𑐩𑐴𑐵𑐩𑐵𑐣𑐰 𑐐𑑁𑐟𑐩 𑐧𑐸𑐡𑑂𑐢𑐫𑐵 𑑑𑑐 𑐐𑐹 𑐄𑐥𑐡𑐾𑐱

𑐳𑐵𑐎𑑂𑐫𑐩𑐸𑐣𑐶 𑐳𑐶𑐡𑑂𑐢𑐵𑐬𑑂𑐠 𑐐𑑁𑐟𑐩 𑐧𑐸𑐡𑑂𑐢, 𑐐𑐸𑐩𑑂𑐴 𑐧𑐸𑐡𑑂𑐢𑐫𑐵 𑐬𑐸𑐥𑑄 𑐩𑑂𑐴𑐳𑑂𑐫𑐹, 𑐊𑐳𑐶𑐫𑐵𑐫𑐵 𑐣𑐐𑐸 𑐎𑐠𑑄 𑐩𑑂𑐴𑐳𑑂𑐫𑐹, 𑐳𑑄𑐳𑐵𑐬𑐫𑐵 𑐱𑐵𑐣𑑂𑐟𑐶𑐫𑐵 𑐡𑐹𑐟 𑐎𑐠𑑄 𑐩𑑂𑐴𑐳𑑂𑐫𑐹, 𑐰𑐳𑐥𑑀𑐮 𑐕𑐩𑑂𑐴 𑐀𑐣𑑂𑐟𑐬𑐖𑑂𑐘𑐵𑐣𑐷 𑐏𑑅 𑐰 𑐐𑐸𑐬𑐸 𑐣𑑄 𑑋 𑐰𑐳𑐥𑑀𑐮𑑄 𑐧𑐸𑐡𑑂𑐢 𑐢𑐬𑑂𑐩𑐫𑐵 𑐖𑐐 𑐠𑐣𑐵𑑅 𑐧𑐶𑐖𑑂𑐫𑐵𑐟 𑑋 ‘𑐧𑐷𑐳𑐷’𑐫𑐵 𑐏𑐸𑐐𑐹𑐐𑐸 𑐱𑐟𑐵𑐧𑑂𑐡𑐷𑐂 𑐖𑐣𑑂𑐩 𑐖𑐸𑐫𑐵𑑅 𑐥𑑂𑐫𑑄𑐐𑐹𑐐𑐸 𑐱𑐟𑐵𑐧𑑂𑐡𑐷𑐂 𑐰𑐳𑐥𑑀𑐮 𑐩𑐴𑐵𑐥𑐬𑐶𑐣𑐶𑐬𑑂𑐰𑐵𑐞 𑐖𑐸𑐫𑐵𑑅 𑐧𑐶𑐖𑑂𑐫𑐵𑐐𑐸 𑐏𑑅𑐳𑐵𑑄 𑐣𑑄 𑐰𑐳𑐥𑑀𑐮𑐫𑐵 𑐰𑐶𑐔𑐵𑑅, 𑐳𑐣𑑂𑐡𑐾𑐱, 𑐄𑐥𑐡𑐾𑐱 𑐠𑑁𑐟𑐎 𑐣𑑄 𑐄𑐟𑐶𑐎𑑄 𑐴𑐾 𑐳𑐵𑐣𑑂𑐡𑐬𑑂𑐨𑐶𑐎 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐰𑐳𑐥𑑀𑐮 𑐩𑐴𑐵𑐩𑐵𑐣𑐰 𑐐𑑁𑐟𑐩 𑐧𑐸𑐡𑑂𑐢𑐫𑐵 𑐰𑐶𑐔𑐵𑑅𑐟𑐳𑐾𑑄 𑐠𑑁𑑄 𑐣𑑄 𑐳𑑄𑐳𑐵𑐬𑐫𑐵 𑐎𑐬𑑀𑐜𑑁𑑄 𑐩𑐣𑐹𑐟𑐫𑑂𑐟 𑐄𑐟𑑂𑐥𑐾𑑂𑐬𑐬𑐞𑐵 𑐧𑐶𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑁𑑄 𑐗𑐷𑐳𑑄 𑐕𑐶𑐐𑐸 𑐣𑐶𑐟𑐶𑑄 𑐣𑑄 𑐧𑐸𑐡𑑂𑐢𑐫𑐵 𑑑𑑐 𑐐𑐹 𑐩𑐴𑐵𑐣 𑐰𑐶𑐔𑐵𑑅 𑐴𑐫𑐵𑐐𑐸 𑐡𑐸, 𑐐𑐸𑐎𑐶𑑄 𑐕𑐶𑐐𑐸 𑐖𑐷𑐰𑐣𑐫𑑂 𑐳𑐡𑐵𑑄 𑐣𑑂𑐴𑑂𑐫𑑅𑐣𑐾 𑐰𑐣𑐾𑐟 𑐐𑑂𑐰𑐵𑐴𑐵𑐮𑐶 𑐖𑐸𑐂 𑑋

𑐕𑐐𑐹– 𑐖𑐷𑐰𑐣𑐫𑑂 𑐔𑐷𑐢𑑄𑐐𑐸 𑐏𑑃𑐥𑐵𑐏𑐾𑑄 𑐳𑐸𑐬𑐸𑐰𑐵𑐟 𑐫𑐵𑐫𑐾𑐐𑐸 𑐏𑐬𑐵𑐧 𑐏𑑃 𑐩𑐏𑐸, 𑐠𑑂𑐰 𑐧𑐵𑑄𑐮𑐵𑑅𑐐𑐸 𑐏𑑃 𑐏𑑅

𑐩𑐴𑐵𑐩𑐵𑐣𑐰 𑐧𑐸𑐡𑑂𑐢𑑄 𑐢𑐫𑐵𑑅 𑐧𑐶𑐖𑑂𑐫𑐵𑑅𑐐𑐸 𑐡𑐸, “𑐕𑐐𑑅 𑐢𑐩𑑂𑐥 𑐠𑑀𑐥𑐵 𑐠𑑀𑐥𑐵 𑐮𑐏𑑄 𑐖𑐵𑐂 𑑋 𑐀𑐠𑐾𑐴𑐾, 𑐧𑐸𑐡𑑂𑐢𑐶𑐩𑐵𑐣 𑐩𑐣𑐸𑐏𑑄 𑐔𑐶𑐔𑐷𑐢𑑄𑐐𑐸 𑐏𑑃 𑐩𑐸𑑄𑐎𑐵𑑅 𑐠𑑅𑐎𑐾 𑐧𑐵𑑄𑐮𑐵𑑅𑐐𑐸 𑐏𑑃𑐥𑐵𑐏𑐾𑑄 𑐨𑐬𑐶𑐥𑐹𑐬𑑂𑐞 𑐫𑐵𑐂 𑑋”

𑐕𑐩𑑂𑐴 𑐀𑐩𑐾𑐬𑐶𑐎𑐷 𑐎𑐰𑐶, 𑐡𑐬𑑂𑐱𑐣𑐱𑐵𑐳𑑂𑐟𑑂𑐬𑐷 𑐮𑐶𑐳𑐾𑑄 𑐣𑐶𑐧𑐣𑑂𑐢𑐎𑐵𑐬 𑐬𑐵𑐮𑑂𑐦 𑐰𑐮𑑂𑐜𑑀 𑐂𑐩𑐬𑐳𑐣𑑄 𑐕𑐎𑑂𑐰𑑅 𑐢𑐫𑐵𑐡𑐷𑐐𑐸 𑐡𑐸, “𑐴𑐬𑐾𑐎 𑐔𑐶𑐟𑑂𑐬𑐎𑐵𑐬 𑐕𑐎𑑂𑐰𑑅 𑐀𑐥𑐬𑐶𑐥𑐎𑑂𑐰 𑐴𑐾 𑐖𑐸𑐂 𑑋 𑐠𑐸𑐎𑐶𑐫𑐵 𑐧𑐵𑐬𑐾 𑐳𑑀𑐔𑐾𑐫𑐵𑐣𑐵𑐡𑐶𑐳𑑃, 𑐗𑐷 𑐳𑐎𑐮𑐳𑐶𑐣𑑄 𑐔𑐷𑐢𑑄𑐐𑐸𑐥𑐵𑐏𑐾𑑄 𑐴𑐾 𑐳𑐸𑐬𑐸𑐰𑐵𑐟 𑐫𑐵𑐫𑐾𑐩𑐵𑑅 𑐟𑐬 𑐠𑐸𑐎𑐶𑐫𑐵 𑐩𑐟𑐮𑐧 𑐠𑑂𑐰 𑐩𑐏𑐸𑐎𑐶 𑐗𑐷𑐳𑑄 𑐰 𑐔𑐷𑐢𑑄𑐐𑐸 𑐳𑐸𑐬𑐸𑐰𑐵𑐟𑐫𑐵𑐟 𑐑𑐺𑐞𑐵 𑐫𑐵𑐫𑐾𑐣𑐸 𑑋 𑐗𑐷𑐥𑐶𑑄 𑐳𑐡𑐵𑑄 𑐢𑐿𑐬𑑂𑐫𑐰𑐵𑐣 𑐖𑐸𑐂𑐩𑐵𑑅, 𑐀𑐮𑐾 𑐖𑐎 𑐗𑐷𑐳𑑄 𑐔𑐵𑐴𑐾𑐖𑐸𑐫𑐵𑐐𑐸 𑐳𑐦𑐮𑐟𑐵 𑐎𑐵𑐫𑐾𑐏𑐣𑐷 𑑋 𑐳𑐸𑐣𑐵𑑄𑐣𑑄 𑐕𑐸𑑄 𑐣𑑄 𑐳𑐦𑐮𑐟𑐵 𑐔𑐵𑑄𑐔𑐵𑑄 𑐎𑐵𑑅𑐐𑐸 𑐩𑐏𑐸, 𑐄𑐎𑐶𑑄 𑐳𑐩𑑂𑐗𑐾 𑐖𑐸𑐂𑐩𑐵𑑅 𑐎𑐶 𑐔𑐷𑐢𑑄𑐐𑐸 𑐏𑑃𑐥𑐵𑐏𑐾𑑄 𑐳𑐸𑐬𑐸𑐰𑐵𑐟 𑐫𑐵𑐫𑐾𑐣𑐸 𑐰 𑐢𑐩𑑂𑐥 𑐩𑐖𑐵𑑅𑐟𑐮𑐾 𑐟𑐎 𑐢𑐿𑐬𑑂𑐫𑐰𑐵𑐣 𑐖𑐸𑐂𑐣𑐸 𑑋”

𑐣𑐶𑐐𑐹– 𑐳𑑀𑐔𑐵𑐃 𑐴𑐾 𑐳𑐎𑐟𑐵𑑄 𑐖𑑂𑐫𑐵 𑐏𑑅

𑐐𑑁𑐟𑐩 𑐧𑐸𑐡𑑂𑐢𑑄 𑐢𑐫𑐵𑑅 𑐧𑐶𑐖𑑂𑐫𑐵𑑅𑐐𑐸 𑐡𑐸, “𑐗𑐷𑐥𑐶𑑄 𑐐𑐠𑐾 𑐡𑐸, 𑐰 𑐦𑐸𑐎𑑂𑐎 𑐗𑐷𑐥𑐶𑑄 𑐠𑑅𑐥𑐶𑐣𑑂𑐳𑑄 𑐕𑐸 𑐳𑑀𑐔𑐾𑐫𑐵𑐣𑐵𑐐𑐸 𑐡𑐸 𑐄𑐎𑐶𑐫𑐵 𑐥𑐬𑐶𑐞𑐵𑐩 𑐏𑑅 𑑋 𑐫𑐡𑐶 𑐳𑐸𑑄 𑐩𑐣𑐸𑐏𑑄 𑐐𑐮𑐟 𑐰𑐶𑐔𑐵𑑅 𑐰 𑐢𑐵𑐬𑐞𑐵𑑄 𑐖𑑂𑐫𑐵 𑐫𑐵𑐂 𑐰𑐵 𑐳𑑀𑐔𑐾𑐫𑐵𑐂 𑐢𑐵𑑅𑐳𑐵 𑐰𑐫𑐵𑐟 𑐡𑐸𑑅𑐏 𑐰 𑐥𑐷𑐜𑐵 𑐥𑑂𑐬𑐵𑐥𑑂𑐟 𑐖𑐸𑐂 𑑋 𑐫𑐡𑐶 𑐳𑐸𑑄 𑐩𑐣𑐸𑐏𑑄 𑐳𑑂𑐰𑐔𑑂𑐕 𑐳𑑀𑐔𑐵𑐃 𑐟𑐫𑐵𑑅 𑐏𑑃 𑐮𑑂𑐴𑐵𑐂 𑐰𑐵 𑐖𑑂𑐫𑐵 𑐫𑐵𑐂 𑐢𑐵𑑅𑐳𑐵 𑐰𑐫𑐵𑐟 𑐴𑐬𑑂𑐲 𑐰 𑐮𑐳𑐟𑐵 𑐥𑑂𑐬𑐵𑐥𑑂𑐟 𑐖𑐸𑐂 𑑋 𑐳𑑀𑐔 𑐎𑐠𑑄𑐫𑐵 𑐰𑑂𑐫𑐰𑐴𑐵𑐬 𑐢𑐫𑐵𑐐𑐸 𑐕𑐐𑐹 𑐎𑐠𑑄𑐫𑐵 𑐎𑐶𑐔𑑅𑐠𑐾𑑄 𑐴𑐾 𑐏𑑅, 𑐐𑐸𑐎𑐶𑑄 𑐐𑐸𑐧𑐮𑐾𑑄 𑐣𑑄 𑐟𑑂𑐰𑑅𑐟𑐷𑐩𑐏𑐸 𑑋”

𑐧𑐸𑐡𑑂𑐢𑑄 𑐕𑐎𑑂𑐰𑑅 𑐢𑐫𑐵𑑅 𑐧𑐶𑐖𑑂𑐫𑐵𑑅𑐐𑐸 𑐡𑐸, 𑐡𑐶𑐩𑐵𑐐 𑐴𑐾 𑐦𑐸𑐎𑑂𑐎 𑐏𑑃 𑐏𑑅, 𑐕𑑄 𑐕𑐸 𑐳𑑀𑐔𑐾𑐫𑐵𑐂, 𑐕 𑐰𑐴𑐾 𑐖𑐸𑐂 𑑋 𑐄𑐎𑐶𑑄 𑐫𑐡𑐶 𑐮𑐳𑐟𑐵𑑄 𑐩𑑂𑐰𑐵𑐫𑐾𑐐𑐸 𑐏𑑅𑐳𑐵 𑐗𑐷𑐳𑑄 𑐠𑑅𑐐𑐸 𑐡𑐶𑐩𑐵𑐐𑐫𑐵𑐟 𑐧𑐵𑑄𑐮𑐵𑑅𑐐𑐸 𑐰 𑐡𑐫𑐵𑐰𑐵𑐣 𑐳𑑀𑐔𑐵𑐃 𑐣𑑄 𑐖𑐵𑐫𑐾𑐎𑐾𑐩𑐵𑑅 𑑋 𑐣𑐎𑐵𑐬𑐵𑐟𑑂𑐩𑐎 𑐳𑑀𑐔𑐵𑐃 𑐣𑑄 𑐧𑐸𑐮𑐸𑐴𑐸𑑃 𑐗𑐷𑐟 𑐴𑐾 𑐧𑐬𑑂𑐧𑐵𑐡 𑐫𑐵𑐣𑐵𑐧𑐶𑐂 𑑋

𑐕𑐵𑐫𑑂 𑐢𑐵𑑅𑐳𑐵 𑐗𑐷𑐳𑑄 𑐐𑐠𑐾 𑐳𑑀𑐔𑐾𑐫𑐵𑐂 𑐰 𑐳𑑀𑐔𑐵𑐬𑑂𑐫 𑐣𑑄 𑐴𑐾 𑐗𑐷𑐐𑐸 𑐖𑑂𑐫𑐵𑐫𑐵𑐟 𑐮𑐶𑐔𑑂𑐰𑑅 𑐮𑐵𑐎𑐷, 𑐰𑐴𑐾 𑐎𑐠𑑄 𑐴𑐾 𑐗𑐷𑐳𑑄 𑐎𑐬𑑂𑐩 𑐫𑐵𑐂 𑐰 𑐗𑐷𑐐𑐸 𑐎𑐬𑑂𑐩𑑄 𑐴𑐾 𑐗𑐷𑐳𑑄 𑐕𑐸 𑐎𑐵𑐫𑐾𑐏𑐣𑐷 𑐢𑐿𑐐𑐸 𑐏𑑃 𑐣𑐶𑐬𑑂𑐢𑐵𑐬𑐞 𑐫𑐵𑐂 𑑋

𑐧𑐸𑐡𑑂𑐢𑑄 𑐢𑐫𑐵𑑅 𑐧𑐶𑐖𑑂𑐫𑐵𑐐𑐸 𑐡𑐸, ‘𑐦𑐸𑐎𑑂𑐎 𑐏𑐬𑐵𑐧 𑐎𑐬𑑂𑐩𑐟 𑐡𑐶𑐩𑐵𑐐𑐥𑐵𑐏𑐾𑑄 𑐴𑐾 𑐧𑐸𑐫𑐵𑑅 𑐰𑐂 𑑋 𑐄𑐎𑐶𑑄 𑐡𑐶𑐩𑐵𑐐𑐫𑐵𑐟 𑐥𑐬𑐶𑐰𑐬𑑂𑐟𑐣 𑐫𑐵𑐟 𑐢𑐵𑑅𑐳𑐵 𑐏𑐬𑐵𑐧 𑐎𑐬𑑂𑐩𑐟 𑐡𑐶𑐩𑐵𑐐𑑄 𑐟𑐣𑐵𑐰𑐣𑐷 𑑋’

𑐳𑑂𑐰𑑄𑐐𑐹– 𑐎𑑂𑐲𑐩𑐵 𑐫𑐵𑐫𑐾 𑐳𑐫𑐾𑐎𑐷

𑐑𑐺𑐞𑐵 𑐢𑐫𑐵𑐐𑐸 𑐏𑑃 𑐑𑐺𑐞𑐵 𑐫𑐵𑐣𑐵𑑅 𑐩𑑂𑐴𑑀 𑐖𑐸𑐂𑐩𑐏𑐸, 𑐧𑐬𑐸 𑐩𑐵𑐫𑐵 𑐫𑐵𑐣𑐵𑑅 𑐩𑑂𑐴𑑀 𑐖𑐸𑐂 𑑋 𑐐𑐸𑐧𑐮𑐾𑑄 𑐕𑑄 𑐎𑑂𑐲𑐩𑐵 𑐫𑐵𑐫𑐾𑐩𑐦𑐫𑐵𑑅 𑐣𑐸𑐐𑑅 𑐡𑐸𑐣𑐾 𑐧𑐣𑑂𑐡𑐷 𑐡𑐫𑐾𑐎𑐵𑑅 𑐟𑐫𑐵𑐟𑑅𑐥𑐶𑐣𑑂𑐟 𑐏𑐸𑐮𑑂𑐮𑐵 𑐫𑐵𑐂, 𑐄𑐧𑐮𑐾 𑐕𑑄 𑐠𑑅𑐟 𑐣𑑄 𑐰𑐴𑐾 𑐖𑐾𑐮𑐥𑐵𑐏𑐾𑑄 𑐩𑐸𑐎𑑂𑐟 𑐫𑐵𑐂 𑑋

𑐧𑐸𑐡𑑂𑐢𑐫𑐵 𑐎𑐠𑑄 𑐗𑐷𑐳𑑄 𑐳𑐸𑐫𑐵𑐟𑑄 𑐎𑑂𑐰𑐫𑑂 𑐩𑐔𑑂𑐰𑑄𑐳𑐾 𑐎𑑂𑐰𑐫𑑂 𑐟𑐫𑐾𑐦𑐂𑐩𑐏𑐸 𑑋 𑐄𑐎𑐶𑑄 𑐐𑐸𑐮𑐶 𑐫𑐵𑐎𑐣𑑄 𑐗𑐷𑐳𑑄 𑐩𑐾𑐥𑐶𑐣𑑂𑐟 𑐎𑑂𑐲𑐩𑐵 𑐫𑐵𑐫𑐾 𑐳𑐫𑐾𑐎𑐷 𑐄𑐮𑐶 𑐴𑐾 𑐧𑐵𑑄𑐮𑐵𑑅 𑐖𑐸𑐂 𑑋

𑐧𑐸𑐡𑑂𑐢𑑄 𑐢𑐫𑐵𑑅 𑐧𑐶𑐖𑑂𑐫𑐵𑐐𑐸 𑐡𑐸, “𑐰𑑃𑐫𑑂 𑐳𑐹–𑐥𑐵𑐐𑐮𑐥𑐣𑐠𑐾𑑄 𑐖𑐵𑐐𑐸 𑐕𑐸𑑄 𑐩𑐶𑑃 𑐡𑐂𑐩𑐏𑐸, 𑐑𑐺𑐞𑐵𑐠𑐾𑑄 𑐖𑐵𑑅𑐐𑐸 𑐕𑐸𑑄 𑐀𑐥𑐬𑐵𑐢 𑐡𑐂𑐩𑐏𑐸, 𑐩𑐹𑐬𑑂𑐏𑐟𑐵𑐠𑐾𑑄 𑐖𑐵𑐐𑐸 𑐕𑐸𑑄 𑐖𑐵𑐮 𑐡𑐂𑐩𑐏𑐸, 𑐮𑑀𑐨𑐠𑐾𑑄 𑐖𑐵𑐐𑐸 𑐕𑐸𑑄 𑐏𑐸𑐳𑐶𑐧𑐵𑑅 𑐡𑐂𑐩𑐏𑐸 𑑋”

𑐥𑑂𑐫𑑄𑐐𑐹– 𑐗𑐷𑐐𑐸 𑐖𑑂𑐫𑐵 𑐴𑐾 𑐏𑑅, 𑐰 𑐡𑐎𑐮𑐾 𑐩𑐴𑐟𑑂𑐰𑐥𑐹𑐬𑑂𑐞 𑐖𑐸𑐂

𑐫𑐡𑐶 𑐕𑐸𑑄 𑐖𑑂𑐫𑐵 𑐫𑐵𑐫𑐾𑐩𑐵𑑅𑐐𑐸 𑐡𑐸𑐳𑐵 𑐄𑐎𑐶𑐫𑐵𑐟 𑐡𑐸𑐣𑐸𑐐𑐮𑑄𑐣𑐶𑐳𑐾𑑄 𑐩𑐣 𑐧𑐶𑐫𑐵𑑅 𑐴𑐾 𑐫𑐵𑐫𑐾𑐩𑐵𑑅 𑑋 𑐣𑑂𑐴𑑂𑐫𑑅𑐣𑐾 𑐰𑐣𑐾𑐐𑐸 𑐣𑐶𑐟𑐶𑑄 𑐖𑐷𑐰𑐣𑐫𑑂 𑐣𑑂𑐴𑐶𑐠𑑄 𑐕𑐸𑑄 𑐣𑑄 𑐕𑐸𑑄 𑐫𑐵𑐫𑐾𑐐𑐸 𑐖𑐬𑐸𑐬𑐷 𑐖𑐹 𑑋 𑐕𑐐𑐹 𑐥𑐸𑐮𑐵𑑄𑐐𑐸 𑐢𑐵𑐥𑐹 𑐡𑐸, ‘𑐨𑐐𑐰𑐵𑐣𑑄 𑐳𑐎𑐮 𑐔𑐏𑐸𑑄 𑐧𑐏𑐸𑑄𑐫𑐵𑐟 ‘𑐎𑐷’ 𑐧𑐶𑐫𑐵𑐟𑑅𑐐𑐸 𑐡𑐸, 𑐟𑐬 𑐳𑐸𑐫𑐵𑐟 𑐣𑑄 𑐰𑑄 𑐂𑐩𑐶𑐐𑐸 𑐴𑐾 𑐐𑐸𑑃𑐜𑐫𑑂 𑐰𑐵𑑄𑐕𑑂𑐰𑐫𑐵𑑅 𑐧𑐶𑐂𑐩𑐏𑐸 𑑋’ 𑐄𑐎𑐶𑑄 𑐫𑐡𑐶 𑐕𑐶𑑄 𑐕𑐸𑑄 𑐫𑐵𑐣𑐵𑐔𑑂𑐰𑐣𑐵 𑐡𑐶𑐫𑐵𑐐𑐸 𑐡𑐸𑐳𑐵 𑐡𑐸𑐣𑐸𑐐𑐮𑑄𑐣𑐶𑐳𑐾𑑄 𑐫𑐵𑐣𑐵𑐡𑐶𑐳𑑃, 𑐳𑐦𑐮𑐟𑐵 𑐕𑐶𑐳𑑄 𑐴𑐾 𑐎𑐵𑐫𑐾𑐏𑐣𑐷 𑑋

𑐣𑑂𑐫𑐵𑐐𑐹– 𑐠𑐸𑐂𑐎𑐾𑐐𑐸 𑐎𑐸𑐟𑑅 𑐫𑐵𑐫𑐾

‘𑐴𑐬𑐾𑐎 𑐎𑑂𑐲𑐾𑐟𑑂𑐬𑐫𑑂 𑐴𑐸𑑃– 𑐮𑐳𑐟𑐵 𑐰 𑐱𑐵𑐣𑑂𑐟𑐶𑐫𑐵 𑐣𑐶𑐟𑐶𑑄, 𑐦𑐸𑐎𑑂𑐎 𑐩𑐣𑐹𑐟𑐫𑑂𑐐𑐸 𑐴𑐶𑐟𑐫𑐵 𑐣𑐶𑐟𑐶𑑄 𑑋 𑐠𑑅𑐐𑐸 𑐩𑐣𑐫𑐵𑐟 𑐳𑐸𑐗𑐧𑐸𑐗𑐫𑐵 𑐧𑐶𑐅 𑐥𑑂𑐬𑐡𑐵𑐣 𑐫𑐵, 𑐄𑐖𑑂𑐰𑑅𑐐𑐸 𑐩𑐟𑐠𑐾𑑄 𑐐𑐸𑐎𑐶𑑄 𑐠𑑅𑐟 𑐔𑑂𑐫𑐵𑐎𑐵𑑅 𑐏𑐶𑐄𑑃𑐖𑑅𑐫𑐵𑐟 𑐟𑑄𑐎𑐵𑑅 𑐫𑐔𑐸𑐐𑐸 𑐖𑑅 𑐴𑐫𑐵𑐧𑐶𑐂 𑑋’
𑐕𑐩𑑂𑐴 𑐀𑐩𑐾𑐬𑐶𑐎𑐷 𑐱𑐶𑐎𑑂𑐲𑐎, 𑐮𑐾𑐏𑐎 𑐰 𑐰𑑂𑐫𑐰𑐳𑐵𑐫𑐷 𑐳𑑂𑐚𑐾𑐦𑐾𑐣 𑐎𑑀𑐨𑐾𑑄 𑐕𑐎𑑂𑐰𑑅 𑐢𑐵𑑅𑐐𑐸 𑐡𑐸, ‘𑐣𑑂𑐴𑐵𑐥𑐵𑑄 𑐠𑐸𑐂𑐎𑐾𑐐𑐸 𑐣𑐶𑐟𑐶𑑄 𑐳𑑂𑐰, 𑐰𑐢𑐸𑑄𑐎𑐵𑑅 𑐖𑐎 𑐠𑐸𑐂𑐎𑐷 𑑋’

𑐠𑐸𑐖𑑂𑐰𑑅𑐐𑐸𑐮𑐶 𑐗𑐷𑐳𑑄 𑐳𑑀𑐔𑐾𑐫𑐵𑐫𑐾 𑐦𑐂, 𑐏𑑅 𑐠𑑂𑐰 𑐢𑐵𑐫𑐾𑐟 𑐮𑐵 𑐀𑑅𑐥𑐸 𑐟𑐬 𑐠𑑂𑐰 𑐄𑐮𑐶 𑐩𑐕𑐶𑑄𑐐𑐸 𑐣𑑄 𑐩𑐖𑐹 𑐐𑐸𑐮𑐶 𑐗𑐷𑐳𑑄 𑐳𑑀𑐔𑐾 𑐫𑐵𑐂 𑑋

𑐩𑐾𑐩𑑂𑐴 𑐰𑑂𑐫𑐎𑑂𑐟𑐶𑐫𑐵 𑐰𑐶𑐔𑐵𑑅 𑐠𑐸𑐂𑐎𑐾𑐐𑐸 𑐣𑐶𑐟𑐶𑑄 𑐣𑑂𑐴𑐵𑐥𑐵𑑄 𑐠𑑅𑐎𑐾 𑐡𑐹𑐐𑐸 𑐟𑑄𑐫𑐵𑐟 𑐟𑑂𑐫𑐵𑐐 𑐫𑐵𑐫𑐾𑐩𑐵𑑅 𑑋 𑐩𑐾𑐥𑐶𑐣𑐶𑐐𑐸 𑐏𑑃 𑐣𑑂𑐫𑐣𑐾, 𑐰𑑄 𑐕𑐸 𑐀𑐣𑐸𑐨𑐰 𑐫𑐵𑑅𑐐𑐸 𑐡𑐸 𑐢𑐿𑐐𑐸 𑐠𑐸𑐂𑐎𑐾 𑑋 𑐰𑐢𑐸𑑄𑐎𑐵𑑅 𑐗𑐷𑐳𑑄 𑐱𑐵𑐣𑑂𑐟𑐶 𑐎𑐵𑐫𑐾𑐏𑐣𑐷 𑑋 𑐴𑐬𑐾𑐎 𑐥𑐮 𑐛𑐷𑐎 𑐖𑐸𑐂𑐐𑐸𑐳𑐶𑐧𑐾𑑄 𑐮𑐫𑑂 𑐟𑐫𑐵𑐫𑐾𑐐𑐸 𑐏𑑃𑐫𑐵𑐟 𑐥𑑂𑐬𑐵𑐠𑐩𑐶𑐎𑐟𑐵 𑐧𑐶𑐂𑐣𑐸 𑑋

𑐏𑐸𑐐𑐹– 𑐠𑑅𑐐𑐸 𑐡𑐶𑐩𑐵𑐐𑐫𑐵𑐟 𑐰𑐱𑐫𑑂 𑐟𑐶

‘𑐕𑐸𑑄 𑐣𑑄 𑐏𑑄 𑐗𑐷𑐟 𑐄𑐮𑐶 𑐮𑐶𑐔𑑂𑐰𑑅 𑐮𑐵𑐎𑐷𑐩𑐏𑐸 𑐐𑐸𑐮𑐶 𑐗𑐷𑐟 𑐗𑐷𑐐𑐸 𑐠𑑅𑐐𑐸 𑐀𑐣𑐶𑐫𑐣𑑂𑐟𑑂𑐬𑐶𑐟 𑐳𑑀𑐔𑐵𑐃 𑐣𑑄 𑐫𑐵𑐫𑐾𑐐𑐸 𑐫𑐵𑐂 𑑋’

𑐫𑐸𑐡𑑂𑐢𑐫𑐵 𑐩𑐿𑐡𑐵𑐣𑐫𑑂 𑐳𑐮𑑄𑐳𑑅 𑐩𑐣𑐹𑐟𑐫𑑂𑐟 𑐎𑐿𑐡 𑐫𑐵𑐫𑐾𑐦𑐸𑐩𑑂𑐴 𑐰𑑂𑐫𑐎𑑂𑐟𑐶𑐳𑐶𑐧𑐾𑑄 𑐣𑑄 𑐰 𑐰𑑂𑐫𑐎𑑂𑐟𑐶 𑐩𑐴𑐵𑐣 𑐖𑐸𑐂, 𑐳𑐸𑐣𑐵𑑄 𑐠𑑅𑐐𑐸 𑐰𑐶𑐔𑐵𑑅𑐫𑐵𑐟 𑐠𑑅𑐐𑐸 𑐰𑐱𑐫𑑂 𑐟𑐫𑐾𑐦𑐂 𑑋 𑐗𑐷𑐐𑐸 𑐰𑐶𑐔𑐵𑑅𑐫𑐵𑐟 𑐗𑐷𑐳𑑄 𑐳𑐩𑐸𑐡𑑂𑐬𑐫𑐵 𑐕𑐵𑐮𑐠𑐾𑑄 𑐫𑐵𑐣𑐵𑑅 𑐰𑑂𑐫𑐰𑐴𑐵𑐬 𑐫𑐵𑐎𑐾 𑐧𑐶𑐂𑐩𑐖𑑂𑐫𑐹 𑑋

𑐳𑐩𑐸𑐡𑑂𑐬𑐫𑐵 𑐕𑐵𑐮𑐟 𑐱𑐎𑑂𑐟𑐶𑐱𑐵𑐮𑐷 𑐖𑐸𑐂 𑐰 𑐀𑐣𑐶𑐫𑐣𑑂𑐟𑑂𑐬𑐶𑐟 𑐖𑐸𑐂 𑑋 𑐗𑐷𑐐𑐸 𑐧𑐳𑐫𑑂 𑐩𑐡𑐹𑐐𑐸 𑐰𑐶𑐔𑐵𑑅 𑐣𑑄 𑐀𑐠𑐾𑐴𑐾 𑐖𑐸𑐂 𑑋 𑐗𑐷𑐳𑑄 𑐳𑑀𑐔𑐾 𑐫𑐵𑐫𑐾𑐦𑐸 𑐎𑐶 𑐖𑐶𑑄 𑐠𑑅𑐐𑐸 𑐳𑑀𑐔𑐵𑐃𑐫𑐵𑐟 𑐐𑐸𑐎𑐠𑑄 𑐣𑐶𑐫𑐣𑑂𑐟𑑂𑐬𑐶𑐟 𑐫𑐵𑐫𑐾𑐦𑐂, 𑐠𑑂𑐰 𑐮𑐵 𑐣𑑂𑐴𑑂𑐫𑐵𑐐𑑂𑐐𑐸 𑐂𑐮𑐫𑑂 𑐣𑑄 𑐰𑐫𑐾𑐦𑐸 𑑋 𑐏𑑅, 𑐟𑐬 𑐠𑑂𑐰 𑐏𑑃𑐫𑐵𑐟 𑐠𑐸𑐎𑐠𑑄 𑐣𑑄 𑐠𑐸𑐂𑐎𑐾 𑐦𑐂 𑑋 ‘𑐗𑐷𑐳𑑄 𑐠𑑅𑐐𑐸 𑐕𑑂𑐫𑑄 𑐔𑑂𑐰𑐳𑑄 𑐧𑑂𑐰𑐂𑐥𑐶𑑄 𑐥𑐱𑐸𑐥𑑄𑐎𑑂𑐲𑐷𑐫𑐵𑐟 𑐥𑐣𑐾 𑐦𑐂𑐩𑐏𑐸, 𑐟𑐬 𑐄𑐥𑐶𑑄 𑐥𑐱𑐸𑐥𑑄𑐎𑑂𑐲𑐷𑐫𑐵𑐟 𑐠𑑅𑐐𑐸 𑐕𑑂𑐫𑐣𑐫𑑂 𑐕𑐾𑑃 𑐡𑐫𑐾𑐎𑐷𑐐𑐸𑐥𑐵𑐏𑐾𑑄 𑐢𑐵𑑅𑐳𑐵 𑐀𑐰𑐱𑑂𑐫 𑐣𑑄 𑐥𑐣𑐾𑐦𑐸 𑑋’

𑐣𑑂𑐴𑐫𑐐𑐹– 𑐱𑐵𑐣𑑂𑐟𑐶 𑐰 𑐳𑑁𑐴𑐵𑐬𑑂𑐡𑐥𑐹𑐬𑑂𑐞 𑐮𑐎𑐳𑐫𑑂 𑐩𑑂𑐰𑐵𑐫𑐾𑐣𑐸

𑐰𑐶𑐖𑐫𑐷 𑐨𑐵𑐰𑑄 𑐑𑐺𑐞𑐵𑐫𑐵𑐟 𑐖𑐣𑑂𑐩 𑐧𑐶𑐂 𑑋 𑐠𑐸𑐎𑐶𑑄 𑐖𑐷𑐰𑐣𑐫𑐵𑐟 𑐡𑐸𑑅𑐏𑐫𑑂 𑐠𑑂𑐫𑑄𑐎𑐵𑐧𑐶𑐂 𑑋 𑐴𑐵𑐬 𑐰 𑐖𑐷𑐟𑐳𑐶𑐧𑐾𑑄 𑐟𑐵𑐥𑐵𑐎𑑂𑐎 𑐔𑑂𑐰𑑄𑐳𑐵 𑐖𑐎 𑐮𑐳𑐟𑐵 𑐰 𑐱𑐵𑐣𑑂𑐟𑐶𑐥𑐹𑐬𑑂𑐰𑐎𑑄 𑐩𑑂𑐰𑐵𑐫𑐾𑐦𑐂 𑑋 𑐠𑑅𑐐𑐸 𑐩𑐣𑐫𑑂 𑐕𑐸 𑐮𑐸𑐫𑐵𑐰𑐂 𑐰 𑐖𑐎 𑐩𑐵𑐮𑐾𑐐𑐸 𑐣𑐶𑐟𑐶𑑄 𑐥𑐶𑐣𑐾 𑐳𑑂𑐰𑐫𑐾𑐩𑐟𑐾 𑑋 𑐐𑐸𑐧𑐮𑐾𑑄 𑐐𑐸𑐧𑐮𑐾𑑄 𑐗𑐷𑐥𑐶𑑄 𑐫𑐠𑐵𑐬𑑂𑐠𑐟𑐵 𑐰 𑐱𑐵𑐣𑑂𑐟𑐶𑐥𑐵𑐏𑐾𑑄 𑐟𑐵𑐥𑐵𑐎𑑂𑐎 𑐔𑑂𑐰𑐣𑐾𑐐𑐸 𑐣𑐶𑐟𑐶𑑄 𑐖𑐎 𑐕𑐸𑑄 𑐏𑑃 𑐔𑐵𑐫𑐾𑐖𑐸𑐫𑐵𑐔𑑂𑐰𑑄𑐐𑐸 𑐖𑐸𑐂 𑑋 𑐱𑐵𑐣𑑂𑐟𑐶 𑐢𑐿𑐐𑐸 𑐕𑐸𑑄 𑐣𑑂𑐴𑐹𑐐𑐸 𑐖𑐵𑐐𑐶𑐬 𑐩𑐏𑐸, 𑐱𑐵𑐣𑑂𑐟𑐶 𑐁𑐣𑐣𑑂𑐡 𑐢𑐿𑐐𑐸 𑐣𑑂𑐴𑐹𑐐𑐸 𑐕𑐾𑑃 𑐰𑐵 𑐣𑑂𑐴𑐹𑐐𑐸 𑐐𑐵𑐜𑐷 𑐩𑐏𑐸, 𑐣 𑐎𑐶 𑐣𑑂𑐴𑐹𑐐𑐸 𑐰𑐿𑐰𑐵𑐴𑐶𑐎 𑐳𑐩𑑂𑐧𑐣𑑂𑐢 𑐴𑐾 𑐏𑑅 𑑋 𑐳𑐸𑐏 𑐰 𑐱𑐵𑐣𑑂𑐟𑐶 𑐮𑐶𑐳𑐾𑑄 𑐁𑐣𑐣𑑂𑐡 𑐢𑐿𑐐𑐸 𑐏 𑐠𑑅 𑐡𑐸𑐣𑐾 𑐴𑐾 𑐡𑐂𑐐𑐸 𑐏𑑃 𑐏𑑅 𑑋

𑐔𑑂𑐫𑐵𑐐𑐹– 𑐎𑐺𑐟𑐖𑑂𑐘 𑐖𑐸𑐂𑐣𑐸

‘𑐳𑑂𑐰𑐵𑐳𑑂𑐠𑑂𑐫 𑐢𑐿𑐐𑐸 𑐡𑐎𑐮𑐾 𑐟𑑅𑐢𑑄𑐐𑐸 𑐄𑐥𑐴𑐵𑐬 𑐏𑑅, 𑐳𑐣𑑂𑐟𑐸𑐲𑑂𑐚𑐶 𑐡𑐎𑐮𑐾 𑐟𑑅𑐢𑑄𑐐𑐸 𑐢𑐣 𑐏𑑅 𑑋’

𑐳𑐡𑐵𑑄 𑐮𑐸𑐩𑑄𑐎𑐾, 𑐖𑐷𑐰𑐣𑐫𑑂 𑐣𑑂𑐴𑑂𑐫𑐵𑐧𑐮𑐾𑑄 𑐕𑐸𑑄 𑐣𑑄 𑐕𑐸𑑄 𑐖𑐸𑐂, 𑐐𑐸𑐎𑐶𑐫𑐵 𑐣𑐶𑐟𑐶𑑄 𑐗𑐷𑐥𑐶𑑄 𑐎𑐺𑐟𑐖𑑂𑐘 𑐖𑐸𑐂𑐩𑐵𑑅 𑑋 𑐩𑑂𑐴𑐶𑐐𑑅 𑐧𑐴𑐣𑐷 𑐡𑐾𑐣𑐵𑐔𑑂𑐰𑑄𑐥𑐶𑑄 𑐳𑐎𑐮𑐳𑐶𑐣𑑄 𑐠𑑁𑑄𑐫𑐵 𑐳𑐸𑐠 𑐏𑐣𑐷𑐐𑐸 𑐖𑐸𑐂𑐩𑐏𑐸 𑑋 𑐀𑐠𑐾𑐴𑐾, 𑐁𑐥𑐵𑐮𑑄 𑐩𑐣𑐹𑐟 𑐠𑑁𑑄 𑐕𑐸𑑄 𑐣𑑄 𑐕𑐸𑑄 𑐮𑑂𑐰𑐔𑑄 𑐎𑐫𑐵𑑅 𑐐𑑂𑐰𑐵𑐬𑐵𑐟𑐸𑐮𑐵𑐔𑑂𑐰𑑄𑐐𑐸 𑐖𑐸𑐂𑐦𑐸 𑑋 𑐀𑐠𑐾𑐴𑐾, 𑐖𑐷𑐰𑐣𑐫𑑂 𑐳𑐡𑐵𑑄 𑐕𑐸𑑄 𑐣𑑄 𑐕𑐸𑑄 𑐖𑐸𑐂, 𑐐𑐸𑐎𑐶𑐫𑐵 𑐣𑐶𑐟𑐶𑑄 𑐗𑐷𑐳𑑄 𑐠𑑅𑐟 𑐎𑐺𑐟𑐖𑑂𑐘 𑐫𑐵𑐣𑐵𑐟𑐫𑐾𑐩𑐵𑑅 𑑋 𑐟𑑅𑐢𑑄𑐐𑐸 𑐴𑐺𑐡𑐫𑑄 𑐴𑐾 𑐗𑐷𑐟 𑐟𑑅𑐢𑑄 𑐫𑐵𑐂 𑑋

𑐐𑐸𑑄𑐐𑐹– 𑐗𑐷𑐳𑑄 𑐳𑑂𑐫𑐹𑐐𑐸 𑐏𑑃𑐫𑑂 𑐳𑐡𑐵𑑄 𑐳𑐟𑑂𑐫 𑐖𑐸𑐂𑐣𑐸

‘𑐐𑐠𑐾 𑐕𑐸𑑄 𑐟𑑅𑐐𑑂𑐰𑑅𑐐𑐸 𑐥𑐟𑑂𑐠𑐬𑐫𑐵𑐟 𑐦𑐳𑑄 𑐥𑐸𑐂𑐎𑐾 𑐦𑐂𑐩𑐏𑐸, 𑐀𑐠𑐾𑐴𑐾 𑐖𑑂𑐘𑐵𑐣𑐷 𑐩𑐣𑐸 𑐥𑑂𑐬𑐱𑑄𑐳𑐵 𑐰𑐵 𑐁𑐬𑑀𑐥𑑄 𑐟𑐣𑐷𑐩𑐏𑐸 𑑋’

𑐗𑐷𑐳𑑄 𑐁𑐥𑐵𑐮𑑄 𑐏𑑃 𑐳𑐷𑐎𑐾𑐦𑐸, 𑐟𑐬 𑐗𑐷𑐳𑑄 𑐳𑐡𑐵𑑄 𑐠𑑅𑐥𑐶𑐣𑑂𑐳𑑄 𑐳𑑂𑐫𑐹𑐐𑐸 𑐴𑐾 𑐏𑑃 𑐮𑑂𑐴𑐵𑐂𑐩𑐏𑐸 𑑋 𑐫𑐡𑐶 𑐗𑐷𑐥𑐶𑑄 𑐮𑑃𑐥𑐸 𑐡𑐮 𑐢𑐵𑑅𑐳𑐵 𑐗𑐷𑐳𑑄 𑐗𑐷𑐟 𑐕𑐸 𑐫𑐵𑐫𑐾𑐐𑐸 𑐩𑐳𑐶𑐫𑐵 𑐡𑑅𑐐𑐸 𑐩𑐏𑐸, 𑐠𑑂𑐰 𑐠𑐸𑐎𑐠𑑄 𑐖𑐸𑐂 𑐕𑐵𑐫𑑂 𑐢𑐵𑑅𑐳𑐵 𑐗𑐷𑐳𑑄 𑐰 𑐖𑑂𑐫𑐵 𑐩𑐫𑐵𑐣𑐵 𑐐𑐸𑐐𑐸 𑐗𑐷𑐳𑑄 𑐳𑑂𑐫𑐹𑐐𑐸 𑐏𑑅, 𑐗𑐷𑐳𑑄 𑐫𑐵𑐫𑐾𑐩𑐵𑑅𑐐𑐸 𑐏𑑅 𑑋 𑐠𑑅𑐥𑑂𑐬𑐟𑐶 𑐳𑐡𑐵𑑄 𑐳𑐟𑑂𑐫 𑐖𑐸𑐂𑐣𑐸 𑑋

𑐗𑐶𑐐𑐹– 𑐮𑐳𑐟𑐵 𑐂𑐣𑐾𑐣𑐸

‘𑐕𑐐𑐹 𑐩𑐿𑐣𑐩𑐟𑐥𑐵𑐏𑐾𑑄 𑐡𑑂𑐰𑐮𑑄𑐡𑑂𑐰𑑅 𑐩𑐿𑐣𑐩𑐟 𑐔𑑂𑐫𑐵𑐎𑐾𑐦𑐂, 𑐰 𑐠𑐸𑐎𑐶𑑄 𑐄𑐐𑐸 𑐩𑐿𑐣𑐩𑐟𑐫𑐵 𑐖𑐷𑐰𑐣 𑐔𑐷𑐴𑐵𑐎𑑅 𑐖𑐸𑐂𑐩𑐏𑐸 𑑋 𑐮𑐳𑐟𑐵 𑐣𑑄 𑐂𑐣𑐵𑑅 𑐎𑐩 𑐖𑐸𑐂𑐩𑐏𑐸, 𑐩𑑂𑐴𑑀 𑐖𑐸𑐂𑐩𑐏𑐸 𑑋’

𑐠𑑂𑐰 𑐏𑑅𑐐𑐸 𑐏𑑃 𑐏𑑅, 𑐮𑐳𑐟𑐵 𑐢𑐿𑐐𑐸 𑐏𑑃 𑐐𑐸𑐧𑐮𑐾𑑄 𑐣𑑄 𑐂𑐣𑐵𑑅 𑐎𑐩 𑐖𑐸𑐂𑐩𑐏𑐸 𑐟𑐬 𑐗𑐣𑑂 𑐀𑐥𑑂𑐰𑐫𑐵𑑅 𑐰𑐂, 𑐐𑐸𑐧𑐮𑐾 𑐂𑐣𑐾𑐐𑐸 𑐫𑐵𑐂 𑑋

𑐠𑑅𑐐𑐸 𑐮𑐳𑐟𑐵 𑐩𑐾𑐥𑐶𑐣𑐶𑐐𑐸 𑐣𑑂𑐴𑑂𑐫𑑅𑐣𑐾 𑐳𑐸𑐔𑐸𑐎𑐾𑐩𑐟𑐾, 𑐮𑐳𑐟𑐵 𑐂𑐣𑐾𑐐𑐸 𑐫𑐵 𑐰 𑐠𑑅𑐐𑐸 𑐖𑑅𑐏𑑅𑐫𑐵 𑐮𑐎𑐳 (𑐰𑐵𑐟𑐵𑐰𑐬𑐞)𑐫𑐵𑐟 𑐀𑐗 𑐧𑐵𑑄𑐮𑐵𑐎𑐾𑐣𑐸 𑑋