𑐩𑐴𑐵𑐎𑐰𑐶 𑐳𑐶𑐡𑑂𑐢𑐶𑐡𑐵𑐳 𑐩𑐴𑐵𑐖𑐸𑐫𑐵 𑑑𑑕𑑕 𑐎𑑂𑐰𑑅𑐐𑐸 𑐧𑐸𑐣𑑂𑐴𑐶 𑐴𑐣

𑐩𑐴𑐵𑐎𑐰𑐶 𑐳𑐶𑐡𑑂𑐢𑐶𑐡𑐵𑐳 𑐩𑐴𑐵𑐖𑐸𑐫𑐵 𑑑𑑕𑑕 𑐎𑑂𑐰𑑅𑐐𑐸 𑐧𑐸𑐣𑑂𑐴𑐶𑐫𑐵 𑐮𑐳𑐟𑐵𑐫𑑂 𑐩𑑂𑐴𑐶𑐐𑑅 𑐣𑐳𑑄𑐔𑐵 𑐄𑐮𑐾𑐐𑐸 𑐖𑑂𑐫𑐵 𑐖𑐸𑐮 𑑋 𑐣𑐾𑐥𑐵𑐮𑐨𑐵𑐲𑐵 𑐩𑑄𑐎𑐵𑑅 𑐏𑐮𑑅, 𑐫𑐾𑑃 𑐰 𑐳𑐶𑐡𑑂𑐢𑐶𑐡𑐵𑐳 𑐳𑑂𑐩𑐺𑐟𑐶 𑐳𑐩𑐵𑐖𑐫𑐵 𑐩𑑄𑐎𑐵𑑅 𑐐𑑂𑐰𑐳𑐵𑐮𑐫𑑂 𑐖𑐹𑐐𑐸 𑐣𑐳𑑄𑐔𑐵 𑐄𑐮𑐾𑐐𑐸 𑐖𑑂𑐫𑐵𑐗𑑂𑐰𑑅 𑐠𑐣𑐫𑐵 𑐨𑑀𑐟𑐵𑐴𑐶𑐟𑐶 𑐡𑐸𑐰𑐵𑐟𑑄 𑐣𑑂𑐴𑑂𑐫𑐵𑑅𑐐𑐸 𑐏𑑅 𑑋

𑐨𑑀𑐟𑐵𑐴𑐶𑐟𑐶𑑄 𑐬𑐟𑑂𑐣𑐥𑐵𑐬𑑂𑐎 𑐰𑐣𑐾𑐐𑐸 𑐡𑐸𑐰𑐵𑐟𑐫𑑂 𑐔𑑂𑐰𑑄𑐐𑐸 𑐩𑐴𑐵𑐎𑐰𑐶 𑐳𑐶𑐡𑑂𑐢𑐶𑐡𑐵𑐳 𑐩𑐴𑐵𑐖𑐸𑐫𑐵 𑐗𑑂𑐰𑐵𑐟𑐵𑐫𑑂 𑐩𑑄𑐎𑐵𑑅 𑐏𑐮𑑅𑐫𑐵 𑐣𑐵𑐫𑑅 𑐖𑐣𑐎𑐰𑐶 𑐡𑐸𑐬𑑂𑐐𑐵𑐮𑐵𑐮 𑐱𑑂𑐬𑐾𑐲𑑂𑐛, 𑐩𑑄𑐎𑐵𑑅 𑐏𑐮𑑅 𑐣𑑂𑐰𑐎𑐸, 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐾𑐩𑐶𑐫𑐵 𑐨𑐵𑐂𑐳 𑐔𑐵𑐣𑑂𑐳𑐮𑐬𑐮𑐶𑐳𑐾𑑄 𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵 𑐩𑐮𑑂𑐮 𑐎𑐾. 𑐳𑐸𑐣𑑂𑐡𑐬, 𑐩𑑄𑐎𑐵𑑅 𑐏𑐮𑑅𑐫𑐵 𑐡𑐵𑑄𑐨𑐬𑐶𑑄 𑐐𑐞𑐾𑐱 𑐳𑐵𑐫𑑂𑐩𑐶, 𑐳𑐩𑐵𑐖𑐫𑐵 𑐕𑑂𑐫𑐵𑐘𑑂𑐖𑐾 𑐡𑐷𑐥𑐎 𑐟𑐸𑐮𑐵𑐢𑐬, 𑐧𑐵𑐐𑐩𑐟𑐶 𑐥𑑂𑐬𑐡𑐾𑐱 𑐳𑐵𑑄𑐳𑐡 𑐬𑐵𑐖𑐾𑐱 𑐱𑐵𑐎𑑂𑐫, 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑑒𑑗 𑐰𑐜𑐵𑐀𑐢𑑂𑐫𑐎𑑂𑐲 𑐫𑑀𑐐𑐾𑐱𑐎𑐸𑐩𑐵𑐬 𑐏𑐜𑑂𑐐𑐷𑐥𑐶𑑄𑐳𑑄 𑐩𑐵𑐮𑑂𑐬𑑂𑐫𑐵𑐥𑐞 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐩𑐴𑐵𑐎𑐰𑐶 𑐳𑐶𑐡𑑂𑐢𑐶𑐡𑐵𑐳𑐫𑐵 𑐗𑑂𑐰𑐵𑐟𑐵𑐫𑑂 𑐩𑐵𑐮𑑂𑐬𑑂𑐫𑐵𑐥𑐞𑐮𑐶𑐳𑐾𑑄 𑐣𑑂𑐴𑑂𑐫𑐵𑑅𑐐𑐸 𑐣𑐳𑑄𑐔𑐵 𑐄𑐮𑐾𑐖𑑂𑐫𑐵 𑐨𑑀𑐟𑐵𑐴𑐶𑐟𑐶, 𑐀𑐳𑑄, 𑐟𑑂𑐫𑑅𑐬, 𑐠𑑃𑐴𑐶𑐟𑐶, 𑐕𑐟𑑂𑐬𑐥𑐵𑐟𑐶, 𑐟𑑂𑐫𑑄𑐑𑑅, 𑐣𑑂𑐫𑐟, 𑐎𑐶𑐮𑐵𑐑𑑅, 𑐨𑑂𑐫𑐵𑑅𑐔𑐵𑐡𑑂𑐫𑑅, 𑐰𑑄𑐑𑑅 𑐖𑐸𑐫𑐵𑑅 𑐎𑐾𑐮𑐟𑑂𑐰𑐵𑑅 (𑐖𑐣𑐧𑐴𑐵𑑅)𑐮𑐫𑑂 𑐠𑑂𑐫𑑄𑐎𑐵𑑅 𑐎𑑂𑐰𑐔𑐵𑐫𑐾𑐎𑐹𑐐𑐸 𑐏𑑅 𑑋

𑐖𑐣𑐎𑐰𑐶 𑐡𑐸𑐬𑑂𑐐𑐵𑐮𑐵𑐮𑑄 𑐳𑐶𑐡𑑂𑐢𑐶𑐡𑐵𑐳𑐫𑐵 𑐧𑐸𑐣𑑂𑐴𑐶𑐫𑐵 𑐮𑐳𑐟𑐵𑐫𑑂 𑐔𑑂𑐰𑐫𑐵𑐡𑐷𑐐𑐸 ‘𑐠𑑁𑑄𑐫𑐵 𑐡𑐶𑐣 𑐎𑐰𑐶 𑐐𑐸𑐬𑐸 𑐳𑐶𑐡𑑂𑐢𑐶𑐡𑐵𑐳 𑐧𑐹𑐐𑐸 𑐬𑐾 !’ 𑐧𑑂𑐫𑐵𑐴𑐵𑑄𑐔𑐸𑐮𑐶 𑐩𑑂𑐫𑐾𑑃 𑐴𑐵𑐮𑐵𑑅 𑐣𑐳𑑄𑐔𑐵 𑐄𑐮𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐏𑑅 𑑋 𑐣𑐳𑑄𑐔𑐵 𑐄𑐮𑐾𑐖𑑂𑐫𑐵𑐗𑑂𑐰𑐮𑐫𑑂 𑐩𑑄𑐎𑐵𑑅 𑐏𑐮𑑅 𑐰 𑐳𑑂𑐩𑐺𑐟𑐶 𑐳𑐩𑐵𑐖𑐫𑐵 𑐥𑐡𑐵𑐢𑐶𑐎𑐵𑐬𑐷, 𑐮𑐶𑐳𑐾𑑄 𑐁𑐥𑐵𑐮𑑄 𑐨𑐵𑐲𑐵𑐴𑑂𑐫𑑅𑐩𑐶𑐥𑐶𑑄 𑐣𑐵𑐥𑑄 𑐖𑐐𑐟𑐳𑐸𑐣𑑂𑐡𑐬 𑐧𑑂𑐰𑐣𑐾𑐎𑐸𑐠𑐶, 𑐱𑑂𑐬𑐷 𑐩𑐴𑐵𑑄𑐎𑐵𑐮 𑐩𑐵.𑐰𑐶., 𑐖𑐸𑐡𑑂𑐢𑑀𑐡𑐫 𑐩𑐵𑐢𑑂𑐫𑐩𑐶𑐎 𑐰𑐶𑐡𑑂𑐫𑐵𑐮𑐫, 𑐀𑐣𑑂𑐣𑐥𑐹𑐬𑑂𑐞 𑐩𑐵𑐢𑑂𑐫𑐩𑐶𑐎 𑐰𑐶𑐡𑑂𑐫𑐵𑐮𑐫𑐫𑐵 𑐰𑐶𑐡𑑂𑐫𑐵𑐬𑑂𑐠𑐷 𑐱𑐶𑐎𑑂𑐲𑐎, 𑐱𑐶𑐎𑑂𑐲𑐶𑐎𑐵𑐥𑐶𑐣𑐶 𑐳𑐴𑐨𑐵𑐐𑐶𑐟𑐵 𑐡𑐸𑐐𑐸 𑐏𑑅 𑑋

𑐎𑐾𑐮𑐟𑑂𑐰𑐵𑐮𑐫𑑂 𑐠𑑂𑐫𑑄𑐎𑐵𑑅 𑐳𑐸𑐨𑐵𑐫𑑂 𑐡𑐾𑐕𑐵𑐫𑐾𑐐𑐸 𑐗𑑂𑐰𑐮𑐫𑑂 𑐣𑐵𑑄𑐖𑐵𑑅𑐩𑑂𑐴 𑐩𑑂𑐫𑐾𑑃 𑐴𑐵𑐮𑐵𑐩𑐶 𑐫𑑀𑐐𑐾𑐱𑑂𑐰𑐬 𑐀𑐩𑐵𑐟𑑂𑐫𑑄 𑐳𑐶𑐡𑑂𑐢𑐶𑐡𑐵𑐳𑐫𑐵 𑐧𑐸𑐣𑑂𑐴𑐶𑐫𑐵 𑐮𑐳𑐟𑐵𑐫𑑂 𑐡𑑃𑐫𑑂𑐡𑐳𑑄 𑐔𑐶𑐣𑐵𑐏𑑃 𑐎𑐵𑐳𑐵 𑐫𑐵𑐫𑐾𑐐𑐸 𑐰 𑐄𑐎𑐶𑐫𑐵 𑐣𑐶𑑄𑐟𑐶𑑄 𑐣𑐶𑐐𑐹 𑐮𑐵𑐏 𑐟𑐎𑐵 𑐡𑐵𑑄 𑐡𑑃𑐫𑑂𑐡𑐳𑑄 𑐧𑐷𑐐𑐸 𑐑𑑀𑐲𑐞𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐰𑐫𑑂𑐎𑐮𑑄 𑐔𑐶𑐣𑐵𑐏𑑃 𑐎𑐵𑐳𑐵𑐫𑑂 𑐣𑑂𑐴𑐵𑐥𑐫𑐵𑐟 𑐕𑐐𑐹 𑐮𑐏, 𑐮𑐶𑐄𑐫𑐵𑐟 𑐣𑑂𑐫𑐫𑑂𑐡𑑂𑐰𑑅 𑐰 𑐮𑐶𑐫𑐵𑑄𑐮𑐶𑐄𑐫𑐵𑐟 𑐣𑐷𑐣𑑂𑐫𑐵𑐡𑑂𑐰𑑅 𑐟𑐎𑐵 𑐡𑐵𑑄 𑐳𑐶𑐬𑐥𑐵𑑅 𑐧𑐷𑐐𑐸 𑐰 𑐮𑑂𑐫𑑄 𑐡𑐸𑐐𑐸 𑐣𑐷𑐣𑑂𑐫𑐵𑐡𑑂𑐰𑑅 𑐟𑐎𑐵 𑐡𑐵𑑄 𑐖𑑂𑐫𑐵𑐗𑑂𑐰𑑅𑐫𑐵 𑐰𑑂𑐫𑐰𑐳𑑂𑐠𑐵𑐥𑐣𑐫𑐵 𑐣𑐶𑑄𑐟𑐶𑑄 𑐧𑐷𑐐𑐸 𑐑𑑀𑐲𑐞𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋