡𑑂𑐬𑐶𑐟 𑐖𑐸𑐫𑐵𑑅 𑐖𑑂𑐫𑐵𑐏𑑃 𑐣𑑂𑐴𑑂𑐫𑐵𑐎𑐵 𑐰𑐣𑐾𑐐𑐸 𑐢𑐎𑐵𑑅 𑐑𑑀𑐲𑐞𑐵 𑐫𑐵𑑅𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐡𑐾𑐫𑑂 𑐡𑐧𑐹𑐫𑐵 𑐣𑐵𑐫𑑅 𑐥𑐰𑐶𑐟𑑂𑐬 𑐰𑐖𑑂𑐬𑐵𑐔𑐵𑐬𑑂𑐫𑑄 𑐳𑐴𑐮𑐴𑐥𑐵𑐏𑐾𑑄 𑐰𑑅𑐐𑐸 𑐳𑐸𑐗𑐵𑐰𑐫𑐵𑐟 𑐣𑑂𑐴𑑂𑐫𑑅𑐣𑐾 𑐟𑐫𑐵𑑅 𑐁𑑅 𑐎𑐔𑐵𑐥𑐵𑐏𑐾𑑄 𑐩𑐔𑐵 𑐳𑐵𑐴𑐶𑐟𑑂𑐫 𑐔𑑂𑐰𑐣𑑂𑐴𑑂𑐫𑐵𑐎𑐾𑐟 𑐠𑐷𑐠𑐷 𑐖𑑂𑐫𑐵𑐗𑑂𑐰𑑅 𑐫𑐵𑐣𑐵 𑐰𑐣𑐾𑐐𑐸 𑐏𑑃 𑐎𑐣𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐰𑐬𑐶𑐲𑑂𑐛 𑐳𑐵𑐴𑐶𑐟𑑂𑐫𑐎𑐵𑐬 𑐬𑐩𑐾𑐱𑐎𑐵𑐖𑐷 𑐳𑑂𑐠𑐵𑐥𑐶𑐟𑑄 𑐖𑑂𑐫𑐵𑐥𑑁 𑐣𑑂𑐴𑑂𑐫𑐧𑑂𑐰𑐳𑐾𑑄 𑐩𑐔𑐵 𑐳𑐵𑐴𑐶𑐟𑑂𑐫 𑐔𑑂𑐰𑐣𑑂𑐴𑑂𑐫𑐵𑐎𑐾𑐐𑐸 𑐮𑐵𑐐𑐶𑑄 𑐫𑐵𑐫𑐾𑐩𑐵𑑅𑐐𑐸 𑐠𑐷𑐠𑐷 𑐖𑑂𑐫𑐵𑐗𑑂𑐰𑑅𑐟 𑐥𑑂𑐬𑐳𑑂𑐟𑐵𑐰 𑐫𑐵𑐣𑐵𑐡𑐶𑐮 𑑋 𑐨𑐵𑐲𑐵 𑐁𑐫𑑀𑐐𑐫𑐵 𑐡𑐸𑐖𑑅 𑐳𑐸𑐬𑐾𑐱 𑐎𑐶𑐬𑐞𑑄 𑐩𑐔𑐵 𑐳𑐵𑐴𑐶𑐟𑑂𑐫 𑐔𑑂𑐰𑐣𑑂𑐴𑑂𑐫𑐵𑐎𑐾𑐐𑐸 𑐮𑐵𑐐𑐶𑑄 𑑒𑑓 𑐰𑐜𑐵𑐫𑐵 𑐮𑑂𑐫𑐵𑐫𑑂𑐩𑑂𑐴𑐟 𑐣𑑂𑐴𑑂𑐫𑐔𑐶𑐄𑐐𑐸 𑐮𑐳𑐟𑐵𑐫𑐵 𑐏𑑃 𑐏𑑅 𑐢𑐫𑐵𑐡𑐶𑐮 𑑋 𑑒𑑓 𑐰𑐜𑐵𑐫𑐵 𑐰𑐜𑐵 𑐀𑐢𑑂𑐫𑐎𑑂𑐲 𑐩𑐔𑐵𑐬𑐵𑐖𑐵 𑐩𑐴𑐬𑑂𑐖𑐣𑑄 𑐠𑐖𑑂𑐫𑐵𑑅𑐐𑐸 𑐬𑐔𑐣𑐵𑐟𑑂𑐩𑐎 𑐖𑑂𑐫𑐵𑐏𑑃 𑐫𑐵𑐫𑐾𑐟 𑐰𑐜𑐵𑐥𑐵𑐏𑐾𑑄 𑐩𑐵𑑅𑐐𑐸 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐐𑐸 𑐧𑐔𑑄 𑐧𑐶𑐫𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐜𑐵. 𑐥𑐸𑐲𑑂𑐥𑐬𑐵𑐖 𑐬𑐵𑐖–𑐎𑐬𑑂𑐞𑐶𑐎𑐵𑐬, 𑐥𑑂𑐬𑐟𑐶𑐳𑐬𑐵 𑐳𑐵𑐫𑑂𑐩𑐶, 𑐬𑐵𑐖𑐨𑐵𑐂 𑐖𑐎𑑅𑐩𑐶, 𑐥𑑂𑐬𑐾𑐩𑐴𑐶𑐬𑐵 𑐟𑐸𑐮𑐵𑐢𑐬, 𑐁𑐬 𑐩𑐵𑐣𑐣𑑂𑐢𑐬, 𑐧𑐶𑐲𑑂𑐞𑐸 𑐔𑐶𑐟𑑂𑐬𑐎𑐵𑐬, 𑐬𑐰𑐶𑐣 𑐳𑐵𑐫𑑂𑐩𑐶, 𑐀𑐣𑐶𑐮 𑐳𑑂𑐠𑐵𑐥𑐶𑐟 𑐁𑐡𑐶𑐥𑐶𑑄𑐳𑑄 𑐩𑐔𑐵 𑐳𑐵𑐴𑐶𑐟𑑂𑐫 𑐔𑑂𑐰𑐣𑑂𑐴𑑂𑐫𑐵𑐎𑐾𑐟 𑐎𑐶𑐥𑐵 𑐖𑐎 𑐡𑐸𑐐𑐸 𑐳𑐦𑐹 𑐥𑐶𑐎𑐵𑐫𑐾𑐩𑐵𑑅𑐐𑐸, 𑐎𑐵𑐬𑑂𑐚𑐸𑐣 𑐰 𑐩𑑂𑐫𑐾 𑐥𑐶𑐎𑐵𑐫𑐾𑐩𑐵𑑅𑐐𑐸, 𑐟𑑅𑐢𑐷𑐥𑐶𑑄 𑐳𑐵𑐴𑐶𑐟𑑂𑐫𑐎𑐵𑐬𑐥𑐶𑐣𑐶 𑐡𑐠𑐸𑐂 𑐩𑐔𑐵 𑐳𑐵𑐴𑐶𑐟𑑂𑐫 𑐢𑐾𑑄𑐢𑐾𑑄𑐧𑐮𑑂𑐮𑐵𑑅 𑐫𑐵𑐫𑐾𑐩𑐵𑑅𑐐𑐸 𑐁𑐡𑐶 𑐳𑐸𑐗𑐵𑐰 𑐧𑐶𑐄𑐐𑐸 𑐏𑑅 𑑋 𑐎𑐔𑐵𑐫𑐵 𑐣𑐵𑐫𑑅 𑐁𑐱𑐵𑐎𑐵𑐖𑐷 𑐩𑐴𑐬𑑂𑐖𑐣𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐎𑐔𑐵𑐫𑐵 𑐥𑐡𑐵𑐢𑐶𑐎𑐵𑐬𑐷𑐥𑐶𑑄 𑐡𑐶𑐣𑐾𑐱 𑐰𑐖𑑂𑐬𑐵𑐔𑐵𑐬𑑂𑐫 𑐰 𑐡𑐶𑐣𑐾𑐱 𑐳𑐸𑐰𑐵𑐮𑐥𑐶𑑄𑐳𑑄 𑐣𑑄 𑐣𑑂𑐰𑐰𑐵𑐣𑐵𑐡𑐷𑐐𑐸 𑐏𑑅 𑑋